Jehova Chuan Kan Ni Tin Mamawh Min Pe
Jehova Chuan Kan Ni Tin Mamawh Min Pe
“Tuilairap angin . . . awm suh u. . . . Chûng chu in mamawh tih in Pain a hre reng si a.”—LUKA 12:29, 39.
1. Engtin nge Jehova chuan a thil siam nungchate chu a châwm?
CHAWNGZAWNG emaw, sava dang emawin bawlhhlawh mai mai anga lang thil a chuk mawlh mawlh lai i thlîr ngai em? Lei a chukna aṭangin ei tûr eng tak hmu ang maw, tiin i ngaihtuah mai thei a ni. Tlâng Chunga a Thusawiah Isua chuan Jehova’n savate a châwm dân aṭangin zir theih kan nei tih a târ lang. Heti hian a sawi a ni: “Chunglêng savate hi en rawh u; buh an tuh lo va, an ât hek lo, buh inah an senglût hek lo; nimahsela in Pa vâna mi chuan a châwm si a. Nangni chu anni ai chuan nasa takin in hlu zâwk lo vem ni?,” tiin. (Matthaia 6:26) Jehova chuan a thil siam zawng zawngte chu kawng mak tak takin a châwm vek a ni.—Sâm 104:14, 21; 147:9.
2, 3. Vawiina ei khawp tûr chaw dîl tûra min zirtîrna aṭangin, thlarau lamah zir tûr eng nge kan hmuh?
2 A nih leh, engvângin nge Isua’n Lal ṭawngṭainaah: “Vawiinah hian kan ei khawpin chaw min pe ang che,” tih thu hi a telh? (Matthaia 6:11) He dîlna mâwltê aṭang hian thlarau lam thil zir tûr thûk tak a awm a ni. A hmasa berin, Jehova chu kan mamawh thilte min Petu-Ropui a nihzia min hriattîr a. (Sâm 145:15, 16) Mihringin a phun thei a, a enkawl thei bawk a; mahse, Pathian chauhvin thlarau lam leh tisa lamah a ṭhantîr thei a ni. (1 Korinth 3:7) Kan thil ei leh inte hi Pathian thilpêk vek a ni a. (Tirhkohte 14:17) Kan nî tin mamawh min pe tûra dîlna chuan chutianga min châwmnate kan hlutzia a târ lang a ni. Mahse, chutiang dîlna chuan thawk thei kan nih phawt chuan, thawk tûra mawhphurhna kan neih ata min chhuah chuang lo.—Ephesi 4:28; 2 Thessalonika 3:10.
3 A pahnihnaah chuan, ‘vawiina ei khawp tûr chaw’ kan dîlna chuan nakin hun atân kan lungkham lutuk tûr a ni lo tih a târ lang. Isua chuan heti hian a sawi zawm a ni: “‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna mi’n a hre reng a ni. A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia. Chutichuan a tûk atân lungkham suh u, atûk chuan ama tân a lungkham chawp dâwn si a,” tiin. (Matthaia 6:31-34) ‘Vawiina ei khawp tûr chaw’ dîla ṭawngṭai chuan ‘Pathian ngaihsakna tel lungawina’ neia nun dân a siam a ni.—1 Timothea 6:6-8.
Ni Tina Thlarau Lam Chaw
4. Isua leh Israelte nuna eng thil thlengin nge thlarau lam chaw ei a pawimawhzia sawi uar?
4 Nî tina chaw ei tûr kan dîlna chuan thlarau lam chaw nî tina kan mamawhzia min hriatchhuahtîr tûr a ni bawk. Hun rei tak chaw a nghei hnuah rilṭâm hle mah se, Isua chuan lung chhanga chantîr tûra Setana thlêmna chu a hnâwl a, heti hian a ti a ni: “‘Mihring hi chhang chauhvin an nung lo vang a, Pathian kaa thu tin chhuakin an nung zâwk ang’ tih ziak a ni” tiin. (Matthaia 4:4) Isua chuan Israelte hnêna: “Mihring hi chhang chauhvin an nung lo va, LALPA kâa thu tin chhuakin an nung zâwk a ni tih a hriattîr theih nân che u [Jehova chuan] a tihhrehawm che u a, in ṭâmte a phal a, in hriat ngai loh in pi leh pute pawhin an hriat ngai bîk loh manna chuan a châwm che u,” titu zâwlnei Mosia thusawi chu a la chhuak a ni. (Deuteronomy 8:3) Jehova’n Israelte manna a pêk dân chuan tisa lam chaw mai bâkah thlarau lama zir tûr pawh a pe bawk. Thlarau lama zir tûr a pêk pakhat chu hei hi a ni, anni chuan “ni tin ni khat atâna chanvo tâwk chauh zêl” an chhar tûr a ni a. Nî tina an mamawh aia tam an chhar chuan a rimchhia a, a lung zêl a ni. (Exodus 16:4, 20) Mahse, a ni ruk nîah Sabbath nî atâna an chhar chuan chutiangin a chhe lo va, a lung hek lo. (Exodus 16:5, 23, 34) Chuvângin, manna chuan thuâwih an ngai a ni tih leh an nunna chu chhangah chauh ni lo, “LALPA kâa thu tin chhuak” ngaih pawimawhnaah a innghahzia an thinlungah a tuh a ni.
