“Inlainat Tawn Ṭheuh Rawh U”
“Inlainat Tawn Ṭheuh Rawh U”
“Unaute hmangaih kawngah chuan hmangaih takin inlainat tawn ṭheuh rawh u.”—ROM 12:10.
1, 2. Tûn laia missionary pakhat leh tirhkoh Paula chuan an unaute nên eng inlaichînna nge an neih?
KHAWCHHAK lam ram hla taka kum 43 chhûng missionary rawng a bâwl chhûngin, Don-a chuan a rawngbâwlsakte a hmangaihna avângin hriat a hlawh hle a. Thihna khuma a mut laiin, a Bible zirpui hlui ṭhenkhat chu a khum sîra dinga, “Kamsahamnida, kamsahamnida!”—Korea ṭawnga “Ka lâwm e, ka lâwm e!” tih hrilh tûr ringawtin mêl sâng têla hla aṭangin an lo kal vang vang a ni. Don-a lainatna chuan an rilru a khawih tak zet a ni.
2 Don-a hi hetiang kawnga entawn tûr awmchhun a ni lo. Kum zabi khatnaah tirhkoh Paula chuan a rawngbâwlsakte chu lainatna nasa tak a lantîr a, an tân a inpe a ni. Ani chu rin tlatna nei, mize nghet tak nei ni mah se, “nu nau pawmin ama fate a duat angin” mi nunnêm leh mi ngaihsak tak a ni. Thessalonika khuaa kohhran hnênah: “Kan duhzâwng tak in loh nih tâk avâng khân, kan duh ngawih ngawih che u a, Pathian chanchin ṭha chauh ni lovin, keimahni nun pawh pêk hial che u kan peih kha,” tiin a ziak a ni. (1 Thessalonika 2:7, 8) A hnuah, Paula’n Ephesi khuaa a unaute hnêna amah an hmuh leh tawh loh tûr thu a hrilhin, “an za chuan an ṭap zawih zawih a, Paula chu pawmin an fâwp ngawih ngawih” a ni. (Tirhkohte 20:25, 37) Paula leh a unaute inkâra inlaichînna chu rinna inṭâwm avâng mai a ni lo tih a chiang hle. Anni chuan inlainat tawnna an nei a ni.
Inlainatna leh Hmangaihna
3. Bible thu mal lainatna leh hmangaihna chu engtin nge a inkûngkaih?
3 Bible-ah chuan, duh ngawih ngawihna, lainatna, leh khawngaihna te chu Kristian mize ṭha ber—hmangaihna nên a inzawm hnai hle a. (1 Thessalonika 2:8, 2 Petera 1:7) Lunghlu mawi tak hmai chi hrang hrang angin, hêng Pathian miziate hi a inchawih tâwkin, a incheimawi tawn a ni. Chûng miziate chuan Kristiante a inhnaihtîr mai a ni lo, an Pa vâna mi nên pawh a inhnaihtîr a ni. Chuvângin, tirhkoh Paula chuan a rinpuite chu: “Hmangaihna chu vervêkna tel lovin ni rawh se. . . . Unaute in hmangaih kawngah chuan hmangaih takin inlainat tawn ṭheuh rawh u,” tiin a fuih a ni.—Rom 12:9, 10.
4. Eng nge ‘lainatna’ tih awmzia chu?
4 ‘Lainatna’ tih atâna Paula hman Grik thu mal hi thil chi hnih, inṭhianna leh pianpui hmangaihna inkawp aṭanga lo kal a ni a. Bible lama mi thiam pakhat sawi dânin, chu mi awmzia chu Kristiante chu “hmangaihna, inpawhna, leh inṭanpui tawnna te hmanga chhinchhiah an ni tûr a ni” tiin a hrilhfiah a. Chu chu i Kristian unaupate leh unaunute chunga i ngaih dân a ni em? Kristian kohhranah chuan boruak nuam tak—inchhûngkhatna—a awm tûr a ni. (Galatia 6:10) Chuvângin, J. B. Phillips-a chuan The New Testament in Modern English-ah chuan, Rom 12:10 thu hi: “Pianpui unau inkâra inhmangaihna ang hi i nei ang u,” tiin a let a. Tin, The Jerusalem Bible-ah chuan: “Pianpui unau angin inhmangaih tawn rawh u,” tiin kan chhiar bawk. Ni e, Kristian inhmangaihna chu thil tihâwm leh tih tûr a nih vâng maia lantîr a ni lo. “Vervêkna tel lo unau inhmangaihna nên,” kan “thinlungah ṭhahnem ngai takin kan inhmangaih tawn” tûr a ni.—1 Petera 1:22, NW.
