Jehova Thu Chu A Nung

Samuela Bu Hnihna Aṭanga Thu Pawimawh Hrilhfiahna

JEHOVA lalchungnunna pawmna chuan thu âwih pumhlûm a phût em? Mi rinawm chuan engtik lai pawhin Pathian mithmuhah thil dik a ti reng em? Eng ang mi hi nge Pathian dikin “ama thinlung ang pu mi” nia a ngaih? (1 Samuela 13:14) Samuela bu hnihna chuan hêng zawhnate chhânna lungâwithlâk takte hi a pe a ni.

Samuela bu hnihna hi hmân lai Israel Lal Davida nêna inṭhian, zâwlnei pahnih, Gada leh Nathana-te ziah a ni a. * Davida kum 40 chhûng a lalna tâwp lam, B.C.E. 1040 vêla ziak zawh a ni a, a bîk takin, Davida leh Jehova inlaichînna chungchâng ziakna a ni. He chanchin phûrawm tak hian ram inṭhen darh chu lal huaisen tak hnuaia ram hausa tak leh inpumkhat tlat a lo nih dân a târ lang. He chanchin phûrawm tak hi mihringte rilrua veina thûk tak târ lannain a khat a ni.

DAVIDA CHU A LO “ROPUI TA DEUH DEUH”

(2 Samuela 1:1–​10:19)

Saula leh Jonathana thih chanchin a hriata Davida chhân lêt dân chuan anmahni leh Jehova chunga a rilru put dân a târ lang a. Hebron-ah Davida chu Juda hnam chunga lala ruat a ni. Saula fapa Is-bosetha chu Israel dang zawngte chunga lala siam a ni. Davida chu a lo “ropui ta deuh deuh va,” kum sarih leh a chanve hnu vêlah chuan, Israel zawng zawng chunga lala siam a lo ni ta a ni.​—⁠2 Samuela 5:10.

Davida chuan Jerusalem chu Jubus-ho hnên aṭangin a la a, a lalram khawpuiah a siam a. Jerusalema thuthlung bâwm sawn a tum vawikhatna chuan chhiatna a thlen a ni. Mahse, a vawihnihna chu a hlawhtling thung a, Davida chu hlimin a lâm a. Jehova chuan Davida nên lalram atân thuthlung a siam a. Pathian chu a hnêna a awm zêl avângin, Davida chuan a hmêlmate chu a hneh ta zêl a ni.

Bible Chungchâng Zawhnate Chhânna:

2:​18​—⁠Engvângin nge atîra ziak Bible-ah chuan Joaba leh a unaupa pahnihte chu an nu, Zeruii fapate anga koh an nih? Hebrai Pathian Lehkha Thuah, a tlângpui thuin thlah chhuina chu pa lam aṭanga chhui a ni ṭhîn a. Zeruii pasal chu a boral hma a ni thei a, a nih loh leh Pathian Lehkha Thu Thianghlima telh tlâk loh anga ngaih pawh a ni thei. Davida farnu emaw, nu hmun pa hrang unaunu emaw a nih avângin, Zeruii aṭanga chhiar a ni thei bawk. (1 Chronicles 2:​15, 16) Chu unau pathumte pa hming chu Bethlehema  thlân hmun nêna inkûngkaih thilah chauh a lang a ni.​—⁠2 Samuela 2:32.

5:​1, 2​—⁠Is-bosetha thah a nih hnu kum eng zâtah nge Davida chu Israel zawng zawng chunga lala siam a nih? Is-bosetha lal hun chhûng kum hnih chu Saula thih hnu lawkah a inṭan tia thutâwp siam chu a âwm a, chu hun vêlah tho chuan Davida chu Hebron-ah a lal ṭan a ni. Davida chuan Hebron aṭangin Juda ram chungah kum sarih leh a chanve vêl ro a rêl a. Israel zawng zawng chunga lala siam a nih hnu lawk chuan, a khawpui chu Jerusalem-ah a sawn a ni. Chuvângin, Is-bosetha thih hnu kum nga vêlah Davida chu Israel zawng zawng chunga lalah siam a ni.​—⁠2 Samuela 2:​3, 4, 8-11; 5:​4, 5.

