Hnam Tina Mite Tâna Chanchin Ṭha
Hnam Tina Mite Tâna Chanchin Ṭha
“Kâwlkil thleng pawhin ka thuhretute in ni ang.”—TIRHKOHTE 1:8.
1. Bible zirtîrtu kan nih angin, engah nge kan fîmkhur a, engvângin nge?
ZIRTIRTU nih tling takte chuan zirlaite hnêna an thu hrilhah chauh ni lovin, an hrilh dânah pawh an fîmkhur a ni. Bible thutak zirtîrtute kan nih angin, chutiang bawk chuan kan fîmkhur a. Kan thu hrilh leh kan hrilh dân chu kan ngaihsak a. Kan thuchah ken, Pathian Ram chanchin ṭha chu a danglam lo; mahse, kan tihdân phung erawh chu dinhmun azirin kan siamrem thung a ni. Engvângin nge? Mi a tam thei ang berte hnêna chanchin ṭha kan thlen theih nân a ni.
2. Kan thuhrilh dânte kan siamrem hian, tunge kan entawn?
2 Kan zirtîr dân phung siamremna hmangin, hmân laia Jehova chhiahhlawhte chu kan entawn a ni. Entîr nân, tirhkoh Paula hi ngaihtuah teh. Ani chuan: “Judate hnênah Juda mi angin ka awm ṭhîn . . . Dân hnuaia awmte hnênah Dân hnuaia awm angin ka awm ṭhîn . . . Chak lote ka lâk luh theihna tûrin chak lote hnênah chak lo angin ka awm ṭhîn; eng emaw ti tala ṭhenkhatte tal ka chhandam theihna tûrin mi zawng zawng hnênah engkim ka ni tawh,” tiin a sawi. (1 Korinth 9:19-23) Paula tih dân phung siamrem theih hman chu a ṭangkai hle a ni. Keini pawhin kan biakate mil tûra kan thusawi dânte kan siamrem chuan, rah ṭha kan chhuah ngei ang.
‘Kâwlkil’ Thlengin
3. (a) Kan thuhrilh rawngbâwlnaah harsatna eng nge kan tawh? (b) Engtin nge Isaia 45:22 thu chu tûn laiah a thlen famkim?
3 Chanchin ṭha hriltute tawh harsatna lian tak mai chu bialchhûng—‘khawvêl zawng zawng’—a zauh êm vânga lo awm harsatna a ni a. (Matthaia 24:14) Kum zabi liamta chhûng khân, Jehova chhiahhlawh tam takte chuan ram thara chanchin ṭha thehdarh tûrin an thawk rim hle a ni. Eng nge a rah chhuah? Khawvêl pum puia mak tak maia punna a thleng a ni. Kum zabi 20-na ṭantirhah chuan, ram tlem têah chauh thuhrilhna chu neih a ni a; mahse, tûnah hian Jehova Thuhretute chu ram 235-ah an awm a ni! Dik takin, Lalram chanchin ṭha chu ‘kâwlkil’ thleng pawha puanchhuah mêk a ni.—Isaia 45:22.
4, 5. (a) Chanchin ṭha thehdarhna kawngah tute’n nge hmun pawimawh tak luah? (b) Branch bialchhûnga rawngbâwltute chungchângah branch office ṭhenkhat chuan eng nge an sawi?
4 Chutiang khawpa punna nasa chu engvânga lo awm nge ni? Thil tam tak vâng a ni. Watchtower Bible School of Gilead aṭanga zir chhuak missionary-te leh tûn hnaia neih Ministerial Training School aṭanga zir chhuak mi 20,000 chuangte chuan punna chu nasa takin an awmtîr a. Chutiang bawkin, mahni sum sênga Lalram thuchhuahtu mamawh zualna rama pêm Thuhretute pawhin punna an awmtîr bawk. Chutiang Kristian inpumpêk—mipa leh hmeichhia, apui apang, nupui pasal nei leh nei lo te—chuan lei pum puia Lalram thuchah puanchhuahnaah hmun pawimawh tak an luah a ni. (Sâm 110:3; Rom 10:18) Anni chu nasa taka ngaihsân an ni. Branch bialchhûng mamawh zualna hmuna rawngbâwl ram dang aṭanga lo kalte chungchâng branch office ṭhenkhatte lehkha ziah chu chhinchhiah teh.
