Kan Kristian Nihna Vêng Ṭhain

“Nangni hi mi hriatpuitute in ni, . . . LALPAN a ti.”​—⁠ISAIA 43:10.

1. Eng ang mite nge Jehova’n ama lama a hîp?

KINGDOM Hall-a i awm laiin, i bula awmte chu ṭha takin han chîk teh. He biakna hmunah hian tute nge i hmuh? Tih tak zeta Pathian Lehkha Thua finna ngun taka ngaithla ṭhalaite i hmu mai thei a. (Sâm 148:​12, 13) Chhûngkaw nun hlutna kiamna khawvêla awm chung pawha Pathian tihlâwm tum ṭâng ṭâng chhûngkaw lûte pawh i hmu thei a. Tar avânga bawrhsâwm chung pawha an inpumpêkna mila nun tum tlatte pawh i hmu mai thei a ni. (Thufingte 16:31) An vaiin Jehova hmangaihna thûk tak an nei ṭheuh va. Tin, ani chuan inlaichînna neihpui tûrin anni chu a hîp a ni. Pathian Fapa chuan: “Pa mi tîrtuin a hîp loh chuan tumah ka hnênah an lo kal thei lo vang,” tiin a nemnghet a ni.​—⁠Johana 6:​37, 44, 65.

2, 3. Engvângin nge Kristian nihna hriatna vawn chu a harsat theih?

² Jehova pawm leh malsâwmna dawng mite zînga kan awm hi kan lâwm a ni lâwm ni? Mahse, hêng “hun khirh takte” kâra Kristiante anga kan nihna hriatna nghet vawn reng chu a awlsam lo. (2 Timothea 3:⁠1) Hei hi Kristian chhûngkuaa seilian ṭhalaite tân a dikzual bîk a ni. Chutiang ṭhalai pakhat chuan: “Kristian inkhâwmnaahte tel mah ila, thlarau lam thiltum chiang tak ka nei lo va; a ruh lang râwta han sawi chuan Jehova rawngbâwl duhna tak tak ka nei lo,” tiin a sawi.

³ Ṭhenkhat chuan Jehova rawngbâwl duhna tak tak nei mah se, ṭhiante nêksâwrna nasa tak te, khawvêl thununna te, leh sual châkna te lâkpênin an awm thei a. Nêksâwrnate hnuaia kan awmin, chu chuan zâwi zâwiin kan Kristian nihna min hlohtîr thei a ni. Entîr nân, tûn lai khawvêla mi tam takte chuan nungchang lama Bible tehna chu kan tûn lai khawvêl tân a hmân lai tawh emaw, a hman tlâk lo emaw niin an thlîr a. (1 Petera 4:⁠4) Ṭhenkhat chuan a kaihhruaina anga Pathian biak chu a pawimawh lo niin an ngai a ni. (Johana 4:24) Ephesi khuaa a lehkha thawnah khân, Paula chuan khawvêl hian “thlarau,” a nih loh leh rilru put hmang bul ber nei angin a sawi a. (Ephesi 2:⁠2) Chu thlarau chuan Jehova hre lo khawtlângte ngaih dân zâwm tûrin mite chu a tur a ni.

4. Engtin nge Isua’n Kristian kan nihna chiang tak vên ṭhat a pawimawhzia a târ lan?

⁴ Amaherawhchu, Jehova hnêna inpumpêk tawh a chhiahhlawhte angin, kan Kristian nihna hloh chu kan vaia tân​—⁠apui apangte tân​—⁠a râpthlâk hle dâwn tih chu kan hria a ni. Kristian nihna thlîr dân dik chu Jehova tehna leh kan chunga a thil beiseiah chuan a innghat thei a ni. Ama anpuia siam kan nih avângin chu chu a âwm a ni. (Genesis 1:26; Mika 6:⁠8) Bible chuan kan Kristian nihna chiang tak chu mi zawng zawng hmuh atâna kan puan ven nên a tehkhin a. Kan hun chungchângah Isua chuan: “Ngai teh, rûkru angin ka lo kal dâwn e; inringa puan veng chu a eng a thâwl e, chutilochuan saruakin a lêng ang a, a zahmawh an hmu dah ang e,” tiin a vaukhân a ni. * (Thu Puan 16:15) Kan Kristian mizia leh nungchang tehnate phelh a, Setana khawvêl inthununtîr chu kan duh lo. Chutiang a thlen chuan, hêng ‘puante’ hi  kan hloh dâwn a ni. Chutiang dinhmun chu a inchhîrawmin, a zahthlâk hle ang.

5, 6. Engvângin nge thlarau lama nghehna chu a pawimawh?

