Sakhaw Hruaitute’n Politics An Khêl Tûr A Ni Em?

“POLITICS khelh hian mi retheite a ṭanpui a, . . . Politics kal phung chu Pathian duhzâwng nên inrem chiah lo mah se, ‘mi retheite tâna diknain ro a rêl theih nân kan inhnamhnawih a ngai a ni,’ tiin Canadian mi archbishop pakhat chuan hmun thianghlim tlawha zinte chu a hrilh a ni.”​—⁠Catholic News.

Sakhaw hruaitute’n politics khelh an fakmawi chu hriat ngai loh thil a ni lo va; politics-a dinhmun sâng chelh sakhaw hruaitu lah an vâng hek lo. Ṭhenkhat chu politics siam ṭhat tum an ni a. Ṭhenkhat dangte lah hnam intluktlânna leh sal tihbona lama an ṭanlâkna avânga ngaihsân leh hriat reng an ni thung.

Mahse, sakhaw mi tam tak chuan an hruaitute’n politics an khelh hian nuam an ti chiah ṭhîn lo. “Evangelic kohhran mite chuan an hruaitute inhnamhnawihna chu an ngai thiam lo ṭhîn,” tiin Christian Century tih magazine-a political theology chungchâng thuziak chuan a târ lang. Sakhaw ngaihsak mi tam tak chuan sakhuana hi a thianghlim êm avângin politics inrawlhna chi-ah an ngai lo a ni.

Sakhaw hruaitute politics khelhna chuan, khawvêl ṭha zâwk hmu duhtu zawng zawngte ngaihven hlawh tak zawhna ṭhenkhat a siam chhuak a ni. Kristian sakhaw thuhriltute’n politics an siam ṭha thei em? * Politics khelh chu sawrkâr ṭha zâwk leh khawvêl ṭha zâwk neih nâna Pathian kawng hman a ni em? Kristianna din chhan hi kawng danga politics khelh nân a ni em?

Krista Hminga Politics Khelh Ṭan A Nih Dân

The Early Church tih lehkhabuah historian Henry Chadwick-a chuan hmân lai Kristian kohhran chu “he khawvêla thuneihna chelh a ngaihsak lohna” avânga hriat hlawh tak a nih thu a sawi a. Chu chu “Politics-a inhnamhnawihna nei lo, buaina siam ngai lo ber, leh remna duh ber” a ni. Kristiante chanchin ziakna, History of Christianity lehkhabu chuan: “Kristiante zîngah chuan tumahin sawrkâr hnuaiah nihna an chelh tûr a ni lo tih rinna chu a lâr hle . . . Kum zabi thumna tîr lam thleng pawh khân, hmân lai Kristiante chîn dânah Kristian sakhua zâwm tûr chuan tualchhûng thuneitu chuan a nihna a kalsan a ngaih thu Hippolytus-a chuan a sawi,” a ti. Mahse, zawi zawiin, nihna lama mi duhâm takte chuan kohhran tam takah hma an rawn hruai ṭan a, nihna ropui tak tak an rawn inpe ta a. (Tirhkohte 20:​29, 30) Ṭhenkhat chuan sakhaw hruaitu nih leh politician nih kawp chu an duh ta a. Rom sawrkâr inthlâk thleng thutna chuan chutiang sakhaw hruaitute chu an  duhzâwng tak nih theihna hun remchâng a pe ta a ni.

Tichuan, C.E. 312 chuan, milem be mi Rom Lal Constantine-a chuan a hming maiin Kristianna chu a duh ṭan a. Mak tak maiin, sakhaw hruaitute chuan chu milem betu lalberin nihna a pêkte an dawn theih nân inrem siam chu an duh ta tlat mai a. “Sakhuana chu politics lama thu tlûkna lian tham tak takah a inhnamhnawih tial tial a ni,” tiin Henry Chadwick-a chuan a ziak a ni. Chutianga politics-a inhnamhnawihna chuan sakhaw hruaitute chungah eng nghawng nge a neih?

Politics-in Thuhriltute A Nghawng Dân

Sakhaw hruaitute chu ram veitu (politicians) atân Pathianin a hmang ang tih ngaih dân chu, kum zabi nganaa Catholic theologian hmingthang tak Augustine-a tih chhuah a ni ber a. Ani chuan sakhuanain ram chhûnga ro a rêl a, mihringte chunga remna a thlen tûr chu a lo suangtuah a ni. Mahse, thilthleng chanchin ziak mi H. G. Wells-a chuan: “Kum zabi ngana aṭanga sâwmpangna thlenga Europe chanchin chu, he ngaih dân ropui tak Pathian khawvêl sawrkâr a taka chantîr tumna a hlawhchhamna hlîr a ni,” tiin a ziak a ni. Kristianna ram chuan khawvêl pum chu sawi loh, Europe khawmualah pawh remna a thlen thei lo va. Mi tam takte rin a hlawh ta lo a ni. Eng nge kal dik lo ta?

