Tûn Laiah Tute’n Nge Pathian Chawimawi?

“Kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e.”​—⁠THU PUAN 4:11.

1, 2. (a) Eng entîrnatein nge biomimetics nih phung chu târ lang? (b) Eng zawhna nge lo chhuak a, eng nge a chhânna chu?

KUM 1940 chho bâwr vêl khân ni khat chu, Swiss engineer George de Mestral-a chuan a ui a kal chhuahpui a. An lo kîr leh chuan a thawmhnawah leh a ui hmula chabet kai chu a hmu a. Hriat chian a duh avângin chabet chu enlenna hmanga a enfiah chuan, valh nei rêng rêng chunga inbât tâng thei tûr thil kawm te tak tê tê a hmuh avângin mak a ti hle a ni. A tâwpah chuan, a anpui thil​—⁠Velcro (Ṭhenkhatin “a chabet” an tih mai hmehkhâwma inchâr thei thil) chu a siam chhuak ta a ni. Leilunga thil awm nih phungte entawna thil siam chhuak chu de Mestral-a chauh hi a ni lo. United States-a Wright-a te unau chuan sava lian tak thlawh dân an zir chîk hnuah thlawh theihna an siam chhuak a. French engineer Alexandre-Gustave Eiffel-a chuan mihring malpui ruhin taksa rihna a dâwl dân ṭanchhanin Paris rama a hming chawi tower chu a sa a ni.

² Hêng entîrnate hian leilunga thil awm pianhmang entawna thil siam chhuahna, biomimetics science nih phung chu a târ lang chiang hle a ni. * Mahse: Thil siam chhuaktute chuan chabet te tak tê tê te, sava lian te, mihring malpui ruh te, leh mi tam takte thil siam chhuahna bul dang zawng zawng siam chhuak hmasatu chu an fak ṭhîn em? tiha zawh chu a âwm hle a ni. Dik tak chuan, tûn lai khawvêlah hian Pathian chuan a phu anga fakna emaw, chawimawina emaw a dawng khât hle a ni.

3, 4. “Ropuina” tia lehlin Hebrai thu mal awmzia chu eng nge ni a, Jehova tâna hman a nihin eng tihna nge a nih ang?

³ Ṭhenkhat chuan, ‘Engvângin nge Pathian chawimawi a ngaih? Pathian chuan ropuina a nei tawhsa reng a ni lâwm ni?’ tiin an ngaihtuah mai thei. Ni e, Jehova chu lei leh vâna Mi ropui ber a ni a; mahse, mi zawng zawng mithmuhah a ropui tihna a ni kher lo. Bible-ah chuan, “ropui” tiha lehlin Hebrai thu mal chuan “rit” tih lam pang a kâwk a. Chu chu mi dangte ngaiha mi pawimawha siamtu emaw, mi ropuia siamtu emaw tihna a ni. Pathian tâna hman a nihin, chu chu mihringte tâna Pathian tiropuitu tihna a ni.

⁴ Tûn laiah Pathian tiropuitu hria an awm mang lo va. (Sâm 10:4; 14:⁠1) A dik a dik chuan, tualchhûnga mi challangte chuan Pathian awm an ring a nih pawhin lei leh vân Siamtu ropui tak chu zahpah lo taka cheibâwl tûrin mi dangte chu an thunun ṭhîn a ni. Eng kawngtein nge an thunun?

 “Chhuanlam Tûr An Nei Lo”

5. Engtin nge scientist tam takin thil siam makte chu an hrilhfiah?

⁵ Scientist tam takte chuan Pathian a awm lo tiin an ṭang a. A nih leh, mihring pawh tiamin, thil siam mak takte chu engtin nge an hrilhfiah ang? Chûng thil siam mak takte chu chanchhâwnna vâng niin an sawi a, chakna engemaw avânga lo awm palh angin an sawi a ni. Entîr nân, chanchhâwnna lam ring mi Stephen Jay Gould-a chuan: “Kan lo awm chhan hi sangha dangdai tak rual khat hian khawmuala chêng ran nungte kea chang thei pângparh dangdai tak an neih vâng a ni . . . Hrilhfiahna ‘ṭha zâwk’ kan duh mai thei​—⁠mahse, a awm tlat lo,” tiin a ziak a. Chutiang bawkin, Richard E. Leakey-a leh Roger Lewin-a pawhin: “Mihringte hi thil nung aṭanga tihpalh thil liau liauva lo awm an ni mahna,” tiin an ziak ve bawk. Thil siamte mawi dân leh pian hmang mawi takte ngaisânga fak mawlh mawlhtu mi thiam ṭhenkhatte pawhin Pathian chunga chawimawina thlen nachâng an hre lo.