⁵ Kristian nihna hriatna nasa tak chuan mi nun dân a nghawng nasa hle a. Engvângin nge? Jehova betu chuan a nihna dik tak hriatna a hloh chuan, kaihhruaina emaw, thiltum emaw mu leh mal nei lovin, a buai nuai thei a. Bible chuan chutiang rilru bulbâl nei lo dinhmun lakah min vaukhân zîng hle a ni. Zirtîr Jakoba chuan: “Ringhleltu chu tuifinriat fâwn thli chhêm len leh vawrh ang a ni si a. Chutiang mi, rilru bulbâl nei lo, a thil tih zawng zawnga nghet lo mi chuan Lalpa hnênah engmah hmuh inring suh se,” tiin a vaukhân a ni.​—⁠Jakoba 1:​6-8; Ephesi 4:14; Hebrai 13:⁠9.

⁶ Engtin nge kan Kristian nihna chu kan vên ṭhat theih ang? Engin eng Chungnung Bera betu nihna kan chanvo ropui tak kan hriatna tipung tûra min ṭanpui thei? Khawngaihin a hnuaia min ṭanpui theih dân kawngte hi ngaihtuah rawh.

I Kristian Nihna Tinghet Rawh

7. Engvângin nge min enfiah tûra Jehova ngen chu a ṭangkai?

⁷ Jehova nêna in inlaichînna tinghet reng rawh. Kristian thil neih hlu ber chu Pathian nêna a mi mal inlaichînna hi a ni a. (Sâm 25:14; Thufingte 3:32) Kan Kristian nihna chungchânga rinhlelhna kan nei ṭan a nih chuan, chu inlaichînna ṭhat lam leh a thûk lam chu ṭha taka enfiah hun a ni. Inâwm takin fakna hla phuahtu chuan: “Aw LALPA, mi en fiahin, mi fiah la; . . . Ka rilru leh ka thinlung hi tithianghlim ang che,” tiin a ngên a ni. (Sâm 26:⁠2) Engvângin nge chutianga inenfiah chu a pawimawh? Keimahni ngei hi kan tum leh kan rilru chhûngril ber chhût chiang tûra kan rin tlâk loh vâng a ni. Jehova chauhvin kan chhûngril mizia​—⁠kan tumte, ngaihtuahnate, leh kan rilru veizâwngte chu a hre thei a ni.​—⁠Jeremia 17:​9, 10.

8. (a) Jehova enfiahna chu engtin nge kan hlâwkpui theih? (b) Kristian anga hmasâwn tûrin eng ang ṭanpuina nge i dawn tawh?

⁸ Jehova min enfiah tûra kan dîl hian, min fiah tûrin kan sâwm tihna a ni. Kan tum ber leh kan thinlung dinhmun dik tak târ langtu dinhmunte kan chunga a thlen chu a phal thei a. (Hebrai 4:​12, 13; Jakoba 1:​22-25) Jehova chunga kan rinawmna thûkzia târ lanna hun remchâng min pêk avângin chutiang fiahnate chu kan pawm tûr a ni. Chûngte chuan “engmah tlachham lova [kan] famkim” leh kim loh a târ lang thei a ni. (Jakoba 1:​2-4) Tin, fiah kan nih laiin, thlarau lamah kan ṭhang chho thei bawk a ni.​—⁠Ephesi 4:​22-24.

9. Bible thutak mahnia bih chian chu ngaihthah theih a ni em? Hrilhfiah rawh.

⁹ Bible thutak ring tlat tûrin inzir rawh. Jehova chhiahhlawh kan nihna hriatna chu Pathian Lehkha Thu hriatna dika a innghah loh chuan a chau thei a. (Philippi 1:​9-11) Kristian tinte​—⁠apui apangte​—⁠chuan an thurin chu Bible-a awm thutak a ni ngei tih lungawina khawpin an fiah a ngai a ni. Paula chuan a rinpuite chu: “Engkim fiah zâwk ula; a ṭha apiang pawm tlat ula,” tiin a fuih a. (1 Thessalonika 5:21) Pathian ṭih chhûngkaw nei Kristian  ṭhalaite chuan an nu leh pate rinnaa innghatin, Kristian dik an ni thei dâwn lo tih an hre tûr a ni. Davida chuan a fapa Salomona chu “i pa Pathian hi hria la, thinlung ṭha famkim . . . takin a rawng bâwl ang che,” tiin a fuih a ni. (1 Chronicles 28:⁠9) Ṭhalai Solomona tân chuan a pa’n Jehova a rin dân lo thlîr mai mai chu a tâwk lo. Jehova a hriat chian a ngai a, a hre chiang ta rêng a ni. Pathian hnênah: “Hêng mipuiho hmaa lût leh chhuaka ka awm theih nân finna leh hriatna mi han pe ang che,” tiin a ngên a ni.​—⁠2 Chronicles 1:10.

