Nu Leh Pate U, In Rochan Hlu Tak Chu Vênghim Rawh U
Nu Leh Pate U, In Rochan Hlu Tak Chu Vênghim Rawh U
“Finna hi himna a ni si . . . a neitu nun chu finnain a tiharh ṭhîn.”—Thuhriltu 7:12.
1. Engvângin nge nu leh pate’n an fate chu thilthlâwnpêk anga an thlîr ang?
NU LEH PATE chuan anmahni neih ang taksa pianhmang leh mize nei nunna thar chu khawvêlah an rawn pian chhuahtîr a. Bible chuan chutiang nausênte chu “LALPA laka kan rochan” tiin a vuah a ni. (Sâm 127:3) Nunna-Petu dik tak a nih angin, Jehova chuan nu leh pate hnênah a thil neih chu a kawltîr a. (Sâm 36:9) Nu leh pate u, chutiang Pathian thilthlâwnpêk hlu tak chu engtin nge in thlîr le?
2. Pa a ni dâwn tih a hriat khân Manoa’n engtin nge a chhân lêt?
2 Chutiang thilthlâwnpêk chu inngaitlâwm tak leh lâwm taka dawnsawn tûr a ni tih chu rinhlelh rual a ni lo. Kum 3,000 aia tam liamta khân, Israel mi Manoa chu a nupuiin nau a hrinsak dâwn tih vântirhkohvin a hrilh khân, chutiang chuan a chhâng lêt a ni. Chanchin ṭha a hriat hnu chuan: “Aw LALPA, khawngaih takin Pathian mi i rawn tirha kha kan hnênah lo kal leh sela, naupang lo piang tûr chu engtin nge kan tih ang min han zirtîr rawh se,” tiin Manoa chu a ṭawngṭai a ni. (Rorêltute 13:8) Nu leh pate u, Manoa entîrna siam aṭang hian eng nge in zir theih?
Pathian Ṭanpuina Tûna Mamawh A Nih Chhan
3. A bîk takin tûn laia fate enkawlna kawngah engvângin nge Pathian ṭanpuina mamawh a nih?
3 An fate enkawl tûrin tûn hma zawng aiin nu leh pate chuan Jehova ṭanpuina an mamawh lehzual a ni. Eng nge a chhan? Diabol-Setana leh a tirhkohte chu vân aṭangin leiah paih thlâk an ni tawh a. “Lei. . . chung a pik e! Diabola chuan hun tlêm tê chauh a nei tih a inhriat avânga thinur êm êma in hnêna a lo chhuk tâk avângin,” tiin Bible chuan a vaukhân a ni. (Thu Puan 12:7-9, 12) Bible chuan Setana chu “sakeibaknei rûm ṭhîn angin a ei theih tûr zawngin a phi ruai ṭhîn,” a ti. (1 Petera 5:8) Sakeibaknei chuan a tlângpuiin sa chak lo ber, a bîkin la puitling lote chu a man ṭhîn. Chuvângin, Kristian nu leh pate chuan an fate vênghim tûrin fing takin Jehova kaihhruaina an zawng tlat a ni. Chutiang ti tûr chuan engti fakauvin nge ṭan i lâk?
4. (a) Ṭhenawmah sakeibaknei a vâk vêl a ni tih hriatna chuan nu leh pate chu eng ti tûrin nge a tur ang? (b) Vênhimna atân eng nge naupangte’n an mamawh?
