Intichak Tawn Rawh U
Intichak Tawn Rawh U
“Mi thlamuantute [“mi tichaktute,” NW] an ni.”—KOLOSSA 4:11.
1, 2. Engvângin nge hlauhawm chung pawha Paula chu a ṭhiante’n tân ina an tlawh?
TAN INA hrehawm tuara tâng tuemaw ṭhian nih chu a hlauhawm thei a—i ṭhian chu dik lo taka tântîr a nih pawhin a hlauhawm thei tho a ni. Tân in hotu chuan rinhlelhna mitin a en mai thei che a, dân i bawhchhiat leh chhiat loh hriat nân i kalna a piangah a enthla mai thei che. Chuvângin, i ṭhian tân ina tâng chu be pawp reng tûr leh tlawh pawh reng tûr chuan i huaisen a ngai a ni.
2 Mahse, hei hi kum 1,900 vêl kal taa tirhkoh Paula ṭhian ṭhenkhatte tih dân a ni. Anni chuan Paula tânna tân inah a mamawh hnemna leh fuihna pe tûr leh thlarau lama tichak tûrin an tlawh hreh miah lo va. Tute nge chûng a ṭhian rinawmte chu? An huaisenna te, rinawmna te, leh inṭhianna te aṭangin eng nge kan zir theih?—Thufingte 17:17.
“Tichaktute”
3, 4. (a) Tute nge Paula ṭhian mi pangate chu ni a, a tân eng nge an lo nih? (b) ‘Tichaktu’ tih chu eng tihna nge?
3 C.E. 60 kum vêlah lo kîrleh ta ila. Tirhkoh Paula chu hel anga puhna tawngin Rom khuaah a tâng a. (Tirhkohte 24:4; 25:11, 12) Paula chuan amah ṭanpuitu Kristian mi pangate chu a sawi a ni: Tukika, Asia ram aṭanga a palai leh “Lalpaa a unau duh tak”; Onesima, Kolossa khuaa “unau rinawm leh duh tak”; Aristarka, Makedonia mi Thessalonika khuaa mi Paula “tânpuipa”; Marka, Paula missionnary thawhpui Barnaba tupa, ama hmingpua Chanchin Ṭha ziaktu; leh Justa, ‘Pathian ram thu lama’ tirhkoh Paula thawhpuitu, tiin. Paula’n chûng mi pangate chungchângah: “Mi thlamuantute [“mi tichaktute,” NW] an ni,” a ti.—Kolossa 4:7-11.
4 Paula chuan a ṭhian rinawmte ṭanpui dân chungchângah thu thiltithei tak a sawi a ni. Ani chuan Bible-a he mi châng chauhva hmuh theih ‘tichaktu’ tia lehlin Grik thu mal (pa·re·go·riʹa) chu a hmang a ni. He thu mal hian awmze tam tak a nei a, a bîk takin damdawi lam chungchângah hman a ni. * Chu chu ‘inhnemna, chhâwkzângkhaina, thlamuanna, a nih loh leh hrehawm kianna’ tiin a hman theih a ni. Paula chuan chutiang ṭanpuina chu a mamawh a, chûng mi pangate chuan an pe a ni.
Paula’n ‘Tichaktu’ A Mamawh Chhan
5. Tirhkoh a ni chungin, Paula’n eng nge a mamawh a, kan vaiin eng thil nge mamawh châng kan neih?
5 Ṭhenkhat chuan Paula, tirhkoh meuhvin tichaktu a mamawh chu mak an ti hle mai thei a. Mahse, a mamawh miau si. Paula chuan rinna chak tak a nei a, kut thlâkna tam tak “vuaknaahte hleihluak takin, thihnaahte vawi tam tak,” leh thil dang dangte a tuar chhuak ngei mai. (2 Korinth 11:23-27) Mahse, ani pawh mihring a ni ve a, mihring zawng zawngte chuan mi dangte thlamuanna leh an ṭanpuina zâra rinna tihchak chu mamawh châng an nei ṭhîn a ni. Chu chu Isua chungchângah takngial pawh thil awmdân a ni. Zân hnuhnûng ber a hman lai khân, Gethsemane-ah vântirhkoh pakhat rawn inlârin ani chu a “tiharh [“tichak,” NW]” a ni.—Luka 22:43.
