Chhiartute Zawhna

Jehova Thuhretute’n thisen aṭanga ṭhen hran a them te tak tê engpawh chu an pawm em?

A hnuaia chhânna hi June 15, 2000 chhuak (English) thuziak aṭanga chhuah nawn leh a ni.

A chhânna bul ber chu Jehova Thuhretute’n thisen an pawm lo tih a ni a. Thisen chungchânga Pathian dân chu ngaih dân inthlâk zêlte mil tûra tihdanglam theih a ni lo tih kan ring tlat a ni. Mahse, tûnah chuan thisen chu pêng bulpui pali-a ṭhen theih leh pêng bulpuite chu them te tak tê têa ṭhen hran theih a nih tâkah chuan zawhna thar a lo chhuak ta a ni. Chutiang chite a pawm dâwn leh dâwn loh chungchânga thutlûkna a siamnaah Kristian chuan damdawi lama a ṭangkaina leh a hlauhawmna mai piah lam a ngaihtuah tûr a ni a. Chu mi chungchâng Bible sawi dân leh Pathian Engkimtithei nêna an inlaichînna a nghawng theih dân tûr chu a ngai pawimawh ber tûr a ni.

A thupui berte chu a fiah thawkhat hle a ni. Chutiang a nih chhan hre thiam tûra min ṭanpui tûrin, Bible lam,  hmân lai thilthleng chanchin lam, leh damdawi lam dinhmun ṭhenkhat lo ngaihtuah ta ila.

Jehova chuan min thlahtu Nova hnênah thisen chu hlut taka cheibâwl tûrin a hrilh a. (Genesis 9:​3, 4) A hnua Israelte hnêna Pathian dân pêk pawhin, thisen thianghlimzia a lantîr a ni: “Tupawh Israel chhûngkaw zînga mi emaw, ram dang mi . . . emaw, eng thisen pawh ei apiang chu, chu thisen eitu chungah chuan ka hmai ka thuar ang,” tiin. Pathian dân hnâwltu Israel mi chuan mi dangte a tihchhiat theih avângin, Pathianin: “A chipuite zîng ata tuithlârin ka awmtîr ang,” tiin a sawi belh a ni. (Leviticus 17:10) A hnuah, Jerusalema inkhâwmnaah tirhkohte leh upate chuan ‘thisen laka inthiarfihlîm’ tûr thu an puang a. Chu chu mipat hmeichhiatna lama nungchang bawlhhlawhna leh milem biakna laka inthiarfihlîm nên a pawimawh dân a thuhmun reng a ni.​—⁠Tirhkohte 15:​28, 29, NW.

“Inthiarfihlîm” tih chuan kum zabi khatnaa Kristiante tân eng awmzia nge a neih? Kristiante chuan thisen chu a tharlâm emaw, a khal tawh emaw pawh ni se, an ei lo va; sa thisen chhuak lo pawh an ei hek lo. Tin, sa thithun ang chi, thisen telna chaw hmehte chu ei khap a ni bawk a. Eng kawng pawha thisen lâk luh chu Pathian dân bawhchhiatna a ni.​—⁠1 Samuela 14:33.

Tertullian-a thuziak (C.E. kum zabi hnihna leh thumna a mi) aṭanga kan hriat theih dânin, hmân laia mi zawng zawng deuhthaw chuan thisen ei an pawi ti lo va. Kristiante’n thisen an ei nia puhna chhâng lêtin, Tertullian-a chuan thisen temna hmanga thuthlung nemngheh chîng hnam hmingte a sawi lang a. Tin, “insualna chantuala ennawm chhuah a nihin, thiam loh changte thisen tharlâm tak mai chu . . . an phûngzâwl natna tihdam nân duhâm sahâlin an la ṭhîn” tih a sawi bawk.

