“Bawi Rinawm” Chuan Enfiahna A Paltlang!
“Bawi Rinawm” Chuan Enfiahna A Paltlang!
“Rorêlna chu Pathian chhûngteah hian ṭan a hun tawh si a.”—1 PETERA 4:17.
1. Isua’n “bawi” a enfiah khân, eng nge a hmuh?
PENTIKOST C.E. 33-ah, Isua chuan “bawi” chu a “chhûngte” hnêna a hun apianga an chaw chan tûr semsak tûrin a ruat a. Kum 1914-ah Isua chu Lala ṭhuttîr a ni a; “bawi” chu enfiah a lo hun ta thuai a ni. Tam takah chuan “bawi” chu a ‘rinawmin, a fing’ a ni tih a rawn hmu a. Chuvângin, “a neih zawng zawng chungah hotuah” a siam a ni. (Matthaia 24:45-47) Amaherawhchu, bawi sual, rinawm lo leh fing lo tak pawh a awm a ni.
“Bawi Sual”
2, 3. Khawi aṭangin nge “bawi sual” chu a lo awm a, engtin nge a lo awm?
2 Isua chuan “bawi rinawm, fing tak” chungchâng a sawi zawh ve leh, bawi sual chungchâng pawh a sawi zawm nghâl a. Ani chuan: “Bawi sual chuan, a rilruin, ‘Ka pu a lo kal lawk dâwn lo ve,’ tiin, a bawipuite lo vêl ta sela, mi ruite hnênah eiin bâr sela, chu bawia pu chu a rin loh nîah, a hriat loh laiin a lo kal ang a, bung hnihah a rawn chhuah ang a, mi vervêkte chan ang a chantîr ang; chutah chuan ṭah leh ha ṭhial chu a awm ang,” tiin a sawi a. (Matthaia 24:48-51) Chu “bawi sual” tih ṭawngkam chuan Isua’n a sawi hmasak zâwk bawi rinawm leh fing chungchâng chu min ngaihtuahtîr a ni. Dik takin, “bawi sual” chu atîra bawi rinawm zînga mi a ni. * Engtin nge?
3 Kum 1914 hma chuan, bawi rinawm pâwla mi tam tak chuan chu mi kuma vâna mo Neitu hmuh chu an lo inbeisei nasa hle a; mahse, an beiseina chu a thleng famkim lo. Chu mi avâng leh thil dangte avângin, tam tak chu an lunghnual a, ṭhenkhat chu an lo thinur ta a. Chûng zînga ṭhenkhat chuan tûn hmaa an unaute chu ṭawngkam na tak tak hmangin an ‘vêl’ a, Kristianna ram sakhaw pâwl “mi ruite” nên an inkawp a ni.—Isaia 28:1-3; 32:6.
4. Engtin nge Isua’n “bawi sual” chu a cheibâwl a, chutiang rilru put hmang lantîr zawng zawngte chu engtin nge a cheibâwl?
4 Hêng tûn hmaa Kristian lo ni tawhte chu a tâwpah “bawi sual” ang an lo ni ta a, Isua’n anni chu “bung hnihah a rawn chhuah” a ni. Engtin nge? Anni chu hnâwlin leh an vân lam beiseina chântîrin. Mahse, anni chu tihboral nghâl an ni lo. Kristian kohhran “pâwn thimah” hun engemawti chhûng chu ṭap leh ha ṭhialin an awm phawt a ni. (Matthaia 8:12) Chûng hun aṭangin, hriak thih dang mi tlêm tête chuan chutiang bawk rilru put hmang ṭha lo chu lantîrin, “bawi sual” an nihzia an târ lang a. “Berâm dang” ṭhenkhatte pawhin an rinawm lohna chu an entawn ve a ni. (Johana 10:16) Chutiang Krista hmêlma zawng zawngte chuan chutiang bawk thlarau lam ‘pâwn thim’ chu an tawng a ni.
5. “Bawi sual” nêna inkalh takin, engtin nge bawi rinawm leh fing tak chuan a chhân lêt?
5 Mahse, bawi rinawm leh fing tak chuan “bawi sual” tawn ang fiahna chu a tawng ve a. Mahse, thinur a hnêkin, an insiam ṭha zâwk a ni. (2 Korinth 13:11) Jehova leh an unaute an hmangaihna chu tihnghehin a awm a. Chuvângin, he buaina ‘ni hnuhnûngah’ hian, “thutak ban leh innghahna” an lo ni.—2 Timothea 3:1; 1 Timothea 3:15.
