‘Kal Ula, Zirtîrte Siam Rawh U’

“Lei leh vâna thuneihna zawng zawng ka hnênah pêk a ni tawh. Chutichuan kal ula, hnam tina mi zirtîrahte siam ula.”​—⁠MATTHAIA 28:​18, 19.

1, 2. (a) Eng hna nge Isua’n a hnungzuite hnênah a pêk? (b) Isua thupêk chungchânga eng zawhnate nge kan bih chian dâwn?

A HUN chu C.E. 33, nipui lai a ni a, Isua zirtîrte chu Israel ram Galili bial chhûnga tlâng pakhatah an kalkhâwm a ni. An Lalpa, Isua chu kaihthawhleh a ni a, vânah a lâwn tawh dâwn a; mahse, a lâwn hmain thil engemaw pawimawh tak hrilh tûr a nei tlat. Isua chuan hna pêk tûr a nei a ni. Eng hna nge ni? Engtin nge a zirtîrte chuan an chhân lêt? Engtin nge chu hna chu kan tân pawh a nih tel?

 ² Chuta Isua thusawi chu Matthaia 28:​18-20-ah heti hian chhinchhiah a ni: “Lei leh vâna thuneihna zawng zawng ka hnênah pêk a ni tawh. Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u. Tin, ngai teh u, kei kumkhuain, khawvêl tâwp thleng pawhin, in hnênah ka awm zêl ang,” tiin. Isua chuan “thuneihna zawng zawng,” “hnam tina mi,” “thu ka pêk zawng zawng,” leh “kumkhuain” tih chungchâng te a sawi a. Hêng thil palite telna a thupêkte hian engvâng nge?, khawiah nge?, eng nge?, tih leh engtikah nge? tia lâk tawi theih zawhna pawimawh tak tak a siam chhuak a ni. Hêng zawhnate hi a mal malin lo bih chiang ta ila. *

“Thuneihna Zawng Zawng Ka Hnênah Pêk A Ni Tawh”

3. Engvângin nge zirtîr siam tûra thupêk chu kan zawm ang?

³ A hmasa berin, engvângin nge zirtîrte siam tûra thupêk chu kan zawm ang? Isua chuan: “Lei leh vâna thuneihna zawng zawng ka hnênah pêk a ni tawh. Chutichuan kal ula, hnam tina mi zirtîrahte siam ula,” a ti a. “Chutichuan” tih thu mal chuan he thupêk kan zawm chhan ber tûr a târ lang a ni. A chhan chu, he thupêk petu Isua hian “thuneihna zawng zawng” a neih vâng a ni a. A thuneihna chu eng ang taka sâng nge?

4. (a) Isua thuneihna chu eng anga sâng nge ni? (b) Engtin nge Isua thuneihna kan hriatthiamna chuan zirtîr siam tûra thupêk kan thlîr dân chu a nghawng ang?

⁴ Isua chuan a kohhran chungah thuneihna a nei a; tin, kum 1914 aṭangin, Pathian Lalram din thar chungah thu a nei bawk a ni. (Kolossa 1:13; Thu Puan 11:15) Ani chu vântirhkoh chungnung ber a ni a, chuvângin vântirhkoh tlûklehdingâwn tam takte chungah thu a nei a ni. (1 Thessalonika 4:16; 1 Petera 3:22; Thu Puan 19:​14-16) Ani chu thu bul felte dodâltu “rorêlna zawng zawngte leh, thuneihna leh thiltihtheihna zawng zawngte” tibo vek tûrin, a Pain thuneihna a pe a ni. (1 Korinth 15:​24-26; Ephesi 1:​19-23) Isua thuneihna chu mi nungdamte chungah chauh a ni lo. ‘Mitthite leh mi nungte chunga rorêltu’ pawh a ni a; thihnaa muhîl tate kaihthawh theihna Pathian pêk pawh a nei a. (Tirhkohte 10:42; Johana 5:​26-28) Chiang takin, chutiang khawpa thuneihna sâng Neitu thupêk chu thil pawimawh berah kan ngai tûr a ni. Chuvângin, ‘kal a, zirtîrte siam’ tûra Krista thupêk chu zah tak leh duh tak chungin kan zâwm a ni.