4 Ṭhenawmah sakeibaknei a vâk vêl nia i hriat chuan, i fate vênhim chu ngaih pawimawh hmasak ber tûr a ni ang. Setana hi suam hmang a ni a. Pathian mite tihchhiat a, Pathian pawm tlâk lova siam a tum a ni. (Joba 2:1-7; 1 Johana 5:19) Naupangte chu tihnat awl tak an ni zual a. Diabola thang tlânchhiatsan tûr chuan, naupangte chuan Jehova an hriain, a thu an zâwm ngei tûr a ni. Bible hriatna an neih a pawimawh hle. Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi. (Johana 17:3) Chu bâkah, naupangte chuan finna—an thil zirte hriatthiamna leh nunpui theihna chu an mamawh a ni. ‘A neitu nunna chu finnain a tihharh [“zuah,” NW] ṭhin’ avângin, nangni nu leh pate hian in fate thinlungah thutak chu in tuh a ngai a ni. (Thuhriltu 7:12) Chu chu engtin nge in tih theih ang?
5. (a) Engtin nge finna chu pêk chhuah theih a nih? (b) Engtin nge Thufingte chuan finna hlutzia chu a sawifiah?
5 I fate chu Pathian Thu i chhiarsak theiin, i chhiarsak tûr a ni. Mahse, Jehova hmangaih leh a thu âwih tûra ṭanpui tûr chuan, chu aia tam a ngai a—anmahni lamah hriatthiamna an neih a ngai a ni. Entîr nân: Naupang chu kawng ding lam leh vei lam a en tawn hma loh chuan kawngpui kân lo tûra hrilh a ni thei a. Mahse, naupang ṭhenkhatte chuan an zâwm lo. Engvângin nge an zawm loh? Motor sut a hlauhawmzia chu hrilhfiah tâwk a ni lo ṭhîn emaw, hrilhfiah a nih pawhin naupang rilrua a hlauhawmnain zungkaih tûr zâwng leh chêtsualna thlen thei “âtna” hneh tûr zâwnga hrilhfiah a ni lo ṭhîn. Mi dang hnêna finna pe chhâwng tûr chuan hun leh dawhtheih a ngai a. Mahse, chu finna chu a va hlu si êm! “A kawngte chu nunkhaw nawmna kawng a ni a, a kawng zawng zawng chu thlamuanna a ni. A vuan apiangte tân nunna thing a ni a, a kawl reng apiangte chu an hamṭha e,” tiin Bible chuan a sawi.—Thufingte 3:13-18; 22:15.
Finna Pe Chhuak Zirtîrna
6. (a) Engvângin nge naupangte’n thil dik lo an tih ṭhin? (b) Eng indona nge thleng mêk?
6 Naupangte chuan thil dik zirtîr an nih loh vâng ni lovin, zirtîrna chuan an thinlung—an chhûngril nihna—a thlen loh avângin thil dik lo an ti ṭhîn. Diabola chuan naupangte thinlung hneh tumin a bei reng a. He khawvêl Pathian ngaihsak lohna thununna hnuaia awmtîr chu a tum a ni. Tin, an rochun sual lam ngaihtuahna chu thil sual tihtîr nâna chhawr khaw loh a tum bawk. (Genesis 8:21; Sâm 51:5) Nu leh pate chuan an fate thinlung hneh tûrin indona tak tak a thleng mêk a ni tih an hriatthiam a ngai a ni.
7. Engvângin nge naupang chu a dik emaw, dik lo emaw hrilh ringawt a tâwk loh?
7 Nungchang lam thu bul eng engemawte zirtîr nia inngaiin, nu leh pate’n an fa chu thil dik leh dik lo an hrilh tlângpui ṭhîn a. Naupang hnênah dâwtsawi te, rûk rûk te, a nih loh leh an nupui pasal ni lote nêna mipat hmeichhiatna hman te chu a dik lo tih an sawi mai thei a. Amaherawhchu, naupang chuan a nu leh pate’n an sawi vâng mai ni lovin, an zawm chhan tûr chhan ṭha zâwk a mamawh a ni. Chûng chu Jehova dânte a ni. Naupang chuan Pathian thupêkte zawm hi finna kawng a ni tih a zir tûr a ni.—Thufingte 6:16-19; Hebrai 13:4.
