Tarte Enkawl​—⁠Kristiante Mawhphurhna

“In tarkûn thleng pawhin amaha chu ka ni ang a, in lûa kêlsam a ṭo vek thleng pawhin ka pawm ang che u.”​—⁠ISAIA 46:⁠4.

1, 2. Engtin nge mihring nu leh pate ngaihsakna pêk leh kan Pa vâna mi ngaihsakna pêk chu a inan loh?

NU LEH PA inpumpêk takte chuan an fate chu an sên lai, naupan lai, leh tleirâwl chhuah lai thlengin an enkawl a. Tleirâwlte an lo puitlin a, mahnia chhûngkaw nei an nih thlengin, an nu leh pate chuan an ngaihsakin an ṭanpui zêl a ni.

² Mihringte’n an fate tâna an tihsak theihte chuan chintâwk nei mah se, kan Pa vâna mi chuan a chhiahhlawh rinawmte chu a ngaihsakin a ṭanpui reng thei a ni. Jehova chuan hmân laia a mi thlante hnênah: “In tarkûn thleng pawhin amaha chu ka ni ang a, in lûa kêlsam a ṭo vek thleng pawhin ka pawm ang che u,” a ti a. (Isaia 46:⁠4) Hêng thute hi Kristian tar tawhte tân a va thlamuanthlâk tak êm! Jehova chuan a laka rinawm nghet rengte chu a hawisan lo. An dam chhûng, an tarkûn thleng pawha ṭanpui te, chhawmdâwl te, leh kaihhruai te chu a tiam zâwk mah a ni.​—⁠Sâm 48:14.

3. He thu ziakah hian, eng nge kan ngaihtuah dâwn?

³ Jehova’n tarte a ngaihsakna chu engtin nge kan entawn theih? (Ephesi 5:​1, 2) Naupangte, kohhran enkawltute, leh Kristian tinte’n kan khawvêl pum huap unaute zînga tarte mamawh kan ngaihsak theih dân i lo ngaihtuah ang u.

Naupang Anga Kan Mawhphurhna

4. Kristian nunpangte chuan a nu leh pate chungah eng mawhphurhna nge an neih?

⁴ “I nu leh i pa chawimawi rawh.” (Ephesi 6:2; Exodus 20:12) Hebrai Pathian Lehkha Thu aṭanga lâk chhâwn he thu mâwlmang tak, awmze ril tak nei si hmang hian, tirhkoh Paula chuan naupangte chu nu leh pate chunga an mawhphurhna a hriatnawntîr a ni. Mahse, hêng thu hi tarte enkawl nên engtin nge a inkûngkaih? Kristian hun hmaa entawn tûr duhawm tak chuan he zawhna hi min chhânsak ang.

5. (a) Josefa chuan a chhûngkaw mawhphurhna a theihnghilh lo tih engin nge târ lang? (b) Kan nu leh pate chawimawi tih hi eng tihna nge ni a, he mi chungchângah hian Josefa’n eng entawn tûr ṭha nge a siam?

⁵ Kum 20 chuang chu Josefa chuan a pa tar tawh tak chhûngkaw puipa Jakoba chu a pawh thei lo va. Mahse, Josefa chuan Jakoba a hmangaihna chhûngkhat inhmangaihna chu a hloh lo tih a lang a ni. Josefa’n a nihna dik tak a unaute hnêna a puan khân: “Ka pa chu a la dam maw?” tiin a zâwt hial a nih kha. (Genesis 43:​7, 27; 45:⁠3) Chutih lai chuan, Kanaan ramah ṭâm nasa tak a tla a. Chuvângin, Josefa chuan a pa hnêna thu chahin: “Ka hnênah lo chhuk rawh, rei rawn rial suh: tichuan Gosen ramah i awm ang a, ka kiang ngeiah hian i awm dâwn nia . . . chutah chuan keiman ka châwm ang che,” a ti a ni. (Genesis 45:​9-11; 47:12) Ni e, nu leh pa tarte chawimawinaah chuan mahni an inenkawl theih loh huna vênhim leh châwm a tel a ni. (1 Samuela 22:​1-4; Johana 19:​25-27) Josefa chuan chu mawhphurhna chu lâwm takin a pawm a ni.

