Pathian Ram Thlîr Lâwkna Chu A Tak A Lo Ni Ta
Pathian Ram Thlîr Lâwkna Chu A Tak A Lo Ni Ta
“Khâwnvâr hmun thima êng an ngaihsak anga [hrilh lâwkna thu] in ngaihsak chuan in tiṭha ang”—2 PETERA 1:19.
1. Eng thil inkalh tak nge tûn lai khawvêlah kan hmuh?
TUN lai khawvêl hi harsatna hlîrin a tlâkbuak a. Leilung thilte chhiatna aṭanga khawvêl puma fîrfiaka chêtna thlengin, mihringte harsatna tawh chu thunun theih loh niin a lang. Khawvêl sakhuate pawhin he mi kawngah hian an ṭanpui thei lo. Dik takin, mihringte ṭhendarhtu mahni pâwl âtchilhna te, inhuatna te, leh mahni hnam ngaihsânna te hmangin dinhmun chu an tichhe zual sauh zâwk a ni. Ni e, hrilh lâwk ang ngeiin “thim chhah mupin mite” a khuh a ni. (Isaia 60:2) Nimahsela, chutih rual chuan maktaduai tam takte chuan nakin hun chu inringtâwk takin an thlîr a ni. Engvangin nge? Pathian thu hrilh lâwkna chu “khâwnvâr hmun thima êng . . . anga” an ngaihsak vâng a ni. Anni chuan Pathian “thu,” a nih loh leh a thuchah tûna Bible-a kan hmuhte hmangin an kawng an vêngṭha a ni.—2 Petera 1:19.
2. Daniela “tâwpna hun” hrilh lâwkna aṭangin, tute hnênah chauh nge thlarau lam thil hriatthiamna pêk a nih?
2 “Tâwpna hun” chungchângah zâwlnei Daniela chuan: “Mi tam tak an tlân vêl ang a, hriatnate a pung dâwn a ni. . . . Mi tam tak chu an intithianghlimin an intivâr ang a, an lo ṭha ang; mahse mi suaksualte chuan sual takin an ti ang a, mi suaksual tumahin a ngaihna an hre lo vang a; mi fingte erawh chuan a ngaihna an hria ang,” tiin a ziak a ni. (Daniela 12:4, 10) Thlarau lam thil hriatthiamna hi tih tak zeta “tlân vêl” te, a nih loh leh taima taka a Thu zira a tehnate hnuaia intulût a, a duhzâwng tih tumte tân chauh a ni.—Matthaia 13:11-15; 1 Johana 5:20.
3. Kum 1870 chho bâwr vêl khân, Bible zirlai hmasate’n eng thu dik pawimawh tak nge an hriatthiam?
3 “Tâwpna hun” inṭan hma, kum 1870 chho bâwr vêl ṭantîr lamah chuan, Pathian Jehova chuan “vân ram thurûk” chu a rawn hailang chiang ṭan a. (2 Timothea 3:15; Matthaia 13:11) Chu tih lai chuan, Bible zirlaite chuan mi nâwlpuite ngaih dân nêna inperhsan tak, Krista lo kal lehna chu mita hmuh theih a ni dâwn lo tih an hre thiam a. Vâna lalṭhutthlênga ṭhuttîr a nih hnuah, lei Lal anga lei lama a ngaihsakna pein Isua chu a lo kal leh a ni. Mita hmuh theih chhinchhiahna hlâwm khat chuan a zirtîrte chu mita hmuh theih lohvin a lo awm ṭan tawh tih a hriattîr a ni.—Matthaia 24:3-14.
Thlîr Lâwkna A Tak A Lo Nih Hun
4. Engtin nge Jehova’n tûn laia a chhiahhlawhte rinna a tihchak?
4 Hmêl danglamna inlârna chu Lalrama Krista ropuina thlîr lâwkna ropui tak a ni. (Matthaia 17:1-9) Mi tam takin Isua’n ti tûra an beisei ang a tih loh avânga a hnung an zui loh lai khân, chu inlârna chuan Petera te, Jakoba te, leh Johana te rinna chu a tichak a ni. Chutiang bawkin, he tâwpna hunah pawh hian hmêl danglamna inlârna mak ropui tak leh chu mi nêna inkungkaih hrilh lâwkna tam takte thlen famkimna hre thiam zual zêl tûra ṭanpuiin, Jehova chuan tûn laia a chhiahhlawhte rinna chu a tichak a ni. Tûnah chuan chûng rinna tichak thei thlarau lam thil a tak lo ni ta thil ṭhenkhat chu i lo ngaihtuah ang u.
