Rethei Awm Lohna Khawvêl A Hnai

HE MAGAZINE kâwma mi ang Paradis lemte hian rethei taka khawsate chu a hîp a. Paradis chu nupa kawp hmasa ber, Adama leh Evi tân chuan thil awm tak tak a ni a. An in chu Eden huan hi a ni. (Genesis 2:​7-23) Chu Paradis chu hloh ni mah sela, kan hmaa lo thleng tûr paradis​—⁠rethei awm lohna khawvêl thar​—⁠rin chu mumang mai a ni lo. Bible-a awm thu tiamah nghet takin a innghat tlat a ni.

Leia a nun tâwp dâwna Isua Krista thutiam kha han ngaihtuah teh. Thil tisualtu pakhat Isua ruala thi tûr chuan mihringte harsatna sukiang tûra Pathian thiltihtheihna a rinzia a lantîr a. Heti hian a sawi a ni: “Isu, i ram i thlen hunah mi hre reng ang che,” tiin. Thil tisualtu chuan Isua’n Lal angin ro a rêl ang a, mitthite chu tihnun leh an ni dâwn tih a rinzia hêng thute hian a lantîr a. Isua chuan: “Vawiinah hian tih tak meuhvin ka hrilh a che, ka hnênah Paradis-ah i awm ve ang,” tiin a chhâng a ni.​—⁠Luka 23:​42, 43, New World Tanslation.

Paradis a nung tûrte chungchâng chu sawiin, Bible chuan: “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang,” a ti. (Isaia 65:21) Ni e, “mi tinte chu an grêp hrui hnuaiah leh an theipui kûng hnuaiah an ṭhu zâwk ang a, tuman an tihlau lo vang: sipaihote LALPA kâ chuan a sawi tawh si a.”​—⁠Mika 4:⁠4.

Mahse, engvângin nge tûnah retheihna a awm phal a nih? Retheihnain a tlâk buakte hnênah Pathianin eng ṭanpuina nge a pêk? Engtikah nge retheihna chu a tâwp hlen ang?

Engvângin Nge Retheihna A Awm Phal A Nih?

Vântirhkoh sual, Diabol-Setana’n a thlentîr helna rah chhuah avângin Adama leh Evi awmna Paradis chu hloh a ni a. Rûl chu a aia ṭawngtîrin, Setana chuan Evi chu Pathian dân kalha thing rah ei loh tûr chu ei tûrin a thlêmthlu a. Pathian laka inlâk hranna chuan nun ṭha zâwk a thlen dâwn tih ring tûrin a bum a ni. Evi’n thei ei loh tûr a pêk chuan, Adama pawhin a ei ve a, a nupui duhzâwng tiin Pathian chu a hnâwl a ni.​—⁠Genesis 3:​1-6; 1 Timothea 2:14.

Nupa helte chu Paradis aṭang chuan a nih dân tûr ang taka hnawh chhuah an ni a, chu mi nî aṭang chuan an nunna atân an thawhrim a ngai ta a ni. Vawiin nî thlengin, Pathian thuâwih lohna rah chhuah ti chiang tûrin, Jehova’n sualna nei mihringte chunga Setana ro rêl chu a la phal a. Mihring chanchin chuan mihringte’n lei hi Paradis-ah an siam thei lo tih chu a finfiah tawh. (Jeremia 10:23) Pathian laka inlâk hranna chuan retheihna tiamin harsatna râpthlâk tak a thlen zâwk a ni.​—⁠Thuhriltu 8:⁠9.

Amaherawhchu, he khawvêl harsatnaa khatah hian retheite chu ṭanpuitu nei lova hnutchhiah an ni ngawt lo. Pathian  thâwk khum Thu, Bible chuan an tân kaihhruaina ṭha tak a pai a ni.

