‘Lalpa, Ṭawngṭai Dân Min Zirtîr Ve Ta Che’
‘Lalpa, Ṭawngṭai Dân Min Zirtîr Ve Ta Che’
“A zirtîr mi pakhatin a hnênah, ‘Lalpa, ṭawngṭai dân . . . min zirtîr ve ta che,’ a ti a.”—LUKA 11:1.
1. Engvângin nge Isua zirtîr pakhat chuan ṭawngṭai dân zirtîr tûra a ngen?
VANTLANG kum chhiar C.E. 32 khân, ṭum khat chu Isua zirtîr pakhat chuan Isua ṭawngṭai lai a lo thlîr reng a. Thâwm nei lova a ṭawngṭai avângin, a Pa hnêna a thil dîl erawh a lo hre thei lo va. Mahse, a ṭawngṭai zawh chuan, ani chuan: “Lalpa ṭawngṭai dân . . . min zirtîr ve ta che,” a rawn ti a. (Luka 11:1) Engin nge chutianga dîltîr le? Ṭawngṭai chu Judate nunphung leh biaknaa tel ve rêng a ni a. Hebrai Pathian Lehkha Thu, Sâm-ah leh hmun dangahte chuan ṭawngṭaina tam tak a chuang a ni. Chuvângin, he zirtîr thil dîl chu a hriat ngai loh thil emaw, a tih ngai loh thil emaw a ni lo. Rinhlelrual lovin, ani chuan Juda sakhaw hruaitute puithu taka ṭawngṭai ṭhin dân chu a hre hneh êm êm a ni. Mahse, Isua ṭawngṭai lai a lo hmu a, a ṭawngṭai dân leh a hleih a hluaka intifel rabiho ṭawngṭai dân inthlauhzia chu a hre thei a ni ngei ang.—Matthaia 6:5-8.
2. (a) Engin nge Isua’n Lal ṭawngṭaina chu a ngai ngaia chhamnawn ṭhin atân a ti lo tih târ lang? (b) Engvângin nge ṭawngṭai dân hriat chu kan duh?
2 Thla 18 vêl liam taa Tlâng Chunga a Thusawiah, Isua chuan a zirtîrte chu ṭawngṭai dân tûr a lo hrilh tawh a. (Matthaia 6:9-13) Chutih lai chuan tûna zawhna zâwttu zirtîr hi a awm lo a ni ngei ang; chuvângin, Isua chuan Lal ṭawngṭainaa thu pawimawhte chu a hrilh nawn leh a ni. Heta langsâr êm êm mai chu, ṭawngṭai dân tûr a lo hrilh tawh chu a ngai ngaia a hrilh nawn leh lo hi a ni a, chu chuan ṭawngṭai dân tûr a hrilh chu ṭawngṭai apianga chham ziah tûr a ni lo tih a târ lang a ni. (Luka 11:1-4) A hming târ lan loh he zirtîr pakhat ang hian, kan ṭawngṭainain Jehova min hnaihtîr lehzual sauh thei tûra ṭawngṭai dân zirtîrna dawn chu kan duh a. Chuvângin, Lal ṭawngṭaina kimchang zâwk, tirhkoh Matthaia ziak chu i lo bih chiang ang u. Chutah chuan thil dîl pasarih a awm a, chûng zînga pathum chu Pathian thil tum chungchângah a ni a, a dang pali chu kan tisa lam leh thlarau lam mamawh chungchângah a ni. He thuziakah hian a hmasa pathumte hi kan ngaihtuah dâwn a ni.
Hmangaihna Nei Pa Ber
3, 4. Jehova chu kan “Pa” tia kan koh hian eng kan tihna nge ni?
3 Atîr aṭangin, Isua chuan Jehova nêna inlaichînna ṭha tak, zahawm tak si chu kan ṭawngṭainain a târ lang tûr a ni tih a sawi a. Chu tlâng chunga lo kalkhâwm a zirtîrte hlâwkpui atân bîka sawiin, Isua chuan Jehova chu “kan Pa vâna mi,” tia ko tûrin a hrilh a ni. (Matthaia 6:9) Mi thiam pakhat sawi dân chuan, Isua’n Hebrai ṭawng emaw, Aramaic ṭawng emaw pawh hmang se, “Pa” tih sawi nâna a ṭawngkam hman chu ‘naupang ṭawngkam’ nên a inhnaih hle a ni. Jehova chu Pa anga kohna chuan inlaichînna ṭha tak leh rinawm tak a kâwk a ni.