8. Eng ang chi zirtîrnain nge naupang chu fing taka thil ti tûrin ṭanpui thei?
8 Vân sâng boruak chipchiarzia te, thilnung chi hrang hrang tamzia te, sik leh sa inthlâk dân te—chûng zawng zawngte chuan naupangte chu Siamtu fing tak a awm tih hre thiam tûrin a ṭanpui thei a. (Rom 1:20; Hebrai 3:4) Chu bâkah, naupang chu Pathianin a hmangaih tih leh chatuana nunna a neih theih nân A Fapa pêkna hmangin ruahmanna a siam a, A thu sawite zawmna hmangin Pathian a tilâwm thei a ni tih zirtîr tûr a ni. Tichuan, Diabola’n tihtâwp tumin nasa takin bei mah se, naupang chuan Jehova rawngbâwl chu a duh a rinawm.—Thufingte 22:6; 27:11; Johana 3:16.
9. (a) Nun chhanhim thei zirtîrna chuan eng nge a mamawh? (b) Eng nge pate chu ti tûra zirtîr an nih a, chutah chuan engte nge tel?
9 Naupang vênghimtu leh thil dik ti tûra chêttîrtu zirtîrna pe tûr chuan hun, ngaihsakna, leh ruahmanna a ngai a. Nu leh pate’n Pathian kaihhruaina an pawm a ngai a ni. Bible chuan: “Nangni pate u, . . . Lalpa thununnaah leh zilhnaah chuan [in fate] enkawl zâwk rawh u,” tiin a sawi. (Ephesi 6:4) Chu chu eng tihna nge ni? Grik original-ah chuan “thununnaah” tih hian “rilrua tuh lût” tih a kâwk a ni. Chuvângin pate chu, an fate rilruah Jehova rilru tuh tûra fuih an ni. Chu chu naupangte tân invênhimna ṭha a va ni dâwn êm! Naupangte rilrua Pathian ngaihtuahna leh a thil chhût dân tuh a nih chuan thil ṭha lo tihna lak ata vênhim an ni ang.
Hmangaihnain A Chêttîr Duhna
10. I fa hlawhtling taka zirtîr tûrin, eng thil pawimawh tak nge i tân hriat ngai?
10 Amaherawhchu, i fa ṭha taka enkawl chhoh i duhna ti puitling tûr chuan, i ṭan lâkna chu hmangaihnain a chêttîr a ni tûr a ni. Thil pawimawh tak chu inbiakpawhna ṭha neih hi a ni a. I fa nuna thilthlengte leh a thlîr dânte hmu chhuak rawh. Inthlahrunna awm hauh lo tûra kâwmin, thiam takin i fa ngaih dânte zâwt chhuak rawh. A châng chuan, a thu sawi chu mak i ti hle mai thei. Mak i tihna a lutuka lantîr lo tûrin fîmkhur rawh. Chu ai chuan, khawngaihna lantîr chungin ngaihthlâksak rawh.
11. Engtin nge nu leh pate’n an fa lakah Pathian rilru an tuh theih?
11 Ni e, Bible aṭangin mipat hmeichhiatna lama nungchang bawlhhlawhna chu Pathian dânin a khap tih chu i fa hnênah i chhiarsak tawh mai theiin, vawi tam tak i chhiarsak tawh pawh a ni thei ang. (1 Korinth 6:18; Ephesi 5:5) Hei hian i fate thinlungah Jehova tilâwmtu leh tilâwm lotute a tuh nghet thei ang. Amaherawhchu, Jehova rilru naupang laka tuh tûr chuan thil dang a la ngai a ni. Naupangte chuan Jehova dânte hlutna hre thiam tûrin ṭanpui an ngai a. Jehova dânte chu a dikin a ṭha a, chûngte zawm chu thil tihâwm leh thil duhawm tak a ni tih an pawm a ngai bawk. In fate’n Pathian thlîr dân an pawm theih nâna Pathian Thu aṭanga i chhûtpui chauhvin, anmahniah Pathian rilru in tuh tia sawi theih a ni ang.