10. Engvângin nge rilru dik tak nêna tih tak zeta zawhnate zawh chu a sual loh?

¹⁰ Rinna nghet tak chu hriatna hmanga sak a ni a. “Rinna chu hriatna avângin a lo awm ṭhîn,” tih Paula chuan a târ lang. (Rom 10:17) Chu chu eng a tihna nge? Pathian Thua inchâwmna hmangin, Jehova, a thutiamte, leh a inawpna pâwla kan rinna leh rinngamna kan tichak a tihna a ni. Bible chungchâng tih tak zeta zawhnate zawhna chuan chhânna thlamuanpui awm takte min pe thei a ni. Chu bâkah, Rom 12:​2-ah: “Pathian duhzâwng, a ṭha leh lawm tlâk leh, ṭhat famkim chu hriatfiah theih nân, in rilru athara awmin lo danglam zâwk tawh rawh u,” tih Paula thurâwn chu kan hmu thei a ni. Chu chu engtin chiah nge kan tih theih? “Thutak hriatna” neihna hmangin. (Tita 1:​1, 2) Jehova thlarau chuan thu harsa takte pawh hre thiam tûrin min ṭanpui thei a. (1 Korinth 2:​11, 12) Thil engemaw hriatthiam harsa kan neih hunah Pathian ṭanpuina kan dîl thei a ni. (Sâm 119:​10, 11, 27) Jehova chuan a thu kan hriat thiam a, kan rin a, kan zawm chu a duh a ni. Rilru put hmang dik nêna tih tak zeta zawhna kan zawhte chu a pawm a ni.

Pathian Tihlâwm Tum Tlat Rawh

11. (a) Eng châkna pângngai takin nge min awh theih? (b) Engtin nge ṭhiante nêksâwrna do tûrin huaisenna kan insiam theih?

¹¹ Mihring ni lovin, Pathian tihlâwm chu tum rawh. Pâwl pakhata telna hial hmanga kan nihna sawhngheh chu thil pângngai tak a ni a. Tupawhin ṭhiante kan mamawh a, an zînga telna chuan min tihlim a ni. Mahse, tleirâwl lai chuan​—⁠puitlin hunah pawh​—⁠ṭhiante nêksâwrna chu a chak hle thei a, mi dangte entawn emaw, tihlâwm emaw duhna nasa tak a awmtîr thei a. Mahse, ṭhiante chuan kan ṭhatna tûr englai pawhin an ngaihtuah lo. A châng chuan thil sual tihpui tûr an duh mai chauh a ni. (Thufingte 1:​11-19) Kristian chuan ṭhian ṭha lote nêksâwrna laka a tlûkin, a nihna chu a thup tlângpui ṭhîn. (Sâm 26:⁠4) “Nangmah hualvêltu khawvêl nungchang entawn suh,” tiin tirhkoh Paula chuan a vaukhân a ni. (Rom 12:​2, The Jerusalem Bible) Jehova chuan pâwn lam nêksâwrna do tûra kan mamawh chhûng lam chakna min pe a ni.​—⁠Hebrai 13:⁠6.

12. Pathian kan rinna a inkaihhnawih hunah chuan eng thu bul leh entîrnain nge ding nghet tûra min thuam thei?

¹² Pâwn lam nêksâwrnain Kristian nihna kan hriatna a tihchhiat a hlauhawm hunah, Pathian chunga kan rinawm nghehna chu vântlâng ngaih dân emaw, a tam zâwk chîn dân emaw aiin a pawimawh zâwk daih tih hriat a ṭha a. Exodus 23:​2-a thu: “Thil sual tih tumin mipui chu i zui tûr a ni lo,” tih chu min vêngtu thu bul a ni. A thutiamte hlen tûra Jehova thiltihtheihna chu Israel mi a tam zâwkin an rinhlelh lai khân, Kaleba chuan mi tam zâwkte ngaih dân zui chu a hnâwl ṭhak a. Pathian thutiamte chu a rin tlâk tih a hre chiang a, a dinnghehna avângin malsâwmna nasa tak a dawng bawk a ni. (Number 13:30: Josua 14:​6-11) Chutiang bawkin Pathian nêna in inlaichînna vên ṭhat nân mi tam zâwkte ngaih dân chu i hnâwl ve duh ang em?