4 “Kan Pa,” tia kovin, Nunna Petu anga Jehova pawmtu, chhûngkaw hung tak zînga mi kan nihzia kan târ lang a ni. (Isaia 64:8; Tirhkohte 17:24, 28) Thlarauva hrin Kristiante chu “Pathian fate” anga pawm an ni a, a hnênah “Abba! (Ka pa!)” tiin an au thei a ni. (Rom 8:14, 15) Mi maktaduai tam takte chu an ṭhian rinawm nghette an lo ni a. Anni chuan an nun chu Jehova hnênah pumpêkin, an inpumpêkna chu baptisma changin an lantîr a ni. Hêng “berâm dang” te pawh hian Isua hmingin Jehova an hnaih thei a, “kan Pa,” tiin an ko ve thei a ni. (Johana 10:16; 14:6) Kan Pa vâna mi fak tûrin, kan chunga a ṭhatna avânga lâwm thu hrilh tûrin, leh min timangangtu harsatna kan tawhte hrilh tûrin ṭawngṭaiin kan pan thei reng a, ani’n min ngaihsak a ni tih kan ring tlat thei a ni.—Philippi 4:6, 7; 1 Petera 5:6, 7.
Jehova Hming Hmangaihna
5. Lal ṭawngṭaina bul inṭanna chu eng nge ni a, engvângin nge chu chu inâwm tak a nih?
5 Dîlna hmasa ber chuan a pawimawh dân indawtin a dah nghâl ṭhap a. Heti hian a sawi a ni: “I hming zahawm [“thianghlim,” NW] rawh se,” tiin. (Matthaia 6:9) A ni, Jehova hming tihthianghlimna chu kan dah pawimawh ber tûr a ni, amah kan hmangaih avâng leh a hming sawichhiata a awm kan hmuh duh loh avângin. Setana helna leh mihring tuak hmasa berte Pathian Jehova thu âwih lo tûra a thlêmthlûkna chuan Jehova hming a tichhia a, a lalchungnunna a kenkawh dânah rinhlelhna a siam a ni. (Genesis 3:1-6) Chu bâkah, chu mi hun aṭang chuan Jehova hming chu amah biaa inchhâlte thiltih leh zirtîrna zahthlâk tak takte hmanga tihchhiat a ni bawk.
6. Jehova hming thianghlim tûra kan ṭawngṭai chuan, eng nge kan tih loh vang?
6 Jehova hming tihthianghlim nâna kan ṭawngṭaina chuan lei leh vâna lalchungnunna thu buaia kan ṭan lam chu a târ lang—Jehova’n lei leh vân awp tûra dikna a neih chu kan thlâwp pumhlûm a ni tih chu. Jehova chuan lei leh vân chu amah an hmangaih avâng leh a hmingin a huam tel zawng zawng an hmangaih avânga a lalchungnunna fel tak hnuaia hlim tak leh châk taka intulûttu, finna nei thil siamtea tihkhah chu a duh a ni. (1 Chronicles 29:10-13; Sâm 8:1; 148:13) Jehova hming kan hmangaihna chuan chu hming thianghlim tichhe thei tûr thil engmah ti lo tûrin min vêng ang. (Ezekiela 36:20, 21; Rom 2:21-24) Lei leh vân leh a chhûnga chêngte remna chu Jehova hming tihthianghlimna leh hmangaihna avânga a lalchungnunnaa intukluhnaah a innghah avângin, “i hming thianghlim rawh se,” tia kan ṭawngṭaina chu amah fak nâna Jehova thiltumte a thleng famkim dâwn tih kan rinzia târ lanna a ni.—Ezekiela 38:23.
Kan Dîl Ber Lalram Chu
7, 8. (a) Isua’n ṭawngṭaia dîl tûra min zirtîr Lalram chu eng nge ni? (b) He Lalram chungchâng eng nge Daniela leh Thu Puan bu aṭanga kan zir?
7 Lal ṭawngṭainaa kan dîl a pahnihna chu: “I ram lo thleng rawh se,” tih hi a ni. (Matthaia 6:10a) Hei hi dîlna hmasa zâwk nên a inkûngkaih hnai hle. A hming tihthianghlim nâna Jehova thil hman chu Messia Lalram, a vân sawrkâr a ni a, chutah chuan a Fapa Isua Krista chu Lala ruat a ni. (Sâm 2:1-9) Daniela hrilh lâwkna chuan Messia Lalram chu “tlâng” ata laih chhuah “lung” angin a sawi a. (Daniela 2:34, 35, 44, 45) Tlâng chuan lei leh vâna Jehova lalchungnunna a entîr a; chuvângin, lungin a entîr Lalram chu lei leh vâna Jehova rorêlna lo lanna thar a ni. Hrilh lâwknaah chuan, lung chu “tlâng lian takah a lo chang a, lei pum hi a khat ta a,” chu chuan Messia Lalramin lei chungah rorêlin, Pathian thuneihna sâng tak ai a awh dâwn tih a târ lang a ni.
