Mi Suaksualte Chungah Jehova Rorêlna A Lo Thleng Ang

“I Pathian tâwk tûrin inpeih rawh.”​—AMOSA 4:⁠12.

1, 2. Engvângin nge Pathianin suahsualna a titâwp ang tih kan rin tlat theih?

JEHOVA chuan he leia suahsualna leh hrehawm tawrhnate hi a titâwp ngai ang em? Kum zabi 21-na tîr lamah chuan, he zawhna hi zawhna inâwm tak a ni bîk zual a. Hawina lam apiangah, mi dangte mihring anga cheibâwl lohna hlîr kan hmu a ni ber mai. Tharum thawhna te, fîrfiaka chêtna te, leh ei rûkna te awm lohna khawvêl chu kan va nghâkhlel tak êm!

² Mahse, thu lâwmawm tak chu, Jehova’n suahsualna a titâwp dâwn tih kan ring tlat thei hi a ni a. Pathian mizia hrim hrim chuan suahsualna chungah phuba a la dâwn tih min tiam vâng a ni. Jehova chu a felin, a dik a. Sâm 33:5-ah, a Thu chuan: “Felna leh rorêlna fel hi a ngaina,” tih min hrilh a ni. Tin, fakna hla dang pawhin: “Mi suaksual leh nunrâwnna ngaina erawh chu [Jehova] nunnain a haw ṭhîn,” tih a sawi a ni. (Sâm 11:⁠5) Chiang takin, Jehova, Pathian thil engkimtithei, felna leh dikna ngainatu chuan a thil huatzâwng chu chatuanin a dawh reng lo vang.

3. Amosa hrilh lâwkna zir belhna chuan eng nge a sawi uar ang?

³ Jehova’n suahsualna a tibo dâwn tih rin theihna tûr chhan dang hi han ngaihtuah teh. Hun kal tawha a thil lo tih dân chuan chu chu min tiam a ni. Jehova’n mi suaksualte a dâwr dân entîrna rilru khawih tak chu Bible-a Amosa bu-ah kan hmu thei a. Amosa hrilh lâwkna zir belhna  chuan Pathian rorêlna chungchânga thil pathum min zirtîr dâwn a ni. A hmasa berin, phu rêng vâng a ni ṭhîn a. Pahnihnaah chuan, pumpelh theih a ni lo. A pathumnaah chuan, hrem phute chauh a hrem ṭhîn, Jehova chuan mi suaksualte chu a tiboral a; mahse, duhna rilru dik tak neite leh inlam lêtte chungah ngilneihna a lantîr ṭhin avângin.​—⁠Rom 9:​17-26.

Pathian Rorêlna Chu Phu Rêng Vâng A Ni Ṭhîn

4. Khawiah nge Jehova’n Amosa chu a tirh a, engti tûrin nge a tirh?

⁴ Amosa hun lai chuan, Israel hnam chu lalram pahnihah an inṭhen dêr tawh a. Pakhat chu chhim lam hnam hnih Juda lalram a ni a. A dang leh chu hmâr lam hnam sâwm Israel lalram a ni. Jehova chuan Amosa chu a khua Juda aṭanga tîr chhuakin, Israel rama Pathian rorêlna thu puang tûrin thu a pe a. Chutah chuan Amosa chu Pathianin a rorêlna thu puang tûrin a hmang dâwn a ni.

5. Eng hnamte chungchâng nge Amosa’n a puan chhuah hmasak a, rorêl an phu chhan pakhat chu nge nge ni?

⁵ Amosa chuan hmâr lam lalram chunga Jehova rorêlna chu a puang hmasa lo va. Israel chhehvêl hnam parukte chunga rorêlna lo thleng tûr chungchâng a puang chhuak hmasa zâwk a. Chûng hnamte chu Suria te, Philistia te, Tura te, Edom te, Amon te, leh Moab hnamte a ni. Mahse, chûng hnamte chuan Pathian thiam loh chantîr rorêlna chu an phu em? Phu chiang e! A chhan pakhat chu, Pathian mite hmêlma hlun an nih vâng a ni.

