Hlim Taka Dam Rei Theih Dân

ṬHENKHAT sawi dân chuan “Mi tinin kum upat chhoh zêl an duh a; tar duh erawh tumah an awm lo” a ni. Penson hun ṭêp tawh mi tam takte chuan mawhphurhna tlêm tê chauh nei a, mahni duhzâwng tih nâna hun tam tak neih chu an nghâkhlel a. Mahse, thiltum nei lo leh tlâktlai lo nih chu an hlau a ni. Tin, khawhar te, hlim loh te, leh hrisêlna tlâk chhiat te chu an hlau bawk.

Anih chuan, nun hlim tak neih theih dân thurûk chu eng nge ni? Ṭhian ṭhate leh chhûngkaw inhmangaih tak chuan a pui a pangte chu hlim tûrin a ṭanpui a. Mahse, tarte tâna mi dangte thil tihsak chu nun hlim an neih nân a pawimawh ber lo. A pawimawh zâwk chu tarte’n mi dangte tâna thil an tihsak hi a ni.

Tar lam tawh nupa tuak 423-te chungchâng hun rei tak chhûng zirna chuan “mi dangte ṭanpuina chuan dam rei tûrin min ṭanpui theih a rinawm” tih a târ lang a. Chu zirna kaihruaitu, Stephanie Brown-i chuan: “He thil hmuh chhuah hian mi dangte nêna kan inlaichînna hlâwkna chu kan thil dawn hi a ni lo; kan pêk chhuah hi a ni zâwk a ni,” tiin a hrilhfiah a ni. Chûng pêk chhuahna zîngah chuan, mi dangte in chhûng hna thawhpui te, naupang enkawlsak te, nepnawi dâwra kalsak te, zinvahna tûr ruahmansak te, a nih loh leh an thusawi ngaihthlâksak te a tel thei a ni.

Kum 2,000 vêl kal ta khân, Isua Krista chuan: “Englo lâk aiin pêkin lukhâwng a nei zâwk,” tiin a lo sawi a. (Tirhkohte 20:35) Hlim taka dam reina chu pawisa neih ṭeuh emaw, tar loh nâna ei-in insûm leh inenkawl emaw a ni lo. Chu ai mahin, mawngzâng taka awm a, mi dangte nun tinuam tûra hun te, thahrui te, leh chakna te pêkah a innghat zâwk a ni.

Mahse, tarna te, natna te, leh thihna te aṭanga mi chhanhim tûr chuan chutiang thilpêk mai a tâwk lo. Pathian Lalram chauhvin chûng thilte chu a nuai bo dâwn a ni. Chu Lalram rorêlna hnuaiah chuan, natna a awm tawh lo vang a, ‘thihna pawh a awm tawh lo vang.’ (Thu Puan 21:​3, 4; Isaia 33:24) Dik tak chuan, thuâwih mihringte chuan lei paradis-ah hlim takin chatuan nun an chên ang. (Luka 23:43) He Bible ṭanchhan hlim taka dam rei theih dân hi mi dangte an hriattîr theih avângin Jehova Thuhretute chu an lâwm hle a ni. (w04 5/15)