Tun Laia “Tuikeplung Hlu Tak” Umna
Tun Laia “Tuikeplung Hlu Tak” Umna
“He ram chanchin ṭha hi . . . hriattîrna tûrin khawvêl zawng zawngah hrilhin a awm ang.”—MATTHAIA 24:14.
1, 2. (a) Engtin nge Pathian Ram chungchâng chu Isua hun laia Judate khân an ngaih? (b) Lalram hriat thiamna dik pe tûrin Isua’n eng nge a tih a, eng nge a rah chhuah?
ISUA leia a lo kal khân Pathian Ram chungchâng chu Juda mite’n nasa takin an ngaihven a. (Matthaia 3:1, 2; 4:23-25; Johana 1:49) Mahse, atîr chuan Lalram huam chin leh a thuneihna chin hria an awm mang meuh lo va; vân lam sawrkârna a nih tûr pawh an hre hek lo. (Johana 3:1-5) Isua hnungzuitu lo ni ta mi ṭhenkhatte pawhin Pathian Ram emaw, Krista rorêlpui ni thei tûra an tih ngai emawte chu an hre thiam chiah lo a ni.—Matthaia 20:20-22; Luka 19:11; Tirhkohte 1:6.
2 Hunte aliam zêl chuan Isua chuan a zirtîrte chu dawhthei takin thil tam tak a zirtîr a, chûng zîngah chuan thuziak hmasaa kan zir tâk tuikeplung hlu tak tehkhin thu a tel a, vân lam Lalram ûmna kawnga an tih hrâm hrâm a pawimawhzia a kawhhmuh a ni. (Matthaia 6:33; 13:45, 46; Luka 13:23, 24) Hei hian an rilru a khawih ngei a ni ang, a hnu lawkah Lalram chanchin ṭha chu kâwlkil thlenga taima tak leh huai taka an puan chhuah avângin. Chutiang a nihzia chu Tirhkohte bu hian finfiahna tam tak a pe a ni.—Tirhkohte 1:8; Kolossa 1:23.
3. Kan hun lai atân Isua’n Lalram chungchâng eng nge a sawi?
3 A nih leh, tûn laiah eng nge ni ve? Lalram hnuaia lei lam paradis malsâwmnate chu mi maktaduai têlte hnênah hrilh a ni a. “Khawvêl tâwpna” chungchâng a hrilh lâwkna pawimawh takah, Isua chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin chiang takin a sawi a ni. (Matthaia 24:3, 14; Marka 13:10) Dodâlna leh harsatna hlauhawm takte leh tihduhdahna hial kârah pawh he hna lian tak mai hi thawh a nih tûrzia a hrilhfiah bawk a ni. Amaherawhchu, he thutiam: “A tâwp thlenga tuar peih apiang chu, chu mi ngei chu chhandamin a awm ang,” tih chu a pe bawk a ni. (Matthaia 24:9-13) Hêng zawng zawng ti tûr hian Isua tehkhin thua sumdâwng mi lantîr ang mahni inphatna leh inpumpêkna a ngai a ni. Tûn laiah Lalram ûm nâna chutiang rinna leh ṭhahnemngaihna lantîrtu an awm em?
Thutak Hmuhchhuah Avânga Hlimna
4. Lalram thutak chuan tûn laia mite chungah eng nghawng nge a neih?
4 Isua tehkhin thua sumdâwng mi chu “tuikeplung hlu tak” nia a ngaih a hmuhin a hlim êm êm a. Chu hlimna chuan tuikeplung a neih theih nâna a tih theih apiang ti tûrin a chêttîr a ni. (Hebrai 12:1, 2) Tûn laiah pawh, Pathian leh a Lalram chungchâng thutak chuan mite a hîpin, a chêttîr bawk a ni. Hei hian Unau A. H. Macmillan-a, Faith on the March tih lehkhabua mahnia Pathian leh mihringte tâna A thiltum a zawn dân chungchâng ziaktu thusawi chu min hriat chhuahtîr a ni. Ani chuan: “Ka thil hmuh chhuah chu mi a sâng têlte chuan kum tinin an hmu chhuak zêl a. Chûng mite chu nang leh kei ang bawk an ni; hnam tin, chi tin aṭanga lo kal, hausa leh rethei leh a pui a pangte an nih avângin. Thutak chuan thleibîk a nei lo. Mi tinrêngte a lamah a hîp khâwm a ni,” a ti.
