Jehova Chuan Amah Beiseitute Chu A Humhim Ṭhîn
Jehova Chuan Amah Beiseitute Chu A Humhim Ṭhîn
“I ngilneihna leh i takna chuan mi humhim fo rawh se.”—SAM 40:11.
1. Lal Davida’n Jehova hnênah eng nge a dîl a, engtin nge chu dîlna chu chhânsak a nih?
HMAN lai Israel Lal Davida chuan ‘LALPA chu a nghâk fan fan,’ a nih loh leh a beisei tlat a, Jehova chuan amah a “rawn thlêk a, [a] au chu a ngaithla,” tiin a sawi chhuak hial a ni. (Sâm 40:1) Jehova’n Amah hmangaihtute a humhim dân chu a hmu zîng hle a. Chuvângin, Davida chuan Jehova humhim fona chu a dîl thei a ni. (Sâm 40:11) “Thawhlehna ṭha lehzual” thutiam nei mi rinawm hmeichhia leh mipate zînga chhiar tel Davida chu, chu lâwmman dâwng tûr chuan Jehova hriat rengnaah him takin a awm mêk a ni. (Hebrai 11:32-35) Chuvângin, a hmabâk chu kawng ṭha berin a him chiang a. A hming chu Jehova ‘hriat rengna lehkhabuah’ ziak a ni.—Malakia 3:16.
2. Engtin nge Pathian Lehkha Thu chuan Jehova humhim nih awmzia hre thiam tûra min ṭanpui?
2 Hebrai bung 11-a târ chhuah mi rinawmte chu Isua leia a nun hmaa nungte ni hlawm mah se, Isua sawi: “Tupawh a nun thlahlel chuan a hloh ṭhîn; tupawh he khawvêlah hian a nun ngaitlâwm chuan chatuana nunna tûr a vawng reng ang,” tih zirtîrna milin an nung a ni. (Johana 12:25) Chuvângin, Jehova humhim nih chu hrehawm tawrhna emaw, tihduhdahna emaw laka fihlîmna a ni lo tih a chiang hle. Mahse, mi chu Pathian hmaa dinhmun ṭha vawng reng thei tûra thlarau lama humhim tihna a ni.
3. Isua Krista chuan Jehova humhimna a dawng tih engin nge târ lang a, eng nge a rah chhuah?
3 Isua ngei kha râwng taka tihduhdah leh huat a ni a, a tâwpah a hmêlmate’n zahthlâk tak leh na tak tuarin an tihlum a ni. Mahse, Pathianin Messia humhim tûra a thutiam a hlen lo tihna a ni lo. (Isaia 42:1-6) Zahthlâk taka a thih hnu ni thum nîa Isua thawhlehna chuan Jehova’n Davida au thâwm a ngaihthlâk ang chiahin Isua au thâwm chu a ngaithla tih a târ lang a. A au thâwm chhân lêt nân Jehova’n a rinawmna vawng tûrin chakna a pe a ni. (Matthaia 26:39) Chutianga humhima awmin, Isua chuan vâna thi thei lo nun chu a chang a, tlanna ringtu mi maktaduai têlte chuan chatuana nun beiseina an nei a ni.
4. Hriak thih Kristiante leh “berâm dang” te tân eng thutiam nge pêk a nih?
4 Jehova chuan Davida leh Isua hun lai ang bawkin tûnah pawh a chhiahhlawhte humhim a duhin, a humhim thei bawk tih kan ring tlat thei a ni. (Jakoba 1:17) Isua unau hriak thih leia labâng tlêm tête chuan Jehova thutiam: “Rochan chhe thei lo, bawlhhlawh kai lo, chuai thei lo, vâna in tâna khêk chu hmuhna tûrin; chhandamna, hun hnuhnûnga lang tûra peih sa chu hmu tûrin, rinna avângin Pathian thiltihtheihnaa vên chu in ni,” tih chu an rin chhan thei a ni. (1 Petera 1:4, 5) Chutiang bawkin “berâm dang” lei lam beiseina neite chuan, Pathian thutiam fakna hla phuahtu sawi: “Aw, a mi thianghlim zawng zawngte u, LALPA chu hmangaih rawh u: LALPA chuan mi rinawm chu a humhim a,” tih chu an ring tlat thei a ni.—Johana 10:16; Sâm 31:23.