8 He Lalram sawrkâra Krista kawppui tûrte chu, lal leh puithiamte ni tûra “mihring zîng ata tlan” tawh, mi 1,44,000-te an ni. (Thu Puan 5:9, 10; 14:1-4; 20:6) Daniela chuan chûng mite chu “Chungnungbera mi thianghlimte” a ti a, anni chuan an Lu, Krista nên “ram leh rorêlna leh vân pum pui hnuaia ramte ropuina” an chang ang. Tin, “a ram chu ram hlun a ni a, awp ram zawng zawngin a rawng an bâwl ang a, amah an âwih ang.” (Daniela 7:13, 14, 18, 27) Hêng hi Isua’n a hnungzuitute hnêna dîl tûra a zirtîr vân lam sawrkâr sawifiahna inhmeh tak a ni.
Engvângin Nge Lalram Lo Thleng Tûra Ṭawngṭai Cheu A La Nih?
9. Engvângin nge Pathian Lalram lo thleng tûra dîl chu inâwm tak a nih?
9 Lal ṭawngṭainaah, Krista chuan Pathian Ram lo thleng tûra ṭawngṭai tûrin min zirtîr a. Bible hrilh lâwkna thleng famkim tawhte chuan Messia Lalram chu vânah kum 1914 khân din a ni tawh tih a târ lang. * Chuvângin, chu Lalram chu lo thleng tûra la ṭawngṭai cheu chu a âwm em? Âwm teh rêng mai. Daniela hrilh lâwknaah chuan, lungin a entîr Messia Lalram chu milim lian takin a entîr mihring siam politics sawrkârte nên an la inhmachhawn dâwn avângin. Chu lung chu milim lamah rawn lumin, a dêng ang a, a tidip vek ang. Daniela hrilh lâwkna chuan: “A lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk anga, kumkhuain a ding reng ang,” a ti.—Daniela 2:44.
10. Engvângin nge Pathian Lalram lo thlen hlân chu kan nghahhlelh?
10 Setana khawvêl suaksual tak kalha Pathian Lalram lo thlen hun chu hmuh hlân kan nghâkhlel êm êm a ni, chu chu Jehova hming tihthianghlimna leh Pathian lalchungnunna dodâltute paihchhuahna a nih dâwn avângin. Tih tak zetin: “I ram lo thleng rawh se,” tiin kan ṭawngṭai a, tirhkoh Johana rualin: “Amen. Lo kal ta che, Lalpa Isu,” kan ti a ni. (Thu Puan 22:20) Ni e, Jehova hming tithianghlim tûr leh A lalchungnunna thiam chantîr tûrin Isua chu lo kal rawh se, fakna hla phuahtu thu:“Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tih hi a lo thlen famkim theih nân.—Sâm 83:18.
‘I Duhzâwng Tih Ni Rawh Se’
11, 12. (a) Pathian duhzâwng “vâna an tih angin leia mi’n ti rawh se,” kan tih hian, eng nge kan dîl? (b) Jehova duhzâwng tih ni tûra kan ṭawngṭai hian eng awmze dang nge a neih?
11 Isua chuan a zirtîrte chu: “I duhzâwng vâna an tih angin leia mi’n ti rawh se,” tia ṭawngṭai tûrin a zirtîr leh a. (Matthaia 6:10) Jehova duhzâwng avângin lei leh vân hi a lo piang a. Vân lam thil siam thiltithei takte chu: “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tiin an au a ni. (Thu Puan 4:11) Jehova chuan “vâna thil awmte, lei chunga thil awmte” tân tum a nei a ni. (Ephesi 1:8-10) Pathian duhzâwng lo thleng tûra kan ṭawngṭai hian, a nihna takah chuan, Jehova hnênah a thiltum puitlin tûrin kan ngên a ni. Chu bâkah, Pathian duhzâwng lei leh vâna tiha a awm kan hmuh duhzia kan lantîr bawk a ni.
