Pathian Chawimawitute Chu Malsâwm An Ni
Pathian Chawimawitute Chu Malsâwm An Ni
“Aw Lalpa, i siam hnam tinrêngte chu an lo kal ang a, i hmâah an lo kûn ang a; i hming chu an rawn chawimawi ang.”—SAM 86:9.
1. Engvângin nge nunna nei lo thil siamte tihtheih bâka Pathian kan chawimawi theih?
JEHOVA chuan a thil siam zawng zawngte fak chu a phu a. A thil siam nunna nei lote’n thâwm nei lova amah an chawimawi laiin, keini mihringte hi chuan chhût theihna te, hriatthiam theihna te, lâwmna lantîr theihna te, leh chibai bûk theihna te kan nei a ni. Chuvângin, fakna hla phuahtuin: “Leilung luah zawng zawngte u, Pathian chawimawiin hlim takin au ula: a hming ropuizia chu hlain sa chhuak ula: a fakna chu tiropui rawh u,” a tih hi keimahni hnênah a ni a sawi ni.—Sâm 66:1, 2.
2. Tute’n nge Pathian hming chawimawi tûra thupêk chu zâwm a, engvângin nge?
2 Mi tam zâwk chuan Pathian a awm tih pawm emaw, amah chawimawi emaw chu an duh lo va. Mahse, Jehova Thuhretu mi nuai 60 chuangte chuan ram 235-ah Pathian “thil hmuh theih loh” a miziate chu a thil siamte aṭanga an hmuhzia leh thil siamte’n thâwm nei lova thu an hrilhte an “hriat” theihzia an lantîr a ni. (Rom 1:20; Sâm 19:2, 3) Bible zirna hmangin, Jehova an hriain an hmangaih bawk. Sâm 86:9, 10 chuan heti hian a sawi lâwk a: “Aw Lalpa, i siam hnam tinrêngte chu an lo kal ang a, i hmâah an lo kûn ang a; i hming chu an rawn chawimawi ang. Nang chu i ropui si a, thilmakte i ti bawk ṭhîn a: nangmah chauh hi Pathian i ni,” tiin.
3. Engtin nge “mipui tam tak” chuan ‘achhûn azânin rawng an bâwl’?
3 Chutiang bawkin, Thu Puan 7:9, 15 pawhin Pathian chibai bûktu “mipui tam tak” chuan “achhûn azânin [Pathian] biak inah chuan a rawng an bâwl” thu a sawi bawk a. Pathianin a chhiahhlawhte chu chhum lo chat lo va amah chawimawi tûrin a phût tihna a ni lo; mahse, amah chibai bûktute chu khawvêl pum huap inawpna pâwlah an awm a. Chuvângin, ram ṭhenkhata zân a nih laiin, khawvêl hmun danga Pathian chhiahhlawhte chu thu hrilin an buai êm êm thung a ni. Chutiang a nih avâng chuan, achhûn azânin Jehova chawimawitu an awm a tih theih a ni. Nakin lawkah chuan, “engkim, thaw thei tawh phawt chuan” Jehova chawimawia aw an chhuah hun a lo thleng thuai ang. (Sâm 150:6) Mahse, chu hun a lo thlen hma chuan, Pathian chawimawi tûrin a mi malin eng nge kan tih theih? Eng harsatnate nge kan tawn ang? Tin, Pathian chawimawitute chu eng malsâwmnain nge nghâk? Hêng zawhnate chhân nân hian, Israel mi Gada hnam chungchânga Bible thuziak hi i lo ngaihtuah ang u.
Hmân Laia Harsatna
4. Gada thlahte’n eng harsatna nge an tawh?
4 Ram Tiam an luh hma lawkin, Israel mi Gada thlahte chuan Jordan chhak lama ran tlatna hmun ṭha tak maiah chuan chên an dîl tlat mai a. (Numbers 32:1-5) Chuta chêng tûr chuan harsatna nasa tak tawn reng a ngai dâwn a ni. A thlang lama awm hnamte tân chuan Jordan Lui ruam chu sipaiin an rûn loh nâna vênghimtu amaha awm sa a ni dâwn a ni. (Josua 3:13-17) Mahse, Jordan chhak lama ram chungchângah George Adam Smith-a Ram Tiam leilung pianhmang chanchin ziakna lehkhabu The Historical Geography of the Holy Land, tih chuan heti hian a sawi: “[Ram] chu daidangtu engmah awm lo deuhthawin Arabia ram zâwl zau takah chuan a inpharh duai mai a. Chuvângin, chuta awmte chu pêmlâwr hnam ṭâm takte’n an rûn reng ṭhîn a, a ṭhen phei chuan chu hmun zâwl zau tak chu an ran tlat nân kum tin an hrût chhuak ṭhîn a ni,” tiin.