Thlarau Lama Humhim
5, 6. (a) Tûn laiah Pathian mite chu engtianga humhim nge an nih? (b) Hriak thihte chuan Jehova nên eng inlaichînna nge an neih a, lei lam beiseina neite chuan eng inlaichînna nge an neih?
5 Tûn lai hunah hian, Jehova chuan a mite thlarau lama humhim nân ruahmanna a siam a. Tihduhdahna emaw, nuna thilthleng pângngai tak harsatnate leh chhiat tawhnate emaw laka a humhim loh laiin, amah nêna inlaichînna humhim thei tûra an mamawh ṭanpuina leh fuihna chu rinawm takin a pe reng a ni. He inlaichînna an siam theihna bul ṭhut nghahchhan chu Pathianin hmangaih taka a pêk tlanna an rinna hi a ni a. Hêng Kristian rinawmte zînga ṭhenkhat chu vâna Krista rorêlpui ni tûrin Pathian thlarauvin hriak a thih a ni. Pathian thlarau lam fate angin mi fel tia puan an ni tawh a, hêng thu: “Ani chuan thim thuneihna laka min chhan chhuakin, a Fapa hmangaih taka ramah chuan min kaitîr ta a; amahah chuan kan tlanna kan hmu a ni—kan sualte ngaihdamna chu,” tihte hi an tân a ni.—Kolossa 1:13, 14.
6 Kristian rinawm dang mi maktaduai têlte pawhin Pathian ruahman tlanna an hlâwkpui thei tih an ring tlat a. “Mihring Fapa meuh pawh rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûrin a lo kal a ni,” tih kan chhiar a ni. (Marka 10:45) Chûng Kristiante chuan ‘Pathian fate zalenna ropui’ an chen hun tûr chu an nghâkhlel hle. (Rom 8:21) Chutih chhûng chuan, Pathian nêna an inlaichînna chu an hlutin, chu inlaichînna tihchak chu an tum tlat a ni.
7. Eng kawngin nge Jehova’n tûn laia a mite thlarau lam hmakhua chu a humhim?
7 Jehova’n a mite thlarau lam hmakhua a humhimsak dân kawng khat chu zirtîrna hmasâwn zêl ruahmansakna hmangin a ni. Chu chuan thutak hriatna dik lehzual a neihtîr a. Jehova chuan a Thu, a inawpna pâwl, leh a thlarau thianghlim hmangin kaihhruaina a pe chho zêl bawk. “Bawi rinawm, fing tak” kaihhruaina hnuaiah, khawvêl puma Pathian mite chu khawvêl pum huap chhûngkaw zînga mi ang mai an ni. He bâwih pâwl hian Jehova chhiahhlawh chhûngkaw zînga mite chu, an ram mi nihna leh neihnun dân chu eng ang pawh ni se, an thlarau lam mamawh a enkawl a, a ṭûl hunah chuan an taksa lam mamawh pawh a enkawl bawk a ni.—Matthaia 24:45.
8. Jehova’n a mi rinawmte lakah eng rinna nge a neih a, eng nge a tiam?
8 Isua chu a hmêlmate beihna lak aṭanga tisa lama a vênhim loh ang bawkin, tûn laiah pawh Kristiante chu chu mi kawngah chuan A vênghim bîk lo. Mahse, chu chu kan chungah Pathian a lâwm lo tih lantîrna a ni lo. A ni lo rêng rêng! Chu aimah chuan, lei leh vân huap thu buai lian takah ama lamah an ṭang tlat dâwn tih a rinzia a târ lang zâwk a ni. (Joba 1:8-12; Thufingte 27:11) Jehova chuan a laka rinawmte chu engtikah mah a thlahthlam dâwn lo, ‘Jehova chuan rorêlna fel a ngaina si a, a mi thianghlimte chu a kalsan ngai lo vang; kumkhua atân vawn ṭhatin an awm ang.’—Sâm 37:28.
Ngilneihna leh Takna Hmanga Humhim
9, 10. (a) Engtin nge Jehova takna chuan a mite a humhim? (b) Engtin nge Bible chuan Jehova’n a mi rinawmte chu a ngilneihnain a humhim tih a târ lan?