6, 7. (a) Rom khuaah tute’n nge Paula tilunghnual a, tuin nge amah fuih? (b) Rom khuaah khân, ‘tichaktu’ an nih phahna tûrin Paula Kristian unaute’n eng ang ṭanpuina nge an pêk?
6 Paula pawhin tihchak a mamawh a. Rom khuaa mi tâng anga a va thlen chuan, a chipuite chuan an lo lâwm ṭha lo va. Chûng Juda tam zâwkte chuan, Lalram thuchah chu an ngaihsak lo a ni. Juda mi liante’n a tânna hmuna an va tlawh hnu chuan, Tirhkohte thuziak chuan: “A ṭhenin a thusawi chu an ring a, a ṭhenin an ring lo va. Tin, an inngeih ta lo va, . . . an kal chhuak ta a,” a ti. (Tirhkohte 28:17, 24, 25) Jehova phu loh ngilneihna an hlut loh avângin Paula chu a va lungchhe dâwn êm! He mi chungchâng a veizia chu a hma lawka Rom kohhran hnêna a lehkha thawn ziakah a hmuh theih a ni: “Ka thinlungah hian hrehawmna nasa tak leh lungngaihna reh thei lo ka pai asin; kan unaute [Judate], tisa lama ka chipuite aiah hian, kei hi Krista hnên ata tihhran khawp laiin ânchhe dawngin awm hial ila ka ti si a,” tih chu. (Rom 9:2, 3) Mahse, Rom-ah chuan an huaisenna leh hmangaihnaa a thinlung thawidamtu mi rinawm leh ṭhian ṭha a hmu tho a ni. Anni chu thlarau lama a unau tak takte an ni.
7 Engtin nge chûng mi pangate chu tichaktu an lo nih? Anni chuan Paula chu tân ina khung a nih avâng maiin an pumpelh lo va. Châk tak leh duhsak takin Paula rawng an bâwlsak zâwk a, lung ina a tân avânga a tih theih loh thilte chu an tihsak a ni. Entîr nân, Paula thuchah kengtu angin kohhran chi hrang hranga ṭawngkam leh lehkha thawn hmanga zirtîrna a pêkte chu an hrilh chhâwngin an kensak a; Rom khua leh hmun danga unaute chanchin chu Paula tihchak nân a hnênah an thlen leh a ni. Paula mamawh thilte, entîr nân thlasik thawmhnaw te, lehkha zialte, leh a ziakna tûr hmanruate an leisak ngei ang. (Ephesi 6:21 22; 2 Timothea 4:11-13) Lung ina tâng tirhkoh tân chuan chûng ṭanpuinate chu tichaktu leh fuihna a ni tak zet a, ani pawh kohhran zawng zawng tiamin, mi dangte tân ‘tichaktu’ a nih ve theih phah a ni.—Rom 1:11, 12.
‘Tichaktu’ Nih Dân
8. Paula’n ‘tichaktu’ a mamawh tih inngaitlâwm taka a pawmna aṭangin zir tûr eng nge kan neih?
8 Paula leh a thawhpui mi pangate chanchin aṭangin eng nge kan zir theih? Zir tûr pakhat lo thlûr ta bîk ila: Mi dangte’n harsatna an tawh huna ṭanpui tûr chuan huaisenna leh mahni inpêkna neih a ngai tih hi a ni a. Tin, manganna kan tawh hunah ṭanpuina kan mamawh tih pawm nân inngaihtlâwm a ngai tih hi. Paula chuan ṭanpui a mamawh tih a pawm bâkah, chu ṭanpuina chu hlut taka dawngin, a petute chu a fak zui a ni. Mi dangte ṭanpuina dawn chu chak lohna hriltu ang emaw, mualphothlâk ang emawin a thlîr lo va, keini pawhin chutiang chuan kan thlîr tûr a ni hek lo. Tichaktu kan mamawh lo kan tih chuan mihring ṭha chungchuang kan ni tihna a ni thei a ni. Isua entîrnain a târ lan angin, mihring ṭha famkim tân pawh ṭanpui dîl a ngaih châng a awm thei tih hre reng rawh.—Hebrai 5:7.
