Chhiartute Zawhna

Mosia Dânin hnam dang mi nupui pasala neih khap mah se, engvângin nge Israel mipate’n sala an hruai zînga hmeichhiate nupui atâna an neih chu phalsak a nih?​—⁠Deuteronomy 7:​1-3; 21:​10, 11.

Chutiang phal a nih chhan chu a dinhmun danglam bîk tak vâng a ni. Jehova chuan Israel mite chu Kanaan rama hnam sarihte awmna khawpui chu tichhia a, a chhûnga chêng zawng zawngte that vek tûrin thu a lo pe tawh a. (Deuteronomy 20:15-18) Hnam dangte chungchângah chuan, puitling dam khawchhuak awmchhun chu hmeichhia mi la pâwl lo an mante chauh an nih a rinawm. (Number 31:​17, 18; Deuteronomy 20:14) Chutiang hmeichhia chuan a tih tûrte a tih chuan Israel mipain nupui atân a nei thei ang.

Chutiang hmeichhiain a tih tûrte chungchângah Bible chuan: “An lû an mêt ang a, an tin an zai ang a; an sal kawr chu an hlîp ang a, in inah an awm ang a, thla khat zet an nu leh an pa an sûn ang a, chu mi hnuah chuan in pâwl ang a, an pasal in ni ang a, in nupui an ni ang,” tiin a sawi.​—Deuteronomy 21:​12, 13.

Israel mipain a neih duh râllâk hmeichhia mi la pâwl loh chuan a lu a mêt tûr a ni. Lu meh chu sûnna leh lungngaihna entîrna a ni. (Isaia 3:24) Entîr nân, a fate zawng zawng an thih a, a thil neih zawng zawng a chân khân, thlahtu Joba chuan a sûnna lantîr nân a lû a ziat kawlh vek a. (Joba 1:20) Hnam dang hmeichhia chuan a tin rawng a hnawih a nih pawha a lan nalh loh nân a zai ang, chu chu ‘a tin a hlep ang’ tihna a ni. (Deuteronomy 21:12, Knox) Râllâk hmeichhiain a hlih tûr “sal kawr” chu eng nge ni? Milem beho khawpuia awm hmeichhiate chuan râl laka an tlâwm dâwnin, an thawmhnaw neih ṭhat ber chu an ha ṭhîn a. Chu chu a mantute duhsakna dawn nâna tih a ni. Chûng thawmhnawte chu sala hruai hmeichhia chuan a lusûn chhûngin a hlîp tûr a ni.

Israel mi nupui tûr râllâk hmeichhia chuan thla khat zet a chhûngkhat thite chu a sûn tûr a ni. Râllâk khawpuite tihchhiatna chu a nasat dâwn êm avângin, tûn hmaa an chhûngkua leh khawtlâng inkûngkaihna zawng zawng thlengin a bo vek ang. Israel sipaite’n an tihchhiat vek tawh dâwn avângin, a pathiante chu a awm tawh lo vang. Lusûn hun thla khat chhûngin râllâk hmeichhiain a sakhaw hmasa tih dân zawng zawng a tih tawh dâwn loh avângin, chu chu a inthenfaina hun a ni bawk.

Mahse, hnam dang hmeichhe pângngaite chungchângah chuan hetiang a ni ve lo. He mi chungchângah hian, he thu bul: “Nupui pasalah in nei tûr a ni hek lo, in fanute chu an fapate in neihtîr tûr a ni lo va, an fanute chu in fapate in neihtîr tûr a ni hek lo,” tih hi a hman theih a ni. (Deuteronomy 7:⁠3)  A khuahkhirh chhan chu eng nge ni? Deuteronomy 7:4 chuan: “In fapate, mi zui lai hi pathian dangte biakna lamah an hruai kawi mai ang,” tiin a sawi. Chutiang a nih chuan, khuahkhirhna chu Israel mite sakhaw dik lo laka humhim nân a ni. Amaherawhchu, Deuteronomy 21:10-13-a târ lan hnam dang hmeichhia chuan chutiang hlauhawmna a thlen thei lo. A chhûng zawng zawngte an thi tawh a, a pathian lemte lah tihchhiat vek a ni tawh bawk a. Sakhaw dik lo betute nên inzawmna rêng a nei thei tawh bawk lo a ni. Chutiang dinhmunah chuan Israel mi chu hnam dang mi neih phalsak a ni. (w04 09/15)