6. Engtin nge Josefa’n a pa a hmangaih tak zetzia a lantîr a, engtin nge kan entawn theih ang?

⁶ Jehova ṭanpuina zârah, Josefa chu Aigupta rama hausa ber leh thunei berte zînga mi a lo ni a. (Genesis 41:40) Mahse, ani chu a pa upa tawh tak kum 130 mi chu chawimawi  tûrin a inngai pawimawh lutuk emaw, a buai lutuk emaw lo. Jakoba (or Israela) a lo thleng hnai tih a hriat chuan, “Josefa chuan a tawlailîr chu a buatsaih a, Gosen ramah chuan a pa hmuak tûrin a han kal ta a; tin, a hnênah a inhriattîr a, a ir a chuktuah a, rei fe a ir chuktuahin a ṭap a.” (Genesis 46:​28, 29) He inlawmna hi inzahna lantîrna pângngai piah lam thil a ni. Josefa chuan a pa tar tawh tak chu a hmangaih êm êm a, a hmangaihzia pawh a lantîr zak lo a ni. Nu leh pa tar nei kan nih chuan, kan hmangaihzia chu chutiang khawpin kan lantîr ve em?

7. Engvângin nge Jakoba’n Kanaan rama phûm nih a duh?

⁷ Jehova hnêna Jakoba inpêkna chu a thih thlengin a nghet a. (Hebrai 11:21) Pathian thutiamte a rin avângin, a ruang chu Kanaan-a phûm a ngên a ni. Chutianga tih chu a man a tovin, hahthlâk hle mah se, Josefa chuan chu ngenna chu pawmin a pa a chawimawi a ni.​—⁠Genesis 47:​29-31; 50:​7-14.

8. (a) Eng nge kan nu leh pa tarte enkawl tûra min chêttîrtu ber chu? (b) Hun kima rawngbâwltu pakhatin a nu leh pa tar tawhte enkawl tûrin eng nge a tih? (Phêk 15-a bâwm en rawh.)

⁸ A pa enkawl tûrin engin nge Josefa chu chêttîr le? Nunna petu leh châwm seiliantu chunga hmangaihna leh bat nei nia a inhriatnate chu a chhan ni hlawm mah se, Josefa chuan Jehova tihlâwm a duh vâng a ni bawk tih chu rinhlelh rual a ni lo. Keini pawhin chutiang duhna chu kan nei ve tûr a ni. Paula chuan: “Hmeithai tupawhin fate emaw, tute emaw nei sela, chûngte chuan anmahni in chhûng lamah Pathian ngaihsaka awm leh anmahni hringtute chungah ṭhat ve thung zir zet rawh se; chu chu Pathian lâwmzâwng a ni si a,” tiin a ziak a ni. (1 Timothea 5:⁠4) Jehova hmangaihna leh amah ṭihna chuan eng anga harsa pawh ni se, kan nu leh pa tarte enkawl tûrin min chêttîr ang. *

Upate’n An Ngaihsakzia An Lantîr

9. Jehova’n Kristian tarte pawh tiamin, berâmte enkawl tûrin tute nge a ruat?

⁹ A thih dâwn hnaihah Jakoba chuan Jehova chu “vawiin thlenga ka damchhûng zawng zawnga mi châwmtu Pathian,” a ti a. (Genesis 48:15) Tûn laiah, Jehova chuan a lei lam chhiahhlawhte chu a Fapa, Isua Krista “berâm vêngtu lalber” kaihhruaina hnuaia Kristian enkawltute, a nih loh leh upate hmangin a châwm a ni. (1 Petera 5:​2-5) Engtin nge upate chuan berâm zînga tarte an enkawlnaah Jehova an entawn theih ang?