8:​2​—⁠Israelte nêna an inbeihnaah Moab mi eng zât nge thah an nih? A number zât chu a chhiara chhiar lovin, a tehin an teh a ni thei ang. Davida chuan Moab mite chu leiah a mut tlartîr a. Tichuan, tehna hruiin a teh a nih hmêl hle a. A tlar hnih, a nih loh leh Moab mi hmun thuma ṭhena hmun hnih chu a tihlum a, a teh tlar khat, a nih loh leh hmun thuma ṭhena hmun khat chu a zuah a nih hmêl hle bawk.

Kan Zir Tûrte:

2:1; 5:​19, 23. Davida chuan Hebron-a awm hmun a khuar hma leh a hmêlmate do tûra a kal chhuah hmain Jehova a râwn a. Keini pawhin kan thlarau lam nghawng thei thu tlûkna kan siam hmain, Jehova kaihhruaina chu kan zawng ve tûr a ni.

3:​26-​30. Phuba lâkna chuan rah ṭha lo tak a thlen.​—⁠Rom 12:​17-19.

3:​31-​34; 4:​9-​12. Davida phuba lâk duh lohna leh huatna lantîr duh lohna chu a entâwn tlâk hle.

5:​12. Jehova chuan a kawngte min zirtîrin, amah nêna inlaichînna ṭha neih theih dân kawng a siam tih chu kan theihnghilh ngai tûr a ni lo.

6:​1-7. Davida chuan tum ṭha tak nei mah se, tawlailîra Bâwm phurh a tumna chuan Pathian thupêk a kalh a, a hlawhchham a ni. (Exodus 25:​13, 14; Number 4:​15, 19; 7:​7-9) Uza’n Bâwm a vawnna pawhin thil tum ṭha chuan Pathian thil phûtte a thlâkthleng chuang lo tih a târ lang bawk.

6:​8, 9. Dinhmun khirh takah chuan Davida chu a thinur a; tichuan, chhiatna lo thleng avânga Jehova a mawhchhiat hial pawh a hlauhawm hlel lo. A thupêk hnâwl avânga lo awm buainate avânga Jehova mawhchhiat lo tûrin i fîmkhur ang u.

7:​18, 22, 23, 26. Davida inngaihtlâwmna, Jehova hnêna a inpumpêkna, leh Pathian hming chawimawi a duhnate chu kan entawn tûr a ni.

8:⁠2. Kum 400 hma vêla hrilh lâwkna a thleng famkim. (Number 24:17) Jehova thu chu engtik lai pawhin a thleng dik zêl a ni.

9:​1, 6, 7. Davida chuan a thutiam a hlen a. Keini pawhin kan thutiam hlen kan tum ve tûr a ni.

JEHOVA CHUAN A HRIAK THIH CHUNGAH THIL ṬHA LO A THLENTIR

(2 Samuela 11:​1–20:26)

Jehova chuan Davida hnênah: “Ngai teh, nangma chhûngkaw zîng aṭang ngeiin i chungah thil ṭha lo ka chhuahtîr ang a, i mithmuh ngeiah i nupuite chu ka lâksak ang chia, i vêngte ka pe ang a, chhûn ênah i nupuite an mutpui ang,” tih a hrilh a ni. (2 Samuela 12:11) He rorêlna hi engvânga lo chhuak nge ni? Bath-sebi nêna an chêtsual vâng a ni. Sual a sim avângin Davida chu ngaihdam ni mah se, a sual tih rah chhuah chu a pumpelh thei lo.

A hmasa berin, Bath-sebi fa hrin chu a thi a. Tin, Davida fanu nula thianghlim chu pa hmun nu hrang a nuṭapa Amnona chuan a pâwngsual a. A nuṭa dik tak Absaloma chuan phuba lain Amnona chu a that a ni. Absaloma chuan a pa ngei chu phiarruin, Hebron-ah lal angin a inpuang a. Davida chuan Jerusalem a tlânchhiatsan a ngai ta a ni. Absaloma chuan a  pa’n in enkawl tûra a hnutchhiah a hmei sâwmte chu a mutpui a. Absaloma thah a nih hnuah chauh Davida chu a lal leh a ni. Benjamin mi Seba helna chu a thihin a tâwp a ni.