6. Engin nge mi tam tak chu Siamtu phu ang chawimawina pêk lohtîr?

⁶ Lehkha thiamte’n chanchhâwnna an ṭan laiin a hnâwltute chu mi mâwl angin an dah tlat a ni. Chutianga ṭantute chu mi tam takin engtin nge a chhân lêt ṭhin? Kum engemaw zât kalta khân, chanchhâwnna thu lama mi bengvâr tak pakhat chuan chanchhâwnna ngaih dân pawmtute biangbiakna a nei a. Ani chuan: “Chanchhâwnna ringtu a tam zâwkte chu mi fing zawng zawngin chanchhâwnna an ring tia hrilh an nih avânga ring an ni tih kan hmu chhuak a ni,” a ti. Ni e, Pathian awm ring lotu lehkha thiamte’n an ngaih dân an sawi hian mite chu Siamtu a nih anga Pathianin a phu tâwk chawimawina pe lo tûrin a hmin a ni.​—⁠Thufingte 14:​15, 18.

7. Rom 1:​20-a sawi angin, hmuh theih thil siamte aṭangin eng nge chiang taka kan hmuh theih a, engvângin nge?

⁷ Scientist-te chuan chanchhâwnna hi finfiahna a awm avânga ring an ni em? Ni hauh lo! Siamtu a awm tih finfiahna thilte hian min hual vêl a ni. A chungchâng chu tirhkoh Paula chuan: “Thil hmuh theih loh (a chatuan thiltihtheihna leh a Pathianzia chu) khawvêl [mihringte] siam tirh ata fiah taka hmuhin a awm a, thil siamah chuan a lang a ni; chuvâng chuan [ring lotute chuan] chhuanlam tûr an nei lo,” tiin a ziak a ni. (Rom 1:20) A thil siam aṭangin Siamtu a awm tih chiang takin kan hre thei a. Chuvângin, Paula chuan mihring awm tirh aṭang tawhin, mita hmuh theih thil siamte hmangin mihringte tân Pathian a awm tih fiahna ‘a lang’ a ni a ti. Chu fiahna chu kawiah nge a awm?

8. (a) Engtin nge vânte khian Pathian thiltihtheihna leh finna chu an târ lan? (b) Lei leh vân hian Awmtîr Hmasatu a nei tih engin nge târ lang?

⁸ Vâna arsi pe ûn maite chu Pathian a awm tih finfiahna a ni. Sâm 19:1 chuan “Vânte khian Pathian ropuizia chu a hriattîr a,” a ti. “Vânte”​—⁠ni, thla, leh arsite​—⁠chuan Pathian thiltihtheihna leh finna an lantîr a. Arsi chhiarsên loh te hian mak tihna min neihtîr a ni. Hêng vân lam thil zawng zawngte hi vân boruakah tum nei tak leh a dân ang thlapin an insawn a. * (Isaia 40:26) Chûng chu chhan awm mumal lova lo awm ve mai mai anga ngaih chu a âwm ang em? Chhinchhiah tlâk takin, scientist tam tak chuan lei leh vân chu vawilehkhata awm  ṭan thut niin an sawi a. He ngaih dân pawmnain a kawh chu hrilhfiahin, professor pakhat chuan: “Lei leh vân hi chatuana awm reng anga ngaih chu Pathian a awm lo tih ngaih dân emaw, Pathian a awm leh awm loh chu chhui phak a ni lo tih ngaih dân emaw neitute pawm chi tak a ni a. Chutiang bawkin, bul inṭanna nei lei leh vân chuan awmtîr hmasatu a neih a ngai tlat a ni; chutiang thilthleng chu a titu awm lova a lo thlen theih tuin nge ring thei tehlul ang?” tiin a ziak a ni.