5. Engtin nge Jehova’n nî tin thlarau lam chaw min pêk?
5 Chutiang bawkin keini pawhin Jehova’n a Fapa hmanga thlarau lam chaw min pêkte chu nî tin kan ei a ṭûl a. Chutianga kan ei theih nân Isua chuan “bawi rinawm, fing tak” chu a chhûngte hnêna “a hun apianga an chaw chan tûr” semsak tûrin a ruat a ni. (Matthaia 24:45) Bawi rinawm, fing tak pâwl chuan Bible zirna ṭanpuitu thlarau lam chaw hnianghnâr tak min pêk bâkah, nî tina Bible chhiar tûr pawhin min fuih bawk a ni. (Josua 1:8; Sâm 1:1-3) Isua angin, keini pawhin Jehova duhzâwng zir tûr leh ti tûra nî tina theihtâwp chhuahin, thlarau lam chaw kan ei thei a ni.—Johana 4:34.
Kan Sualte Ngaihdamna
6. Eng bâ chungchângah nge ngaihdam kan dîl a, engtia kan tihin nge Jehova’n paih bo a inhuam?
6 Lal ṭawngṭainaa a dawta thil dîl chu: “Kan batte hi min ngaidam ang che. Keini pawhin kan englo bâte kan ngaihdam tâk ang khân,” tih a ni. (Matthaia 6:12) Hetah hian Isua’n pawisa bat chungchâng a sawi lo. Kan sualte ngaihdam chungchâng a sawi zâwk a ni. Luka ziak Lal ṭawngṭainaah he dîlna hi heti hian kan chhiar a ni: “Kan sualte min ngaidam ang che, keini pawhin kan englo bâte zawng zawng kan ngaidam ṭhîn a ni,” tiin. (Luka 11:4) Chutiang chuan, sual kan tih hian Jehova hnênah bâ nei ang kan lo ni ṭhîn a ni. Mahse, kan inchhîr tak zet a, “hawikîr leh” a, Krista tlanna inthawina rinna ṭanchhana ngaihdam kan dîl chuan, hmangaihnaa khat kan Pathian chuan “thai bo,” a nih loh leh paih bo hmak chu a peih reng a ni.
7. Engvângin nge nî tin ngaihdam dîlin kan ṭawngṭai ang?
7 Kawng dang aṭanga thlîr chuan, Jehova tehna felte kan tlin loh hian kan sual a ni. Sualna kan rochun avângin, kan vai hian ṭawngkamah te, thiltihah te, leh ngaihtuahnaahte kan sual emaw, kan tih tûr kan ti lo emaw mai ṭhîn. (Thuhriltu 7:20; Rom 3:23; Jakoba 3:2; 4:17) Chuvângin, thil tihsual kan neih kan hria emaw, hre lo emaw pawh ni se, kan nî tin ṭawngṭainaah kan sualte ngaihdam dîlna chu kan telh ziah a ṭûl a ni.—Sâm 19:12; 40:12.
8. Ngaihdam dîla ṭawngṭaina chuan eng nge min tihtîr ang a, chu chuan eng hlâwkna nge a thlen dâwn?
8 Ngaihdam dîla ṭawngṭaina chu ngun taka mahni inenfiahna te, inlamlêtna te, leh Krista thisen chhuakin chhandam theihna a nei tih rinna ṭanchhana sual inpuanna te hian a zui tûr a ni. (1 Johana 1:7-9) Kan tih tak zetzia lantîr nân, ngaihdam dîla kan ṭawngṭaina chu ‘sim hming pu tlâka thiltihin’ kan thlâwp tûr a ni. (Tirhkohte 26:20) Chutianga kan tih chuan kan sualte Jehova’n min ngaidam ang tih kan ring thei a ni. (Sâm 86:5; 103: 8-14) A rah chhuah chu “Pathian thlamuanna, rilru rêng rênga hriat sên loh” rilru thlamuanna a ni a, chu chuan “[kan]thinlung leh [kan] ngaihtuahnate chu Krista Isuaah chuan [min] vênsak ang.” (Philippi 4:7) Mahse, Isua Lal ṭawngṭaina chuan kan sualte ngaihdam a nih theih nâna kan tih tûr dangte pawh min zirtîr a ni.
