Thinlung Fiahtu Jehova Chu Zawng Rawh
Thinlung Fiahtu Jehova Chu Zawng Rawh
“Mi zawng ula, in nung ang.”—AMOSA 5:4.
1, 2. Pathian Lehkha Thu-a Jehova’n “thinlung lam a en zâwk ṭhîn” tih hi eng a tihna nge ni?
PATHIAN JEHOVA chuan zâwlnei Samuela hnênah chuan: “Mihring chuan pawn lama lan dân an en ṭhîn a, LALPA erawh chuan thinlung lam a en zâwk ṭhîn,” tih a hrilh a. (1 Samuela 16:7) Engtin nge Jehova chuan ‘thinlung lam a en ṭhin’?
2 Pathian Lehkha Thu-ah chuan, thinlung chu chhûngril lama mi nihna tak tak—a duhzâwng te, a ngaihtuahna te, a rilru veizâwng leh a ngainat zâwng te—sawi nâna hman a ni a. Chuvângin, Bible-in Pathianin thinlung a en a tih hian, mi chu pâwn lama a lan ang mai piah lam, a chhûngril nihna tak tak a en zâwk tihna a ni.
Pathianin Israelte A Enfiah
3, 4. Amosa 6:4-6-a sawi angin, Israel hnam sâwm lalramah eng dinhmun nge awm?
3 Thinlung Fiahtuin Amosa hun laia hnam sâwm Israel lalram a zuk en thlâk chuan, eng nge a hmuh? Amosa 6:4-6 chuan ‘saingho khuma mua, an ṭhutthlêng sei chunga zi marte’ chungchang a sawi a. Anni chuan “berâm rual zînga berâm note leh sebâwng awmna zîng ata sebâwng tuaite [an] ei a.” “Ṭingṭanga dâwngdahna hlate [an] sa a,” ‘berhbu lianin uain an in,’ thu a sawi bawk.
4 Atîr chuan, chu chu thil hmuh nuam tak niin a lang mai thei. Mi hausate chuan an in nuam takah ei leh in tûr tui ber berte an eiin an in a, rimawi ṭha berte an ngaithla a. ‘Saingho khum’ an nei bawk a. Thil hlui chanchin zir mite chuan Israel lalram Samaria khawpuiah sainghova siam thil nalh tak tak an lai chhuak a ni. (1 Lalte 10:22) Chûng zînga tam tak chu in chhûng bungruaa bel leh bang chei mawi nâna hman te a nih a rinawm hle.
5. Engvângin nge Amosa hun laia Israelte chungah Pathian a lâwm loh?
5 Jehova chuan Israelte nuam taka an khawsak a, chaw tuihnai tak an ei a, uain tui tak an in a, rimawi nalh tak tak an ngaihthlâk te chu a phal lo vem ni? Phal lo lo ve! A nihna takah chuan, amah ngei chuan chûng thilte chu mihringte chen atân hnianghnâr takin a pe zâwk a ni. (1 Timothea 6:17) Amah tilâwm lotu chu mite thinlunga châkna dik lo awm te, an thinlung suahsualna te, Pathian zah lo an rilru put hmang te, leh an Israelpuite chunga hmangaihna an tlâkchhamna te chu a ni.
6. Amosa hun laia Israel ram thlarau lam dinhmun chu eng nge ni?
6 Chûng ‘an ṭhutthlêng sei chunga zi mar a, berâm rual zînga berâm note ei a, ṭingṭanga dâwngdahna hlate sakna’ chungchâng sawi chu a mak a ni. Chûng mite chu: ‘Nangni hian ni ṭha lo chu in rilru ata hla takah indah em ni?’ tia zawh an ni. Anni chu Israel ram dinhmun avânga lungngai hle tûr an ni a; mahse, “Josefho hrehawmna avângin an lungngai lo.” (Amosa 6:3-6) Sum leh pai lamah nei nung mah se, Jehova chuan Josefho—a nih loh leh Israelho—thlarau lam dinhmun chhiatzia chu a hmu a. Mahse, mite chuan veina rêng nei lovin, an nî tin thiltihah an buai reng a ni. Tûn laia mi tam takte pawhin, chutiang rilru put hmang chu an lantîr a. Hun khirh takah kan awm tih chu an pawm mai thei; mahse, a mi mala an tawrh loh chhûng chuan, mi dangte tawrhna chu engah mah an ngai lo va, thlarau lam thil chu an ngaihsak lo a ni.
