Pathian Hmangaihna Avânga Inpumkhat

VANTLANG kum chhiar kum zabi khatnaa Kristian kohhran din a nih khân, a ze langsâr berte zînga pakhat chu mi chi tin chi tang awmkhâwm an ni chung pawha an inpumkhatna kha a ni. Chûng Pathian dik betute chu Asia te, Europe te, leh Africa te aṭanga lo kal an ni hlawm a. Mi chi hrang hrang​—⁠puithiamte, sipaite, chhiahhlawhte, râltlânte, kut hnathawk mite, mi themthiam te, leh dâwrkaite an ni hlawm a ni. A ṭhen chu Judate an ni a, a dangte chu Jentailte an ni. Tam tak chu tûn hmaa uirête, mawngkawhurte, zu ruih hmangte, rûk hmangte, a nih loh leh hlêprute an ni bawk. Nimahsela, Kristian an lo nih tâk achinah chuan, an thil chîn ṭha lote chu bânsanin rinnaah chuan an inpumkhat tlat a ni.

Engin nge kum zabi khatnaa Kristianna chuan hêng mi zawng zawngte hi a inpumkhattîr theih le? Engvângin nge an inkârah remna a awm a, mi dangte nên pawh an inrem? Engvângin nge helnaahte leh indonaahte an tel loh? Engvângin nge Kristian hmasate chu tûn lai sakhaw liante nêna an inthlauh êm êm?

Kohhrana Mite Chu Engin Nge Hîp Khâwm?

Kum zabi khatnaa ringtute zînga inpumkhatna awmtîrtu ber chu Pathian hmangaihna hi a ni. Chûng Kristiante chuan an mawhphurhna  hmasa ber chu Pathian dik Jehova chu an thinlung, nunna, leh rilru zawng zawngin an hmangaih tûr a ni tih an pawm a. Entîr nân, Juda mi tirhkoh Petera chu dân pângngai anga a kawm duh loh tûr Jentail mi pakhat ina lêng tûra tirh a ni. Chu tirhna a âwih chhan bul ber chu Jehova a hmangaih vâng a ni. Petera leh Kristian hmasa dangte chuan Pathian mizia hriatna dik leh a duhzâwng leh duh lohzâwngte hriatnaa innghat Pathian nêna inlaichînna ṭha tak an nei a ni. A hnuah chuan, Pathian betu zawng zawngte chuan an tâna Jehova duhzâwng chu “rilru hmunkhat leh ngaihtuahna hmunkhata fel taka [an] inzawm tlat” a ni tih an lo hre thiam ta a ni.​—⁠1 Korinth 1:10; Matthaia 22:37; Tirhkohte 10:​1-35.

Ringtute chu Isua Krista an rinna chuan a hîp khâwm chho zêl a. A hniakhnung zui tlat chu an duh a ni. Ani chuan: “Keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chu miah chuan an hria ang,” tiin thu a pe a ni. (Johana 13:​34, 35) Hei hi ral leh mai tûr rilrua veina mai a ni lo, mahni hmasial lo hmangaihna a ni zâwk. Chu chuan eng nge a hrin dâwn? Amah ringtute tâna Isua ṭawngṭaina chu a hring dâwn a ni: “An zaa pumkhat an nihna tûrin; ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna tûrin,” tih chu.​—⁠Johana 17:​20, 21; 1 Petera 2:21.

Jehova chuan a thlarau thianghlim, a nih loh leh chakna chevêl reng chu a chhiahhlawh dik takte chungah a leih a. Chu thlarau chuan an zîngah inpumkhatna a awmtîr a ni. Chu chuan kohhran zawng zawnga an pawm Bible zirtîrnate a hriatthiamtîr a. Jehova betute chuan chanchin thuhmun​—⁠mihringte chunga rorêl tûr vân lam sawrkâr Pathian Messia Lalram hmanga Jehova hming tihthianghlimna​—⁠chu an puang a ni. Kristian hmasate chuan ‘khawvêla mi ni lo’ tûra an mawhphurhna chu an hria a. Chuvângin, tualchhûng buaina emaw, sipai indona emaw a lo thlen hian an tualdawih a. Mi zawng zawng nêna inrem chu an tum tlat a ni.​—⁠Johana 14:26; 18:36; Matthaia 6:​9, 10; Tirhkohte 2:​1-4; Rom 12:​17-21.