5. Kum 2004 rawngbâwl kum report-ah eng rah ṭha nge hmuh a nih?
5 Chûng thute dikzia chu, kum tina Pathian Ram chanchin ṭhain mi thinlung ṭha pu a nuai têlte Jehova hnêna inpumpêk tûr leh a duhzâwng ti tûra a chêttîr dân kan hmuh aṭangin a lang a ni. Kum 2004 rawngbâwl kum, September 2003 aṭanga August 2004 thleng chu hmaih theih a ni bîk lo. Chûng thla 12 chhûng chuan mi 2,62,416-te chuan Jehova hnêna inpumpêkna chu baptisma changin vântlâng hmaah an lantîr a. Hei hi ram 235-ah a thleng a, chûng ramahte chuan Jehova Thuhretute chuan nunna pe thei Pathian Thu thutak chu hnam tin, chi tin, ṭawng tina mi tinrêngte ṭanpui nân chawlhkâr tin in lama Bible zirpui 6,085,387 an nei a ni.—Thu Puan 7:9.
6. Engvângin nge a kum têla kan pun chhoh zêl?
6 Hêng zawng zawng hi engin nge nih theihtîr? Jehova’n duhna rilru dik tak neite chu a lamah a hîp tih chu rinhlelh rual a ni lo. (Johana 6:65; Tirhkohte 13:48) Nimahsela, Lalram ûm nâna mahni inphat leh taima taka inhmangte thawh rimna chu ngaihnêp tûr a ni hauh lo. Kum 79 a nihin, Unau Macmillan-a chuan: “Natna leh thihnain a tlâk buak mihringte tâna thutiamte ka hriat hmasak ber aṭang khân, chu Bible thuchah ka beiseina chu a da lo. Chuta ṭang chuan keimah anga Pathian Engkimtithei, Jehova leh mihringte tâna a thiltum ṭha tak chungchâng hriatna zawngtu mi dangte kan ṭanpui theih nân, Bible zirtîrna tam lehzual hmuh chhuah chu kan tum tlat a ni,” tiin a ziak a ni.
7. Bible thutak hmu chhuaktute hlimna leh phûrna chu eng thiltawnin nge entîr?
7 Chu phûrna chu tûn laia Jehova chhiahhlawhte zîngah pawh hmuh a ni a. Vienna, Austria-a Daniela-i chu entîr nân han hmang ta ila. Ani chuan: “Ka têttê aṭangin Pathian chu ka ṭhian ṭha ber a ni a. Ka tân chuan ‘Pathian’ tih hian mi mal tumah kawh bîk a neih loh avângin a hming hriat chu ka duh reng a. Mahse, kum 17 ka nih a, Jehova Thuhretute ka ina an lo lên thleng ka nghah a ngai a ni. Anni chuan Pathian chungchâng ka hriat duh zawng zawng chu min hrilhfiah fai vek a. A tâwpah chuan, thutak chu ka zawng hmu ta a, chu chu a va ropui tak êm! Ka phûr êm avângin mi tin hnênah thu ka hril ṭan nghâl a ni,” a ti. A phûrna chuan a school kalpuite nuihzatbûr a nihtîr nghâl thuai a. Ani chuan: “Mahse, Isua’n a hnungzuitute chu a hming avângin huat leh tihduhdah an ni dâwn tih a sawi ka hriat avângin, ka tân chuan Bible hrilh lâwkna thlen famkimna hmu ang mai ka ni a. Ka lâwmin, mak ka ti hle bawk a ni,” tiin a sawi belh leh a ni. A hnu rei lo têah, Daniela-i chu Jehova hnêna inpumpêkin, baptisma a chang a; tichuan, missionary rawngbâwl chu a tum ṭan ta a ni. Pasal a neih hnu chuan Daniela-i chu an pa, Helmut-a nên Vienna hmuna African, Chinese, Filipino, leh Indian mite zîngah thu an hril ṭan a. Tûnah chuan Daniela-i leh Helmut-a te chu Africa chhimthlang lamah missionary-in rawng an bâwl mêk a ni.
An Bânsan Lo
8. Mi tam takin Pathian an hmangaihna leh a Lalram chunga an rinawm nghehna an lantîr dân kawng hlâwk tak chu eng nge ni?