Bible Chungchâng Zawhnate Chhânna:

14:​7​—⁠“Ka meiling” tih hian eng nge a entîr? Muang chânga alh meiling chu chi thlah nung entîr nâna hman a ni.

19:​29​—⁠Mephibosetha hrilhfiahna chu Davida’n engvângin nge khatianga a chhân lêt? Mephibosetha thusawi a ngaihtlâk chuan, Davida chuan Ziba thu a lo âwih mai avângin thil a tisual a ni tih a hre chhuak ngei ang a. (2 Samuela 16:​1-4; 19:​24-28) Chu chuan Davida chu a tilungni lovin, chu mi chungchâng hriat belh chu a duh lo a nih a rinawm hle.

Kan Zir Tûrte:

11:​2-​15. Davida tlin lohna chanchin dik tak chhinchhiah chuan Bible hi Pathian thâwk khum Thu a nihzia a finfiah.

11:16-​27. Sual pawi tak kan tihin, Davida tih angin thup kan tum tûr a ni lo. Kan sual chu Jehova hnêna puangin, kohhrana upate ṭanpuina kan zawng zâwk tûr a ni.​—⁠Thufingte 28:13; Jakoba 5:​13-16.

12:​1-​14. Nathana chuan kohhran upate tân entawn tûr ṭha tak a siam a ni. Anni chu suala tlute an thiltih sim tûra ṭanpui tûr an ni a. Upate chuan an mawhphurhna chu thiam takin an tlingtla tûr a ni.

12:15-​23. A chunga thilthlengte thlîr dân dik a neihna chuan Davida chu dinhmun harsate ṭha taka chhâng lêt tûrin a ṭanpui a ni.

15:12; 16:15, 21, 23. Absaloma’n lalṭhutthlêng luah dâwn anga a lan khân, chapona leh challan duhna chuan thurâwn petu fing tak Ahithophela chu phatsantuah a siam. Inngaihtlâwmna leh rinawmna tel lo finna chu thangah a chang thei a ni.

19:​24, 30. Mephibosetha chuan Davida khawngaihna chu a hlut tak zet a. Ziba chungchânga lal thutlûkna chu a pawm thlap a ni. Jehova leh a inawpna pâwl kan hlutna chuan intulût tûrin min chêttîr tûr a ni.

20:​21, 22. Mi pakhat finna chuan mi tam tak chhiatna tûr a pumpelhtîr thei a ni.​—⁠Thufingte 9:​14, 15.

“LALPA KUTAH” I TLU LUT ANG U

(2 Samuela 21:1–​24:25)

Saula’n Gebeon mite a thaha thisen thiam loh a chantîr avângin kum thum ṭâm a tla a ni. (Josua 9:15) Chu thisen mawh thungrulh nân Gibeon mite chuan Saula fapa pasarihte chu tihhlum atân an dîl a. Davida chuan Gibeon mite kutah a pe a; tichuan, khawkhêng chu ruah nasa  taka sûrin a tâwp ta a ni. Philistia mi hrâwl palite chu “Davida leh a mite kutah an thi” a ni.​—⁠2 Samuela 21:22.

Davida chuan dân lo anga chhiarpui nei tûra thu a pêk avângin sual lian tak a ti a. A inchhîrin, ‘LALPA kuta tlûk luh’ chu a thlang a ni. (2 Samuela 24:14) Chu mi avâng chuan, hripuiin mi 70,000 a nuai hlum a. Davida chuan Jehova thupêk chu a zâwm a, hremna chu a reh ta a ni.

Bible Chungchâng Zawhnate Chhânna:

21:​8​—⁠Samuela bu hnihna 6:23 chuan Saula fanu Mikali chu fa nei lova thi anga a sawi laiin engtin nge fapa panga nei anga sawi theih a nih? Hêngte hi Mikali unaunu Merabi, Adriela nupui fate a ni tih hrilhfiahna chu mi tam takin an pawm a ni. Merabi chu a thi hma a, fa nei lo Mikali’n a fate chu a enkawl seilian a nih hmêl hle.

