Infiamna Mai A Ni Lo

NAUPANGTE chuan infiam hi nuam an ti hle a. Mahse, “hei hi thiltih tê tham emaw, ṭangkai lo emaw a ni lo. Naupangte’n an chhehvêl thlîr dân an neih ṭanna thil niin a lang,” tiin The Developing Child tih lehkhabu chuan a hrilhfiah a ni. An infiamna aṭangin naupangte chuan an thil hriat theihna hman dân an zir a, an chhehvêla thil awmte an hre thiam a; tin, mi dangte nên an inkâwm bawk a ni.

Naupangte chuan kum li emaw, kum nga emaw an han chuankai aṭang chuan an infiamnaah puitling tih dân an zir ṭan nghâl a. Isua chuan naupang infiam chungchâng ṭum khat chu a sawi a ni. Naupang ṭhenkhat chuan “innei” lema chan an duh a, a dangte chuan “mitthi vui” lema chan chu an duh thung a; mahse, ṭhenkhat an tel ve duh loh avângin an inhnial phah fo bawk. (Matthaia 11:​16,17) Hetiang chi infiamna hian naupang ṭhang laite rilruah mize nghet tak a tuh thei a ni.

He milemtea hmeichhe naupangte hian Bible zirtirtu leh zirlai lem an chang a ni. Mi Bible an zirpui tak tak lo nachungin, mite Bible thuchah hrilhhriat chu an rilruah a awm chiang hle. Isua’n a hnungzuitute chu zirtîr siam tûr leh thu a pêk zawng zawng an pawm nâna zirtîr tûra thu a pêk avângin, he an lemchan hi a pawimawh hle a ni.​—⁠Matthaia 28:​19, 20.

Bible zirte, thusawite, a nih loh leh in tin kala Pathian thu sawi te zir duh fate nei nu leh pate chuan inchhuan chhan tûr an nei a ni. Dân narânin, naupangte chuan an bula puitlingte thiltih an hmuhte chu an entawn ṭhîn a ni si a. Bible hmanga naupangte infiamna chuan “Lalpa pawmzâwng zirtirna leh zilhnaa” enkawl an nihzia a târ lang.​—⁠Ephesi 6:4, Charles B. Williams.

Jehova chuan biakna dika naupangte an tel chu a duh a. Dân an chhiar laiin “fanau tê tê te” pawh teltîr tûrin Mosia a hrilh a ni. (Deuteronomy 31:12) Naupangte’n tel ve nia inhriatna an neih chuan, an infiamna chuan a lantîr dâwn a ni. Pathian rawngbâwltu lema chang naupang chuan chutiang ni tûrin kê a pên ṭan tihna a ni. (w04 10/1)