“Lungkham Suh U”

Rethei tam tak awmna mipui hmaa thu a sawi khân, Isua chuan: “Chunglêng savate hi en rawh u; buh an tuh lo va, an ât hek lo, buh inah an seng lût hek lo; nimahsela in Pa vâna mi chuan a châwm si a. Nangni chu anni ai chuan nasa takin in hlu zâwk lo vem ni?. . . Chutichuan, ‘Engnge kan ei ang?’ emaw, ‘Engnge kan in ang’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna mi’n a hre reng a ni. A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” a ti a ni.​—⁠Matthaia 6:​26-33.

Mi retheiin thil a rûk a ngai kher lo. (Thufingte 6:​30, 31) A nunah Pathian a dah hmasak chuan pêk a ni ang. Africa chhim lam Lesotho rama mipa pakhat, Tukiso-a chungchâng hi ngaihtuah teh. Kum 1998-ah chuan, sawrkâr laka helna titâwp tûrin ram dang sipaite chu Lesotho ramah an lo lût a. Chu indona avâng chuan, dâwrte chu rawk a ni a, mite’n an hna an chân a, ei tûr tlâkchhamna nasa tak a thleng bawk a ni.

Tukiso-a chu khawpuia rethei ber berte awmna vêngah chuan a chêng a. A ṭhenawmte zînga tam tak chuan dam khawchhuah nân dâwrte chu an rawk a ni. A chênna pindana a rawn kîr leh chuan, a chênpuinu Maseiso-i chuan a thilrûk tam tak a kawl tih a hmu a. Tukiso-a chuan: “Hêng thilte hi la chhuak rawh,” tia hrilhin, rûkrûk chu Pathian dân kalh a nih thu a hrilhfiah a ni. Meseiso-i chuan a thu chu a zâwm a. An ṭhenawmte chuan nuihsawhin, an thilrûk an paih chhuahte chu an la hlawm a.

Hetianga Tukiso-a’n thil a tih chhan chu Jehova Thuhretute nêna Bible a zir vâng a ni. Pathian dân a zawmna chuan a ṭâmtîr em? Ṭâmtîr lo ve. Chu mi hnu deuh lawkah chuan, a inkhâwmna Jehova Thuhretute kohhrana upate chuan Tukiso-a chu be pawpin, ei tûr ṭhenkhat an rawn pe a ni. South Africa ṭhenawm rama chêng Jehova Thuhretute chuan Lesotho rama an Kristian unaute tan ton hnih aia tam ṭanpuina an thawn a ni. Tukiso-a Pathian thuâwihna leh kohhrante ṭanpuina chuan Meseiso-i rilru a khawih hle a. Ani pawhin Bible a zir ṭan ve ta a. A tâwpah chuan, an pahnih chuan dân angin an innei a; tichuan, Jehova Thuhretute zînga mi anga baptisma chang tûrin an tling ta a ni. Tûn thlengin Pathian rawng rinawm takin an bâwl a ni.

Pathian Jehova chuan retheite a ngaihsak a. (“Engtin Nge Pathianin Retheite A Thlîr?”  tih bâwm chu en rawh.) Ani chuan Tukiso-a leh Maseiso-i ang bawka a chanchin zir belh tûra mi dangte ṭanpui nân hmangaih takin ruahmanna a siam a ni. Tin, kan nî tin nuna hman theih tûr thurâwn ṭangkai takte pawh a Thu-ah chuan min pe bawk.

Ruahmanna Ṭangkai

Jehova thuhretute chuan Pathianin retheite a ngaihtuahna chu lan chhuahtîr an tum reng a. (Galatia 2:10) Ram pakhata chhiatna a thlena Kristian dikte’n an tuar hian, an mamawh ṭanpuina pêk dân chu ruahman a ni fo va. A pawimawh zâwk chu, Thuhretute chuan mi retheite pawh tiamin mi zawng zawng thlarau lam mamawh ngaihtuahna an lantîr hi a ni. (Matthaia 9:​36-38) Kum 60 kalta chhûng khân, rawngbâwl tûra zirtîrna dawng sâng tam takte chu ram dangah missionary angin an inpe a. Entîr nân, Tukiso-a leh Meseiso-i te kha Isua zuitu ni tûra ṭanpuitute chu Sesotho ṭawng zir Finland ram aṭanga lokal missionary nupa tuak khat a ni a. (Matthaia 28:​19, 20) Chutianga missionary rawngbâwl tûr chuan ram hausaa nuamsa taka nun chu kalsan a, ram rethei lam pan a ngai fo a ni.

