Innghahna Tlâk Ro Chu

“TUEMAW hnên aṭangin i ro chun tûr thilin a nghah rêng che thu hriattirna lehkha i dawng hlauh a nih chuan, fîmkhur ang che. Bumtu fing vervêk takin bum che a tum a ni mai thei a nia.”

Hei hi United States Postal Inspection Service-in an Web Site-a vaukhânna thu an târ chhuah a ni. Engvangin nge? A chhan chu mi sâng tam takin, ‘I chhûngte pakhat a thi a, roluah tûr a hnutchhiah che,’ tih ziahna lehkha an dawn vâng a ni. Chuvângin, mi tam tak chuan ro luah tûr a awmna hmun leh a neih theih dân hriattîrna man atân $30 emaw, a aia tam emaw chu an thawn hlawm a. Mahse, nasa takin an beidawng a ni. A chhan chu, pawisa thawntu zawng zawngte chuan chhânna chi khat an dawng hlawm a​—⁠ro khâwm tûr nei lo hnên aṭanga ro khâwm tum chu thil theih a ni si lo.

Chutiang phiarrûkna chuan mihringte ro luah duhna chu a chawk tho a. Mahse, Bible chuan: “Mi ṭha chuan a tûte thlenga rochun tûr a hnutchhiah ṭhîn,” tiin ro petu chu a fak a ni. (Thufingte 13:22) Dik tak chuan, tu dang ni lovin, Isua ngeiin he thu hriat lâr tak leh duhawm tak hi Tlâng Chunga a Thusawiah a sawi a ni: “Thuhnuairawlhte chu an eng a thâwl e; lei hi an la rochung dawn si a,” tiin.​—⁠Matthaia 5:⁠5.

Isua thusai hian kum zabi hmasa lama hmân lai Israel Lal Davida’n: “Thuhnuairawlhte chuan lei hi an rochung ang a: remna chênin an hmuingil ang,” tih a ziah chu min hriat chhuahtîr a.​—Sam 37:11, King James Version.

“Lei hi an rochung ang”​—⁠beiseina phûrawm tak a va ni êm! Mahse, hei pawh hi a chunga kan sawi tâk anga inbumna fing tak a ni lo vang tih kan hre chiang thei ang em? Aw, hre chiang thei e. Lei hi Jehova thil siam mak ropui tak zînga mi a nih avângin, a Siamtu leh a Neitu a nihnaah ani chuan a duh apiangte hnênah ro angin a pe thei a ni. Lal Davida hmangin, A Fapa duat êm êm Isua Krista hnênah, Jehova chuan: “Mi dîl rawh, tichuan i rochun atân hnam tin ka pe ang chia, kâwlkil tâwp thlengin i ro atân ka pe bawk ang che,” tiin thu a lo tiam tawh a ni. (Sâm 2:⁠8) He mi avâng hian, tirhkoh Paula chuan Isua chu Pathianin “engkim rochungtuah a ruat” tih a sawi a. (Hebrai 1:⁠2) Chuvângin, Isua’n thuhnuairawlhte chuan “lei hi an la rochung dâwn” a tih khân a ti tak zet a ni tih leh a thutiam tipuitling tûrin thuneihna a nei tih kan ring tlat thei a ni.​—⁠Matthaia 28:18.

Tichuan, zawhna pawimawh tak lo chhuak ta chu, Engtin nge chu thutiam chu a lo thlen famkim ang? tih a ni. Tûn lai khawvêl kan thlîrna apiangah chuan, mi invaivûngte leh tumsângte hi an hlawhtlingin, an duh duh an nei thei niin a lang a. A nih chuan thuhnuairawlhte chu khawiah nge an  awm tâk ang? Chu bâkah, buaina nasa tak boruak leh tui bawlhhlawhna angte hian a tlâkbuak a; tin, duhâmna leh dâwn tawina avângin leilung hausaknate chu tihcherêu a ni bawk si a. He lei hi rochun tlâkin a awm ang em? Hêng zawhnate leh zawhna pawimawh dangte chhânna hre thei tûr hian, a dawta thuziak hi chhiar tûrin kan sâwm che a ni. (w04 10/1)

[Phêk 3-naa milem]

Ro dik tak i chang ang em?