Ṭhalaite U, Nakin Hun Atân Lungphûm In Phûm Em?
Ṭhalaite U, Nakin Hun Atân Lungphûm In Phûm Em?
“Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin thil ṭha lo ni lovin ṭhatna ka ngaihtuah asin.”—JEREMIAH 29:11.
1, 2. Naupan lai chu thlîr dân inang lo eng kawngtein nge a thlîr theih?
PUITLING tam tak chuan ṭhat lai hun hi dam chhûnga hun ṭha ber niin an hria a. An ṭhat lai huna an chakna leh thathonate chu an hre reng ṭhîn a ni. Mawhphurhna an neih tlêm lai, hun hlimawm tak an hman lai leh hmabâk nun kawng pumhlûm an neih lai hun chu an ngaihtuah chhuak leh vawng vawng ṭhîn.
2 Nangni, tûna naupang ni mêkte ṭhat lai hun thlîr dân nên chuan a inang lo ngei ang. Ṭhang lai rilru leh taksa lam inthlâkte avângin buaina i tâwk mai thei a. School-ah ṭhiante nêksâwrna nasa tak i tâwk mai thei bawk a. Ruihhlo ngaihna te, zungawl veina te, leh nungchang bawlhhlawhnate do tûrin i tum ruh tlat pawh a ngai mai thei a ni. In zînga tam tak chuan tualdawihna chungchângah emaw, in rinna nêna inkûngkaih thil dang chungchângah emaw harsatna in tâwk mai thei bawk. Ni e, ṭhat lai hun chu hun harsa a ni thei a ni. Mahse, chu chu hun remchâng a ni bawk. Zawhna lo awm ta chu, Engtin nge hêng hun remchângte hi i hman ang? tih a ni.
I Ṭhat Lai Hun Chên Rawh
3. Solomona’n eng fuihna leh vaukhânna nge ṭhalaite hnêna a pêk?
3 Puitling tawhte chuan ṭhat lai hun rei lohzia an hrilh thei ang che a, chu chu a dik rêng a ni. Kum rei lo têah, i ṭhat lai chu i pêl mai dâwn a. Chuvângin, i ṭhat lai hun chên rawh! Chu chu, he fuihna: “Ṭhalaite u, in ṭhat lai chên ula, in la naupan viau lai hian hlim rawh u,” tih ziaktu Lal Solomona fuihna a ni. Amaherawhchu, Solomona’n ṭhalaite chu: “Engmah engto nei suh ula, in pang tinatu awm hek suh se,” tiin a vaukhân a. Tin, “In ṭhat lai hun a rei dâwn lo,” tiin a sawi belh bawk a ni.—Thuhriltu 11:9, 10.
4, 5. Engvângin nge ṭhalaite tân nakin hun tâna inbuatsaih chu a finthlâk? Entîrna pe rawh.
4 Solomona sawi awmzia chu i man em? I hriatfiah nân, thilpêk hlu tak, a nih loh leh pawisa tam tak dawngtu ṭhalai pakhat chu han ngaihtuah ta la. A pawisa chuan eng nge a tih ang? Isua tehkhin thua fapa tlân bo ang maiin—nawm chen nân a pawisa chu a khawh ral thei a. (Luka 15:11-23) Mahse, a pawisa a zawh hunah engtin nge a awm dâwn? A hman fîmkhur loh avângin a inchhîr ngei ang! Kawng leh lamah chuan, a thilpêk dawn chu nakin hun tâna inbuatsaih nân hmangin, a tam zâwk chu a pung neiin dah kham ta se. Khua reiah, a pawisa dah kham a hlâwkpui hunah chuan, a ṭhat lai hun chen nâna a pawisa a hmang ral vek lo chu a inchhîr i ring em? A inchhîr lo rêng rêng ang!