9, 10. Miin ṭanpuina a mamawh tih a pawm hian eng rah ṭha nge lo awm thei a, chu chuan chhûngkua leh kohhrana mi dangte chungah eng thununna nge a neih theih?
9 Mawhphurhna neite’n tihtheih chin an nei tih leh mi dangte ṭanpuinaah an innghat tih an pawmna chuan rah ṭha a chhuah thei a. (Jakoba 3:2) Chutianga pawmna chuan thuneitute leh a hnuaia mite inkâra inzawmna chu a tinghet sauh va, inbiak pawhna duhawm tak leh tlang tak a siam a ni. Ṭanpuina pawm duhte inngaihtlâwmna chu chutiang dinhmuna ding mi dangte tân zir tûr hmuh theihah a chang thei a. Chu chuan hruaitute pawh mihring ve mai an ni a, pan an nuam a ni tih a târ lang a ni.—Thuhriltu 7:20.
10 Entîr nân, naupangte’n an buaina leh thlêmna tawh ang bawk an nu leh pate’n an naupan laiin an tâwk ve tih an hriat hian chutiang hmachhawn tûra an nu leh pate ṭanpuina chu pawm nuam an tih phah sawt ṭhîn a ni. (Kolossa 3:21) Chutiang chuan, naupang leh nu leh pate inkârah pawh inbiak pawhna ṭha a awmtîr thei a. Pathian Lehkha Thua a chinfel dân chu hlawhtling taka hriattîr theih a niin, awlsam taka pawm a nihtîr thei bawk a ni. (Ephesi 6:4) Chutiang bawkin, kohhrana mite chuan upate pawhin buainate, hlauhnate, leh mangannate an hmachhawn ve tih an hriat chuan, upate ṭanpuina chu an pawm duh lehzual ang. (Rom 12:3; 1 Petera 5:3) Hetah pawh hian, inbiak pawhna ṭha neih theih a ni a, Pathian Lehkha Thu zilhna hriattîr theih a ni a, rinna tihchakin a awm thei a ni. Kan unaute chuan tûn hma zawng aiin tichaktu an mamawh tih chu kan hre reng tûr a ni.—2 Timothea 3:1.
11. Engvângin nge tûn laiah mi tam takin ‘tichaktu’ an mamawh?
11 Khawi hmunah pawh awm ila, tupawh ni ila, a nih loh leh kum eng zâta upa pawh ni ila, kan vaiin lungngaihna tawh châng kan nei dâwn a. Chu chu tûn lai khawvêl dân a ni. (Thu Puan 12:12) Chutiang tisa lam emaw, rilru lam emawa hrehawmna dinhmunte chuan kan rinna chu a fiah a ni. Hna thawhnaah te, school-ah te, chhûngkaw zîngah te, leh kohhranah te chuan dinhmun khirh tak a thleng mai thei a. Natna khirh tak emaw, hun kal tawha hrehawm tawrh theihnghilh har tak chu lungngaihna awmtîrtu a ni thei. Kawppuiin, upain, a nih loh leh ṭhian ṭhain ngaihsakna ṭawngkam leh ṭanpuina ṭangkai tak ngilnei taka a pêk chuan—chu chuan a va thawi dam nasa dâwn êm! Chu chu vun thakna laia tirehtu damdawi hnawih ang a ni dâwn si a! Chuvângin, i unau tuemaw chu chutiang dinhmunah an awm tih i hriat chuan, a tân tichaktu ni ang che. A nih loh leh, harsatna engemaw takin a tlâk buak che chuan, thlarau lama puitlingte ṭanpuina chu dîl ang che.—Jakoba 5:14, 15.
Kohhranin A Ṭanpui Theih Dân
12. Kohhrana mi tinte chuan an unaute an tihchak theih nân eng nge an tih theih?
12 Kohhrana mi zawng zawng, naupangte thlengin mi dangte thlamuan nân tihtheih an nei a. Entîr nân, inkhâwmna leh thlawhhma rawngbâwlnaa i tel ziahna chuan mi dangte rinna chu a tichak thei hle a ni. (Hebrai 10:24, 25) Rawngbâwlna thianghlim thawk renga i nghehna chuan Jehova laka i rinawmna chu a târ lang a, harsatnate i tuar reng chung pawhin thlarau lamah i harhvâng reng tih a tilang a ni. (Ephesi 6:18) Chu nghehna chuan mi dangte a tichak thei a ni.—Jakoba 2:18.