Dam khawchhuah nâna rûkrûk hi Kristian dikte tih tûr a ni lo. Chu ai chuan, an mamawh pe tûra Pathian Jehova thiltihtheihna chu an ring zâwk a ni. (Hebrai 13:​5, 6) Jehova’n a mite mamawh a pêk dân kawng khat chu inngaihsak tawnna nei khawvêl pum puia amah betute inawpna pâwl hmangin a ni.

Jehova’n retheite a ṭanpui dân kawng dang leh chu nî tin nun dân kawnga thurâwn ṭangkai tak pêkna hmangin a ni. Entîr nân, Bible chuan: “Rûk hmang chuan ru tawh suh  sela; tlachham hnênah chuan pêk tûr a neih theihna tûrin a kuta thil ṭha thawkin rim zâwk rawh se,” tiin thu a pe a ni. (Ephesi 4:28) Hna nei lo tam tak chuan huan siam leh enkawl ang chi hna hahthlâk thawkin, hna an insiam chawp a. Bible chuan retheite chu pawisa an khâwl theih nâna an thil chîn ṭha lote pumpelh tûra zirtîrin a ṭanpui bawk.​—⁠Ephesi 5:⁠18.

Rethei Awm Lohna Khawvêl ​—⁠Engtikah Nge?

Bible chuan Setana rorêlna ‘ni hnuhnûngah’ kan awm a ni tih a târ lang a. (2 Timothea 3:⁠1) Pathian Jehova chuan Isua Krista chu mihringte rorêlsak tûrin a tîr thuai ang. Chutih hunah chuan eng nge lo thleng dâwn? A tehkhin thu pakhatah Isua chuan a chhânna a pe a ni. Heti hian a sawi a: “Mihring Fapa hi chu, a vântirhkohte zawng zawng nên, a ropuinaa inthuama a lo kal hunah chuan, a ropuina ṭhutphahah a ṭhu ang a; a hmaah chuan hnam tin an inkhâwm ang a: berâm vengtuin kêl zîng ata a berâmte a hlîr angin anniho chu a hlîr ang,” tiin.​—⁠Matthaia 25:​31-33.

He tehkhin thua berâmte hi Isua lalna hnuaia intulûtte an ni a. Berâm anga an Pu an zui avângin, Isua chuan anni chu berâm nên a tehkhin a ni. (Johana 10:16) Hêng berâm angte hian Isua rorêlna ṭha famkim hnuaiah chuan nunna an chang ang. Rethei awm lohna khawvêl thara nun chu a hlimawm ngei ang. Kêl ang mi, Isua rorêlna hnâwltute erawh chu chatuana tihboral an ni ang.​—⁠Matthaia 25:46.

Pathian Lalram chuan suahsualnate a rawn titâwp ang a. Chutih hunah chuan retheihna chu a awm tawh lo vang. Lei chu inhmangaih tawn leh inngaihsak tawnna nei mihringte’n an luah khat tawh zâwk ang. Chutiang khawvêl thar chu thil awm thei a nihzia Jehova Thuhretute neih khawvêl pum huap inunauna duhawm tak aṭangin a hriat theih a ni, Isua chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” tia a sawi avângin.​—⁠Johana 13:35. (w05 5/15)

[Phêk 6, 7-naa bâwm/milem]

ENGTIN NGE PATHIANIN RETHEITE A THLIR?

