Leviticus Bu Aṭanga Thu Pawimawh Hrilhfiahna
Jehova Thu Chu A Nung
Leviticus Bu Aṭanga Thu Pawimawh Hrilhfiahna
ISRAELTE chu Aigupta sal tânna ata an chhuahna kum khat pawh a la tling lo va. Tûnah hnam thara siam lo niin, Kanaan ram lam an pan mêk a ni. Chu rama hnam thianghlim pakhat awmtîr chu Jehova thiltum a ni a. Amaherawhchu, Kanaan mite nun dân leh sakhaw chîn dânte chu a bawlhhlawh hle. Chuvângin, Pathian dik chuan Israel mite chu a rawngbâwl tûra anmahni tihrangtu tûr thupêkte a pe a ni. Chûng thupêkte chu Bible-a Leviticus buah hian chhinchhiah a ni a. Sinai thlalêra zâwlnei Mosia’n B.C.E. 1512 vêla a ziah a nih hmêl hle a, thlakhat chhûnga Israel mite chanchin a chuang a ni. (Exodus 40:17; Number 1:1-3) Jehova chuan amah betute chu thianghlim tûrin a fuih nawn fo a ni.—Leviticus 11:44; 19:2; 20:7, 26.
Tûn laia Jehova Thuhretute chu Pathianin Mosia hmanga a pêk Dân hnuaiah an awm lo va. Isua Krista thihna chuan chu Dân chu a tibâng a ni. (Rom 6:14; Ephesi 2:11-16) Amaherawhchu, Leviticus-a hmuh thupêkte chu kan ṭangkaipui thei a, kan Pathian, Jehova biak dân chungchâng tam tak min zirtîr a ni.
PATHIAN HNENA THILHLAN—DUH THUA HLAN LEH LOH THEIH LOHVA HLAN
(Leviticus 1:1–7:38)
Dân thupêka thilhlante leh inthawina ṭhenkhat chu duh thua hlan a nih laiin, a dangte chu loh theih lohva hlan a ni. Entîr nân, hâlral thilhlan chu duh thua hlan a ni a. Chu chu a puma Pathian hnêna pêk a ni, Isua Krista pawhin a nun chu châk taka tlanna inthawi nâna a hlan pumhlûm ang hian. Duh thua remna thilhlan inthawina chu insem chi a ni a. A ṭhen chu maichâmah Pathian tâna hlân a ni a, a ṭhen dang chu puithiamte’n an ei a, a ṭhen dang leh chu a hlântuin a ei a ni. Chutiang bawkin, hriak thih Kristiante tân chuan, Krista thih Hriatrengna chu remna chawhlui a ni.—1 Korinth 10:16-22.
Sual thawina thilhlan leh bawhchhiat thawina thilhlan chu loh theih lohva hlan tûr a ni a. Sual thawina thilhlan chu thil sual tih, a nih loh leh tum lo taka tihpalh ang chi thil tihsual thawi nân a ni a. Bawhchhiat thawina thilhlan chu miin mi dang dikna neih a tihchhiatsak hunah Pathian tihlungawi nân emaw, thilsualtitu hrem nâna a chanvo hlihsakte a inchhîr avânga pêk lêtleh nân emaw—a pahnih atân emaw a ni. Chhangphut thilhlan pawh a awm bawk a, chu chu Jehova châwmna nasa tak chunga lâwmna lantîrna thilhlan a ni. Dân thuthlung hnuaia inthawina thupêkte hian Isua Krista leh a inthawina emaw, a inthawina aṭanga neih theih malsâwmnate emaw chu a kawh tlat avângin hêng zawng zawng hi kan ngaihven a ni.—Hebrai 8:3-6; 9:9-14; 10:5-10.
Bible Chungchâng Zawhnate Chhânna:
2:11, 12—Engvângin nge ‘meia thilhlan’ anga khawizu hâl chu Jehova’n a pawm loh? Heta khawizu sawi hi khawizu tak tak sawina a ni thei lo. ‘Meia thilhlan’ atân phal lo mah se, khawizu chu “lova thil haw hmasa berte” zîngah telh a ni. (2 Chronicles 31:5) He khawizu hi thei tuisâwr, a nih loh leh theitui hnâng a ni thei ang. Chu chuan thil a bilh thawh theih avângin, maichâma hlan atân pawm tlâk a ni lo.