Chûng thiltihte chu (Rom mi ṭhenkhatte’n damdawi atâna an hmang a nih pawhin) Kristiante tân chuan a dik lo a ni: “Kan ei leh inah chuan ran thisen takngial pawh kan telh ngai lo,” tiin Tertullian-a chuan a ziak a ni. Rom mite chuan thisen telna chaw chu Kristian dikte rinawmna chhin nân an hmang a. Tertullian-a chuan heti hian a ziah belh a: “Tûnah heti hian ka zâwt a che, [Kristiante chuan] ran thisen takngial pawh duh lovin, an hawisan dâwn tih hre reng chung sia mihring thisen châk anga ngaih tlat si chu eng nge a awmzia?,” tiin.

Tûn laiah pawh, dâktawrte’n thisen hmang tûra an râwn hian Pathian Engkimtitheia dânte a kaihhnawih tel a ni tih ngaihtuahtu an awm mang lo. Keini Jehova Thuhretute chuan dam rei kan duh hle nâ a, thisen chungchânga Jehova dân kan zâwm tlat a ni. Chu chu tûn laia damdawia inenkawlna lam aṭanga thlîrin eng tihna nge ni ang?

Indopui II hnua thisen a hlanga thun a lâr tâk hleah chuan, Jehova Thuhretute chuan Pathian dân kalh a ni tih an hria a​—⁠chu chu tûn thlengin kan la ring reng a ni. Mahse, chuta ṭang chuan damdawi lama inenkawl dân kalhmang chu a inthlâk zêl a. Tûn laia thisen thun a tam zâwk chu thisen hlang a ni tawh lo va, thisen pêng bulpui pali: (1) thi mûr sen; (2) thi mûr vâr; (3) thi mûr ban; (4) thisena tuihnâng (serum) te zînga a pakhat chauh a ni tawh a ni. Dam lo dinhmun azirin, dâktawrte chuan thi mûr sen emaw, thi mûr vâr emaw, thi mûr ban emaw, a nih loh leh thisena tuihnâng emaw chu thun tûrin an chawh thei a. Hetianga thisen pêng bulpuite zînga a pakhat chauh thunna chuan thisen unit khat chauh pawh dam lo tam takte hnêna sem darh theih a nihtîr a ni. Jehova Thuhretute chuan thisen hlang emaw, thisen pêng bulpui palite zînga a pakhat khat emaw dawn chu Pathian dân kalh niin an ring tlat a. Chhinchhiah tlâk takin, he Bible thu bulte an zawm tlatna chuan thinlian leh AIDS natnate tiamin, thisen aṭanga kai theih natna hlauhawm tam tak lakah a vêng a ni.

Amaherawhchu, thisen chu hêng pêng bulpui palite aṭanga ṭhen hran lehchhâwn theih a nih avângin, chûngte hman tûr leh tûr loh chungchângah chuan zawhna a lo chhuak ta a ni. Engtin nge chûng thisen them te tak tê tête chu hman a nih a, Kristianin a hman tûr leh tûr loh chungchânga thutlûkna a siam hunah eng nge a ngaihtuah ang?

Thisen chu thil tam tak inzawmkhâwm a ni a. Thisena tuihnâng​—⁠chu chu zaa 90 tui a ni​—⁠ringawtah pawh hormone te, inorganic salts (thil al chikhat) te, enzymes (taksa siam chhuah tui chikhat) te, leh mineral leh sugar (thlum) pawh tiamin chaw ṭha tam tak a awm a. Tin, protein chi hrang hrang albumin te, thisen tikhangtute, leh natna hrik dotu antibodies te a keng tel bawk. Mi thiamte chuan thisena tuihnânga protein tam tak awmte chu thliar hrangin, an hmang a ni. Entîr nân, thisen tikhangtu VIII chu awlsam taka thisen chhuak thei, thisen natna neite pêk a ni a. A nih loh leh, dâktawrte chuan natna engemaw nei mi chu natna do thei mite thisena awm tuihnâng aṭanga lâk chhuah gamma globulin chiu chu an chawh mai thei a ni. Thisena tuihnâng protein dangte chu damdawi atâna hman a ni a; mahse, a chunga kan târ lan khi chuan thisen pêng bulpui pakhat (thisena tuihnâng) chu them te tak tê têa ṭhen hran theih a nihzia a târ lang a ni. *