Ngaihdam Ni Tûr Chuan, Kan Ngaihdam A Ngai
9, 10. (a) Eng thu nge Isua’n Lal ṭawngṭainaah a sawi belh a, chu chuan eng nge a sawi pawimawh? (b) Engtin nge Isua’n mi dangte kan ngaihdam a pawimawhzia tehkhin thu dang a sawi belh?
9 Mak tak maiin, “kan batte hi min ngaidam ang che. Keini pawhin kan englo bâte kan ngaihdam tâk ang khân,” tih hi Isua’n Lal ṭawngṭaina zînga a hrilhfiah awmchhun a ni. Ṭawngṭaina a zawh chuan heti hian a sawi zawm a: “Mi an bawhchhiatte in ngaihdam chuan, in Pa vâna miin a ngaidam ve ang che u. Nimahsela mite in ngaihdam si loh chuan, in Pain in bawhchhiatte a ngaidam bîk lo vang,” tiin. (Matthaia 6:14, 15) Chutiang chuan, Isua chuan Jehova ngaihdamna kan dawn leh dawn loh chu mi dangte ngaihdam kan inpeih leh peih lovah a innghat tih chiang takin a sawi a ni.—Marka 11:25.
10 Hun dangah pawh, Isua chuan Jehova ngaihdamna kan beisei dâwn chuan mite kan ngaihdam a ngai tih târ langtu tehkhin thu a sawi a. A chhiahhlawhin pawisa tam tak a bat ngaidamtu lal pakhat chungchâng tehkhin thu a sawi a ni. Lal chuan chu pa vêk chu a hnuah nasa takin a hrem leh a ni, a chhiahhlawhpuiin pawisa tlêm tê a bat a ngaihdam duh loh avângin. Isua chuan a tehkhin thu sawi chu: “Mi tinin thinlung taka in unaute in ngaihdam loh chuan ka Pa vâna mi pawhin chutiang bawkin in chungah a ti ve ang” tiin a titâwp a ni. (Matthaia 18:23-35) Zir tûr chu a chiang ta khawp mai: Jehovan’n kan sual a ngaihdam chu tupawhin kan chunga an tihsual engpawh aiin nasa takin a tam zâwk a ni. Chu bâkah, Jehova chuan nî tinin min ngaidam a. Chuvângin, mi dangin a châng chânga min tihthinurnate chu kan ngaidam thei a ni.
11. Min ngaidam tûra Jehova kan beisei dâwn chuan, tirhkoh Paula fuihna thu eng nge kan zawm ang a, chu chuan eng rah nge a chhuah dâwn?
11 Tirhkoh Paula chuan heti hian a lo ziak a: “Inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u,” tiin. (Ephesi 4:32) Inngaihdam tawnna chuan Kristiante zîngah remna a awmtîr a. Paula chuan heti hian min fuih belh a ni: “Pathian mi thlan, mi thianghlim leh duh takte angin lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u, tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u,” tiin. (Kolossa 3:12-14) Hêng zawng zawngte hi Isua min zirtîr ṭawngṭai dân tûr: “Kan batte hi min ngaidam ang che. Keini pawhin kan englo bâte kan ngaihdam tâk ang khân” tihah hian a tel vek a ni.
Thlêmna Hnuaia Inhumhimna
12, 13. (a) Isua Lal ṭawngṭainaa thil dîl hnuhnûng ber dawttu chu eng tihna nge a nih theih loh? (b) Thlêmtu ropui chu tunge ni a, thlêmnaa min hruai lût lo tûra ṭawngṭai chu eng tihna nge?
12 Isua Lal ṭawngṭainaa thil dîl hnuhnûng ber dawttu chu: “Sual tûra thlêmnaah min hruai lût suh la,” tih a ni. (Matthaia 6:13) Hetah hian Isua’n Jehova hnênah min thlêm lo tûrin kan dîl tûr a tihna a ni em? A ni thei lo, a chhan chu zirtîr Jakoba chu: “Tuman thlêmna an tawh laiin, ‘Pathian thlêm ka ni’ ti suh se; Pathian chu sual thlêm rual a ni lo, amah pawhin tumah a thlêm ngai lo” tia ziak tûra thâwk khum a nih avângin. (Jakoba 1:13) Chu bâkah, fakna hla phuahtu chuan heti hian a ziak bawk a: “LALPA, nangin khawlohnate i chhinchhiah chuan, Aw LALPA, tunge ding ang le?” tiin a ziak bawk. (Sâm 130:3) Jehova chuan kan thil tihsual hmuh tumin min châng reng lo va, tlu tûrin min thlêm ngai bawk hek lo. Chuti a nih chuan, he Lal ṭawngṭaina hi eng tihna nge ni ta ang?