5. Engtin nge Jakoba chuan Gada thlahte chu râlin an beih huna ti lêt tûra a fuih?
5 Engtin nge Gada thlahte chu chutiang nêkchêp rengna hnuaiah chuan an awm theih? Kum zabi engemaw zât kalta khân, an thlahtu Jakoba chuan a thihna khumah heti hian a lo sawi lâwk diam a ni: “Gada hi, râlin an bei ang a, nimahsela ani chuan an ke artui lamah a bei zâwk ang,” tiin. (Genesis 49:18, 19) Han ngaihtuah mai chuan chûng thute chu a beidawnthlâk hle mai thei. Mahse, a nihna takah chuan chûng thute chu Gada thlahte hnêna bei lêt tûra thupêkna a ni. Jakoba chuan chutianga an beihlêt phawt chuan, anmahni beitute chu zahthlâk takin an tlânchhia ang a, Gada thlahte chuan an ke artui lam an bei zâwk dâwn tih a hrilh a ni.
Tûn Lai Pathian Biaknaa Harsatna Kan Tawhte
6, 7. Engtin nge tûn laia Kristiante dinhmun leh Gada thlahte dinhmun chu a inan?
6 Gada thlahte ang bawkin, tûn laia Kristiante pawh Setana khawvêl nêkchêp leh tihhrehawmin an awm a; thilmak tiha humhimna kan dawng lo va. (Joba 1:10-12) Kan zînga tam tak chuan school kan kalnaah te, ei zawnnaah te, leh fanau enkawlnaah te nêksâwrna kan tâwk a. Mi mal emaw, chhûng lam aṭang emawa nêksâwrna pawh hmaih chi a ni lo. Ṭhenkhat chuan ramtuileilohna leh natna khirh tak ang chi ‘tisaa hlîng’ chu an tawrh chhuah a ngai a ni. (2 Korinth 12:7-10) Mi dangte lahin tlâktlai lo nia inhriatna an nei bawk. Kristian tar tawhte chu upatnain a thlen “ni ṭha lote” chuan tûn hma angin Jehova rawng a bâwltîr thei lo a ni.—Thuhriltu 12:1.
7 Tirhkoh Paula pawhin “kan buante hi . . . vân hmunahte thlarau sualho awmte an ni” tih min hriattîr a. (Ephesi 6:12) “Khawvêl thlarau,” Setana leh a ramhuaihote tihlâr helna leh nungchang bawlhhlawhna thlarau chu kan hmachhawn reng a ni. (1 Korinth 2:12; Ephesi 2:2, 3) Pathian ṭih mi Lota angin, tûn laiah pawh kan vêla mite ṭawngkam leh nungchang bawlhhlawh takte avângin kan lungngai hle mai thei. (2 Petera 2:7) Tin, Setana hmaichhana beihna chu kan tawng bawk. Setana chuan hriak thih la bâng, “Pathian thupêkte zâwma Isua hriattîrna thu pawmte” chu a do tlat a ni. (Thu Puan 12:17) Isua “berâm dang” hote pawhin, khapbehna leh tihduhdahnate hmanga Setana beihna chu an tâwk bawk.—Johana 10:16.
Kan Tlâwm Dâwn Nge Kan Bei Lêt Dâwn?
8. Engtin nge Setana beihna kan chhân lêt ang a, engvâng nge?
8 Setana min beihna chu engtin nge kan chhân lêt ang? Hmân laia Gada thlahte angin, Pathian kaihhruaina anga thlarau lamah chak taka awmin, kan bei lêt tûr a ni. Lungchhiatthlâk takin, ṭhenkhat chu nuna nêksâwrna lakah an tlâwm ṭan a, an thlarau lam mawhphurhna chu an ngaihthah a ni. (Matthaia 13:20-22) Thuhretu pakhat chuan an kohhrana inkhâwm an tlêm chhan hetiang hian a sawi: “Unaute chu an chau chhe êm a ni. An vaiin an chau ngawih ngawih a ni,” tiin. Ni e, tûn lai mite hian chauh chhan tûr thil tam tak an nei a. Chuvângin, Pathian biakna pawh hi nêksâwrna chi dang, phurrit anga ngaih mai a awl êm êm a ni. Mahse, chu chu ngaih dân ṭha—emaw dik emaw—a ni em?