Ringtu zawng zawngte chuan inpumkhatna awmtîr tûra an mawhphurhna chu an thawk ṭheuh a ni. Engtin nge? An nungchang chu Bible nêna inremtîrna hmangin. Chuvângin, tirhkoh Paula chuan Kristiante hnênah: “In hmân lai awm dân kawnga mihring hlui . . . kha hlîp thla ula . . . mihring thar . . . khân inthuam bawk ula,” tiin a ziak a ni.​—⁠Ephesi 4:​22-32.

Inpumkhatna Vawn Ṭhat A Ni

Dik takin, kum zabi khatnaa ringtute chu ṭha famkim an ni lo va, an inpumkhatna tiderthâwng thei dinhmunte a lo awm ngei mai a. Entîr nân, Tirhkohte 6:​1-6 chuan Juda Kristian zînga Grik ṭawng hmangte leh Hebrai ṭawng hmangte zîngah buaina a chhuah thu a sawi a. Grik ṭawng hmangte chuan thlei bîk nia inhriatna an nei a ni. Mahse, tirhkohte hriattîr an nih chuan, thil awm dân chu thlei bîk awm lo leh fel taka chinfel nghâl a ni. A hnuah, doctrine chungchânga buaina chuan Kristian kohhrana Juda ni lote mawhphurhna chungchângah inhnialna a awmtîr a. Bible thu bulte ṭanchhanin thu tlûkna siam a ni a, chu thu tlûkna chu lungrual taka pawm tlân a ni.​—⁠Tirhkohte 15:​1-29.

Hêng entîrnate hian kum zabi khatna Kristian kohhranah inrem lohnain a hnam zâwnga inthleina emaw, doctrine pakhat bulfûk lutuk avânga inrem lohna emaw a thlen lo tih a târ lang. Engvângin nge a thlen loh? Inpumkhatna awmtîrtu thilte​—⁠Jehova an hmangaihna te,  Isua Krista an rinna te, hmasial lova inhmangaih tawnna te, thlarau thianghlim kaihhruaina pawmna te, Bible zirtîrna hriatthiam dân thuhmun neihna te, leh mahni nungchang thlâk inpeihna te​—⁠chu kohhran hmasa inpumkhattîr tûr leh inremtîr tûra a chak tâwk vâng a ni.

Tûn Laia Biaknaa Inpumkhatna

Tûn laiah inpumkhatna chu chutiang bawka neih theih a ni em? Chûng inpumkhatna awmtîrtu thilte chuan rinna thuhmun nei mite chu hîp khâwmin, khawvêl hmun tina hnam chi hrang hrangte chu a inremtîr thei em? Aw, thei chiang e! Ram 230 chuanga Jehova Thuhretute chu khawvêl pum inunaunaah an inpumkhat tlat a. Kum zabi khatnaa Kristiante inpumkhattîrtu thilte chuan anni chu a phuar khâwm tlat a ni.

Jehova Thuhretute neih inpumkhatna awmtîrtu ber chu Pathian Jehova hnêna an inpumpêkna hi a ni a. Chu chu dinhmun eng ang hnuaiah pawh a chungah rinawm tlat an tum tihna a ni. Jehova Thuhretute chuan Isua Krista leh a zirtîrnate chu an ring tlat bawk a. Hêng Kristiante hian an rinpuite chungah mahni inphat hmangaihna an lantîr a, thu an hrilhna ram zawng zawngah Pathian Lalram chanchin ṭha thuhmun chu an puang a ni. Chu Lalram chanchin chu rinna chi hrang hrang neite, hnam chi hrang hrang te, ram mi nihna chi hrang hrang neite, leh hausa leh retheite hnêna hrilh an duh a ni. Tin, Jehova Thuhretute chu khawvêl thilahte an tualdawih tlat a, chu chuan mihringte ṭhendarhtu politics lam thil te, hnam thil te, khawtlâng thil te, leh sumdâwnna lam thilte do hneh tûrin a ṭanpui a ni. Thuhretu zawng zawngte chuan Bible tehnate mila nunna hmangin inpumkhatna awmtîr tûra an mawhphurhna chu an pawm ṭheuh a ni.