13. Engvângin nge kan Kristian nihna hriattîr lâwk chu a finthlâk?

¹³ I Kristian nihna hriattîr lâwk rawh. Invênna ṭha ber chu hma lâk hi a ni, tih thufing chu kan Kristian nihna humhimnaah a dik hle a. Ezra hun laia Jehova duhzâwng tih an tumna kawnga dodâlna an tawhin, Israel mi rinawmte chuan: “Lei leh vân Pathian chhiahhlawhte kan ni,” an ti. (Ezra 5:11) Hmêlmate thiltih leh sawisêlnain min nghawng chuan, hlauhnain min hneh thei a. Mi zawng zawng tihlâwm  kan tum chuan, chu chuan kan hlawhtlinna tûr a tiderthâwng ang. Chuvângin dâwihzep suh. Mi dangte hnêna Jehova Thuhretute zînga mi i nih thu chiang taka hriattîr chu a ṭha ber ṭhîn. Mi dangte chu zah thiam tak, nghet tak siin i thu bulte, i thurinte, leh Kristian anga i dinhmunte chu i hrilhfiah thei a ni. Mi dangte chu nungchang lama Jehova tehna sâng tak vawn tlat i tumna chu hriattîr rawh. I Kristian rinawmna hi sawi rem theih mai mai a ni lo tih hrilh chiang ang che. I nungchang tehna i chhuanzia lantîr rawh. Kristian nghet tak anga i lanna chuan a tichak thei chein, a vênghim thei che a, Jehova leh a mite chungchâng chîk tûrin ṭhenkhatte chu a chêttîr hial thei a ni.

14. Nuihzatbûrna emaw, dodâlna emaw chuan min tilunghnual tûr a ni em? Hrilhfiah rawh.

¹⁴ Ni e, ṭhenkhat chuan an nuihzatbûr emaw, an dodâl emaw ang che. (Juda 18) Mi dangin i thu bul hrilhfiah i tumte an dawn duh loh pawhin lunghnual mai suh. (Ezekiela 3:​7, 8) Engti khawp pawhin tum mah la, ring duh lote chu engtikahmah i hmin thei chuang lo vang. Pharaoa chu hre reng rawh. Hri emaw, thilmak tih​—⁠ama fatîr ngei chânna​—⁠emaw pawhin Mosia chu Jehova aia thusawitu a ni tih ring tûrin Pharaoa chu a thlêmthlu thei lo a ni. Chuvângin, mihring hlauhna chuan hneh che suh se. Pathian rinchhanna leh amah rinna chuan hlauhna hneh tûrin min ṭanpui thei a ni.​—⁠Thufingte 3:​5, 6; 29:25.

Hun Kal Tawhte Thlîrin, Nakin Hun Atân Inbuatsaih Rawh

15, 16. (a) Eng nge kan thlarau lam ro chu? (b) Pathian Thu hmanga kan thlarau lam ro chungchâng rilrua chhût ngunna chu engtin nge kan hlâwkpui theih?

¹⁵ I thlarau lam ro chu hlut rawh. Pathian Thu hmanga an thlarau lam ro hlu tak rilrua chhût ngunna chu Kristiante chuan an ṭangkaipui dâwn a ni. He ro-ah hian Jehova Thu thutak te, chantuana nun beiseina te, leh chanchin ṭha puang chhuaktute anga Pathian aiawh theihna te a tel a ni. Nun chhanhim thei Ram chanchin ṭha hril tûra chanvo sâng tak chang a Thuhretute zînga i chanvo chu i hmu thei em? “Mi hriatpuitute in ni,” titu chu Jehova ngei a ni tih hre reng rawh.​—⁠Isaia 43:10.

¹⁶ Hêng zawhnate hi i inzâwt thei ang: ‘He thlarau lam ro hi kan tân eng ang khawpa hlu nge a nih? Pathian duhzâwng tih chu ka nuna dah pawimawh ber tûr khawpin ka hlut tâwk em? Ro min chântîr thei thlêmna engpawh do tûra min tichak thei tûr khawpin kan hlut tâwk em?’ tiin. Kan thlarau lam ro chuan Jehova inawpna pâwl chauhva hmuh theih thlarau lam himna hriat chianna min neihtîr thei bawk a ni. (Sâm 91:​1, 2) Tûn laia Jehova inawpna pâwl chunga thilthleng chhinchhiah tlâk takte ennawnna chuan eng mihring emaw, eng thil emaw pawhin he lei aṭang hian Jehova mite a nuaibo thei lo tih chu kan rilruah a tuh nghet thei a ni.​—⁠Isaia 54:17; Jeremia 1:⁠19.