5. Vârparh Arsi chu tunge ni a, eng hunah leh engtin nge a “lo chhuah”?
5 Hmêl danglamna chungchâng sawilangin, tirhkoh Petera chuan: “Tin, hrilh lâwkna thu nghet lehzual chu kan nei a ni, khua a lo vâr a, vârparh arsi chu in thinlunga a lo chhuah hma loh zawng chu chu khâwnvâr hmun thima êng an ngaihsak anga in ngaihsak chuan in tiṭha ang,” tiin a ziak a ni. (2 Petera 1:19) Chu entîr nei Vârparh Arsi emaw, “arsi êng tak, vârparh” emaw chu Isua Krista, chawimawia awm tawha chu a ni a. (Thu Puan 22:16) Kum 1914-a Pathian Ram vâna a pian khân, ani chu a “lo chhuak” a, hun thar inher chhuahna chhinchhiahna a lo ni ta a ni. (Thu Puan 11:15) Hmêl danglamna inlârnaah chuan Mosia leh Elija chu Isua kiangah lo langin, an inbia a. Chûng mite chuan tute nge an entîr lâwk?
6, 7. Hmêl danglamnaah khân Mosia leh Elija te khân tute ai nge an awh a, an chungchâng thil pawimawh chipchiar tak chu engtin nge Bible-in a laihlan?
6 Mosia leh Elija’n Krista ropuina an ṭâwmpui avângin, hêng thuhretu rinawmte hian Lalrama Isua rorêlpui tûrte an entîr a ni. Isua’n rorêlpui tûr a nei tih hriatthiamna hi zâwlnei Daniela hmuhtîr inlârna Messia lala ṭhuttîrna nên pawh a inrem a ni. Daniela chuan “mihring fapa ang” hian “Hmâkhawsânga,” Pathian Jehova hnên ata “rorêlna hlun” a dawn lai a hmu a. Mahse, a hnu lawkah Daniela chu eng nge hmuhtîr a nih chhinchhiah rawh: “Ram leh rorêlna leh vân pum pui hnuaia ramte ropuina chu Chungnungbera mi thianghlimte hnênah chuan pêk a ni ang,” tiin a ziak a ni. (Daniela 7:13, 14, 27) Ni e, hmêl danglamna inlârna a thlen hma kum zabi nga aia tamah khân, Pathian chuan ‘mithianghlim’ ṭhenkhatin Krista lal ropuina an ṭâwmpui dâwn tih a sawi lang tawh a ni.
7 Daniela inlârna hmuha mi thianghlimte chu tute nge ni? Chutiang mite hnênah a ni, tirhkoh Paula chuan: “Thlarau ngei chuan keimahni thlarau nên Pathian fate kan ni tih min hriattîr ṭhin; tin, fate kan nih chuan roluahtute kan ni a; Pathian roluahtu, Krista luahpuitute kan ni; a hnêna chawimawiin kan awm ve theihna tûrin amah kan tuarpui tak zet chuan,” a tih ni. (Rom 8:16, 17) Mi thianghlimte chu thlarau lama hriak thih Isua zirtîrte an ni a. Thu Puanah Isua chuan: “A hnehtu apiang ka lalṭhutphahah ka hnênah ka ṭhuttîr ang, kei pawhin ka hneh a, ka Pa hnênah a lalṭhutphaha ka ṭhu ang khân,” a ti a. Hêng mi 1,44,000, tholeh ‘hnehtute’ hian, Isua rualin lei chung zawng zawngah ro an rêl dâwn a ni.—Thu Puan 3:21; 5:9, 10; 14:1, 3, 4; 1 Korinth 15:53.
