Jeremia Angin Huaisen Rawh
Jeremia Angin Huaisen Rawh
“LALPA chu nghâk reng rawh; chak takin awm la, i thinlung chu intihuai rawh se; a ni, LALPA chu nghâk reng rawh.”—SAM 27:14.
1. Eng malsâwmna nasa tak nge Jehova Thuhretute’n an chen?
JEHOVA THUHRETUTE chu thlarau lam paradise-ah an chêng a. (Isaia 11:6-9) He khawvêl buai tak kârah hian, an Kristianpui, Pathian Jehova leh anmahni inkâra remna neite nên thlarau lam dinhmun ṭha tak chu an chên a ni. (Sâm 29:11; Isaia 54:13) Tin, an thlarau lam paradis chu a ṭhang chho zêl a. “Thinlunga Pathian duhzâwng ti” zawng zawngte chuan chu chu an zauh a ni. (Ephesi 6:5-8) Engtin nge an zauh? Bible thu bulte mila nunna hmangin leh mi dangte pawh chutianga nung ve tûra zirtîrna hmangin an zauh va; chutiang chuan, chu paradis malsâwmna nasa tak chên ve tûrin anni chu an sâwm a ni.—Matthaia 28:19, 20; Johana 15:8.
2, 3. Kristian dikte chuan eng nge an tawrh ngai?
2 Amaherawhchu, thlarau lam paradis-a kan awm avângin fiahna kan tâwk lo tihna a ni lo. Kan vaiin mihring famkim lo kan la niin, natna te, kum upat avânga bawrhsâwmnate, a tâwpa thihnate chuan min tlâkbuak reng a ni. Chu bâkah, ‘ni hnuhnûnga’ thleng famkim tûr hrilh lâwknate chu kan tawng mêk a ni. (2 Timothea 3:1) Mihring zawng zawng chuan indona te, dân bawhchhiatna te, ṭâm te, leh harsatna nasa tak dang te chu an tuar a, Jehova Thuhretute pawhin an tuar ve bawk a ni.—Marka 13:3-10; Luka 21:10, 11.
3 Chûng zawng zawng bâkah, kan himna thlarau lam paradis-a tel lote hnên aṭangin dodâlna nasa tak chu kan tâwk a ni tih kan hre chiang a. Isua’n a hnungzuitute chu: “Khawvêla mi in ni si lo va, khawvêla mi ka thlan chhuak zâwk che u avâng hian khawvêlin a hua che u a ni e. ‘Bâwih a pu aiin a ropui lo,’ tih thu ka hrilh tawh che u kha hre reng rawh u. Annin kei mi tihduhdah tawh chuan nangni pawh an tiduhdah ang che u,” tiin a vaukhân a ni. (Johana 15:18-21) Tûn laiah pawh chutiang bawk chu a ni a. Mi a tam zâwk chuan kan Pathian biak dân hi an la hre thiam lovin, an hlut lo va. Ṭhenkhat chuan min sawichhia a, min nuihsawh bawk a; a nih loh leh Isua vaukhân lâwk angin, min haw hial a ni. (Matthaia 10:22) Chanchin thehdarhna hmanga kan chungchâng thu dik lo leh ngaih dân dik lote chu theh darh a ni ṭhîn. (Sâm 109:1-3) Ni e, dinhmun khirhte chu kan hmachhawn ṭheuh va, kan zînga ṭhenkhat chu an lunghnual ṭan mai thei a ni. Engtin nge kan tawrh theih ang?
4. Chhel taka tuar thei tûra ṭanpuina chu khawiah nge kan zawn?
4 Jehova chuan min ṭanpui ang. Thlarauva thâwk khumin, fakna hla phuahtu chuan: “Mi fel hrehawmnate chu a tam a, nimahsela LALPAN chûng zawng zawngah chuan a chhan chhuak ṭhîn,” tiin a ziak a ni. (Sâm 34:19; 1 Korinth 10:13) Kan zînga tam tak chuan Jehova kan rinchhan pumhlûm chuan, harsatna eng pawh chhel taka tuar thei tûrin chakna min pe a ni tih chu kan nemnghet thei a. Amah kan hmangaihna leh kan hmaa hlimna awm chuan lunghnualna leh hlauhna te hneh tûrin min ṭanpui a ni. (Hebrai 12:2) Chuvângin, harsatna kan hmachhawn chung pawhin, kan ding nghet tlat a ni.
