Pathian Ram Sawrkâr​—⁠Tûn Laiah A Awm Ngei

“Engtin nge ram hrang tam tak, hnam zia leh hmasâwn dân inang lo tak takte chu an inlungrual theih ang? Khawvêl (planet) dang aṭanga beihna chauh hian mihringte chu a inpumkhattîr thei ang tia sawi a ni ṭhîn,”​—⁠The Age, Australian chanchinbu.

KHAWVEL dang aṭanga beihna maw? Chutianga beihna chuan khawvêl ram zawng zawng inpumkhatna a rawn thlen dâwn leh dâwn loh hre lo mah ila, Bible hrilh lâwkna chuan khawvêl ram zawng zawng suihkhâwmtu tûr chhiatna a lo thlen thuai tûr thu a sawi a. Tin, chu chhiatna chu khawvêl pâwn lama thiltihtheihna hian a rawn thlen dâwn a ni.

Hmân lai Israel Lal Davida chuan he khawvêl dinhmun chungchâng hi a lo hrilh lâwk a. Pathian thâwk khumin hetiang hian a sawi a ni: “Khawvêl lalten an ep huai huai a, hotute pawh an pungkhâwm a, Lalpa leh a Krista chungah chuan,” tiin. (Tirhkohte 4:​25, 26; Sâm 2:​2, 3) Khawvêl lalte chu Jehova, lei leh vân Siamtu leh a hriak thiha, a nih loh leh Lal atâna a thlan, Isua Krista ep tûrin an pungkhâwm tih chhinchhiah rawh. Engtin nge chu chu a thlen ang?

Bible kum chhûtna leh hrilh lâwk thu thleng famkimte’n a târ lan angin, kum 1914-ah Pathian Ram chu vânah din a ni tawh a, Isua Krista chu Lalah a ṭhu tawh a ni. * Chutih lai chuan khawvêl ramte chuan ngaihtuahna  pakhat chu an inṭâwm ṭheuh a ni. Chu chu Pathian Ram piangtîr thuneihna hnuaia intukluh aia thuneih inchuha indo hi a ni​—⁠Indona Ropui, a nih loh leh Khawvêl Indopui I-naah telin.

Engtin nge Pathian Jehova chuan chutianga mihring rorêltute chhân lêtna chu a ngaih? “Vâna ṭhua chu a nui ang a: Lalpa chuan anniho chu a nuihzatbûr ang. Chu mi hunah chuan thinurin an hnênah thu a sawi ang a, thinrim takin anmahni a timangang tawh ang.” Tichuan, Jehova chuan Lalrama Lal atâna a thlan a Fapa hnênah chuan: “Mi dîl rawh, tichuan i rochun atân hnam tin ka pe ang chia, kâwlkil tâwp thlengin i ro atân ka pe bawk ang che. Anni chu thîr tiangin i tikeh ang a; bêlvawtu bêl an paih keh sawm ang hian i paih keh sawm ang,” tiin a hrilh ang.​—⁠Sâm 2:​4, 5, 8, 9.

Chutianga dodâltu ramte thîr tianga a tihkeh sawm vekna hnuhnûng ber chu Armageddon, a nih loh leh Har–Magedon-ah a thleng ang. Bible bu hnuhnûng ber, Thu Puan bu chuan chu tâwpna thilthleng chu “khawvêl zawng zawnga lalte” hruai khâwm an nihna, “Pathian Engkimtitheia ni ropuia indona” tiin a hrilhfiah a ni. (Thu Puan 16:​14, 16) Ramhuai thununna hnuaiah, khawvêl ram zawng zawngte chu tum pakhat​—⁠Pathian Engkimtitheia do tûrin an la inthurual vek ang.

Pathian lal chungnunna do tûra mihringte an punkhâwm hun chu a hnai tawh hle a. Inkalh tak maiin, an “inpumkhatna” chuan an beisei ang mi mal hlâwkna a thlen lo vang. Chutih ahnêkin, an thiltih chu mihringte’n hun rei tak an lo nghah tawh remna hmahruaitu a ni zâwk ang. Engtin nge a nih theih? Chu indona hnuhnûng berah chuan, Pathian Ram chuan “hêng [khawvêl] ram zawng zawngte hi a tikeh sawmin a tiral zâwk ang a, [chu Ram chu] kumkhuain a ding reng ang.” (Daniela 2:44) Mihringte thlâkhlel êm êm khawvêl puma remna rawn thlentu tûr chu, mihringte inawpna pâwl ni lovin, Pathian Ram a ni zâwk ang.

Lalram Sawrkâra A Hotu Ber

Chu Lalram chu a ni, mi rilru ṭha tam takin: “I ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭaia an dîl chu ni. (Matthaia 6:10) Pathian Ram chu hmuh theih loh thinlung dinhmun mai ni lovin, kum 1914-a vâna din a nih aṭanga thil ropui tak tak hlen chhuaktu sawrkâr tak tak a ni. Tûnah chuan Pathian Ram chu a awm ngei a, tûn laiah thil a ti mêk a ni tih târ langtu thil pawimawh tak tak ṭhenkhat i lo ngaihtuah ang u.

