Hna​—⁠Malsâwmna Nge Anchhia?

“Mihring tân chuan . . . a thawhrimnaa a rilru tihnawm te aliama ṭha a lo awm lo.” ​—⁠Thuhriltu 2:24.

“NILENGA hna han thawh hnu chuan kan chau hnêp ṭhîn.” Hei hi, tûn hnaia ngaih dân lâknaa hnathawktu 3 zînga 1 zêlin an awm fo dân an sawi chhuahna a ni. Hei hi mite’n rilru hahna an tawrhna hmun atân thilmak a ni hran lo; anni chuan dârkâr rei tak hna an thawkin, hna tam tak inah an hâwn bawk a​—⁠chu a chhapah hotute chuan lâwmthu an hrilh khât hle a ni.

Thil siam chhuahna tam tak a lo awmna chuan hna thawktu tam takte chu pawimawhna nei vak lova inhriatna a neihtîr a. Phûrna leh thil thar ngaihtuaha siam chhuah theihnate chu bendaihsak an ni fo. Dân narânin, hei hian hna lama mite rilru put hmang chu a nghawng a. Hnathawh lai tuipui tûra chêttîrtu chu awlsam têin a tida bawk a ni. Themthiam tak nih châkna pawh chu a tireh ṭhak thei bawk.  Chûng chuan mi chu a hnathawh lai duh lohna a neihtîr theiin, nasa takin a huattîr hial thei a ni.

Kan Rilru Put Hmang Inenfiahin

Kan dinhmunte thlâk danglam theih loh châng kan nei ngei mai. Mahse, kan rilru put hmang erawh kan siamrem thei tih chu i pawm dâwn lâwm ni? Hna lam chungchângah engemaw chen chu rilru put hmang duhawm lo tak i nei tih i inhriat chuan, he mi chungchâng Pathian thlîr dân leh thu bulte ngaihtuah chu i ṭangkaipui ang. (Thuhriltu 5:18) Chutiang ngaihtuahna avâng chuan an hnaah hlimna leh lungawina engemaw chen an neih phah tih mi tam takin an hmu chhuak a ni.

Pathian chu Hnathawktu Chungnungber a ni. Pathian chu hnathawktu a ni a. Chutiang chuan kan ngai lo mai thei; mahse, chu chu Bible-a a inhmêlhriattîr hmasak ber dân chu a ni. Genesis thuziak chu Jehova’n lei leh vân a siam chungchângin a inṭan a. (Genesis 1:⁠1) Thil a siam ṭan laia Pathian chelh nihna chi hrang hrangte han ngaihtuah teh​—⁠tlêm azâwng chauh pawh sawi dâwn ila, ani chu ruahmantu, huaihawttu, engineer, lem ziaktu, thil siam chhuah dâwna a thil hman tûr thlang thiam tak, thiltum tipuitlingtu, damdawi lam thiam, thil nungte chanchin zirna lama mi thiam, nungcha chanchin zir mi, riruangtu, ṭawng chi hrang hrang thiam a ni.​—⁠Thufingte 8:​12, 22-31.

Eng nge Pathian hnathawh a ṭhatzâwng chu? Bible-a chhinchhiah chuan a hnathawh chu “ṭha,” ‘ṭha êm êm’ tiin a sawi. (Genesis 1:​4, 31) Dik takin, thil siamte chuan “Pathian ropuizia chu a hriattîr a,” keini pawhin amah kan fak ve tûr a ni!​—⁠Sâm 19:​1, 148:⁠1.

Mahse, Pathian hnathawh chu lei leh vân leh mihring tuak hmasa berte a siam zawh khân a tâwp mai lo. Jehova Fapa, Isua Krista chuan: “Ka Pain tûn thleng pawhin hna a thawk reng a ni,” a ti. (Johana 5:17) Ni e, Jehova chuan a thil siamte mamawh phuhru tûr leh châwm tûrin, leh amah betu mi rinawmte chhanhim tûrin hna a la thawk reng a ni. (Nehemia 9:6; Sâm 36:6; 145:​15, 16) A hnate thawh zawh nân mihring, “Pathian hnathawhpuite” chu a hmang hial a ni.​—⁠1 Korinth 3:⁠9.