Pathian Thuin Jeremia A Tichak
5, 6. (a) Pathian betu dik mi chhel takte entawn tûr siam eng nge kan neih? (b) Jeremia chuan zâwlnei ni tûra koh a nih khân, engtin nge a chhân lêt?
5 Mihring chanchin tluanchhuakah chuan, Jehova chhiahhlawh mi rinawmte chuan hun khirhah pawh hlimna an nei a. Mi ṭhenkhat chu Jehova’n mi rinawm lote chunga a thinur avânga rorêlna a thlentîr hunah an nung a ni. Chûng mi rinawmte zîngah chuan Jeremia leh a dam rualpui zînga mi tlêm tê, leh kum zabi pakhatnaa Kristiante pawh an tel a. Chûng hmân lai thilthleng entawn tûrte chu mi fuihtu atân Bible-ah a chuang a, chûngte kan zirna aṭangin thil tam tak kan zir thei a ni. (Rom 15:4) Entîr nân, Jeremia hi lo ngaihtuah ta ila.
6 Naupang a nih laiin, Jeremia chuan Judai rama zâwlnei ni tûrin kohna a dawng a. Chu chu hna awlsam a ni hauh lo. Mi tam tak chuan pathian dik lote an bia a. Jeremia rawngbâwl ṭan laia lal ni mêk Josia chu lal rinawm tak ni mah se, a hnua lal zawng zawng chu an rinawm lo va, mite zirtîr tûra mawhphurhna nei—zâwlneite leh puithiam—a tam zâwkte chu thutak lamah an ṭang tlat lo. (Jeremia 1:1, 2; 6:13; 23:11) A nih leh, Jehova’n zâwlnei ni tûra a koh khân, Jeremia chu engtin nge a awm? A hlau hle a ni! (Jeremia 1:8, 17) Jeremia’n a chhân lêt ṭan dân chu: “Kei chuan, ‘E, Lalpa PATHIAN, ngai teh, thu ka sawi thiam lo, ka naupang si,’ ka ti a,” tiin a sawi leh a ni.—Jeremia 1:6.
7. Eng thil nge Jeremia’n a tawh a, engtin nge a chhân lêt?
7 Jeremia thuhrilhna biala awmte chu mi thinlung sak an ni deuh vek hlawm a, dodâlna nasa tak pawh a tâwk fo a ni. Ṭum khat phei chu, puithiam Pasura’n a vua a, kawlah a tântîr a. Jeremia’n chuti laia a rilru chu ti hian a sawi a: “[Jehova] chu ka lam lo vang a, a hmingin thu kan sawi tawh hek lo ang,” tiin. Nang pawhin chutianga tih châng neiin, bânsan hial duh châng pawh i nei mai thei. Chhel ṭâng ṭâng tûra Jeremia ṭanpuitu hi lo chhinchhiah teh. Ani chuan: “Ka ruh chhûnga mei kâng inkhung ta ang mai hian ka thinlung chhûngah chuan [Pathian thu, a nih loh leh thuchah] a awm si ṭhîn, ka pai hle hle zo lo va, ka chelh ngang lo a ni,” a ti a. (Jeremia 20:9) Pathian Thuin chutiang chuan a nghawng ve che em?
Jeremia Ṭhiante
8, 9. (a) Eng chak lohna nge zâwlnei Uria’n a lantîr a, eng nge a rah chhuah? (b) Engvângin nge Baruka kha a lunghnual a, engtia ṭanpui nge a nih?
8 Jeremia chu a thu hrilh lâwknaah a mal ṭan lo. Ṭhian a nei a, anni chuan amah an fuih ngei ang. Mahse, a châng chuan a ṭhiante chu an che fîmkhur ṭhîn lo. Entîr nân, a ṭhian zâwlnei Uria chu “Jeremia thu sawi zawng zawng ang bawkin” Jerusalem leh Judai ram chhiatna tûr thu sawiin a buai hle a. Amaherawhchu, Lal Jehoiakima’n amah tihlum tûra thupêk a chhuah chuan, Uria chu hlauvin Aigupta ramah a tlân bo a ni. Mahse, a him phah chuang lo. Lal mi tirhte chuan an ûm a, manin Jerusalemah an hruaikîr leh a, chutah chuan an tihlum ta a. Jeremia tân chuan a va thin ṭhâwnthlâk âwm êm!—Jeremia 26:20-23.