8. Isua zirtîr hriak thihte chuan engtin nge Mosia leh Elija hna thawh ang an thawh a, eng nge a rah chhuah?
8 Engvângin nge Mosia leh Elija khân hriak thih Kristiante an entîr? A chhan chu, chûng Kristiante chuan mihring an nih laiin Mosia leh Elija hnathawh nêna inang tak an thawh vâng a ni. Entîr nân, tihduhdahna hnuaiah pawh Jehova thuhretute angin rawng an bâwl a. (Isaia 43:10; Tirhkohte 8:1-8; Thu Puan 11:2-12) Mosia leh Elija angin mi rinawmte Pathian hnêna inpumpêk tûra an fuih rualin, sakhaw dik lo chu huaisen takin an pho lang a ni. (Exodus 32:19, 20; Deuteronomy 4:22-24; 1 Lalte 18:18-40) An hnathawh chuan rah a chhuah em? Chhuah tehrêng e! Hriak thih zawng zawng an khâwm kim vek bâkah, “berâm dang” maktaduai tam takte chu Isua Krista hnuaia intukluh duhna nei tûrin an ṭanpui bawk a ni.—Johana 10:16; Thu Puan 7:4.
Krista’n A Hnehna A Tifamkim
9. Engtin nge Thu Puan 6:2-in tûn laia Isua nihna a sawi?
9 Isua chu mihring sabengtung no chunga chuang mai mai ni tawh lovin, tûnah chuan Lal thiltithei tak a ni tawh a. Bible-in indo entîr nâna a hman ṭhin—sakawr chunga chuang angin a sawi a ni. (Thufingte 21:31) Thu Puan 6:2 chuan: “Ngaiteh, sakawr vâr ka hmu a; a chunga chuang chuanin thalngul a keng a; tin, a hnênah chuan lallukhum an pe a; tin, hneh chung leh hneh zêl tûrin a chhuak ta a,” tiin a sawi a ni. Chu bâkah, fakna hla phuahtu Davida chuan Isua chungchângah: “LALPA chuan i chakna tiang chu Zion tlâng aṭangin a tîr chhuak ang: nangin nangmah dotute zîngah ro rêl rawh,” tiin a ziak a ni.—Sâm 110:2.
10. (a) Engtin nge Isua hneh chunga chhuahna chu ropui taka a inṭan? (b) Krista hnehna hmasa chuan a tlângpuiin khawvêl engtin nge a nghawng?
10 Isua hnehna hmasa ber chu, a hmelma thiltithei ber—Setana leh ramhuaihote hnehna a ni a. Vân aṭanga hnawt chhuakin, leiah a paih thla a. An hun a tlêm tih an hriat avângin, hêng thlarau suaksualhote hian an thinrimna chu mihringte chungah hrithlain, chungpikna nasa tak an thlentîr a ni. He chungpikna hi Thu Puan chuan sakawr chungchuang pathum dangte nên a tehkhin a ni. (Thu Puan 6:3-8; 12:7-12) Isua sawi ‘a lo kal lehna leh khawvêl tâwpna chhinchhiahna’ nêna inremin, chûng sakawr chungchuangte chuan indona te, ṭam te, leh thihna hrilêng te an thlentîr a ni. (Matthaia 24:3, 7; Luka 21:7-11) Hêng “nau veina” hi Krista’n mita hmuh theih Setana inawpna pâwl kuangbâng zawng zawng a ‘hneh zawh vek’ thlengin a nasa chho tial tial zêl ang. *—Matthaia 24:8.
11. Engtin nge Kristian kohhran chanchin chuan Krista lal thuneihna a lantîr?
11 Isua lal thuneihna pawh hi khawvêl puma Lalram thuchah hrilh tûra thupêk tipuitling thei tûra Kristian kohhrante a humhimnaah hian a lang a ni. Babulon Khaw Ropui—khawvêl sakhaw dik lo lalram—dodâlna leh sawrkâr kawlh takte aṭanga râwng taka dodâlna kan tâwk nachungin, thu hrilhna hna chu chhunzawm zêl mai ni lo, khawvêl chanchina tûn hmaa la hriat ngai loh khawpa nasaa neih a ni. (Thu Puan 17:5, 6) Krista lalna finfiahna thiltithei tak a va ni êm!—Sâm 110:3.