Hna chu malsâwmna a ni thei. Bible chuan hna chu ânchhia angin a sawi a ni lâwm ni? Genesis 3:​17-19 hian Pathianin Adama leh Evi chu an helna avângin hna hahthlâk tak hmanga hrem angin a lantîr mai thei a. Chûng mihring hmasate thiam loh a chantîr khân, Pathianin Adama hnênah: “Leia i kîr leh hma loh chuan i hmaia thlantui luang zawih zawihin chaw i ei tawh ang,” a ti a. Chu chu hnathawk tûr ngawr ngawra thiam loh chantîrna a ni em?

Ni lo ve. Chutih a hnêkin, Adama leh Evi rinawm lohna avângin, Eden huan Paradis chu zauh a ni dâwn lo va. Lei chu Pathianin ânchhia a lawh a. Lei rinchhana inchâwm tûr chuan thlantui luang zawih zawiha thawhrim a ngai ta a ni.​—⁠Rom 8:​20, 21.

Hna chu ânchhia anga sawi ai mahin, Bible chuan malsâwmna angin a târ lang zâwk a ni. A chunga kan hmuh tâk angin, Pathian ngei pawhin hna a thawkrim a ni. Mihringte a anpuia siamin, Jehova chuan lei lama a thil siamte kîlkawi tûra theihna leh thuneihna chu a pe a. (Genesis 1:​26, 28; 2:15) Chu hna chu Pathianin Genesis 3:​19-a chhinchhiah thute a sawi hma daiha pêk a ni. Hna chu ânchhia leh thil ṭha lo ni se chuan, Jehova’n mite chu hna thawk tûrin a fuih ngai hauh lo vang le. Nova leh a chhûngte chuan Tuilêt hma leh a hnuah hnathawh tûr tam tak an nei a. Kristian hunah pawh, Isua hnungzuitute chu hna thawk tûra fuih an ni.​—⁠1 Thessalonika 4:11.

Chutichung pawhin, tûn lai hun atân hna chu phurrit a ni thei tih kan hre ṭheuh va. Rilru hahna te, hlauhthâwnawmna te, nin hluah hluahna te, beidawnna te, inelna te, inbumna te, leh rorêl dik lohna chu hna nêna inkûngkaih “hlîng leh buarte” zînga ṭhenkhat chauh a ni. Mahse, hna chu amah rau rauvah chuan ânchhia a ni lo. Thuhriltu 3:​13-ah, Bible chuan hna leh a rahchhuah chu Pathian thilpêk tiin a ko a ni.​—⁠“Hna Nêna Inkûngkaih Rilru Hahnate Hmachhawnin” tih bâwm hi en rawh.

I hnathawh hmangin Pathian i chawimawi thei. Hnathawhna hmuna hna thawh  ṭhatna leh ṭha lawr taka thawhna hian fak a hlawh reng ṭhîn a. Hna thawh ṭhat hi hnatawh chungchâng Bible thlîr dân hmêlhmang pawimawh tak a ni. Pathian ngei pawhin ṭha lawr takin hna a thawk a. Ani chuan themthiamna leh theihna min pe a, kan thiamnate chu thil ṭha tih nâna hmang tûrin min duh a ni. Entîr nân, hmân lai Israel rama biak bûk sak a nih chhûng khân, an hna thiam tak leh ṭangkai taka an thawh theihna tûrin Bezalela leh Oholiaba ang mite chu Jehova’n finna, hriat thiamna, leh hriatnain a vûr a ni. (Exodus 31:​1-11) Hei hian Pathianin an hnathawh dân te, an themthiamna te, an thil siam pian hmang te, leh an hnathawh dang dangte chu a ngaihven hle tih a târ lang.

