Jehovah Thu Chu A Nung

Josua Bu Aṭanga Thu Pawimawh Hrilhfiahna

MOAB Phaizâwla B.C.E. 1473-a awm Israelte chuan: “Ei tûrte buatsaih rawh u khai, ni thum chhûngin LALPA in Pathianin ram luah tûr a pêk che u hi luah tûrin Jordan lui hi in kân dâwn a ni e,” tih thu hi an phûrpui ngei ang. (Josua 1:​10, 11) Thlalêra kum 40 an zinna kawng chu a tâwp ṭêp tawh a ni.

A hnu kum sâwmhnih chuang lekah chuan, hruaitu Josua chuan Kanaan ram lai takah dingin, Israel upate hnênah he thu hi a puang a ni: “Ngai teh u, hêng hnam a la awmate hi hêng hnam ka tihbo tâkho zawng zawng ramte nên hian, Jordan aṭanga ni tlâkna lam tuifinriat zauna thleng rakin in chite rochanah ka ruatsak a che u. Tin, LALPA in Pathianin in hmaah hian a hnawt chhuak ang a, in hmuh phâk lohvah a hnawt bo vek ang a; tichuan LALPA in Pathianin in hnêna a sawi tawh ang khân an ram chu in nei dâwn nia,” tiin.​—⁠Josua 23:​4, 5.

Josua Bu chu amah ngeiin B.C.E. 1450-a a ziah a ni a, chûng kum 22 chhûnga thilthleng phûrawm tak takte chhinchhiahna a ni. Thutiam khawvêl thar kawtkaia kan din mêk avângin, kan dinhmun chu Ram Tiam la tûra inpeih thlap Israel fate dinhmun nên a khaikhin theih a. Chuvângin, ngaihven takin Josua lehkhabu chu i lo ngaihtuah ang u.​—⁠Hebrai 4:⁠12.

“JERIKO PHAIAHTE CHUAN”

(Josua 1:​1–5:15)

Jehova’n a hnêna: “Ka chhiahhlawh Mosia chu a thi ta a; chutichuan tho la, nang leh hêng mipuiho zawng zawngte nên hian Jordan lui hi kân ula, anmahni, Israela thlahte ka pêk ramah chuan kal rawh u,” a tih khân, Josua mawhphurhna dawn chu a va rit tak êm! (Josua 1:⁠2) A mawhphurhna chu Israel hnam a nuai têlte Ram Tiama hruai luh a ni a. Chu mi atâna inbuatsaih nân khaw lâk hmasak ber tûr Jeriko-ah enthlatu mi pahnih a tîr a ni. Chu khawpuiah chuan nawhchizuar Rahabi a awm a, ani chuan Jehova’n a mite tâna thil ropui tak a tihte chu a lo hre tawh a. Enthlatute chu lo vênghimin a lo ṭanpui a, a nun chhanhim tûra intiamna chu an hnên aṭangin a dawng a ni.

Enthlatute an lo haw chuan, Josua leh mipuite chu Jordan lui kân tûrin an lo inpeih tawh a. Jordan lui chu a kuang zawng zawngah liam zawih zawih mah se, chu chuan an tân harsatna a siam lo; Jehova chuan chhak lam aṭanga tui lo luang chu a tih din a, a thlang lama tuite chu Tuifinriat Thi-a a luan zawhtîr avângin. Jordan lui an kân hnu chuan, Israelte chuan Jeriko khaw kiang Gilgal-ah awmhmun an khuar a. Ni li hnu, Abib thla ni 14 nîah chuan Jeriko phaizâwlahte chuan Kalhlên Kût an hmang a ni. (Josua 5:10) A tûka chu rama chhuak thlaite an ei ṭan aṭang chuan manna chu pêk an ni tawh lo. Chutih chhûng chuan, Josua chuan thlalêra piang mipa tawh phawt chu an serh a tantîr a ni.

 Bible Chungchâng Zawhnate Chhânna:

2:​4, 5​—⁠Engvângin nge Rahabi chuan enthlatute zawngtu lal mi tirhte chu a bum? Rahabi chuan Jehova a rin tlat avângin a nunna thâpin enthlatute chu a humhim a ni. Chuvângin, Pathian mite tihnat tumtute hnênah enthlatute awmna dik hrilh tûrin tihluihna hnuaiah a awm lo. (Matthaia 7:6; 21:​23-27; Johana 7:​3-10) A nihna takah phei chuan, Rahabi chuan a “thiltih avângin thiam a chang” a ni, chu a thiltihah chuan lal mi tirhte kawng dik lo a hrilhna pawh a tel a ni.​—⁠Jakoba 2:​24-26.

