Thiltih Vâng Chauh Ni Lo, Khawngaihna Avânga Chhandam
Thiltih Vâng Chauh Ni Lo, Khawngaihna Avânga Chhandam
“Rinna avânga . . . chhandam in ni; . . . thiltih avâng a ni lo ve, chutilochuan miin an chhuang dah ang e.”—EPHESI 2:8, 9.
1. Mi mal hlawhtlinna chungchângah engtin nge Kristiante chu mi nâwlpuite laka an dang lam a, engvângin nge?
TUN laia mite chuan an mi mal hlawhtlinna chu nasa taka chhuangin, an uanpui hma hle ṭhîn a. Kristiante chu chutiang an ni ve lo. Biakna dik nêna inkûngkaih thilah pawh ni se, an mi mal hlawhtlinna uar taka sawi chu an pumpelh a ni. Jehova mite’n a huhova an thiltih hlawhtlinte avânga an hlim hle laiin, he hlawhtlinnaa mi mala an telna chu an thup ṭhîn. Jehova rawngbâwlnaah chuan mi mal hlawhtlinna aiin chêttîrtu dik neih a pawimawh zâwk tih an hria a ni. A tâwpa chatuana nunna dawngtu chuan, a mi mal hlawhtlinna vâng ni lovin, rinna leh Pathian khawngaihna avâng zâwkin a dawng a ni.—Luka 17:10; Johana 3:16.
2, 3. Paula’n eng nge a chhuan a, engvângin nge?
2 Tirhkoh Paula chuan he nihphung hi a hre chiang hle a. ‘Tisaa hlîng’ laka chhâwk zângkhai tûra vawi thum a ṭawngṭai hnu chuan: “Ka khawngaihna i tân a tâwk e; ka thiltihtheihna hi chak lohnaah asin tihfamkimin a awm ni,” tia Pathian chhân lêtna chu a dawng a ni. Jehova thutlûkna siam chu inngaitlâwm taka pawmin, Paula chuan: “Chutichuan Krista thiltihtheihna chu ka chunga a awm theih nân lâwm êm êmin ka chak lohnate hi ka chhuang tawh zâwk ang,” a ti a ni. Paula inngaihtlâwmna rilru put hmang chu a ni, kan entawn duh tûr chu ni.—2 Korinth 12:7-9.
3 Paula chu Kristian rawngbâwlnaah langsâr hle mah se, a hlawhtlinna engpawh chu ama thiamna leh theihna vâng a ni lo tih a hria a. Ani chuan inngaitlâwm takin: “Jentailte hnêna Krista hausakna chhui chhuah rual lohte chanchin hril . . . tûrin kei mi thianghlim zawng zawnga tê ber aia tê zâwk hnênah hian chu khawngaihna chu pêk a ni,” a ti. (Ephesi 3:8, 9) A thusawite hian a inchhuang lovin, chapona nên a intivei hek lo tih a târ lang. “Pathianin mi chapote a dodâl a, inngaitlâwm te erawh chu khawngaihna a pe ṭhîn.” (Jakoba 4:6; 1 Petera 5:5) Paula entawn tûr siam chu zuiin, inngaitlâwm takin kan unaute zînga tê ber aia tê zâwkah kan inngai em?
‘Mahni Aia Mi Dang Ṭha Zâwka Ruatin’
