Tun Lai Khawvêlah Inneihna A Hlawhtling Thei

“Hmangaihna inbel rawh u, chu chu phuar famkimna a ni.”​—⁠KOLOSSA 3:14.

1, 2. (a) Kristian kohhran chungchângah eng thu dik nge phûrawm tak a nih? (b) Eng nge inneihna hlawhtling chu?

KRISTIAN kohhran kan han en hian, nupa kawp tam tak, kum 10, 20, 30, leh a aia tam hial an kawppuite laka rinawm han hmuh hi a hlimawm hle a ni lâwm ni? Hun nuam leh hrehawm kârah pawh an kawppuite lakah an rinawm tlat a ni.​—⁠Genesis 2:24.

² Tam tak chuan an nupa inkârah harsatna an nei tih chu an pawm ngei ang. Thil awmdân lo thlîrtu pakhat chuan: “Nupa nun hlim hi harsatna lakah a fihlim lo. Hlim lai leh hlim loh laite pawh a awm a . . . mahse, engtin tin emawin . . . anni chuan an inneihna chu tûn lai nun [buai tak] kârah pawh an vawng tlat a ni,” tiin a ziak a. Nupa hlawhtlingte chuan a bîk takin fate an neih chuan, tûn lai nuna nêksâwrna aṭanga lo awm buaina leh lungkhamnate hma chhawn dân chu an zir tawh a. Chutiang nupate chuan hmangaihna dik hi “a reh lo,” a nih loh leh a hlawhchham ngai lo tih an thiltawn aṭangin an zir tawh a ni.​—⁠1 Korinth 13:⁠8.

3. Innei zât leh inṭhen zât hriltu number-te chuan eng nge a târ lan a, chu chuan eng zawhnate nge a siam?

³ Inkalh tak maiin, maktaduai tam takte inneihna chu a kehchhia a. Thu dawn pakhat chuan: “Tûn laia U.S.-a inneite zînga a chanve hi chu inṭhen leh tura beisei an ni. Chûng [inṭhente] zînga a chanve chu an inneih hnu kum 7.8 chhûngah an inṭhen ang . . . Nupui pasal nei leh za zêla 75-te zînga za zêla 60-te chu an inṭhen leh ang,” tiin a sawi. Tûn hmaa nupa inṭhen tam lohna ramah pawh inṭhen an pung chho a ni. Entîr nân, Japan-ah tûn hnai mai aṭangin inṭhen zât chu a lêtin a pung deuh thuak tawh a ni. Hetiang dinhmun thlentîrtu nêksâwrna ṭhenkhat, a chânga Kristian kohhran pawha lang ṭhîn chu engte nge ni? Setana’n inneihna tihchhiat a tum nasa hle chung pawha inneihna hlawhtling tak neih theih nân eng nge ngai?

 Pumpelh Tûr Thangte Chu

4. Inneihna tiderthâwng theitu thil ṭhenkhat chu engte nge ni?

⁴ Pathian Thu chuan inneihna tiderthâwng thei thilte chu hre thiam tûrin min ṭanpui a ni. Entîr nân, ni hnuhnûnga thil lo awm tûr chungchânga tirhkoh Paula thusawi hi ngaihtuah teh: “Ni hnuhnûngahte chuan hun khirh takte a lo awm ang. Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu âwih lo te, lâwm nachâng hre lo te, thianghlim lo te, hmangaihna pianpui nei lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te, Pathian hmangaih aia mahni lâwmna mai hmangaih zâwktu te an ni dâwn si; Pathian ngaihsak anna an nei ang a, nimahsela a thiltihtheihna chu an âwih lo vang; chûng ang chu hawisan rawh,” tih hi.​—⁠2 Timothea 3:​1-5.

5. Engvângin nge “mahni inhmangaihtu” chuan a inneihna chu a tihderthâwn a, he mi chungchânga Bible fuihna chu eng nge ni?

⁵ Paula thusawi kan han chîk hian, inneihna tichhetu thil tam tak kan hmu a ni. Entîr nân, “mahni inhmangaihtu te” chuan mahni hma an sialin, mi dangte ngaihtuahna an nei lo. Nupui emaw, pasal emaw, mahni chauh inhmangaihtu chuan an thil duhzâwng neih an tum lui tlat a. Anni chu sâwi danglam theih an ni lo. Chutiang rilru put hmang chuan inneihna hlimawm a thlen ang em le? Thlen lo khawp ang. Tirhkoh Paula chuan nupa kawpte pawh tiamin Kristiante chu fing takin a zilh a ni: “Elrel leh inngaihhlut avânga engmah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh [u]; mahni ta ta mai en lovin, mi dang ta pawh en ṭheuh zâwk rawh u,” tiin a zilhhau a ni.​—⁠Philippi 2:​3, 4.