Inpumkhatnain Mi Dangte A Hîp

He an inpumkhatna hian Thuhretu ni lo mi dangte ngaihven a hlawh hle a. Entîr nân, Ilse-i * chu tûn hmain Germany rama sakhaw rawngbâwltute awm khâwmnaah Katholic nula thianghlim a ni a. Engin nge Jehova Thuhretute lama hîp le? Ilse-i chuan: “Ka mi tawn tawhte zînga mi ṭha ber an ni. Indonaah an tel lo; mi dangte tina tûrin engmah an ti lo. Mite chu Pathian Lalram hnuaia lei paradis-ah hlim taka chêng tûrin ṭanpui an duh a ni,” a ti.

Tin, entîrna dang leh chu indopui pahnihna laia France rama tirh German sipai Günther-a hi a ni. Ni khat chu Protestant puithiam pakhat chuan Günther-a telna sipai pâwl atân inkhâwm a neihpui a. Puithiam chuan Pathian ṭanpuina, vênhimna, leh hnehna dîlin a ṭawngṭaisak a ni. Hun an hman zawh chuan, Günther-a chu râl vêngtu angin a duty ṭan a. En hlatna hmanga hmêlmate a en chuan, puithiam dang pakhatin inkhâwmna a neihpui lai chu a zuk hmu tlat a ni. A hnuah Günther-a chuan: “Chu puithiam pawh chuan Pathian ṭanpuina, vênhimna, leh hnehna a dîlsak ve ngei âwm si a. Engtin nge Kristian kohhrante chu indona thuhmuna a inep zâwnga an tel theih tih ka ngaihtuah a ni,” a ti. Hêng thilte hi Günther-a rilruah chuan a châm tlat a. A hnuah indonaa tel lo Jehova Thuhretute nêna an inbiak fuh tâkah chuan, Günther-a chu an khawvêl pum inunauna zîngah a lo tel ta a ni.

Ashok-a leh Feema-i chu tûn hma chuan Khawchhak lam sakhaw vuantu an ni a. An inah chuan, pathian maichâm an nei a ni. Natna khirh takin an chhûngkua a tlâkbuak chuan, an sakhua chu an bihchiang a. Jehova Thuhretute nêna an inbiakna aṭangin, Bible zirtîrna leh Thuhretute zînga hmangaihna awm an hmuh chuan Ashok-a leh Feema-i rilru chu a khawih hle. Tûnah chuan Jehova Lalram chanchin ṭha thuchhuahtu taima tak an ni dêr tawh a ni.

Ilse-i te, Günther-a te, Ashok-a te, leh Feema-i te chu Jehova Thuhretute khawvêl pum huap inunauna zînga mi a nuaih têlte nên an inpumkhat tawh a ni. Anni chuan tûn laia biaknaa anmahni inpumkhattîrtu thilte chuan nakin lawkah thuawih mihring zawng zawng a inpumkhattîr dâwn tih Bible thutiam chu an ring tlat a. Chutih hunah chuan, sakhaw hminga nunrâwng taka insawisakna te, inrem lohna te, leh inṭhendarhna te a awm tawh lo vang. Khawvêl pum pui chu Pathian dik, Jehova biaknaah a inpumkhat tlat tawh ang.​—⁠Thu Puan 21:​4, 5. (w05 1/1)

[Footnote]

[Phêk 4, 5-naa milemte]

An lo chhuahna chi hrang hrang mah ni se, Kristian hmasate chu an inpumkhat