6. Engvângin nge Pathianin Suria te, Philistia te, leh Tura te chungah chhiatna thlentîr a tum?

⁶ Entîr nân, Suria mite chuan “Gilead ram chu buh râwtna thîrte chuan an râwt avângin,” Jehova’n a dem a. (Amosa 1:⁠3) Suria mite chuan Gilead​—⁠Jordan Lui chhak lam Israel ram​—⁠chu an lâksak a, chuta Pathian mite chu na takin an sawisa bawk a ni. A nih leh, Philistia mite leh Tura mite’n eng sual nge an tih ve? Philistia hnam chuan Israel mite an hnawt chhuak, a nih loh leh salah an hruai a, Edom-ho kutah an hralh a, Israel ṭhenkhat chu Tura mite salah an awm a ni. (Amosa 1:​6, 9) Han ngaihtuah teh​—⁠Jehova mite sala han hralh tâk mai chu! Chuvângin, Jehova’n Suria te, Philistia te, leh Tura te chunga chhiatna a puang chu a mak lo a ni.

7. Edom te, Amon te, leh Moab hnamte chuan Israelte nêna inkûngkaihna eng nge an neih a; mahse, engtin nge Israelte chu an cheibâwl?

⁷ Edom te, Amon te, leh Moab hnamte chuan Israel leh an zîngah inanna engemaw tak an nei vek a. An vai chuan Israelte nên an inchhûng vek a ni. Edom-ho chu Jakoba phirpui Esauva kal tlanga Abrahama thlahte an ni a. Chuvângin, Israel nên unau an ni. Amon-hote leh Moab-hote chu Abrahama tupa Lota thlahte an ni bawk. Mahse, Edom te, Amon te, leh Moab te chuan an chhûng khat Israelte chu unau angin an cheibâwl em? Cheibâwl lo rêng rêng! Edom chuan “a unau” chungah zah ngai hauh lovin khandaih a lek a, Amon-ho chu Israel saltângte chungah an nunrâwng zual a ni. (Amosa 1:​11, 13) Amosa chuan Moab-hovin Pathian mite an tihretheih chungchâng sawi chiah lo mah se, Moab-ho chuan hun rei tak chhûng Israel chu an lo dodâl tawh a ni. Chûng inchhûng khat hnam pathumte hremna chu a nasa hle ang. Jehova chuan an chungah boralna râpthlâk tak a thlentîr ang.

Pathian Rorêlna Chu Pumpelh Rual A Ni Lo

8. Engvângin nge Israel ram bula hnam rukte chunga Pathian rorêlna chu pumpelh theih rual a nih loh?

⁸ Chiang takin, Amosa hrilh lâwkna tîr lama sawi Israel hual vêltu hnam parukte chuan Pathian rorêlna chu an phu hliah hliah a ni. Chu bâkah, an tân pumpelhna kawng a awm thei lo. Amosa bung 1 châng 3-na aṭangin bung 2 châng 1-na thlengin Jehova chuan: “A hremna chu ka tireh lo vang,” tiin vawi ruk lai a sawi a. A sawi ang ngeiin, an chunga hremna chu a thlentîr ngei a ni. Chûng hnam tinte chuan a hnua chhiatna an tawhzia chu thilthleng chanchinin a târ lang a. An zînga a lo berah hnam pali​—⁠Philistia te, Moab te, Amon te, leh Edom te​—⁠phei chu a mihring hmuh tûr pawh an awm tawh lo!

9. Juda mite chuan eng nge an phu a, engvângin nge?

⁹ Zâwlnei Amosa chuan a hnam pasarihna​—⁠ama in leh lo awmna Judai ram ngei chanchin chu a sawi ve leh thung a. Hmâr lam lalrama Amosa thu ngaithlatute chuan, Juda lalram  chunga rorêlna thu a puan chhuah chu mak an ti mai thei. Engvângin nge Juda mi leh sate chuan rorêlna râpthlâk tak chu tawn an phu? Amosa 2:4 chuan “LALPA dân chu an hnar” vâng niin a sawi. Jehova chuan duh rêng vânga a Dân ngaihthahna chu a ngawihpui mai mai lo. Amosa 2:5-in a sawi angin, heti hian a hrilh lâwk a ni: “Juda chungah mei ka tîr ang a, Jerusalem khaw lal inte chu a kâng zo vang,” tiin.

10. Engvângin nge Juda chuan chungpikna a pumpelh theih loh?

¹⁰ Juda mi rinawm lote chuan chungpikna lo thleng tûr chu an pumpelh thei lo. Jehova chuan: “Hremna chu ka tireh lo vang,” tiin a vawi sarihna atân a sawi si a. (Amos 2:⁠4) Juda chuan B.C.E. 607-a Babulon hovin an ram an tihchhiat khân, a hremna tawrh tûr hrilh lâwk chu a tuar a ni. Hetah pawh hian, mi suaksualte tân Pathian rorêlna chu pumpelh theih a ni lo tih kan hmu leh a ni.