12. Engvângin nge mi tam takin Krista mita hmuhtheih lohva a lo awmna chu an hriat loh?
12 Mahse, lungngaihthlâk takin, Kristiana inchhâl mi maktaduai tam takte tiamin khawvêl mi a tam zâwkte chuan he leia thil pawimawh tak thleng mêkte’n mita hmuh theih lova a lo awm lehna a lantîr a ni tih an hre lo. Pathian Ram chungchâng puangtute chu an nuihsan hial zâwk mah a ni. (2 Petera 3:3, 4) Engvângin nge? Setana’n an rilru mit a tihdelsak vâng a ni. (2 Korinth 4:3, 4) Dik takin, thlarau lam thimnain Kristiana inchhâlte chu kum zabi tam tak chhûng a khuh tawh a, Lalram beiseina hlu tak pawh chu a thlahthlamtîr hial a ni.
Lalram Beiseina Thlahthlam A Ni
13. Thlarau lam thima khuhna chuan eng nge a thlen?
13 Isua chuan buh zînga buh lem theh angin kalpêngte chuan Kristian kohhrante chu an tibawrh bâng ang a, tam takte chu a hruai bo ang tih a sawi lâwk a ni. (Matthaia 13:24-30; 36-43; Tirhkohte 20:29-31; Juda 4) A hunah chuan, hêng Kristian nia inchhâlte hian milem betute kûtte, an thil chînte, leh zirtîrnate chu chhawmin, “Kristian” chîn dân niin an sawi hial a ni. Entîr nân, Kristmas hi milem pathian Mithra leh Saturn biakna aṭanga lo chhuak a ni. Mahse, hêng Kristian nia inchhâlte hi, milem betute kût nî chhawm tûr hian engin nge hmin tehlul le? The New Encyclopædia Britannica (1974) chuan: “Isua Krista piancham lawmna Kristmas hi, Isua lo kal leh thuai beiseina hloh avânga siam a ni,” a ti.
14. Engtin nge Origen-a leh Augustine-a te zirtîrna chuan Lalram thutak chu a tihkhaw loh?
14 “Lalram” tih awmzia an herh kawi dân pawh hi ngaihtuah teh. Kum zabi 20-naa Pathian Ram hrilhfiahna lehkhabu, The Kingdom of God in 20th-Century Interpretation chuan: “Origen-a [kum zabi pathumnaa theologian] chuan Kristiante’n ‘lalram’ an hmanna chu thinlung chhûngrila Pathian rorêlna angin a rawn thlâkthleng,” a ti. Origen-a chuan eng ṭanchhanin nge chutianga a zirtîr? Bible a ṭanchhan lo, “khawvêl finna leh thlîr dân a ṭanchhan a, chu chu Isua leh hmân lai kohhrante ngaih dân nên a inang lo hle” a ni. A lehkhabu chhuah De Civitate Dei (Pathian Khawpui) tihah chuan, Hippo khaw chhuak Augustine-a (354-430 C.E.) chuan kohhrante ngei hi Pathian Ram chu a ni, a ti. Chutiang Pathian Lehkha Thu mil lo ngaih dân chuan Kristianna rama kohhrante chu politic thuneihna chhawm tûrin chhan leh vâng a pe a ni. Tin, chutiang thuneihna chu kum zabi tam tak chhûng nunrâwng takin an hmang chho a ni.—Thu Puan 17:5, 18.
15. Kristianna rama kohhran tam takte chungah engtin nge Galatia 6:7 a thlen famkim?
15 Mahse, tûn laiah pawh hian, kohhrante chuan an tuh rah chu an seng mêk a ni. (Galatia 6:7) Tam takte chuan an thiltihtheihna leh anmahni mi leh sate chu an chân mêk a. Hetiang thil hi Europe-ah chuan a langsâr hle a ni. Christianity Today tih chanchinbu sawi dân chuan, “tûnah chuan Europe-a biak in (cathedral) ropui tak takte chu Pathian biakna hmun atân ni lovin thilhlui dahkhâwmna in (museum) atâna hman a ni a, zin vâkvêlte chauhvin an tlawh tawh a ni.” Chutiang bawk chu khawvêl hmun dangah pawh hmuh theih a ni. Hei hian sakhaw dik lo tân eng nge a entîr? Thlâwptu a awm loh avângin a rêm mai dâwn em ni? Engtin nge biakna dik a nghawng ang?