5 I ṭhat lai kumte chu a nihna ang tak, Pathian thilpêk angin han ngaihtuah teh. Engtin nge i hman dâwn? Nakin hun ngaihtuah hlek lovin, hlimhlawp bâwlnaah i chakna leh i phûrna zawng zawng chu i khawhral thei a. Mahse, chutianga i tih chuan, “i ṭhat lai hun” chu ‘a rei lo’ ngei ang. Nakin hun atâna inbuatsaih nân ṭhat lai hun hman chu a va ṭha zâwk tak êm!
6. (a) Solomona thusawi eng hian nge ṭhalaite tân kaihhruaina a pêk? (b) Eng nge Jehova’n ṭhalaite tâna tihsak a duh a, engtin nge ṭhalai chuan a ṭangkaipui theih?
6 Solomona chuan i ṭhat lai hun fing taka hmang tûra ṭanpui thei thu bul pakhat a lo sawi a. Ani chuan: “I vânglai hian i siamtu hre reng rawh,” a ti a ni. (Thuhriltu 12:1) Chu chu hlawhtlinna bul a ni—Jehova thu ngaihthlâk leh a duhzâwng tih chu. Jehova chuan hmân lai Israelte hnênah an tâna a tihsak duh chu a hrilh a ni: “Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin thil ṭha lo ni lovin ṭhatna ka ngaihtuah asin,” tiin. (Jeremia 29:11) Jehova chuan nang pawh ‘hun hnuhnûng tâwpa beiseina’ pêk che chu a duh a ni. I thiltihahte, i ngaihtuahnaahte, leh i thuthlûkna siamahte amah i hriatchhuah chuan, chu hun hnuhnûng tâwpa beiseina chu a takah a lo chang ang.—Thu Puan 7:16, 17; 21:3, 4.
“Pathian Hnaih Rawh”
7, 8. Engtin nge ṭhalaiin Pathian a hnaih theih?
7 Jakoba chuan Jehova hre reng tûrin heti hian min fuih a ni: “Pathian hnaih rawh u, tichuan anin a hnaih ang che u,” tiin. (Jakoba 4:8) Jehova chu Siamtu leh vâna Lalchungnung ber a ni a, chibai bûk leh fakna zawng zawng chu a phu a ni. (Thu Puan 4:11) Chutichung pawhin, amah kan hnaih chuan, ani’n min hnaih ang. Chutiang ngaihsakna duhawm tak chuan i thinlung a tiphûr lâwm ni?—Matthaia 22:37.
8 Kawng tam takin Jehova kan hnaih a. Entîr nân, tirhkoh Paula chuan: “Ṭawngṭai fan fan ula, chu miah chuan lâwmthu hril chungin ngaihven rawh u,” a ti a. (Kolossa 4:2) Thu danga sawi chuan, ṭawngṭai chu tih ṭhanah nei rawh tihna a ni. I aiawha i pa emaw, kohhrana Kristianpuiin emaw a ṭawngṭai hnua amen tih rîkngawtah lungawi suh. Jehova hnênah i ngaihtuah te, i hlauh te, i harsatna te sawiin i thinlung i leih baw ngai em? Mihring tu hnênah mah i sawi ngam loh tûr thu chu i hrilh ngai em? Rilru dik tak leh tih tak zeta ṭawngṭaina chuan rilrua thlamuanna a thlen a. (Philippi 4:6, 7) Jehova hnaih tûr leh aman min hnaihzia hre tûrin min ṭanpui a ni.
9. Engtin eng ṭhalaiin Jehova thu a ngaihthlâk theih?
9 Hêng thâwk khum thuahte hian Jehova hnaih dân kawng dang kan hmu a ni: “Atâwp atâwpa i lo fin theih nân zilhna pawm la, thununna pawisa rawh,” tiin. (Thufingte 19:20) Ni e, Jehova thu i ngaihthlâk a, a thu i âwih chuan nakin hun tân lungphûm i phûm tihna a ni. Engtin nge Jehova thu i ngaihthlâkzia i târ lan theih ang? Kristian inkhâwmnaahte i tel ziahin, thusawite chu i ngaithla ngei ang a. Tin, chhûngkaw Bible zirnaa telna hmangin ‘i nu leh i pa i chawimawi’ bawk a. (Ephesi 6:1, 2; Hebrai 10:24, 25) Chu chu a fakawm hle. Chu bâkah, inkhâwm atâna inpuahchah nân te, Bible chhiar ziah nân te, chhui zauna neih nân te ‘hun i lei’ em? ‘Mi fing’ anga awm tûrin, i thu chhiarte chu nunpui i tum em? (Ephesi 5:15-17; Sâm 1:1-3) Chutianga i tih chuan, Jehova i hnaih tihna a ni.