9. Engtin nge thil siam nungchaahte hian Jehova finna chu a lan?

⁹ Leiah pawh hian Pathian a awm tih finfiahnate chu kan hmu a. Fakna hla phuahtu chuan: “Aw LALPA, i thiltihte chu a va tam êm! Finnain i siam vek a ni: leilung hi i hausaknain a khat a nih hi,” tiin a puang chhuak a ni. (Sâm 104:24) Thil siam nungchate pawh tiamin, Jehova “thiltihte” chuan a finna a târ lang a ni. Atira kan hriat tawh angin, thil nungte pian hmang chu a ṭhat êm avângin scientist-te chuan an entawn ṭhîn a ni. Entîrna dang ṭhenkhat hi ngaihtuah rawh. Zir chîk mite chuan lukhum rinawm zâwk siam nân sazuk ki chu an zir a; bengdâr vuah chi ṭha zâwk siam chhuah nân hriat theihna ṭha tak nei tho chanchin chu an zir a; rader khâwl hmanga hmuh theih loh tûr thlawhna siam changkân lehzual nân chhimbuk thlaa a hmulte chu an zir chîk a ni. Entawn tumin eng ang pawhin thawk hah mah se, mihring chuan leilunga thil awm atîra ṭha famkima duante tlukin an siam thei tak tak lo. Biomimicry​—⁠Innovation Inspired by Nature tih lehkhabu sawi hi lo chhinchhiah teh: “Kan tih duh zawng zawng chu thil nungte chuan lei hnuai khâwl chaw (fuel) hmang heh lutuk lo, lei tibawlhhlawh lo, a nih loh leh an nakin hun atâna hlauhawm awmtîr si lovin an lo siam vek tawh a ni,” tih hi. Finna a va ni tak êm!

10. Siamtu Ropui a awm tih hnâwl chu engvângin nge thil âwm lo tak a nih? Entîrna pe rawh.

¹⁰ Vân lamah khian i mit i lên chho emaw, he leia thil siamte i en kual vêl emaw pawh ni se, Siamtu a awm tih chu a chiang a ni. (Jeremia 10:12) Vân lam thil siamte thusawi chu lâwm takin kan pawm ve tûr a ni: “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam . . . si a,” tih chu. (Thu Puan 4:​10, 11) Mahse, scientist tam takte chuan an tisa mita hmuin, thil siamte chu mak ti hlawm hle mah se, ‘an thinlung mitin’ Siamtu a awm tih finfiahna chu an hmuh hmaih a ni. (Ephesi 1:18) Hetiang hian entîrna kan pe thei ang: Thil siam mawi dân leh pian hmangte ngaisâng hle si a, a Siamtu Ropui hnâwl chu lem ziak ṭha tak ngaisâng taka thlîr hnua lem ziaktu a awm tih hnâwl ang tlukin thil inâwm lo tak a ni. Chuvângin, Pathian awm ring lotute chuan ‘chhuanlam tûr rêng an nei lo’ pawh hi a mak lo ve!

‘Hruaitu Mitdelte’ Chuan Mi Tam Tak An Hruaisual

11, 12. Ruat lâwkna thurin chu eng ngaihruatnaa innghat nge ni a, chu thurin chuan Pathian a chawimawi lo tih engin nge târ lang?

¹¹ Sakhaw mi tam tak chuan Pathian an biak dânin amah a chawimawi chu an ring tak zet a. (Rom 10:​2, 3) Amaherawhchu, a tlângpui thuin sakhua chu mi maktaduai tam takte Pathian chawimawi lo tûra dangtu a ni tlat. Chu chu engtin nge a nih theih? Kawng hnih i lo ngaihtuah ang u.

¹² A hmasain, sakhua chuan zirtîrna dik lo hmangin Pathian chawimawina dawn tûr a la pêng a. Engkim ruat lâwk anga zirtîrna chu entîr nân han hmang ta ila. Chu thurin chu Pathianin nakin hun hriat theihna a neih avângin, thil engkim rahchhuah tûr chu a hresa vek ngei ang tih ngaihruatna thil aṭanga lo chhuak a ni. Chuvângin, ruat lâwkna thurin chuan Pathianin mi tinte nakin hun tûr​—⁠a chhia emaw, a ṭha emaw pawh ni se​—⁠hmân ata tawh a ruat lâwk diam tih a kâwk a ni. He ngaih dân ang chuan, tûn lai khawvêla mite hrehawm tawrhna leh suahsualna zawng zawng chunga mawhphurtu chu Pathian a ni tûr a ni. Bible-in “khawvêl lal” tia a koh, a Hmêlma lian ber Setana neih mawhchhiatnate Pathian chunga hmelhbelna chuan Pathian a va chawimawi lo tak êm!​—⁠Johana 14:30; 1 Johana 5:19.