Nula Thianghlim Fing leh Âte
6. (a) Engtin nge Isua’n a bawi rinawm pâwl finzia a târ lan? (b) Kum 1914 hmain, hriak thih Kristiante chuan eng thuchah nge an puan?
6 Isua chuan “bawi sual” chungchâng a sawi zawhah, hriak thih Kristian ṭhenkhatin rinawmna leh finna an lantîr theih chhan leh a dangin an lantîr theih loh chhan târ lan nân tehkhin thu pahnih a sawi a. * An finzia lantîr nân, ani chuan: “Vân ram chu nula thianghlim sâwm an khâwnvâr kenga mo neitu hmuak tûra chhuakte nên chuan tehkhin a ni tawh ang. An zînga mi panga an â a, panga an fing. A âte chuan an khâwnvârte an kenin, a tui an keng tel si lo va; a fingte erawh chuan an khâwnvârte an keng a, an ûmte chuan a tui an keng tel bawk a,” tiin a sawi a. (Matthaia 25:1-4) Nula thianghlim sâwmte chuan kum 1914 hmaa hriak thih Kristiante min hriatchhuahtîr a ni. Anni chuan mo neitu, Isua Krista lo inlan hun tûr chu an chhût chhuak a. Chuvângin, amah hmu tûrin an ‘chhuak’ a, “Jentailte nî” chu kum 1914-ah a kin dâwn tih huaisen takin an hril a ni.—Luka 21:24.
7. Eng hunah leh engvângin nge hriak thih Kristiante chu an ‘muthilh’?
7 An thu hril chu a dik ngei mai. Jentailte nî chu kum 1914-ah a tâwp ngei a, Krista hnuaia Pathian Ram chuan ro a rêl ṭan a ni. Mahse, chu chu hmuh theih loh vânah daih a ni a. Leiah chuan, mihringte chuan ‘chung pikna’ sawi lâwkte chu an tuar ṭan a ni. (Thu Puan 12:10, 12) Fiahna hun hian a rawn zui a. Thil an hriat chian loh vângin, hriak thih Kristiante chuan “mo neitu chu a lo kal har” angah an ngai a ni. An mangang êm êm a, khawvêl huat an hlawh bawk nên, zawi zawia hnungtawlhin mumal taka vântlâng rawngbâwlna chu a tâwp ṭhelh a ni. Tehkhin thua nula thianghlimte angin, thlarau lamah an “muthlua, an lo muhîl ta” a ni: Isua tirhkohte thih hnua Kristiana inchhâl mi rinawm lote tih ang bawkin.—Matthaia 25:5; Thu Puan 11:7, 8; 12:17.
8. Engin nge: “Mo neitu chu a lo kal e!” tia auhtîr a, chu hun chu hriak thih Kristiante tân eng tihna hun nge?
8 Chu mi hnu kum 1919-ah chuan rin loh tak mai thil engemaw a lo thleng ta. Heti hian kan chhiar a ni: “Zan lai takah chuan, ‘Ngai teh u, mo neitu chu a lo kal e! A hmuak tûrin lo chhuak r’u khai!’ tiin au thâwm a lo awm ta a. Chu veleh chuan nula thianghlimho chu an tho vek a, an khâwnvârte chu an buatsaih a,” tiin. (Matthaia 25:6, 7) Beisei a bo hle laiin, harhfîm tûra kohna a lo chhuak ta mai! Kum 1918-ah chuan, Jehova thlarau lam biak in enfiah tûr leh Pathian kohhran tithianghlim tûrin Isua, “thuthlung tirhkoh” chu a lo kal a ni. (Malakia 3:1) Tûnah chuan, hriak thih Kristiante chuan kal chhuakin, chu biak in lei lam hung chhûngah amah an va hmuah chu a ngai ta a. Chu chu an tân ‘êng tihchhuah’ hun a ni.—Isaia 60:1; Philippi 2:14, 15.
9, 10. Kum 1919-ah, engvângin nge Kristian ṭhenkhat chu an ‘fin’ a, ṭhenkhat chu an ‘ât’?