A hmasa berin, Pathian Ram chuan Lala ṭhuttîr Isua Krista kaihhruai rorêl pâwl (executive branch) thiltithei tak leh tling tak mai a nei a. C.E. 33 khân, Pathian Jehova chuan Isua Krista chu Kristian Kohhran Lû berah a siam a. (Ephesi 1:22) Chuta ṭang chuan Isua chuan lû nihna a chelh ta zêl a, ro a rêl thiamzia a târ lang a ni. Entîr nân, kum zabi khatnaa Judai rama ṭâm nasa tak a tlâk khân, Kristian kohhran chuan a mi leh sate ṭanpui tûrin hma a la nghâl vat a. Chhawmdâwlna hna ruahman a ni a, Barnaba leh Saula chu chhawmdâwlna tûr kengin Antiokei khua aṭang chuan an thawn ta a ni.​—⁠Tirhkohte 11:​27-30.

Tûna Lalram sawrkârin hna a thawh hunah phei chuan Isua Krista hnên aṭangin chûng aia nasa chu kan beisei thei a ni. Chhiatna  engpawh​—⁠lîrnghîng te, ṭâm te, tui lian te, hurricanes te, thlipui te, a nih loh leh tlângkâng te​—⁠a lo thlen apiangin, Jehova Thuhretute Kristian kohhran chuan chutiang thlenna rama an rinpuite leh mi dangte tanpui tûrin hma a la vat zêl a ni. Entîr nân, January leh February 2001-a El Salvador rama lîr nasa tak a nghîn ṭum khân, ram chhûng hmun hrang hrangah chhawmdâwlna hna thawh nghâl a ni a, Canada te, Guatemala te, leh United States tea Jehova Thuhretute chuan an ṭanpui bawk a ni. Rei lo te chhûngin an inkhâwmna in pathum leh mi chênna in 500 chuang chu sak zawh a ni.

Pathian Ram Khua leh Tuite

Pathian van lam Lalram chuan kum 1914-a din a nih aṭang khân, khawvêl hmun tina mite chu a khua leh tui atân la khâwmin, a huaihawt a. Chu chu Isaia’n hrilh lâwk thu ropui tak a lo chhinchhiah thlen famkimna a ni: “Ni hnuhnûngahte chuan heti hi a ni ang a, LALPA in [a biakna dik chawisân tawh] awmna tlâng chu tlâng lian chungahte chuan tihnghehin a awm ang a, . . . chutah chuan hnam tinrêngte chu an kal nguah nguah ang,” tih hi. Hrilh lâwkna chuan “chi tam takte” chu, chu tlângah chuan an chho vang a, Jehova zirtîrna leh dânte chu an pawm ang tih a târ lang.​—⁠Isaia 2:​2, 3.

He thiltih hian tûn laia beihpui thlâkna pawimawh ber mai chu a hring chhuak a ni​—⁠khawvêl ram 230 chuanga Kristian 6,000,000 chuangte laka inunauna chu. Jehova Thuhretute khawvêl pum huap inkhâwmpui lo hmutute chuan mipui zînga hmangaihna te, remna te, leh inpumkhatna te, hnam hrang te, ze hrang te, leh ṭawng hrangte inenhranna a awm lo chu mak an ti hle ṭhîn. (Tirhkohte 10:​34, 35) Hnam hrang hrang za tam takte inrem tak leh inngeih taka hruai khâwm tûr chuan, sawrkâr ṭha leh ngelnghet tak leh a tak tak a nih a ngai tih i pawm dâwn lâwm ni?

Pathian Ram leh Zirna

Sawrkâr tin hian a khua leh tuite zawm tûr dân a nei ṭheuh va, chu sawrkâr hnuaia awm duhtu apiangte chuan chu dânte chu an zawm a ngai a ni. Chutiang bawkin, Pathian Ram pawhin a awpna hnuaia awm duhtu apiangte zawm tûr dân a nei ve a ni. Nimahsela, mi chi hrang hrang tam takte dân thuhmun pawmtîr a, chu mi hnuaia awmtîr chu hna namên a ni lo. Chuvângin, hei hi Pathian Ram a awm ngei tih finfiahna dang a ni​—⁠mite rilru mai bâkah thinlung pawh thlâk thleng thei a zirna hlawhtling tak mai chu.