12. Nu leh pate’n mipat hmeichhiatna thlîr dân dik nei tûrin engtin nge an fa an ṭanpui theih?
12 Mipat hmeichhiatna chungchâng i sawipui lai chuan, “Inneih hmaa mipat hmeichhiatna hman loh chungchânga Jehova dân chuan mi hlimna a la bovin i hria em?” tiin i zâwt thei a ni. I fa chu a chhânna pêk sawifiah tûrin fuih rawh. Fa neih chungchânga Pathian thil ruahman ropui tak inennawn hnuah: “Kan Pathian hmangaihnaa khat chuan kan nuna hlimna la bo tûrin dân a siam i ring em? Nge, a dânte chu min tihlim tûr leh min vêng tûra siam a ni zâwk?” tiin i zâwt thei a ni. (Sâm 119:1, 2; Isaia 48:17) He mi chungchânga a ngaih dân hre rawh. Tichuan mipat hmeichhiatna hman khaw lohnain luhaina leh harsatna a thlen theih dân entîrnate i hrilh mai thei bawk. (2 Samuela 13:1-33) Pathian thlîr dân hre thiama a pawm theih nâna i fa i chhûtpuina chu, amaha Pathian rilru i tuhna kawngah a ṭangkai hle ang. Amaherawhchu, thil dang i tih theih a la awm a ni.
13. Eng thil hriatthiamnain nge naupang chu Jehova thu âwih tûrin a bîk takin chêttîr ang?
13 Fing takin, i fate chu Jehova thu zawm lohnain a rah chhuah chauh zirtîr lovin, kan nun dânin a mi mala Jehova a nghawng dân hrilhfiah bawk ang che. A duhzâwng kan tih loh huna Jehova rilru kan tihnat theih dân Bible aṭangin i fa chu hmuhtîr rawh. (Sâm 78:41) “Engvângin nge Jehova rilru tihnat i duh loh?” tiin zâwt la, “Pathian hmêlma Setana chuan Jehova chu kan hmangaih vâng ni lovin, keimahni hma kan sial avângin a rawng kan bâwl a ni, a ti,” tiin hrilhfiah ang che. Tichuan, Joba chuan a rinawmna vawnna hmangin Pathian thinlung a tilâwm a, chu chuan Setana dâwta puhna chhân lêtna a pe a ni tih sawifiah rawh. (Joba 1:9-11; 27:5) A chêtzia azirin Jehova chu a tilungngaiin, a tihlim thei bawk tih i fa chuan a hriatthiam a ngai a ni. (Thufingte 27:11) Hêngte leh zir tûr pawimawh tak tak dangte chu Learn From the Great Teacher tih lehkhabu hmangin zirtîr theih a ni. *
Rahchhuah Duhawm
14, 15. (a) Teacher bua eng zirlaite hian nge naupangte chêttîr? (b) Eng rahchhuah ṭha nge he lehkhabu hmanna aṭangin i neih tawh? (Phêk 30-31-naa bâwm chu en bawk rawh.)
14 Croatia rama putar pakhat, Teacher bu a tupa kum sarih mi chhiarsaktu chuan a tupain he thu a hrilh chu heti hian a ziak a ni: “Ka nuin thil tih tûr min hrilh a; mahse, ka ti duh lo. Tichuan, ‘Thuâwihnain A Venghim Che’ tih bung chu ka hre chhuak a, ka nu hnênah chuan ka kîr leha a thu ka awih dâwn tih ka hrilh a ni,” tiin. Florida, U.S.A. rama nupa tuak khat chuan, “Dâwt Kan Sawi Loh Chhan Tûr” tih bung chungchângah khân: “Naupangte chu an ngaihtuahna phawrh chhuak tûr leh chuti ni lo sela chuan an pawm miah loh tûr an thil tihsualte pawm tûra sâwmna zawhnate a zâwt a ni,” tiin an sawi.