13 Tlu tûra min thlêmtu, ngamthlêmnaa min awh tumtu, leh min ei tumtu chu Diabol-Setana a ni. (Ephesi 6:11) Ani chu Thlêmtu ropui a ni a. (1 Thessalonika 3:5) Thlêmnaa min hruai lût lo tûra kan ṭawngṭaiin, thlêmna kan tawh huna kan tlûk phal lo tûrin Jehova hnênah kan dîl tihna a ni. “Setanan min dinchan khalh” loh nân leh a thlêmna hneha kan awm loh nâna min ṭanpui tûrin kan dîl tihna a ni bawk. (2 Korinth 2:11) “Chungnungbera bihrûkna hmuna” awm reng a, an thiltih zawng zawnga Jehova lal chungnunna pawmtute tâna thlarau lam vênhimna a tiam chu kan dawn reng theih nân kan ṭawngṭai a ni.—Sâm 91:1-3.
14. Thlêmna kan tawh huna Jehova lam kan hawi chuan, Anin min thlahthlam loh tûrzia chu Paula’n engtin nge min hrilh?
14 Chu chu kan thinlung tak taka kan duhthusâm a nih a, kan ṭawngṭaina leh thiltiha kan lantîr phawt chuan, Jehova’n min thlahthlam ngai lo vang tih kan ring tlat thei a ni. Tirhkoh Paula chuan: “Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin min tiam a ni.—1 Korinth 10:13.
“Mi Sual Lakah Chuan Min Chhandam Zâwk Ang Che”
15. Engvângin nge misual laka min chhandam tûra ṭawngṭai chu tûn hma zawng aia a pawimawh zual?
15 Kristian Grik Pathian Lehkha Thu kut ziak rinawm berin a sawi dânin, Isua Lal ṭawngṭaina chu: “Mi sual lakah chuan min chhandam zâwk ang che,” tia tihtâwp a ni. * (Matthaia 6:13) He tâwpna hunah hian Diabola laka vênhimna chu kan mamawh lehzual a ni, a chhan chu Setana leh a ramhuaihote vân aṭanga paih thlâk an ni a, hriak thih la bâng, “Pathian thupêkte zâwma Isua hriattîrna thu pawmte” leh an ṭhian “mipui tam tak” chungah chuan indo an puan vâng a ni. (Thu Puan 7:9; 12:9, 17) Tirhkoh Petera pawhin: “Ngaihven ula, fimkhur rawh u; in khingpui Diabola chu sakeibaknei rûm ṭhîn angin a ei theih tûr zawngin a phi ruai ṭhîn; . . . ring nghet taka awmin amah chu do rawh u,” tiin Kristiante chu a fuih a ni. (1 Petera 5:8, 9) Setana chuan kan thuhrilh rawngbâwlna chu tihtâwp a duh a, leia a mi hman—sakhaw lam emaw, sumdâwnna lam emaw, a nih loh leh politics lam emaw—te hmangin min tihṭhaih a tum a ni. Mahse, kan din ngheh phawt chuan, Jehova chuan min chhanhim ang. Zirtîr Jakoba chuan heti hian a ziak a ni: “Pathian thu thuin awm rawh u; amaherawhchu Diabola dodâl rawh u, tichuan a tlân bosan ang che u,” tiin.—Jakoba 4:7.
16. Jehova chuan a chhiahhlawh thlêmna tâwkte chhan chhuah nân eng hmanrua nge a neih?
16 Jehova chuan a Fapa chu thlêma a awm a phal a. Mahse, Isua’n Pathian Thu chu inhumhim nâna hmanga Diabola a dodâl hnu chuan, Jehova chuan amah tichak tûrin vântirhkoh a tîr a ni. (Matthaia 4:1-11) Chutiang bawkin, rinna nei chung leh amah chu kan inhumhimna atâna hmang chunga kan ṭawngṭai chuan, Jehova chuan min ṭanpui tûrin a vântirhkohte a hmang ṭhîn. (Sâm 34:7; 91:9-11) Tirhkoh Petera chuan: “Lalpa chuan amah ngaihsaktute chu thlêmna ata chhan chhuah dân leh fel lote chu rorêl ni atân chuan hrem chunga khêk dân a hria,” tiin a ziak a ni.—2 Petera 2:9.