9 Mahse, lo ngawi lawk teh! Tehkhin thuah khân, nula ṭhenkhat chuan buaina an nei tlat. Isua chuan: “Tin, a âte chuan, a fingte hnênah, ‘Inkhâwnvâr tui kha min pe ve rawh u; kan khâwnvârte a thi dâwn e,’ an ti a,” tiin a sawi zawm a. (Matthaia 25:8) Khâwnvâr tui tel lo chuan khâwnvârin êng a pe thei lo va. Khâwnvâr tui chuan Pathian betu dik takte chu tiêngtute ni tûra thuamtu, Pathian Thu thutak leh a thlarau thianghlim chu min hriatchhuahtîr a ni. (Sâm 119:130; Daniela 5:14) Kum 1919 hma chuan, hriak thih Kristian fingte chuan, rei lo te chhûng an chauh lai pawhin Pathian duhzâwng chu taima takin an ngaihtuah zawm zêl a. Chuvângin, êng pe chhuak tûra tih a nih khân, an lo inpeih diam tawh a ni.—2 Timothea 4:2; Hebrai 10:24, 25.
10 Amaherawhchu, hriak thih ṭhenkhat chuan Mo Neitu nêna awm tlân chu châk hle mah se, mahni inpe tûrin an inbuatsaih lo va, taihmâk an chhuah hek lo. Chuvângin, chanchin ṭha hrilh hun a lo thlen chuan, an lo inpeih ta lo a ni. (Matthaia 24:14) An ṭhian taima takte hnênah khâwnvâr tui dîlin, tihchauh an tum a ni. Isua tehkhin thuah khân, engtin nge nula thianghlim fingte chuan an chhân? “Keini leh nangni tân a daih lo vang e, a zuartute hnênah kal ula lei ve zâwk rawh u,” an ti a ni. (Matthaia 25:9) Chutiang bawkin, kum 1919-ah hriak thih Kristian rinawm nghette chuan êng an pêk chhuah theihna tichau thei thil engkim chu an hnâwl a. Chutiang chuan, enfiahna chu an paltlang a ni.
11. Nula thianghlim âte chungah eng nge thleng?
11 Isua chuan: “Tin, lei tûra [nula thianghlim âte] an kal bo hlân chuan mo neitu chu a lo thleng ta a; tichuan, a peihte chu amah nên lawi chaw eiin an lût a; tin, kawng chu an khâr ta a. Chu mi hnuah chuan nula thianghlim dangte pawh chu an lo thleng a, ‘Ka pu, ka pu, min hawnsak rawh!’ an ti a. Ani erawh chuan, ‘Tih tak meuhvin ka hrilh a che u, ka hre lo che u a ni,’ a ti a, a chhâng a,” tiin a titâwp a ni. (Matthaia 25:10-12) Ni e, ṭhenkhat chu Mo Neitu lo hmuak tûrin an inrâlring lo va. Chuvângin, enfiahnaah an hlawhtling ta lo va, vân lam inneihna ruai ṭheh theihna chanvo chu an chân ta a ni. A va lungchhiatthlâk tak êm!
Talent Tehkhin Thu
12. (a) Rinawmna chungchângah Isua’n eng tehkhin thu nge a hman? (b) Tunge “ram danga kal” chu?
12 Finna tehkhin thu a pêk zawhah, Isua chuan rinawmna chungchâng tehkhin thu a pe leh a. Ani chuan: “Mi, ram danga kal dâwn a, ama bawite kova, a sumte an hnêna kawltîr ang chu a ni si a. Bawi pakhat hnênah talent nga a pe a, bawi dang hnênah talent hnih a pe a, bawi dang hnênah talent khat a pe a; an tih theih tâwk tûr ang zêl ṭheuhvin a pe a; tichuan a kal ta a,” a ti a. (Matthaia 25:14, 15) Tehkhin thua chu mi chu amah Isua ngei hi a ni a, C.E. 33-ah vânah lâwnin, ‘ram dangah a kal’ a ni. Mahse, a lâwn hmain Isua chuan a zirtîr rinawmte hnênah “a neih zawng zawng” chu a hlân a ni. Engtin nge?
13. Engtin nge Isua’n thlawhhma lian tak a buatsaih a, a “bawite” chu sumdâwng tûra thuneihna a pêk?
13 Leia rawng a bâwl chhûngin, Isua chuan Lalram chanchin ṭha chu Israel ram zawng zawnga hrilin, thlawhhma lian tak a buatsaih ṭan a. (Matthaia 9:35-37) ‘Ram danga a kal’ hmain, a zirtîr rinawmte hnênah chu thlawhhma chu kawltîrin: “Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah baptis ula, thu ka pêk zawng zawng chu u pawm tûrin zirtîr rawh u,” tiin a hrilh a ni. (Matthaia 28:18-20) Hêng thute hmang hian, Isua chuan a “bawite” chu a lo kîr leh hma zawng ‘an tih theih tâwk tûr ang zêl ṭheuh va’ sumdâwng tûrin thuneihna a pe a ni.