Hei hian kan mi mal theihna leh hnathawh dân chungchâng kan thlîr dân tûr a hril thui hle a ni. Chûng chu thil ho mai mai anga thlîr lo va, Pathian thilpêk anga thlîr tûrin min ṭanpui a ni. Chuvângin, Kristiante chu an hnathawh laite Pathian ngeiin endik ang hrima thawk tûra fuih  an ni: “In tih apiang chu mihring tân anga ti lovin, Lalpa tân anga ti zâwkin, châk takin ti rawh u,” tiin. (Kolossa 3:​23, 24) Pathian chhiahhlawhte chu hna thawk ṭha tûra fuih an ni a, chu chuan an hnathawhpuite leh mi dangte tân Kristian thuchah chu a duhawmtîr lehzual a ni.​—⁠“Hnathawhna Hmuna Bible Thu Bulte Nunpuiin,” tih bâwm hi en rawh.

Kan hnathawhin Pathian a chawimawi theih avângin, kan hnaa kan thawh ṭhat dân leh kan taihmâk dânte kan enfiah tûr a ni. Kan hnathawh dânah Pathian a lâwm ang em? Kan hna chante kan thawh dânah kan lung a âwi tâwk em? Kan lungâwi tâwk lo a nih chuan hma kan la sâwn thei tihna a ni.​—⁠Thufingte 10:4; 22:29.

Hna leh thlarau lam thil inbûk tâwktîr rawh. Hna thawhrim chu fakawm hle mah se, hnathawhna leh nuna lungâwina hmuh theih nâna thil pawimawh tak dang a la awm cheu va. Chu chu thlarau lam thil ngaihsak hi a ni. Hna thawkrim a, nuna hausakna leh nawmsakna zawng zawng chêntu, Lal Solomona chuan, heti hian thutâwp a siam: “Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tiin.​—⁠Thuhriltu 12:13.

Chiang takin, kan thiltih apiangah Pathian duhzâwng kan ngaihtuah tel tûr a ni. A duhzâwng milin hna kan thawk nge, a kalhzâwngin kan thawk zâwk? Pathian tihlâwm kan tum nge,  mahni in tihlâwm kan tum zâwk? Pathian duhzâwng kan tih loh chuan, a tâwpah lungngaihna, mal ngawih ngawih leh ruak nia inhriatna te kan tuar dâwn a ni.

Steven Berglas-a chuan hna thawkrim lutuk hotute chu, ‘an hnathawh duhzâwng tak hmu chhuak a, chu chu an nun kawng pêng pakhata siam’ tûrin thu a râwn a ni. Hna awmze nei tak thawk thei tûra themthiamna leh theihna min Petu rawngbâwlsak aia hna hlu zâwk a awm lo. Min Siamtu tilâwm thei hna kan thawhna chuan lungâwi lohna min neihtîr lo vang. Isua tân chuan, Jehova pêk hna chu chakna nei, lungâwithlâk tak, leh mi tiharh thei tak chaw ang a ni. (Johana 4:34; 5:36) Chu bâkah, Hnathawktu Chungnungber, Pathian chuan ama “hnathawhpuite” ni tûrin min sâwm a ni.​—⁠1 Korinth 3:⁠9.

Pathian biak leh thlarau lama ṭhanchhohna chuan hna manhla tak leh mawhphurhna sâng tak chelh thei tûrin min thuam a ni. Hnathawhna hmunte hi nêkchêpna te, inngeih lohna te, thilphûttea a khah tlat ṭhin avângin, kan rinna nasa tak leh thlarau lama kan puitlinna chuan hnathawktu ṭha emaw, hnathawhna pu ṭha emaw nih kan tumna kawnga kan mamawh chakna chu min pe thei a ni. Kawng lehlamah chuan, he Pathian ngaihsak lohna khawvêla nun dânte hian rinnaa kan ṭhanchhoh a ngaihna lai tûr min hriattîr thei bawk.​—⁠1 Korinth 16:​13, 14.

