Pêkna Aṭanga Lo Awm Hlimna Chu I Hria Em?

KRISTIAN rinawm unaunu pakhat chuan kum 50 dâwn lai rawngbâwlnaah a hun a hmang tawh a. A tar avângin chau tawh hle mah se, Kingdom Hall sak thar hlim va tlawh chu a tum tlat a ni. Kristian unaupa rinchhan chungin, hall chhûngah zawi têin a tum lam​—⁠thawhlâwm bâwm awmna lam​—⁠chu ding taka panin a lo lût a. Chutah, he mi atâna a lo khâwl pawisa tlêm azâwng chu a thlâk a ni. Hall saknaah tha leh zung sêngin tel thei lo mah se, ṭanpuina pêk chu a duh tlat a ni.

He Kristian hmeichhia hian hmeichhe rinawm dang​—⁠Isua’n biak in thawhlâwm bâwma dar tangka dere pahnih a thlâk lai a lo thlîr reng “hmeithai rethei tê” chu a hriatchhuahtîr mai thei che a. A dinhmun chiah chu hriattîr kan ni lo nâ a, chûng hun laia hmeithai chuan sum leh pai lamah harsatna namên lo a tâwk ngei ang. Isua’n a dinhmun a hriat avângin a khawngaih ngei bawk ang. Ani chu a zirtîrte entawn tûra târ chhuakin, a thilpêk têtham tak chu “a neih chhun tak, a intunnunna tûr zawng zawng” a nih thu a sawi hial a ni.​—⁠Marka 12:​41-44.

Engvângin nge he hmeithai rethei tak hian chutianga thawhlâwm a thawh le? Jerusalema a biakna hmunpui dintu Pathian Jehova hnênah a inpêk tak zet vâng a ni tih a chiang hle. A tih theih chu beitham hle mah se, rawngbâwlna thianghlim thlâwp chu a duh a ni. Tin, a theih ang tâwk a thawh theih avângin hlimna dik tak a tawng ngei ang.

Jehova Hna Ṭanpui Tûra Pêkna

Thil neih leh sum leh pai lama thawhlâwm thawh chu biakna dik pêng pawimawh tak a ni a, chu chu hlimna bulpui a ni ṭhîn bawk. (1 Chronicles 29:⁠9) Hmân lai Israel ramah chuan thawhlâwmte chu biak in sak ṭhat nân mai ni lo, chuta Jehova biak nâna nî tin thiltih atân pawh hman a ni. Dân thu chuan Israel fate hnênah an thlai thar sâwma pakhat chu Levia chite tâna thawh tûrin a phût a. Mahse, Levia chite pawhin an thil dawn sâwma pakhat chu Jehova hnênah an pe leh chhâwng tûr a ni.​—⁠Number 18:​21-29.

Kristiante chu Dân thupêk hnuai ata zalên tawh mah se, biakna dik thlâwp nâna thawhlâwm thawhna thu bul chu a la ngai reng a. (Galatia 5:⁠1) Chu bâkah, kum zabi khatnaa Kristiante chuan an unaute mamawh phuhrûk nâna thawhlâwm thawh chu hlimnaah  an ruat a ni. (Tirhkohte 2:​45, 46) Tirhkoh Paula chuan Kristiante chu Pathianin thil ṭhaa a vûr nghek angin, mi dangte chungah an thil phal ve tûr a ni tih a hriattîr a. Heti hian a ziak a ni: “He mi khawvêla hausate hi chapo lo tûr leh sum rinawm lovah hian an beiseina nghat lova, thil zawng zawng lâwmna tûra tam taka min petu Pathian chungah chuan nghat zâwk tûrin zilh rawh; thil ṭha ti tûrin, thil ṭha tih ngah tûrin, thil phala thawhlâwm peih tûrin, nunna, nunna taktak chu an vawn theih nân, hun lo thleng tûr atân chuan lungphûm ṭha tak an tâna khâwl khâwm tûrin fuih rawh,” tiin. (1 Timothea 6:​17-19; 2 Korinth 9:11) Ama thiltawn aṭang ngeiin, Paula chuan Isua thusawi: “Englo lâk aiin pêkin lukhâwng a nei zâwk,” tih a dikzia a nemnghet thei a ni.​—⁠Tirhkohte 20:⁠35.