15 Teacher buah hian milem 230 aia tam a awm a, milem tinah emaw, milem awmkhâwm tinah emaw hian a hrilhfiahna thuziak a awm bawk a ni. He lehkhabu avânga lâwm tak nu pakhat chuan: “Ka fapa chuan milemte a en tlat ṭhîn a, keu sawn a duh ngai lo. A lemte chuan mi an hîp mai a ni lo va, zirtîr a nei bawk a, a nih loh pawhin naupangte chu zawhna a zawhtîr tal a ni. A lema naupangin pindan thima T.V. a en lai chungchângah ka fapa chuan, ‘A nu, kha mipa naupang khân eng nge a tih?’ tiin, thil dik lo a awm tih hriatna awki danglamin a zâwt a ni,” tiin a sawi. A hrilhfiahna thuziak chu: “Tuin nge kan thiltih apiang hmu thei?” tih a ni.
Tûn Lai Hun Atâna Pawimawh Zirna
16. Tûn laiah naupangte hnêna eng thu zirtîr nge a pawimawh a, engvângin nge?
16 Naupangte chuan an taksa bung hrang hrangte hman dân dik leh dik lo an hriat a ngai a ni. Mahse, he mi chungchâng sawipui hi thil awlsam a ni ṭhîn lo. Chanchinbua thu ziaktu pakhat chuan serh sawina ṭawngkamte hman hi sual nia ngaih huna seilian niin a insawi a ni. A fate a zirtîrna chungchângah chuan, “Ka hrehna chu ka paih bo a ngai,” tiin a ziak a. Dik takin, an sawi hreh avânga nu leh pate’n mipat hmeichhiatna lam chungchâng an sawipui lohna chuan naupang a humhim lo. Naupang khawih chingpen chîngte chuan naupangte thil hriat lohna chu remchângah an la a ni. Learn From the Great Teacher hian chutiang chungchângte chu a thianghlim leh a zahawm zâwngin a sawi a ni. Naupangte mipat hmeichhiatna chungchâng hrilhhriatna hian an nungchang thianghlimna a hlohtîr lo va, hrilhhriat lohna erawh chuan an hlohtîr hlauh thei zâwk a ni.
17. Engtin nge Teacher bu chuan nu leh pate chu an fate hnêna mipat hmeichhiatna chungchâng zirtîr tûrin a ṭanpui?
17 Bung 10-naa vântirhkoh sual leia rawn chhuk thlaa fa neite chungchâng sawiho laiin, naupang chu, “Mipat hmeichhiatna chungchâng eng nge i hriat?” tia zawh a ni a. Lehkhabu chuan chhânna awlsam leh zahawm tak a pe a ni. A hnuah, bung 32-na chuan naupangte chu khawih chingpentute laka hum theih dân a sawi a. Lehkha thawn tam tak chuan chutiang zirtîrna chu a pawimawhzia a sawi a ni. Nu pakhat chuan: “Kâr hmasa khân ka fapa Javan-a chuan naupang specialist a hmuh chuan, doctor nu chuan mi mal taksa bung hrang hrang hman dân dik sawipuina kan neih leh neih loh min zâwt a. Kan lehkhabu thar hmanga kan sawiho tawh thu a hriat chuan a rilru a khawih hle a ni,” tiin a ziak.
