Pathianin A Ngaihsak Tak Zet Che

KAN mamawh ngawih ngawih huna Pathian hnêna ṭanpuina dîl chu thil pângngai tak a ni. Ani chu “a ropui a, thiltihtheih lamah pawh chak tak a ni a; a finna chuan tawpintai a nei lo” bawk si a. (Sâm 147:⁠5) Ani chu kan buainate hmachhawn tûra min ṭanpui theitu ber a ni. Chu bâkah, Bible chuan a hmâa ‘kan thinlung leihbaw’ tûrin min sâwm bawk a ni. (Sâm 62:⁠8) A nih chuan, engvângin nge mi tam takin an ṭawngṭaina chhân loh nia an hriat? Chu chu Pathianin anmahni a ngaihsak lo tihna a ni em?

Pathian inrawlh lo anga a lanna apianga amah dem mai aiin, i naupan lai hun kha han ngaihtuah lêt zâwk teh. I nu leh i pain i thil duh apiang an pêk vek loh che avâng maiin an hmangaih lo cheah i puh ngai em? Naupang tam tak chuan an puh a ni. Mahse, i lo puitlin chuan hmangaihna chu kawng tam taka lantîr a nihzia leh naupangte duh ang apiang tihsak chu hmangaihna thiltih a nih tak tak lohzia i lo hre thiam ta a ni.

Chutiang bawkin, Jehova’n kan ṭawngṭainate kan beisei ang zâwnga min chhâng ṭhîn lo a nih pawhin, min ngaihthah tihna a ni kher lo. A nihna takah chuan, Pathian chuan min ngaihsakna chu kawng tam takin a lantîr a ni.

“Amah Avângin Kan Nung”

A hmasa berin, Pathian avânga “kan nung, kan che, kan awm” hi a lâwmawm hliah hliah a. (Tirhkohte 17:28) Nunna min pêk ngawt pawh hian min ngaihtuahzia a târ lang chiang hle a ni.

Chu bâkah, Jehova chuan kan nun theih nâna kan mamawh pawh min pe bawk a. Heti hian kan chhiar a ni: “Hlobet chu rante tân a ṭotîr ṭhîn a, thlai chu mihring hmanah a ṭotîr bawk ṭhîn; lei aṭangin ei tûr a chhuahtîr theih nân.” (Sâm 104:14) Dik takin, Siamtu chuan nun nâna pawimawh mai aia tam min pe a. Phal takin ‘vân ata ruahte leh kum ṭhat kumte min pe a, kan rilru ei tûr leh lâwmnain a tikhat a ni.’​—⁠Tirhkohte 14:17.

Nimahsela, ṭhenkhat chuan, ‘Pathianin min hmangaih hle si chuan, engvângin nge hrehawm kan tawrh a phal?’ an la ti cheu mai thei a. Chu zawhna chhânna chu i hria em?

Pathian Chu Dem Tûr A Ni Em?

Mihringte tawrhna tam tak chu mahni thiltih avânga lo thleng a ni. Entîr nân, thiltih ṭhenkhat chu a hlauhawm hle tih tlâng hriat a ni a. Chuti chung chuan mite chu mipat hmeichhiatna lama nungchang bawlhhlawhnaah te, zu leh damdawi dang ngawlveinaah te, vaihlo hmannaah te, nun atâna hlauhawm infiamnaah te, lîrthei chak taka khalhnaah te leh thil dang dangah te an inhmang tho a ni. Chutiang nun atâna hlauhawm thil an tih avânga an tawrh chuan, tunge dem tûr ni ang? Pathian nge fing lo taka thiltitu zâwk chu? Pathian thâwk khum Thu chuan: “Bumin awm suh u; Pathian chu hmuhsit zia a ni lo ve, miin a theh apiang, chu mi vêk chu a seng bawk dâwn si a,” tiin min hrilh a ni.​—⁠Galatia 6:⁠7.

Chu bâkah, mihringte chu an intina fo ṭhîn bawk. Hnam leh hnam an indo hian a rahchhuah hrehawm tawrhna avângin Pathian chu dem tûr a ni lo rêng rêng. Dân bawhchhetuin a mihringpui a beih hian, a rahchhuah inhliamna emaw, thihna emaw avângin Pathian chu dem tûr a ni em? Ni teh suh e! Rorêltuin a thununna hnuaia awmte a hnehchhiah a, a nghaisak a, a thah hian Pathian kan dem ang em? Chu chu a âwm lo a ni.​—⁠Thuhriltu 8:⁠9.

A nih leh, mi maktaduai tam tak rethei lutuk emaw, rilṭâma awm emawte hi eng nge ni ve thung? Chutianga an awm avâng chuan Pathian dem tûr a ni em? Ni lo. Kan chênna lei hian mi tinte mamawh aia tam ei tûr a pe  chhuak a. (Sâm 10:​2, 3; 145:16) Ṭâmna leh retheihnate hi hnianghnâr taka Pathian thil min pêkte sem rual loh avânga lo awm a ni a. Mihringte mahni hmasialna chuan chu mi chungchânga buaina chu tihkian theih lohvin a siam a ni.