11-13. Amosa hrilh lâwkna chu eng hnam tân nge a nih deuh ber a, chutah chuan eng ang inhnehchhiahna nge awm?

¹¹ Zâwlnei Amosa chuan hnam pasarihte chunga Jehova rorêlna chu a puang zo chiah a. Mahse, a thu hrilh lâwkna a zo tawh nia ngai apiang chuan an ngai sual hle a ni. Amosa chuan a la zo teuh mai si lo va! Ani chu hmâr lam hnam sâwm Israel lalram chunga rorêlna thu puang tûra tirh a ni ber a. Tin, nungchang lam leh sakhaw lama a tlâk chhiat êm vângin, Israel chuan chutiang Pathian rorêlna chu a phu a ni.

¹² Amosa hrilh lâwkna chuan Israel lalrama hluar tak inhnehchhiahna chu a hai lang a. Chu mi chungchâng chu, Amosa 2:​6, 7-ah: “Israel bawhchhiatna pathum avângin, a ni, pali avângin, a hremna chu ka tireh lo vang; tangkaruaa mi fel an hralh avâng leh pheikhawk bun khata mi tlachham an hralh avângin: mi retheite lu chunga vaivut tak ngial pawh an ît a, pachhiate an rûksak a,” tiin kan chhiar a ni.

¹³ Mi felte chu “tangkarua” mai maia hralh an ni a, chu mi awmzia chu rorêltute chuan anmahni thamna tangkaruate an dawn avângin, mi felte chu thiam loh an chantîr ṭhîn tihna a nih a rinawm hle. Sum pûktîrtute lah chuan, mi retheite chu “pheikhawk bun khat” lekin salah an hralh bawk a, an sum bat tlêm tham tak atân a nih a rinawm bawk. Manganna, lungngaihna, a nih loh leh mualphona târ langtu atâna ‘mi retheiten’ an lu chunga vaivut an phul pawh an “ît,” a nih loh leh an châk ngawih ngawih a ni. Eirûkna lah a hluar êm avângin, “pachhiate” chuan rorêl dikna hmuh inbeiseina rêng an nei thei lo a ni.

14. Hnam sâwm Israel lalrama tute’n nge ṭha lo taka cheibâwlna tuar?

¹⁴ Tute nge hnehchhiahna tuarte tih hi chhinchhiah rawh. Anni chu mi felte, tlachhamte, retheite, leh pachhiate an ni. Israel mite nêna Jehova Dân thuthlung chuan mi chak lo leh ṭanpui ngaite chunga khawngaihna lantîr chu a phût a. Mahse, hnam sâwm Israel lalrama chutiang mite dinhmun chu a chhe hle a ni.

“I Pathian Tâwk Tûrin Inpeih Rawh”

15, 16. (a) Engvângin nge Israelte chu: “I Pathian tâwk tûrin inpeih rawh,” tia vaukhân an nih? (b) Engtin nge Amosa 9:​1, 2 chuan mi suaksualte’n Pathian rorêlna an pumpelh thei lo tih a târ lan? (c) B.C.E. 740-ah Israel hnam sâwm lalram chungah eng thil nge thleng?

¹⁵ Israel ramah chuan nungchang bawlhhlawhna leh thil sual dangte a hluar êm avângin, chhan ṭha tak neiin zâwlnei Amosa chuan hel hrât hnam chu: “I Pathian tâwk tûrin inpeih rawh,” tiin a vaukhân a ni. (Amosa 4:12) Jehova chuan a vawi riatna atân: “A hremna chu ka tireh lo vang,” tia a puan avângin, Israel mi rinawm lote chuan Pathian rorêlna lo thleng tûr chu an pumpelh thei lo vang. (Amosa 2:⁠6) Mi sual bihrûk tumte chungchângah, Pathian chuan: “Pakhat mah an tlân bo lo vang a, pakhat mahin an pumpelh hek lo vang a. Mitthi khaw thlengin lai tlang mah sela, chuta ta chu ka kutin ka la chhuak ang a; vânah lâwn mah sela chuta ta chu ka hnûk thla ang,” a ti.​—⁠Amosa 9:​1, 2.