10, 11. Ṭhalaite’n Jehova thu an ngaihthlâk hian eng hlâwkna ropui tak nge an dawn ṭhin?
10 Thufingte bu inṭanna chângah hian thâwk khuma ziaktu chuan Thufingte bu ziah a nih chhan a hrilhfiah a. Chu thiltum chu “finna leh zirtîrna, hriat theihna tûr te, hriat thiamna thu ngaihruat dân thiamna te; felna te, rorêl te, hleih nei lova hmang hre taka zirtîrna pawm dân thiamna te; mi mâwlte remhriatna neihtîr tûr te, tlangvâlte hriatna leh ngaihruat thiamna neihtîr tûr” tein a ni. (Thufingte 1:1-4) Chuvângin, Thufingte thu—Bible bu dangte nên lam—i chhiara i nunpui hian, felna leh dikna chu i nei ang a, Jehova chu i hnaih avângin a hlim ang. (Sâm 15:1-5) Rorêlna te, remhriatna te, hriatna te, ngaihruat thiamna te i neih tam poh leh i thuthlûkna chu a ṭha zâwk sauh dâwn a ni.
11 Ṭhalaite fing taka khawsa tûra beisei chu a âwm lo viau em? Âwm lo lo ve, ṭhalai tam tak chu fing takin an khawsa si a. Chuvângin, mi dangin an zahin, ‘an naupanna chu an ngainêp lo’ a ni. (1 Timothea 4:12) An nu leh pate’n an chhuangin, Jehova pawhin a thinlung an tilâwm tih a sawi bawk. (Thufingte 27:11) La puitling rih lo mah se, hêng thâwk khum thute hi an tân pawh a ni tel ve tih an ring tlat thei a ni: “Mi sawisêlbo chhinchhiah la, mi dik tak chu en rawh, chutiang mi tâwpna tûr chu thlamuanna a ni dâwn si a,” tih chu.—Sâm 37:37.
Duhthlanna Ṭha Siam Rawh
12. Ṭhalaite’n duhthlanna pawimawh tak an siamte zînga pakhat chu eng nge ni a, engvângin nge chu duhthlanna chuan sawhkhâwk daih rei tak a neih?
12 Ṭhat lai hun hi duhthlanna siam hun a ni a, a ṭhen chuan kum khaw daih sawhkhâwk a nei a. Tûna duhthlanna i siam ṭhenkhat chuan i nakin hun rei tak a nghawng dâwn a ni. Duhthlanna ṭha chuan hlawhtlinna leh hlimna a thlen ang a. Duhthlanna âtthlâk erawh chuan dam chhûng a tihmêlhem thei a ni. He thu dikzia târ langtu duhthlanna pahnih lo ngaihtuah ta ila. Pakhatna: Tute nge ṭhian atâna i thlan? Engvângin nge chu chu a pawimawh? Aw le, thlarauva thâwk khum thufing chuan: “Mi fing pâwl la, i lo fing ang a, mi â pâwl erawh chu hrehawm tuar phahna a ni,” a ti a. (Thufingte 13:20) Thu danga sawi chuan, an fing emaw, an â emaw a tâwpah chuan kan ṭhian kawmte ang kan lo ni ṭhîn. A eng zâwk nge nih i duh?
13, 14. (a) Ṭhian kawmah mi dangte nêna inkawm mai bâk thil dang eng nge tel? (b) Eng thil tihsual nge ṭhalaite’n an pumpelh tûr?