18. Ram chhinchhiahna flag zahna lantîr chungchângah Teacher buin engtin nge a sawi?
18 Bung dang leh chu Babulon Sawrkâr aiawh milim chibai bûk duh lotu, Hebrai râwlthar pathum Sadraka te, Mesaka te, Abednegoa te chungchânga Bible thute a sawi a ni. (Daniela 3:1-30) Teacher buin a sawi angin, milem biakna leh flag chibai bûkna inzawm dân chu a ṭhenin an hmu thiam lo mai thei a. Amaherawhchu, U.S. Catholic chanchinbuin biangbiakna a neihnaa lehkhabu ziaktu Edward Gaffney-a’n sawi tûr a neih chu lo chhinchhiah teh. A fanuin vântlâng school-a a kal hmasak ber ṭum khân “school-a ṭawngṭai dân thar” a zir chu a sawi a, chu chu sawi chhâwng leh tûrin a ngên a. Gaffney-a chuan “a thinlung awmnaah a kut dahin, inchhuang takin, ‘Flag hnênah he thu hi ka tiam tlat e, . . . ,’ a ti ṭan a.” Heti hian a sawi zawm a ni: “Vawilehkhatah thil ka hre thiam ta thut a. Jehova Thuhretute chu an dik a ni. Ram chibai bûkna chu kan school-ahte hian a tîr tê aṭanga neih ṭan a ni—rinawmna sâng ber pe tûrin,” tiin.
Theih Tâwp Chhuah A Phu
19. Naupangte zirtîrnaah eng lâwmman nge awm?
19 I fate zirtîrna chuan theih tâwp chhuaha thawh a phu a ni. Nu pakhat, Kansas, U.S.A. rama awm chu a fapa hnên aṭanga lehkha thawn a dawn chuan a mittui a tla hial a ni. A fapa chuan: “Rilru nghet tûr leh inbûk tâwk tûra min enkawlna avâng hian, vânnei ka inti hle. Nang leh ka Pa hian fak in phu tak zet a ni,” tiin a ziak a ni. (Thufingte 31:28) Learn From the Great Teacher chuan nu leh pa tam tak dangte chu an rochan hlu tak an fate humhim tûra zirtîr tûrin a ṭanpui thei a ni.
20. Eng nge nu leh pate’n an hriat reng tûr ni a, chu chuan an chungah eng nghawng nge a neih ang?
20 Kan fate chuan kan pêk theih hun te, ngaihsakna te, leh taihmâkna te an phu a. An naupan lai chu a rei lo hle a. An bula awm tûrin leh ṭanpui tûrin hun remchâng awm apiang chu hmang ṭangkai rawh. I inchhîr ngai lo vang. An hmangaih lêt ang che. I fate chu Pathian thilthlâwnpêk an ni tih engtik lai pawhin hre reng ang che. Rochan hlu an va ni tehrêng êm! (Sâm 127:3-5) Chuvângin, rochan hlu angin cheibâwl la, Pathian chunga mawhphurhna nei angin enkawl rawh; mawhphurhna i nei ngei si a. (w05 4/1)
[Footnote]
^ par. 13 Jehova Thuhretute chhuah a ni. “Pathian Tihlâwm Dân” tih bung 40-na en rawh.
Engtin Nge I Chhân Ang?
• Engvângin nge nu leh pate’n a bîkin tûn laiah an fate an vênhim a ngaih?
• Eng ang zirtîrnain nge finna pe?
• Tûn laia i fate nêna in sawiho tûr thil pawimawhte chu engte nge?
• Engtin nge Teacher bu chuan an fate zirtîr tûra nu leh pate a ṭanpui?
[Zirlai Atâna Zawhnate]
[Phêk 30, 31-naa bâwm/milem]
Mi Tinte Tâna Lehkhabu Chu
Learn From the Great Teacher tih bu hi nu leh pate emaw, puitlingte emawin Isua Krista zirtîrna thute chu naupangte an chhiarpui leh sawipui atâna ruahman a ni. Mahse, mahni tâna chhiar puitlingte chuan an thu zir avânga an lâwm tak zetzia an sawi bawk.
Taxas, U.S.A. rama chêng pa pakhat chuan: “Learn From the Great Teacher hi ṭawngkam tluang tak hmang mi rilru hneh thei tak a ni a, kum eng zât mi pawh, keimah anga kum 76 tling hial tawhte pawh a chêttîr thei a. Naupan lai aṭanga Jehova rawngbâwltu keimah hian lâwmthu ka sawi a ni,” a ti.