13. Engvângin nge ṭhenkhat chu an inhman tawh loh va, anmahni ṭanpui tûrin eng nge tihtheih awm?
13 A châng chuan, nun lungkhamna emaw, harsatna dangte emaw avângin, ṭhenkhat chu thlawhhma rawngbâwlna lamah an tlahniam a, an bânsan hial thei a. (Marka 4:18, 19) Rawngbâwlna bânsante chu an inkhâwm lo mai thei. Mahse, an thinlungah Pathian hmangaihna chu an la nei mai thei a ni. An rinna tichak tûrin eng nge tih theih ni ang? Upate chuan anmahni va tlawhin ṭanpuina an pe thei a. (Tirhkohte 20:35) Kohhrana mi dangte chu ṭanpui tûrin an tîr thei bawk a ni. Chûng hmangaih taka va tlawhna chu rinna chak lote tichak thartu damdawi a tih theih ngei ang.
14, 15. Paula’n mi dangte tihchakna chungchângah eng zilhna nge a pêk? Kohhran pakhata mite’n chu zilhna an nunpui dân chu sawi rawh.
14 Bible chuan “rilru tête [“lungngaite,” NW] chu fuih ula, chak lote chu ṭanpui ula,” tiin min fuih a ni. (1 Thessalonika 5:14) Chûng “lungngaite” chu an huaisen tawh lovin, harsatnate chu ṭanpuina tel lo va sukiang thei tawh lovah an inngai mai thei a ni. Anni chu i ṭanpui thei ang em? “Chak lote . . . ṭanpui” tih ṭawngkam chu chak lote “vuan nghet tlat” a nih loh leh “chelh tlat” tia lehlin a ni a. Jehova chuan a berâm zawng zawng chu a hlutin a hmangaih a ni. Anni chu hlu vak lo angin a thlîr lo va, tuma tawlh bo pawh a duh hek lo. Thlarau lama chak lote chu an lo chak leh thlengin i “vuan nghet tlat” thei ang em?—Hebrai 2:1.
15 Upa pakhat chuan kum ruk lai rawngbâwlna bânsan tawh nupa tuak khat chu a va tlawh a. Upa chuan: “An chunga kohhran pumin a lantîr ngilneihna leh ngaihsakna chuan berâm huang chhûnga lo kîr leh tûrin an chungah ngawng ṭha tak a nei a ni,” tiin a ziak a ni. Tûn hmaa rawngbâwlna lo bânsan tawh unaunu pakhat chuan kohhran mite’n an tlawh chu eng angin nge a ngaih? Tûnah chuan heti hian a sawi a ni: “Inhmang leh tûra min ṭanpuitu chu mi lo tlawhtu unaupate emaw, anmahni lo zuitu unaunute emaw chuan min dem loh vâng emaw, thiam loh min chantîr loh vâng emaw a ni a. Chutianga ti lovin, anni chuan min hre thiamin, Pathian Lehkha Thua fuihnate chu min pe zâwk a ni,” tiin.
16. Tunge tihchak ngaite ṭanpui inpeih reng?
16 Ni e, Kristian dik tak chuan mi dangte tichaktu nih chu a duh a. Kan nunah dinhmunte a inthlâk hian, keini ngei pawh mi dangte tihchakin kan awm mai thei a ni. Mahse, ṭanpui kan mamawh lai hian kan unaute ṭanpuina chu kan dawng lo mai thei tih chu kan hriat a ngai a. Chutichung pawhin, tichaktu Hnâr pakhat, englai pawha mi ṭanpui peihtu a awm reng a ni—Pathian Jehova chu.—Sâm 27:10.
Jehova—Chakna Hnâr Ropui Ber
17, 18. Eng kawngin nge Jehova’n a Fapa, Isua Krista chu a tihchak?