10. Kristian tarte sum leh pai lama ṭanpui tûrin eng nge tih a nih? (Phêk 17-a bâwm en rawh.)

¹⁰ Kristian kohhran a pian hnu lawkah, tirhkohte chuan Kristian hmeithai retheite “ni tin thil sem” enkawl tûrin “thlarau leh fina khat mi hmingṭha hlîr pasarih” chu an ruat a. (Tirhkohte 6:​1-6) A hnuah, Paula chuan enkawltu Timothea chu hmeithai tar entawn tlâkte chu sum leh pai lama ṭanpuina dawng tûrte zînga telh tûrin a hrilh a ni. (1 Timothea 5:​3, 9, 10) Chutiang bawkin, tûn laia kohhran enkawltute pawhin a ṭûl hunah Kristian tarte tân ṭanpuina pêk dân tûr chu châk takin an huaihawt ve a. Amaherawhchu, tar rinawmte enkawlnaah hêng bâk thil dang a la awm cheu a ni.

11. Hmeithai retheiin thawhlâwm tlêm tê a pêk chungchângah Isua’n eng nge a sawi?

¹¹ Isua chuan a lei lam rawngbâwlna a tâwp dâwn ṭepah biak inah ṭhuin “thawhlâwm bâwma mipuiho tangka thlâkzia chu a en a.” Tichuan, tuemawni chuan a rilru a la ta. Thuziak chuan: “Hmeithai rethei tê a lo kal a, dar tangka dere pahnih a thlâk a,” a ti. Isua’n a zirtîrte ko khâwmin, an hnênah: “Tih tak meuhvin ka hrilh a che u, thawhlâwm bâwma thlâktu zawng zawng ai hian he hmeithai rethei tê hian a thlâk tam zâwk. Hêng zawng zawng hian an neih liama mi an thlâk a ni; ani erawh hi chuan a duh lai tak, a neih chhun tak, a intunnunna tûr zawng  zawng chu a thlâk vek a ni,” a ti a. (Marka 12:​41-44) A hlutna lam thuah chuan, hmeithai thawhlâwm thawh chu a tlêm hle a; mahse, Isua chuan thinlung zawng zawnga lantîr chutiang inpêkna chu a Pa vâna miin a hlutzia a hria a ni. Hmeithai rethei chu kum engzât mi pawh ni se, Isua chuan a thiltih chu a hmuh hmaih lo a ni.

12. Engtin nge upate chuan Kristian tarte thiltih an hlutzia an lantîr theih?

¹² Isua ang bawkin, Kristian enkawltute chuan biakna dik tihhmasâwn nâna tarte thiltih chu an hmuh hmaih lo. Upate chuan tarte chu rawngbâwlnaa an tel avâng te, inkhâwmnaa an chhân avâng te, kohhranah a ṭha lama nghawng an neih avâng te, leh an chhelna avâng tein fakna tûr chhan tam tak an nei a ni. Tih tak zeta fuihna chuan tarte chu an rawngbâwlna thianghlima “chhuan tûr” nei tûrin a ṭanpui thei a, chutiang chuan Kristian dangte thiltihte emaw, hun kal tawha anmahni ngei thiltihte emaw nêna khaikhin avânga lunghnualna chu pumpelh a ni dâwn a ni.​—⁠Galatia 6:⁠4.

13. Engtin nge upate chuan tarte thiltawn leh an thiamnate an zawh theih?

¹³ Upate chuan Kristian tarte ṭanpuina hlu tak an hriatthiamzia chu an thiltawnte leh an thiamnate zawhna hmangin an lantîr thei a. Tar entawn tlâkte chu lamchan emaw, biangbiakna emaw atân hman ṭhin tûr a ni. Upa pakhat chuan: “An fate thutaka enkawl seiliantu unau tar tawhte biangbiakna ka neih hian, ngaithlatute chuan an beng an chhi bîk a ni,” a ti. Kohhran danga upate chuan, kum 71 mi pioneer unaunu chuan Lalram thuchhuahtute chu thlawhhma rawngbâwlnaa tel ziah tûra ṭanpuina kawnga a hlawhtlin thu an sawi a ni. Tin, ani chuan Bible leh ni châng chhiar ang thil “bulpuite” ti tûr leh an thil chhiarte ngun taka chhût tûrin a fuih bawk a ni.