9 Jeremia ṭhian dang leh chu a lehkha ziaktu Baruka a ni a. Baruka chuan ṭha takin Jeremia a ṭanpui a; mahse, ṭum khat chu ani pawhin a thlarau lam khaw hmuhna a hloh ve a ni. A phunnawi ṭanin: “Ka chung a va pik ta êm! LALPA chuan ka tuarnaah lungngaihna mi belhchhah ta si a: ka rûm hi ka chauhpui a, hahdamna rêng ka hmu zo lo,” a ti a ni. Baruka chu a lunghnualin, thlarau lam thilte a ngaihhlutna chu a hloh ṭan a. Chutichung chuan, Jehova chuan Baruka chu ngilnei takin zilhhauhna fing tak a pe a; tichuan, ani chu a insiam ṭha leh a ni. Chutah Jerusalem tihchhiatnaah chhanchhuah a ni dâwn tih thutiam pêk a ni. (Jeremia 45:1-5) Thlarau lama Baruka chak lehna chuan Jeremia chu a va tiphûr dâwn êm!
Jehova’n A Zâwlnei A Ṭanpui
10. Jehova’n Jeremia hnênah eng ṭanpuina nge a tiam?
10 A pawimawh ber chu, Jehova’n Jeremia a thlahthlam lo hi a ni a. A zâwlnei rilru chu a hria a, a mamawh chakna leh ṭanpuina chu a pe a ni. Entîr nân, Jeremia’n rawng a bâwl ṭan dâwna a tlin loh a hlauh khân, Jehova’n: “Anmahni avângin hlau suh la, chhan chhuak tûr chein i hnênah ka awm e, tih hi LALPA thu chhuak a ni,” tiin a hrilh a ni. Zâwlnei hnêna a thawh tûr a hrilh zawh hnuah, Jehova chuan: “An bei ang chia, mahse an hneh lo vang che: chhan chhuak tûr chein i hnênah ka awm si a, tih hi LALPA thu chhuak a ni,” a ti a. (Jeremia 1:8, 19) A va thlamuanthlâk tak êm! Tichuan, Jehova’n a thutiam chu a hlen a ni.
11. Engtin nge Jehova chuan Jeremia ṭanpui tûra a thutiam chu a hlen tih kan hriat theih?
11 Chuvângin, kawla tântîr a nih a, vântlâng nuihzat a nih hnu chuan, Jeremia chuan inring tâwk takin: “LALPA chu mi huaisen hlauhawm tak angin ka hnênah a awm a, mi tiduhdahtute chu an tlu ang a, mi hneh lo vang. Mualpho takin an awm ang,” tiin a sawi a ni. (Jeremia 20:11) A hnua Jeremia tihhlum an tum pawhin, Jehova chu a hnênah a awm zêl a, amah tiduhdahtute leh a vaukhânna thu ngaihsak lotute chu an thi emaw, Babulon-a hruai emaw an ni hlawm a. Mahse, Baruka ang bawkin Jeremia chu chu tihchhiatnaah chuan a dam khawchhuak a, chhuah a ni ta a ni.
12. Lunghnual chhan tûr awm mah se, eng nge kan rilrua kan dah tûr?
12 Jeremia angin, tûn laia Jehova Thuhretu tam tak chuan hrehawmnate chu an tuar chhuak a. Atîra târ lan angin, hêng zînga ṭhenkhat chu kan mihring ṭhat famkim loh vâng a ni a, a dangte chu he khawvêl dinhmun buai tak vâng a ni bawk a, a dang lehte chu kan rawngbâwlna dodâltute vâng a ni bawk. Chûng hrehawmnate chuan mi tilunghnual thei a. Jeremia ang bawkin, rawngbâwlna kan chhunzawm zêl theih pawh kan ring lo hial thei a ni. A nihna takah chuan, lunghnual châng neih zeuh zeuh chu kan inbeisei thei a. Lunghnualna chuan Jehova kan hmangaihna a nasat dân chu a fiah a ni. Chuvângin, Uria anga lunghnualna avânga Jehova rawngbâwlna bânsan loh chu i tum tlat ang u. Chu aimahin, Jeremia entawnin Jehova ṭanpuina chu i ring tlat ang u.