Chhanchhuahna Pumhlûm A Hnai
17. Lal ṭawngṭaina min pein, Isua chuan engtin nge thilte chu a indawt thlapa a dah ṭheuh?
17 Lal ṭawngṭainaah chuan, Isua chuan thilte chu a indawt thlapin a dah ṭheuh va. Kan ngaih pawimawh ber chu Jehova hming thianghlim leh ropui tihthianghlim hi a ni tûr a ni a. Chu mi tihpuitlinna tûr hmanrua chu Messia Lalram a nih avângin, chu Lalram chu ṭha famkim lo mihring lalram, a nih loh leh sawrkâr zawng zawng ti chhe vek tûr leh Pathian duhzâwng vâna an tih anga leia tihtîr tûra lo thleng tûrin kan ṭawngṭai bawk a ni. Lei paradis-a chatuana nun kan beiseina chu Jehova hming tihthianghlimna leh lei leh vâna a lalchungnunna fel pawmnaah a innghat a ni. Hêng thil pawimawh ber berte dîla kan ṭawngṭai zawhah, kan nî tin mamawh te, sual ngaihdamna te, leh mi suaksual Diabol-Setana ngamthlêmna leh thlêmna laka chhamdamna te kan dîl thei a ni.
18, 19. Engtin nge Isua Lal ṭawngṭaina chuan kan beiseina chu ‘a tâwp thlenga nghet taka vawng tlat’ tûra harhvâng reng tûrin min ṭanpui ang?
18 Mi suaksual leh a kalhmang bawlhhlawh tak lak aṭanga chhanchhuahna hun chu a hnai tawh hle a. Setana chuan leiah, a bîk takin Jehova chhiahhlawh rinawmte chungah a ‘thinurna’ leihbuak nân “hun tlêm tê chauh” a nei tawh tih a hre chiang êm êm a ni. (Thu Puan 12:12, 17) Isua chuan “khawvêl tâwpna” chhinchhiahna hlâwm a pêkah, thilthleng phûrawm tak tak a sawi lâwk a, chûng zînga ṭhenkhat chu a la rawn thleng dâwn chauh a ni. (Matthaia 24:3, 29-31) Chûng thilte lo thleng kan hmuh hian, chhandam kan inbeiseina chu a chiang tawlh tawlh ang. Isua chuan: “Chûng thilte chu a lo thlen tirhin, en chho ula, dâk chhuak rawh u; in tlanna tûr chu a hnaih tâk avâgin,” a ti.—Luka 21:25-28.
19 Isua’n a zirtîrte hnêna a pêk Lal ṭawngṭaina tawi fel tak chuan tâwpna lo hnaih huna ṭawngṭainaa kan telh tûr thute chungchângah kaihhruaina ṭha tak min pe a ni. A tâwp thlengin Jehova chuan thlarau lam leh tisa lama kan nî tin mamawhte chu min pe zêl dâwn tih i ring tlat ang u. Ṭawngṭaia kan harhvân rengna chuan “kan rin chhan ṭantirhna kha a tâwp thlengin nghet taka kan vawn tlat” theih nân min ṭanpui ang.—Hebrai 3:14; 1 Petera 4:7. (w04 2/01)
[Footnote]
^ par. 15 Bible chhuak hlui zâwk ṭhenkhat, Sâpṭawnga chhuah King James Version angte chuan, Lal Ṭawngṭaina chu Pathian fakna thu chham: “Ram te, thiltihtheihna te, ropuina te chatuanin i ta a ni si a. Amen,” tiin an titâwp a ni. The Jerome Biblical Commentary chuan: “He Pathian fakna thu chham . . . hi [hmân lai kut ziak Pathian Lehkha Thu] rin tlâk a tam zâwkah chuan a chuang lo,” a ti.
Ennawn Nân
• ‘Vawiina kan ei khawp chaw’ kan dîl hian eng kan tihna nge?
• “Kan batte hi min ngaidam ang che. Keini pawhin kan englo bâte kan ngaihdam tâk ang khân,” tih ṭawngṭaina hi hrilhfiah rawh.
• Thlêmnaa min hruai lût lo tûra Jehova kan dîl hian eng kan tihna nge?
• Engvângin nge “mi sual lakah chuan min chhandam zâwk ang che” tia kan ṭawngṭai a ngaih?
[Zirlai Atâna Zawhnate]
[Phêk 11-naa milemte]
Ngaihdam nih kan duh chuan mi dangte kan ngaidam tûr a ni
[Phêk 9-naa Thlalâk Hawhtîrtu]
Lydekker