Hna Chu Malsâwmna A Nih Hun Tûr

Tûna Pathian rawngbâwl tûra thawkrimte chuan, Pathianin Paradis din leh a, lei pum pui hi hna manhla tak thawh tûra a khah hun chu nghâkhlel takin an thlîr thei a ni. Jehova zâwlnei, Isaia chuan chuta nun dân tûr chungchâng chu a lo sawi lâwk a: “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang: . . . ka mi thlante chu rei tak an thawh chhuah chungah chuan an lâwm dâwn a ni,” tiin.​—⁠Isaia 65:​21-23.

Chutih hunah chuan hnathawh chu malsâwmna a va ni dâwn êm! I tâna Pathian duhzâwng zir a, chu mi nêna inmila hnathawhna hmangin, Jehova malsâwmte zînga mi i ni thei a, ‘i thawhrimna zawng zawngah hlim takin i awm’ reng thei dâwn a ni.​—⁠Thuhriltu 3:13. (w05 6/15)

[Phêk 8-naa thu lâk chhuah]

Pathian chu Hnathawktu Chungnungber a ni: Genesis 1:​1, 4, 31; Johana 5:17

[Phêk 8-naa thu lâk chhuah]

Hna chu malsâwmna a ni thei: Genesis 1:28; 2:15; 1 Thessalonika 4:11

[Phêk 8-naa thu lâk chhuah]

I hnathawh hmangin Pathian i chawimawi thei: Exodus 31:​1-11; Kolossa 3:​23, 24

[Phêk 8-naa thu lâk chhuah]

Hna leh thlarau lam thil inbûk tâwktîr rawh: Thuhriltu 12:13; 1 Korinth 3:⁠9.

[Phêk 6-naa bâwm/milem]

HNA NENA INKUNGKAIH RILRU HAHNATE HMACHHAWNIN

Damdawi lama mi thiamte chuan hna nêna inkûngkaih rilru hahna chu hnathawh nêna inkûngkaih thil hlauhthâwnawm angin an thliar hrang a. Chu chuan pân chhia leh lunghnualnate a thlen theiin, mahni inthahna hial pawh a thlen thei a ni. Japan-ho chuan chu mi atân thu mal​—⁠karoshi, tih chu an nei a, “thawhrim luat thihpuina,” tihna a ni.

Hna nêna inkûngkaih thil chi hrang hrang chuan rilru hahna a thlen thei a. Chûng zîngah chuan hnathawh hun dârkâr emaw, dinhmun emaw inthlâkna te, hotute nêna intihbuaina te, mawhphurhna emaw, hna emaw inthlâkna te, hna chawlhsanna te, hna aṭanga bânna te a tel a ni. Chutiang rilru hahnate chhân lêt nân, ṭhenkhat chuan an hna emaw, dinhmun emaw thlâkna hmangin tâl chhuah an tum a. Mi dangte chuan chûng rilru hahnate chu dan beh dân kawng an dap a, an nun kawng dang, a tlângpuiin in chhûngkhurah a lo lang ṭhîn a. Mi ṭhenkhat chuan rilru lamin an tuar a, lungngaihna a thlen a ni.

Kristiante chu hna nêna inkûngkaih rilru hahnate hmachhawn tûrin ṭha taka thuam an ni a. Bible chuan hun harsaah pawh thlarau lam leh rilru lam atâna nghawng ṭha tak nei thei thu bul pawimawh tam tak a pe chhuak a ni. Entîr nân, Isua chuan: “Atûk atân lungkham suh u, atûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni,” a ti a. Hetah hian naktûk atân ni lo, vawiina buainate ngaihsak tûrin min fuih a ni. Chuvângin, kan hrehawmna tizual tûr ringawtin kan harsatnate chu a nihna bâkin kan sawi uar chiam lo a ni.​—⁠Matthaia 6:​25-34.

Kristiante tân mahni chakna ni lovin, Pathian chaknaa an innghah chu a pawimawh a. Tuar thei tawh ngang lova kan inhriat hunah chuan, Pathian chuan thinlunga thlamuanna leh hlimna min pe a; tin, harsatna engpawh hmachhawn thei tûrin finna min pe thei bawk a ni. “Lalpaah leh a chakna thahruiah chuan thiltihtheihna neiin lo awm rawh u,” tiin Paula chuan a ziak a ni.​—⁠Ephesi 6:10; Philippi 4:⁠7.