8 Missionary rawngbâwlna chu tûn laia Jehova mite’n Pathian an hmangaihna leh a Lalram chunga an rinawm nghehna an lantîrna kawng pakhat a ni. Isua tehkhin thua sumdâwng mi angin, he rawngbâwlnaa telte chuan Lalram avângin ram hla tak takah zin an inhuam a. Hêng missionary-te hi Ram chanchin ṭha zawng tûra zin an ni lo ngei mai; chu Ram chanchin ṭha chu ram hla kîlkhâwra awmte hnênah an hrilh zâwk a, Isua Krista zirtîr an lo nih theih nân an zirtîrin, an ṭanpui a ni. (Matthaia 28:19, 20) Ram tam takah chuan harsatna namai lote an tawrh a ngai a. Mahse, an chhelna chu nasa taka malsâwmsak an ni.
9, 10. Central African Republic ram anga hmun hla taka missionary-te’n eng thiltawn phûrawm takte nge an tawn?
9 Entîr nân, Central African Republic ramah ni kum khân Krista thih Hriatrengnaah mi 16,184 an inkhâwm a, chu mi rama Lalram thuchhuahtute aiin a lêt sarih vêl an ni. Chu ram hmun tam takah electric current a awm loh avângin, mite chuan an ni tin hna tê tête chu pâwn lam thingkûng hlim hnuaiahte an thawk ṭhîn a. Chuvângin, missionary-te pawhin an thu hril hna chu chutiang bawkin an ti a, pâwn daihlim hnuaiah Bible an zirtîr a ni. Pâwn lam chu a êng zâwkin, a daih zâwk mai bâkah, a ṭangkaina dang a awm a. Mite chuan Bible an ngaina a, sakhuana chungchâng titi chu thil pângngai tak a ni a. A bula kalte chuan thil awm dân chu hriain, zirna chu an zawm ve mai ṭhîn a ni.
10 Chutiang a nih avângin, missionary pakhatin pâwna Bible a zirtîr laiin, tlangvâl pakhat kawng leh lam panga awm chu a lo kal a, missionary-in a la tlawh loh avângin, va tlawha Bible zirpui se a tih thu a rawn hrilh a ni. Missionary chu a lâwm hle a, chu tlangvâl chuan hma a sâwn chak hle a ni. Chu ramah chuan, police-ho chuan Thuhretute chu kawngah an lo tiding ṭhîn a; thu buai rêlnaa ko tûr emaw, pawisa chawitîr tûr emaw ni lovin, Vênnainsâng leh Awake! chhuak tharte chu dîl tûrin, a nih loh leh an tuipui tak thuziak avânga lâwmthu sawi tûrin an tiding ṭhîn zâwk a ni.
11. Harsatna a awm chung pawhin, rei tak chhûng missionary ni tawhte chuan engtin nge an rawngbâwlna chu an ngaih?
11 Kum 40 emaw, 50 emaw kal ta aṭanga missionary-a rawngbâwl ṭan mi tam takte chuan tûn thlengin rawng an la bâwl zêl a. Kan vai tâna rinna leh taihmâkna kawnga entawn tûr an va ni tak êm! Kum 42 chuang kalta chhûngin nupa tuak khatte chuan ram pathumah missionary-in rawng an bâwl a. A pasal chuan heti hian a sawi: “Harsatna tawh châng kan nei a. Entîr nân, kum 35 chhûng malaria natna kan do a ngai a. Mahse, missionary ni tûra kan thu tlûkna siam avângin kan inchhîr ngai lo,” a ti a. A nupui chuan: “Lâwm chhan tûr tam tak a awm a. Thlawhhma rawngbâwlna chu a nuam êm êm a, Bible zirpui neih ṭan pawh a awlsam hle a ni. Zirlaite inkhâwma an lo kala an inhmêlhriat tawn hmuh chu, chhûngkua inhmuh khâwmna ang mai a ni,” tiin a sawi belh a ni.