2:13—Engvângin nge “thilhlan zawng zawngah” chi telh tûr a nih? Hei hi inthawina thilte tihtui nâna hman a ni lo. Khawvêl pumah hian chi chu ei tûr vawn ṭhat nâna hman a ni a. Chhiatna leh ṭawihna laka fihlîmna a entîr avânga hlan tel a nih hmêl hle.
Kan Zir Tûrte:
3:17. Ran thau chu a sa ṭha lai ber emaw, duhawm lai ber emaw anga ngaih a nih avângin, ei khapna dân chuan thil ṭha ber chu Jehova ta a ni tih Israelte rilruah a tuh nghet a ni. (Genesis 45:18) Hei hian kan thil ṭha ber chu Jehova pe tûrin min hriatnawntîr a ni.—Thufingte 3:9, 10; Kolossa 3:23, 24.
7:26, 27. Israelte chu thisen ei lo tûr an ni a. Pathian thlîr dân chuan, thisen chu nunna aiawhtu a ni. “Tisa nunna chu thisenah chuan a awm si a,” tiin Leviticus 17:11 chuan a târ lang a. Thisen laka inthiar fihlim hi tûn laia Pathian betu dikte tân pawh a la ngai reng a ni.—Tirhkohte 15:28, 29.
PUITHIAM THIANGHLIMHO DIN A NI
(Leviticus 8:1–10:20)
Inthawina leh thilhlante nêna inkûngkaih hnate thawk tûrin tute nge mawhphurhna pêk an nih? Puithiamte hnêna pêk a ni. Pathian kaihhruaina angin, Mosia chuan puithiam lal ni tûra Arona lâk luhna leh a fapate pali chu puithiam lal hnuaia puithiam ni tûra lâk luhna hun serh chu a kaihruai a ni. Chu hun serh chuan ni sarih chhûng a awh a, a tûkah chuan puithiamho chuan an puithiam hna an thawk ṭan nghâl a ni.
Bible Chungchâng Zawhnate Chhânna:
9:9—Maichâm bula thisen leih leh thil chi hrang hrang chunga thisen tah chuan eng awmzia nge a neih? Chu chuan Jehova’n thisen chu sual thawi nâna a pawm tih a târ lang. Sual thawina zawng zawng chu thisenah a innghat a. Tirhkoh Paula chuan: “Dân thu zawngin engkim thaw mai hi thisena tihthianghlimin a awm ṭhîn a, thisen chhuah lohvin ngaihdamna rêng a awm lo,” tiin a ziak a ni.—Hebrai 9:22.
10:1, 2—Arona fapa Nadaba leh Abihua te thil sual tihah khân eng thil nge tel mai thei? Nadaba leh Abihuate’n puithiam hna an thawh laia an tih loh tûr an tih hnu lawkah, Jehova chuan puithiamte chu biakna puan in chhûnga rawng an bâwl laia uain emaw, zu emaw an in chu a khap a ni. (Leviticus 10:9) Chu chuan Arona fapa pahnihte’n chu mi ṭuma puithiam rawng an bâwl lai chuan zu an in tih a sihhmuh a ni. Amaherawhchu, an thih chhan bul tak chu “[Jehova] hmaah a thupêk lohvin mei hman loh chi” an hlan vâng a ni.
Kan Zir Tûrte:
10:1, 2. Tûn laia Jehova chhiahhlawh mawhphurhna neite chuan Pathian thil phûtte chu an zâwm ngei ngei tûr a ni. Chu bâkah, an mawhphurhna an thawh hian an chapo tûr a ni lo.
10:9. Pathian pêk hna kan thawh laiin zu kan in tûr a ni lo.
