Mihringte’n Pathian Tihlâwm An Tumna

“PATHIAN tel lohna khawtlâng a awm ngai lo, a tlângpui thuin ani chu lei leh vân thununtu leh Siamtu anga ngaih a ni a. Pathian awm ring lo khawtlângah pawh chutiang chu thil awm dân a ni,” tiin John Bowker-a chuan a lehkhabu God​—⁠A Brief History tihah chuan a ziak a. Kawng engemaw talin, Pathian hmuh chhuah leh a duhsakna dawn tumna chu mihring miziaah hian a bet tel tlat a ni. Khawvêla mi tam tak chuan Pathian tihlâwm an duh tak zet a. Mahse, an tum dân erawh an rin dân ang zêlin a hrang thliah thliah a ni.

Ṭhenkhat chuan Pathian duhsakna dawn theih nâna thil ṭûl awmchhun chu ṭha taka nun hi ni maiin an hria a. Ṭhenkhat dang chuan mi retheite tâna thil ṭha tihna hmanga Pathian pawm mi nih theih an inring bawk. Tin, mi maktaduai tam takte tân chuan sakhaw serh leh sângte chu a pawimawh hle bawk a ni.

Kawng lehlamah, ṭhenkhat chuan Pathian chu an suangtuah phâk bâk niin an hria​—⁠a awm hla lutuk emaw, thil danga a buai êm avânga mi narânte ngaihsak hman lo emawah an ngai bawk. Hmân lai Grik mi fing Epicurus-a chuan ‘pathiante chu an awm hlat êm avângin mi tina tûr emaw, mi tiṭha tûr emawin mihring chungah nghawng an nei lo’ tih a ring a. Amaherawhchu, chutiang ngaih dân nei mi tam tak chu sakhaw mi tak an ni hlawm a. Ṭhenkhat phei chuan an thlahtu thi tawhte tihlâwm inbeiseiin serh leh sâng leh inthâwina hial pawh an hlân bawk a ni.

Nang, eng nge i ngaih ve dân? Pathianin a duhsakna dawn tuma kan thawhrimna hi a hre tak zet em? Kan tân Pathian thinlung khawih leh amah tihlâwm chu thil theih a ni em? (w04 5/15)

 [Phêk 2-naa Thlalâk Hawhtîrtu]

A KAWM: Courtesy of ROE/Anglo-Australian Observatory, photograph by David Malin