13. Pathianin nakin hun a hriat theihna thunun thei lo tûra ngaih chu engvângin nge a âtthlâk? Hrilhfiah rawh.

¹³ Ruat lâwkna chu Bible thu nêna inkalh  Pathian sawichhiatna zirtîrna a ni a. Chu chuan a tih theih leh a tih tak tak chu a tifiah lo a ni. Bible chuan Pathianin thilthleng tûrte chu a hre lâwk thei tih chiang takin a sawi ngei mai a. (Isaia 46:​9, 10) Amaherawhchu, a nakin hun hriat theihna chu a thunun thei lo emaw, thilthleng tinte atâna mawhphurtu emaw anga ngaih chu a âwm lo a ni. Entîr nân: Chakna nasa tak i nei ta a. Chu chuan thil rit i hmuh apiang chu chawikân a duhtîr che ang em? Teuh lo mai! Chutiang bawkin, nakin hun hriat theihna a neihna chuan Pathian chu thil engkim hre lâwk tûr emaw, ruat lâwk tûr emawin a tur chuang lo. A hriat lâwk theihna chu a duhna lai atân chauh a hmang ṭhîn a ni. * Chiang takin, ruat lâwkna pawh tiamin, zirtîrna dik lote chuan Pathian a chawimawi lo a ni.

14. Eng kawngin nge sakhaw pâwlte chuan Pathian an chawimawi loh?

¹⁴ Sakhaw pâwlte’n Pathian an chawimawi loh dân dang leh chu sakhaw vuantute nungchang hmangin a ni. Kristiante chu Isua zirtîrna zui tûra beisei an ni a. Thil dang tam takte bâkah, Isua chuan a hnûngzuitute chu “inhmangaih” tûr leh ‘khawvêla mi ni lo’ tûrin a zîrtîr a. (Johana 15:12; 17:​14-16) A nih leh Kristianna rama sakhaw hruaitute chungchâng chu eng nge ni? Chûng zirtîrnate chu an zui tak tak em?

15. (a) Hnamte indona chungchângah sakhaw hruaitute chanchin chu eng nge ni? (b) Sakhaw hruaitute chêtzia chuan mi maktaduai têlte chungah eng ngawng nge a neih?

¹⁵ Indona lam panga sakhaw hruaitute chanchin hi han ngaihtuah teh. Anni chuan hnam indona tam tak chu an thlâwpin, an paizam a, hmahruaituahte hial an ṭang a ni. Sipaite mal an sâwm a, tual thahna chu an thiam chawp a. ‘Chûng sakhaw hruaitute chuan a lehlama anmahni sakhua ngei vuantu sakhaw hruaitute chuan an tih ang bawk an ti ang tih an ngaihtuah ngai lo em ni le?’ tih ngaihtuah lo thei kan ni lo. (“Tu Lamah Nge Pathian A Ṭan?” tih bâwm chu en rawh) Sakhaw hruaitute’n thisen chhuaha indonate chu Pathian ṭanpuina dawng anga an sawi hian Pathian an chawimawi lo va; Bible tehnate chu a hmân lai tawh tia mipat hmeichhiatna lama nungchang kawlohna eng pawh an ngaihzamna lah hian Pathian a chawimawi hek lo. Anni chuan Isua’n “thil sual tite” a tihte leh “hruaitu mitdel” tia a koh sakhaw hruaitute chu min va hriat chhuahtîr tak êm! (Matthaia 7:​15-23; 15:14) Sakhaw hruaitute nungchang chuan mi maktaduai têlte Pathian hmangaihna chu a tidai a ni.​—⁠Matthaia 24:12.

Tute’n Nge Pathian Chawimawi Tak Tak?

16. Tute’n nge tûn laiah Pathian chawimawi, tih zawhna chhân nân, engvângin nge Bible kan en ang?

¹⁶ Khawvêla mi hmingthang leh mi challangte’n a tlângpui thua Pathian an chawimawi loh chuan, tute’n nge Pathian chawimawi tak tak? Chu mi chhân nân, Bible kan en a ngai a ni. Pathianin amah chawimawi dân tûr sawi tûrin dikna a nei si a, a tehnate chu a Thu, Bible-ah a ziak a ni. (Isaia 42:⁠8) Pathian chawimawi theih dân kawng thum chu lo en ta ila, chûng kawng  thumte chu tûn laiah tute’n nge Pathian chawimawi, tih zawhna nên a inkûngkaih a ni.