PATHIAN BIAKNA CHUAN THIANGHLIMNA A PHUT
(Leviticus 11:1–15:33)
Ran ei thiang leh thiang lo chungchânga thupêk chu Israelte’n kawng chi hnihin an hlâwkpui a. Hêng thupêkte hian hrik hlauhawmte kai lo tûrin a vêng a, anmahni leh an chhehvêla hnamte indaidanna chu a tinghet a ni. Thupêk dang lehte chu ruang sâwngbâwlna aṭanga thianghlim lohna te, nau hrin avânga inthenfaina te, phâr chungchânga tih dân tûr te, leh hmeichhia leh mipa zahmawh aṭanga chi chhuak avânga thianghlim lohnate a ni. Puithiamte chuan chûng avânga thianghlim lote chu an enkawl tûr a ni.
Bible Chungchâng Zawhnate Chhânna:
12:2, 5—Engvângin nge nau hrinna chuan hmeichhia a ‘tihbawlhhlawh’? Inthlahchhâwnna taksa pêngte chu mihring nun ṭha famkim pe chhâwng tûra siam a ni a. Amaherawhchu, sual rochunte avângin, mihring ṭha famkim lo leh nun kawng sual chu an fate hnêna hlan chhâwn a ni a. Nau hrin te, leh thil dang thi neih leh mipa chi pût ang chi avânga rei lo te chhûng ‘bawlhhlawhna’ chuan sual an rochunzia a hriat chhuahtîr a ni. (Leviticus 15:16-24; Sâm 51:5; Rom 5:12) Inthenfaina thupêk chuan Israelte chu mihringte sual khuh nân leh ṭha famkima siam nân tlanna inthawina a mamawhzia hre thiam tûrin a ṭanpui a ni. Chuvângin Dân chu an tân chuan “Krista hnên lama . . . kaihruaitu” a lo ni.—Galatia 3:24.
15:16-18—Eng nge hêng Bible chânga târ lan ‘chi chhuak’ chu? Hei hian zâna amaha chi chhuak leh nupa inpâwlna a kawh ve ve hmêl.
Kan Zîr Tûrte:
11:45. Pathian Jehova chu a thianghlim a, a rawngbâwltute pawh thianghlim ve tûrin a phût a ni. Thianghlimna chu ûmin, taksa leh thlarau lamah an thianghlim reng tûr a ni.—2 Korinth 7:1; 1 Petera 1:15, 16.
12:8. Jehova chuan mi retheite inthawina thilhlan atân a man to zâwk berâm aiah sava hlan chu a phal a. Ani chuan retheite a ngaihhnathiam a ni.
THIANGHLIMNA CHU VAWN RENG TUR A NI
(Leviticus 16:1–27:34)
Sual thawina thilhlan pawimawh ber chu kum tina neih Inremna Nîa hlan a ni a. Puithiamte leh Levia chi tân bâwngpa pakhat hlan a ni. Puithiam ni lo Israel hnamte tân kêl pakhat hmanga inthawina neih a ni a. Kêl dang pakhat chu mipuite sualna a chunga puttîr a nih hnuah thlalêrah a nung chunga thlah a ni. Chu kêl pahnihte chu sual thawina pakhat anga ngaih a ni a. Hêng zawng zawng hian Isua Krista chu inthawina leh sualte tibotu a ni kawp dâwn tih a kawhhmuh a ni.
Sa ei leh thil dang chungchânga thupêkte chuan Jehova chibai kan bûk laia thianghlim a ṭûlzia kan rilruah a nemkai a. Inâwm takin, puithiamte chu an intithianghlim tûr a ni. Kum tina neih kût pathumte chu lâwmna hun ropui tak leh Siamtu chunga lâwmthu hrilh hun a ni a. Jehova chuan a mite hnênah a hming thianghlim hman khaw lohna te, Sabbath leh Jubiblee hman te, mi rethei cheibâwl dân te, leh bawi chhawr dân te nêna inkûngkaih thupêkte a pe bawk. Pathian thuâwih avânga hmuh tûr malsâwmnate chu thuâwih loh avânga tawn tûr ânchhiate nên khaikhin a ni. Tin, thilhlan nêna inkûngkaih intiamkamna leh ruatnate, ran piang hmasa berte, leh “LALPA tâna thianghlim” anga sâwma pakhat pêk chungchânga thupêkte a awm bawk a ni.