14. Engvângin nge mi tinte chu sumdâwn chin intluk vek tûra beisei an nih loh?
14 Chu ṭawngkam hman chuan kum zabi khatnaa Kristian zawng zawngte’n dinhmun thuhmun emaw, remchân dân thuhmun emaw an nei dâwn lo tih a târ lang a ni. Paula leh Timothea-te ang ṭhenkhat chu thu hrilh leh zirtîr rawngbâwlna lama nasa taka thawk tûrin an dinhmunin a zîr a. Mi dangte chuan an dinhmunin a zir loh avângin an thawk thei mang lo pawh a ni thei. Entîr nân, Kristian ṭhenkhat chu chhiahhlawh an ni a, a dangte chu mi hrisêl lo te, tar te, a nih loh leh chhûngkaw mawhphurhna neite an ni. Tin, kohhrana mawhphurhna ṭhenkhat chu zirtîr zawng zawngte tân a ni lo bawk. Hriak thih hmeichhiate leh hriak thih mipa ṭhenkhatte chuan kohhranah an zirtîr lo a ni. (1 Korinth 14:34; 1 Timothea 3:1; Jakoba 3:1) Mahse, an mi mal dinhmun chu eng ang pawh ni se, Krista zirtîr hriak thih zawng zawng—a hmei a pa—te chu sumdâwng tûra tirh an ni, Kristian rawngbâwlnaah an hun remchâng leh an dinhmunte hmang ṭangkai tûrin. Tûn laia Krista zirtîrte pawhin chutiang chuan an ti a ni.
Enfiah Hun A Inṭan!
15, 16. (a) Engtikin nge sum chanchin tihfel a nih? (b) Mi rinawmte hnênah eng ‘sumdâwnna’ hun remchâng thar nge pêk a nih?
15 Tehkhin thu chu: “Tin, rei tak hnuah chûng bawiho pu chu a lo haw a, an hnênah a sum chanchin a tifel a,” tiin a inchhunzâwm a. (Matthaia 25:19) C.E. 33 hnu hun rei tak, kum 1914 hnuah Isua Krista chu rinawm takin a lo awm leh ṭan a ni. Kum thum leh a chanve hnu, kum 1918-ah chuan Pathian thlarau lam biak inah lo kalin, Petera thu: “Rorêlna chu Pathian chhûngteah hian ṭan a hun tawh si a,” tih chu a rawn tifamkim a. (1 Petera 4:17; Malakia 3:1) Chu chu sum chanchin tihfel hun a ni.
16 Isua hriak thih unau bawite chuan Lal “talent” chuan eng nge an tih? C.E. 33 aṭanga kum 1914 thlengin, mi tam tak chuan Isua ‘sumdâwnnaah’ an thawk rim hle a. (Matthaia 25:16) Khawvêl indopui pakhatna hrân lai pawhin, an Pu rawngbâwl an châkzia chu nasa takin an lantîr a ni. Tûn hi mi rinawmte ‘sumdâwng tûra’ hun remchâng thar pêk hun a ni ta. He khawvêl tâwp hun hi a lo thleng tawh a. Khawvêl pum puiah chanchin ṭha chu hrilh tûr a ni. “Lei buh” chu ah a lo hun ta bawk. (Thu Puan 14:6, 7, 14-16) Buh zînga a hnuhnûng berte chu zawn chhuah a, berâm dang pâwla “mipui nasa tak” chu lâkkhâwm a ngai a ni.—Thu Puan 7:9; Matthaia 13:24-30.
17. Engtin nge hriak thih Kristian rinawmte chu ‘an pu lâwmnaah an luh’?
17 Buh seng hun chu hun hlimawm tak a ni a. (Sâm 126:6) A nih chuan, kum 1919-a hriak thih unau rinawmte mawhphurhna lian zâwk a kawltîr khân: “Tlêmte chungah i rinawm a, tam tak chungah ka awmtîr ang che; i pu lâwmnaah lût rawh,” a ti chu a inâwm hle a ni. (Matthaia 25:21, 23) Chu bâkah, Pathian Rama Lal thar Pu ber lâwmna chu kan suangtuah theih bâkin a nasa a ni. (Sâm 45:1, 2, 6, 7) Bawi rinawm pâwl chuan leia Lal aiawhna leh a thil neih tihpunna hmangin chu lâwmna chu a ṭawmpui a ni. (2 Korinth 5:20) An hlimna chu Isaia 61:10-ah hmuh a ni: “LALPA-ah chuan nasa takin ka hlim ang a, ka nunna hi ka Pathianah chuan lâwm takin a awm ang; . . . ani chuan chhandamna silhfênte mi bel a, felna kawrfualin mi tuam ta si a.”