Kristianna thuhrila inchhâl tam takte chu thiltum ṭha tak neiin politics-ah an lût a; mahse, thil suaksual takah an tlu lût nge nge ṭhîn. Thuhriltu leh Bible letlingtu Martin Luther-a chu Katholic Sakhaw siam ṭhatnaa a thawhrim avânga hmingthang tak a ni a. Mahse, sakhaw thurin huaisen taka a kalhna chuan politics lam thil avânga helte zîngah a vawrhlâr hle a ni. Politics lam thil a ngaih dân a sawi tâkah chuan mi tam takte chuan Luther-a chu an ngaihnêp phah ta a. A tîr chuan, mi dangte awpbettu mi liante laka hel, lo neitute chu a duhsak a, a ṭan tlat a ni. Chutah, helna chu a lo nasat tâkah chuan, helho tichimih tûrin mi lianho chu a fuih leh si a, a fuih ang ngei chuan an ti a, mi sâng tam tak an that a ni. Chuvângin, ani chu lo neitute’n phatsantu anga an ngai pawh hi thil mak a ni lo. Luther-a chuan mi lianhote chu Catholic lal laka hel tûr pawhin a fuih bawk a. A nihna takah chuan, Protestants lo ni ta Luther-a hnungzuitute chuan, an hel aṭang rêngin politics lam thil an din a ni. Engtin nge thuneihna chuan Luther-a chu a nghawng? Amah a tichhe vek a ni. Entîr nân, a tîrah sakhaw lama helna chu duh lo mah se, a hnuah chuan politics lama a ṭhiante chu nausên baptisma chantîr dodâltute hâlhlum tûrin a fuih a ni.

John Calvin-a pawh hi Geneva-a sakhaw hruaitu hmingthang tak a ni a; mahse, ani pawhin politics lama thuneihna nasa tak a lo nei chho va. Michael Servetus-a’n Trinity thurinin Bible ṭanchhan a nei lo tih a sawifiah chuan, Calvin-a chuan a politics lama thuneihna chu Servetus-a bana hâlhlumna thlâwp nân a hmang a ni. Isua zirtîrna aṭanga kalpênna râpthlâk tak a va ni êm!

Hêng mite hian 1 Johana 5:​19-a Bible-in: “Khawvêl pumhlûm hi mi sual thu thuin a awm,” a tih hi an theihnghilh a ni ngei ang. An hun laia politics thenfai chu an duh tak tak nge thuneihna chan leh dinhmun sânga dingte ṭhiana neih chu an thlahlel zâwk? A enga pawh chu ni se, Isua zirtîr Jakoba’n Pathian thâwk khuma a ziah: “Khawvêl ṭhian nihna hi Pathian hmêlma nihna a ni tih in hre lo vem ni? Chutichuan tupawh khawvêl ṭhian nih duh apiang chuan Pathian hmêlmaah a insiam ṭhîn a ni,” tih hi an hre tûr a ni na a le. (Jakoba 4:⁠4) Jakoba chuan, Isua’n a hnungzuitute chungchângah: ‘Anni chu khawvêla mi an  ni lo, kei khawvêla mi ka ni lo ang bawk hian,’ a tih chu a hria a ni.​—⁠Johana 17:14.

Chutichung pawhin, Kristiante chu khawvêl sualah an inhnamhnawih tûr a ni lo tih hre mah se, mi tam takte chuan politics-a tualdâwih chu ‘khawvêl mi nih lohna’ tak tak a ni tih an pawm duh tlat lo. Chûng mite chuan chutianga tualdawihna chuan Kristiante chu mi dangte chunga hmangaihna an lantîrna a dang a ni an ti tlat a. Anni chuan sakhaw hruaitute chu eirûkna leh hleih neihnate tihbo tuma beihnaah tela, inhmang ve tûr niin an hria a ni. Mahse, Isua zirtîr tualdâwihna chu mi dangte ngaihsakna nên a inkawp thei lo vem? Kristian chuan politics hnawk tak laka tel si lovin mi dangte hnênah ṭanpuina ṭangkai tak a pe thei em? A dawta thuziak hian hêng zawhnate hi a chhâng ang. (w04 5/1)

[Footnote]

[Phêk 4-naa milem]

Politics lama thuneihna an chan theih nân, sakhaw hruaitute chu Emperor Constantine-a te ang rorêltute lakah an intulût

[Milem Hawhtîrtu]

Musée du Louvre, Paris

[Phêk 5-naa milemte]

Engvângin nge sakhaw hruaitu lâr tak takte chu politics lama hîpa an awm?

Augustin-a

Luther-a

Calvin-a

[Milem Hawhtîrtu]

Augustine-a: ICCD Photo; Calvin-a: Portrait by Holbein, from the book The History of Protestantism (Vol. II)