England ram London khawpuia chhiartu pakhat chuan: “Milem mawi takte hian nu leh pate leh naupangte rilru a la ngei ngei dâwn. Zawhnate leh a inruahman dânte chu a ṭha êm êm a; tin, bung 32-naa ‘Isua Vênhim A Nih Dân’ tih thuziaka thu khirh takte thiam taka ziak a nih dân pawh chu a ṭha hle,” a ti a. “He lehkhabu hi Jehova Thuhretu naupangte tâna duan bîk a ni tih chu chiang hle mah se, zirtîrtute leh mi dangte pawhin neih ve chu an duh hle ka ring. Thla lo la awm tûr leh kum lo la awm tûra hman hlân ka nghâkhlel a ni,” tiin a titâwp a ni.
Massachusetts, U.S.A. rama nu pakhat chuan “ṭha taka ruahman milem” tam takte chungchâng a sawi a. Heti hian a ziak a ni: “Lehkhabu chu naupangte tâna tih mah ni se, a thute chuan keini puitling tawhte pawh Jehova nêna kan inlaichînna ngaihtuah tûrin min ṭanpui thei bawk a ni,” tiin.
“Lehkhabu ṭha a va ni tak êm!” tiin Maine, U.S.A. rama nu pakhat chu a au chhuak hial a ni. “Hei hi naupangte tân chauh a ni lo, Pathian fate kan nih anga kan zavaia tân a ni. Ka taksa leh thinlung zawng zawng a fan chhuakin ka rilru a chawk tho va; tichuan a thawidam ta a ni: rilru thlamuanna ka neih theih nân. Jehova chu ka Pa ang tluk hiala hnaihin ka inhria. Hun liam taa rilru natna ka tawn zawng zawngte chu la bovin, a thiltum chu a tichiang hle a ni,” a ti a. “Mi tinte hnênah, ‘Khawngaihin chhiar rawh aw,’ ka ti ṭhîn,” tiin a thusawi chu a titâwp a ni.
Kyoto, Japan rama nu pakhat chuan a tute tâna a chhiarsak laiin: “Kha mipa naupang khân eng nge a tih? Engvângin nge he hmeichhe naupang tê hi hauh hrep a nih? Heta nu ber hian eng nge a tih? Sakeibaknei hian eng nge a tih?” tih ang chi zawhnate hi an zâwt niin a sawi. “Kan thil tuizâwngte a zirtîr a, chuvângin library-a lehkhabu dang awm zawng zawngte aiin ka duh zâwk a ni,” a ti bawk.
Calgary, Canada rama pa pakhat chuan lehkhabu a dawn ve leh, a fanu kum ruk mi leh a fapa kum kaw mi tân a chhiarsak a. “An chhân lêt dân chu a ṭha nghâl khawp mai. Ka fate chuan an ngaihsak a, a zawhnate chu an ir-âwm chhuakin an sawi a ni. Zirnaa tel angin an inhria a, chu chuan an ngaih dân sawi theihna hun a pe a ni. An phûrpui hle a, ka fanu phei chuan lehkhabu thar chu zân tina zir a duh thu a sawi a ni,” tiin a sawi.
Ṭum khat an zir hnu chuan, pa pakhat chuan: “Ka fapa nên Jehova leh a thiltum chungchâng dârkâr rei tak chhûng kan sawi dûn a. Lehkhabu aṭangin zawhna tam tak a nei a ni. Mu tûra min mangṭha paha: ‘Pa, hetiang hian kan ti leh thei ang em? Zawhna tam tak ka nei a, Jehova chungchâng hriat theih apiang hriat ka duh a ni,’ a tih phei chuan ka mittui a tling hial a ni,” a ti.
[Phêk 29-naa milemte]
“Teacher” bua milem leh a lem hrilhfiahnate chu zirtîrna atâna hmanraw thiltithei tak an ni
Eng dâwtthu nge Anania’n Petera a hrilh?
Tuin nge kan thiltih apiang hmu thei?