Bible Chungchâng Zawhnate Chhânna:
16:29—Eng kawngin nge Israelte chuan ‘an rilrute an tihrehawm’ ang? Inremna Nîa tih ṭhin he kalhmang hi sual ngaihdam dîlna nên a inkûngkaih a ni. Chu mi hun laia chaw nghei chu sualzia pawmna nên a inkûngkaih hmêl hle. A nih chuan, ‘rilru tihrehawmna’ chu chaw nghei chungchâng sawina a nih ngei a rinawm.
19:27—‘Bekbawr aṭanga a vêla lû mêt’ lo tûr emaw, khabe hmul ‘sîr tuak tan’ lo tûr emawa thupêk hi eng tihna nge? He dân hi Judate’n milem betute khabe hmul hmeh dân emaw, sam meh dân emaw an entawn loh nâna pêk a nih hmêl hle. (Jeremia 9:25, 26; 25:23; 49:32) Amaherawhchu, chutianga Pathian thupêk chu an khabe hmul emaw, bekbawr vêla hmul emaw an mêt thei lo tihna a ni lo.—2 Samuela 19:24.
25:35-37—Israelte tân a pung neia pawisa pûktîr chu thil dik lo a ni reng em? Sûmdawn nâna pûktîr a nih chuan, a pûktîrtu chuan a pung a la thei a. Amaherawhchu, rethei intunnun nâna pûktîr anih chuan a pung lâk chu Dânin a khap a ni. Ṭhenawm retheite hnên aṭanga a pung lâk chu a dik lo.—Exodus 22:25.
26:19—Engtin nge ‘vân chu thîr ang leh lei chu dâr ang’ a nih theih? Ruah a sûr loh avângin, Kanaan ram chunga vânte chu thîr anga sak leh tui puh tlang theih loh niin a lang a ni. Ruah a sûr loh avângin lei chu dâr rawng, thîr ang maiin a tlê a ni.
26:26—‘Hmeichhe sâwmin chhang âwmna pakhatah chhang an âwm ang’ tih hi eng tihna nge? A tlângpui thuin, hmeichhe pakhat chuan chhang âwm nân a âwmna hrang pakhat zêl a mamawh a. Mahse, hêng ṭawngkamte hian ei tûr a vân êm avângin, hmeichhe sâwmin an siam tûr chhang chu a âwmna pakhat atân a tâwk chauh ang tih a sawina a ni. Hei hi thianghlimna vawn lohnain a rah chhuah tûr sawi lâwkte zînga pakhat a ni.
Kan Zîr Tûrte:
20:9. Huatna leh sualna rilru chu Jehova ngaihah tualthah nên a intluk a. Chuvângin, nu leh pate ânchhe lawhtu chu anmahni that ang chiaha hremna thu a puang a ni. Hei hian kan rinpuite chunga hmangaihna lantîr tûrin min chêttîr tûr a ni lâwm ni?—1 Johana 3:14, 15.
22:32; 24:10-16, 23. Jehova hming chu tihhliau tûr a ni lo. A hming chu kan fakin, zahawm tûr, a nih loh leh thianghlim tûrin kan ṭawngṭai zâwk tûr a ni.—Sâm 7:17; Matthaia 6:9.
Leviticus-in Kan Biakna A Nghawng Dân
Tûn laia Jehova Thuhretute chu Dân hnuaiah an awm lo va. (Galatia 3:23-25) Mahse, Leviticus hian thil chi hrang hrang chungchânga Jehova thlîr dân min hriattîr avângin, kan biakna a nghawng thei a ni.
Theocratic Rawngbâwlna School-a zir tûr inpuahchah nâna chawlhkâr tin Bible chhiar tûrte i chhiar hian, Pathianin a chhiahhlawhte a phût thianghlimna chungchâng chuan i rilru a khawih hle dâwn tih chu rinhlelh rual a ni lo. He Bible bu hian Chungnungbera chu i thil ṭha ber pe tûr leh amah fak nâna thianghlimna vawng rêng tûrin a chêttîr thei bawk che a ni. (w04 5/15)