18. Engvângin nge ṭhenkhat chuan enfiahna an paltlang loh va, eng nge a rahchhuah?
18 Lungchhiatthlâk takin, ṭhenkhat chuan enfiahna an paltlang thei lo. Heti hian kan chhiar a ni: “Tin, talent khat dawngtu pawh chu a lo kal a, ‘Ka pu, mi ti kher kher i ni tih ka hria a che, i tuh lohnaah pawh i ât ṭhîn a, i tihdarh lohnaah pawh i seng ṭhîn a ni; tichuan, ka hlau va, ka va kal a, i talent kha leiah ka thukru a; en teh i ta ngai kha i hmuh leh hi,’ a ti a,” tiin. (Matthaia 25:24, 25) Chutiang bawkin, hriak thih Kristian ṭhenkhat chu an “sumdâwng” lo. Kum 1914 hmain mi dangte hnênah an beiseina chu phûr takin an hrilh lo va, kum 1919-ah pawh an ṭan duh hek lo. An chaltlaina chu Isua’n engtin nge a tih? An chanvo chu a lâk bosak vek a. ‘Ṭah leh ha ṭhialna awmna pâwn lam thimah chuan a paih chhuak’ a ni.—Matthaia 25:28, 30.
Enfiahna Chhunzawm Zêl A Ni
19. Eng kawngin nge enfiahna chu a awm zêl a, eng nge hriak thih Kristian zawng zawngin tih an tum?
19 Dik takin, kum 1918-a Isua’n enfiahna a ṭan khân, tâwpna huna hriak thih Kristian lo la ni tûr a tam zâwkte chuan Jehova rawng chu an la bâwl rih lo va. Anni chuan enfiahna an pumpelh em? Pumpelh lo ve. Enfiahna chu bawi rinawm leh fing takin a pâwl anga enfiahna a paltlang hun, 1918 aṭanga 1919-ah a inṭan chauh a ni. Hriak thih Kristian tinte chu chhinchhiah an nih hma loh zawng enfiahna hnuaiah an awm chhunzawm zêl a ni. (Thu Puan 7:1-3) Chu chu hre thiamin, hriak thih Krista unaute chuan rinawm taka ‘sumdâwn’ chu an tum a. Anni chuan fin an tum a, êng chu a ên zual deuh deuhna tûrin khâwnvâr tui tam tak an dah khâwl a ni. An nun tâwp thlenga an rinawm chuan, Isua’n vân hmunah a lo hmuak dâwn tih an hria a ni.—Matthaia 24:13; Johana 14:2-4; 1 Korinth 15:50, 51.
20. (a) Eng nge tûn laia berâm dangte’n tih an tum tlat? (b) Eng nge hriak thih Kristiante’n an hriat?
20 Berâm dang mipui tam takte chuan hriak thih an unaute chu an entawn a. Anni chuan Pathian thiltum an hriatnain mawhphurhna lian tak a pe tih an hria a ni. (Ezekiela 3:17-21) Chuvângin, Jehova Thu leh thlarau thianghlim ṭanpuinain, inzirna leh inkhâwmna hmangin an khâwnvâr tui chu hnianghnâr takin an dah khâwl a ni. Tichuan, an êng chu ên chhuahtîrin, thu hrilh leh zirtîr rawngbâwlnaah telin, hriak thih an unaute nên an “sumdâwng” a ni. Amaherawhchu, hriak thih Kristiante chuan talent chu an kutah a awm tih an hre chiang êm êm a. Leia Lalpa thilneihte an enkawl dânah mawh an phur ngei tûr a ni. Anni chu tlêm tê chauh mah ni se, mipui tam takte chungah an mawhphurhna chu an hlân chhâwng thei lo. Chu chu rilrua hre rengin, bawi rinawm leh fing tak chuan Lal sumdâwnnaah hma hruai zêlin, inpumpêk mipui tam takte ṭanpuina chungah an lâwm êm êm a ni. Mipui tam tak zînga mite pawhin hriak thih an unaute mawhphurhna chu hriain, an enkawlna hnuaia thawh chu chanvo hluah an ngai a ni.