21:​9, 10​—⁠Rizpi chuan Gibeon mite kuta thi a fapate pahnih leh Saula tupa pangate ruang chu eng chen nge a vên? Hêng pasarihte hi ‘buh seng ṭantirh’​—⁠March thla emaw, April thla emaw vêla khai hlum an ni a. An ruang chu tlâng chunga hnutchhiat a ni. Rizpi chuan Jehova’n khawkhêng tihrehna hmanga a thinrim a dai tawh tih a lantîr thlengin, ruang pasarih chu achhûn azânin a vêng reng a ni. Ruahpui chu buh seng zawh hun October thla hmaa a sûr a rinawm lo hle a. Chuvângin Rizpi chuan thla nga emaw, thla ruk emaw chhûng a vêng mai thei a ni. Chu mi hnu chuan Davida chuan an ruhte chu a phûmtîr a ni.

24:​1​—⁠Engvângin nge chhiarpui neih chu Davida tân sual pawi tak a nih? Chhiarpui neih hrim hrima chu Dânin a khap lo va. (Number 1:​1-3; 26:​1-4) Bible chuan Davida chu eng thilin nge mite a chhiartîr tih a sawi lo. Mahse, 1 Chronicles 21:1 chuan a tîrtu chu Setana a ni tih a târ lang a ni. Engpawh lo ni se, a sipai hotu, Joaba chuan mipuite hming ziak tûra Davida thutlûkna siam chu a dik lo tih a hria a, chutianga ti lo tûrin khap a tum a ni.

Kan Zir Tûrte:

22:​2-​51. Davida hla chuan Jehova chu kan rin tlat phu Pathian dik a nihzia a va târ lang ṭha tak êm!

23:15-​17. Davida chuan nunna leh thisen chungchânga Pathian dân pêk a zah êm avângin, he mi ṭum hian chu dân bawhchhiatna ni thei tûr thiltih dang lakah chuan a insûm a ni. Pathian thupêk zawng zawng chungah chutiang rilru put hmang chu kan nei tûr a ni.

24:10. Davida chhia leh ṭha hriatna chuan inlamlêt tûrin a chêttîr a. Chutiang kawnga chhâng lêt ve tûr chuan kan chhia leh ṭha hriatna chu a chak tâwk em?

24:14. Davida chuan Jehova chu mihringte aiin zahngaihna a ngah zâwk tih a hre chiang a. Chutiang rin tlatna chu kan nei ve em?

24:17. Davida’n a thilsual tih avânga a hnam pumpuiin an tawrh chu pawi a ti a. Thil tisualtu inlamlêt chuan a thiltih avânga kohhran hming chhiatna chu pawi a ti hle tûr a ni.

‘Pathian Thinlung Ang Pu Mi’ Kan Ni Thei

Israel lal panihna chu ‘Pathian thinlung ang pu mi’ a ni. (1 Samuela 13:14) Davida chuan Pathian tehna felte chu a ringhlel ngai lo va, Pathian hnên aṭanga inlâk hranna thiltih chu a ûm hek lo. Thil a tihsual apiangin, a thilsualtih chu a pawm a, thununna chu a pawmin, a kawngte chu a siam ṭha a ni. Davida chu mi rinawm a ni. A bîk takin, thilsual kan tih hunah amah ang nih chu a finthlâk lâwm ni?

Davida chanchin hian Jehova lalchungnunna pawmna chu chhia leh ṭha chungchânga Ama tehnate pawm leh rinawmna vawngtu anga chûng thilte zawm tum tlatna chu a ni tih a târ lang chiang hle. Chu chu kan ti thei a ni. Samuela bu Hnihna aṭanga kan thu zirte avâng hian kan va lâwm tak êm! He Bible bua tel thâwk khum thuchahte hi a nungin, thil a tithei tak zet a ni.​—⁠Hebrai 4:12. (w05 5/15)

[Footnote]

[Phêk 8-naa milem]

Lal anga dinchantîrtu a hriatrengna chuan Davida chu inngaitlâwm reng tûrin a ṭanpui

[Phêk 10-naa milemte]

“Ngai teh, nangma chhûngkaw zîng aṭang ngeiin i chungah thil ṭha lo ka chhuahtîr ang.”

Bath-sebi

Tamari

Amnona