Kristiante U​—⁠In Nihna Chhuang Rawh U!

“A chhuang apiangin Lalpa chhuang rawh se.”​—⁠1 KORINTH 1:⁠31.

1. Sakhuana lama mite rilru put hmang chu eng lamah nge a thlêk?

“PATHIAN rinna ngaihsak lohna.” Sakhaw thila ngaih dân sawichhuaktu pakhat chuan, tûn hnai mai khân rinna lama mi tam takte rilru put hmang sawifiah nân he ṭawngkam hi a hmang a ni. Ani chuan: “Tûn lai sakhuana ze pui ber chu a sakhua lo hle​—⁠chu rilru put hmang chu ‘Pathian rinna ngaihsak lohna’ tia sawi chu a inhmeh ber a ni,” tiin a hrilhfiah a. Sawifiah lehzualin, Pathian rinna ngaihsak lohna chu “mahni sakhaw lam thil zawng zawng ngaihsak hrehna,” angin a sawi a ni. Ani chuan, mi tam takin, “Pathian an ring a . . . ; amah chu an ngaihsak lo ringawt mai a ni,” a ti.

2. (a) Engvângin nge mite’n thlarau lam thil an ngaihsak lo chu thil mak a nih loh? (b) Kristian dikte tân ngaihsak lohnain eng hlauhawm nge a awmtîr?

² He ngaihsak lohna lama thlêkna hi Bible zirlaite tân chuan thilmak a ni lo. (Luka 18:⁠8) Sakhuana hrim hrimah chuan, chutiang ngaihsak lohna a awm chu beisei tûr a ni. Hmân aṭang tawhin sakhaw dik lo chuan mihringte a bumin, a tibeidawng tawh a. (Thu Puan 17:​15, 16) Amaherawhchu, Kristian dikte tân chuan phûr lohna darhzau tak leh ṭhahnemngaihna tlâkchhamna chu a hlauhawm a ni. Kan rinna ngaihsak lo va, Pathian leh Bible thutak atâna ṭhahnemngaihna hloh chu kan ngam lo. Isua chuan kum zabi khatnaa Laodikei khuaa awm Kristiante hnênah, chutianga lum chang changna laka invêng tûrin a vaukhân a ni: “I vawh hek loh va, i lum hek loh hi; i vawh emaw i lum emaw ka duh a ni. . . . I lum chang chang avângin,” tiin.​—⁠Thu Puan 3:​15-18.

Kan Nihna Hriain

3. Kristiante chuan an nihna hmêlhmang engte nge an chhuan theih?

³ Thlarau lam ngaihsak lohna do tûr chuan, Kristiante chuan an nihna an hriat chian a ngai a; tin, an nihna danglam tak chu a âwmtâwkin an chhuang tûr a ni bawk. Jehova chhiahhlawh leh Krista zirtîrte kan nih angin, Bible sawi kan nihnate chu kan hmu chhuak thei a. Mi dangte hnêna “chanchin ṭha” thatho taka kan hrilhin, ‘Pathian hnathawhpui,’ Jehova ‘thuhretute’ kan ni. (Matthaia 24:14; 1 Korinth 3:9; Isaia 43:10) Mi ‘inhmangaih tawnte’ kan ni a. (Johana 13:34) Kristian dikte chu ‘hman fo avânga chhia leh ṭha fiah tûra an hriat theihna sawizawitute’ an ni. (Hebrai 5:14) “Khawvêlah hian tiêngtu” kan ni a. (Philippi 2:​14-16) “Jentailte zînga [kan] chêtzia chu mawi tak” nihtîr kan tum tlat a ni.​—⁠1 Petera 2:12; 2 Petera 3:​11, 12, 14.

4. Engtin nge Jehova betu chuan a nih lohna chu a hriat theih?

⁴ Jehova betu dikte chuan an nih lohnate pawh an hre bawk a. “Anni chu khawvêla mi an ni lo,” an Hruaitu, Isua Krista chu khawvêla mi a ni lo ang bawkin. (Johana 17:16) ‘Pathian nunna lakah ṭhena lo awm, an hriatna thim’ “Jentailte” lak aṭangin an awm hrang a ni. (Ephesi 4:​17, 18) Chutianga an tih avângin, Isua hnungzuitute chuan “Pathian ngaihsak lohna leh khawvêl châknate bânsanin, tûn lai khawvêlah hian insûm leh fel tak leh Pathian  ngaihsakin [an] awm,” a ni.​—⁠Tita 2:​12, 13.