5 “Hêng Thuhretu duh takte hian hmun kilkhâwra thuhrilhnaahte hma an hruai a, kohhran thar dinna kawngahte an ṭanpui a; tin, tualchhûnga unaute thlarau lama ṭhanlenna kawngah nasa takin thawh an nei ni.” (Ecuador) “Heta ram dang mi za tam tak rawngbâwlte hi an haw ngai ta se chuan, kohhran ngelnghehna chuan a tuar ngei ang. Kan zînga an awm hi malsâwmna a ni tak zet a ni.” (Dominican Republic) “Kan kohhran tam takahte chuan, unaunute an tam hle a, a châng chuan za zêla 70 vêl an tling a ni. (Sâm 68:11) A tam zâwkte chu thutaka lo awm tharte an ni a; mahse, ram dang aṭanga lo kal pasal nei lo pioneer unaunute chuan chûng mi tharte chu zirtîrin ṭanpuina hlu tak chu an pe a ni. Hêng ram dang aṭanga lo kal unaunute hi kan tâna thilthlawnpêk dik tak an ni!” (Europe Khawthlang lama ram pakhat) Ram danga rawngbâwl chu i ngaihtuah chhin tawh ngai em? *—Tirhkohte 16:9, 10.
‘Mi Sâwm Hnam Tin Zînga Ṭawng Tinrêng Hmangte’
6. Ṭawng hrang hrang a tam vânga kan thuhrilhnaa harsatna awm chu Zakaria 8:23-in engtin nge a târ lan?
6 Harsatna lian tak dang pakhat leh chu leia ṭawng chi hrang hrang tam lutuk hi a ni. Pathian Thu chuan: “Chûng nîahte chuan heti hi a la ni ang a, mi sâwm, hnam ze tinrêng aṭanga lo chhuakte chuan Juda mi pakhat fênfualah an vuanin an chelh ang a, I hnênah Pathian a awm tih kan hriat avângin i hnênah kan kal ve dâwn e, an ti ang, a ti a,” tiin sawi lâwk a ni. (Zakaria 8:23) He hrilh lâwkna tûnlaia a famkimnaah hian, mi sâwmte chuan mipui tam tak, Thu Puan 7:9-a hrilh lâwk chu an entîr a ni. Amaherawhchu, Zakaria hrilh lâwknain a sawi dân chuan, “mi sâwm” chu hnam tin zînga mi mai ni lovin, “hnam ze tinrêng aṭanga lo chhuakte,” a nih loh leh hnam tin zînga ṭawng tinrêng hmangte an ni tih chhinchhiah ang che. He hrilh lâwkna kimchang pawimawh tak thlen famkimna hi kan hmu tawh em? Aw, hmu tawh chiang e.
7. A zât târ lanna engte’n nge ‘hnam tin zînga ṭawng tinrêng hmangte’ hnênah chanchin ṭha thlen a ni tih târ lang?
7 A zât târ lanna ṭhenkhatte hi ngaihtuah teh. Kum sawmnga liam ta khân kan thu leh hlate chu ṭawng hrang 90-a tih chhuah a ni a. Tûn laiah, 400 chuanga tihchhuah a ni. A dang nêna khaikhin chuan ṭawng ṭhenkhat hmangtute chu tlêm hle mah se, “bawi rinawm, fing tak” chuan thu leh hlate pe chhuak tûrin a theih ang apiang a ti a. (Matthaia 24:45) Entîr nân, Bible thu leh hla hi tûnah Greenland ṭawngin (mi 47,000-in he ṭawng hi an hmang), Palauan ṭawngin (mi 15,000-in an hmang), leh Yapese ṭawngin (mi 7,000 aia tlêmin an hmang) hmuh theihin a awm a ni.
Remchânna Thar Thlentu “Kawngka Zau Tak”
8, 9. Eng thilin nge “kawngka zau tak” min hawnsak a, Thuhretu sang tam takin engtin nge an chhân lêt?
8 Mahse, tûn laiah chuan ṭawng hrang hrang hmangte hnêna chanchin ṭha hril tûra ram danga kan kal chu a ngai kher lo mai thei. Tûn hnai mai khân, ei leh bâr hnianghnârna ramah râl tlân leh pêm lût mi maktaduai têl an awm avângin, ṭawng dang hmanna vêng tam tak a lo awm a ni. Entîr nân, France ram Paris khawpuiah chuan, ṭawng chi 100 vêl hman a ni a. Canada ram Toronto khawpuiah chuan 125; tin, England ram London khawpuiah chuan ṭawng 300 chuang lai hman a ni! Kohhran bial tam taka hêng ram dang mite awmna hian hnam tinte hnêna chanchin ṭha hrilhna tûrin “kawngka zau tak” a hawng a ni.—1 Korinth 16:9.
9 Thuhretu sang tam takte’n ṭawng dang zirna hmangin harsatna lo awm chu an hmachhawn a. Tam takte tân chuan hei hi a harsa a; mahse, an thawhrimna hi Pathian Thua thutak zir tûra râl tlânte leh pêm lûtte ṭanpuinaa hlimna an dawnte chuan a bûk hneh êm êm a ni. Tûn hnai maiah khân, Europe Khawthlanga district inkhâwmpui pakhata baptisma chang zaa 40 deuh thaw chu ram dang aṭanga lo kalte an ni.