Israel—Hnam Tlachhe Tak
7. Israel mite khân Pathian vaukhânna a ngaihsak loh chuan eng thil nge lo thleng ang?
7 Amosa bu chuan hausa taka lang sia tlachhe tak hnam pakhat chungchâng a sawi a. Mite chuan Pathian vaukhânna ngai pawimawh a, an thlîr dân an thlâk loh avângin, Jehova chuan an hmêlmate lakah a humhim lo vang. Tichuan, Assuria mite chu an rawn thawk ang a, an saingho khum ropui tak tak aṭang chuan an rawn hnûk thlain, salah an hruai mai ang. Nuam an chên chhunzawm thei tawh lo vang!
8. Engtin nge Israel hnam chu thlarau lam dinhmun chhe taka a lo awm tâk?
8 Engtin nge Israel hnam chu chutiang dinhmuna a lo awm tâk? Chu dinhmun chu a fapa Rehoboama’n Lal Solomona a thlâk a, hmâr lam lalram chu Juda leh Benjamin hnam aṭanga an inlâk hran kum, B.C.E. 997 aṭangin a inṭan a ni. Israel hnam sâwm lalrama lal hmasa ber chu “Nebata fapa,” Jeroboama a ni a. (1 Lalte 11:26) Ani chuan a ram chhûnga mite chu Jehova be tûra Jerusalema kal chu a hautak lutuk tiin a hmin a. Mahse, mipuite ṭhatna tûr a ngaihtuah tak tak vâng a ni lo. Ama ṭhatna tûr a ngaihtuah vâng zâwk a ni. (1 Lalte 12:26) Jeroboama chuan Israel mite kum khata vawi thum zêl Jerusalem biak ina an kal chuan, a tâwpah Juda lamah an ṭang leh ang tih a hlau a ni. Chu chu dan tumin, rangkachak bâwng no lem pahnih a din a, pakhat chu Dan-ah, a dang chu Bethel-ah a dah a ni. Chutiang chuan, bâwng no lem biakna chu Israel ram sawrkâr sakhua a lo ni ta a ni.—2 Chronicles 11:13-15.
9, 10. (a) Lal Jeroboama I-nain eng sakhaw kûtte nge a buatsaih? (b) Engtin nge Pathianin Israel rama Lal Jeroboama II-na hun laia kûtte chu a thlîr?
9 Jeroboama chuan chu sakhaw thar chu sakhaw dik ang taka lantîr tûrin a bei a. Jerusalema kût an hman ṭhin ang tak kût nîte a huaihawt a ni. 1 Lalte 12:32-ah chuan heti hian kan chhiar a ni: “Jeroboama chuan Judai rama kût an neih ang bawkin thla riatna, chu mi thla ni sâwm leh ni nga ni chu kût nîah a ruat ve a, maichâmah chuan a han kal a; Bethel-ah chuan a bâwng no lem siam hnêna inthawiin chutiang chuan a ti a ni,” tiin.
10 Jehova chuan chutiang sakhaw dik lo kûtte chu a hnâwl ṭhak a. Chu chu a hnu kum zabi khat chuang, B.C.E. 844 vêla hnam sâwm Israel lalram chunga Jeroboama II-na a lal laiin, Amosa kaltlangin a tichiang hle a ni. (Amosa 1:1) Amosa 5:21-24 sawi dânin Pathian chuan: “In kûtte ka huain ka hmusit a, in inkhâwmpui urhsûnahte chuan ka lâwm hek lo vang a. A ni, in hâlral thilhlan leh in buhhlan min hlân mah ula, ka pawm lo vang a, in ran thau remhlante pawh ka ngaihsak hek lo vang a. In ṭingṭang ri mawi chu ka ngaithla lo vang; chuvângin ka lakah i hla bengchheng chu la bo rawh. Nimahsela, rorêlna dik chu lui angin luang sela, felna chu luipui kang ngai lo angin luang rawh se,” a ti a ni.
Tûnlai Nêna A Inannate
11, 12. Kristianna ram biakna leh hmân laia Israelte biakna inkârah eng inanna nge hmuh a nih?
11 Chiang takin, Jehova chuan Israel kûta telte thinlung chu a endik a, chûng an kûtte leh an thil hlan zawng zawngte chu a hnâwl vek a ni. Chutiang bawkin, tûn laiah pawh, Pathian chuan Kristianna ramin kût nia a hman, milem biakna hunserh, Kristmas leh Easter te chu a hnâwl a ni. Pathian Jehova betute tân chuan suahsualna leh felnain inṭâwmna a nei thei lo va, thim leh êng pawhin inpâwlna a nei thei hek lo.—2 Korinth 6:14-16.