Thisena tuihnâng chu them te tak tê têa ṭhen hran theih a nih ang bawkin, pêng bulpui pali zînga a dang (thi mûr sente, thi mûr vârte, thi mûr bante) pawh them te tak tê têa ṭhen hran theih a ni. Entîr nân, thi mûr vâr chu tlâng hrilêng leh cancer enkawl nâna hman chi interferon leh interleukin-te siam chhuahna bul a ni a. Thi mûr ban aṭangin hliam tihdamna damdawi a siam theih a ni. Tin, damdawi dangte pawh (a tir lamah tal) thisen pêng bulpuite aṭanga siam chhuah a ni hlawm a. Chûng inenkawlnate chu thisen pêng bulpuite inthunna ni lovin, a pêng te tak tê tête telna a ni tlângpui a ni. Chutiang a  them te tak tê tête hmanga inenkawl chu Kristiante’n an pawm tûr a ni em? Chu chu kan chhân theih a ni lo. Bible chuan chipchiar takin a sawi lo va; chuvângin, Kristian chuan Pathian hmaa a chhia leh ṭha hriatna hmangin thu a titlu tûr a ni.

Ṭhenkhat chuan (rei lo te chhûng chauh atâna natna do theihna pe thei thisen them te tak tê tête pawh ni se) thisen telna damdawi eng pawh chu an hnâwl a. Chu chu ‘thisen laka inthiarfihlîm’ tûra Pathian thupêk an hriatthiam dân a ni. Anni chuan Israelte hnêna a dân pêkah chuan sa thisen chu ‘leia leihbuak tûr’ a ni si a, tiin an chhût a ni. (Deuteronomy 12:​22-24) Engvângin nge he Bible châng hian awmzia a neih? Gamma globulin te, thisen tikhangtu te, leh chutiang chi thil dangte siam chhuak tûr chuan thisen chu dahkhâwl a, chuta ṭanga siam chu a ngai a. Chuvângin, Kristian ṭhenkhat chuan chûng chu thisen hlang, a nih loh leh a pêng bulpui palite an hnâwl ang chiahin an hnâwl a ni. Tih tak zet leh an chhia leh ṭha hriatna mila thutlûkna an siam chu zahsak tûr a ni.

Kristian dangte erawh chuan thutlûkna dang an siam thei a. Anni pawhin, thisen hlang te, thi mûr sente, thi mûr vârte, thi mûr bante, leh thisena tuihnângte inthun chu an hnâwl ve tho va. Mahse, thisen pêng bulpuite aṭanga lâk chhuah them te tak tê tête hmanga dâktawr enkawlna chu an pawm mai thei a ni. Hetah pawh hian thutlûkna chu a inang lo thei a. Kristian pakhat chuan gamma globulin inchiu chu a remti mai thei a; mahse, thi mûr sen leh thi mûr vâr aṭanga siam damdawi engemaw inchiu chu a remti lo thei a ni. Amaherawhchu, a tlângpui thuin, engin nge Kristian ṭhenkhat chu thisen pêng te tak tê tête pawm thei nia thutlûkna siamtîr le?

Vênnainsâng (English) June 1, 1990-a “Chhiartute Zawhna” chuan, naupai nu ber thisena tuihnânga awm protein (a them te tak tê tête) chu thisen kalhmang hrang daih a pum chhûnga naute insiam lai hnênah a luanglût tih a târ lang a. Chutiang chuan nu chuan a fa pai lai hnênah protein chi khat immunoglobulin pe chhâwngin, natna do theihna hlu tak a pe a ni. Tichuan, a hranga pum chhûnga naute insiam lai thi mûr sente chu an lo puitlin chuan, oxygen an keng thei ta a ni. A ṭhen chu mît tui eng, bilirubin-ah lo changin, chu chu hlam aṭanga chhuakin, a nu zun ram thiar rualin, paih chhuah a ni ve ta ṭhîn a ni. Kristian ṭhenkhat chuan hetiang kawnga thisen them te tak tê tête amaha mi dang hnêna inhlan chhâwn theih a nih avângin, thisena tuihnâng emaw, thi mûrte emaw aṭanga siam them te tak tê tête dawng theihah an ngai a ni.