6. Engtin nge tangka sum ngainatna chuan nupa inlaichînna a tihderthâwn theih?

⁶ Tangka sum ngainatna hian nupa inkârah hêm a thlâk thei a ni. Paula chuan: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn. Tangka sum ngainat hi sual tinrêng bul a ni si a; chu chu ṭhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a,” tiin a vaukhân a ni. (1 Timothea 6:​9, 10) Lungngaihthlâk takin, Paula vaukhânna chu tûn laia innei tam takte chungah a lo thleng dik a. Hausak an tumna lamah, nupa kawp tam tak chuan an mamawh bul ber, rilru lama ṭanpuina leh hmangaihna nêna inkawmna nuam takte tiamin, an kawppuite mamawh chu an ngaihthah a ni.

7. A châng chuan, eng nungchangin nge inneihna kawnga rinawm lohna thlen?

⁷ Paula chuan ni hnuhnûngah mi ṭhenkhatte chu “hmangaihna pianpui nei lo te, huaikawmbâwl te, . . . vervêk te” an ni dâwn tih a sawi a. Inneihna thutiam chu inkawp hlenna tûra thutiam urhsûn tak a ni a, inbumna thil mai mai a ni tûr a ni lo. (Malakia 2:​14-16) Mahse, ṭhenkhat chuan an kawppui ni lo mi dangte chu an ngaizâwng a ni. Kum 30 chho bâwr vêl mi nu, a pasalin a chhuahsan tâk chuan, a chhuahsan hma rêng rêng pawhin a pasal chu hmeichhe dangho lakah a tlângnêl lutukin, a duat thei lutuk tih a sawi a. Nupui neite awmdân tûr a hre fuh lo a ni. Hetiang thil a thleng  tih a hmuh hian a a rilru a na hle a, thiam takin a kawng dai lai hlauhawmzia hrilh a tum a. Mahse, inngaihna sualah chuan a tlu lût ta tho a ni. Ngilnei taka hlauhawm lo thleng tûr hriattîr a ni chung pawhin, a kawppui a thiam lo zâwk chuan a ngaihsak duh lo. A biling a balangin thangah chuan a âwk ta a ni.​—⁠Thufingte 6:​27-29.

8. Engin nge uirêna thlen thei?

⁸ Bible chuan inngaihna sual do tûrin min va han vaukhân chiang tak êm! “Mi nu uiretu chuan hriatna a nei lo a ni, ama nunna tichhe tûr thil a ti a ni.” (Thufingte 6:32) A tlângpuiin, uirêna hi vawi leh khata thilthleng thut a ni ṭhîn lo. Bible ziaktu Jakoba sawi angin, uirêna ang chi sual chu rilrua daha ngaihtuah chhoh zêl hnuah chauh a takin a thleng ṭhîn a ni. (Jakoba 1:​14, 15) Kawppui a dik lo zâwk chu a kawppui, kum tluang atâna thu a thlunpui lakah zawi zawiin a rinawm lo tial tial a ni. Isua chuan: “‘I uirê tûr a ni lo,’ an ti tih in hre tawh. Kei erawh chuan tupawh ngaih châka hmeichhe melh apiang chu, a thinlungah a uirê tawh reng a ni tih ka hrilh a che u,” tiin a sawi a ni.​—⁠Matthaia 5:​27, 28.

9. Thufingte 5:​18-20-ah eng zilhna fing tak nge hmuh a nih?

⁹ Chuvângin, kawng rinawm leh fing chu Thufingte buin min kawhhmuh a ni: “I tuichhunchhuah chu malsâwmin awm sela, i tleirâwl lai nupuiah chuan hlim rawh. Zukpui duhawm tak leh zukchal nalh tak angin englai pawhin a ṭâng chhûng chuan tilungawi fo che sela, a hmangaihnaah chuan lâwm fo rawh. Eng atân nge, nang, ka fapa chuan hmeichhe sual i lawm ang a, a ṭâng i pawm ang?,” tih hi.