Lunghnualna Do Dân
13. Engtin nge Jeremia leh Davida entawn tûr chu kan zui theih ang?
13 Jeremia chu Pathian Jehova nên an inbe pawp reng a, a rilru chhûngril ber chu hrilhin, chakna a dîl ngawih ngawih a ni. Chu chu entawn tûr ṭha tak a ni. Chu chakna Hnâr bawk lo beiseitu hmân laia Davida chuan: “Aw LALPA, ka thu-ah hian beng lo chhi la, ka ngaihtuahna hi ngaihtuah ang che. Ka Lal leh ka Pathian, ka au thâwm hi ngaithla ang che: i hnêna ṭawngṭai ka ni si a,” tiin a ziak a ni. (Sâm 5:1, 2) Thâwk khuma ziak Davida nun kawng chanchin chuan ṭanpui dîla Davida ṭawngṭaina chu Jehova chuan a chhâng nawn fo tih a târ lang a ni. (Sâm 18:1, 2; 21:1-5) Chutiang bawkin, nêksâwrna a nasat viau va, kan buainate hi chinfel theih rual loh anga a lan chuan, Jehova hnêna ṭawngṭai a, kan thinlung a hnêna leihbuak chu a thlamuanthlâk ber a ni. (Philippi 4:6, 7; 1 Thessalonika 5:16-18) Jehova chuan min ngaithla lo ngai lo. ‘Min ngaihsak’ a ni tih min tiam zâwk mah a ni. (1 Petera 5:6, 7) Amaherawhchu, a thu sawi ngaithla si lo va, Jehova hnêna ṭawngṭai chu a âwm dâwn em ni?
14. Jehova thuin Jeremia chungah eng nghawng nge a neih?
14 Engtin nge Jehova’n mi biak? Jeremia kha han ngaihtuah leh teh. Jeremia chu zâwlnei a nih avângin, Jehova chuan tlang takin a be pawp a. Ani chuan Pathian Thuin a thinlung a khawih dân chu a târ lang a ni: “I thute chu tihlan a ni a, ka ei a, i thute chu ka tân lâwmna leh ka thinlung hlimna a ni; Aw LALPA, Sipaihote Pathian, i hming kan pu ta si a,” tiin. (Jeremia 15:16) Ni e, Jeremia chu Pathian hming a put avângin a lâwm hle a, A thute chu atân chuan a hlu a ni. Chuvângin, tirhkoh Paula angin, Jeremia chuan kawltîr a nih thuchah puan chu a phûr hle a ni.—Rom 1:15, 16.
15. Engtin nge Jehova thu kan thinglunga kan tuh theih ang a, eng ngaihtuahnain nge ngawih reng loh min tumtîr ang?
15 Tûn lai hian Jehova chuan hmaichhanah tumah a be ngai lo va. Mahse, Bible-a chuang Pathian thute chu kan nei a ni. Chuvângin, taima taka Bible kan zir a, kan zirte ṭha taka kan chhût ngun chuan, Pathian thute chu kan tân ‘lâwmna leh thinlung hlimna’ a lo ni ang. Mi dangte hnêna chûng thute hrilh tûra kan kalin, Jehova hming kan pu tihna a ni a, chuvângin kan lâwm hle a ni. Tûn lai khawvêla tumahin Jehova hming chu an puang lo tih i theih nghilh ngai lo vang u. A Thuhretute chauhvin Pathian Lalram din tawh chanchin ṭha chu an puangin, mi thinlung ṭhate chu Isua Krista zirtîr ni tûrin an zirtîr a ni. (Matthaia 28:19, 20) Malsâwmna kan va dawng tak êm! Jehova min pêk chanvo ropui tak ngaihtuahin, engtin nge kan ngawih theih tehlul ang?
Ṭhian Kawmah I Fîmkhur Ang U
16, 17. Ṭhian kawm chungchâng Jeremia thlîr dân chu eng nge ni a, engtin nge kan entawn theih ang?
16 Jeremia chuan huaisen tûra ṭanpuitu thil dang pawh a sawi lang a. Ani chuan: “Nuamsip bâwltuteho zîngah ka tel lo va, ka hlimpui hek lo; nangma kut avângin a fâlin ka ṭhu a, lungnih lohnain mi tikhat si a,” a ti a ni. (Jeremia 15:17) Jeremia chuan ṭhian sualte tihkhawloha awm ai chuan, mahni chauhva awm fâl chu a duh zâwk a. Tûn laiah pawh chutiang chuan kan thlang zâwk a ni. Tirhkoh Paula vaukhânna “ṭhian sualte chuan nungchang ṭha an tikhawlo ṭhîn” tih hi kan theihnghilh ngai lo, chûng chuan kum tam tak aṭanga kan neih tawh nungchang ṭhate pawh a tikhawlo ṭhîn a ni.—1 Korinth 15:33.