14. Engtin nge upahote chuan an thawhpui putar pakhat an hlutzia an târ lan?

¹⁴ Upate chuan an zînga tar tawhte ṭanpuina chu an hlut bawk a ni. Kum 70 chho bâwr vêl José-a, kum sâwmbi têl upa nia rawngbâwl tawh chuan tûn hnai mai khân inzaipui a tâwk a. Rei tak chhûng a dam kawr avângin, enkawltu lû nihna ata inhnuhdawh a tum a ni. José-a chuan: “Upa dangte chhân lêt dân chu mak ka ti ngawt mai. Ka rawtna siam pawm lo vin, ka mawhphurhna ka hlen zêl theih nâna ṭanpuina ka mamawhte chu min zâwt zâwk a,” a ti. Upa zînga a naupang zâwkte ṭanpuinain José-a chuan enkawltu lû anga a rawngbâwlna chu hlim takin a chhun zawm thei a, chu chu kohhran tân pawh  malsâwmna a ni. A upa nihpui pakhat chuan: “Unaute chuan upa anga José-a rawngbâwlna chu an ngaisâng hle a. A thiltawn leh a rinna entawn tlâk tak avângin, ani chu an hmangaih a, an zah bawk a ni. Kan kohhran a tichangtlung tlat,” a ti.

Inenkawl Tawn Rawh U

15. Engvângin nge Kristian zawng zawngte chuan an zînga tarte ṭhatna tûr chu an ngaihtuah ang?

¹⁵ Nu leh pa tar nei naupangte leh rawngbâwltua ruatte chauh chu tarte ngaihsaktu tûr an ni lo. Kristian kohhran chu mihring taksa nêna khaikhinin, Paula chuan: “Taksaah hian inṭhenna rêng rêng a awm lova, a pêngte hian inang taka an inbuaipui tawn ṭheuh zâwkna tûrin Pathianin mawina nei lo pêng chu chawimawi nasa zâwkin, taksa hi a remkhâwm a ni,” tiin a ziak a. (1 Korinth 12:​24, 25) Kristian kohhranin inrem taka hna thawk tûr chuan, tarte pawh tiamin mi mal tinte chuan an rinpuite ṭhatna tûr an ngaihtuah tûr a ni.​—⁠Galatia 6:⁠2.

16. Engtin nge Kristian inkhâwmnaah tarte ngaihsakna kan lantîr theih ang?

¹⁶ Kristian inkhâwmnate chuan tarte kan ngaihvenzia lantîr theihna hun remchâng ṭha tak min pe a. (Philippi 2:4; Hebrai 10:​24, 25) Chutiang hunahte chuan tarte titipui tûrin hun kan insiam em? An hrisêlna chungchâng zawh chu thil âwm tak a nih laiin, mi tichak thei thiltawn emaw, Pathian Lehkha Thu ngaihtuahna emaw hrilhna ang chite hmangin “thlarau lam thilpêk” kan pe thei ang em? Tar ṭhenkhat chu mahnia an chêtsawn theih loh avângin, an lo kal nghah aia anmahni va pan chu a ngilneihthlâk dâwn a ni. An beng a chhêt deuh a nih chuan, muangchâng leh fiah taka ṭawng chu a ngai mai thei a. Tichuan, “inthlamuan tawn” tûr chuan tarte thusawi chu ngun takin kan ngaihthlâksak tûr a ni.​—⁠Rom 1:​11, 12.