‘Engkim Pawh Chânnaah An Ruat’
12. Lalram ngaihhlutna dik tak chu eng anga târ lan nge a nih?
12 Sumdâwng miin tuikeplung ṭha a zawn hmuhin, “a neih zawng zawng chu a va hralh a, a lei ta a.” (Matthaia 13:46) Thil hlu nia ngaihte pawh chân inhuamna chu Lalram hlutna ngaihlu tak takte nihna mizia a ni. Lalram ropuinaa Krista ṭâwmpuitu tûr zînga pakhat a nih angin, tirhkoh Paula chuan: ‘Ka Lalpa Krista Isua hriatna ropui bîkzia avângin thil engkim pawh chânnaah ka ruat a ni; amah avângin thil zawng zawng ka chân ta vek a, chûng chu hnâwmhneah lek ka ngai, Krista ka hmuh theihna tûrin,’ a ti.—Philippi 3:8.
13. Engtin nge Czech Republic rama mi pakhat chuan Lalram hmangaihna chu a lantîr?
13 Chutiang bawkin, tûn laia mi tam takte chuan Lalram malsâwmnate an hmuh theihna tûrin, an nuna inthlâkthlengna lian tham tak siam pawh an inhuam a. Entîr nân, kum 2003 October-ah, Czech Republic rama kum 60 mi school headmaster chuan Chatuan Nunnaa Hruaitu Hriatna bu chu a hmu a. A chhiar hnu chuan, Bible zirna neihpui tûrin a vêngchhûnga Jehova Thuhretute chu a be pawh vat a. Thlarau lamah nasa taka hmasâwnin, inkhâwm zawng zawngah a tel ta thuai a. A nih leh sawrkâr hna lian chelh a tumna leh inthlannaa rorêltu nihna chuh a tumna chu engtin nge ni ang? A tumna chu thil dang daih atân a hmang a ni—nun atâna intlânsiakna, Lalram puangchhuaktu nih tumna lamah chuan. Ani chuan, “Ka school naupangte hnênah Bible thu leh hla chhuah tam tak ka sem thei a ni,” a ti. Kum 2004 July thlaa neih inkhâwmpuiah tuia inhnimphûmin Jehova hnêna a inpumpêkna chu a lantîr ta a ni.
14. (a) Lalram chanchin ṭhain mi maktaduai têlte chu eng ti tûrin nge a chêttîr? (b) Eng zawhna pawimawh tak nge kan inzawh ṭheuh theih?
14 Mi dang maktaduai têlte pawhin chutiang bawk chuan Lalram chanchin ṭha chu an chhâng lêt a. Anni chu suahsualna khawvêl ata lo chhuakin, an mihring hluite hlîpin, an ṭhian kawm hluite thlahin, khawvêl thil an ûmte chu an bânsan a ni. (Johana 15:19; Ephesi 4:22-24; Jakoba 4:4; 1 Johana 2:15-17) Hêng zawng zawng hi engvângin nge an tih? Tûn lai khawvêlin a pêk theih thil eng ang ai pawha Pathian Ram hmasâwmna an ngaihsân zâwk vâng a ni. Chutiang chuan Lalram chanchin ṭha chu i ngai ve em? Chu chuan Jehova thil phûtte nêna inmil tûrin i nunphung, i thil hlutte, leh i thiltumte a ṭûl ang anga thlâk tûrin a chêttîr che em? Chutianga i tih chuan tûnah leh nakin hun atân malsâwmna ropui tak i dawng ang.
Buh Sengnain A Vâwrtâwp A Thleng
15. Tâwpna huna Pathian mite tih tûr eng nge hrilh lâwk a nih?
15 Fakna hla phuahtu chuan: “I mite chu i thiltihtheihna nîah chuan mahni duh thuin an inpe ṭhîn,” tiin a ziak a. Chutianga mahni inpete zîngah chuan “tleirâwl daifîm” angte leh ‘chanchin hrilhtu hmeichhe tam takte’ an tel a ni. (Sâm 68:11; 110:3) Tûn tâwpna hunah hian Jehova mi—ahmei apa, apui apangte—taihmâkna leh inpêknain eng rah nge a chhuah?
