Tualdawihnain Kristian Hmangaihna A Dang Em?

KRISTIAN nihnaah chuan Bible chhiar te, ṭawngṭai te, leh Chawlhnia fakna hla sak maite aia tam a tel a. Pathian leh mite tâna thil tihsak a tel a ni. Bible chuan: “Thu chauhvin i hmangaih suh ang u khai, lei chauhvin i hmangaih hek suh ang u, thiltih leh tih tak zetin ni zâwk rawh se,” tiin a sawi a. (1 Johana 3:18) Isua chuan mi dangte ngaihsakna tak tak a lantîr a, chu chu Kristiante chuan an entawn duh a ni. Tirhkoh Paula chuan a rinpuite chu “Lalpa hna ṭhahnemngai taka thawk fovin awm rawh u,” tiin a fuih a. (1 Korinth 15:58) A nih leh Lalpa hna chu eng nge ni? Chu chuan mi rethei leh rahbeha awmte tâna sawrkâr kalphung thlâk chu a huam tel em? Isua’n chutiang chuan a lo ti em?

Isua chu politics-a inhnamhnawih tûr emaw, ṭan lam nei tûr emawa nawr mah ni se,  chutiang chuan a ti lo. Khawvêl lalram zawng zawng chunga thuneihna nei tûra Setana thlêmna chu a hnâwl a, chhiah pêk chungchâng thubuaiah a tel duh lo va, mipuiin lala siam an tum pawhin a duh lo. (Matthaia 4:​8-10; 22:​17-21; Johana 6:15) Mahse, chutianga a tualdâwihna chuan mi dangte ṭhatna tûra thil a tihna chu a dang chuang lo.

Isua chuan mi dangte tâna ṭhatna kumhlun thlentu tûr chu a ngai pawimawh zâwk a. Mipui sângnga a hrai leh dam lo a tihdamte chuan mi tlêm tête tân hun engemawti chhûng ṭhatna a thlen laiin, a zirtîrna chuan mi zawng zawng tân chatuan daih malsâwmna a thlen thung a ni. Isua chu rethei chhawmdâwltu pâwl hotu anga hriat a ni lo va, “Zirtîrtu” tia hriat a ni zâwk a ni. (Matthaia 26:18; Marka 5:35; Johana 11:28) Ani chuan heti hian a sawi: “Thutak hriattîr hi ka pian chhan leh khawvêla ka rawn kal chhan a ni,” tiin.​—⁠Johana 18:37.

Politics Aia Ṭha Zâwk Chanchin A Hril

Isua zirtîr thutak chu politics lam thil a ni lo. Amah ngei Lal a nihna tûr Lalram chanchin a ni zâwk a. (Luka 4:43) Chu Lalram chu vân lam sawrkâr a ni a, chu chuan mihring inawpna zawng zawng hi a rawn thlâk thleng vek ang a, mihringte tân chatuan remna a rawn thlen dâwn a ni. (Isaia 9:​6, 7; 11:9; Daniela 2:44) Chuvângin, chu Lalram chauh chu mihringte beisei tûr awmchhun a ni. Chutianga nakin hun beiseina rin tlâk tak puan chhuah chu hmabâk him min pe tûra mihringte rinchhan tûra infuih ai chuan hmangaihna lantîrna a ni zâwk daih lâwm ni? Bible chuan: “Mi liante chu ring suh ula, mihring fapa, ṭanpuina rêng rêng awm lohna chu, ring hek suh u. A thawin a chhuahsan a, ani chu a leilungah a kîr leh a; chu mi nî ngei chuan a ngaihtuahnate chu a bo nghâl a ni. Jakoba Pathian ṭanpuitua nei chu, lâwm takin a awm ṭhîn, LALPA Pathiana beiseina neitu chu,” a ti. (Sâm 146:​3-5) Chuvângin, Isua chuan a zirtîrte chu sawrkâr ṭha zâwk siam dân chungchâng hril tûra tîr lovin, “ram chanchin ṭha” hril tûrin a zirtîr zâwk a ni.​—⁠Matthaia 10:​6, 7; 24:14.

Chuti a nih chuan, chu ngei mai chu a ni, Kristian thuhriltute hnêna thawk tûra tih “Lalpa hna” chu ni. Pathian Lalrama chêng tûrte chu an inhmangaih tawn a ngaih avângin, Lalram chuan mihringte hausakna chu inbûk tâwk taka semna hmanga retheihna a tihbona kawngah chuan a hlawhtling ang. (Sâm 72:​8, 12, 13) Chu chu chanchin ṭha a ni a, mite hnêna hrilh a phu hliah hliah a ni.

Tûn laia Jehova Thuhretute chuan ram 235-ah he “Lalpa hna” hi an thawk a. Isua thupêk angin, anni chuan sawrkâr zawng zawng chungah zahna an lantîr a ni. (Matthaia 22:21) Chutih rualin, Isua’n a hnungzuitute hnêna a hrilh: “Khawvêla mi in ni si lo va, khawvêla mi ka thlan chhuah . . . che u a ni,” tih hi an zâwm bawk a ni.​—⁠Johana 15:19.