Hmanhmawh Taka Inneih Pumpelh Rawh

10. Kawppui tûrte hre chiang tûra hun pêk chu engvângin nge a finthlâk?

¹⁰ Hmanhmawh taka an inneih hian nupa inkârah harsatna a chhuak thei a. An naupang lutukin, thiltawn an la nei tlêm a ni thei a. An thil duh leh duh loh te, an nuna an thiltum te, an chhûngkaw chanchin te inhriatsak nân hun an nei lo pawh a ni thei bawk. Dawhtheihna lantîr a, kawppui tûrte hre chiang lehzual tûra hun insiam chu a finthlâk a ni. Isaaka fapa, Jakoba kha han ngaihtuah teh. Rakili a neih theih hma kum sarih chhûng chu a pu zawn tûr atâna hna a thawh a ngai a. A rilru chu a hmêlṭhatnaah chauh ni lo, hmangaihna dik taka a innghah avângin chu hna chu thawh a inhuam a ni.​—⁠Genesis 29:​20-30.

11. (a) Inneihnain eng nge a zawm khâwm? (b) Engvângin nge ṭawngkam hman fîmkhur chu inneihnaah a pawimawh?

¹¹ Inneihna hi nula tlangvâl inngaihzâwnna mai ang a ni lo. Inneihna chuan, seilenna chhûngkaw hran daih leh mize dang daih te, thinlunga thilvei dân inang lo te, leh lehkha thiam dân inang lo tak mi pahnihte chu a zawm khâwm a ni. A châng chuan hnam chi hnih leh ṭawng chi hnih inzawm khâwmna a ni. A chunga mi ang a nih loh pawhin, thil tinrêngah ngaih dân inang lo sawichhuah theihna aw pahnih zawm khâwmna a ni. Chu aw pahnihte chu inneihna atâna pêng bulpui an ni ve ve a. An pahnih chuan khirh tak leh sawisêl  hrât tak pawh an ni ve ve thei a, a nih loh leh mi tiphûr thei leh tichak thei tak pawh an ni ve ve thei bawk. Ni e, kan ṭawngkamin kan kawppuite chu kan hliam theiin, kan tidam thei bawk a. Insûmna tel lova thusawi chuan nupa nun chu a tihrehawm thei tak zet a ni.​—⁠Thufingte 12:18; 15:​1, 2; 16:24; 31:26.

12, 13. Inneihna chungchângah duhthu sâm mai ni lova eng ang a tak rama chên nge fuih a nih?

¹² Chuvâng chuan, kawppui tûrte hre chiang tûra hun insiam chu a finthlâk tak zet a ni. Kristian unaunu pasal nei tawh pakhat chuan vawikhat chu: “Nupui pasal tûr i zawn hunah chuan, amaha i hmuh duh thil bulpui sâwm vêl chu ngaihtuah rawh. Chutah amahah chuan pasarih chauh i hmuh chuan, ‘A labâng pathumte chu ka ngaihhnathiam duh ang em? Chûng a thil tlâkchhamte chu nî tinin ka tuar thei ang em?’ tiin inzâwt rawh. Rinhlelhna i neih chuan, inngaihtuah ṭha leh rawh,” tiin a sawi a ni. Duhthu sâm mai lo va, a tak rama i chên a ngai ngei mai. Nupui pasal i nei duh a nih chuan, kawppui sawisêlbo i hmu ngai dâwn lo tih hre rawh. Chutih rual chuan, i neiha pawh chuan kawppui sawisêlbo a hmu bîk lo a ni!​—⁠Luka 6:41.

¹³ Inneihnaah hian inpumpêkna a tel a ni. Paula’n: “Lungkham nei lova in awm ka duhsak che u a ni. Nupui nei lo chuan Lalpa tihlâwm theihnazia tûr ngaihtuahin Lalpa lam thil chu a lungkham ṭhîn. Nupui nei erawh chuan a nupui tihlâwm theihnazia tûr ngaihtuahin khawvêl lam thil chu a lungkham zâwk ṭhîn. Tin, pasal nei leh nula thianghlim chu an inang lo bawk a. Pasal nei lo chuan a taksa leh a thlarauvah chuan thianghlim takin a awm theihna tûrin Lalpa lam thil chu a lungkham ṭhîn; pasal nei erawh chuan a pasal tihlâwm theihnazia tûr ngaihtuahin khawvêl lam thil chu a lungkham zâwk ṭhîn,” tih a sawi lai hian he inpumpêkna hi a sawi lang a ni.​—⁠1 Korinth 7:​32-34.