5. (a) Engtin nge Petera chuan Isua thu a âwih? (b) Petera’n Isua zirtîrna thu a âwihna chuan eng malsâwmna nge a thlen?

⁵ Isua’n he leia rawng a bâwl tirh lam khân, a zirtîrte hnênah a thuneihna pawm leh a thupêkte zawmna chuan malsâwmna a thlen dâwn tih mak tak maiin a zirtîr a. Ṭum khat chu sangha mantu Petera hnênah chuan: “Li thûk lam pan la, sangha man tûrin in lênte dêng rawh,” a ti a. Petera chuan sangha man tûr a awm lo tih a hriat chian êm avângin, Isua hnênah chuan: “Zirtîrtu, rim takin zankhuain kan bei a, engmah kan man lo,” a ti a. Mahse, inngaitlâwm takin Petera chuan: “Nimahsela i thuin lênte ka dêng leh ang e,” a tihzawm a ni. Petera’n Isua thupêk a zawm chuan, “sangha tam tak” a man ta mai a. Mak ti lutukin, Petera chu “Isua khûp kiangah a bawkkhup a, ‘Lalpa, mi kalsan rawh, mi sual ka nih hi’” a ti a. Mahse, Isua chuan: “Hlau suh, tûn hnuah zawng mihring i man tawh ang,” tiin a chhâng a ni. (Luka 5:​1-10; Matthaia 4:18) He mi chanchin aṭang hian eng nge kan zir?

6. (a) Mak tak maia sangha manna chungchâng thuziak chuan Isua’n eng ang chi thuâwihna nge a duh tih a târ lan? (b) Engtin nge Isua kan entawn theih?

⁶ Isua chuan Petera, Andria, leh tirhkoh dangte chu, tûn hma aṭang ni lovin, mak tak maia sangha an man ṭeuh hnuah “mihring mantuah” a siam a ni. (Marka 1:​16, 17) Isua chuan a thu pâwngpaw âwih tûrin min phût lo tih a chiang hle. A thu an zawm chhan tûr rin tlâk tak a pe a ni. An lênte dêng tûra Isua thupêk zawmnain rah hlimawm tak a chhuah ang chiahin, ‘mihring man’ tûra Isua thupêk zawmna chuan  malsâwmna nasa tak a thlen ang. Tirhkohte chuan rinhlelhna chhetê mah nei lovin an zâwm a ni. Heti hian thuziak chu khâr a ni: “An lawngte chu vaukamah an hruai kai a, engkim kalsanin amah chu an zui ta a,” tiin. (Luka 5:11) Tûn laiah pawh, zirtîr siam rawngbâwlna thawk tûra mite kan fuih hian, Isua kan entawn a ni. Mite chuan kan hrilh anga an tih mai chu kan phût lo va, Krista thupêk an zawm chhan tûr rin tlâk tak kan pe zâwk a ni.

Chhan Rin Tlâk leh Rilru Put Hmang Dik

7, 8. (a) Lalram thuhrilh leh zirtîr siam rawngbâwl chhan Pathian Lehkha Thu ṭanchhan ṭhenkhatte chu engte nge? (b) Eng Bible chângin nge thu hril zêl tûra chêttîr bîk che? (Footnote en bawk rawh.)

⁷ Krista thuneihna kan pawm avângin, Lalram thuhrilhnaah leh zirtîr siam rawngbâwlnaah kan tel ve a ni. Chutiang rawngbâwlna ṭhaa tel ve tûra kan duhte hnênah chuan, chutiang hna thawh chhan dang eng nge Pathian Lehkha Thu aṭangin kan hrilh theih? A hnuaia thu hmun hrang hranga Thuhretu rinawm engemaw zâtte sawi leh Bible châng târ lante’n an thusawi a nemngheh dân hi lo ngaihtuah ta ila.