Pathian Ni Ropui Atân Inbuatsaih Rawh
16. Engvângin nge Babulon Khaw Ropui huatna pung zêl chu thil pawimawh tak a nih?
16 Tlângkâng aṭanga meikhu leh vâpte inphuh chhuak chuan tlâng a kâng puak thuai dâwn tih a târ lan angin, khawvêl hmun tam taka sakhaw lam huatna pung chho zêl hi sakhaw dik lote tâwpna a hnai tawh a ni tih târ langtu a ni. (Thu Puan 17:15-17; 18:21) Rei lo têah, Jehova chuan Babulon Khaw Ropui, thlarau lama nawhchizuar chu pholang tûr leh suasam tûra ṭangrual tûrin khawvêl politics lam thilte chu a chêttîr thuai ang. (Thu Puan 17:15-17; 18:21) Kristian dikte chuan chu thilthleng tûr leh a dawta lo thleng tûr “hrehawm nasa tak” hmêlhmang dangte chu an hlau tûr a ni em? (Matthaia 24:21) Teh suh e! Pathianin mi sualte a do hunah hian Kristian dikte chuan hlim chhan tûr an nei zâwk dâwn a ni. (Thu Puan 18:20; 19:1, 2) Kum zabi khatnaa Jerusalem leh chuta chêng Kristiante entîrna kha han ngaihtuah teh.
17. Engvângin nge Jehova chhiahhlawh rinawmte chuan he kalhmang tâwpna hi huai taka an hmachhawn theih?
17 C.E. 66-a Rom sipaite’n Jerusalem an hual khân, thlarau lama harhvâng Kristiante chuan mak an ti lo va, an hlau hek lo. Pathian Thu taima taka an zir avângin, “a boral dâwn” tih an hria a. (Luka 21:20) Pathianin hmun hima tlân chhiatna tûr kawng a hawnsak dâwn tih pawh an hre bawk a ni. Chutiang a lo thlen chuan, Kristiante chu an tlân chhia a ni. (Daniela 9:26; Matthaia 24:15-19; Luka 21:21) Chutiang bawkin tûn laiah pawh, Pathian hriate leh a Fapa thu âwihte chuan he kalhmang tâwpna hi huai tak an hmachhawn thei a. (2 Thessalonika 1:6-9) Dik tak chuan, hrehawm nasa takin a rawn thlen hunah chuan, hlim takin an ‘en chho vin, an dâk chhuak ang; an tlanna tûr chu a hnai tih an hriat avângin.’—Luka 21:28.
18. Goga’n Jehova chhiahhlawhte a beihna rah chhuah chu eng nge ni ang?
18 Babulon Khaw Ropui tihchhiat a nih hnuah, Setana chuan Magoga rama Goga anga ṭangin, a tâwp ber atân Jehova Thuhretu thlamuang takte chu theih tâwp chhuahin a rawn bei ang. ‘Chhûmin ram a tuam mup mup ang maia’ rawn thawkin, Goga hote chuan awlsam taka hneh an inbeisei ang. Mahse, thil mak thintiṭhâwng takin anni chu a nghâk tlat mai! (Ezekiela 38:14-16, 18-23) Tirhkoh Johana chuan: “Vân inhawng ka hmu a; tin, ngai teh, sakawr vâr leh a chunga chuang, Rinawma leh Diktaka an tih chu ka hmu bawk a. . . . A kâ aṭangin khandaih hriam tak a chhuak a, chu chu hnam tin sahna tûr a ni,” tiin a ziak a. He mita hmuh theih loh “Lalte Lal” hian rinawm taka Jehova betute chu chhanchhuakin, an hmêlma zawng zawngte chu a nuai chimit vek ang. (Thu Puan 19:11-21) Hmêl danglamna inlârna thlen famkimna vâwrtâwp a va ni dâwn tehrêng êm!
19. Engtin nge Krista hnehna zawng zawng chuan a zirtîr rinawmte a nghawng ang a, eng thil nge tûnah tih an tum ang?
19 Isua chu ‘chu mi ni-ah chuan ringtu zawng zawng mak tih tûr’ a ni ang. (2 Thessalonika 1:9, 10) Pathian Fapa hnehna mak ti taka lo hmute zînga tel chu i duh em? I duh chuan, i rinna tichak la, ‘i rin loh hunah Mihring Fapa a lo kal dâwn si avângin inring rengin awm’ rawh.—Matthaia 24:43, 44.