9. Engtin nge Krista nghâwngkawl bahna chuan chawlhna min pêk?
9 Nuna nêksâwrnate avânga chau a hun laia mipuite hnêna Isua thusawi hi ngaihtuah teh: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u,” tih hi. Isua chuan chawlhhahdamna chu Pathian rawngbâwlna tihtlêm aṭangin a lo awm ang a ti em? Chutianga ti lovin hetiang hian a ti zâwk a ni: “Ka nghâwngkawl hi bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang,” tiin. Nghâwngkawl chu thing emaw, thîr emaw aṭanga siam, mihring emaw, ran emawin thil rit phurh nâna an hman hi a ni. Chutiang ni si, engati nge miin chutiang nghâwngkawl chu bah a duh ang? Kan “phurrit” sa hle tawh a ni lâwm ni? Ni e, mahse Grik thuziak chu: “Ka nghâwngkawl hi rawn bât ve rawh,” tihna pawh a ni thei a. Han ngaihtuah teh: Isua chuan kan rit phurh min phurhpui a inhuam a nih chu! Chu chu kan chakna maia tih a ngai lo a ni.—Matthaia 9:36; 11:28, 29; 2 Korinth 4:7.
10. Pathian chawimawi tûra theihtâwp kan chhuahna chuan eng rah nge a chhuah?
10 Zirtîr nihna nghâwngkawl kan bah hian, Setana kan bei lêt tihna a ni. Jakoba 4:7 chuan, “Diabola dodâl rawh u, tichuan a tlân bosan ang che u,” tih min tiam a. Hetiang a nih avâng hian Diabola dodâl chu a awlsam dâwn tihna a ni lo. Pathian rawngbâwl tûr chuan theihtâwp chhuah a ngai a ni. (Luka 13:24) Mahse, Bible chuan Sâm 126:5-ah he thutiam min pe: “Mittui tla chunga tuhte chuan hlim takin an ât ang,” tiin. Ni e, lâwm nachâng hre lo Pathian bia kan ni lo. Ani chu amah “zawngtute hnêna lâwmman pêk hmang” a ni a, amah chawimawitute chu mal a sâwm ṭhîn a ni.—Hebrai 11:6.
Lalram Thuhriltute Anga Pathian Chawimawina
11. Engtin nge thlawhhma rawngbâwlna chu Setana beihna laka invênna a nih?
11 Isua chuan: “Kal ula, hnam tina mi zirtîrahte siam ula,” tiin thu min pe a. Thuhrilh rawngbâwlna hi Pathian hnêna “faka inthâwina” kan hlan dân kawng pawimawh ber a ni. (Matthaia 28:19; Hebrai 13:15) ‘Remna chanchin ṭha inbuatsaihna kea bun’ chu kan ‘râlthuam famkim’ pêng pawimawh tak a ni—Setana mi beihna laka kan invênhimna chu. (Ephesi 6:11-15) Thlawhhma rawngbâwlnaa Pathian chawimawi hi kan rinna tihchakna kawng ṭha tak a ni a. (2 Korinth 4:13) Chu chuan thil ṭha lote ngaihtuah lo tûrin kan rilru a vêng a ni. (Philippi 4:8) Thlawhhma rawngbâwlnaa telna chuan Pathian chibai kan bûkpuite nêna inkawmna mi tichak thei tak min neihtîr a ni.
12, 13. Engtin nge thlawhhma rawngbâwlnaa tel ziahna chuan chhûngkua a ṭanpui theih? Hrilhfiah rawh.
12 Thuhrilh rawngbâwlna chu chhûngkaw thiltih ṭha tak a ni thei bawk. Naupangte chuan a âwm tâwka intihhlimna chu an mamawh ngei mai. Nimahsela, chhûngkuaa thlawhhma rawngbâwlnaa hun hman chu hna hahthlâk tak a ni tûr a ni lo. Nu leh pate chuan an fate chu rawngbâwlnaa thiam thei tûra zirtîrna hmangin, thuhrilhna chu hlimawm tak an nihtîr thei a ni. Naupangte chuan ṭha taka an tih theihte chu tih nuam an ti ṭhîn a ni lâwm ni? Nu leh pate chuan naupangte chu an theih tâwk aia tam phût lovin, rawngbâwlnaa hlimna hmu tûrin an ṭanpui thei a ni.—Genesis 33:13, 14.