9 Sâm 40-a chhinchhiah a ṭawngṭainaah, Davida chuan Jehova ngilneihna leh takna hmanga humhim ni tûrin a ngên a. Jehova takna leh felna ngainatna chuan a tehnate fiah taka sawi chhuah a phût a ni. Hêng a tehnate mila nungte chu, a hnâwltute tawh ṭhin lungkhamnate, hlauhnate, leh buainate lakah nasa taka humhim an ni. Entîr nân, damdawi leh zu hman dik lohna te, inphalraina te, leh tharum thawhna nungchang te kan pumpelh chuan, buaina lungchhiatthlâk tam tak lak ata mahni leh kan hmangaihte chu kan vênghim thei a ni. A chânga Davida tih anga Jehova takna kawng aṭanga vâkbote pawhin thil sualti inlamlêtte tân Pathian chu “bihrûkna hmun” a la ni cheu tih thutiam chu an nei a ni. Chûng mite chuan: “Nang chuan manganna lakah mi humhim ang” tiin hlim takin an sawi thei a ni. (Sâm 32:7) Pathian ngilneihna lantîrna hlu tak a va ni êm!
10 Pathian ngilneihna dang leh chu, nakin lawka tihboral tûr, suahsualna khawvêl lak ata awm hrang tûra a chhiahhlawhte a vaukhânna hi a ni. Heti hian kan chhiar a: “Khawvêl hi hmangaih suh ula, khawvêla thil awmte pawh hi hmangaih hek suh u. Mi tupawhin khawvêl hi a hmangaih chuan Pa a hmangaihna amahah a awm lo. Khawvêla thil awm zawng zawng, tisa châkna te, mit châkna te, dam chhûng ropuina lem te hi Paa chhuak a ni lo va, khawvêla chhuak a ni zâwk si a,” tiin. He vaukhânna hi ngaihsaka nunpuina hmangin kan nun chu chatuan atân kan humhim thei tak tak a ni: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tia a sawi zawm avângin.—1 Johana 2:15-17.
Remhriatna, Hriatthiamna, leh Finna Hmanga Humhim
11, 12. Remhriatna te, hriatthiamna te, leh finnate’n min humhim dân hrilhfiah rawh.
11 Pathian pawm nih inbeiseitute tân: “Remhriatnain a vêng ang chia, hriatthiamnain a enkawl ang che,” tia ziak tûrin Davida fapa Solomona chu thâwk khum a ni. Ani chuan: “Finna nei la . . . Hawisan suh la, a humhim ang che; hmangaih la, a vêng ang che,” tiin a fuih bawk a ni.—Thufingte 2:11; 4:5, 6.
12 Pathian Thu aṭanga kan thu zirte kan chhût ngun chuan, remhriatna kan hmang tihna a ni a. Chutianga tihna chuan ngaih pawimawh tûr indawt dân dik siam thei tûrin nasa lehzuala hriatthiamna min neihtîr a ni. Hei hi a pawimawh hle a ni; kan za deuhthaw hian—mahni thiltawn aṭangin emaw—tum rêng vâng emaw, tihpalh vâng emawa ngaih pawimawh tûr indawt dân kan siam dik loh hian buaina a chhuak ṭhîn tih kan hriat avângin. Jehova’n thlarau lam thiltum pawimawh zâwkte ûm tûra min fuih laiin, Setana khawvêl chuan hausaknate, hming thanna te, leh thuneihna te hmangin min thlêm a ni. Thlarau lam thil dah pawimawh lohna chuan chhûngkua a keh chhiattîr a, inṭhianna a tlûk chhiattîrin, thlarau lam thiltumte a thâmraltîr a ni. Chuti chuan, mite chuan: “Miin khawvêl hi a pumin nei sela, a nun chân si sela a tân engnge sâwt ang?” tia Isua sawi dinhmun lungchhiatthlâk tak chu an seng ta ṭhîn a ni. (Marka 8:36) Finna chuan Isua thurâwn: “A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tih zâwm tûrin min tur a ni.—Matthaia 6:33.
Mahni Hmasialna Hlauhawmna
13, 14. Mahni hmasial tih awmzia chu eng nge ni a, chutiang mi nih chu engvângin nge a finthlâk loh?