Tûn Laia Kristian Thilpêk

Tûn laia Jehova chhiahhlawhte chuan an thil neihte chu inṭanpui tawn nân leh Pathian hna thawh nân an hmang zêl a. Rethei tak takte pawhin an theih ang tâwk tâwk chu an thawh ve ṭhîn a ni. “Bawi rinawm, fing tak” chuan chûng thawhlâwm zawng zawng chu a ṭangkai thei ang bera hmang tûra mawhphurhna nei niin a inhria a. (Matthaia 24:45) Chûng pawisate chu branch office-te enkawl nân te, Bible leh Bible ṭanchhan thu leh hla chhuahte lehlin nân leh chhut chhuah nân te, Kristian inkhâwmpui huaihawt nân te, bial kantute leh missionary-te zirtîra thawn chhuah nân te, vânduaina tâwkte ṭanpui nân te, leh thil mamawh dang dangte atân pawha hman a ni. Chutiang thiltumte zînga pakhat hi lo thlûr bing ta ila​—⁠chu chu inkhâwmna tûr in sak nâna ṭanpuina a ni.

Jehova Thuhretute chu an Kingdom Hall-ah thlarau lam zirtîrna leh inkawmna ṭha neih nân chawlhkâr khat chhûngin vawi engemaw zât an inhmukhâwm ṭhîn a. Amaherawhchu, ram tam takah chuan tualchhûng Thuhretute an retheih avângin ṭanpuina an dawn loh chuan anmahni pualin Kingdom Hall an sa thei lo va. Chuvângin, kum 1999 khân Jehova Thuhretute chuan ram hausa zâwk aṭanga thawhlâwmte chu ram rethei zâwka Kingdom Hall sak nân an hmang ṭan a. Chu bâkah, mi a sâng têl mahnia inpete chuan an hun leh an thiamnate chu thawhin, chûng ram retheia thingtlâng ramahte chuan Kingdom Hall an sa a ni. Chutianga an sak chhûng chuan, tualchhûng Thuhretute chuan in sak dân leh enkawl  zui dân an thiam phah a; tin, Kingdom Hall Thawhlâwm chuan hmanrua leh bungraw mamawhte an lei theih phah a ni. Tûna hêng hall tharte hmangtu Thuhretute chuan an rinpuite’n sum leh pai leh an hun an hman avângin an chungah an lâwm hle a. Tualchhûnga Thuhretute pawhin thla tinin Kingdom Hall thar enkawl zui nân leh a sak man phuhrûk nân thawhlâwm an thawh ve leh a, chutiang chuan Kingdom Hall tam lehzual sakna chu an ṭanpui a ni.

Kingdom Hall-te chu tualchhûng in sak dân leh bungruate hmanga sak a ni a. Hêng hall-te hi ropui tak tak ni lo mah se, a duhawmin, a hman tlâk a, a hman a nuam hle bawk a ni. Kum 1999-a Kingdom Hall sakna program ṭan a nih chuan, ram rethei 40 vêl an tel a. Chuta ṭang chuan, chu in sakna program chu ram 116-ah neih a lo ni chho va, khawvêla Jehova Thuhretute kohhran awm zât chanve chuang an tel ta a ni. Kum nga liam ta chhûng khân he ruahmanna hnuaiah hian Kingdom Hall 9,000 chuang sak zawh a ni a, chawhrualin ni khatah hall 5 aia tam sak zawh a ni tihna a nih chu! Chutichung chuan, hêng ram 116-ah hian, Kingdom Hall 14,500 lai mamawh a la ni cheu va. Jehova malsâwmna leh khawvêl puma Thuhretute inhuamna leh thilphalna zârah, Kingdom Hall thawhlâwm chuan hêng mamawhte hi a phuhrûk theih beisei tlat a ni.​—⁠Sâm 127:⁠1.

Kingdom Hall-te Chuan Punna A Awmtîr

He ṭan lâkna nasa tak hian tualchhûng Thuhretute leh an Lalram thu hrilh rawngbâwlna chungah eng nghawng nge a neih? Hmun tam takah chuan, Kingdom Hall sak zawh hnuah inkhâwm an pung nasa êm êm a. Entîrna pakhat chu Burundi ram aṭanga dawn he thu hi a ni: “Kingdom Hall sak zawh a nih ve leh kan khat nghâl a. Entîr nân, Kingdom Hall pakhat chu chawhruala mi 100 vêl inkhâwm ṭhinna kohhran atâna sak a ni a. An Kingdom Hall tharah chuan nuamsa takin mi 150 vêl chu a ṭhut theih a ni. Mahse, sak zawh a nih meuh chuan, mi 250 an inkhâwm ta a ni.”