12 He ṭawngṭaina hmang hian, Jehova duhzâwng nêna inmila kan nun siam rem kan duhzia kan târ lang bawk. Isua chuan: “Mitîrtu duhzâwng tih leh, a hna thawh zawh tûr hi ka chaw a ni,” a ti. (Johana 4:34) Isua ang bawkin, Kristian inpumpêk tawh kan nih angin, Pathian duhzâwng tih chu nuam kan ti a. Jehova leh a Fapa kan hmangaihna chuan “mihring châkna lamah te awm tawh lovin, Pathian duhzâwng lamah . . . awm tawh” tûrin min chêttîr a ni. (1 Petera 4:1, 2; 2 Korinth 5:14, 15) Jehova duhzâwng nêna inkalh nia kan hriatte chu pumpelh hrâm hrâm kan tum a. (1 Thessalonika 4:3-5) Zirna neih nân leh Bible chhiar nâna hun leiin, “Lalpa duhzâwng engnge ni tih” kan zawng a, chutah chuan “ram chanchin ṭha” hrilh hi a tel a ni.—Ephesi 5:15-17; Matthaia 24:14.
Vâna Jehova Duhzâwng
13. Engtin nge Pathian duhzâwng chu Setana hel hma daihin tih a lo nih tawh?
13 Jehova duhzâwng chu a thlarau lam fa pakhat a hel a, Setana a lo nih hma daih khân, vânah a thleng famkim tawh a. Thufingte bu chuan Pathian Fapa piang hmasa ber chu finna mihring anga chantîrin a lo târ lang a ni. Chu chuan hun chhiar sên lohva rei chhûng Pathian Fapa mal neih chhun chu ‘Pathian bulah a hlim êm êm reng ṭhîn’ a, a Pa duhzâwng tih chu a hlimpui ṭhîn a ni tih a târ lang. A tâwp a tâwpah chuan, “vâna awmte, leia awmte, . . . hmuh theihte, hmuh theih lohte” siam nân, Jehova “mi themthiam” a lo ni a. (Kolossa 1:15-17; Thufingte 8:22-31) Jehova chuan a Thu, a nih loh leh Thusawitu angin a hmang a ni.—Johana 1:1-3.
14. Sâm 103 aṭangin vântirhkohte’n vâna Jehova duhzâwng an tihfamkimzia chungchâng eng nge kan hriat theih?
14 Fakna hla phuahtu chuan Jehova lalchungnunna chu thil siam zawng zawng aiin a sâng a, vântirhkoh tam takte chuan a zirtîrna leh a thupêkte an âwih ṭhîn tih a târ lang. Heti hian kan chhiar: “LALPA chuan a lalṭhutphah chu vânahte khian a tinghet a; a ram chuan engkim chungah ro a rêl a. A vântirhkohte u, a thu ngaithlaa, a thu zâwm ṭhîn, chaknaa ropuite u, LALPA chu fak rawh u: a sipaihote u, a duhzâwng ti ṭhîn, a rawngbâwltute u, LALPA chu fak rawh u. A rorêlna hmun zawng zawnga [lalchungnunnaa] a thiltih zawng zawngte u, LALPA chu fak rawh u,” tiin.—Sâm 103:19-22.
15. Engtin nge Isua’n Lalram thuneihna a channain vâna Pathian duhzâwng tihna chu a nghawng?
15 Joba lehkhabuin a târ lan angin, Setana chu a hel hnuah pawh vânah a la awm zui thei a ni. (Joba 1:6-12; 2:1-7) Nimahsela, Thu Puan bu chuan, Setana leh a ramhuaite chu vân ata hnawhchhuah a ni dâwn tih a hrilh lâwk a ni. Chu hun chu, Isua’n Lalram thuneihna a chan hun, kum 1914 hnu lawkah a lo thleng ta a. Chuta ṭang chuan, chûng hel hmanghote tân chuan vânah hmun rêng a awm tawh lo. Anni chu leia khuahkhirh an ni a. (Thu Puan 12:7-12) Jehova lalchungnunna chungchânga inhnial buaina rêng vânah hriat a ni tawh lo va, “Berâm No,” Isua Krista fakna aw leh Jehova laka intukluhna fakna awte chauh hriat a ni tawh a ni. (Thu Puan 4:9-11) Jehova duhzâwng chu vâna tih a ni tak zet a ni.