13 Mihringte hian mahni inngaihsak duhna kan pianpui a. Mahse, mi mal châkna leh tuizâwngte kan dah pawimawh ber hian, buaina a chhuak ṭhîn. Chuvângin, amah nêna kan inṭhianna humhim tûrin, Jehova chuan mahni hmasialna pumpelh tûrin min zirtîr a ni. “Mahni hmasial” tih awmzia chu “mahni ṭhatna tûr leh hlâwkna tûr ngaihtuah, . . . mahni chauh inhai vûr; mahni tâna ṭha chauh ngaihtuah,” tihna a ni. Hei hian tûn lai mi tam takte nih dân chiah a sawi a ni lâwm ni? Chhinchhiah tlâk takin, Bible chuan Setana kal hmang suaksual “ni hnuhnûngahte” chuan, mite chu “mahni inhmangaihtu te,” a nih loh leh mahni hmasialtute an lo ni ang tih a sawi lâwk a ni.—2 Timothea 3:1, 2.
14 Kristiante chuan mi dangte ngaihsak tûr leh mahni kan inhmangaih anga mi dangte hmangaih tûra Bible thu pêk zawm a finthlâkzia chu an hre thiam a ni. (Luka 10:27; Philippi 2:4) Mi nâwlpuite chuan hei hi thil hman tlâk lo angin an thlîr mai thei; mahse, inneihna hlawhtling neih nân, chhûngkuaa inlaichînna hlimawm neih nân, leh inṭhianna lungawithlâk tak neih nân hei hi a pawimawh a ni. Chuvângin, Jehova chhiahhlawh dik tak chuan ngaih pawimawh zâwk tûr hmaih khawpin mahni a inngaihsak tûr a ni lo. A pawimawh ber chu, a Pathian Jehova a biakna nêna inkûngkaih thilte hi a ni.
15, 16. (a) Mahni hmasialna rilru put hmang chuan eng nge a thlen theih? (b) A nihna takah chuan, miin mi dangte chungthu a rêl nghâl ṭhin hian eng nge a tih?
15 Mahni hmasialna rilru put hmang chuan mahni intihfelna a neihtîr thei a, chu chuan mi chu mi rilru zîm leh chapo tak a nihtîr chhâwng thei a ni. Inhmeh takin, Bible chuan: “Aw mihring, mi sawisêltu tupawh ni mah la, chhuanlam rêng i nei lo ve; mi dang i sawisêlna ngeiah chuan nangmah leh nangmah thiam loh inchantîr i ni asin; nang, sawisêltu pawhin chutiang thilte chu i ti ve ṭhîn si a,” a ti. (Rom 2:1; 14:4, 10) Isua hun laia sakhaw hruaitute chu fel nia an inngaih êm avângin, Isua leh a hnungzuitute thiam loh chantîr tûra tlingah an inngai hial a ni. Chutianga tihna hmangin, rorêltu dinhmunah an indah a ni. An tlin lohna an inhmuh chhuah theih lohna chuan, mahni chungah thiam loh chantîrna an thlentîr a ni.
16 Isua hnungzuitu, a hnua phatsantu lo ni ta Juda chu mi dangte rorêltuah a insiam a. Ṭum khat chu Bethani khuaa Lazara farnu Mari’n Isua hriak rimtui a thih khân Juda chuan nasa takin a khap a. A thinurzia chu: “He hriak rimtui hi engati nge duli zathuma hralhin mi retheite hnêna an pêk zâwk loh?” tia zâwtin a sawi chhuak a. Mahse, a chanchin chu hetianga chhunzawm a ni: “Mi retheite a ngaihsak vânga chu thu chu sawi a ni lo; rûkru a ni a, tangka ip a kawl a, a chhûnga dah chu a lâk ṭhin vâng zâwk a ni,” tiin. (Johana 12:1-6) Mahni intihchhiat nân Juda ang emaw, mi dangte chungthu rêl hrât sakhaw hruaitute ang emaw i ni ngai lo vang u.