A tâwp berah chuan, rilru hahna dinhmunte pawhin rah ṭha a chhuah thei a ni. Fiahnate chuan Jehova lam min hawitîrin, amah min zawntîrin, min rinchhantîr thei a ni. Kristian miziate nei zêl tûrin leh nêksâwrna hnuaia chhel ṭâng ṭâng thei tûrin min ṭanpui bawk. Paula chuan: “Kan hrehawmnaah pawh lâwmin i awm ang u, hrehawmna chuan chhelna a siam a, chhelna chuan hriatfiahna a siam a, hriatfiahna chuan beiseina a siam tih kan hre si a,” tiin min fuih a ni.​—⁠Rom 5:​3, 4.

Chuvângin, rilru hahna chu lungngaihna leh manganna thlentu aiin, thlarau lama ṭhang chho tûra min chêttîrtu a ni thei a ni.

[Phêk 7-naa bâwm/milem]

HNATHAWHNA HMUNA BIBLE THU BULTE NUNPUIIN

Hna thawh laia Kristian rilru put hmang leh nungchang chuan hnathawhpuite leh mi dangte tân Bible thuchah chu a duhawmtîr lehzual a ni. Tita hnêna a lehkha thawnah khân, tirhkoh Paula chuan mi dangte hnuaia hnathawktute hnênah chuan “Pathian min Chhandamtu zirtîrna thu engkima an cheimawi theih nân, hnial lovin, kutkem hmang lovin, rinawmna ṭha zawng zawng tilang zâwkin, an [hotute] thu thua awm tûr leh, engkima an lâwmzâwnga awm tûrin,” a fuih a ni.​—⁠Tita 2:​9, 10.

Entîr nân, sumdâwng mi pakhatin khawvêl puma Jehova Thuhretute hmunpuia a lehkha thawn hi han ngaihtuah teh: “Jehova Thuhretute ruai thei tûra phalna dîlin ka rawn ziak a ni. An rinawm a, an dik a, an rin tlâk a; tin, min bum dâwn lo tih ka hriat avângin, anni chu rawih ka duh a ni. Jehova Thuhretute chauh hi ka mi rin awmchhun an ni. Khawngaihin min ṭanpui rawh,” tih hi.

Kyle-i chu private school-a mite lo dawngsawngtu (receptionist) anga hna thawk Kristian pakhat a ni a. Inhriat sualna a awm avângin, a thawhpui pakhatin, school naupang ṭhenkhat hmaah a ânkhum chiam a. Kyle-i chuan: “Jehova hming tichhe lo tûrin ka fîmkhur hle a ngai a ni,” a ti. A hnu ni nga chhûng chuan Bible thu bulte a nunpui theih dân tûr chu a ngaihtuah char char a. Pakhat chu Rom 12:​18-a hmuh thu hi a ni: “A theih phawt chuan nangmahni lam tal, mi zawng zawng nên inremin awm rawh u,” tih hi. An inkâra inhmuhthiam lohna a awm avângin e-mail hmanga lehkha thawnin ngaihdam a dîl a. Kyle-i chuan a thawhpuinu chu hnathawh bân hnua an buaina chingfel tûrin a sâwm a ni. Chutianga an chinfel chuan, Kyle-i thawhpuinu rilru chu a lo dam deuh va, Kyle-i hma lâk dân finthlâkzia chu a pawm a ni. Ani chuan Kyle-i hnênah, “He hi i sakhua vâng i ni êm êm ang,” a ti a, inpawmin an inmangṭha ta a ni. Kyle-i thutâwp siam chu eng nge ni? “Bible thu bulte kan nunpui phawt chuan kan kal sual ngai lo vang.”

[Phêk 4, 5-naa milem]

Hnathawktu tam tak chuan pawimawhna nei lova inhriatna an nei

[Milem Hawhtîrtu]

Japan Information Center, Consulate General of Japan in NY

[Phêk 8-naa Milem Hman Hawhtîrtu]

Khawvêl pum lem: NASA photo