Inneihna Ṭhenkhat A Hlawhchham Chhan

14, 15. Engin nge inneihna tichak lo thei?

¹⁴ Tûn hnai lawk khân Kristian hmeichhe pakhat chu kum 12 lai an inneih hnuah a pasalin a chhuahsan a, hmeichhe dang a kawpsan avângin inṭhenna hrehawm tak chu a tuar a ni. Ani chuan an kehchhiat hmain hlauhawm lo thleng tûr rim hriat lâwkna a nei em? “Ṭawngṭai meuh pawh a thlahthlam a. Kristian inkhâwmna leh thu hrilhnaa tel lo tûrin chhuanlam tling lo tak tak a siam a. Hun mi hmanpui tûrin a buai lutuk emaw, a chau lutuk emaw niin a insawi ṭhîn. Min be duh lo va. Thlarau lam thil min sawipui ngai ta lo bawk a. Chutianga a awm ta chu a lungchhiatthlâk hle. Mipa pasal atâna ka neih kha a ni ta lo,” tiin a sawifiah a ni.

¹⁵ Mi dangte pawhin chutiang bawk mi mal Bible zirna te, ṭawngṭai te, a nih loh leh Kristian inkhâwmna thlahthlamna te an hmuh thu an sawi bawk. Thu danga sawi chuan, an kawppui kalsan mi tam takte chuan Jehova nêna an inlaichînna tihchauh chu an phal a ni. Chu mi avângin, an thlarau lam thil an thlîr tawh lo va. Jehova chu an tân chuan Pathian nung a ni reng tawh lo. Felna khawvêl thar thutiam lah a tak a ni ta lo. A ṭhenah phei chuan, he thlarau lam chauhna hi kawppui rinawm lote’n inneihna pâwn lama mi dang an ngaihzâwn hma pawhin a thleng a ni.​—⁠Hebrai 10:​38, 39; 11:6; 2 Petera 3:​13, 14.

16. Engin nge inneihna tinghet?

¹⁶ Inkalh takin, nupa kawp hlim tak pakhat chuan an inneihna hlawhtlinna chu thlarau lama an inphuarngheh vâng niin an sawi. An ṭawngṭai dûnin, Pathian thu an zir dûn a. A pasal chuan: “Bible kan chhiar dûn a. Rawngbâwlnaah kan chhuak dûn bawk a. Thiltih dûn chu nuam kan ti a ni,” a ti. A zirtîr chu a chiang ta hle mai: Jehova nêna inlaichînna ṭha tak vawn chhohna chuan inneihna a tinghet sauh a ni, tih hi.

A Tak Rama Chêngin, Inbepawp Rawh U

17. (a) Eng thil pahnihin nge inneihna hlawhtling siam? (b) Engtin nge Paula’n Kristian hmangaihna a sawifiah?

¹⁷ Inneihna hlawhtling neihtîrtu thil dang pahnihte chu: Kristian hmangaihna leh  inbiakpawhna hi a ni. Mi pahnih an han inngaihzâwn hian, dik lohnate inhaidersak tawn duhna a awm ṭhîn a. Inngaizâwngte chu nula leh tlangvâl inngaihzâwnna thawnthu bû-a an chhiar emaw, cinema-a an hmuh emawte ṭanchhanin beiseina sâng tak neiin an innei mai thei a. Amaherawhchu, a tâwp a tâwpah chuan, nupa kawpte chuan a tak ram an hmachhawn a ngai ta. Tichuan, dik lohna tê tham tak takte leh thil chîn duhawm vak lote pawh chu buaina lian thamah a lo chang thei a ni. Chu thil a lo thleng a nih chuan, Kristiante chuan thlarau rah an tihlan a ngai a, chu mi pêng pakhat chu hmangaihna a ni. (Galatia 5:​22, 23) Hmangaihna​—⁠nula tlangvâl inhmangaihna ni lovin, Kristian hmangaihna chu thiltithei tak a ni. Chu Kristian hmangaihna chu hrilhfiahin Paula chuan: “Hmangaihnain a dawhthei a, ngil a nei bawk ṭhîn . . . mahni hma a sial lo va, a thinur duh lo va, sual lamah a ngaihtuah lo va . . . engkim a tuar hrâm hrâm a, engkim a ring a, engkim a beisei a, engkim a tuar chhuak ṭhîn,” tiin. (1 Korinth 13:​4-7) Chiang takin, hmangaihna dik tak chuan mihring tlin lohnate a tuar thei a. A nihna takah chuan, ṭhat famkimna a beisei lo.​—⁠Thufingte 10:12.