5:​14, 15​—⁠“LALPA sipaihote hotu” chu tunge ni? Ram Tiam lâkna ṭan laia Josua tichak tûra lo kal hotu chu tu dang ni lovin, mihringa a rawn chan hmaa Isua Krista, “Thu” chu a nih ngei a rinawm. (Johana 1:1; Daniela 10:13) Chawimawi tawh Isua Krista chu thlarau lam indonaa tel Pathian mite zîngah a awm tih hriatna chuan min va tichak tak êm!

Kan Zir Tûrte:

1:​7-9. Bible nî tina chhiar te, a sawite ngaihtuah ziah te, leh kan thu zirte nunpuina te chu thlarau lama hlawhtlin nân a pawimawh hle.

1:​11. Josua chuan thatchhe taka Pathian thilpêk tûr nghâk tûra ti lovin, ei tûrte buatsaih tûrin mite chu a hrilh a ni. Isua’n kan nun atâna mamawh thilte lungkham lo tûr leh “chûng zawng zawng chu a pêk belhchhah dâwn che u nia,” a tih hian, mahni inchâwm tûrin hma kan la tûr a ni lo a tihna a ni lo.​—⁠Matthaia 6:​25, 33.

2:​4-13. Jehova thiltih ropuite leh hun khirh tak a nihzia a hriat hnu chuan, Rahabi chuan Jehova betute lama ṭang tûrin thu tlûkna a siam. Hun engemawti chhûng Bible i zir a, ‘ni hnuhnûngah’ kan awm tih i hriat chuan, Pathian rawngbâwl tûrin thu tlûkna i siam dâwn lâwm ni?​—⁠2 Timothea 3:⁠1.

3:15. Jeriko enthla tûra tirhte thu thlen chu a ṭhat avângin, Josua chuan Jordan luitui a kiam pawh nghâk lovin hma a la nghâl a. Biakna dik kaihhnawih nungchang lam thil a nih chuan, dinhmun ṭha zâwk anga lang chu nghâk khawtlai lovin huaisen takin hma kan la nghâl tûr a ni.

4:​4-8, 20-24. Jordan lui lai aṭanga lâk lung 12-te chu Israelte tân chuan thilthleng hriat rengna a ni a. Jehova’n a hmêlmate laka tûn laia a mite a chhanchhuahnate pawh hi a mite hnêna a awm rengzia hriat rengna a ni.

HNEHNA A KALTLUANG ZEL

(Josua 6:​1–12:24)

Jeriko khawpui chu “an khâr tlat a: tumah an chhuak lo va, tumah an lût hek lo.” (Josua 6:⁠1) He khawpui hi eng anga lâk tûr nge ni ang? Jehova chuan Josua hnênah beih dân tûr a hrilh a ni. A hnu lawkah khawpui kulh chu a chim a, tihchhiat a ni ta a. Rahabi leh a chhûngte chauh an dam khawchhuak a ni.

Chu mi hnua an lâk chu lal khawpui Ai khua a ni. Enthla tûra mi tirhte chuan khuaa mi chêng an tlêm a, a lâk nân mi tam tak a ngai dâwn lo tih an sawi a. Mahse, chu khawpui la tûra tirh sipai 3,000 te chu Ai khaw mite hmaah an tlân chhia a ni. Engvângin nge? Jehova chu Israelte hnêna a awm loh avângin. Juda thlah Akana’n Jeriko an lâk laiin thil a lo tisual a. Thil fel lo a tihfel hnuah, Josua chuan Ai khua a bei leh a ni. Israelte ṭum khat a lo hneh tawh avângin Ai khaw lal chuan Israelte  beih chu a châk zek zek a. Mahse, Josua chuan Ai khaw mite a lutuka an inrinna chu hmang ṭangkaiin, khawpui chu a la ta a ni.

Gibeon chu ‘khaw lian tak​—⁠Ai khua ai pawha ropui zâwk, a mihring zawng zawngte pawh mi chak tak’ an ni a. (Josua 10:⁠2) Nimahsela, Israel mite’n Jeriko leh Ai khuate an hneh tawh tih a hriat chuan, Gibeon mite chuan anni nêna remna thuthlung siam tûrin Josua chu an bum a ni. A chhehvêla awm ramte chuan chu an thiltih chu an tâna thil hlauhawm angin an thlîr a. An lal pangate chuan ṭangrual pâwl siamin Gibeon mite chu an bei a ni. Israelte chuan Gibeon mite chu chhanchhuakin, a beitute chu an ching nek a. Josua hruaina hnuaia Israelte hnehna dangte zîngah chuan chhim lam leh khaw thlang lama khawpuite, leh hmâr lama ṭangrual lalte  hnehna a tel a ni. Jordan lui thlang lama a hneh lalte chu belhkhâwmin 31 an ni.