⁸ Roy-a, kum 1951-a baptisma chang: “Jehova hnêna ka inpumpêk lai chuan, a rawng ka bâwl kumkhua ang tih ka tiam a. Chu ka thutiam chu hlen ka duh a ni.” (Sâm 50:14; Matthaia 5:37) Heather-i, kum 1962-a baptisma chang: “Ka tâna Jehova thiltih zawng zawngte ka ngaihtuah hian, rinawm taka a rawngbâwlna hmanga ka lâwmzia lantîr chu ka duh a ni.” (Sâm 9:​1, 9-11; Kolossa 3:15) Hannelore-i, kum 1954-a baptisma chang: “Rawngbâwlnaa kan tel apiang hian, vântirhkohte’n min ṭanpui zêl a​—⁠chu chu thil ropui a va ni êm!” (Tirhkohte 10:​30-33; Thu Puan 14:​6, 7) Honor-i, kum 1969-a baptisma chang: “Jehova rorêlna nî a lo thlen huna kan ṭhenawm tumahin Jehova leh a Thuhretute hnêna amah ngaihthah anga, ‘Vaukhânna ka dawng rêng rêng lo!’ an tih ka duh lo.” (Ezekiela 2:5; 3:​17-19; Rom 10:​16, 18) Claudio-a, kum 1974-a baptisma chang: “Thuhrilha kan kal hian ‘Pathian mithmuhin Kristaah chuan thu kan sawi’ a ni a. Han ngaihtuah teh! Rawngbâwlnaa kan thawh laiin, kan Ṭhian ṭha berte nên hun kan hmangho a lo ni.”​—⁠2 Korinth 2:17. *

9. (a) Petera leh tirhkoh dangte sangha man chungchâng thiltawn chuan Krista thuâwih nâna rilru put hmang dik chungchâng eng nge a târ lan? (b) Tûn laiah Pathian leh Krista thuâwih nâna rilru put hmang dik chu eng nge ni a, engvâng nge?

⁹ Sangha manna mak tak chungchâng thu chuan Krista thuâwih nâna rilru put hmang dik tak​—⁠hmangaihna​—⁠neih a pawimawhzia a târ lang bawk. Petera’n, “Mi kalsan rawh, mi sual ka nih hi” a tih khân, Isua’n a kalsan lo va, eng sualah mah Petera chu thiam loh a chantîr bawk lo. (Luka 5:⁠8) Petera’n kal bosan tûra a ngen avângin Isua chuan a sawisêl bawk hek lo. Chutih ahnêkin, Isua chuan: “Hlau suh,” tiin ngilnei takin a chhâng zâwk a ni. Sakei hlauhva hlauhna chu Krista thuâwih nân rilru put hmang dik lo a ni ngei ang. Chutiang ni lovin, Isua chuan Petera hnênah amah leh a ṭhiante chu mihring  mantu ṭangkai tak an lo nih tûr thu a hrilh zâwk a ni. Chutiang bawkin tûn laiah pawh, inthiam lohna leh zahna ang chi rilru put hmang dik lo emaw, hlauhna emaw chu midangte Krista thu âwih luihtîr nân kan hmang lo. Pathian leh Krista hmangaihna avânga thinlung zawng zawnga thuâwihna chauhvin Jehova thinlung a tilâwm a ni.​—⁠Matthaia 22:37.

“Hnam Tina Mi Zirtîrahte Siam Ula”

10. (a) Zirtîr siam tûra Isua thupêk chipchiar tak chuan a zirtîrte tân eng harsatna nge a siam? (b) Engtin nge zirtîrte chuan Isua thupêk chu an chhân lêt?