Engvângin nge chutianga an pun le? Thil pakhatah chuan, inkhâwmna hmun mumal nei lo, thing hnuai emaw, ram hnuai emawa inkhâwm ṭhîn Lalram thuchhuahtute chuan rinhlelh kai châng an nei thei a. Ram pakhatah chuan, hnam leh hnam chunga  tharum thawhna chu chutiang sakhaw tênaute aṭanga inṭan nia sawi a ni a, chuvângin dân chuan sakhaw thil avânga inhmuh khâwmna chu in chhûnga neih a phût a ni.

Mahnia hall neihna chuan pastor pakhat hnungzuitu an nih lohzia tualchhûng mite hnêna târ lang tûrin Jehova Thuhretute chu a ṭanpui bawk a ni. Zimbabwe rama Jehova Thuhretute branch office chuan heti hian a ziak a: “Tûn hma chuan, hêng hmuna unaute chu mi mal inahte an inkhâwm ṭhîn a, chuvângin tualchhûnga mite chuan kohhran chu an inhmuhkhâwmna in neitu hming nên an hmeh bel ṭhîn a ni. Unaute chu Pu Chu-mi-kha-mia pâwla awm anga sawi an ni ṭhîn. Tûnah chuan hall tinah ‘Jehova Thuhretute Kingdom Hall’ tih lehkha in târ an hmuh avângin, chûng zawng zawng chu a inthlâk tawh a ni,” tiin.

Hlim Taka Petute

“Pathian chuan hlim taka petu a ni a hmangaih ni,” tiin tirhkoh Paula chuan a ziak a. (2 Korinth 9:⁠7) Thawhlâwm tam thamte chu a ṭangkai ngei mai a. Mahse, Jehova Thuhretute rawngbâwlna atâna thawhlâwm a tam  zâwk chu Kingdom Hall-a thawhlâwm bâwmte aṭanga lo kal a ni. A tam emaw, a tlêm emaw pawh ni se, thawhlâwm zawng zawng chu a pawimawh a, hmuh hmaihin a awm ngai lo. Isua’n hmeithai rethei tê thawhlâwm dar tangka dere pahnih kha a hmu tih hre chhuak la. Vântirhkohte leh Jehova pawhin an lo hmu ve a ni. Chu hmeithai chu a hming takngial pawh kan hre lo va, mahse Jehova chuan a thiltih chu chatuan atân Bible-ah a chhinchhiahtîr a ni.

Kingdom Hall sakna bâkah, kan thawhlâwmte chuan Lalram rawngbâwlna pawimawh tak chi hrang hrangte a ṭanpui bawk. Hetiang kawnga thawhhona chuan hlim chhan tûr min pe a; tin, “Pathian hnêna lâwmthu sawina tam taka . . . luang liam” chhan tûr min pe bawk. (2 Korinth 9:12) Benin rama kan Kristian unaute chuan: “Khawvêl pum puia kan unaute hnên aṭanga sum leh paia ṭanpuina kan dawnte avângin, nî tin Jehova hnênah lâwmthu sawina tam tak a chho ṭhîn,” an ti. Chutih rual chuan, keini Lalram hna sum leh paia ṭanpuitute chuan Kristian thil pêkna aṭanga lo awm hlimna chu kan tawng thung a ni! (w04 11/1)

[Phêk 6, 7-naa bâwm/milem]

Ṭhenkhatin An Thlan Pêk Chhuah Dân Kawngte

KHAWVEL PUM HUAP RAWNGBAWLNA THAWHLAWM

Tam tak chuan, “Khawvêl Pum Huap Rawngbâwlna Atâna Thawhlâwm​—⁠Matthaia 24:14.” tih inziak thawhlâwm bâwma an thawh tûr chu an dah hrang, a nih loh leh an bituk a ni.

Thla tinin, kohhrante chuan chûng thawhlâwmte chu an ram chhûng Jehova Thuhretute office-ah an thawn ṭhîn a. Phal taka pêk pawisate chu hêng office-ah te hian thawn tlang nghâl theih a ni bawk. Branch office address-te chu he magazine phêk 2-naah hian hmuh theih a ni. Cheque hmanga pêk a nih chuan a dawngtu tûr hming ziahnaah “Watch Tower” tih ziah tûr a ni. Rangkachak leh lunghlute emaw, thil hlu dangte emaw pawh thawh theih a ni a. Hetiang chi thawhlâwmte hi, thilthlâwnpêk liau liau a nih thu ziakna lehkha nêna thawn tel ngei ngei tûr a ni.