Bible Chungchâng Zawhnate Chhânna:

10:​13​—⁠Engtin nge chutiang thilmak tak a thlen theih? Lei leh vân Siamtu “LALPA tân thil rêng rêng a harsa lutuk em ni?” (Genesis 18:14) A duh phawt chuan, Jehova chuan lei aṭanga a lo thlîrtu tâna ni leh thla chu a ding reng anga lang tûrin, leilung inher dân chu a khawih danglam thei a ni. A nih loh leh, lei leh thla awm dân chu khawih danglam lovin, chûng aṭanga lo kal êng zung chu lei lama êng reng tûrin a herh kawi pawh a ni thei bawk ang. Eng ang pawh chu lo ni ta se, mihring chanchinah chutiang “nî ang chuan a hmain nî rêng rêng a awm ngai lo.”​—⁠Josua 10:⁠14.

10:​13​—⁠Jasara bu chu eng lehkhabu nge? He lehkhabu hi “thal kah hla”​—⁠Israelte lal, Lal Saula leh a fapa Jonathana te sûnna hla⁠—​chungchângah 2 Samuela 1:​18-ah hian sawi lan a ni leh a. He lehkhabu hi Israelte chanchina thilthleng ropui tak takte ṭanchhana phuah hlate ziah khâwmna a nih ngei a rinawm a, chûng thilthlengte chu Hebrai mite’n an hriat chian hle a rinawm bawk.

Kan Zir Tûrte:

6:​26; 9:​22, 23. Jeriko tihchhiat laia Josua sawichhuah ânchhe lawhna thute chu a hnu kum 500 vêlah a thleng famkim a. (1 Lalte 16:34) Nova’n a tupa Kanaana chunga ânchhia a lawhnate chu Gibeon mite chhiahhlawha an ṭan khân a thleng famkim bawk. Jehova thu chu a thleng dik zêl a ni.

7:​20-25. Ṭhenkhat chuan Akana rûkrûk chu sual tênauvah ngaiin, mi dangte chungah chhiatna a thlen lo tih ngaih dân an nei mai thei. Anni chuan thil ho tê tê rûk leh Bible dân têtham tak takte zawm loh chu chutiang bawkin an thlîr mai thei. Mahse, keini chu thil dik lo emaw, bawlhhlawh emawte dona kawngah Josua angin kan nghet tlat tûr a ni.

9:​15, 26, 27. Inremna kan siamte chu kan ngai thutak tûr a ni a, kan sawhsawn tûr a ni lo.

JOSUA CHUAN A HNA LIAN TAK A THAWK ṬAN

(Josua 13:​1–24:33)

Tûnah chuan kum 90 a hnaih tawh avângin a tar tawh a, Josua chuan ram chu a sem ṭan a. Chu chu hna lian tak a va ni êm! Reubena thlah te, Gada thlah te, leh Manasea thlah hnam chanve te chuan Jordan chhak lamah hmun an chang tawh a ni. A la bâng zawngte chu Jordan thlang lam ram pêk an ni a, ṭhum vâwra semsak an ni.

Biak bûk chu Ephraim ram Silo-ah din a ni a. Kaleba chuan Hebron khawpui a chang a, Josua chuan Timnath-sera khua a chang a ni. Levia chite chuan khaw 48 an chang a, chûng zîngah chuan tualtlânna, a nih loh leh inhumhimna khawpui 6 pawh a tel a ni. Reubena thlah te, Gada thlah te, leh Manasea thlah hnam chanve te chuan an ram chana an kîr chuan, “maichâm lianpui langsâr tak” an siam a ni. (Josua 22:10) Jordan thlang lama awm hnamte chuan an thiltih chu kalpênna angin an thlîr a, Israel thlahte inkârah indo a chhuah phah ṭêp a; mahse, inbiak pawhna ṭha a awm avângin an pumpelh a ni.