¹⁰ Krista thupêk chungchânga zawhna lo chhuak a pahnihna chu, Khawiah nge he zirtîr siam rawngbâwlna hi thawh tûr a nih?, tih chu a ni. Isua chuan a hnungzuitute hnênah: “Hnam tina mi zirtîrahte siam ula,” a ti a. Isua rawngbâwl hma chuan, hnam dang mite chu Israel rama Jehova rawngbâwl tûra an lo kal chuan pawm an ni a. (1 Lalte 8:​41-43) Amah Isua ngei pawhin Judate hnênah thu a hril deuh ber a; mahse, tûnah chuan a hnungzuitute chu hnam tina mite hnêna kal tûrin a hrilh tawh a ni. A nihna takah chuan, a zirtîrte sangha manna hmun, a nih loh leh thu hrilhna bial chu “dîl” te tak tê​—⁠Juda mite hnênah​—⁠chauh a ni ṭhîn a; mahse, mihring ang “tuipui” zawng zawng chu a ni tel thuai dâwn a ni. Chu inthlâkthlengna chuan zirtîrte tân harsatna siam mah se, Isua zirtîrna chu an zâwm nghâl vat a. Isua thih hnu kum 30 pawh a tlin hmain, tirhkoh Paula chuan chanchin ṭha chu Juda mite hnênah chauh ni lo “vân hnuaia thil siam zawng zawngte zînga” hrilh chhuah a nih thu a ziak thei tawh a ni.​—⁠Kolossa 1:23.

11. Kum zabi 20-na tîr lam aṭangin ‘sangha manna hmun’ chu eng anga zauh nge a nih?

¹¹ Tûn hnai mai khân, chutiang bawka thuhrilhna bial tihzauh a nihzia kan hmu a. Kum zabi 20-na tîr lamah chuan, ‘sangha manna hmun’ chu ram tlêm têah chauh a awm a. Mahse, chutih laia Krista hnungzuitute chuan kum zabi khatnaa Kristiante entawnin, an thuhrilhna bial chu phûr takin an zauh a ni. (Rom 15:20) Tichuan, kum 1930 a pelh hret chuan, ram za vêlah zirtîr an siam ta a. Tûnah hian, kan ‘sangha manna hmun’ chu ram 235-ah a darh zau tawh a ni.​—⁠Marka 13:10.

“Ṭawng Tin Zînga Mite”

12. Zakaria 8:​23-a hrilh lâwkna chuan eng harsatna nge a sawi uar?

¹² Hnam tin zînga mite zirtîra siam chu a hmun zau vâng mai ni lovin, ṭawng chi hrang a tam avâng pawhin harsatna a tling a. Zâwlnei Zakaria hmangin, Jehova chuan heti hian a hrilh lâwk a ni: “Chûng nîahte chuan heti hi a la ni ang a, mi sâwm, hnam ze tinrêng aṭanga lo chhuakte [“ṭawng tin zînga mite,” NW] chuan Juda mi pakhat fênfualah an vuanin an chelh ang a, i hnênah Pathian a awm tih kan hriat avângin i hnênah kan kal ve dâwn e, an la ti ang” tiin. (Zakaria 8:23) He hrilh lâwkna thlen famkimna lian zâwkah chuan, “Juda mi pakhat” chuan hriak thih Kristiante a entîr a, “mi sâwm” chuan “mipui tam tak” an entîr thung a ni. * (Thu Puan 7:​9, 10; Galatia 6:16) Krista zirtîr mipui tam takte chu hnam tam takah hmuh an ni ang a, Zakaria sawi angin ṭawng chi hrang hrang an hmang ang. Tûn laia Pathian mite chanchin hian he zirtîr nihna hmêlhmang chu a lantîr em? Aw, lantîr e.

13. (a) Tûn laia Pathian mite zîngah ṭawng chi hrang chungchângah eng nge thleng? (b) Engtin nge bawi rinawm pâwl chuan ṭawng chi hrang hranga thlarau lam chaw pêk chhuah ngai chu a hmachhawn? (“Mitdelte Tâna Chhuah Thu leh Hlate” tih chuanna bâwm telh rawh.)

