Mihringte Hian Retheihna An Titâwp Thei Em?

MAKTADUAI tam takte chu retheihna hre miah lovin an ṭhang chho va. Rilṭâm chungin mut hmun an pan ngai lo va, khawvâwt avânga khûr chungin an muhil ngai hek lo. Chutichung pawhin, chûng zînga mi tam takte chuan retheite an khawngaihin, an ṭanpui ṭhîn a ni.

Amaherawhchu, tualchhûng indona te, tui lian te, khawkhêng te, leh harsatna dang dangin a tlâk buakte chuan retheihna chu an la tâwk reng a ni. Hêngte hi Africa rama lo neitu rethei takte tân chuan rilrua thâmral lo tûr thiltawn hrehawm tak a ni. Ṭhenkhatte’n loh theih lohva an in chhuahsana khawpui lam an pan emaw, râltlân anga khawsa tûra ram dang an pan emaw a ngai a. Thingtlânga chêng mi dangte pawh chu nuamsa zâwka nun an duh avângin khawpuiah an pêm bawk a ni.

Khawpui tâwt khat tlat chu retheihna lo chhuahna hmun a ni fo ṭhîn. Thlai chîn nân hmun âwl a awm a nih pawhin a zîm hle a. Hna hmuh a harsa hle bawk. Mangan tâwpkhâwkah tam takte chuan dân bawhchhiatna thil an ti a. Khawpuia chêngte chu ṭanpuina dîlin an au chhuak a; mahse, mihring sawrkâr chuan retheihna avânga harsatna tam tual tual chu a sukiang thei lo. November 2003-a tihchhuah United Nation thuchhuah sawichhâwngin, London khawpuia chanchinbu The Independent chuan: “Khawvêl hi a ṭâm lehzual ta a ni,” a ti. “Tûn laiah khawvêl pum puiah hian mi maktaduai 842-te chu chaw ṭha ei tûr nei lo anga chhût an ni a, chu number chu kum tinin maktaduai 5-in a pung,” tiin a sawi belh a ni.

South Africa rama Jehova Thuhretute branch office chuan retheihnain a tlâk buakte hnên aṭangin lehkha thawn dawn châng a nei a. Entîr nân, Bloemfontein aṭanga pa pakhat chuan: “Hna ka nei lo va, a remchân dân azirin khawpuiah thil ka ru ṭhîn. Ka rûk loh chuan, khawvâwt lutûk chu sawilohva lum​—⁠ni engemaw zât chhûng kan ṭâm a ni mai. Hna thawh tûr a awm hlawl lo va. Tam takte chu hnathawh tûr leh ei tûr zawngin kawtthlêrahte an tei kual a ni. Mi dang ei theih zawnga bawlhhlawh paihna haite pawh ka hria. Ṭhenkhat dangte chu anmahni an intihlum hial a. Keimah ang mi tam takte chu an lungngaiin, an beidawng a ni. Hmabâk beisei tûr rêng a awm lo niin a lang. Pathian, ei tûr leh silh tûr mamawha min siamtu hian hei hi a hmu lo em ni le?,” tiin a ziak a ni.

Hepa manganna atân chhânna thlamuanthlâk tak a awm a. A dawta thuziakin a târ lan angin, hêng zawhnate chhânna hi Pathian Thu, Bible-ah a awm a ni. (w05 5/15)