12 Kristianna ram biakna leh Israel bâwng no lem biakna inkârah inanna dang pawh a la awm a. Kristiana inchhâl ṭhenkhat chuan Pathian Thu thutak pawm mah se, Kristianna ram biakna chu Pathian hmangaihna dik tak avânga lo awm a ni lo. Ni se chuan, “thlarau leh thutaka” Jehova biak a tum tlat ang, chutianga biak chu a lâwmzâwng a ni si a. (Johana 4:24, NW) Chu bâkah, Kristianna ram chuan “rorêlna dik chu lui angin a luantîr lo va, felna chu luipui kang ngai lo angin a luantîr,” hek lo. Chutih a hnêkin, nungchang lama Pathian thil phûtte chu a pawlh dal zâwk a. Inngaihna te leh thil sual lian tak tak dangte pawh a ngaimawh lo va, mawngkawhurte inneih pawh a phal hial zâwk mah a ni!
“Ṭhatna Ngaina Ula”
13. Engvângin nge Amosa 5:15 thute hi kan zawm a ngaih?
13 Jehova pawm tlâka chibai bûk duhtu zawng zawngte hnênah, ani chuan: “Sualna chu hua ula, ṭhatna ngaina ula,” a ti. (Amosa 5:15) Hmangaihna leh huatna chu thil veizâwng chak tak mai a ni a, entîr nei kan thinlung chhûngril aṭanga lo chhuak a ni. Thinlung hi bumhmang tak a nih avângin, vênghim tûrin kan theih apiang kan ti tûr a ni. (Thufingte 4:23; Jeremia 17:9) Châkna dik lo kan thinlunga kan chhawmnun reng chuan, sual chu kan ngainain, ṭha kan haw mai ang. Inchhîrna nei miah lova thil sual tihzêlna hmanga chutiang châkna dik lo chu kan nunpui zêl chuan, khawvêla taihmâkna zawng zawng pawhin Pathian duhsakna min neihtîr leh chuang lo vang. Chuvângin, ‘sualna huaa, ṭhatna ngaina’ tûrin Pathian ṭanpuina i dîl ang u.
14, 15. (a) Israel ramah khân, thil ṭha tite zîngah tute nge tel a; mahse, engtianga cheibâwl nge an nih? (b) Engtin nge tûn laia hun bikima rawngbâwlte chu kan fuih theih?
14 Mahse, Amosa hun laia Israel mi zawng zawngte chuan Jehova mithmuhah sual an ti vek lo. Entîr nân, Hosea leh Amosa chuan ‘ṭhatna chu an ngaina a,’ zâwlnei rinawm tak niin rawng an bâwl a ni. Ṭhenkhat dangte chuan Nazirit mite anga nung tûrin thu an tiam bawk. Nazirit mi anga an inserh chhûng chuan, grêp rah aṭanga siam rêng rêng, a bîk takin uain lakah an intibawrhbâng lo rêng rêng a ni. (Number 6:1-4) Engtin nge Israel mi dangte chuan chutiang rinna nei mite inpêkna chu an thlîr? A chhânna râpthlâk tak mai chuan hnamte dinhmun chhiat nasatzia a hai lang a ni. Amosa 2:12 chuan heti hian a sawi: “Nazirit mite hnênah uain in tûr in pe a, zâwlneite hnênah, Thu hril suh u, tiin thu in pe a,” tiin.
15 Mi rinawm Naziritte leh zâwlneite entawn tûr siam an hmuhna hian, chûng Israel nawmsipbâwl âtchilhtute chu a tizakin, an nun kawng thlâk tûrin a chêttîr tûr a ni nâ a le. Chutih a hnêkin, mi rinawmte chu hmangaih hauh lovin Pathian chawimawi lo tûra tihbeidawn an tum ṭâng ṭâng zâwk a ni. Mahni inpumpêka pioneer thawkte, bial kantute, missionary-te, a nih loh leh Bethel chhûngkaw zînga mite chu ṭhahnemngai taka hunbi kima an rawngbâwlna kalsan a, nun pângngai an tih ang chia nung tûrin i fuih ngai lo vang u. An hna ṭha thawh chu chhunzawm zêl tûrin i fuih zâwk ang u!