Lei Atâna Jehova Duhzâwng
16. Engtin nge Lal ṭawngṭaina chuan mihringte beiseina chungchânga Kristianna ram zirtîrna dik lohzia a târ lan?
16 Kristianna ram sakhuate chuan mi ṭha zawng zawng vânah an kal dâwn tiin, lei chu Pathian thiltum ata an paih chhuak a. Mahse, Isua chuan: “I ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭai tûrin min zirtîr thung. (Matthaia 6:10) Tharum thawhna te, rorêl dik lohna te, natna te, leh thihna tein a tlâk buak he leiah hian Jehova duhzâwng hi tihhlawhtlin a ni, a tih theih ang em le? Theih loh rêng rêng ang! Chuvângin, tirhkoh Petera chhinchhiah thutiam: “A thutiam ang chuan vân tharte [Krista awpna Messia Lalram] leh lei thar [mi fel awmhote], a chhûnga felna awmte chu kan beisei a ni,” tih nêna inremin, leia Pathian duhzâwng tih a nih nân ṭhahnemngai takin kan ṭawngṭai tûr a ni.—2 Petera 3:13.
17. Lei atâna Jehova thiltum hi eng nge ni?
17 Lei a siam khân, Jehova chuan tum a nei a. Zâwlnei Isaia chu hetianga ziak tûrin a thâwk khum a ni: “LALPA, vân siamtu chuan (ani chu Pathian, leilung hi dina siamtu chu a ni; ani chuan leilung hi a tinghet a, engmah lovah a siam lo va, mihring awm nân a din zâwk a ni) heti hian a ti si a: ‘Kei hi LALPA chu ka ni; a dang rêng rêng an awm lo,’” tiin. (Isaia 45:18) Pathianin mihring tuak hmasa ber chu paradis huanah a dah a, heti hian thu a pe a ni: “Chi tam tak thlaha lo pungin, leilung hi luah khat ula, in thu thuin awmtîr rawh u,” tiin. (Genesis 1:27, 28; 2:15) Chuvângin, Siamtu thiltum chu, leilung hi Jehova lalchungnunna hnuaia hlim taka intulût, mi fel ṭha famkimte’n an luah a, Krista lo tiam tawh Paradis-a chatuana an nun hi a ni tih a chiang hle.—Sâm 37:11, 29; Luka 23:43.
18, 19. (a) Pathian duhzâwng leia tih tak tak a nih hmain, eng nge tih ngai? (b) Isua Lal ṭawngṭaina hmêlhmang dang eng nge a dawta thuziakah kan bih chian dâwn?
18 Lei atâna Jehova duhzâwng chu a lalchungnunna dotute he leia an awm chhûng hian a thleng famkim thei ngai lo vang. Krista hruaina hnuaia thlarau lam sipaiho thiltithei takte hmangin, Pathian chuan ‘lei tichhetute chu a tichhe ve thung’ ang. Setana kalhmang suaksual zawng zawng chu, a sakhuana dik lo te, politics bawlhhlawh tak te, sumdâwnna duhâm leh dik lo tak te, leh chhiatna thlen thei a sipai te rualin chatuan atân nuai bo vek a ni ang. (Thu Puan 11:18; 18:21; 19:1, 2, 11-18) Jehova lalchungnunna chu thiamchantîr a ni ang a, a hming pawh tihthianghlim a ni ang. Chuvângin, “Kan Pa vâna mi, i hming zahawm [“thianghlim,” NW] rawh se. I ram lo thleng rawh se. I duhzâwng vâna an tih angin leia mi’n ti rawh se,” tia kan ṭawngṭai hian hêng zawng zawng hi kan dîl a ni.—Matthaia 6:9, 10.
19 Mahse, Lal ṭawngṭainaah chuan kan mi mal thil chungchâng pawh kan dîl thei tih Isua’n a târ lang a. Chutiang thilte chungchâng ṭawngṭai dân zirtîrna chu a dawta thuziakah kan bih chiang ang. (w04 2/01)
[Footnote]
^ par. 9 Jehova Thuhretute chhuah, Pay Attention to Daniel’s Prophecy!, bung 6-na en rawh.
Ennawn Nân
• Engvângin nge Jehova chu “kan Pa,” tia koh hi inâwm tak a nih?
• Engvângin nge Jehova hming thianghlim nâna kan ṭawngṭai chu thil pawimawh ber a nih?
• Engvângin nge Pathian Ram lo thleng tûra kan ṭawngṭai?
• Pathian duhzâwng vâna tih a nih anga leia tih ni tûra kan ṭawngṭai hian, eng kan tihna nge ni?
[Zirlai Atâna Zawhnate]
[Phêk 5-naa milem]
Isua ṭawngṭai dân chu a hlei a hluaka intifel Pharisaite ṭawngṭai dân nên a inang lo hle
[Phêk 6-naa milem]
Kristiante chu Pathian Ram lo thleng tûr te, a hming thianghlim tûr te, leh a duhzâwng tih ni tûrtein an ṭawngṭai