Himna Dik Tak Kan Nei Ngai Ang Em?

NAUPANGTE anmahni hmangaihtu an nu leh pate nêna hlim taka an infiam lai chu tuin nge hmu duh lo tehlul ang? Chutiang naupangte chuan anmahni ngaihsaktu nu leh pate bula an awm hian himin an inhre hliah hliah a ni. Mahse, naupang tam takte tân chutiang hlimna hun chu a awm ngai mang lo. Chutih a hnêkin, naupang ṭhenkhat chuan zâna an mutna tûr lungkhamin an awm nî tin a ni. Chutiang in nei lo naupangte leh himna nei lo mi dangte tân beisei tûr engemaw tal a awm em?

Nakin hun chu beisei awm lo hlein lang mah se, Pathian Thu chuan beisei tûr min pe a. Zâwlnei Isaia chuan him taka mi zawng zawng an awm theih hun a lo thleng dâwn tih a sawi lâwk a ni: “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang,” tiin.​—⁠Isaia 65:​21, 22.

Mahse, he beiseina hian nghahchhan ṭha a nei em? Tihah chuan, “beiseina” tih ṭawngkam hian a thleng ngei ngei dâwn tih a hril si lo. Entîr nân, Brazil ramah chuan he ṭawngkam: “A esperança é a última que morre,” tih hi hriat a ni fo va. A awmzia tak chu, “Beiseina hi a thi hnuhnung ber ṭhîn,” tihna a ni. A sawi tum chu mite hian beisei chhan tûr dik tak awm si lovin beisei an nei tlat ṭhîn tihna a ni. Amaherawhchu, Pathian nungin min pêk beiseina chu a danglam bîk a. Tirhkoh Paula chuan: “Tupawh amah [Pathian] ring apiang chu an mualpho [“beidawng,” NW] lo vang,” tiin a ziak a ni. (Rom 10:11) Bible hrilh lâwkna thleng famkim tawhte chuan Pathian Jehova thutiam dangte pawh a lo thleng famkim dâwn tih rinna min pe a. Chûng a thutiamte a tak a lo chan hunah chuan, naupangte kawng laka khawsaktîrtu dinhmunte chu thil hmasate a lo ni tawh ang.

Tûn la laah pawh, Bible-a kan hmuh thurâwn ṭha takte chuan beiseina nei lo mite chu an nun tichangkângin, himna dik tak hmu tûrin a ṭanpui thei a ni. Chu chu engtin nge a nih theih? In tualchhûnga Jehova Thuhretute chuan he zawhna chhânsak che hi an duh hle a ni. (w04 11/1)