17. Engtin nge Jehova’n a hming chawimawi chu a duhzâwngte zînga thil pawimawh tak a ni tih a târ lan a, tûn laiah tute’n nge khawvêl pum puiah Pathian hming fak?

¹⁷ A hmasa berin, Pathian chu a hming fakna hmangin kan chawimawi thei a. Chutianga tih chu Pathian duhzâwngte zînga thil pawimawh tak a nihzia Isua hnêna Jehova thusawi aṭangin a chiang hle. A thih hma lâwk khân Isua chuan: “Ka pa, i hming chawimawi rawh,” tiin a ṭawngṭai a. Tin, aw chuan: “Ka chawimawi tawh, ka chawimawi leh bawk ang,” tiin a lo chhâng a ni. (Johana 12:28) Rinhlelh rual lohvin, a chhângtu chu amah Jehova ngei hi a ni. A chhânna aṭangin a hming chawimawi chu atân thil pawimawh a ni tih a chiang hle. A nih leh, tûn laiah leilung tluan chhuaka a hming hriattîrna leh fakna hmangin tute’n nge Jehova chu chawimawi? Jehova Thuhretute’n ram 235-ah a hming an chawimawi a ni!​—⁠Sâm 86:​11, 12.

18. ‘Thutaka’ Pathian betute chu engtin nge kan thliar hran theih a, eng pâwlin nge Bible thutak chu kum zabi khat chuang lo zirtîr tawh?

¹⁸ A dawtah chuan, a chungchâng thutak zirtîrna hmangin Pathian kan chawimawi thei a ni. Isua chuan betu dikte chuan ‘Pathian chu tih tak zetin [“thutakin,” NW] chibai an bûk’ ang a ti a. (Johana 4:24) Engtin nge ‘thutaka’ Pathian betute chu kan thliar hran theih ang? Anni chuan Bible-a innghat lo leh Pathian leh a duhzâwng chungchâng dik lo taka târ langtu thurinte chu an hnâwl tûr a ni. A hnuaia thu târ lante tiamin, Pathian Thu thutak thianghlim chu an zirtîr zâwk tûr a ni: Jehova chu Pathian Ropui Ber a ni a; tin, chu dinhmunin a phu chawimawina chu atân chauh a ni (Sâm 83:18); Isua chu Pathian Fapa a ni a, Pathian Massia Lalram tâna Rorêl tûra lal ruat a ni (1 Korinth 15:​27, 28); Pathian Ram chuan Jehova hming a tithianghlimin, lei leh a chunga mihringte tâna a thiltum a tihlawhtling ang (Matthaia 6:​9, 10); He Ram chanchin ṭha hi khawvêl zawng zawngah hrilin a awm ang. (Matthaia 24:14) Kum zabi khat chuang chhûng chu pâwl pakhat chauhvin chutiang thutak hlu tak mai chu rinawm takin a zirtîr a​—⁠chu chu Jehova Thuhretute pâwl a ni!

19, 20. (a) Engvângin nge Kristian chêtze mawi chuan Pathian a chawimawi theih? (b) Tûn laia chhêtze mawi hmanga Pathian chawimawitute hriat nân eng zawhnate hian nge min ṭanpui thei?

¹⁹ A pathumnaah chuan, a tehnate mila nunna hmangin Pathian chu kan chawimawi thei a ni. Tirhkoh Petera chuan: “Jentailte zînga in chêtzia chu mawi tak ni rawh se, chutichuan thil tisualtute anga an sawichhiat che u kawngah chuan in thil tihṭhat an hmuhte avângin fanin an awm hunah chuan Pathian an chawimawi thei ang,” tiin a ziak a ni. (1 Petera 2:12) Kristian nungchang chuan a rinna a târ lang a. Lo thlîrtute’n hetianga an thlunzawm hian, a nih loh leh Kristian nungchang ṭha chu rinna vâng a ni tih an hmuh hian, chu chuan Pathian a chawimawi a ni.