5. ‘Jehova chhuang’ tûra fuihna chu eng tihna nge?

⁵ Kan nihna chiang taka kan hriatna leh lei leh vân Awptu Chungnungber nêna kan inlaichînna chuan ‘Jehova chhuang’ tûrin min chêttîr a ni. (1 Korinth 1:31) Chu chu eng ang inchhuanna nge ni? Kristian dikte kan nih angin, Jehova chu Pathiana kan neih avângin kan lâwm a. He fuihna hi kan zui a ni: “A chhuang apiang erawh chuan hei hi chhuang rawh se, kei LALPA hi, ngilneihna te, rêldikna te, felna leia hmang ṭhîntu chu ka ni tih mi hriat a, a hriat thiamna chu,” tih chu. (Jeremia 9:24) Pathian kan hriatna leh mi dangte ṭanpui tûra ama mi hman kan nihna chanvo chu kan “chhuang” a ni.

Chona Awm Chu

6. Engvângin nge ṭhenkhat chuan Kristian an nihna chiang taka hriat hran chu harsa an tih?

⁶ Mahse, Kristiante anga kan nihna danglam bîk tak chiang taka hriat hran chu a awlsam ṭhîn lo. Kristian pakhat anga sei lian tlangvâl pakhat chuan hun engemaw chen thlarau lama a chak loh lai hre chhuakin: “A chang chuan, Jehova Thuhretute zînga mi kan nih chhan pawh ka hre lo niin ka hria. Ka têt tê aṭangin thutak zirtîr ka ni a. A châng chuan hei hi sakhaw pâwl din pakhat ang lekah ka ngai ṭhîn,” a ti. Mi dangte chuan an nihna chu intihhlimna khawvêl te, chanchin thehdarhna te, leh Pathian nêna inrem lo tûn lai nun thlîr dânte an thununtîr a ni thei. (Ephesi 2:​2, 3) Kristian ṭhenkhat chuan an thil hlutte leh an thiltumte chhût lêtin, mahni inrin hlelhna neih châng an nei mai thei bawk a ni.

7. (a) Eng ang chi mahni inenfiahna nge Pathian chhiahhlawhte tân a inâwm? (b) Khawiah nge hlauhawm a inthup?

⁷ Ṭha taka mahni inenfiahna neih chu a sual em? Sual lo ve. Tirhkoh Paul’n Kristiante chu mahni inenfiah tûra a fuihna: “Rinnaah chuan in awm emaw, nangmahni ngei inchhin ṭhîn ula; nangmahni ngei in fiah ṭhîn rawh u,” tih chu i hre chhuak thei a ni. (2 Korinth 13:⁠5) Hetah hian tirhkoh chuan thlarau lam chak lohna engpawh chu insiam ṭhat tum reng chunga ṭha taka hmuh tum tlat tûrin a fuih a ni. Kristianin rinnaa a awm leh awm loh a fiahin, a thusawi leh thiltih chu a rinna nên a inmil leh mil loh a fiah tûr a ni. Amaherawhchu, a dik lo zâwnga hman a nih chuan kan “nihna” a nih loh leh kan danglam bîkna hre tûr emaw, Jehova nêna kan inlaichînna leh Kristian kohhran nêna inzawmna nei lo thil dangte chungchânga chhânnate zawng tûr emawa min turtu mahni inenfiahna chuan awmzia a nei lo va, kan thlarau lam a tichhe thei a ni. * Kan ‘rinna kawnga lawng keh anga keh chhiat’ chu kan duh ngai hauh lo vang.​—⁠1 Timothea 1:19.

Harsatnate Lakah Kan Fihlîm Bik Lo

8, 9. (a) Engtin nge Mosia’n mahni a inrintâwk lohzia a târ lan? (b) Engtin nge Jehova’n Mosia tling lova inhriatna chu a chhân lêt? (c) Jehova thutiamte chuan engtin nge a nghawng che?