CONDITIONAL-DONATION TRUST RUAHMANNA

Pawisa chu Watch Tower hman atân kawltîr theih a ni a. Mahse, an dîl hunah pêkkîr leh a ni ang. Hriat belh i duh chuan tualchhûng branch office bia ang che.

PEK DAN TUR RUAHMANNA SIAM

Khawvêl pum huap Lalram rawngbâwlna atân pawisa fai pêk theih a nih bâkah, pêk dân dang pawh a awm a. Chûng zîngah chuan hêngte hi a tel a ni:

Zângna Dawmna: Watch Tower chu vânduai palh thila zângna dawmna dawngtu tûr atân emaw, hna bânsan hun/pension huna pawisa dawngtu tûr atân emaw a dah theih a ni.

Bank-a Pawisa Dah: Bank-a pawisa dahte, pawisa dah luhna lehkhate, a nih loh leh hnathawh bânsan huna pawisa lâk tûrte chu Watch Tower kawltîr emaw, thih huna pêk atân emawin tualchhûng bank kalhmang milin a dah theih a ni.

Stock leh Bond-te: Stock leh bond-te chu Watch Tower hnêna thil pêk liau liauvin a pêk theih.

In Hmun Lo Ram: In hmun lo ramte chu thil pêk liau liauva pêk theih a ni a, chênchilhna in a nih chuan, a petu dam chhûng awm chhun zawm theihna hauh chungin a pêk theih a ni. In hmun lo ram chungchânga inhlan chhâwnna engmah neih hmain branch office râwn hmasa ang che.

Gift Annuity: Gift annuity tih chu miin pawisa emaw, dahkham thil emaw chu Watchtower corporation tâna dah tûra ruahmanna a siam hi a ni a. Tichuan, a petu, a nih loh leh a petuin a ruat tuemaw chuan a dam chhûng zawngin kum tin an inremsiamna zât pawisa chu a dawng ziah dâwn a ni. Gift annuity a siam kum chuan, a petu tân income-tax tihhniamsak a ni ṭhîn.

Thuro Chhiah leh Pawisa Inkawltîr: In hmun lo ram emaw, pawisa emaw chu dân ang thlapa siam thuro chhiah hmangin Watch Tower a hlan chhâwn theih a, a nih loh leh pawisa inkawltîrna thuthlung siama a hlâwkna têl tûrin Watch Tower hming a pêk theih a ni. Ram ṭhenkhatah chuan, sakhaw pâwlin a hlâwkna a têl tûr pawisa inkawltîrna chuan chhiah chawi lamah ṭangkaina eng engemaw a nei a, India ramah chuan chutiang chu a ni ve lo.

A hming, “pêk dân tûr ruahmanna siam” tihin a sih hmuh angin, hetiang zâwnga thilpêk pe tûrin a petu lamah ruahmanna ṭhenkhat siam a ngai a. Hêng pêk dân tûr ruahmanna zînga a engemaw ber hmanga Jehova Thuhretute khawvêl pum huap rawngbâwlna ṭawiâwm duhte ṭanpui nân, brochure pakhat, Charitable Planing to Benefit Kingdom Service Worldwide, tih chu Sâpṭawng leh Spanish ṭawnga buatsaih a ni. Chu brochure chu tûn la la leh thih huna rochhiah anga thilpêk pe duhte tâna chanchin tam lehzual hriattîrna tûra buatsaih a ni a. Brochure an chhiar zawh hnuah leh dân lama an mi thiamte an râwn hnuah, mi tam tak chuan khawvêl puma Jehova Thuhretute rawngbâwlna chu an ṭanpui thei a, chutih rual chuan chhiah lamah ṭangkaina nasa tak an nei thei a ni.

Chanchin hriat belh nân, a hnuaia address hmangin emaw, i awmna ram enkawltu Jehova Thuhretute branch office-ah emaw chuan lehkha ziakin emaw, telephone-in emaw Jehova Thuhretute chu i be thei ang.

Jehovah’s Witnesses,

Post Box 6440,

Yelahanka,

Bangalore 560 064,

Karnataka.

Telephone: (080) 28468072

[Phêk 4, 5-naa milemte]

Jehova Thuhretute inkhâwmna hmun hluite leh hmun tharte

Zambia

Central African Republic