4. Kan aia mi dangte ṭha zâwka ngai tûrin engvângin nge harsa tih châng kan neih mai theih?
4 Tirhkoh Paula chuan Kristiante chu: “Elrel leh inngaihhlut avânga engmah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se,” tiin a zilh a. (Philippi 2:3) Hei hi thil harsa tak a ni thei, a bîk takin mawhphurhna dinhmun sâng kan chelh chuan a harsa zual thei a ni. Harsatna lo awm chhan chu tûn lai khawvêla lâr tak inelna rilru put hmang hian engemaw chen min thunun vâng a ni thei. Naupang kan nih laiin inah kan pianpui unaute nên emaw, school-ah kan pâwlpuite nên emaw inel tûra zirtîr kan ni thei a. School-a infiamna lama lâr tak emaw, lehkha thiam thei ber emaw ni tûrin fuihna kan dawng reng pawh a ni thei bawk. Dik tak chuan, eng thilah pawh kan theih tâwp chhuah chu a fakawm a ni. Amaherawhchu, Kristiante theih tâwp chhuah chhan chu mite ngaihsân hlawh duh vâng ni lovin, an thiltih hlâwkpui tak zet tûr leh mi dangte pawhin an hlâwkpui theih nân a ni zâwk. Mahse, tiṭha ber nih reng tum chu a hlauhawm thei a ni. Engtin nge?
5. Thunun a nih loh chuan, inelna rilru put hmang chuan eng nge a thlen theih?
5 Thunun a nih loh chuan, inelna emaw, mahni hmasialna rilru put hmang emaw chuan mi chu mite zahna nei lo leh mi chapo tak a nihtîr thei a. Mi dangte theihna leh chanvo dawnte chu a thîk thei a ni. Thufingte 28:22 chuan: “Mi fîr chuan sum a ûm a, a chungah tlâkchhamna a lo thleng dâwn tih a hre hek lo,” a ti. Chapo takin a phu loh dinhmun chu a chuh hial thei a. A thiltihte inthiam chawp tûrin, a lo phunnawi ṭanin, mi dangte pawh a sawisêl ṭan thei a—chutiang rilru put hmang chu a ni, Kristiante pumpelh tûr chu. (Jakoba 3:14-16) Engpawh lo ni se, ani chu mahni hmasialna rilru put hmang neih hlauhawm takah a indah a ni.
6. Inelna rilru put hmang chu engtin nge Bible-in a vaukhân?
6 Chuvângin, Bible chuan Kristiante chu: “Incho tawna inîtsîk tawnin i inngaihlu suh ang u,” tiin a fuih a. (Galatia 5:26) Tirhkoh Johana chuan a Kristianpui hetiang rilru put hmang neite chungchâng chu a sawi a ni. Johana chuan: “Kohhranho hnênah khân thu tlêm chu ka ziak tawh; nimahsela Diotrepha, an zînga chungnun duh ṭhîn khân min lâwm si lo. Chuvângin ka lo kal chuanin a thiltihte ka hriat chhuahtîr leh ang, kan chungah thu sual sawiin a kamtamzia hi,” a ti. Kristian tân dinhmun lungchhiatthlâk a va ni êm!—3 Johana 9, 10.
7. Tûn lai hnathawhna hmuna inelnaah Kristian chuan eng nge pumpelh a duh ang?
7 Dik tak chuan, Kristianin inelna zawng zawng a pumpelh ṭhak theih a beisei awm loh. Entîr nân, a hnathawhna chu thil thuhmun siam chhuahna emaw, hnathawh inang emaw thawk mi dangte emaw, sumdâwnna pâwl emaw nên a inel mai thei a. Mahse, chutiang dinhmunah pawh, Kristian chuan a hna chu zahthiamna, hmangaihna, leh ngaihtuahna rilru put hmang nên a thawk chhunzawm duh ang. Ani chuan dân piah lam leh Kristian tih chi loh thiltihte chu a hnâwlin, mi el hrât tih hming put chu a pumpelh ang. Ani chuan thil eng kima a ber hauh chu a nunah a dah pawimawh ber lo bawk ang. Hnathawhna lama chutiang rilru put hmang lantîr a ngaih chuan, biakna lamah chuan lantîr a va ngai nasa lehzual dâwn êm!
“Mi Dang Nêna Inkhaikhin Lovin”
8, 9. (a) Engvângin nge Kristian upate chuan inelna tûr chhan an neih loh? (b) Engvângin nge 1 Petera 4:10 chu Pathian chhiahhlawhte zawng zawng tân a nih?