Josua chu Timnath-sera khuaa engemaw chen a awm hnu chuan, upate, hotute, rorêltute, leh Israel mi liante chu ko khâwmin huaisen taka awm tûr leh Jehova laka rinawm tlat tûrin a fuih a ni. A hnuah Josua chuan Israela thlah zawng zawngte chu Sekemah a ko khâwm leh a. Chutah chuan Abrahama hun lai aṭanga Jehova’n anmahni a dâwr dân a sawi a; tichuan, ‘Jehova ṭih tûr leh tih tak zet leh dik taka a rawng bâwl’ tûrin vawikhat a fuih nawn leh a ni. Mipuite chuan: “LALPA kan Pathian rawng chu kan bâwl ang a, a thu kan zâwm zêl ang,” an ti a. (Josua 24:​14, 15, 24) Chung thilte a thlen hnu chuan Josua chu kum 110 mi niin a thi ta a ni.

 Bible Chungchâng Zawhnate Chhânna:

13:​1​—⁠Hei hi Josua 11:23 thu nên a inkalh em? Inkalh lo ve, Ram Tiam lâkna tûrah chuan thil chi hnih a tel a: a hmasa chu a hnam puma Kanaan ram thuneihna tichhe tûra lal 31-te beihna a ni a, a pahnihna chu ram zawng zawng an luah nâna a thlah ang leh a mi mal anga lâkna a ni. (Josua 17:​14-18; 18:⁠3) Israela fate chuan an zînga Kanaan mi zawng zawngte chu hnawt chhuak kim vek lo mah se, a la bângte chu Israel tân hlauhawm tham an ni lo. (Josua 16:10; 17:12) Josua 21:44 chuan: “LALPAN . . . hmun tinah muanna a pe a,” a ti.

24:​2​—⁠Abrahama pa, Tera chu milem betu a ni em? Atîr chuan Tera chu Pathian Jehova betu a ni lo. Hmân lai Ur khawpuia pathian lâr tak thlapui (moon) pathian Sin an tih chu a biak a rinawm hle. Judate thurochhiah sawi dân aṭangin, Tera chu milem pathian chhertu a ni hial mai thei a ni. Nimahsela, Abrahama’n Ur khawpui a chhuahsan khân, a rualin Tera chu Haran-ah a kal ve a ni.​—⁠Genesis 11:⁠31.

Kan Zir Tûrte:

14:10-13. Kaleba chuan kum 85 mi mah ni se, Hebron bul vêla awmte hnawhchhuahna hna hautak tak chu a dîl a ni. Chu hmun chu Anakim-ho​—⁠mi lian tak takte​—⁠awmna a ni a. Chûng sipai kum hlunte chuan Jehova ṭanpuinain an hneh a, Hebron chu tualtlânna, a nih loh leh inhumhimna khawpui pakhat a lo ni ta a ni. (Josua 15:​13-19; 21:​11-13) Kaleba entawn tûr siam chuan theocratic chanvo khirh takte pumpelh tum lo tûrin min fuih a ni.

22:​9-​12, 21-33. Mi dangte ngaihtuahna hre lova thu tlûkna lo siamsak ngawt lo tûrin kan fîmkhur tûr a ni.

“Thlâwn Pakhat Mah A Awm Lo”

A lo upat chuan, Josua chuan Israela mawhphurhna neite hnênah: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo . . . in chungah a lo thleng ta vek a,” tiin a hrilh a ni. (Josua 23:14) He thu dikzia hi Josua ziak thilthleng chanchin chuan a va târ lang chiang êm!

“Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna tûrin ziak a ni si a,” tiin tirhkoh Paula chuan a ziak a ni. (Rom 15:⁠4) Pathian thutiam kan beiseina chu a thlâwn mai dâwn lo tih kan ring tlat thei a. Thutiam pakhat tê mah thleng famkim lo awm lovin, a lo thleng dik vek dâwn a ni. (w04 12/1)

[Phêk 30-naa map]

(A lan dân tûr dik tak hriat nân, a lehkhabu en rawh)

Josua kaihhruaina hnuaiah ram chu lâk a ni

BASAN

GILEAD

ARABA

CHHIM RAM

Jordan Lui

Tuifinriat Al

Jabok Lui Ruam

Arnon Lui Ruam

Hazor

Madon

Lasaron

Simron

Jokneam

Dor

Megido

Kades

Taanak

Hepher

Tirza

Aphek

Tapua

Bethel

Ai

Gilgal

Jeriko

Jerusalem

Makeda

Jarmuth

Adulam

Libna

Lakis

Eglon

Hebron

Debir

Arad

[Phêk 29-naa milem]

Nawhchizuar Rahabi’n thiam a chan chhan i hria em?

[Phêk 30-naa milem]

Josua chuan Israelte chu ‘Jehova ṭiha a rawng bâwl’ tûrin a fuih