²⁰ Chêtze mawi hmangin tûn laiah tute’n nge Pathian chawimawi? Awle, sawrkâr tam takin an inrem avâng te, chhiah pe a, dân an zawm avângtein eng pâwl nge an fak? (Rom 13:​1, 3, 6, 7) Tute’n nge an rinpuite nêna an inpumkhatna​—⁠chi te, hnam te tih buai loh inpumkhatna⁠—⁠avânga khawvêl zawng zawnga hriat hlawh? (Sâm 133:1; Tirhkohte 10:​34, 35) Eng pâwlin nge dân zahna te, chhûngkaw ngaihhlutna te, leh Bible-a nungchang ṭhate awmtîrtu an Bible zirtîrna hnathawh hmanga  khawvêl puma hriat hlawh? He mi chungchângah leh thil danga an chêtze mawiin a finfiah pâwl chu pakhat chauh a awm a, chu chu Jehova Thuhretute pâwl a ni!

Pathian I Chawimawi Em?

21. Engvângin nge a mi mal taka Pathian kan chawimawi leh chawimawi loh chu kan ngaihtuah ang?

²¹ Kan vai hian, ‘Jehova chu a mi malin ka chawimawi em?’ tih chu kan inzâwt tûr a ni. Sâm 148 sawi angin, thil siam zawng zawng deuh thaw chuan Pathian an chawimawi a. Vântirhkohte, vân lam thilte, lei leh a chunga thil siam nungchate​—⁠hêng zawng zawng hian Jehova an fak a ni. (Châng 1-10) Tûn laia mihring a tam zâwkte’n Pathian an chawimawi lo chu a va lungchhiatthlâk tak êm! Pathian chawimawi nun kawng i ûm hian, Jehova chawimawitu thil siam dang zawng zawngte nên in inrem tihna a ni. (Châng 11-13) Hei aia ṭhaa i nun hman theih dân a awm lo.

22. Jehova i chawimawi hian, eng kawngtein nge malsâwmna i dawn a, eng nge i tum tlat tûr chu?

²² Jehova i chawimawiin, kawng tam takin malsâwmna i dawng a ni. Krista tlanna inthawinaa rinna i lantîr hian, Pathian nên in lo inremin, vâna i Pa nên inlaichînna muanawm leh ṭha tak i nei a ni. (Rom 5:10) Pathian chawimawi chhan tûrte i ngaihtuah hian, i hlim zâwkin, i lâwm lehzual a ni. (Jeremia 31:12) Tichuan, mi dangte chu hlim tak leh tum nei taka nung tûrin i ṭanpui thei a, chuta ṭangin hlimna nasa zâwk i tawng a ni. (Tirhkohte 20:35) Tûn leh chatuan thlenga Pathian chawimawi tum tlattute zînga mi ni ang che! (w04 10/1)

[Footnote-te]

I Hre Chhuak Em?

• Engvângin nge scientist mi thiamte chuan a tlângpui thuin mite chu Pathian chawimawi tûrin an ṭanpui lo kan tih theih?

• Eng kawng chi hnihin nge sakhaw pâwlte chuan mite Pathian chawimawina an dan tlat?

• Eng kawngtein nge Pathian kan chawimawi theih?

• A mi mal takin Jehova i chawimawi leh chawimawi loh chu engvângin nge i ngaihtuah ang?

[Zirlai Atâna Zawhnate]

[Phêk 22-naa bâwm]

“Tu Lamah Nge Pathian A Ṭan?”

Indopui II-na chhûnga German Air Force-a ṭang, a hnua Jehova Thuhretu lo ni ta chuan:

“Indo kumte chhûnga ka rilru tibuai tu ber chu . . . kohhran zawng zawng hruaitute​—⁠Katholic te, Lutheran te, Episcopal te, leh a dang danga hruaitute​—⁠chuan bomb thlâk tûra thlâwk chhuak tûr thlawhna leh a kalhtute mal an sâwm ṭhin hi a ni. ‘Tu lamah nge Pathian a ṭan?’ tih chu ka ngaihtuah ṭhîn.

“German sipaite chuan an kâwnghrên inbahna thîrah Gott mit uns (Pathian chu kan lamah a ṭang) tih thuziak chu an târ a. Mahse, ‘Engvângin nge Pathian chu sakhaw inang leh Pathian thuhmun hnêna ṭawngṭaitu a lehlama sipaite hnênah a awm ve loh vang?’ tih ka ngaihtuah a ni,” a ti.

[Phêk 20-naa milem]

Leilung tluanchhuakah, Jehova Thuhretute chuan Pathian an chawimawi tak zet