‘Inhmangaih Tawn Tûra Pathian Zirtîra Awm’
5, 6. (a) Engtin nge Jehova’n khawvêl pum huap inkhâwmpuite chu a mite Kristian inhmangaihna zirtîr nân a hman? (b) Engtin nge hun a kal zêl hian unau inzawmna chu a lo ngheh chhoh?
5 He khawvêla “mi tam zâwk hmangaihna” chu dai mah se, Jehova chuan tûn laia a mite chu “inhmangaih tawn” tûrin a zirtîr a. (Matthaia 24:12; 1 Thessalonika 4:9) Jehova Thuhretute khawvêl pum huap inkhâwmpuite chu he inzirtîrna atân hun ṭha tak a ni. Hêng inkhâwmpuiahte hian, tualchhûnga Thuhretute leh ram hla taka unaute chu inhmukhâwmin, ram dang aṭanga palai lo kalte chu an thleng a. Tûn hnai maia inkhâwmpui pakhatah chuan, ṭhenkhat chu mi a tam zâwkte rilru inhawn lohna ramte aṭangin an lo kal a. Thlen in ngaihtuahtu Kristian pakhat chuan: “Chûng palaite chu an lo thlen tirh chuan an zâmin, an ṭî hle a. Mahse, ni ruk lek hnua haw tûra an han inthlah chuan a thlengtute nên inpawmin an ṭap a. An theihnghilh ngai hauh loh tûr Kristian hmangaihna hian a hualvêl a ni,” a ti. An pian leh mûrna chu engpawh ni se, kan unaute chunga khual chhawn thiamna kan lantîrna chuan a mikhualte leh a thlengtu tân thil ṭha tak a thlen thei a ni.—Rom 12:13.
6 Chûng inkhâwmpuia thiltawnte chu phûrawm hle mah se, Kristiante’n hun engemaw ti chhûng Jehova rawng an bâwl tlânna hian inlaichînna hnai tak a siam a ni. Kan unaute kan hriat chian hian, an mizia duhawm tak—an dikna te, an rin tlâkna te, an rinawmna te, an ngilneihna te, an thilphalna te, an mi ngaihsakna te, an mi khawngaihna te, leh hma an sial lohna te—chu i ngaisâng lehzual thei a ni. (Sâm 15:3-5; Thufingte 19:22) Africa Khawchhak Lam rama misssionary-a rawngbâwl Mark-a chuan, “Kan unaute nêna rawngbâwl tlânna chuan tihchhiat theih rual loh inzawmna a siam a ni,” a ti.
7. Kohhrana Kristian inlainatna neih theih nân kei mahni lamah eng nge tih ngai?
7 Kohhrana chutiang inzawmna awmtîr tûr leh vawng reng tûr chuan, kohhran mite chu an inhnaih tawn sauh tûr a ni. Kristian inkhâwmnaa tel ziahna hmangin, kan unaute nêna kan inzawmna chu kan tichak a. Inkhâwmnaa tel a, a ṭan hma leh bân hnua unaute nêna inkawmna leh inkhâwm laia chhânna pêknate hmangin, “hmangaih leh thil ṭha” ti tûra infuihin, kan inchawk tho a ni. (Hebrai 10:24, 25) United States-a upa pakhat chuan, “Ka naupan laiin, kan chhûngkua chu Kingdom Hall chhuahsan hnuhnûng berte zînga mi kan ni ṭhîn a, a theih ang tâwkin inkawmna leh awmze nei taka titina kan neih thinte chu ka la hre reng,” a ti.