⁸ A châng chânga mahni inrinhlelhna nei ṭhîn Kristiante chu hlawhchham taah an inngai tûr a ni em? Ni lo ve! Chutianga inrinhlelhna neih chu thil thar a ni lo tih hriatna aṭangin thlamuanna an hmu thei a ni. Hun kal tawha Pathian thuhretu rinawmte chuan chutiang chu an tawng a ni. Entîr nân, rinna, rinawm nghehna, leh inpêkna namai lo lantîrtu, Mosia hi han ngaihtuah ta ila. A tih tûr hna khirh tak pêk a nihin, Mosia chuan hreh takin “Tunge maw ka nih le?” tiin a zâwt a ni. (Exodus 3:11) Chu chu ‘Engmah ka ni lo!’ a nih loh leh ‘Ka tling lo!’ a tihna a nih hmêl hle. Mosia seilenna dinhmun chi hrang hrangte chuan tling lovah a inngaihtîr a ni thei: Bawi hnam a ni si a. Israel mite’n an hnâwl a. Mi ṭawnghmang thiam a ni lo bawk. (Exodus 1:​13, 14; 2:​11-14; 4:10) Aigupta mite hna tenzâwng tak, berâm vêngtu a ni a. (Genesis 46:34) Pathian mi sal tângte chhanchhuak tûra tling lova a inngai pawh hi thil mak a ni lo!

⁹ Jehova’n Mosia chu thutiam ropui tak  pahnih pein a thlamuan a: “I hnênah ka awm dâwn alâwm; tichuan keima tirh ngei i ni tih hei hi i tân chhinchhiahna a ni ang: Aigupta ram ata mite chu i rawn hruai chhuah hunah chuan, he tlâng ngeiah hian Pathian rawng in la bâwl ang,” tiin. (Exodus 3:12) Pathian chuan a chhiahhlawh tîm tak hnênah chuan A awmpui reng dâwn tih a hrilh a ni. Chu bâkah, Jehova chuan a mite chu ma thei lovin a chhuah dâwn tih a târ lang bawk. Kum zabi tluanchhuakin, Pathian chuan chutiang bawk ṭanpuina chu a tiam a ni. Entîr nân, Ram Tiam an luh dâwnin Israel hnam hnênah Mosia kal tlangin: “Chhel tak leh huai takin awm ula, ṭih suh ula, . . . in hnêna kala chu LALPA in Pathian a ni si a; a tithlâwn lo vang che u a, kal pawh a kalsan tawp lo vang che u,” a ti. (Deuteronomy 31:⁠6) Jehova chuan Josua hnênah pawh: “I dam chhûng zawng tumah rêng rêngin an chelh lo vang che: . . . i hnênah pawh ka awm ve dâwn e: ka tithlâwn lovang chia, kal pawh ka kalsan tawp lo vang che,” tiin a tiam a. (Josua 1:⁠5) Tin, Kristiante chu: “Engtikah mah ka thlahthlam tawp lo vang chia, kal pawh ka kalsan tawp lo vang che,” tiin a tiam a ni. (Hebrai 13:⁠5) Chutiang ṭanpuina thiltithei tak kan neihna chuan kan Kristian nihna min chhuantîr tûr a va ni êm!

10, 11. Engtin nge Levia mi Asapha chu Jehova rawng a bâwlna hlutna chunga rilru put hmang dik nei tûra ṭanpui a nih?

¹⁰ Mosia hun hnu kum zabi nga vêlah, Levia mi rinawm, a hming Asapha chuan nun kawng fel ûm hlutna a rinhlelhna thu tlang takin a ziak a. Fiahnate leh thlêmnate kâra Pathian rawng a bâwl ṭâng ṭâng laiin, Asapha chuan Pathian nuihsawhtu mi ṭhenkhatte’n thil an tithei zâwkin an hmuingîl zâwk tih a hmu a. Engtin nge chu chuan Asapha chu a nghawng? “Nimahsela kei zawngin ka rap pelh ṭhelh ṭhelh a; ka ke pênte hi a tleu lek lek a ni. Mi suaksualte vânneihzia ka hmuhin, mi uangthuangte chu ka awt si a,” tiin a sawi a. Jehova betu nih hlutna chu a ringhlel ṭan a ni. “Athlâwn maiin a ni, ka thinlung hi ka tihfai a, ka kutte sawisêlbonaa ka sil ni,” tiin Asapha chuan a ngaihtuah a. “Nilêngin sawisakin ka awm,” a ti a ni.​—⁠Sâm 73:​2, 3, 13, 14.