¹⁶ Mi suaksualte chuan “mitthi khaw thlengin lai tlang” mah se, Jehova chu an pumpelh thei chuang lo; chu chu lei chhûngril berah bihrûk tum mahse an hlawhtling dâwn lo tihna a ni. Tin, “vânah lâwn mah sela” Pathian rorêlna chu an pumpelh thei hek lo; vâna lâwn tih hian tlâng sâng tak taka inhumhim tumna a kâwk a ni. Jehova vaukhânna chu a chiang hle: A ban phâk loh bihrûkna hmun rêng a awm lo tih chu. Dikna lama Pathian tehna chuan, hmâr lam lalram chu a thil suaksual tihte mawhphurhtîr a ngiat tlat a.  Chu hun chu a lo thleng ta rêng a ni. Amosa’n a hrilh lâwkna thu a chhinchhiah hnu kum 60 vêl, B.C.E. 740-ah chuan, hmâr lam Israel lalram chu Assuria-in an hneh ta a ni.

Pathian Rorêlna Chuan Hrem Phute Chauh A Hrem Ṭhîn

17, 18. Amosa bung 9-nain Pathian zahngaihna chungchâng eng nge a sawi?

¹⁷ Pathian rorêlna chu a phute chungah a tla a, pumpelh theih rual a ni lo tih kan hmu ta a. Mahse, Amosa lehkhabu chuan Jehova rorêlna chuan hrem phute chauh a hrem ṭhîn tih a târ lang bawk. Pathian chuan mi suaksualte chu an bihrûkna hmun apiangah a hmu chhuak thei a. Chutiang a nih chuan zahngaihna phute pawh a hmu chhuak thei êm êm dâwn a ni. He mi chungchâng hi, Amosa bung tâwpnaah mak taka târ lan a ni.

¹⁸ Amosa bung 9, châng 8-nain a sawi angin, Jehova chuan: “Jakoba chhûngte chu ka tihche vek lo vang,” a ti a. Châng 13 aṭanga 15 sawi dânin, Jehova chuan a mite chu ‘sal ata a hruai kîr leh’ dâwn tih a tiam a ni. Chûng mite chungah chuan zahngaihna lantîr a ni ang a, himna leh hmuingîlna an chên ang. Jehova chuan: “Lei lettu chuan buh âttu . . . chu a ûm phâk ang,” tih a tiam a. Han ngaihtuah teh​—⁠buh seng tûr a tam dâwn êm avângin, an seng zawh hmain lei leh hun leh chi theh leh hun a lo thleng dâwn a nih chu!

19. Israel leh Juda la bângte chungah eng thil nge thleng?

¹⁹ Juda ram leh Israel rama Jehova rorêlna chu hrem phute chauh hremin, inchhîrte leh duhna tak tak neite chungah zahngaihna lantîr a ni tih a sawi theih a ni. He siamṭhat lehna thutiam thlen famkim nân, Israel leh Juda mi a la bâng inchhîrte chu B.C.E. 537 khân, an sal tânna ata chhuah an ni ta a. An in leh lo an ngainat êm êm hmunah chuan, biakna thianghlim chu an dinthar leh ta a ni. Tin, an inte pawh an sa ṭha leh a, grêp huante leh huan dangte pawh ngaihngam takin an siam leh a ni.

Jehova Rorêlna Râpthlâk Tak A Lo Thleng Dâwn!

20. Amosa puanchhuah Pathian rorêlna thu kan zirna hian, eng nge min rintîr ang?

²⁰ Amosa’n Pathian rorêlna thuchah a puanchhuah kan zirna hian, kan hun laia suahsualna pawh Jehova’n a tâwptîr ngei dâwn tih min rintîr tûr a ni. Engvângin nge kan rin theih? A hmasain, tûn hmaa Jehova’n mi suaksualte a dâwr dân entîrnate hian kan huna a chêt lâk dân tûr a târ lang a. A pahnihnaah, kal pêng Israel lalram chunga Pathian rorêlna chuan, Pathianin “Babulon Khaw Ropui,” khawvêl sakhaw dik lo lalram zînga a challang pâwl, Kristianna ram a tichhe vek dâwn tih a nemnghet a ni.​—⁠Thu Puan 18:⁠2.

21. Engvângin nge Kristianna ram chuan Pathian rorêlna a phu?

²¹ Kristianna ram hian Pathian rorêlna a phu tak zet tih rinhlelh rual a ni lo. A chhûnga sakhuana leh nungchang lam dinhmun chhe tak hian a phu tih a târ lang chiang hle. Kristianna ram​—⁠leh Setana khawvêl dang​—⁠chuan Jehova rorêlna chu a phu a. Chu chu pumpelh theih rual a ni lo bawk, rorêl hun a lo thlen chuan, Amosa bung 9, châng 1 thu: “Pakhat mah an tlân bo lo vang a, pakhat mahin an pumpelh hek lo vang,” tih chu a thleng famkim dâwn si a. Ni e, mi suaksualte chu khawi hmunah pawh bîru mah sela, Jehova chuan a hmu chhuak tho tho dâwn a ni.