13 Chu bâkah, chhûngkuaa Pathian chawimawi tlângte chuan inlaichînna ṭha an siam ṭhîn. Fa panga nei, a pasal ring lo miin a tlân bosan unaunu pakhat hi han ngaihtuah teh. Ani chuan hna thawhin a fate tisa lam mamawh chu a phuhrûksak a ngai a. A hna lamah a chauh êm avângin, a fate thlarau lam mamawh chu a hlamchhiah mai em? Hetiang hian a sawi: “Bible leh Bible ṭan chhan thu leh hla chhuahte chu taima takin ka zir a, ka thu chhiarte chu nunpui ka tum zêl a. Ka fate pawh inkhâwmnaah leh in tina rawngbâwlnaah ka hruai ziah ṭhîn. Ka thawhrimna chuan eng nge a rah chhuah? Ka fate zawng zawngin baptisma an chang vek tawh a ni,” tiin. Chutiang bawka rawngbâwlnaa theihtâwpa telna chuan i fate “Lalpa thununnaah leh zilhnaah chuan enkawl” tûra i thawhrimna chu a ṭanpui thei a ni.—Ephesi 6:4.
14. (a) Engtin nge naupangte chuan school-ah Pathian an chawimawi theih? (b) Engin nge naupangte chu ‘chanchin ṭha zahpui’ lo tûra ṭanpui thei?
14 Naupangte u, in chênna ramin a phal phawt chuan, school-a thu hrilhna hmangin Pathian in chawimawi em? Nge, mihring hlauhnain a ngawihtîr zâwk che u? (Thufingte 29:25) Puerto Rico rama Thuhretu kum 13 mi pakhat chuan heti hian a ziak: “Ka thu hrilh hi thutak a ni tih ka hriat tlat avângin school-a thuhrilh chu ka zahpui ngai lo. Class-ah pawh ka bân pharin, Bible aṭanga ka thu zirte ka hrilh chhâwng zêl ṭhîn. Hun âwl ka neih châng chuan, library-ah ka kal a, Young People Ask lehkhabu chu ka chhiar ṭhîn,” tiin. * A thawhrimna chu Jehova’n mal a sâwm em? Hetiang hian a sawi: “A châng chuan ka pâwlpuite chuan zawhnate min zâwt ṭhîn a, lehkhabu pawh min dîl hial a ni,” tiin. He mi kawngah hian hrehna i nei ṭhîn a nih chuan, mahnia taima taka inzirna hmangin ‘Pathian duhzâwng, a ṭha leh lawm tlâk leh, ṭha famkim’ i nih theih nân ṭan i lâk a ngai thei ang. (Rom 12:2) I zir chu thutak a ni tih i rin ngheh phawt chuan, ‘chanchin ṭha chu i zahpui’ ngai lo vang.—Rom 1:16.
Rawngbâwlna ‘Kawngka Inhawng’
15, 16. Eng “kawngka zau tak leh sâwt tak” inhawngah nge Kristian ṭhenkhat an luh a, chutianga an tihna aṭangin eng malsâwmnate nge an dawn?
15 Tirhkoh Paula chuan atâna “kawngka zau tak leh sâwt tak” a inhawn thu a ziak a. (1 Korinth 16:9) Rawngbâwlna danga tel thei dinhmunah i ding em? Entîr nân, regular emaw, auxiliary pioneer rawngbâwlna emawa tel tûr chuan thla khatah thuhrilhnaa dârkâr 70 emaw, 50 emaw pêk a ngai a. Chuvângin, pioneer thawkte chu an Kristianpuite chuan rinawm taka an rawngbâwlna avângin an ngaihlu hle a ni. Mahse, rawngbâwlnaa hun an hman tam zâwk avângin an unaute aia chungnung zâwkah an indah lo. Chutih a hnêkin, Isua’n pu tûra a tih rilru put hmang: “Bâwih ṭhahnem lo kan ni e; kan tih tûr rêng a ni kan tih ni,” tih hi an nei tlat zâwk a ni.—Luka 17:10.