A Chhan Bul Ber

A nih leh, tuemaw a nat emaw, tar avânga a thih emaw hian tunge dem tûr ni ang? Chu mi avâng pawh chuan Pathian chu dem tûr a ni lo tih hriat chu mak i ti viau lo maw? Pathian chuan mihring hi tara, thi tûrin a siam lo rêng rêng a ni.

Jehova chuan mihring tuak hmasa ber, Adama leh Evi Eden huana a dah khân, lei paradis-a chatuana nung tûrin beiseina a pe a. Amaherawhchu, lei chu an thil dawnte hluttu mihringte hmanga tihkhah a duh si a. Chuvângin, nakin nun beisei theihna chu a khuahkhirh a ni. Adama leh Evi chu an Siamtu hmangaihna ngah tak hnuaia an intukluh chauhvin Paradis-ah an awm thei dâwn a ni.​—⁠Genesis 2:17; 3:​2, 3, 17-23.

Lungchhiatthlâk takin, Adama leh Evi chu an hel a. Evi chuan Diabol-Setana thu ngaihthlâk a thlang zâwk a ni. Setana chuan Evi chu a bum a, Pathianin thil ṭha engemaw a hnêna pe duh lo angin dâwt a hrilh a. Tichuan, “a chhia leh a ṭha hriain Pathian ang” nih tumin zalênna kawng chu a zawh ṭan ta a. Adama pawhin Evi helna chu a zawm ve ta bawk a ni.​—⁠Genesis 3:​5, 6.

Chutianga lo sualin, Adama leh Evi chuan chatuana nun an phû lohzia an lantîr a. Sual rahchhuah râpthlâk tak chu an tuar ta a ni. An chakna leh an thiltihtheihna chu a lo tla hniam tial tial a, a tâwpah chuan an thi ta a ni. (Genesis 5:⁠5) Nimahsela, an helna chuan an boralna mai aia rah chhuah râpthlâk zâwk a nei a. An thilsual tihin a nghawng chu tûn thlengin kan la tuar ta reng a ni. Tirhkoh Paula chuan: “Mi pakhat [Adama]avângin sual khawvêlah a lût a, sual avângin thihna a lût bawk a, . . . mi zawng zawngin thil an lo tihsual avângin thihnain mi zawng zawng a fan chhuak ta a,” tiin a ziak a. (Rom 5:12) Ni e, Adama leh Evi helna avângin sualna leh thihna chu hri hlauhawm tak angin mi zawng zawng hnênah a darh ta a ni.

Pathian Min Ngaihsakzia Lanchianna Ber

Chu chu Pathian siam mihringte an chhe hlen dâwn tihna a ni em? Ni lo ve,  hetah tak hian Pathianin min ngaihsakzia a lanchianna ber kan hmu a ni. Thil nasa tak chân phahin, Pathian chuan mihringte sualna leh thihna ata chhanchhuahna a ruahman a. Min tlanna man chu Isua nun ṭha famkim, kan tâna phal taka a pêk chu a ni. (Rom 3:24) Chuvângin, tirhkoh Johana chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin a ziak a ni. (Johana 3:16) Chu hmangaihna thiltih ropui tak avâng chuan, chatuana nun beiseina chu kan lo nei leh ta a. Rom khuaa mite hnênah Paula chuan: “Thil fel pakhat tih avângin nunna hmuh nân thiam chantîrna thilthlâwnpêk chu mi zawng zawng chungah a lo awm,” tiin a ziak a ni.​—⁠Rom 5:18.

Pathian hun ruatah chuan, leiah hian hrehawm tawrhna emaw thihna emaw chu a awm tawh lo vang tih kan ring tlat thei a. Thu Puan bua dinhmun hmuh lâwk: “Ngai teh, Pathian bâwktê chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tih chu thil awm dân a ni tawh ang. (Thu Puan 21:​3, 4) ‘Chu hun lo thlen thleng chuan ka dam lo vang’ i ti mai thei. Mahse, i dam thleng pawh a ni thei asin. I dam thleng lo a nih pawhin, Pathianin thihna ata a kaitho thei che a ni. (Johana 5:​28, 29) Chu chu kan tâna Pathian thiltum lo thleng ngei tûr chu a ni. Pathianin mihringte a ngaihsak lo tia sawi chu a va dik lo tak êm!

“Pathian Hnaih Rawh”

Pathianin mihringte hrehawm tawrhna chatuan atâna tireh tûrin hma a la ṭan daih tawh tih hriat chu a thlamuanthlâk hle mai. Mahse, tûn dinhmun chungchâng hi eng nge ni ang? Kan hmangaihte thihnaa kan chân emaw, kan fate an dam loh emawin eng nge kan tih theih? Aw le, tûn hi natnate leh thihna nuaibo tûra Pathian hun tiam a la ni lo va. Hun engemawti chhûng kan la nghah a ngai tih Bible chuan a târ lang a ni. Mahse, Pathian chuan ṭanpuina pe lovin min hawisan mai lo. Zirtîrtu Jakoba chuan: “Pathian hnaih rawh u, tichuan anin a hnaih ang che u,” a ti. (Jakoba 4:⁠8) Ni e, Siamtu chuan amah nêna inlaichînna nei tûrin min sâwm a, chutiang inlaichînna neite chuan dinhmun harsa ber hnuaiah pawh a ṭanpuina an dawng reng a ni.