I ‘Inhawn’ A Ngai Em?
8. (a) Paula’n Korinth mite hnêna “inhawng” tûra a fuih khân eng a tihna nge? (b) Kohhran chhûnga inlainatna awm tûrin eng nge kan tih theih?
8 Chutiang inlainatna lantîr pumhlûm tûrin, kan rilru kan ‘hawn’ a ngai mai thei a. Korinth khua kohhran mite hnênah tirhkoh Paula chuan: “Kan thinlung pawh phawrh vekin . . . kan inhawng a, nangni erawh chu in inhawng ve si lo,” tiin a ziak a. Paula chuan anni chu “inhawng” ve tûrin a fuih a ni. (2 Korinth 6:11-13) Lainatna kawngah chuan i “inhawng” ve thei ang em? Mi dangin hma an lâk i nghah kher a ngai lo. Rom khaw mite hnêna a lehkha thawnah, Paula chuan inlainat tawn a ngaihna chu: “Inchawimawi tawnna kawngah chuan hma hruai ula,” tih thurâwn nên a thlunzawm a ni. (Rom 12:10, NW) Mi dangte chawimawi tûrin, inkhâwmnaah mi dangte chu i be hmasa thei a. Tlawhhma rawngbâwlnaa thawhpui tûrin emaw, inkhâwmna atâna inpuahchah tlâng tûrin emaw i sâwm thei bawk a ni. Chutianga tihna chuan inlainatna ṭhang cho tûrin a ṭanpui a ni.
9. Mi ṭhenkhatte’n an Kristianpuite nêna inṭhian ṭha lehzual tûrin eng hma lâkna nge an neih? (Tualchhûnga entîrna engpawh telh rawh.)
9 Kohhrana chhûngkuate leh mi mal tinte chuan chaw pangngai tak kîlhova intlawh pawh tawnin, leh thil ṭha engemaw titlângin an “inhawng” thei a ni. (Luka 10:42; 14:12-14) Hakop-a chuan mi tam vak lote nên picnic a ruahman zauh zauh ṭhîn a. Ani chuan, “Nu leh pa mal ṭante pawh tiamin, apui apangin an tel vek a. Mi tinin hun hlimawm tak an hriatreng tûr chu an pai haw a, an inpawh lehzual hlawm a ni,” a ti. Kristiante kan nih angin, rinpuite ang chauh ni lovin, ṭhian ṭha tak nih chu kan tum ṭheuh tûr a ni.—3 Johana 14.
10. Unaute nêna harsatna kan neih hunah eng nge kan tih theih?
10 Mahse, a châng chuan ṭhat famkim lohna chuan inṭhianna leh inlainatna nei tûrin harsatna a siam thei a. Eng nge kan tih tâk ang? A hmasain, kan unaute nêna inlaichînna ṭha nei tûrin kan ṭawngṭai thei a. A chhiahhlawhte inngeih dial diala an awm chu Pathian duhzâwng a ni a, chutiang lam hawia tih tak zeta ṭawngṭaina chu a chhâng dâwn a ni. (1 Johana 4:20, 21; 5:14, 15) Kan ṭawngṭaina nêna inmilin hma kan la tûr a ni bawk. Africa Khawchhak Lam rama bial kantu Ric-a chuan unaupa thin ram tak pakhat nêna inngeih chu harsa a ti hle a. “Unaupa chu pumpelh mai lovin, amah hriat chian chu ka tum zâwk a. Chu unaupa pa chu mi khuahkhirh bur chîng tak mai pakhat a lo ni reng a. He a seilen dân hneh tuma a beih nasat dân leh a hlawhtlin tawh ziate ka han hriat hnu chuan, ka ngaisâng ta riau mai a. Ṭhian ṭha tak kan lo ni ta a ni,” tiin Ric-a chuan a sawi.—1 Petera 4:8.
I Rilru Veizâwng Sawi Chhuak Rawh!