17. Kan thlarau lam ro-va innghah mai aia tam eng nge la ngai?

¹⁷ Mahse, kan thlarau lam ro-ah kan innghat bur thei lo. Pathian nêna inlaichînna ṭha chu kan nei ṭheuh tûr a ni. Paula’n Philippi khuaa Kristiante rinna tichak tûra a thawh rim hnu chuan, an hnênah: “Chutichuan ka duh takte u, thu in zawm fo ang khân ka awm chauhva thawk lovin, tûna ka awm loh hlân hian thawk zâwk mahin, hlau leh khûr chungin nangmahni chhandamna thawk chhuak rawh u,” tiin a ziak a ni. (Philippi 2:12) Chhandamna hmu tûrin mi dang kan rinchhan thei lo.

18. Engtin nge Kristian thiltihte chuan Kristian nihna kan hriatna chu a thuam zual?

¹⁸ A Theih tâwka tamin Kristian rawngbâwlnaah inhmang rawh. “Hna thawh chuan mi mal nihna chu nasa takin a thunun” tih hriat a ni a. Tûn laia Kristiante chu Pathian din tawh Ram chanchin ṭha hrilna hna pawimawh tak thawk tûra tirh an ni. Paula chuan: “Jentailte tirhkoh ka nih avângin . . . ka rawngbâwlna hi ka chawimawi a ni,” tiin a puang chhuak a ni. (Rom 11:​13, 14) Kan thu hrilhna chuan khawvêl aṭangin min tihrang a, chuta kan telna chuan kan Kristian nihna a thuam zual a ni. Kristian inkhâwmnate, Pathian biakna hmun saknaahte, a mamawhte ṭanpuinaahte, leh chutiang bawk theocratic thiltih danga a theih ang tâwka kan inhmanna chuan Kristian anga kan nihna hriatna chu a tinghet zual thei a ni.​—⁠Galatia 6:​9, 10; Hebrai 10:​23, 24.

 Nihna Chiang Tak, Malsâwmna Nasa Tak

19, 20. (a) Kristian i nih avângin eng hlâwkna nge a mi mala i tawn tawh? (b) Engin nge kan nihna dik tak min pe?

¹⁹ Kristian dik kan nih avânga kan neih hlâwkna leh ṭangkaina tam takte hi han ngaihtuah lawk teh. A mi mal taka Jehova hriat nihna chanvo kan nei a. Zâwlnei Malakia chuan: “LALPA ṭihtute chu an inbe tlâng a: LALPA chuan a lo ngaithla a, a lo hria a, LALPA ṭihtute leh a hming ngaihsaktute tân hriat rengna lehkhabu chu a hmâah ziak a ni ta a,” tih a sawi a ni. (Malakia 3:16) Tin, Pathian ṭhiante anga thlîr kan ni thei a. (Jakoba 2:23) Kan nunte chu thiltum hriat chianna te, awmze nei tak leh ṭha tak, leh rah ṭha chhuahte chuan a cheimawi a. Tin, chatuan daih nakin hun beiseina pêk kan ni bawk a ni.​—⁠Sâm 37:⁠9.

²⁰ I nihna dik tak leh i hlutzâwng chu mi dang ngaih dânah ni lovin, Pathian chhût dânah a innghat tih hre reng ang che. Mi dangte chuan mihring tehna tling lo takte hmangin min teh mai thei a. Mahse, Pathian hmangaihna leh min ngaihsakna chuan kan hlutna dik tak min pe a ni​—⁠a ta kan ni si a. (Matthaia 10:​29-31) Tin, Pathian kan hmangaihna chuan kan nihna hriatna chiang tak leh kan nun kaihhruaina fiah tak min pe chhâwng thei a ni. “Tupawhin Pathian a hmangaih chuan chu mi ngei chu ama hriat a ni.”​—⁠1 Korinth 8:⁠3. (w05 2/15)

[Footnote]

I Hre Chhuak Em?

• Engvângin nge Kristiante tân an thlarau lam nihna an vên ṭhat a pawimawh?

• Engtin nge kan Kristian nihna chu kan sawhngheh theih ang?

• Tunge kan tihlâwm tûr tih zawhna kan hmachhawn hunah, thutâwp dik siam tûrin eng thilte’n nge min ṭanpui thei?

• Engtin nge kan nihna hriat chianna chuan Kristiante anga kan nakin hun a thunun?

[Zirlai Atâna Zawhnate]

 [Phêk 17-naa milemte]

A theih ang tâwka Kristian rawngbâwlnaa inhmanna chuan kan Kristian nihna a thuammawi zual