¹¹ Engtin nge Asapha’n hêng rilru buaina hi a hmachhawn? Chûngte chu a hnâwl mai em? Hnâwl mai lo ve. Sâm 73-a kan hmuh angin, ṭawngṭaiin Pathian hnênah a thlen a ni. Pathian biak in a tlawhna chu Asapha rilru inthlâkthlengtîrtu a ni. Chuta a awm lai chuan, Pathian hnêna inpêkna chu kawng ṭha ber a ni tho tho tih a rawn hre chhuak ta a. Thlarau lam thil a hlutna tuaithar a nih hnu chuan, Jehova chuan sual a huain, a hunah mi suaksualte chu tihboral an ni dâwn tih a hre thiam a ni. (Sâm 73:​17-19) Chutianga a hriat thiam tâkah chuan, Asapha chuan Jehova rawngbâwltu anga chawimawi a nihzia a hriatna chu a thuamnghet sauh a ni. Pathian hnênah chuan: “I hnênah ka awm fo va: ka kut ding lam hi i lo chelh ṭhîn a. Nangin i remruatnain mi hruai ang a, chu mi hnuah chuan ropuinaah khian mi lâwm ang,” a ti. (Sâm 73:​23, 24) Asapha chuan a Pathian chu a chhuang leh ta a ni.​—⁠Sâm 34:⁠2.

 An Nihna An Hre Chiang Hle

12, 13. Bible-a Pathian nêna an inlaichînna chhuangtute entîrna sawi rawh.

¹² Kristian nihna kan hriatna tihngheh dân kawngkhat chu, harsatna tâwk reng chunga Pathian nêna an inlaichînna chhuang tak taktu, betu rinawmte rinna enfiah leh entawn hi a ni. Jakoba fapa, Josefa hi ngaihtuah teh. A tleirâwl laiin, sala vervêk taka hralh a ni a, Pathian ṭih a pa leh a in lum aṭanga mêl za têla hla Aiguptaa hruai a ni a. Aiguptaa a awm laiin, Pathian lama thurâwn lâkna tûr mihring tumah a nei lo va, a nungchang leh Pathian chunga a innghahna fiahtu, dinhmun khirh takte a tâwk a ni. Mahse, Pathian chhiahhlawh a nih a inhriatna nasa tak chu vawng tûrin theihtâwp a chhuah ngei a, thil dik nia a hriatah chuan a rinawm tlat a ni. Inhmêlmâkna dinhmun hualvêlah pawh Jehova betu nih chu a chhuang a, a ngaih dân sawi chhuah pawh a hreh lo a ni.​—⁠Genesis 39:​7-10.

¹³ Kum zabi riat hnuah chuan, sala hruai Israel hmeichhe naupang, Suria sipai hotu Naamana chhiahhlawh lo ni ta chuan Jehova betu a nihna chu a theihnghilh lo va. Hun remchâng a awm veleh, huaisen takin Elisa chu Pathian dik zâwlnei nia sawiin Jehova tân thu a hril a ni. (2 Lalte 5:​1-19) Kum tam tak hnuah chuan Lal naupang tak Josia chuan dinhmun chhe tak kârah pawh hun rei tak chhûng awh sakhaw siam ṭhatna chu a ṭan a, Pathian biak in chu siam ṭhain, hnam chu Jehova lamah a hruaikîr leh a ni. Ani chuan a rinna leh a biakna chu a chhuang a ni. (2 Chronicles, bung 34, 35) Babulon-a Daniela leh a Hebrai ṭhian pathumte chuan Jehova chhiahhlawh an nihna chu an theihnghilh ngai lo va,  nêksâwrna leh thlêmna kârah pawh rinawmna chu a vawng a ni. Chiang takin, Jehova chhiahhlawh nih chu an chhuang a ni.​—⁠Daniela 1:​8-20.

I Nihna Chhuang Rawh

14, 15. Kan Kristian nihna chhuannaah eng nge tel?

¹⁴ Pathian hmaa an dinhmun chhuanna ṭha an neih avângin, hêng Pathian chhiahhlawhte hi an hlawhtling a ni. Tûn laia keini chungchâng hi eng nge ni ve? Kan Kristian nihna chhuannaah hian eng nge tel?

¹⁵ A bul berah chuan, Jehova hming pu mite zînga pakhat nih leh a malsâwmna leh a pawm nihna avânga lâwmna nasa tak a tel a ni. Pathianin ama tate chu a ringhlel lo. Sakhaw buai lai taka awm tirhkoh Paula chuan: “Lalpa chuan ama tate chu a hria,” tiin a ziak a ni. (2 Timothea 2:19; Number 16:⁠5) Jehova chuan “a tate” chu a chhuang a. Ani chuan: “Nangni khawihtu chuan a mit nautê a khawih a ni mai,” tiin a puang chhuak a ni. (Zakaria 2:⁠8) Chiang takin, Jehova chuan min hmangaih a. Chu chu chhâng lêtin, amah nêna kan inlaichînna chu amah kan hmangaihna thûk takah a innghat tûr a ni. Paula chuan: “Tupawhin Pathian a hmangaih chuan chu mi ngei chu ama hriat a ni,” tih a sawi a ni.​—⁠1 Korinth 8:⁠3.