11. (a) Kohhrana inlainatna ṭhang chho tûrin eng nge ngai? (b) Engvângin nge mi dangte laka rilru veizâwng sawi chhuah loh chuan thlarau lama chhiatna a thlen theih?
11 Tûn laiah, mi tam takte chuan ṭhian ṭha tak nei ngai mang lovin an nun an hmang a. A va lungchhiatthlâk tak em! Kristian kohhranah chuan chutiang nih a ngai lo va—a ni tûr a ni hek lo bawk. Unau inhmangaihna dik tak chu hawihhâwm taka titi leh chêtze mawi mai a ni lo; rilrua veina nasa taka lantîrna mai lah a ni hek lo. Chutiang ni lovin, Paula’n Korinth mite hnêna a tih anga kan rilru veizâwng sawi chhuak duh a, kan rinpuite kan ngaihtuah tak zetzia lantîr chu a ni. Mi tinte chu mi kâwm thiam leh ṭawng duh tak ni vek kher lo mah se, inkulh hran ṭhakna chuan chhiatna a thlen thei a ni. Bible chuan: “Mi inkulh hrang mi chuan mahni duhzâwng a zawng ṭhîn a, finna dik zawng zawng a tai ṭhîn,” tiin a vaukhân a ni.—Thufingte 18:1.
12. Engvângin nge kohhrana inlaichînna ṭha nei tûrin inbiak pawhna ṭha chu thil pawimawh tak a nih?
12 Tlang taka inbiak pawhna chu inṭhian ṭhatna atân a pawimawh ber a. (Johana 15:15) Kan rilru veizâwngte sawi chhuah theihna ṭhian ṭha kan neih chu a ngai a ni. Chu bâkah, kan inhriat chian tawn poh leh, kan mamawhte inphuhhrûksak tawn chu a awl zual dâwn a ni. Hetiang kawnga kan inngaihsak tawn hian, inlainatna kan tipung a ni ang a, Isua thu sawi: “Englo lâk aiin pêkin lukhâwng a nei zâwk,” tih a dikzia chu kan tawng dâwn a ni.—Tirhkohte 20:35; Philippi 2:1-4.
13. Kan unaute lainatna tak tak kan neihzia lantîr nân eng nge kan tih theih?
13 Kan inlainatna chu ṭangkai tak ni tûr chuan, kan lantîr a ngai a. (Thufingte 27:5) Kan inlainatna a tak hian, kan hmêl lan dân hian a târ lang ang a, chu chuan chhâng lêt tûrin mi dangte thinlung chu a chêttîr mai thei a ni. “Hlim hmêlin mi a tilâwm,” tiin Bible thufing chuan a ziak a ni. (Thufingte 15:30) Ngaihsakna lantîrtu thiltih pawhin inlainatna a siam bawk a. Inlainatna dik tak chu tuman lei thei lo mah se, thinlung tak taka thilpêk pêk chu a pawimawh hle thei a. Card te, lehkha thawn te, leh “a âwm tak thu sawi” te—hêng zawng zawngte hian inlainatna thûk tak a lantîr thei a ni. (Thufingte 25:11; 27:9) Mi dang nêna inṭhianna kan neih tawh chuan, mahni hmasial lo lainatna lantîrna hmangin kan chhawmnung zêl tûr a ni. A bîk takin ṭanpui ngaih huna ṭanpuina pêk chu kan duh ang. Bible chuan: “Ṭhian chuan englai pawhin a hmangaih reng a, mangan nî atâna unauva piang a ni,” a ti.—Thufingte 17:17.
14. Tuemawin kan lainatna a chhân lêt loh hunah eng nge kan tih theih ang?
14 A nihna takah chuan, kohhrana mi tinte hnaih kim vek tûrin kan inbeisei thei lo va. Ṭhenkhat chu mi dangte aiin kan hnaih lehzual thei a ni. Chuvângin tuemaw chuan i duh angin a ngainat vak loh che pawhin, nangmahah emaw, chu miah emaw dik lohna engemaw tak awm angah ngai mai suh. Tin, chu mi chu nangmah ngaina tûr chein turlui suh. Chu miin a remtih ang chena nêl i tum chuan, nakina inṭhianna ṭha zâwk nei tûrin i ṭanpui tihna a ni ang.