16. Engvângin nge Amosa hun lai aiin Mosia huna Israelte thlarau lam dinhmun chu a ṭhat zâwk?
16 Amosa hun laia Israel tam takte chu khawvêl thil lamah hausa hle mah se, ‘Pathian lamah an hausa lo.’ (Luka 12:13-21) An pi leh pute chuan thlalêrah chuan manna chauh kum 40 chhûng an ei a. Bâwngpa châwm thau hmanga ruai ṭhehin, sainghova siam khumah chuan thatchhe takin an mu ngai hek lo. Mahse, Mosia chuan heti hian dik takin a hrilh a ni: “LALPA in Pathian chuan in thawh apiangah te mal a sâwm ṭhîn che u a, . . . hêng kum sawmli chhûng zawng hian LALPA chu in hnênah a awm a, engmah in tlâkchham loh kha,” tiin. (Deuteronomy 2:7) Ni e, Israel mite chuan thlalêra an awm chhûng khân an mamawh tak tak thilte chu an nghei ngai lo. A pawimawh berah, Pathian hmangaihna, vênhimna, leh malsâwmna an dawng tlat a ni!
17. Engvângin nge Jehova’n hmân lai Israelte chu Ram Tima a hruai?
17 Jehova chuan Amosa dam rualpui Israel mite hnênah an pi leh pute chu Ram Tiamah hruai thlengin, an hmêlma zawng zawngte pawh a hnehtîr vek dân a hriat nawntîr a. (Amosa 2:9, 10) Mahse, Engvângin nge Jehova chuan Israel mite chu Aigupta ram ata ram tiamah a hruai luh? Hausa taka nung a, an Siamtu hnâwl leh mai atân em ni? Ni lo ve! Zalên taka amah chibai an bûk theih nân leh thlarau lama an thianghlim nân a ni zâwk a. Mahse, hnam sâwm Israel lalrama awmte chuan sualna an haw lo va, ṭhatna an ngaina hek lo. Pathian Jehova ni lovin, milem siam chawp mai maite an chawimawi ta zâwk a ni. A va zahthlâk êm!
Jehova’n A Hrem
18. Engvângin nge Jehova’n thlarau lama min tihzalen?
18 Pathian chuan Israelte thiltih sual tak chu a haider dâwn lo. A thlîr dân chu heti hian chiang takin a sawi a ni: “In khawlohna zawng zawngahte chuan ka hrem ang che u,” tiin. (Amosa 3:2) Hêng thute hian kan saltânna, tûn lai Aigupta—he khawvêl kalhmang suaksual—ata chhanchhuahna min ngaihtuahtîr a ni. Jehova chuan mahni hmasial taka kan duhzâwng ûm nân thlarau lamah min tizalên lo. Ani chuan zalên tak leh thinlung zawng zawnga amah kan chawimawi theih nân min tizalên zâwk a ni. Kan vai hian, kan zalênna neih kan hman dânah mahni chanchin kan sawi ṭheuh dâwn a ni.—Rom 14:12.
19. Amosa 4:4, 5 sawi angin, Israel mi tam zâwkte chuan eng nge an ngainat?
19 Lungchhiatthlâk takin, Amosa thuchah khauh tak mai chu Israela mi tam zâwkte chuan an ngaihsak lo va. Amosa 4:4, 5-ah chuan, zâwlnei chuan thlarau lama an thinlung dam lohzia chu a hai lang a, hetiang hian a sawi a ni: “Bethel-ah chuan lo kal ula, bawhchhe rawh u; Gilgal-ah chuan lo kal ula, bawhchhiatna tipung rawh u . . . Aw Israel fate u, hei hi in duhzâwng tak a ni si,” tiin. Israelte chuan duhzâwng dik an nei lo va. An thinlung an vêngṭha lo a ni. Chuvângin, a tam zâwkte chuan sual chu ngainain, ṭha chu an huat phah a. Chûng bâwng no lem betu luhlul takte chu an inthlâk danglam lo. Jehova chuan a hremin, an sual hlum ṭhak dâwn a ni!