18. Inbiakpawhnain engtin nge inlaichînna a tihchak theih?

¹⁸ Inbiakpawhna pawh hi a pawimawh hle bawk. Kum engzât pawh ral tawh mah se, nupui pasalte chu an inbiain, an inngaithla tawn tak zet tûr a ni. Pasal pakhat chuan heti hian a sawi: “Kan ngaih dân tlang takin kan inhrilh a, mahse nêlawm takin kan inhrilh a ni,” tiin. Thiltawn han ngah deuh hi chuan nupui emaw, pasal emaw chuan thil sawi chauh mai ni lo, thil sawi lohte ngaihthlâk dân pawh an zir thei a ni. Thu danga sawi chuan, kumte a liam zêl chuan, hlim taka inneite chuan rilrua awm sawi chhuah kher loh ngaihtuahna leh ngaih dânte pawh an inhriatsak thei tihna a ni. Nupui ṭhenkhatte chuan an pasalte’n an ngaithla tak tak lo niin an sawi a. Pasal ṭhenkhat ve thung chuan an nupuite chuan hun remchân loh lai bera inbiakpawh an duh ṭhîn niin an sawi bawk. Inbiakpawhnaah chuan inlainatna leh inhriatthiamna a tel a ni. Inbiakpawhna hlawhtling tak neih hi nupui leh pasal tân a ṭangkai ve ve a ni.​—⁠Jakoba 1:19.

19. (a) Engvângin nge ngaihdam dîl chu a harsat theih? (b) Engin nge ngaihdam dîl tûrin min chêttîr ang?

¹⁹ Inbiakpawhnaah chuan ngaihdam dîlna a tel châng a awm ṭhîn a. Hei hi a awlsam ṭhîn lo. Thil tihsual pawm tûrin inngaihtlâwmna a ngai. Mahse, chu chuan inneihna a va siam danglam thei tak êm! Tih tak zeta ngaihdam dîlna chuan nakina inhnialna awmtîr thei thilte chu a tibo thei a, ngaihdamna tak tak leh buaina chinfelna kawng a sial thei bawk a ni. Paula chuan: “Tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u. Tin, chûng zawng zawng chungah chuan hmangaihna inbel rawh u, chu chu phuar famkimna a ni,” tiin a sawi.​—⁠Kolossa 3:​13, 14.

20. Engtin nge Kristian chuan a kawppui chu hmun fianrialah leh mi dangte hmaah a cheibâwl ang?

²⁰ Inneihnaa pawimawh dang chu inṭanpui tawn hi a ni a. Kristian nupui leh pasalte chu an inring tawnin, an inrinchhan tawn thei tûr a ni. A tua pawhin kawppuite mahni inrin tâwkna tichhe tûr emaw, tihniam tûr emaw zâwngin an awm lo ve ve tûr a ni. Kan kawppuite chu hmangaih takin kan fak a; râwng takin kan sawisêl lo. (Thufingte 31:28b) Mi â ang leh  nuihza siam mai mai nâna hmangin anni chu kan timualpho lo. (Kolossa 4:6) Chutianga inṭanpui tawnna chu kan inhmangaihzia lantîr ziah ṭhinna chuan a tichak a ni. Han invawn emaw, chetziaa ngainatzia lantîrna emaw chuan: “Ka hmangaih reng che. Ka bulah i awm avângin ka lawm e,” tih a kâwk thei a ni. Hêngte hi inlaichînna khawih thei leh tûn lai khawvêla inneihna hlawhtling tûra ṭanpui thei thil ṭhenkhat an ni. Thil dang pawh a la awm a, a dawta thuziak chuan inneihna hlawhtlintîr theih dân Pathian Lehkha Thu kaihhruaina a pêk belh chhah ang. * (w05 3/1)

[Footnote]

I Hrilhfiah Thei Em?

• Inneihna tichhe thei thil ṭhenkhat chu engte nge ni?

• Engvângin nge hmanhmawh taka inneih chu a finthlâk loh?

• Engtin nge thlarau lam thil chuan inneihna a khawih?

• Eng thilte’n nge inneihna nghet tûra ṭanpui?

[Zirlai Atâna Zawhnate]

[Phêk 20-naa milem]

Inneihna hi nula tlangvâl inngaihzâwnna mai a ni lo