Chutianga ngaih dânte leh chhia leh ṭha hriatna kaihhruai thutlûknate chu a inan loh theih avângin, he thil hi a pawimawh vak lo tihna a ni em? Ni lo ve. Hei hi thil pawimawh tak a ni. Mahse, a thu chu a fiah thawkhat hle. A chunga thute chuan Jehova Thuhretute’n thisen hlang emaw, a pêng bulpuite emaw inthun an hnâwl tih a târ lang a. Bible chuan Kristiante chu “milem biakna sa ei te, sa thisen ei te, . . . inngaih te bâng [“inthiarfihlîm,” NW]” tûrin a kawhhmuh a ni. (Tirhkohte 15:29) Chu bâkah, thisen pêng bulpuite aṭanga ṭhen hran a them te tak tê tête chungchângah, Kristian tinte chuan, ṭha taka chhût a, ṭawngṭaina nêna an ngaihtuah vek hnuah, an chhia leh ṭha hriatna hmangin thutlûkna an insiam tûr a ni.

Mi tam takte chuan thisen aṭanga siam inenkawlna ang chi hrisêlna atâna hlauhawm theite pawh tiamin, chawpchilha ṭhatpui nghâl theih tûr nia lang inenkawlna engpawh chu dawn an duh a ni. Kristian dik tak erawh chuan taksa lam nêna inkûngkaih thil mai aia tam thlîr dân zau zâwk leh inbûk tâwk zâwk neih chu a tum tlat zâwk a ni. Jehova Thuhretute chu damdawia inenkawlna ṭha pe tûra thawhrimna chungah an lâwm a, inenkawlna engpawh a hlauhawmna leh ṭangkaina awm theite chu an bûk tawn a ni. Amaherawhchu, thisen aṭanga siam dawmdawi hman chungchângah chuan, Pathianin thisen chungchâng a sawi leh Nunna min Petu nêna an inlaichînna chu ngun takin an bûk tawn a ni.​—⁠Sâm 36:⁠9.

Kristian tân: “LALPA Pathian chu nî leh phaw a ni si a: LALPA chuan khawngaihna leh ropuina a pe ang a: dik taka awmte lakah chuan thil ṭha rêng rêng a ui lo vang. Aw . . . LALPA, nangmah ring mi chu a eng a thâwl e,” tia ziaktu fakna hla phuahtu neih ang rinna an nei chu malsâwmna a va ni êm!​—⁠Sâm 84:​11, 12. (w04 6/15)

[Footnote]

[Phêk 31-naa bâwm]

DAKTAWR HNENA ZAWH TURA RAWT ZAWHNATE

Thisen aṭanga siam damdawite hman theihna chi inzai emaw, inenkawlna emaw i tawn chuan, heti hian zâwt rawh:

Heta thawk dâktawr zawng zawngte hian, Jehova Thuhretute zînga mi ka nih anga eng dinhmun hnuaiah pawh thisen rêng rêng (thisen hlang, thi mûr sente, thi mûr vârte, thi mûr bante, a nih loh leh thisena tuihnângte) min thun lo tûrin ka ngên tih an hria em?

An damdawi chawh che chu thisena tuihnâng emaw, thi mûr sen emaw, thi mûr vâr emaw, a nih loh leh thi mûr ban aṭanga siam a nih theih dâwn chuan, heti hian zâwt rawh:

Damdawi chu thisen pêng bulpui palite zînga pakhat khat aṭanga siam a ni em? A nih chuan, a siam dân chiah min hrilh thei em?

Thisen aṭanga lâk chhuah he damdawi hi eng zât nge min thun dâwn a, engtin nge min thun dâwn?

Ka chhia lah ṭha hriatnain he thisen them te tak tê telna damdawi min pawmtîr ni ta se, hrisêlna atâna hlauhawm thei thil engte nge awm?

Ka chhia leh ṭha hriatnain min hnâwltîr ta se, inenkawlna dang eng nge hman theih ni ang?

He mi chungchâng hi chiang lehzuala ka ngaihtuah hnuah, ka thutlûkna chu engtikah nge kan hriattîr ang che?