13 Ṭhian kawm tih hian, mi dang nêna awm tlâng tihnaah i ngai mai thei a. Chu chu a dik ngei mai; mahse, chu aia tam a tel a ni. Television i ente, rimawi i ngaihthlâkte, thawnthubu i chhiarte, cinema i ente, a nih loh leh Internet i hmante hian ṭhian i kâwm a ni. Chutianga ṭhian i kawm chhan chu tharum thawhna leh nungchang bawlhhlawhna lam i ngaihtuahna tihlungawi nân emaw, ruihhlo ngai tûr, zu rui tûra mi tihphûr nân emaw, a nih loh leh Bible thu bulte nêna inkalh engpawh tih nân a nih chuan, Jehova awm lo anga khawsatu “mi â” nên in inkâwm tihna a ni.—Sâm 14:1.
14 Kristian inkhâwmnaah i tel a, kohhrana i phusat avângin, tharum thawhna cinema en emaw, a thlûk mawi tak a hla thu ṭha si lo rimawi ngaihthlâk emaw chuan a hneh thei lo tûrah i inngai a ni thei. Internet Web site-a zahmawh lem chuangte en thuak thuak chuan i chungah rah ṭha lo a chhuah lêm lo tûrah i ngai a ni thei bawk. Tirhkoh Paula chuan i ngai sual a ni a ti! “Ṭhian sualte chuan nungchang ṭha an tikhawlo ṭhîn,” tiin. (1 Korinth 15:33) Lungchhiatthlâk takin, Kristian ṭhalai tam tak chuan ṭhian kawm ṭha lote avângin an nungchang ṭha an tikhawlo a ni. Chuvângin, chutiang ṭhian sualte kawm loh chu tum tlat rawh. Chutianga i tih chuan, Paula fuihna i zâwm a ni ang: “He khawvêl dân ang hian awm suh ula; Pathian duhzâwng, a ṭha leh lawm tlâk leh, ṭhat famkim chu in hriatfiah theih nân, in rilru a thara awmin lo danglam zâwk tawh rawh u,” tih chu.—Rom 12:2.
15. Eng nge ṭhalaite duhthlanna siam tûr pahnihna chu ni a, chu mi chungchângah chuan a chângin eng ti tûra nawr nge an nih ṭhin?
15 Duhthlanna siam tûr i hmachhawn a pahnihna chu hei hi a ni. School i zawh hunah i tih tûr i thlan a ngaih hun a lo thleng ang a. Hnathawh tûr hmuh harsatna rama chêng i nih chuan, hna ṭha tak chu engmah ngaihtuah buai lovin i pawm thut mai thei. Ram hausaa khawsa i nih chuan, hna thlan tûr a tam lutuk ang a, a ṭhen phei chu thawh châkawm tak a ni thei. I zirtîrtute emaw, i nu leh pate emaw chuan duhsak takin sum leh pai lama himna, hausak hial theihna hna thawk tûrin an fuih mai thei che a ni. Amaherawhchu, chu hna thawk tûra i inzirna avângin Jehova rawngbâwl nân hun i nei mang lo thei a ni.
16, 17. Bible châng chi hrang hrangin ṭhalai chu hnathawhna thlîr dân inbûk tâwk nei tûra a ṭanpui dân hrilhfiah rawh.
16 Thuthlûkna i siam hmain Bible râwn theihnghilh suh. Bible chuan intunnun nâna hna thawk tûrin min fuih a, mahni intodelh tûrin mawhphurhna kan nei tih a târ lang a ni. (2 Thessalonika 3:10-12) Chuti chung pawhin, hnathawh tûr thlanna kawngah thil dang a la tel cheu va. A hnuaia Bible châng târ lante hi chhiara, chûngte chuan ṭhalaite chu an hnathawh tûr thlanna kawnga inbûk tâwk tûra a ṭanpui theih dân kawng ngaihtuah tûrin kan fuih che a ni: Thufingte 30:8, 9; Thuhriltu 7:11, 12; Matthaia 6:33; 1 Korinth 7:31; 1 Timothea 6:9, 10. Hêng chângte i chhiar zawh hnuah, he mi chungchânga Jehova thlîr dân chu i hria em?