“I Chungah Ka Lâwm Êm Êm A Ni”
15. Fakna, a nih loh leh fakna awm lohna chuan mi dang chungah eng nghawng nge a neih?
15 Baptisma a chan laia vân aṭanga: “I chungah ka lâwm êm êm a ni,” tih aw a hriat chuan Isua chu a va hlim dâwn tak êm! (Marka 1:11) He pawmna lantîrna hian a Pain a lainat tih a rinna chu a tithûk zual ngei ang le. (Johana 5:20) Lungchhiatthlâk takin, ṭhenkhat chuan an zah leh an hmangaihte hnên aṭangin chutianga fakna thu chu an dawng ngai meuh lo. “Keimah ang ṭhalai tam takte hian an Kristian rinna ṭâwmpui lo chhûngkua an nei a. Inah chuan sawisêlna hlîr kan hre ṭhîn. Chu chuan min tilungchhe hle a ni,” tiin Ann-i chuan a sawi. Mahse, kohhran zînga mi an lo nih chuan, thlarau lam chhûngkua—rinna lama nu leh pate leh unaunu leh unaupate—ṭanpuina leh ngaihsakna chu an dawng ta a ni.—Marka 10:29, 30; Galatia 6:10.
16. Mi dang sawisêl duhna rilru lantîrna chu engvângin nge a ṭangkai loh?
16 Hnam dân ṭhenkhatah chuan nu leh pa te, tar te, leh zirtîrtu te chuan faknain inthlahdahna emaw, chapona emaw a neihtîr an rin avângin naupang zâwkte chu tih tak zetin an fak ngai mang lo va. Chutiang ngaih dân chuan Kirstian chhûngkuate leh kohhran hial pawh a nghawng thei a ni. Thusawi chungchângah emaw, thil dangah emaw upa zâwkte chuan: “I tiṭha tâwk khawp mai; mahse, a aia ṭhain i tithei ang!” an ti mai thei a. A nih loh leh kawng dangin, naupangte chunga an lâwm lohna chu an lantîr hial thei a ni. Chutianga an tihin, mi tam tak chuan naupang zâwkte chu theih tâwp chhuah tûra fuihah an inngai a ni. Mahse, naupangte chu an hnungtawlh theih emaw, tlin lo nia an inhriat theih emaw avângin, hei hian nghawng duhawm lo tak a nei fo zâwk a ni.
17. Engvângin nge mi dangte fak theihna hun remchâng kan zawn ang?
17 Amaherawhchu, fakna chu fuihna engemaw pêk nâna thuhmahruai ang leka hman tûr a ni lo. Tih tak zeta fakna chuan chhûngkuaah leh kohhranah inlainat tawnna a awmtîr a; chuvângin, naupang zâwkte chu thiltawn ngah unaunu leh unaupate hnên aṭanga thurâwn la tûra fuih an ni. Chuvângin, mi dangte kan cheibâwl dân chungchânga hnam dân laltîr aiin, “mihring thar, thutak felna leh thianghlimnaa Pathian anga siam khân [i] inthuam” ṭheuh zâwk ang u. Jehova tih dân angin i fak bawk ang u.—Ephesi 4:24.
18. (a) Ṭhalaite u, upa zâwkte pêk zilhna thu chu engtin nge inthlîr ang? (b) Engvângin nge upa zâwkte chuan zilhna an pêk dân tûr chungchângah an fîmkhur?
18 Kawng leh lamah chuan ṭhalaite u, upa zâwkte’n zilhna emaw, thurâwn emaw an pêk che u hunah, an duh loh che u vângah ngai suh u. (Thuhriltu 7:9) Chutih ahnêkin, an ngaihsakna che leh an lainatna che chuan chutianga ti tûrin a chêttîr a ni thei a. Chuti ni lo se chuan, engvângin nge chu mi chungchâng sawipui tûr chein an intihbuai duh ang? Upa zâwkte—a bîk takin kohhran upate—chuan ṭawngkamin nghawng a neih theih dân hriain, zilhna thu an pêk hmain an ṭawngkam hman tûr ngaihtuah nân leh ṭawngṭai nân hun tam tak an hmang ṭhîn a ni, rah ṭha a chhuah an duh avângin.—1 Petera 5:5.