16, 17. Engvângin nge, Kristian, apui apangte chuan an thlarau lam ro chu an chhuan theih?

¹⁶ Jehova Thuhretute nia seilian ṭhalaite chuan an Kristian nihna chu Pathian nêna an mi mal inlaichînna ṭha taka innghatin a ṭhan chhoh leh chhoh loh an enfiah tûr a ni. An nu leh pate rinnaah an innghat ngawt thei lo. Pathian chhiahhlawh tinte chungchângah, Paula chuan: “A din leh a tlûk chu ama hotu tân a ni,” tiin a ziak a. Chuvângin, Paula chuan: “Kan zain Pathian hnênah mahni chanchin kan sawi ṭheuh tûr a ni,” tiin a sawi belh a ni. Chiang takin, chhûngkaw chhawm sakhuanaa thinlung zawng zawng tel lo va awm chhunzawmna mai chuan Jehova nêna inlaichînna hnai leh daih rei tak a awmtîr thei lo.

¹⁷ Mihring chanchin tluanchhuakah, Jehova thuhretu tam tak indawtin an awm a. Chu chu mi rinawm Abela​—⁠kum zabi 60 vêl kaltaa mi⁠—⁠aṭangin a inṭan a, tûn laia Thuhretu “mipui tam tak” leh tâwp nei lo nakin hun chên tûr Jehova betu mi puite thlengin a huam a ni. (Thu Puan 7:9; Hebrai 11:⁠4) Keini hi betu rinawmte zînga chhuan thar ber kan ni. Thlarau lam ro hlu kan va ngah tak êm!

18. Engtin nge kan thu bulte leh tehnate chuan khawvêl ata min tihhran?

¹⁸ Kan Kristian nihnaah chuan, Kristian anga mi tihrangtu thu bulte, miziate, tehnate, leh hmêlhmangte pawh a tel a. Hei chauh hi nun hlawhtling leh Pathian tihlâwm theihna ‘Kawng,’ awmchhun a ni. (Tirhkohte 9:2; Ephesi 4:22-24) Kristiante chuan ‘engkim fiahin,’ ‘a ṭha apiang an pawm tlat’ a. (1 Thessalonika 5:21) Kristianna leh Pathian laka inmi hran khawvêl inkâra danglamna nasa tak chu kan hre chiang hle a. Jehova chuan biakna dik leh dik lo inkârah ngaih pawlh tûr engmah a siam lo. A zâwlnei Malakia hmangin: “In lamlêt ang a, mi fel leh mi suaksual, Pathian rawngbâwltu leh bâwl lotu chu in thliar thei tawh ang,” tiin a hrilh lâwk a ni.​—⁠Malakia 3:18.

19. Kristian dikte chuan eng nge an neih ngai dâwn loh?

¹⁹ He khawvêl buai tak kâra Jehova chhuan chu a pawimawh êm avângin, engin nge Pathian chhuanna ṭha leh kan Kristian nihna hriatna vawng tûrin min ṭanpui ang? A dawta thuziakah rawtna ṭangkai tak a awm a ni. Chhûngte kan ngaituah rualin: Kristian dikte chuan “Pathian rinna ngaihsak lohna” an nei ngai lo vang, tih i chiang thei a ni. (w05 2/15)

[Footnote]

I Hre Chhuak Thei Em?

• Engtin nge Kristiante chuan ‘Jehova an chhuan’ theih?

• Mosia leh Asapha entîrna aṭangin eng nge i zir?

• Bible-a tute’n nge Pathian rawngbâwlna an chhuan?

• Kan Kristian nihna chhuannaah eng nge tel?

[Zirlai Atâna Zawhnate]

[Phêk 10-naa milem]

Engemaw chhûng chu, Mosia’n mahni inrintâwkna a nei lo

[Phêk 11-naa milem]

Hmân lai Jehova chhiahhlawh tam takte chuan an nihna dang lam bîk tak chu an chhuang