17 Ṭhian sualte chuan khawvêl thlarauvin kan ngaihtuahnate a tihbawlhhlawh chu an phal thei a. (1 Korinth 2:12; Ephesi 2:2; Jakoba 4:4) Chuvângin, min tina thei ṭhian sualte thliar hrang thei a, kan pumpelh ṭhak theih nân kan thil hriat theihnate chu i sâwizawi ang u. (Hebrai 5:14) Paula kha la dam se chuan, nungchang bawlhhlawhna emaw, tharum thawhna cinema leh infiamna emaw entu Kristiante hnênah eng thil nge a sawi i rin? Internet-a hmêlhriat miah loh mi dang nêna inkawm chîngtu unaupa chu engtin nge a zilhhau vang? Darkâr tam tak video game khelh nân emaw, television en nân emawa hmang si a, mi mala zirna hun ṭha nei si lo Kristian chu engtin nge a ngaih ang?—2 Korinth 6:14b; Ephesi 5:3-5, 15, 16.
Thlarau Lam Paradis-ah Awm Zêl Rawh
18. Engin nge thlarau lama chak reng tûrin min ṭanpui ang?
18 Kan thlarau lam paradis chu kan roh a. Tûn lai khawvêlah a anpui thil eng mah a awm lo. Ring lo mite takngial pawhin Kristiante inkâra hmangaihna te, inngaihsakna te, leh ngilneihna te chu an fak a ni. (Ephesi 4:31, 32) Chutiang a ni chung pawhin, tûn hma zawng aiin lunghnualna chu kan do a ngai a. Ṭhian ṭha, ṭawngṭaina, leh zirna hun ṭha neih chuan thlarau lama chak reng tûrin min ṭanpui thei a ni. Chûngte chuan Jehova rinchhan tlat chunga fiahna engpawh hmachhawn tûrin min tichak ang.—2 Korinth 4:7, 8.
19, 20. (a) Engin nge chhel taka tuar tûrin min ṭanpui ang? (b) A dawta thuziak hi tute tân nge ni a, tute tân pawh nge ngaihvenawm tak a nih?
19 Kan Bible thuchah hawtute tihṭhaih leh kan rinna tihchhiatin i awm ngai lo vang u. Jeremia tiduhdahtu hmêlmate angin, min dotute chu Pathian dotute an ni a. An hlawhtling ngai lo vang. Kan hmêlmate aia chak zâwk, Jehova chuan: “LALPA chu nghâk reng rawh; chak takin awm la, i thinlung chu intihuai rawh se; a ni, LALPA chu nghâk reng rawh,” tiin min hrilh a ni. (Sâm 27:14) Jehova beiseina nei tlatin, thil ṭha tih bânsan loh chu i tum tlat ang u. Jeremia leh Baruka angin, kan inthlahdah loh chuan a hunah a rah kan seng dâwn tih chu i ring tlat bawk ang u.—Galatia 6:9.
20 Kristian tam tak tân chuan lunghnualna do reng a ngai a. Mahse, ṭhalaite chuan harsatna engemaw bîk tak an hmachhawn a. Chutichung pawhin, hun remchâng ṭha tak an nei bawk. A dawta thuziak chu kan zînga ṭhalaite tân bîk a ni. Chu chu ṭawngkam te, entawn tûr te, leh ṭanpuina te hmanga kohhrana naupang zâwkte ṭanpuina pe thei dinhmuna ding nu leh pate leh inpumpêk puitling zawng zawngte tân ngaihvenawm tak a ni bawk ang. (w04 5/1)
Engtin Nge I Chhan Ang?
• Engvângin nge lunghnualna dinhmunte chu kan beisei theih a, tu ṭanpuina nge kan beisei ang?
• Engtin nge Jeremia’n hna khirh tak thawh tûr a nei chung pawha lunghnualna a do hneh?
• Engin nge harsatna kârah pawh kan thinlung chu ‘hlim tak leh lâwm taka’ awmtîr ang?
[Zirlai Atâna Zawhnate]
[Phêk 9-naa milem]
Jeremia chu zâwlnei ni tûrin naupang lutuk leh thiltawn nei lovah a inngai
[Phêk 10-naa milem]
Tihduhdah a ni chung pawhin, Jeremia chuan Jehova chu “mi huaisen hlauhawm tak angin” a hnênah a awm tih a hria