Rebeki​—⁠Pathian Ṭih Mi Hmeichhe Taima

NANGMAH ngeiin i fapa nupui tûr thlansak thei ni ta la, eng ang mi nge i thlan ang? Eng thiamna nge a neih ngai ang? Hmêl ṭha, fing, ngilnei, leh taima em ni i thlan dâwn? Nge, a nihna dang i en hmasa zâwk dâwn?

Abrahama chuan he harsatna hi a tâwk a ni. Jehova chuan a fapa Isaaka kaltlangin a thlahte malsâwm chu a tiam a. He chanchin kan ngaihtuah ṭan hun lai hian, Abrahama chu a upa tawh hle a; mahse, a fapa chu a la tlangvâl rih a ni. (Genesis 12:​1-3, 7; 17:19; 22:​17, 18; 24:1) Isaaka chuan malsâwmna chu a nupui la ni tûr leh chu mi nêna an fa neih apiang nêna an dawn tlân tûr a nih avângin, Abrahama chuan Isaaka tâna nupui âwm thlang tûrin ruahmanna a siam ta a. A pawimawh berah chuan, chu hmeichhia chu Jehova chhiahhlawh a ni tûr a ni. Chutiang hmeichhia chu a chênna hmun Kanaan-ah hmuh tûr an awm loh avângin, hmun danga a zawn a ngai ta a. A tâwp atâwpah chuan Rebeki chu thlan a ni ta. Engtin nge ani chu zawn hmun a nih? Thlarau mi tak a ni em? A entawn tûr siam ngaihtuahna aṭangin eng nge kan zir theih?

Hmeichhe Tling Zawnna

Abrahama chuan a chhiahhlawh zînga upa ber, Eliazara chu Jehova betu a laichînte zîng aṭanga a fapa Isaaka nupui tûr thlang tûrin Mesopotamia ram hla takah a tîr a. Chu thil chu thil khûnkhân tak a nih avângin, Eliazara chu Isaaka tâna Kanaan mi hmeichhiate thlang lo tûrin chhia chhamtîr a ni a. He mi chungchânga Abrahama tih kher kherna hi a chhinchhiah tlâk hle.​—⁠Genesis 24:​2-10.

Eliazara chuan Abrahama laichînte khua a thlen hnu chuan a sanghâwngsei sâwmte chu tuichhunchhuahah a hruai a. Thil awm dân tûr chu han mitthla teh! Tlai lam a ni a, hetiang hian Eliazara chu a ṭawngṭai a: “En teh, tuikhur kiangah ka  ding a, khuaa mite fanuho pawh tui chawi tûra an lo kal hi: tichuan heti hian ni rawh se, nula tu hnênah pawh, ‘Khawngaih takin ka in tûrin i tui bêl kha tihniam teh khai,’ ka tiha, tin, aniina, ‘In rawh, i sanghâwngseite pawh hi in tûr ka pe ang e,’ titu apiang; chu mi ngei chu i chhiahhlawh Isaaka tâna i mi ruat chu ni rawh se,” tiin.​—⁠Genesis 24:​11-14.

Chu lai hmuna chêng hmeichheho pawhin an hriat vek angin, sanghâwngsei tuihâl tak pakhat chuan tui a in tam thei hle a (liter 100 thleng a in thei a ni). Sanghâwngsei sâwm lai mai tâna tui châwi inhuam chu hmeichhe taima tak a nih a ngai a ni. Chutiang hmeichhiain mi dangin ṭanpui pawh tum lova an thlîr ṭhup laia chutianga a thawhna chuan a chakzia te, a dawhtheihzia te, a inngaihtlâwmzia te, leh mihring leh ran chunga a ngilneihzia te a târ lang dâwn a ni.

Engtin nge ni zêl? “A sawi zawh hma chuan, ngai teh, Abrahama nau Nahora nupui Milkaii fapa Bathuela fanu Rebeki chu a kokia tui bêl puin a lo chhuak a. Chu nula chu a hmêl a ṭha êm êm a, nula thianghlim a ni a. . . . Tin, tuikhurah chuan a chhuk a, a tui bêl chu a tikhat a, a chho leh a. Tin, chhiahhlawh chu a tâwk tûrin a tlân a, ‘Khawngaih takin i tui bêla tui kha tlêm tê mi intîr teh khai’ a ti a. Tin, ani chuan, ‘In ta che, ka pu,’ a ti a: tin, rang takin a tui bêl chu a kutah a chawi thla a, a intîr ta a.”​—⁠Genesis 24:​15-18.

Rebeki Chu A Tling Em?