¹³ Kum 1950 chuan, khawvêl puma Jehova Thuhretu mi 5 zêla 3 chuan Sâpṭawng an hmang a. Kum 1980 chuan mi 5 zêlah 2 vêlin a tla hniam a, tûnah chuan Thuhretu mi 5 zêlah 1 chauhvin Sâpṭawng an hmang tawh a ni. Bawi rinawm leh fing tak pâwl chuan kan unau a tam zâwkte’n Sâpṭawng an hmang lo chu engtin nge a hmachhawn? Ṭawng chi hrang tam  taka thlarau lam chaw sem chhuahna hmangin a hmachhawn a ni. (Matthaia 24:45) Entîr nân, kum 1950-ah chuan kan thu leh hla chhuahte chu ṭawng chi hrang 90-a chhuah a ni a; mahse, tûnah chuan ṭawng chi hrang 400 vêl laia chhuah a ni tawh a ni. Hetianga ṭawng chi hrang hrang hmangte ngaihsak zual deuh deuhna hian rah a chhuah em? Chhuah tehrêng mai! Rawngbâwl kum kalta chhûnga chawlhkâr tinin “ṭawng tin zînga mi” mi 5,000 vêl chu Krista zirtîrte an lo ni a. (Thu Puan 7:⁠9) Tin, khaihlak lovin an pung zêl bawk. Ram ṭhenkhatah chuan “lênte” chuan sangha tam tak a man mêk bawk!​—⁠Luka 5:6; Johana 21:⁠6.

Rawngbâwlna Manhla Tak ​—⁠I Tel Ve Thei Em?

14. Engtin nge kan bial chhûnga ṭawng dang hmangte kan ṭanpui theih ang? (“Sign Language leh Zirtîr Siamna” tih chuanna bâwm telh rawh.)

¹⁴ Khawthlang lam ram tam takah chuan, pêm tharte avângin mahni awmna hmunah ngei pawh ‘ṭawng tinrênga’ mite zirtîra siam a ngai a. (Thu Puan 14:⁠6) Engtin nge kan bialchhûnga ṭawng dang hmangte chu kan ṭanpui theih ang? (1 Timothea 2:⁠4) Sangha manna hmanraw dik hmangin, a tih theih ang. Chûng mite chu an ṭawng hriatthiam ngeia chhuah thu leh hlate pe chhuak la. A theih chuan, anmahni tlawh tûrin an ṭawng thiam Thuhretu pakhat tîr ang che. (Tirhkohte 22:⁠2) Tûnah chuan Thuhretu tam takin ṭawng dang hmangte Krista zirtîr lo ni tûra an ṭanpui theih nân, ṭawng dang an zir hlawm avângin, chutianga tirh chu thil harsa a ni tawh lo. Chutiang kawnga ṭanpuina pêk chu thiltawn manhla tak neihna a ni tih report chuan a târ lang.

15, 16. (a) Eng entîrnate hian nge hnam dang ṭawng hmangte ṭanpui a manhlazia târ lang? (b) Hnam dang ṭawng hmanga rawngbâwl chungchângah eng zawhnate nge kan ngaihtuah ang?

¹⁵ Ṭawng chi 35-a Lalram thuhrilhna neihna hmun, Netherlands rama entîrna pahnihte hi ngaihtuah teh. Thuhretu nupa tuak khat chu Polish ṭawng hmang rawn pêm lûtte zînga zirtîr siam tûrin an inpe a. An thawh rimna chhân lêtna chu a nasat êm avângin, chutianga tuina  neite Bible zirpui tûra chawlhkâr khata ni khat dang a neih belh theih nân, a pasal chuan a hna thawh a tihtlêm phah hial a. Kâr lovah chu nupa tuak chuan chawlhkâr tinin Bible zirna 20 chuang an kaihruai nghâl a ni. Hetiang hian an sawi: “Kan rawngbâwlna chuan nasa takin min tihlim a ni,” tiin. Zirtîr siamtute chu mi dangin anmahni ṭawng ngeia Bible thutak an hrilh avânga an lâwmzia an lantîr hian an hlim zual bîk ṭhîn. Entîr nân, Vietnam ṭawnga inkhâwm an neih laiin, pa tar lam tawh pakhat chu ding chhuakin, thusawi phalna a dîl a. Mittui parawl ṭeuh chungin Thuhretute hnênah chuan: “Kan ṭawng zir harsa tak mai zir tûra in thawh rimna avângin ka lâwm tak tak a ni. Tar lama Bible-a thil ropui tam tak ka zir theih avâng hian ka lâwm êm êm a ni,” tiin a sawi a ni.