Bible chuan mihringte Siamtu chu ‘rilṭâmte hnêna chaw pe ṭhîntu’ angin a sawi. (Sâm 146:⁠7) Pathianin retheite a ngaihsakzia târ langtu Bible châng za chuang lai a awm a ni.

Entîr nân, Jehova’n hmân lai Israel hnamte hnêna dân a pêk khân, Israel lo neitute hnênah an lova buh an seng hunah vau fêmte thlenga seng zo vek lo tûrin thu a pe a. A vawihnihna atân an oliv thing leh an grêp ṭote chu an zawng tûr a ni lo bawk. Hêng dânte hi ram dang mite, fahrahte, hmeithaite, leh retheite tân ruahmanna duhawm tak a ni.​—⁠Leviticus 19:​9, 10; Deuteronomy 24:​19-21.

Chu bâkah, Pathianin Israel mite hnênah: “Hmeithai emaw fahrah emaw in tirethei tûr a ni lo. Anmahni chu in tihretheih vaih a, mi rawn auh phawt chuan, an mi auhna aw chu ka lo ngaithla ngei ang a; tichuan ka thinur chu a ling phut mai ang a, khandaihin ka rawn tihlum ang che u a; tin, in nupuite chu hmeithai an ni ang a, in fate pawh fahrahin an awm mai ang,” tiin thu a pe a ni. (Exodus 22:​22-24) Lungchhiatthlâk takin, Israel mi hausa tam takte chuan hêng thute hi an ngaihthah a. He mi leh thil sual dang an tih avângin, Pathian Jehova chuan Israel mite chu a zâwlneite kaltlangin vaukhânna chi hrang hrang a pe a ni. (Isaia 10:​1, 2; Jeremia 5:28; Amosa 4:​1-3) A tâwpah chuan, Pathian chuan Asuria leh a hnuah Babulon te chu Israel ram a hnehtîr ta a. Israel mi tam takte chu thah an ni a, a dam khawchhuakte chu ram dangah sal anga hruai an ni bawk a ni.

Pathian fapa duh tak, Isua Krista chuan a Pa’n retheite a ngaihsakna chu a lan chhuahtîr a. A rawngbâwlna thiltum chu sawifiahin, Isua chuan: “Riangvaite hnênah chanchin ṭha hril tûra mi ruat avângin Lalpa thlarau chu ka chungah a awm,” tiin a sawi a ni. (Luka 4:18) He mi avâng hian Isua’n riangvaite, a nih loh leh retheite hnênah chauh chanchin ṭha a hril tihna a ni lo. Hmangaih takin hausate pawh a ṭanpui bawk a ni. Amaherawhchu, hausate a ṭanpui hian Isua chuan retheite a ngaihsakzia a lantîr fo ṭhîn. Entîr nân, hotu hausa pakhat hnênah chuan: “I neih zawng zawng hralh la, pachhiate hnênah sem rawh, chutichuan vânah ro i nei ang; tin, lo kal la, mi zui ang che,” tiin thurâwn a pe a ni.​—⁠Luka 14:​1, 12-14; 18:​18, 22; 19:​1-10.

Pathian Jehova leh a Fapa chuan retheite nasa takin an ngaihtuah a. (Marka 12:​41-44; Jakoba 2:​1-6) Retheite a ngaihsakna lantîrin, Jehova chuan mi rethei thi tawh maktaduai tam takte chu a hre reng a ni. Chûng zawng zawngte chu rethei awm lohna khawvêl tharah an lo tho leh vek ang.​—⁠Tirhkohte 24:15.

[Milem]

Khawvêl pum puia Jehova Thuhretute inunauna chuan khawvêl thar chu thil awm thei a nihzia a lantîr

[Phêk 5-naa milem]

Tukiso-a leh Maseiso-i, missionary unaupa Tukiso-a Bible zirpuitu nên

[Phêk 5-naa milem]

A in kawngka bula Meseiso-i leh missionary unaunu a Bible zirpuitu