17 Pâwn lam hnathawh chu Jehova rawng kan bâwlna khawih buai tûr khawpin a pawimawh lutuk ngai tûr a ni lo. High school thiamna nêna ei zawnna i hmuh theih chuan, chu chu a ṭha. Chu bâk zir belh i ngaih chuan, chu chu nu leh pate nêna sawiho chi a ni. Mahse, “thil ṭha bîkte”—thlarau lam thilte—chu hmuh hmaih ngai suh. (Philippi 1:9-11) Jeremia lehkhaziaktu Baruka angin thil tisual ngai suh ang che. Ani chuan a rawngbâwlna chanvo a hlutna chu hlohvin, ‘mahin tân thil ropui a zawng’ a ni. (Jeremia 45:5) He khawvêla “thil ropui” engmahin Jehova a hnaihtîr emaw, Jerusalem chhiatna lakah a dam khawchhuahtîr emaw dâwn lo tih chu hun engemawti chhûng a theihngilh a. Chutiang thil chu tûn laiah pawh a thleng thei a ni.
Thlarau Lam Thilte Hlut Rawh
18, 19. (a) I ṭhenawm tam zâwkte’n eng nge an tawrh a, an chungah eng rilru nge i put ang? (b) Engvângin nge mi tam tak chu thlarau lama ṭâm nia an inhriat loh?
18 Chanchin tharah hian ṭâm tlâkna rama naupang chêr chhe tak lem i hmu ngai em? I hmuh chuan, anni chu i khawngaih ngei ang. Chutiang bawkin i ṭhenawma mite i khawngaih em? Engvângin nge i khawngaih ang? A tam zâwkte chu an ṭâm ve vâng a ni. Amosa sawi lâwk ṭâmna chu an tuar a ni: “Lalpa PATHIAN thu chhuak chuan, . . . nîte chu a lo thleng mêk a ni; chûng nîahte chuan ramah chuan ṭâm ka tîr ang a, chaw ṭâmna ni lovin, tui ṭâmna ni hek lovin, LALPA thu hriatna ṭâmna zâwk chu,” tih chu.—Amosa 8:11.
19 He thlarau lam ṭâmna tâwktu a tam zâwkte chuan an “thlarau lam mamawh [chu an] ngaihven” lo ngei mai a. (Matthaia 5:3 NW) Mi tam tak chu thlarau lama ṭâmah pawh an inngai lo. A ṭhen phei chu puar tâwkah an inngai hial a ni. Mahse, chutianga an inngaih chhan chu hlutna rêng nei lo “khawvêl finna” hmanga an inchâwm vâng a ni a, chutah chuan hausak âtchilhna te, science lam thila thil chhûtna te, nungchang ṭha chungchâng ngaih dân te, leh chutiang thil dangte a tel a ni. Ṭhenkhat chuan tûn lai “finna” chuan Bible zirtîrna a ti hmân lai tawh niin an hria a. Amaherawhchu, ‘khawvêlin finna hmangin Pathian an hre thei lo’ a ni. Khawvêl finna chuan Pathian hnaih tûrin a ṭanpui lo vang che. Chu chu “Pathian ngaih chuan âtna” mai a ni si a.—1 Korinth 1:20, 21; 3:19.
20. Engvângin nge Jehova be lotute entawn duh chu thil finthlâk a nih loh?
20 Chûng naupang ṭâmte lem i en hian, anmahni ang nih chu i duh ngai em? I duh lo rêng rêng ang! Mahse, Kristian chhûngkuaa ṭhalai ṭhenkhat chuan an hualvêla thlarau lama ṭâmte ang nih an duhzia an lantîr tlat a ni. Chûng ṭhalaite chuan khawvêla ṭhalaite’n ngaihmawh nei lo va, nun hlim tak chênah an ngai a ni. Chûng ṭhalaite chu Jehova laka inmihran an ni tih an theihnghilh a ni. (Ephesi 4:17,, 18) Tin, thlarau lam ṭâmna rahchhuah ṭha lo takte chu an theihnghilh bawk. A rahchhuah ṭha lo ṭhenkhat chu tleirâwl chhuaha duh lo chunga sâwn paite leh nungchang bawlhhlawhna avânga taksa leh rilruin a tawrh dân te, zial zûk te, zu ngawlvei te, ruihhlo ngaihte a ni. Thlarau lama ṭâmna chuan hel duhna rilru te, a rûka beisei bona te, leh nuna kaihhruaina tlâkchhamna te a awmtîr a ni.