8 Kristiante’n an biaknaa an neih ngai rilru put hmang chu hêng thâwk khum thuahte hian târ lan a ni: “Mi tinin mahni thiltih fiah ṭheuh zâwk rawh se, chu mi hunah chuan mi dang chung ni lovin [“mi dang nêna inkhaikhin lovin,” NW], mahni chung chauhvah chhuan tûr a nei ang,” tiin. (Galatia 6:4) Kohhrana upate chuan, an inel lo tih hre reng chungin, taksa pumkhat anga inpui tawnin, an thawk tlâng dial dial a ni. Kohhran ṭhat nâna thawh an neih ṭheuh theih avângin an lâwm a. Chutiang chuan inelna ṭha lo tak chu pumpelhin, kohhran chhûnga mite tân inlungrualna kawngah entawn tûr ṭha an siam a ni.
9 An kum te, an thiltawn te, a nih loh leh an pianpui thiamnate avângin, upa ṭhenkhat chu upa dangte aiin an thiam zâwk, a nih loh leh hriat thiam theihna an nei zâwk pawh a ni thei. Chuvângin, upate chuan Jehova inawpna pâwlah mawhphurhna chi hrang hrang an nei a ni. Mi dang nêna inkhaikhin aiin: “Mi tinin thilpêk in hmuh ang zêlin Pathian khawngaihna tinrêng enkawltu ṭhate angin, chûng chuan rawng inbâwl tawn ṭheuh rawh u,” tih thurâwn chu an hre reng zâwk a ni. (1 Petera 4:10) Dik tak chuan, engemaw chen hriatna dik kan dawn ṭheuh va, Kristian rawngbâwlnaa tel theihna chanvo kan neih ṭheuh avângin, he thu hi Jehova chhiahhlawh zawng zawngte tân a ni.
10. Eng kawng chauhvin nge kan rawngbâwlna thianghlim chu Jehova pawm tlâk a nih ang?
10 Kan rawngbâwlna thianghlim chu mi dangte chunga inlek nân ni lova, hmangaihna leh inpêkna avânga tih a nih chauhvin Jehova lâwmzâwng a ni ang. Chuvângin, biakna dik ṭawiâwmna kawnga kan thiltihah thlîr dân inbûk tawk neih a pawimawh a ni. Tumahin mi dangte chêttîrtu dik taka an rêlsak theih loh laiin, Jehova chu “thinlung bûktu” a ni. (Thufingte 24:12; 1 Samuela 16:7) Chuvângin, ‘Jehova rawng ka bâwlnaa min chêttîrtu chu eng nge?’ tiin a khât tâwkin kan inzâwt ṭhîn tûr a ni.—Sâm 24:3, 4; Matthaia 5:8.
Kan Thiltih Thlîr Dân Dik
11. Kan rawngbâwlna thiltih chungchângah eng zawhnate nge zawh âwm a nih?
11 Jehova pawm nih nân a chêttîrtu chu a pawimawh ber a nih chuan, kan rinna thiltih chungchâng chu eng chenin nge kan ngaihtuah ang? Rilru dik tak pu chunga rawng kan bâwl chhûng chuan, kan thiltih emaw, kan tih zât emaw chhinchhiah kher a ngai em? Hêngte hi inzawh âwm tak a ni, a chhan chu kan thiltih zât chu rinna thiltihte aia dah pawimawh zâwk emaw, kan Kristian rawngbâwlna chungchângah hming ṭha neih chu kan ngaih pawimawh ber emaw nihtîr kan duh loh avângin.
12, 13. (a) Kan thlawhhma rawngbâwl dân kan chhinchhiah chhan ṭhenkhat chu eng nge ni? (b) Kan thuhrilh rawngbâwlna report pum pui ennawn hunah lâwm nachhan tûr eng nge kan neih?