Engtin nge Lalram sawrkâr chuan he hna khirh tak mai hi a hlen chhuah? Tirhkohte tih dân anga Pathian Thu chu “in tinah te” hrilh a, mi mal tinte hnêna zirtîrna hmangin a hlen chhuak a ni. (Tirhkohte 5:42; 20:20) Hetiang kawnga zirtîrna hi engti fakauvin nge a hlawhtlin? Katholic puithiam pakhat, Jacques Johnson-a chuan hmeichhe pakhat chu Jehova Thuhretute nêna Bible zir lo tûra khap a  tum dân chungchâng Canadian weekly chanchinbuah a ziak a. “A ngaihna rêng ka hre lo va, ka hneh loh tûr indonaah ka tel tih ka hre chhuak a ni,” a ti. “Hêng Jehova Thuhretu hmeichhiate hian pâwn chhuak thei lo he nu nên hian thla engemaw zât chhûng chu inlaichînna ṭha tak an lo nei tawh tih ka hre ta a. Amah ṭanpuina te, a ṭhian nihna te, thinlung nêna inzawmna awmze nei tak siamna te hmangin amah nên an lo inzawm tlat tawh a ni. A hnu lawkah chuan an kohhrana mi inhmang tak a ni chho va, chutiang thleng lo tûrin tih theih rêng ka nei lo,” a ti bawk. Tûn hmaa Katholic lo ni ṭhîn chu nu thinlung chu Jehova Thuhretute zirtîr Bible thuchah leh an Kristian nungchangin a chêttîr ang bawkin, khawvêl pum puia mi maktaduai tam takte thinlung pawh a chêttîr a ni.

Hetiang chi zirna​—⁠Lalram thu zirna​—⁠hi Bible ṭanchhana neih a ni a, nungchang lama a hlutna leh a tehna te vawn tlat hi a ni. Chu chuan eng mi pawh ni se, mite chu hmangaih tûr leh chawimawi tûrin a zirtîr a ni. (Johana 13:​34, 35) Tin, he fuihna: “He khawvêl dân ang hian awm suh ula; Pathian duhzâwng, a ṭha leh lawm tlâk leh, ṭhat famkim chu in hriatfiah theih nân, in rilru athara awmin lo danglam zâwk tawh rawh u,” tih hi zâwm tûrin mite a ṭanpui bawk a ni. (Rom 12:⁠2) An nun dân hluite kalsana, Lalram sawrkâr dân leh thu bulte mila lâwm taka insiamremin, mi maktaduai tam takte chuan tûnah remna leh hlimna an nei a, nakin hun atân beiseina êng tak an nei bawk a ni.​—⁠Kolossa 3:​9-11.

He khawvêl puma inpumkhatna nei tûra ṭanpuitu langsâr tak chu, he Vênnainsâng magazine hi a ni. Ṭawng lehlin dân ruahmanna fel tak leh ṭawng chi hrang hranga chhutchhuah theihna khâwlte hmangin, Vênnainsâng-a thuziak pawimawh berte chu ṭawng chi hrang 135-in a ruala chhuah a ni a, khawvêl puma a chhiartu 100 zêla 95 chuangte chuan a rualin mahni ṭawng ngeiin an zir thei a ni.

Mormon sakhaw mi ziaktu pakhat chuan kohhran danga missionary hlawhtling ber maite a ziak tlar a. Jehova Thuhretute chhuah Vênnainsâng leh Awake! magazine-te chu rawngbâwlna magazine ṭha berah a dah a, hetiang hian a sawi a ni: “Tumahin Vênnainsâng emaw, Awake! emaw hi inthlahdahna awmtîrtuah an puh thei lo​—⁠chutih ahnêkin, hêng magazine-te hian kohhran dang thu leh hla chhuaha kan hmuh khât êm êm harhvânna rilru a awmtîr zâwk a ni. Vênnainsâng leh Awake! thuziakte hi thilthleng dik tak, ṭha taka zir bing, leh khawvêl thil awm dân dik tak a nih avângin mi a tihahdam hle,” tiin.

Pathian Ram chu a awm ngei a, hna a thawk mêk a ni tih finfiahna tam tak a awm a. Jehova Thuhretute chuan “he ram chanchin ṭha hi” an ṭhenawmte hnênah phûr tak leh thatho takin an hrilh a, chu Lalram khua leh tuite ni ve tûrin an sâwm a ni. (Matthaia 24:14) Chutiang beiseina chu i duh em? Chu Lalram chungchâng zirtute leh a tehnate mila nun tumte kawmna aṭanga lo awm malsâwmnate chu i dawng thei a ni. Tin, Lalram awpna hnuaia lei thar, ‘a chhûnga felna awma’ nun theih beiseina chu i nei thei bawk a ni.​—⁠2 Petera 3:13. (w04 8/1)

[Footnote]

[Phêk 4, 5-naa milem]

Kum 1914-ah chuan ramte chu khawvêl indopuiah an tel

[Phêk 6-naa milemte]

Chhawmdâwlna hnaa inpêkna chu Kristian hmangaihnain thil a tihzia târ langtu a ni

[Phêk 7-naa milem]

Khawvêl puma Jehova Thuhretute chuan zirna inang vek an neih chu an hlâwkpui