22. 2 Thessalonika 1:​6-8 hian Pathian rorêlna chungchâng eng nge a tih chian?

²² Pathian rorêlna chuan phu rêng vâng, pumpelh theih loh, leh hrem phute chauh a hrem ṭhîn a ni. Chu chu tirhkoh Paula thu aṭangin a hmuh theih a ni: “Pathian hre lo mi leh kan lalpa Isua chanchin ṭha âwih lo mite chunga phuba lain a vântirhkoh chak takte nên, meialh zînga vân aṭanga inlâr hunah a tihrehawmtute che u chu hrehawmna thungrulh leh nangni hrehawm tuartute hi keimahni nêna chawlhnaa rulh thung chu Pathian tân thil fel tak a ni si a,” tihah hian. (2 Thessalonika 1:​6-8) A hriak thihte tihrehawmtu, a phute chunga rorêl chu “Pathian tân thil fel tak a ni.” Chu rorêlna chu pumpelh theih loh, ‘Isua a vântirhkoh chak takte nên, meialh zînga a inlâr hunah’ chuan mi suaksualte chu an dam khawchhuak lo vang. Isua’n ‘Pathian hre lo mi leh chanchin ṭha âwih lo mite chunga’ phuba a lâk dâwn avângin, Pathian rorêlnain hrem phute chauh a hrem bawk ang. Tin, Pathian rorêlna chuan hrehawm tuar Pathian ngaihsaktute tân thlamuanna a thlen ang.

 Mi Felte Tâna Beiseina

23. Eng beiseina leh thlamuanna nge Amosa bu-ah kan hmuh theih?

²³ Amosa hrilh lâwknaah hian beiseina chanchin ropui tak leh duhna rilru dik tak neite tân thlamuanna a tel a ni. Amosa buin a sawi lâwk angin, Jehova chuan hmân laia a mite chu an vaiin a tiboral vek lo va. A tâwpah chuan, Israel sal tângte chu a hruaikhâwm leh a, anmahni in leh lo ngeiah a hruai kîr leh a, remna leh hmuingîlna nasa tak a pe a ni. Chu chuan kan tân eng awmzia nge a neih? Pathian rorêl chhûngin, Jehova’n mi suaksualte chu an bihrûkna hmun apiangah a hmu chhuak ang a, a zahngaihna phûte pawh he khawvêl khawi laia awm pawh ni se a hmu chhuak thei ang tih min rintîr tlat a ni.

24. Eng kawngin nge tûn laia Jehvoa chhiahhlawhte chu malsâwm an nih?

²⁴ Mi sualte chunga Jehova rorêlna lo thlen hun kan nghah chhûng hian, a chhiahhlawh rinawmte angin eng thil nge kan tawn? Jehova chuan thlarau lama hmuingîlna nasa tak min pe a ni! Kristianna ram zirtîrna dik lo avânga lo awm, dâwt thu leh thu veiherh ang chite laka fihlîm biakna chu kan nei a. Jehova chuan thlarau lam chaw hninghnâr tak min pe bawk a ni. Mahse, hêng Jehova malsâwmna nasa takte rual hian, mawhphurhna lian tak kan nei bawk tih hi hre reng rawh. Pathian chuan rorêlna lo thleng tûr chu mi dangte hriattîr tûrin min beisei a. “Duhna rilru dik tak nei” apiang zawng chhuak tûrin, kan tih theih apiang tih chu kan duh a ni. (Tirhkohte 13:​48, NW) Ni e, tûna thlarau lam chaw hnianghnâr takte hlâwkpui ve tûra mi a tam thei ang ber ṭanpui chu kan duh a. Tin, mi suaksualte chunga Pathian rorêlna lo thleng tûr laka an dam khawchhuah chu kan duh a ni. Hêng malsâwmnate chên tûr chuan, thinlung dik kan put a ngai ngei mai a. A dawta thuziaka kan hmuh tûr angin, chu pawh chu Amosa hrilh lâwknaah târ lan a ni. (w04 11/15)

Engtin Nge I Chhân Ang?

• Engtin nge Amosa hrilh lâwkna chuan Pathian rorêlna chu phu rêng vâng a ni tih a târ lan?

• Amosa’n Pathian rorêlna chu pumpelh theih rual a ni lo tih finfiahna eng nge a pêk?

• Engtin nge Amosa bu hian Pathian rorêlna chuan hrem phute chuah a hrem ṭhîn tih a lantîr?

[Zirlai Atâna Zawhnate]