17. Ina khung Kristian tarte kan ngaihtuahzia chu engtin nge kan lantîr theih?

¹⁷ Tar tuemaw chu Kristian inkhâwmnaah tel thei lo ta se, engtin nge ni ang? Jakoba 1:27 chuan “fahrah leh hmeithaite an hrehawm laia kan” chu kan mawhphurhna a ni  tih a târ lang a ni. Grik thu mal “kan” tia lehlin awmze dang pakhat chu “va tlawh” tihna a ni a. Tarte chu kan va tlawh hian an va lâwm thei tak êm! C.E. 65 vêla Rom khuaa “putar” Paula a tân khân, a khua a har hle a. A thawhpui Timothea chu hmuh a châk êm avângin; “Rang takin ka hnênah lo kal hrâm rawh,” tiin lehkha a thawn a ni. (Philemona 9; 2 Timothea 1:​3, 4; 4:⁠9) Tarte chu Paula anga tân ina khung ni lo mah se, ṭhenkhat chu an hrisêl lohna avângin ina khung an ni a. Chuvâng chuan, ‘Khawngaih takin, min rawn tlawh hrâm rawh’ an ti rilru mai thei a ni. Chutiang ngenna chu kan chhâng em?

18. Tarte kan tlawhna aṭangin eng hlâwkna nge thleng thei?

¹⁸ Thlarau lama kan unau tar tawhte tlawh a hlâwkna chu ngainêp ngai suh. Kristian pakhat a hming Onesiphora chu Rom khuaa awm a ni a, Paula chu ngun taka zawng chhuakin, ‘a tiharh ṭhîn’ a ni. (2 Timothea 1:​16, 17) Tar unaunu pakhat chuan: “Naupang deuhte nêna hun hman tlân chu nuam ka ti thei hle. Ka duh ber mai chu an chhûngkaw zînga mi anga min cheibâwl hi a ni. Chu chuan min tichak hle,” a ti a. Kristian tar dang leh chuan: “Tuemawin card min thawn te, phone-a rei lo tê min biak te, a nih loh leh min rawn tlawh zawkte hian ka lâwm thei hle a. Chu chu boruak fîm hîp ang mai a ni,” a ti bawk.

Jehova’n Tar Enkawltute Mal A Sâwm

19. Tarte enkawlna aṭangin eng malsâwmna nge lo awm?

¹⁹ Tarte enkawlna chuan malsâwmna tam tak a thlen a. Tarte nêna inkawm leh an hriatna leh an thiltawnte hman ṭangkai theihna ringawt pawh hi manhla tak a ni. A enkawltute chuan pêkna aṭanga lo awm lungawina nasa zâwk an dawng a, Pathian Lehkha Thua mawhphurhna hlen nia inhriatna aṭanga lo awm chhûngril lama lungawina leh thlamuanna an nei bawk a ni. (Tirhkohte 20:35) Chu bâkah, tar enkawltute chuan an tar huna ngaihsak loh an nih an hlauh a ngai lo. Pathian Thu chuan: “Mi thilphal nunna chu tihthauvin a awm a, tui leih ṭhîntu chuan mahni pawh a inleih a ni,” tih min tiam a ni.​—⁠Thufingte 11:25.

20, 21. Engtin nge Jehova’n tar enkawltute chu a thlîr a, eng nge kan tum tlat tûr chu ni?

²⁰ Jehova chuan an rinpui tarte mamawh hmasial lo taka tihsaktu Pathian ṭih naupangte, enkawltute, leh ngaihsaktu Kristian  dangte chu mal a sâwm a. Chutiang rilru put hmang chu he thufing thu nên hian a inmil a ni: “Mi rethei khawngaih chuan LALPA a pûktîr a ni a, a thiltih ṭhat chu a rûl ang.” (Thufingte 19:17) Hmangaihnain mi hnuaihnungte leh retheite chunga duhsakna lantîr tûra min chêttîr chuan, Pathian chuan amah pûktîr nia ngaiin, malsâwmnain a rûl leh dâwn a ni. Kan chibai bûkpui tarte zînga tam tak chu ‘rinna hausa he khawvêl thila retheite’ an ni a, hmangaih taka kan enkawlna chu Pathianin min rûl leh bawk a ni.​—⁠Jakoba 2:⁠5.