17. Intihvei emaw, mahni inrin tâwk lutuk emaw a hlauhawmna târ lang rawh.
17 Lungchhiatthlâk takin, Kristian hmasa ṭhenkhat chu Juda anga rûk hmang ni lo mah se, an chapovin, an lo intivei a ni. Jakoba chuan an hnênah: “In uannate hi in chhuang zâwk si a,” tiin a ziak a. Tichuan: “Chutiang chhuanna zawng zawng chu sual a ni,” tiin a sawi zawm a ni. (Jakoba 4:16) Jehova rawngbâwlnaa kan thiltih hlawhtlinte emaw, kan chanvo chelhte emaw chhuanna chu mahni intihchhiatna mai a ni. (Thufingte 14:16) Vawi leh khata mahni a inrin tâwkna avânga: “An zain i chung thuah lungni lovin awm mah sela kei zawng lungni lovin ka awm tawp lo vang . . . I thihnaah chuan thi ve dâwn mah ila ka phat tawp lo vang che,” tia inchhuang taka sawitu Petera chunga thilthleng hi kan hre chhuak a ni. A nihna takah chuan, mahni inchhuanna chhan tûr engmah kan nei lo. Kan thil neih engkim hi Jehova ngilneihna zâra kan neih vek a ni a. He mi hriatrengna hian intihveina lak aṭangin min vêng ang.—Matthaia 26:33-35, 69-75.
18. Engtin nge Jehova’n chapona chu a ngaih?
18 “Chapona chu boralna hmâah a kal a, rilru intivei chu tlûkna hmâah,” tih hrilhhriat kan ni. Engvângin nge? Jehova chuan heti hian a chhâng a ni: “Chapona te, uanthuanna te . . . hi ka haw takzet a ni,” tiin. (Thufingte 8:13, 16:18) “Assuria lal rilru uangthuang . . . leh a mit chopo ropuina” avânga Jehova a thinrim pawh chu a mak lo ve! (Isaia 10:12) Jehova chuan a hrem a ni. Rei lo tê a chinah, Setana khawvêl zawng zawng chu a hruaitu hmuh theih leh hmuh theih loh mahni inngai pawimawhte leh chapo takte rualin hrem a ni bawk ang. Jehova dotu mi tihmawhte rilru put hmang chu i entawn ngai lo vang u!
19. Eng kawngah nge Pathian mite chu an inchhuan a; mahse, an inngaihtlâwm?
19 Kristian dikte chuan Jehova chhiahhlawh an nihna chhuan chhan tûr an nei a. (Jeremia 9:24) Chutih rualin, inngaihtlâwm reng nachhan tûr an nei bawk. Engvângin nge? ‘Mi zawng zawngin thil an tisual tawh vek a, Pathian ropuina an chan zawh tâk loh’ avângin. (Rom 3:23) Chuvângin Jehova chhiahhlawh kan nih anga kan nihna humhim tûrin, “Krista Isua mi sualte chhandam tûrin khawvêlah hian a lo kal,” a tih hnua: “An zînga mi sual ber ka nih hi,” titu tirhkoh Paula rilru put hmang chu kan nei tûr a ni.—1 Timothea 1:15.
20. Tûnah engtin nge Jehova’n a mite a humhim a, nakinah engtin nge a humhim dâwn?
20 Jehova mite chuan Pathian ngaihsakna dah pawimawh zâwk nâna lâwm taka mahni hmakhua ṭhatna tûr an dah pawimawh loh zâwk avângin, Ani chuan an thlarau lam a humhimsak zêl dawn tih kan chiang thei a ni. Hrehawmna nasa tak a lo thlen hunah, Jehova chuan a mite chu thlarau lamah chauh ni lovin, tisa lamah pawh a humhim dâwn tih kan chiang thei bawk. Pathian khawvêl thara an luhin, heti hian an au chhuak thei ang: “Ngai teh u, hei hi kan Pathian a nih hi; ani hi kan nghâk reng a, tichuan min chhandam ang: hei hi LALPA chu a nih hi; ani hi kan nghâk reng a, a chhandamnaah chuan kan lâwmin kan hlim ang,” tiin.—Isaia 25:9. (w05 6/1)
I Hre Chhuak Em?
• Engtin nge Lal Davida leh Isua Krista chu humhim an nih?
• Engtin nge tûn laia Jehova mite chu humhim an nih?
• Engvângin nge mahni indah pawimawhna chu kan pumpelh ang?
• Engtin nge inchhuang chung pawhin kan inngaihtlâwm theih?
[Zirlai Atâna Zawhnate]
[Phêk 22-naa milem]
Engtin nge Jehova’n Davida leh Isua a humhim?
[Phêk 24-naa milem]
Eng kawngin nge tûn laiah Pathian mite chu thlarau lama humhim an nih?