12 Organized to Do Jehovah’s Will tih lehkhabu sawi hi lo chhinchhiah rawh: “Isua Krista zuitu hmasate chuan thuhrilh rawngbâwlna hmasâwn dân chungchâng chu an ngaihven a. (Marka 6:30) Bible-a Tirhkohte bu chuan Pentikost-a zirtîrte chunga thlarau thianghlim leih buak a nih khân, mi 120 vêl an awm tih min hrilh a ni. Rei lo têah chu number chu 3,000-in a pung chho va, tichuan 5,000-in a pung chho leh a ni. . . . (Tirhkohte 1:15; 2:5-11, 41, 47; 4:4; 6:7) He punna chanchin thar hian zirtîrte chu a tichak ngei ang le!” tih hi. Chu mi avâng tak chuan, tûn laia Jehova Thuhretute chuan Isua thusawi: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih thlen famkim nâna khawvêl puma an hnathawh dân chhinchhiahna dik tak neih chu an tum a ni. Hêng hian khawvêl puma hnathawh dân dik tak chu a târ lang a. Thuhrilh rawngbâwlna tihhmasâwn nân ṭanpui a ngaihna lai leh thu leh hla mamawh chi leh mamawh zâtte chu a târ lang bawk a ni.
13 Chuvângin, thuhrilh rawngbâwlna report pêkna chuan kan hnathawh tûr Lalram chanchin ṭha hrilhna chu hlawhtling lehzualin min thawhtîr thei a ni. Chu bâkah, khawvêl hmun hrana kan unaute rawngbâwlna chungchâng kan hriatna hian min tichak ṭhîn a ni lâwm ni? Lei pum puia nasa taka punna leh hmasâwnna chanchin chuan min tihlimin, nasa lehzuala thawk tûrin min chêttîr a, Jehova malsâwmna kan dawng tih min rintîr bawk a ni. Tin, kan mi mal report chu khawvêl pum huap report-ah telh a ni tih hriatna chuan min va tilâwm tak êm! Kan mi mal report chu khawvêl pum report belhkhâwm nêna khaikhin chuan engmah tham a ni lo; mahse, Jehova chuan a hmuh hmaih lo a ni. (Marka 12:42, 43) I report tel lo chuan, report pum pui chu a kim thei dâwn lo tih hre reng ang che.
14. Thuhrilh leh zirtîrna bâkah, Jehova kan biaknaah eng nge tel?
14 Jehova chhiahhlawh inpumpêk pakhat anga mawhphurhna hlenna kawnga Thuhretu tinte thiltih tam tak chu an report-ah târ lan a ni lo. Entîr nân, report-ah chuan mi mala Bible a zirna, Kristian inkhâwmnaa a telna leh chhânna a pêkte, kohhrana a mawhphurhnate, a ṭûl anga rinpuite a ṭanpuina, khawvêl pum huap Lalram rawngbâwlna atâna thawhlâwm a thlâkte, leh thil dang dangte chu telh a ni lo. Chuvângin, thuhrilhnaa ṭhahnemngai reng tûr leh dâwngdahna pumpelh tûra min ṭanpuitu thlawhhma rawngbâwlna report chu a pawimawh hle laiin, chu chu a hmun tûr dik takah kan dah tûr a ni. Kan thlawhhma rawngbâwlna report ṭanchhana chatuana nunna dawng tûrah kan inngai tûr a ni lo.
“Thil Ṭha Tiha Ṭhahnemngai”
15. Thiltih chauhvin min chhandam thei lo mah se, engvângin nge an pawimawh?
15 Thiltihte chauhvin min chhandam thei lo mah se, an pawimawh tih chu a chiang hle. Chuvângin Kristiante chu “chi thlan bîk, thil ṭha tiha ṭhahnemngai” tûra koh an ni a, “hmangaih leh thil ṭha tiha inchawk tho” tûra fuih an ni bawk. (Tita 2:14; Hebrai 10:24) Chiang lehzualin, Bible ziaktu dang Jakoba chuan heti hian a sawi a ni: “Thlarau tel lovin taksa chu thi a ni, chutiang bawkin thiltihte tel lovin rinna pawh chu thi a ni.”—Jakoba 2:26.