21. Eng fuihna nge kum 1919 hma lam aṭanga tûn lai Kristian zawng zawngte tân pawh a nih?
21 Chuvângin, hêng tehkhin thu pahnihte hi kum 1919 emaw, chûng lai vêl emawa thilthleng chungchâng mah ni se, a thu bul chu hun tâwp chhûng zawnga Kristian dik zawng zawngte tân an hmang a ni. He mi kawng hian, Isua sawi nula thianghlim sâwm tehkhin thu a sawi tâwpa fuihna a pêk chu atîrin kum 1919 hmaa hriak thih Kristiante tân mah ni se, a thu bul chu tûn thlengin Kristian zawng zawngte tân a la ni reng a ni. A nih chuan, kan vaiin Isua thu: “Chutichuan, ngaihven rawh u, a nî leh a hun chu in hre si lo va,” tih chu i zâwm ṭheuh vang u.—Matthaia 25:13. (w04 3/1)
[Footnote-te]
^ par. 2 Chutiang bawkin, tirhkohte an thih hnuah “chinghne kawlhte” chu hriak thih upate zîng aṭanga lo chhuak an ni.—Tirhkohte 20:29, 30.
^ par. 6 Isua tehkhin thu sawihona dang hriat nân, Jehova thuhretute chhuah Worldwide Security Under the “Prince of Peace,” tih, bung 5 leh 6-na en rawh.
I Hrilhfiah Thei Em?
• Engtik khân nge Isua’n a hnungzuitute a enfiah a, eng nge a rawn hmuh?
• Engvângin nge hriak thih Kristian ṭhenkhatin “bawi sual” rilru put hmang chu an put?
• Engtin nge thlarau lama kan fin theih ang?
• Hriak thih Isua unaute entawnin, eng kawngin nge kan ‘sum dâwn’ zêl theih ang?
[Zirlai Atâna Zawhnate]
[Phêk 14-naa bâwm]
ENGTIKIN NGE ISUA A LO KAL?
Matthaia bung 24 leh 25-ah, Isua chu awmze hrangin a “lo kal” dâwn nia sawi a ni. A “lo kal” nân a ngial a ngana a awmna a thlâk kher a ngai lo. A “lo kal” lehna tih awmzia chu rorêl tûra mihringte emaw, a hnungzuitute emaw lamah a ngaihsakna a pe tihna a ni. Chuvângin, kum 1914-ah Lal anga a lo awm leh nân a “lo kal” a. (Matthaia 16:28; 17:1; Tirhkohte 1:11) Kum 1918-ah thuthlung palai angin a “lo kal” a, Jehova rawngbâwl intite chungah ro a rêl ṭan a ni. (Malakia 3:1-3; 1 Petera 4:17) Armageddon-ah Jehova hmêlmate chunga rorêl tûrin a “lo kal” ang.—Thu Puan 19:11-16.
Matthaia 24:29-44 leh 25:31-46-a lo kal (a nih loh leh, lo thleng) tihte hian “hrehawm nasa tak” a lo thlen hun a kâwk a ni. (Thu Puan 7:14) A leh lamah chuan, Matthaia 24:45 aṭanga 25:30-a lo kal tihte hian kum 1918 aṭanga a hnungzuitu nia inchhâlte chunga a rorêlna nên a inkûngkaih a ni. Entîr nân, bawi rinawmin a dawn lâwmman te, nula thianghlim âte chunga rorêlna te, leh a Pu talent thukrutu bawi zawmthaw tak chunga rorêlnate chu hrehawmna nasa taka Isua “lo kal” huna lo thleng tûr anga sawi chu a âwm lo vang. Chutiang ni se chuan hrehawm nasa tak a lo thlen hunah hriak thih tam tak an rinawm lo vang a, mi dang thlan leh a ngai dâwn tihna a ni ang. Amaherawhchu, Thu Puan 7:3 chuan hriak thih Kristian bawite chu chu mi hunah chuan chatuan atân “chhinchhiah” an ni tawh dâwn tih a târ lang a ni.
[Phêk 16-naa milem]
Hriak thihte leh “mipui tam takte” chuan an êng chu an ên chhuahtîr zêl
[Phêk 17-naa milem]
Bawi rinawm chu a “sumdâwng”
Bawi zawmthaw chu a “sumdâwng” ve lo