²¹ Pathian chuan a va rûl ṭha tak êm! A rulhnaah chuan chatuan nunna pawh a tel a. Jehova chhiahhlawh a tam zâwkte tân chuan a rulhna chu, sual rochun nuai reha tar rinawmte an vânglai nîa an lo kîr lehna tûr, lei paradis-a chatuana nun hi a ni ang. (Thu Puan 21:​3-5) Chu malsâwmna kan nghah rualin, tarte enkawl tûra kan Kristian mawhphurhna chu i hlen zêl ang u. (w04 5/15)

[Footnote]

Eng Nge I Chhânna Chu?

• Engtin nge naupangte’n an nu leh pa tarte an chawimawi theih?

• Engtin nge upate’n berâm zînga tarte an hlutzia an lantîr?

• Kristian tinte’n tarte an ngaihsakna tak tak lantîr tûrin eng nge an tih theih?

• Kristian tarte enkawlnain eng malsâwmna nge a thlen?

[Zirlai Atâna Zawhnate]

[Phêk 15-naa bâwm]

A Nu leh Pate’n Ṭanpui An Mamawhin

Philip-a chuan Liberia rama mahni inpea in sa pâwl (construction worker) zînga rawng a bâwl lai kum 1999 khân, a pa a na hle tih chanchin a dawng a. A nu chuan a ṭanpuina tel lovin dinhmun chu a hmachhawn thei dâwn lo tih a hriat avângin, a pa enkawl tûrin ina haw chu a rêlthlu a ni.

Philip-a chuan: “Ina hawkîr tûra thutlûkna siam chu a harsa hle mai; mahse, ka mawhphurhna hmasa ber chu ka nu leh pate niin ka hre tlat a ni,” tiin a sawi a ni. Chu mi hnu kum thum chhûng chuan, a nu leh pa chu in ṭha zâwkah a sawn a, tualchhûnga a Kristianpuite ṭanpuinain in chu a pa mamawh ang takin a siam danglam a ni.

Tûnah chuan Philip-a nu pawh a pa natna khirh tak hmachhawn tûrin a inbuatsaih ṭha zâwk tawh a. Tûn hnai mai khân, Philip-a chuan Macedonia ram Jehova Thuhretute branch office-a mahni inpein hna thawk tûra sâwmna chu a pawm thei ta a ni.

[Phêk 7-naa bâwm]

A Mamawh Chu An Ngaihthahsak Lo

Australia rama kum 85 mi Kristian Ada-i chu a hrisêl loh avânga pâwn chhuak thei lova a awm chuan, kohhran upate chuan ṭanpuina pe tûrin ruahmanna an siam a. Amah ṭanpui thei tûr an rinpuite chu an huaihawt a ni. Hêng unaute hian in tihfaisak te, insûksak te, eirawngbâwlsak te, leh mamawh thil leisak ang chite chu lâwm takin an thawhsak a ni.

Chu ṭanpuina chu kum sâwm lai kal taa ṭan a ni tawh a. Tûn thlengin, Jehova Thuhretu mi 30 chuangte chuan Ada-i chu an la ṭanpui reng a ni. Amah va tlawh te, Bible thu leh hla chhuah chhiarsak te, kohhrana thlarau lama hmasâwnte chanchin hrilh te, leh ṭawngṭainate chu an neihpui zêl a ni.

Tualchhûng Kristian upa pakhat chuan: “Ada-i enkawltute chuan amah ṭanpui chu chanvo hlu angin an thlîr a. Kum sâwmbi engemaw zât chhûng rinawm taka a rawngbâwlnain mi tam takte rilru a chawh thawh avângin, a mamawhte ngaihthah mai chu an tân ngaihtuah theih rual a ni lo,” tiin a sawi a ni.

[Phêk 16-naa milemte]

Kohhrana mi zawng zawngte chuan an rinpui tarte chungah hmangaihna an lantîr thei