16. Thiltih aimaha pawimawh zâwk chu eng nge ni a; mahse, eng lakah nge kan fîmkhur ang?
16 Thil ṭha tih, a nih loh leh hnathawh ṭhate chu a pawimawh hle mah se, chutianga ti tûra a chêttîrtu chu a pawimawh zâwk a ni. Chuvângin, a khât tâwka min chêttîrtu enfiah ṭhin chu a finthlâk a ni. Mahse, mihring tumahin mi dangte chêttîrtu a rilru chu dik taka kan hriat theih loh avângin, mi dangte sawisêl lo tûrin kan fîmkhur tûr a ni. “Mi dang chhiahhlawh sawisêltu chu tunge maw i nih le? A din leh a tlûk chu ama hotu tân a ni,” tih a chhânna chiang tak keng tel zawhna chu zawh kan ni. (Rom 14:4) Thil engkimte Pu, Jehova leh rorêltua a mi ruat Isua Krista chuan, kan hnathawh ṭanchhan chauh ni lovin, min chêttîrtu te, kan remchân dân te, kan hmangaihna neih te, leh kan inpêkna te ṭanchhan pawhin kan chungah ro an rêl dâwn a ni. Kristiante chu tirhkoh Paula thu: “Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh,” tih hi zâwm tûra fuih kan ni a, chutianga kan tih leh tih loh chu, Jehova leh Isua Krista chuahvin dik takin an rêl thei a ni.—2 Timothea 2:15; 2 Petera 1:10; 3:14.
17. Kan theih tâwp chhuah kan tum laiin, engvângin nge Jakoba 3:17 chu kan hriat reng ang?
17 Jehova chuan kan lakah a beisei sâng lutuk lo va. Jakoba 3:17-a sawi angin “chung lam aṭanga finna lo chhuak” chu thil dang bakah “a nunnêm,” a nih loh leh a âwm lo lo va. He mi chungchânga Jehova entawn chu kan tân a finthlâkin, hlawhtlinna tak tak a ni dâwn lâwm ni? Chuvângin, mahni leh kan unaute lakah kan beisei a sâng lutuk tûr tûr a ni lo.
18. Kan thiltih leh Jehova khawngaihna thlîr dân inbûk tâwk kan neihin eng nge kan beisei theih?
18 Kan rinna thiltih leh Jehova khawngaihna thlîr dân inbûk tâwk kan neih chhûng chuan, Jehova chhiahhlawh dikte chhinchhiahna chiang tak hlimna chu kan vawng reng ang. (Isaia 65:13, 14) Mi mala kal thiltih theih chu engpawh lo ni se, a pâwl angin Jehova’n a mite chunga malsâwmna a vûr chu kan chên thei a ni. “Ṭawngṭai leh dîlin, lâwmthu hril tel zêlin,” theih tâwp chhuah tûrin Pathian ṭanpuina kan dîl ang. Tichuan, rinhlelh rual lohvin, “Pathian thlamuanna, rilru rêng rênga hriat sên loh khân, [kan] thinlung leh [kan] ngaihtuahnate chu Krista Isuaah chuan [min] vênsak ang.” (Philippi 4:4-7) Ni e, thiltih vâng chauh ni lo, khawngaihna avânga chhandam kan ni thei tih hriatna aṭangin thlamunna leh chakna kan hmu thei a ni! (w05 6/1)
I Hrilhfiah Thei Em?
• Engvângin nge Kristiante chuan an mi mal hlawhtlinna an uanpui loh?
• Engvângin nge Kristiante’n inelna rilru put hmang chu an pumpelh?
• Engvângin nge Kristiante’n thlawhhma rawngbâwlnaa an Kristian thiltih chu an report?
• Engvângin nge Kristiante chuan an Kristianpuite sawisêl chu an pumpelh?
[Zirlai Atâna Zawhnate]
[Phêk 27-naa milem]
“Ka khawngaihna i tân a tâwk e”
[Phêk 30, 31-naa milemte]
I report tel lo chuan, report pum pui a kim thei dâwn lo