16 Pioneer thawk tûr chuan mahni inthunun theih, inruahmanna, leh thil engemaw chân inhuam a ngai a. Mahse, chutianga tih avânga malsâwmna dawn chu hlu tak a ni. “Pathian thutak thu fel taka hman theih chu malsâwmna a ni tak zet a ni,” tiin pioneer ṭhalai pakhat, Tamika-i chuan a sawi. “Pioneer i thawh hian, Bible i hmang nasa a. Tûnah chuan in tin ka kal apiangin, in neitu tinte tâna inâwm tûr Pathian Lehkha Thute ka ngaihtuah chhuak zêl thei tawh a ni,” a ti bawk. (2 Timothea 2:15) Pioneer dang Mica-i pawhin: “Thutakin mite nunah nghawng a neih dân hmuh pawh hi malsâwmna dang ropui tak a ni,” a ti bawk. Ṭhalai pakhat Matthew-a pawhin “mi tuemaw thutaka an lo lût hmuh a hlimawmzia leh chu mi vânga hlimna chu hlimna dang engmahin a thlâk thei lo” tih a sawi bawk.
17. Engtin nge Kristian pakhatin pioneer thawk tûra tling lo a intih ṭhinna chu a hneh theih?
17 Pioneer thawh chu i ngaihtuah thei em? Thawh i duh ang a; mahse, tling lo i inti pawh a ni mahna. “Pioneer rawngbâwlna chungchângah hian ka bangbo ṭhîn. Tling lo ka inti a. Thusawi ṭan dân tûr inpuahchah dân leh Pathian Lehkha Thu aṭanga chhûtpui dân ka thiam lo,” tiin unaunu ṭhalai pakhat, Kenyatte-i chuan a sawi. Mahse, upate chuan pioneer unaunu puitling tak pakhat chu thawhpui tûrin an ruat a. Kenyatte-i chuan: “Ani nêna thawhdun chu a nuam khawp mai. Pioneer thawh duhna min neihtîr hial a ni,” a ti. Nang ngei pawhin fuihna leh zirtîrna tlêm i dawn chuan i pioneer duh mai thei asin.
18. Missionary rawngbâwlnaa inhmangte’n eng malsâwmnate nge an dawn theih?
18 Pioneer chuan rawngbâwlna dang thawh theihna kawngka pawh a hawng thei bawk. Entîr nân, nupa ṭhenkhat chu ram danga rawngbâwl tûra missionary zirtîrna dawng tûrin an tling thei a. Missionary-te chuan an kalna ram thar te, ṭawng thar te, nunphung thar te, leh chaw chi dangte chu an mil theih a ngai a ni. Mahse, chutiang remchân lohnate chu malsâwmna an dawnte lakah chuan nêp tak a ni. Mexico rama rei tak chhûng missionary thawk Mildred-i chuan heti hian a ti: “Missionary ni tûra ka thutâwp siam avângin ka inchhîr ngai lo rêng rêng. Hmeichhe naupang tê ka nih lai aṭanga ka thil châk tak a ni,” tiin. Eng malsâwmna nge a dawn? “Kan ramah chuan Bible zirpui neih a harsa êm êm a. Hetah hi chuan, ka Bible zirpui mi pali laiin rawngbâwlnaa a ruala tel ṭan châng an nei a ni!,” a ti.
19, 20. Engtin nge Bethel-a rawngbâwlna te, khawvêl pum huapa rawngbâwlnaa inhmanna te, leh Ministerial Training School te chuan mi tam takte chungah malsâwmna a thlen?
19 Jehova Thuhretute branch office-a Bethel rawngbâwlnaa inhmangte pawhin malsâwmna nasa tak an dawng bawk. German Bethel-a rawngbâwl unaupa tleirâwl pakhat, Sven-a chuan a hna chungchâng hetiang hian a sawi a ni: “Hlutna daih rei tak nei thil engemaw thawkah ka inngai tlat a ni. Ka thiamnate hi khawvêla hmang thei reng ka ni a. Mahse, chu chu bank tlachhe mai tûra pawisa khâwl zêl ang lek ka ni dâwn si,” a ti. Ni e, hlawh nei lova mahnia inpêa rawngbâwl tûr chuan inpêkna nasa tak a ngai ngei mai. Mahse, Sven-a chuan: “I han haw a, nilênga i thiltih zawng zawngte chu Jehova tân a ni tih i hre reng a. Chu chuan rilru nawmna ‘nasa tak’ min pe a ni,” a ti.