21. Jehova be lotute rilru put hmang dik lo lakah engtin nge kan invên theih?
21 Chuvângin, school-a Jehova be lotute zînga i awm hunah, an rilru put hmangte chu inthununtîr suh. (2 Korinth 4:18) Ṭhenkhat chuan thlarau lam thilte chu an ngainêp hle ang a. Chu bâkah, chanchin thar thehdarhnate chuan hriatthiam har tak insawichhiatna khual thuthangte an thehdarh ang a, nungchang bawlhhlawhna te, zu ruih te, a nih loh leh ṭawngkam bawlhhlawhte chu thil pângngai tak angin an hril ang. Chu chu do tlat rawh. ‘Rinna leh chhia leh ṭha hriatna thiang tak pawm tlattute’ nên inkâwm zêl rawh. “Lalpa hna ṭhahnemngai taka thawk fovin awm rawh.” (1 Timothea 1:19; 1 Korinth 15:58) Kingdom Hall-ah leh thlawhhma rawngbâwlnaah buai zêl rawh. I school kal chhûngin, auxiliary pioneer rawngbâwlnaah tel ṭhîn rawh. Hetiang hian i thlarau lam thlîrna chu ti ṭha sauh ang che; tichuan, i inbûk tâwkna chu i hloh lo vang.—2 Timothea 4:5.
22, 23. (a) Engvângin nge Kristian ṭhalaiin mi dangte hriatthiam loh duhthlanna a siam fo vang? (b) Ṭhalaite chu eng ti tûra fuih nge an nih?
22 Thlarau lam aṭanga thil thlîrna chuan mi dangte hriatthiam loh tûr thutlûkna a siamtîr che a rinawm. Entîr nân, Kristian tlangvâl pakhat chu rimawi tum thiam tak, school-a subject tin thiam thei tak a ni a. A zirna a zawh chuan, a hnathawh tûr thlan hun bikima chanchin ṭha hriltu pioneer a nih theih nân a pa hnathawh ang tukverh tihfai hna chu a thawk ve ta a ni. A zirtîrtu chuan a thutlûkna siam chhan chu a hrethiam thei lo va; mahse, Jehova i hnaih chuan, i hriatthiam ngei kan ring a ni.
23 I ṭhat lai chakna hlu tak hman dân i ngaihtuah hian, ‘nunna, nunna taktak chu i vawn theih nân, hun lo thleng tûr atân chuan lungphûm ṭha tak i tân khâwl khâwm ang che.’ (1 Timothea 6:19) I ṭhat lai—leh i dam chhûng zawngin ‘i Siamtu Ropui hriat reng’ chu tum tlat rawh. Chu chu tâwp nei lo tûr hmabâk hlawhtling tak siam theih dân kawng awmchhun a ni si a. (w04 5/1)
Eng Nge I Thutlûkna Chu?
• Thlarauva thâwk khum fuihna eng hian nge ṭhalaite chu nakin hun an ruahmannaah ṭanpui?
• Ṭhalaiin ‘Pathian a hnaih’ theih dân kawng ṭhenkhat chu engte nge?
• Ṭhalaiin a nakin hun nghawng tûr thuthlûkna a siam ṭhenkhat chu engte nge?
[Zirlai Atâna Zawhnate]
[Phêk 15-naa milemte]
I ṭhat lai chakna leh thathona zawng zawng chu mi mal hnaah i hmang ang em?
[Phêk 16, 17-naa milem]
Kristian ṭhalai fingte chuan an thlarau lam khawhmuh an tifiah reng