16. Mite Lalram chungchâng zir tûra Pathian chhiahhlawhte’n an ṭanpui dân entîrna pe rawh.
16 India rama pioneer, a nih loh leh hun kima lalram thu puangtu pakhat chuan an rama bengngawng maktaduai hnih chuangte’n Lalram chungchâng zir tûra ṭanpui theih dân kawng a dap a. (Isaia 35:5) Sign language zirna hmun pakhata zir tûrin thu a titlu ta a ni. Chutah chuan bengngawng tam tak hnênah Lalram thu chu a hrilh thei a; tin, Bible zirna group-te chu din a ni a. Chawlhkâr engemaw zât lek chhûngin mi 12 chuangte chu Kingdom Hall-ah an inkhâwm ṭan ta mai a ni. A hnuah pioneer chuan inneihna hmunah Kolkata (Calcutta) aṭanga lo kal bengngawng tlangvâl pakhat a tâwk a, ani chuan zawhna tam tak neiin, Jehova chungchâng hriat belh a châkzia a lantîr a. Mahse, harsatna a awm a ni. Chu tlangvâl chu mêl 1,000 chuanga hla, Thuhretu tumahin sign language an thiam lohna Kolkata-ah college-a zir ṭan tûra a haw a ngai a. Bible a zir zawm zêl theih nâna Bangalore-a school kal phalsak tûrin a pa chu a thlêm nasa hle a, a thlêm hlawhtling ta a ni. Thlarau lama hmasâwm zêlin, kum khat hnuah chuan Jehova hnênah a inpumpêk ta a. A têttê aṭanga a thianpa pawh tiamin, bengngawngte chu Bible a zirpui lehchhâwng tawh a ni. Tûnah chuan India rama branch office chuan chu thlawhhma ṭanpui tûrin pioneer-te sign language zir tûrin ruahmanna a siam mêk a ni.
‘A Ram Chu Zawng Hmasa Zêl Rawh’
17. Isua’n sumdâwng mi tehkhin thu a sawiah eng nge a sawi tel loh va, engvângin nge a sawi tel loh?
17 Isua sawi sumdâwng mi tehkhin thu-ah kîr leh ta ila, Isua’n sumdâwng miin a neih zawng zawng a hralh hnua a inchâwm dân tûr engmah a sawi lang lo tih kan hria. A nihna takah chuan, mi ṭhenkhat chuan: ‘Sumdâwng mi chuan engmah innghahchhan tûr a neih loh avângin, engtin nge ei in tûr, thawmhnaw, leh chênna tûr chu a zawn ang? Atân tuikeplung hlu chuan eng ṭangkaina nge a neih?’ tiin an zâwt mai thei. Hêng hi tisa lama thlîr chuan zawhna inâwm tak a ni. Mahse, Isua’n a hnungzuitute chu: “A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tiin a fuih lo vem ni? (Matthaia 6:31-33) Tehkhin thua a pawimawhna lai ber chu Pathian tâna thinlung zawng zawnga inpêkna leh Lalram tâna ṭhahnemngaihna lantîr a ṭûlna chu a ni. Chu miah chuan kan tân zir tûr a awm em?
18. Isua tuikeplung hlu tehkhin thu aṭangin eng zir tûr hlu tak nge kan neih?
18 Chanchin ṭha kan zir hlim chauh a ni emaw, kum sâwm têl Lalram kan ûm tawhin, mi dangte hnênah a malsâwmnate kan hrilh tawh emaw pawh ni se, Lalram chu kan ngaihvenin kan ngaihsak chhun zawm zêl tûr a ni. Hun khirh takah kan awm ngei mai; mahse, kan thil ûm chu sumdâwng mi tuikeplung ang chiahin a tak a, engmah nêna khaikhin rual loh a ni tih rinna tûr chhan ṭha tak kan nei a ni. Khawvêla thilthlengte leh Bible hrilh lâwknate chuan “khawvêl tâwpna” huna kan awm tawhzia a tilang chiang a. (Matthaia 24:3) Sumdâwng mi angin, Pathian Ram tâna thinlung zawng zawnga kan ṭhahnemngaihna lantîrin, chanchin ṭha hrilh theihna kan chanvoah i hlim zêl ang u.—Sâm 9:1, 2. (w05 2/1)
I Hre Chhuak Em?
• Kum kalta chhûng zawngahte khân, betu dikte zînga punna chu engin nge awmtîr?
• Missionary anga rawngbâwltute zîngah eng rilru put hmang nge hmuh a nih?
• Lalram chanchin ṭha avângin mite’n eng insiam danglamna nge an neih?
• Isua tuikeplung hlu tehkhin thu aṭangin eng zir tûr hlu tak nge kan neih?
[Zirlai Atâna Zawhnate]
[Phêk 25-naa milem]
Daniela-i leh Helmut-ate chuan Vienna hmuna ram dang ṭawng thlawhhmaah thu an hril