Engtin nge Pathian chu kan hnaih theih ang? Kum sângthum vêl kal ta khân Lal Davida chuan chutiang bawk zawhna chu a lo zâwt tawh a: “LALPA, . . . i tlâng thianghlimah chuan tunge lo awm ang?” tiin. (Sâm 15:⁠1) Davida chuan hetianga sawi zawmin a zawhna chu amah vêkin a chhâng a ni: “Dik taka awma, fel taka tia, a rilrua thutak tak sawi mi chu; a leia mi rêl ngai lova, a ṭhian chung pawha thil sual ti ngai lova . . . chu,” tiin. (Sâm 15:​2, 3) Thu danga sawi chuan, Jehova chuan Adama leh Evi hnâwl tâk kawng zawhtute chu a lâwm a. A duhzâwng titute chu a hnaih ṭhîn a ni.​—⁠Deuteronomy 6:​24, 25; 1 Johana 5:⁠3.

Engtin nge Pathian duhzâwng kan tih theih ang? “Min chhandamtu Pathian ngaihin, a ṭhain, a lawm tlâk” chu eng nge ni tih kan zir a, chu mi mila thil kan tih chu a ngai a ni. (1 Timothea 2:⁠3) Chutah chuan Pathian Thu, Bible hriatna dik neih a tel a. (Johana 17:3; 2 Timothea 3:​16, 17) Bible pawngpaw chhiar satliah mai aia tam a tel a ni. Kum zabi khatnaa Paula thuhrilh lo hretu Beroia khua Judate chu kan entawn a ṭûl a ni. An chungchâng chu: “Rilru lâwm takin thu chu an pawm a, an thusawi chu a dik leh dik loh hriat nân ni tin Pathian Lehkhaah an zawng ṭhîn,” tiin kan chhiar a ni.​—⁠Tirhkohte 17:11.

Chutiang bawkin tûn laiah pawh, ngun taka Bible zirna chuan Pathian kan rinna a tinghet a, amah nêna inlaichînna nei tûrin min ṭanpui a. (Hebrai 11:⁠6) Jehova’n mihringte a dâwr dân​—⁠hun rei lo tê hlâwkpui tûr ni lova, duhna rilru dik tak nei apiangte tâna chatuan daih ṭhatna thlen tûra a dâwr dân​—⁠chiah hre thiam tûrin min ṭanpui bawk a ni.

Pathian nêna inlaichînna hnai tak nei Kristian ṭhenkhatte ṭawngkam hi lo ngaihtuah teh. Kum 16 mi Danielle-i chuan, “Jehova ka hmangaih êm êm a, a hnêna lâwmthu sawina tûr chhan tam tak ka nei a ni. Ani chuan amah  hmangaih tak taktu, a Thu nêna inmila min zirtîrtu hmangaihna nei nu leh pa min pe bawk si a,” tiin a sawi. Uruguay rama Kristian pakhat pawhin: “Ka thinlung hi lâwmnain a khat a, a hmangaih-ngilneihna leh amah nêna kan inṭhian avâng hian Jehova hnêna lâwmthu sawi lo thei ka ni lo,” a ti bawk. Pathian chuan naupang tête pawh a lâwm a ni. Kum sarih mi Gabriela-i chuan: “Khawvêl pumpuia thil dang zawng aiin Pathian chu kan hmangaih zawk a! Mahniin Bible ka nei a. Pathian leh a Fapa chungchâng zir chu nuam ka ti êm êm a ni,” a ti.

Tûn laiah, mi maktaduai têlte chuan he fakna hla phuahtu sawi: “Kei atân erawh zawng Pathian hnaih hi a ṭha a ni,” tih hi an pawmpui a. (Sâm 73:28) Anni chuan tûna an buaina tawhte tuar chhuak tûrin ṭanpuina an dawng a; tin, lei Paradis-a chatuana nun beiseina chiang tak an nei bawk a ni. (1 Timothea 4:⁠8) Engvângin nge “Pathian hnaih” chu i thiltumah i dah loh vang? Dik takin: “Ani chuan min hlat lo ṭheuh” tih kan hria a ni. (Tirhkohte 17:27) Ni e, Pathian chuan a ngaihsak tak zet che a ni! (w04 7/1)

[Phêk 5-naa milemte]

Jehova’n min ngaihtuahzia chu kawng tam takin a lang

[Phêk 7-naa milem]

Naupangte takngial pawhin Pathian an hnaih thei

[Phêk 7-naa milemte]

Tûn laiah, chhel tûrin Jehova’n min ṭanpui. A hun takah chuan thihna leh natnate a nuaibo vang