Ngaihven Reng Rawh
20. (a) Engtin nge Pathianin “bawi rinawm, fing tak” min pêk kan hlutzia kan lantîr theih ang? (b) Eng zawhnate nge mahni kan inzawh ang?
20 “Bawi rinawm, fing tak” chuan Pathian mite chu thlarau lama harhvâng tûr leh ngaihven renga awm tûrin an fuih reng ṭhîn a. (Matthaia 24:45, 46; 1 Thessalonika 5:6) Hêng a hun taka hriatnawntîrnate hi i ngaihlu em? Chûng chu nuna thil pawimawh dân indawt siam nân i hmang em? Engvângin nge: ‘Pathian Fapa vâna rorêl lai min hmuhtîr thei tûrin thlarau lam thlîrna fiah chiang tak ka nei em? Babulon Khaw Ropui leh Setana kalphung zawng zawngte chunga Pathian rorêlna thlentîr tûrin a inpeih reng tawh tih ka hria em?’ titein i inzawh loh vang?
21. Engvângin nge ṭhenkhatin an thlarau lam khaw hmuhna hloh an phal a, eng nge an tih vat ngai?
21 Tûna Jehova mite nêna inkâwm ṭhenkhat hian an thlarau lam khaw hmuhna chu an hloh va. Isua zirtîr hmasa ṭhenkhatte ang bawkin, nghahpeihna emaw, chhelna emaw an tlâkchham vâng a ni thei ang em? Dam chhûng khawsak lungkhamna, hausak âtchilhna, a nih loh leh tihduhdahna hian anni chu a nghawng a ni thei ang em? (Matthaia 13:3-8, 18-23; Luka 21:34-36) A ṭhen chuan “bawi rinawm, fing tak” thu leh hla chhuah ṭhenkhat chu hriatthiam harsa an ti pawh a ni mai thei. Hetiang zînga a engemaw ber hi i tawng a nih chuan, Pathian Thu tha thar chhuaha zir tûr leh Jehova nêna inlaichinna ṭha leh nghet neih thar nâna ṭawngṭaia dîl tûrin kan fuih che a ni.—2 Petera 3:11-15.
22. Hmêl danglamna inlârna leh a kaihhnawih hrilh lâwknate ngaihtuahna chuan engtin nge a nghawng che?
22 Hmêl danglamna inlârna chu tihchak an mamawh huna Isua zirtîrte hnêna pêk a ni. Tûn laiah hian, chu aia min tichak tu tûr ṭha zâwk kan nei a ni—thlîr lâwkna mak ropui tak leh chu mi nêna inkungkaih hrilh lâwkna dang tam takte thlen famkimna chu. Hêng a lo awm lehna ropui takte leh nakina awmze pawimawh tak a neih tûrte chîk taka kan ngaihtuah hian, keini pawhin: “Amen. Lo kal ta che, Lalpa Isu,” titu tirhkoh Johana rilru ang chu i lantîr ve ang u.—Thu Puan 22:20. (w05 1/15)
[Footnote]
^ par. 10 Hei hian nau vei angin, khawvêla harsatnate chu a thleng zingin, a nasa tawlh tawlhin, leh a thlen hun chhûng a rei tawlh tawlh ang a, hrehawm nasa takah a vâwrtâwp a thleng ang tih a sihhmuh a ni.
I Hre Chhuak Em?
• Kum 1870 chho bâwr vêl khân, Bible zirlai pâwl te tak tê chuan Krista lo kal lehna chungchângah eng nge an hriat thiam?
• Engtin nge hmêl danglamna inlârna chu a thlen famkim?
• Isua hneh zêl chunga chhuahna chuan khawvêlah leh Kristian kohhranah eng nghawng nge a neih?
• Isua’n a hnehna a tihfamkim huna dam khawchhuakte zînga tel tûrin eng nge kan tih ngai?
[Zirlai Atâna Zawhnate]
[Phêk 10-naa milemte]
Thlîr lâwkna chu a tak a lo ni ta
[Phêk 11-naa milemte]
Krista’n a hnehna a ṭan laia thilthleng kha i hria em?