¹⁶ Chuvângin, ṭawng dang hmang kohhrana rawngbâwltute’n malsâwmna nasa tak dawng nia an inhria pawh hi thil mak a ni lo. Britain rama nupa tuak khat pawhin: “Ṭawng dang hmanga rawngbâwl chu kum 40 chhûng Lalram rawng kan bâwlnaa kan thiltawn phûrawm ber berte zînga mi a ni,” tiin an sawi hial a ni. Hetianga rawngbâwlna phûrawm taka tel ve thei tûr hian i dinhmun i siamrem thei ang em? School kal lai i nih chuan, hetiang chi rawngbâwlna atâna inbuatsaih nân ṭawng dang i zir thei ang em? Chutianga tihna chuan malsâwmnaa khat nun kawng lungawithlâk tak a pe thei che a ni. (Thufingte 10:22) Engvângin nge i nu leh pate nêna insawiho loh vang le?

Tih Dân Hrang Hrang Hmangin

17. Engtin nge kan kohhran bialah mi kan hmuh tam zâwk theih ang?

¹⁷ Kan zînga a tam zâwkte chuan kan dinhmun avângin hnam dang ṭawng hmanna bialah ‘lên’ kan dêng thei lo va. Mahse, kan kohhran bialah ngei pawh hian tûn aia mi tam zâwk kan hmu thei a ni. Engtin nge? Kan thuchah pêk chhuah dân chi hrang hrang hmangin. Hmun tam takah chuan vênghimtu ṭha tak nei in liana khawsa an pung telh telh a. Mi dang tam takte chu in tina kan kal hunah an awm lo ṭhîn bawk a. Chuvângin, kan “lênte” chu hun dangah leh hmun dangah kan den a ngai mai  thei a ni. Chutiang chuan Isua kan entawn a ni. Ani chuan mite chu tih dân chi hrang hrang hmanga biak dân kawng a zawng chhuak a ni.​—⁠Matthaia 9:9; Luka 19:​1-10; Johana 4:​6-15.

18. Engtin nge tih dân chi hrang hrang hmanga thu hrilhna chu a hlawhtlin? (“Hnathawktute Zirtîra Siamna” tih chuanna bâwm telh rawh.)

¹⁸ Khawvêl hmun ṭhenkhatah chuan, mite awmna apianga thu hrilh chu zirtîr siam dân kawng pawimawh tak a ni a. Zirtîr siamtu thiltawn ngah tak takte chuan hmun hrang hranga thuhrilh chu an tum nasa zual tawlh tawlh a ni. In tina kal mai bâkah, tûnah chuan thuchhuahtute chuan thlawhna ṭumhmunah te, office-ah te, dâwrah te, motor hûnna hmunah te, bus chawlh hmunah te, kawtthlêrah te, park-ah te, tuipuikamah te, leh hmun dang dangah te pawh thu an hril tawh a ni. Hawaii rama Thuhretu baptisma chang thar tam takte chu chutiang hmun aṭanga chhar chhuahte an ni hlawm a. Tih dân chi hrang hrang hmanna chuan zirtîr siam tûra Isua thupêk chu chipchiar taka hlen chhuak tûrin min ṭanpui a ni.​—⁠1 Korinth 9:​22, 23.

19. Isua thupêk a eng ber nge a dawta thuziakah kan sawikhâwm dâwn?

¹⁹ Zirtîrte siam tûra Isua thupêkah hian thu kan hrilh chhan tûr leh kan hrilhna hmun tûr bâkah, kan thu hrilh tûra leh kan hrilh chen tûr pawh a tel bawk a ni. Isua thupêk zînga hêng kawng chi hnihte hi a dawta thuziakah kan ngaihtuah ang. (w04 7/1)

[Footnote-te]

I Hre Chhuak Em?

• Engvângin nge Lalram thuhrilhna leh zirtîr siamnaah hian kan tel a, eng rilru puin nge kan tel?