17 Isua chuan, bana khenbeh a nih laiin: “Ka pa, i kutah ka thlarau ka kawltîr e,” a ti a. (Luka 23:46) Tichuan, a thi ta a. Chu mi hma lawkah ani chu man a ni a, a ṭhian ṭha berte chuan an thlahthlam a, an tlân bosan a ni. (Matthaia 26:56) Isua chuan chakna Hnâr, a Pa vâna mi chauh a nei tawh a ni. Mahse, Jehova a rinchhanna chu a thlâwn lo. A Pa chunga a rinawmna chu amah Jehova ngeiin rinawm taka ṭanpuina hmanga thungrulh a ni.—Sâm 18:25; Hebrai 7:26.
18 Isua’n leia rawng a bâwl chhûng zawng khân, Jehova chuan a Fapa chu a thih thlenga rinawmna vawng tûra a mamawh apiang chu a pe a. Entîr nân, Isua lei lam rawngbâwl ṭanna chhinchhiahna baptisma a chan hnu lawkah chuan, pawm a nihzia târ lanna leh amah A hmangaihzia nem nghehna a Pa aw chu a hria a ni. Isua’n ṭanpui a mamawhin, Jehova’n amah tichak tûrin vântirhkoh a tîr a. A lei nun tâwp lama fiahna nasa tak a tawhin, Jehova chuan a ṭawngṭainate leh a dîlnate chu a ngaihthlâksak a ni. Chûng zawng zawng chu Isua tân tichaktu a ni ngei a ni.—Marka 1:11, 13; Luka 22:43.
19, 20. Kan mamawh hunah Jehova’n min tichak thei tih engtin nge kan hriat chian theih?
19 Jehova chuan kan tân pawha chakna Hnâr nih chu a duh a. (2 Chronicles 16:9) Chakna nasa tak leh thiltih theihna zawng zawng Hnâr dik tak chu kan mamawh huna tichaktu a lo ni thei a ni. (Isaia 40:26) Indona te, retheihna te, natna te, thihna te, a nih loh leh kan ṭhat famkim lohna te chuan nasa takin min tilungngai thei a. Nuna fiahnate chu “dotu chak tak” ang a nih hunah, Jehova chu kan chakna leh kan hla a ni thei a ni. (Sâm 18:17; Exodus 15:2) Ani chuan kan tân ṭanpuitu thiltithei tak a nei—a thlarau thianghlim chu. A thlarau hmangin, Jehova’n “chau hnênahte chuan thiltihtheihna” a pe thei a; chuti chuan, “mupuite angin thlain an thlâwk chho vang.”—Isaia 40:29, 31.
20 Pathian thlarau chu lei leh vâna chakna thiltithei ber a ni a. Paula chuan: “Mi tichaktuah chuan engkim ka ti thei a ni,” a ti. Ni e, lo thleng thuai tûr a thutiam Paradis-a “thil engkim [a] siam thar” hma loh zawnga harsatna nasa takte kan tawrh theihna tûrin, kan duh tak kan Pa vâna mi chuan ‘thiltihtheihna nasa takin’ min thuam thei a ni.—Philippi 4:13; 2 Korinth 4:7; Thu Puan 21:4, 5. (w04 5/1)
[Footnote]
^ par. 4 W. E. Vine-a ziah Bible ṭawngkam hrilhfiahna, Vine’s Complete Expository Dictionary of Old and New Testament Words, chuan: “He thu mal [paregoría] hi ṭawng tuallêngah chuan thak tirehtu damdawi sawina a ni,” a ti.
I Hre Chhuak Em?
• Engtin nge Rom khuaa unaute chu Paula tân “tichaktute” an nih?
• Eng kawngin nge kohhranah ‘tichaktu’ kan nih theih?
• Engtin nge Jehova chu kan chakna Hnâr ropui ber a nih?
[Zirlai Atâna Zawhnate]
[Phêk 18-naa milem]
Unaute chu rinawm taka ṭanpuina te, fuihna te, leh rawngbâwlsakna te hmangin Paula “tichaktute” an lo ni
[Phêk 21-naa milem]
Berâmte tihchakna kawngah upate’n hma an hruai