Rebeki chu Abrahama a unaupa tunu a ni a, a hmêlṭhat mai bâkah a fel hle bawk a ni. Ani chuan mi khual biak chu a hreh lo va, mawi lo khawpin a nêl hek lo. Eliazara’n tui in tûr a dîl chuan a pe mai a ni. Chutianga tih chu hawihhâwmna lantîrna tlânglâwn tak a nih avângin, beisei tûr rêng a ni a. Mahse, enchhinna a la bâng zawng chu engtin nge?

Rebeki chuan: “In ta che, ka pu,” a ti a. Mahse, chutah a tâwp mai lo. Heti hian a sawi zawm a ni: “I sanghâwngseite tân pawh an in kham hma loh chuan ka chawi zêl ang e,” tiin. Ani chuan thil beisei âwm pângngai mai aia tam tih a inhuam a ni. Tichuan, rang takin, “tui chawi tûrin tuichhunchhuah lamah chuan a tlân leh a, a sanghâwngseite zawng zawng tân chuan a chawi ta  zêl a.” A thiltih lai chu taima takin a ti a ni. “Chhiahhlawh chuan [mak ti takin] ani chu a en reng a,” tih thuziak chuan min hrilh a ni.​—⁠Genesis 24:​19-21.

Chu nula chu Abrahama laichîn a ni tih a hriat chuan, Eliazara chuan a lû kûnin, Jehova hnênah lâwmthu a hrilh a. A pa inah amah leh a rante riahna tûr hmun a awm leh awm loh a zâwt a. Rebeki chuan a awm tih a hrilh a; tichuan, mikhual an neih thu hrilh tûrin a tlân haw ta sawk sawk a.​—⁠Genesis 24:​22-28.

Eliazara’n thil awm dân a sawi an ngaihthlâk hnu chuan, Rebeki unaupa Labana leh a pa Bethuela chuan Pathian hnên aṭanga chhuak a ni tih an hre thiam nghâl a. Rebeki chu Isaaka tâna Pathian ruat a ni ngei a ni. “Hruai la, kal ta che, LALPAN a sawi tawh angin i pu fapaa nupuiah awm rawh se,” an ti a. Engtin nge Rebeki’n a ngaih? Kal nghâl a duh leh duh loh an zawh chuan Hebrai ṭawnga ṭawngkam khatin a chhâng nghâl thuai a, chu chu: “Duh ang chu,” tihna a ni. Ani chu nupui atâna an biakna pawm tûra tihluih a ni lo. Chu chu “hmeichhia chuan a zui duh loh . . . chuan” Eliazara chu a thutiam aṭangin a fihlim dâwn tho tih Abrahama ṭawngkam khân a târ lang chiang hle a ni. Mahse, Rebeki pawhin thil chu Pathian kaihhruaina a ni tih a hmu thiam a. Chuvângin, muangchâng lovin, a mi hriat ngai loh pasala nei tûr chuan a chhûngte chu a kalsan nghâl a ni. Huaisen taka chu thutlûkna a siam chuan rinna nasa tak a neihzia a târ lang a ni. Nupui atâna thlan tûr dik tak chu a ni nameuh mai!​—⁠Genesis 24:​29-59.

Isaaka a hmuh vêleh Rebeki chuan a intukluhzia lantîr nân a inkhuhna puanin a hmai a khuh a. Isaaka chuan nupuiah a nei a, a mize ṭha takte avângin a hmangaih ta êm êm a ni.​—⁠Genesis 24:​62-67.

Fapa Phîr

Rebeki chu kum 19 vêl chhûng fa nei lovin a awm a. A tâwp a tâwpah chuan phîr a pai ta a;  mahse, a naupaite chu a pum chhûnga an insual nasat avângin a pai a hrehawm hle a, Jehova ṭanpuina a ngên hial a ni. Keini pawhin manganna nasa tak kan tawh chângin Jehova kan au ve thei a ni. Jehova chuan Rebeki au thâwm chu a hria a, a thlamuan a. Ani chu hnam pahnih lo pianna nu a ni ang a, “a upa zâwk chuan a naupang zâwk rawng a bâwl ang,” tiin.​—⁠Genesis 25:​20-26.

Chu thutiam chu Rebeki’n a fapa naupang zâwk Jakoba a hmangaih zâwk chhan awmchhun a ni lo vang. Chûng mipa naupang pahnihte chu an inang lo êm êm a. Jakoba chu “mi ni chuah” a ni a, Esauva erawh chuan thlarau lam thil a ngaihsak lo êm êm a, chaw vawikhat ei lekah Pathian thutiamte rochung tûra dikna a neih, fa upa zâwk nihna chu Jakoba hnênah a hralh mai a ni. Hetha hnam hmeichhiate nupuia a neihna chuan thlarau lam thil a hmusit a nih loh vêk leh a ngaihhlut lohzia a târ lang a, chu chuan a nu leh pa a tilungngai êm êm a ni.​—⁠Genesis 25:​27-34; 26:​34, 35.