• Tûn laia Jehova chhiahhlawhte’n hnam tina mite zirtîra siam tûra Isua thupêk chu eng ang takin nge an hlen chhuah?

• Engtin nge kan ‘sangha man dân’ chu chi hrang hranga kan thlâk theih a, engvângin nge chutianga kan tih ang?

[Zirlai Atâna Zawhnate]

[Phêk 22-naa bâwm/milem]

Mitdelte Tâna Chhuah Thu leh Hlate

Albert-a chu Kristian upa leh hun puma rawngbâwl, United States rama chêng a ni a, mitdel a ni. Mitdel hawrawpa chhuah Bible thu leh hlate chuan a rawngbâwlnaah leh rawngbâwlna enkawltu chanvo a chelhnaah hlawhtling lehzual tûrin a ṭanpui a ni. Engtin nge kohhrana a chanvote a enkawl?

An enkawltu lû (presiding overseer) James-a chuan “Albert-a ang tlûka rawngbâwlna enkawltu ṭangkai leh fel hi kan kohhranin a la nei ngai lo,” a ti. Albert-a chu United States-a mitdel, kum tluana Sâpṭawng leh Spanish ṭawnga mitdel hawrawpa Bible ṭanchhan thu leh hla chhuahte dawngtu mi 5,000 vêl zînga pakhat a ni. Dik takin, kum 1912 aṭang khân, bawi rinawm pâwl chuan mitdelte tân lehkhabu za chuang a chhuah tawh a ni. Tûn laia khâwl lam thiamna changkâng takte hmangin, Jehova Thuhretute lehkha chhutna khâwlte chuan kum tinin phêk maktaduai tam tak chu ṭawng chi hrang sâwm aia tamin mitdelte tân a chhu chhuak a, ram 70 aia tamah thawn chhuah a ni. Mitdelte tâna buatsaih Bible ṭanchhana thu leh hla chhuahte hlâwkpui thei tûr tuemaw hriat i nei em?

[Phêk 23-naa bâwm]

Sign Language leh Zirtîr Siamna

Ṭhalai ṭhahemngai tak takte pawh tiamin, khawvêl pum puia Thuhretu tam takte chuan bengngawngte Krista zirtîr an lo nih theih nâna ṭanpui nân, sign language (zaizira inbiak dân) an zir a. Chutianga an thawh rimna avâng chuan, Brazil ramah mai pawh bengngawng mi 63 laiin tûn hnai mai khân baptisma an chang a, Thuhretu bengngawng 35 lai chuan hun puma chanchin ṭha hrilh hna an thawk a ni. Tûnah chuan khawvêl pum puiah sign language kohhran leh group 1,200 chuang lai kan nei a. Russia rama sign-language hlang bial chuan a zau zâwngin Russia ram pum pui a huam a, khawvêla bial zau ber a ni.

[Phêk 23-naa bâwm]

Hnathawktute Zirtîra Siamna

Hnathawktute an office-a a tlawh laiin, Hawaii-a Thuhretu pakhat chuan transportation company-a an hotupa chu a hmu hlauh mai a. Chu pa chuan buai hle mah se, a office-a chawlhkâr tin minute 30 chhûng Bible zir chu a remti a. Nilaini zîng apiangin, a hnuaia thawkte chu amah rawn phone buai lo tûra hrilhin, a zirnaah chuan a rilru zawng zawng a pe a ni. Hawaii-a Thuhretu dang pakhat pawhin pheikhawk siamna dâwr neitu nên chawlhkâr khatah vawikhat Bible an zir bawk a. Zirna chu pheikhawk siamna dâwrah an nei a. Dâwrtu an lo kal chuan, Thuhretu chu a tawlh kiang a. Dâwrtute an haw hunah an chhunzawm leh mai thîn a ni.

Hnathawhna hotupa leh dâwr neitu chu Thuhretute’n an “lênte” hmun chi hrang hranga an den vânga hmuh chhuah an ni. In kohhran bial chhûnga ina hmuh har takte tawn fuh theihna tûr hmun âwm i ngaihtuah chhuak thei em?