20 Unau ṭhenkhat chu international rawngbâwlnaah te, ram danga branch saknaah te an tel bawk a. Ram pariata rawngbâwl tawh unau nupa tuak khat chuan hetiang hian an ziak: “Heta kan unaute hi an fel hlawm êm êm a. Kan thiltawnte kha a va han ṭha tak êm! Kalsan an hrehawm hle ang—ṭum riat lai ‘rilru hrehawmin’ kan awm tawh si a,” tiin. Chutah Ministerial Training School a awm leh a. Chutah kal tûra tling unaupa la tlangvâlte chu thlarau lam zirtîrna pêk an ni a. Chutianga zir chhuak unaupa pakhat chuan: “Chutiang school ṭha tak kan neih avânga lâwmthu sawi ngaihna pawh ka hre lo. Eng inawpna pâwl dangin nge hetianga zirtîrna pe tûra theihtâwp chhuah ang le?,” tiin a ziak a ni.
21. Kristian tinte’n Pathian rawng an bâwlnaah eng harsatnate nge an tawh ṭheuh?
21 Ni e, rawngbâwlna kawngka tam tak a inhawng a ni. Kan zînga a tam zâwkte chuan Bethel-ah emaw, ram dangah emaw rawng an bâwl thei kher lo ngei mai. Isua ngei pawhin Kristiante hian dinhmun chi hrang hrang avângin, “rah” inzât an chhuah dâwn lo tih a hre vek a ni. (Matthaia 13:23) Chuvângin, Kristian kan nih anga kan harsatna tawh chu kan dinhmunte a ṭangkai thei ang bera hman—kan dinhmunin azir ang zêla theihtâwpa Jehova rawngbâwl hi a ni. Chutianga kan tih chuan, Jehova kan chawimawi a, ani pawh a lâwm hle tih kan chiang thei a ni. Unaunu tar tawh pakhat, chênchilh chi damdawi ina awm Ethel-i chanchin han ngaihtuah teh. Ani chuan a awmna ina chêng mi dangte hnênah thu a hrilh reng ṭhîn a, telephone hmangin thu a hrilh bawk ṭhîn a ni. Theih chin tâwk nei ni mah se, a rawngbâwlnaah theihtâwp a chhuah a ni.—Matthaia 22:37.
22. (a) Eng kawng dangte hmangin nge Pathian kan chawimawi theih? (b) Eng hun ropui takin nge min nghâk reng?
22 Mahse, thuhrilh hi Jehova kan chawimawi theih dân kawng awmchhun a ni lo tih hre reng ang che. Kan hna thawhna hmunah te, school-ah te, leh in-ah te kan nungchang leh lan dân lama entawn tûr siamna hmang pawhin Jehova thinlung kan tilâwm a ni. (Thufingte 27:11) Thufingte 28:20 chuan hetiang hian min tiam: “Mi rinawm chuan malsâwmna a ngah ang,” tiin. Chuvângin, Pathian rawng kan bâwlnaah hian malsâwmna tam tak kan dawng dâwn tih hre rengin kan “theh tam” tûr a ni. (2 Korinth 9:6) Chutianga kan tih chuan, ‘engkim, thaw thei tawh phawtin,’ Jehova’n a phu ang ngeia amah an fak hun, hun ropui takah kan awm ve thei dâwn a ni.—Sâm 150:6. (w04 6/1)
[Footnote]
^ par. 14 Questions Young People Ask—Answers That Work tih lehkhabu chu Jehova Thuhretute chhuah a ni.
I Hre Chhuak Em?
• Engtin nge Pathian mite chuan “achhûn azânin” Jehova rawng an bâwl?
• Gada thlahte’n eng harsatna nge an tawh a, chu chuan tûn laia Kristiante hnênah eng nge a zirtîr?
• Engtin nge thlawhhma rawngbâwlna hi Setana beihna laka invênna a nih?
• Eng ‘kawngka inhawngah’ nge mi ṭhenkhat chu an luh a, eng malsâwmnate nge an dawn?
[Zirlai Atâna Zawhnate]
[Phêk 26-naa milemte]
Pioneer thawhnain rawngbâwlna dang atâna kawngka a hawn theihte zîngah chuan hêngte hi a tel:
1. Khawvêl pum huapa rawngbâwlna
2. Bethel-a rawngbâwlna
3. Missionary-a rawngbâwlna