20. Engtin nge miin Amosa 5:4 thu nêna inmil nun kawng a ûm theih ang?
20 Chutih hun laia Israel rama chêngte tân Jehova laka rinawm chu a awl hauh lo vang. Kristian apui apangte’n kan hriat ṭheuh angin, tûn laia thil lârte kalha awm chu thil awlsam a ni lo. Mahse, Pathian hmangaihna leh amah tihlâwm duhna chuan Israel mi ṭhenkhat chu biakna dik vuan tûrin a chêttîr a. Chûng mite hnênah, Jehova chuan Amosa 5:4-a chhinchhiah: “Mi zawng ula, in nung ang,” tih sâwmna duhawm tak hi a tichhuak a ni. Tûn laiah pawh, A Thu hriatna dik la lût a, a duhzâwng tihna hmanga inlam lêta amah zawngtute tân Pathian chuan chutiang bawk zahngaihna chu a lantîr a ni. Chutianga tih chu thil awlsam a ni lo; mahse, chu chuan chatuan nunna a thlen a ni.—Johana 17:3.
Thlarau Lam Ṭâmna Kâra Hausakna
21. Biakna dika awm lote chu eng ṭâmin nge a tlâkbuak?
21 Biakna dik thlâwp lotute chu engin nge hmuak? Ṭâm zawng zawnga râpthlâk ber—thlarau lam ṭâmnain a hmuak a ni! Lal chungnung ber Jehova chuan: “Lalpa PATHIAN thu chhuak chuan, Ngai teh u, nîte chu a lo thleng mêk a ni; chûng nîahte chuan ramah chuan ṭâm ka tîr ang a, chaw ṭâmna ni lovin, tui ṭâmna ni hek lovin, LALPA thu hriatna ṭâmna zâwk chu,” a ti. (Amosa 8:11) Kristianna ram chuan chutiang ṭâm nasa tak chu a tuar a. Mahse, an zînga thinlung ṭha pu mite chuan, Pathian mite thlarau lama an hausakzia chu an hmu a, an zînga tel ve an duh a ni. Kristianna ram dinhmun leh Pathian chhiahhlawhte dinhmun inan lohna chu Jehova thu chuan a târ lang a ni: “Ngai teh u, ka chhiahhlawhte chuan an ei ang a, nangni erawh chu rilṭâmin in awm ang: ngai teh u, ka chhiahhlawhte chuan an in ang a, nangni erawh chu tuihâlin in awm ang: ngai teh u, ka chhiahhlawhte chu an hlim ang a, nangni erawh chu in zak ang.”—Isaia 65:13.
22. Engvângin nge hlim chhan tûr kan neih?
22 Jehova chhiahhlawhte kan nih angin, thlarau lama châwmna kan neihte leh malsâwmna kan dawnte hi kan ngaihlu tak zet em? Bible leh Kristian thu leh hlate kan zir hian, leh kan inkhâwmte, assembly-te, leh inkhâwmpuitea kan tel hian, thinlunga kan lâwm avângin hlim taka auh chhuah mai kan châk a. Amosa hrilh lâwkna mi tiphûr thei tak pawh tiamin, Pathian Thu hriat thiamna fiah tak kan neih avâng hian kan hlim a ni.
23. Pathian chawimawitute chuan eng nge an neih?
23 Pathian hmangaihtu leh amah chawimawi duhtu zawng zawngte tân, Amosa hrilh lâwkna thuah beiseina thu a chuang a ni. Tûnah he khawvêl buaithâk takah hian sum leh pai lama harsatna leh fiahna dang eng pawh tâwk mah ila, keini Pathian hmangaihtute chuan a malsâwmna leh thlarau lama chaw ṭha ber chu kan chên a ni. (Thufingte 10:22; Matthaia 24:45-47) Chuti chuan, chawimawina zawng zawng chu, kan ṭhatna atâna thil ṭha zawng zawng hnianghnâr taka min petu hnênah awm rawh se. Chuvângin, kan za hian, thinlung tak takin chatuanin i chawimawi zêl ang u. Chu chu thinlung Fiahtu, Jehova kan zawn chuan kan chanvo hlu a ni ang. (w04 11/15)
Engtin Nge I Chhân Ang?
• Amosa hun lai khân, Israel ram dinhmun chu eng ang nge a nih?
• Hnam sâwm Israel lalram dinhmun hian tûn laiah anpui eng nge a neih?
• Eng hrilh lâwkna ṭâm nge tûn laiah thleng a; mahse, chu chuan tute nge a nghawng ve loh?
[Zirlai Atâna Zawhnate]
[Phêk 17-naa milemte]
Israel tam takte chu hausa hle mah se, thlarau lamah an hausa lo
[Phêk 19-naa milem]
Hun bikima rawngbâwltute chu an hna ṭha thawk zêl tûrin fuih rawh