Politics khêl ṭhîn mi ṭhenkhat chu ngun taka Bible an zir hnuah an inthlâk danglam a. Italy mi politician pakhat, kohhranin a thunun pâwl, Catholic Action pâwl mi leh sa ni bawk chuan heti hian a sawi: “Mi chu politics leh khawtlâng ṭhatna lam thilah a inhmang hle tûr a ni tih ngaih dân neiin politics ka khêl a ni,” tiin. Jehova Thuhretute zînga pakhat anga Pathian Lalram thu a hrilh theih nâna khawpui mayor nihna a bânsan hnu chuan,  rilru ṭha tak pua politics khêlte thawhrimna a hlawhchham chhan chu a sawi a. Heti hian a ti a ni: “Khawvêl dinhmun hetiang a nih chhan hi mi ṭhate’n khawtlâng dinhmun siamṭhat tuma an beih loh vâng ni lovin, mi tlêm tête tih tak zeta thawhrimna chu mi tam takte suahsualnain a chîm hneh êm vâng a ni,” tiin.

Mihringte beisei tûr rin tlâk awmchhun hrilh tûra politics-a tualdâwihna chuan Kristian dikte’n a ṭangkai zâwnga mi dangte an ṭanpuina a dang lo. Pathian Lalram khua leh tui ni tûra an ṭanpuite chuan an nungchang sual tak thlâk dân te, thuneitu zah dân te, an chhûngkaw nun tihṭhat dân te, leh khawvêl hausakna lam thlîr dân chintâwk neih dân te chu an zir a ni. Chu aia pawimawh zâwk, Pathian nêna inlaichînna hnai nei tûrin Jehova Thuhretute chuan mite chu an ṭanpui a ni.

Pathian Lalram thuhriltute chuan an chênna tualchhûng tân hlâwkna an thlen a ni. Chu mai bâkah, sawrkâr tak tak, Pathian hmangaihtu zawng zawngte chunga remna tluantling thlentu tûr chunga an rinna nghat tûrin mite chu an fuih a ni. Chutianga an tualdâwihna avâng chuan, Kristiante chu tûn laia ṭanpuina hlâwk ber leh daih rei ber pe tûrin an zalên a ni. (w04 5/1)

[Phêk 7-naa bâwm/milem]

Politics Bânsana Pathian Lalram Thuhrilhna

Átila chuan a naupan laiin Brazil rama Belém khaw puithiam hnên aṭangin tualchhûng, politics, leh sumdâwnna lama inhnehchhiahna chu sakhua chuan a do tlat tûr a ni tih zirtîrna, liberation theology chu a zir a. Hnehchhiaha awmte zalen thu a hriatte chuan a beng a verh hle a; chuvângin, khawtlâng hmangai pâwlah a inpe a, chutah chuan sawrkâr dodâla kawngzawh kaihhruai dân leh tharum thawh si lova sawrkâr laka nawrh dân chu a zir chhuak a ni.

Mahse, Átila chuan a lehkhabu dawn Listening to the Great Teacher. * tih bu hmanga an pâwla naupangho zirtîr chu nuam a ti hle bawk. Chu lehkhabu chuan nungchang ṭha leh rorêltute thu âwih chungchâng a zirtîr a. Chu chuan Átila chu liberation theology thlâwptute’n nungchang lama Isua tehna sâng takte an zawm loh chhan leh ṭhenkhatin thuneihna an chan huna hnehchhiaha awmte an theihnghilh chhante chu a ngaihtuahtîr ta a ni. Chu pâwl aṭang chuan a bâng ta a. Chu mi hnuah chuan, Jehova Thuhretute chu a inah rawn lêngin, Pathian Lalram chanchin an rawn sawipui a. Ani chuan Bible a zir ta thuai a, hnehchhiaha awmte tâna zalênna tak tak chungchâng a zir ta a ni.

Chutih lai vêl chuan, Átila chu sakhuana leh politics tih chungchânga Catholic seminar-ah a tel a. Chuta zirtîrtu chuan “Sakhuana leh Politics chu thil thuhmun, kawng chi hniha thlîrna mai hi a ni,” tiin a hrilhfiah a. Ani chu Kingdom Hall-ah pawh a inkhâwm bawk a. A va inang lo tehrêng êm! A inan lohna pakhat chu Kingdom Hall-ah chuan mei zu leh zu in an awm lo va, ṭawngkam zahmawh hmanga fiamthu thawh pawh an awm lo. Tichuan, an thuhrilh rawngbâwlnaa tel ve chu a tum ta a, baptisma pawh a chang ta thuai a. Tûnah chuan liberation theory chu mi retheite harsatna tihkianna tak tak a nih loh chhan a hmu chiang ta a ni.

[Footnote]

[Phêk 6-naa milemte]

Kristian rawngbâwltute tualdâwihna chuan mi dangte an ṭanpuina a dang lo