Jakoba’n Malsâwmna A Dawn Theih Nâna Ṭanlâkna

Bible chuan Esauva’n Jakoba rawng a bâwl dâwn tih Isaaka’n a hriat leh hriat loh min hrilh lo va. Engpawhnise, Rebeki leh Jakoba chuan malsâwmna chu Jakoba’n a dawng tih an hria a ni. Rebeki chuan Esauva’n a pa tâna a sa pelh sa a rawn pêk hunah Isaaka chuan mal a lo sâwm dâwn tih a lo hriat chuan hma a la vat a. A tleirâwl laia a mizia, tum ruhna leh a taihmâkna te chu a la nei reng a ni. Ani chuan Jakoba chu kêl no pahnih rawn la tûrin ‘thu a pe’ a. Ani chuan a pasal ngainatzâwng tak chawhmeh a buatsaih ang a. Chutah Jakoba chu malsâwmna dawng tûrin Esauva lemah a chang dâwn a ni. Jakoba erawh chuan a u lema chan chu a hnial a. A pa chuan a thil ruahman chu a hria anga ânchhia a lawh mai ang tih a hlau a ni! Mahse, Rebeki chuan a tilui tlat a. “Ka fapa, i ânchhe dawn tûr chu ka chungah awm rawh se,” a ti tlat a. Tichuan, chawhmeh chu a buatsaih ta a, Jakoba pawh Esauva ang tûrin a chei danglam a, a pasal hnênah a tîr ta a ni.​—⁠Genesis 27:​1-17.

Hetianga Rebeki’n thil a tih chhan hi engmah sawi lan a ni lo va. A thiltih dân hi mi tam tak chuan an sawisêl a; mahse, Bible chuan a sawisêl lo va, Isaaka pawhin Jokoba’n malsâwmna a dawng tih a hriatin a sawisêl hek lo. Chutih ahnêkin Isaaka chuan mal a sâwm belh zâwk mah a ni. (Genesis 27:29; 28:​3, 4) Rebeki chuan a fapate chungchânga Jehova thu sawi lâwk chu a hre kar a. Chuvângin, Jakoba’n a dawn ngei tûr malsâwmna a dawn theih nân hma a la a ni. Chutianga tih chu Jehova duhzâwng nên a inmil chiang hle.​—⁠Rom 9:​6-13.

Jakoba Chu Haranah Thawn A Ni

Rebeki chuan Jakoba chu a unaupa thinrim a reh hma chu tlân bo tûra fuihin, Esauva thiltum chu a hlawhchhamtîr a. Ani chuan Jakoba thawn bo tûrin Isaaka phalna a dîl a; mahse, Esauva’n Jakoba a huat thu chu a sawi lang kher lo. Chutianga sawi lovin, thiam takin Jakoba’n Kanaan mi nupuia a neih palh a hlauh thu a hrilh zâwk a ni. Chu ringawt pawh chuan Jakoba chu Kanaan mite nei lo tûra thu pe tûr leh Pathian ṭih mi nupuia zawng tûra Rebeki chhûngte hnêna tîr tûrin Isaaka chu a thlêm hneh êm êm a ni. Chu mi hnuah Rebeki chuan Jakoba chu a hmuh leh thu engmah târ lan a ni lo va; mahse, a thiltih chuan lo la piang tûr Israel hnam tân lâwmman ropui tak a thlen a ni.​—⁠Genesis 27:​43–28:⁠2.

Rebeki chungchânga kan thil hriatte chuan amah min ngaihsântîr a ni. A hmêl a ṭha a; mahse, a ṭhatna tak tak chu a Pathian ngaihsakna chu a ni. Chu tak chu a ni, Abrahama’n a monu atâna a zawn chu ni. A mize ṭha dangte pawh chu Abrahama beisei aia ṭha a nih hmêl hle bawk. Pathian kaihhruaina a zuina kawnga a rinna leh huaisenna, leh a ṭhahnemngaihna te, a thuhnuairawlhna te, leh a thilphalna leh a khual chhawn thiamnate chu Kristian hmeichhia zawng zawngte tân entawn âwm a ni. Hêng miziate hi a ni, Jehova ngei pawhin hmeichhe entawn tlâk ni tûrte laka a zawn chu ni. (w04 4/15)