“Jehova Chu Lainatnain A Khat”
19. Engvângin nge beidawnna tâwkte’n Jehova ṭanpuina an beisei theih?
19 Lainatna an lantîr hnua dinhmun duhawm lo tak an tawn avângin, ṭhenkhat chuan lainatna lantîrna chuan beidawnna a tizual mai tûrah an ngai thei a. Chutiang mite tân chuan mi dangte hnêna an rilru hawng leh tûrin huaisenna leh rinna chak tak neih a ngai a ni. Mahse, Jehova chuan “min hlat lo ṭheuh” tih chu an theihnghilh ngai tûr a ni lo. Ani chuan amah hnaih tûrin min sâwm a ni. (Tirhkohte 17:27; Jakoba 4:8) Pathian chuan rilru nat kan hlauhna chu a hre thiamin, ṭanpui pawh min tiam bawk a ni. Fakna hla phuahtu Davida chuan: “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn,” tih min tiam a ni.—Sâm 34:18.
20, 21. (a) Engtin nge Jehova nên inlaichînna hnai tak kan nei thei tih kan hriat? (b) Jehova nêna inṭhian ṭha tûrin eng thil nge ngai?
20 Jehova nêna inṭhianna ṭha chu inlaichînna kan neih theih zînga pawimawh ber a ni. Mahse, chutianga inzawmna chu a awm thei tak tak em? Thei e. Bible chuan mi fel a hmei a pate’n kan Pa vâna mi an hnaihzia a târ lang a ni. Keini pawhin Jehova kan hnaih thei tih rinngamna min pe tûrin, an thusawi duhawm takte chu vawiin thlenga vawn ṭhat a ni.—Sâm 23, 34, 139; Johana 16:27; Rom 15:4.
21 Amah hnaih nâna Jehova thil phûtte chu mi tinte tlin theih thil a ni. Davida chuan: “LALPA, i puan inah chuan tunge lo mikhual ang?” tiin a zâwt a. “Dik taka awma, fel taka tia, a rilru thutak tak sawi mi chu” a mikhual dâwn a ni. (Sâm 15:1, 2; 25:14) Pathian rawngbâwlna chuan rah ṭha a chhuahin, a kaihhruaina leh vênhimna kan dawng tih kan hmuh hian, “Jehova chu lainatnain a khat” tih kan hre dâwn a ni.—Jakoba 5:11, NW.
22. Jehova’n eng ang inlaichînna nge a mite’n nei se a duh?
22 Jehova’n mihring ṭha famkim lote nêna mi mal inlaichînna neih a duh avângin kan va nihlawh tak êm! A nih chuan inlainat tawn ṭheuh tûr kan ni lo vem ni? Jehova ṭanpuina nên, kan Kristian inunauna nihna ber, inlainatna chu kan lantîr theiin, kan dawng thei ṭheuh a ni. Pathian Ramah chuan, tupawhin chatuanin inlainatna an nei tawh ang. (w04 10/1)
Engtin Nge I Hrilhfiah?
• Kristian kohhranah eng ang boruak nge awm tûr a nih?
• Kohhranah inlainatna awmtîr tûrin eng nge kan tih ṭheuh theih?
• Engtin nge tih tak zeta fakna chuan Kristian inlainatna a awmtîr?
• Engtin nge Jehova lainatna chuan min ṭanpuiin, min chhawmdâwl?
[Zirlai Atâna Zawhnate]
[Phêk 25-naa milem]
Kristian inkâra inhmangaihna chu tih tûr a nih vâng mai a ni lo
[Phêk 26, 27-naa milemte]
Lainatna kawngah i “inhawng” thei em?
[Phêk 28-naa milem]
I khirh nge, kawm nuam tak i ni?