10. Good News for People of All Nations lehkhabutê chu engtin nge i hman tawh? (“Good News for People of All Nations Lehkhabutê Hmêlhmangte” tih phêk 27-naa bâwm chu en rawh.)
10 A dik a ni, kan zînga a tam zâwkte hi chu ṭawng dang zir thei dinhmunah kan ding lo. Chutichung pawhin, Good News for People of All Nations, * tih lehkhabutê chhuah thar, ṭawng hrang hrang tam taka Bible thu mi hîp thei tak awmna chu hmang ṭangkaiin, pêm tharte chu kan ṭanpui ve thei a ni. (Johana 4:37) He lehkhabutê hi rawngbâwlnaah i hmang em?
Mite’n An Ngaihthlâk Loh Hunah
11. Bial ṭhenkhatah harsatna dang eng nge tawh a nih?
11 Leia Setana thununna a pun chhoh zêl lai hian, harsatna dang kan tawh ṭhin chu bial ṭhenkhata mite’n an ngaihthlâk duh lohna hi a ni. Isua’n hêng hi a lo awm dâwn tih a sawi lâwk avângin, he dinhmun hi mak kan ti lo. Kan hun lai chanchin sawiin, Isua chuan: “Mi tam zâwk hmangaihna chu a la dai ang,” tiin a sawi. (Matthaia 24:12) Dik takin, Pathian rinna leh Bible zahna chu mi tam tak zîngah a tla hniam tawh a ni. (2 Petera 3:3, 4) Chutichuan, khawvêl hmun ṭhenkhatah tlêm azâwngte chu Krista zirtîr tharte an lo ni a. Amaherawhchu, chutiang mite ngaihthlâk duh lohna hmuna kan Kristian unaupa leh unaunu duh takte’n rinawm taka an thawhrimna chu engmah lo mai a ni tihna erawh a ni lo. (Hebrai 6:10) Eng vângin nge a nih loh? A hnuaia mi hi ngaihtuah rawh.
12. Kan thuhrilh rawngbâwlnain a tum pahnihte chu engte nge ni?
12 Chanchin Ṭha Matthaia ziak hian kan thuhrilhnain a tum bulpui ber pahnihte chu a târ lang a. Pakhat chu “hnam tina mi zirtîrahte siam” a ni. (Matthaia 28:19) A dang leh chu Lalram thuchah chu thu “hriattîrna” ang a ni. (Matthaia 24:14) He thiltumte hi an pawimawh ve ve a; mahse, a hnuhnûng zâwk hian awmzia danglam bîk tak a nei a ni. Engvângin nge?
13, 14. (a) Isua lo kal lehna, a nih loh leh lo awm lehna chhinchhiahna langsâr tak chu eng nge ni? (b) A bîkin, ngaihthlâk duh lohna biala thu kan hrilh hunah eng nge kan rilrua kan vawn tûr?
13 Zirtîrte’n Isua hnênah: “I lo kal lehna leh khawvêl tâwpna chhinchhiahna chu engnge ni ang?” tia an zawh thu Bible ziaktu Matthaia chuan a chhinchhiah a. (Matthaia 24:3) Chu chu chhângin, Isua chuan chu chhinchhiahna hmêlhmang langsâr bîk tak pakhat chu khawvêl pum puia thuhrilh rawngbâwlna hi a ni tih a sawi a ni. Zirtîr siam rawngbâwlna a sawi em? Sawi lo. “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang,” tiin a sawi a. (Matthaia 24:14) Chutiang chuan, Isua chuan lalram thuhrilh rawngbâwlna ngei pawh chu chhinchhiahna hmêlhmang pawimawh tak a nih tûr thu a târ lang a ni.
14 Hei vâng hian, Lalram chanchin ṭha kan hrilh hian zirtîrah kan siam thei kher lo a nih pawhin, thu “hriattîrna” kawngah chuan kan hlawhtling tho tho a ni. Mite’n eng ang pawhin chhâng lêt mah se, kan thiltih chu an hria a; chuvângin, Isua thu hrilh lâwkna tihfamkimna kawngah kan tel a ni. (Isaia 52:7; Thu Puan 14:6, 7) Jordy-a, Europe Khawthlang lama Thuhretu rawlthar pakhat chuan: “Jehova’n Matthaia 24:14 thlen famkimnaah tel ve tûrin min hmang tih hriatna chuan min ti hlim hle a ni,” tiin a sawi. (2 Korinth 2:15-17) Rinhlelh rual lohvin, chutiang bawk chuan i ngai ve ngei ang.
Kan Thuchah Ken Chu Dodâl A Nih Hunah
15. (a) Eng chungchângah nge Isua’n amah zuitute a vaukhân lâwk? (b) Engin nge dodâlna tâwk chung pawha thu min hrilhtîr thei?
15 Lalram chanchin ṭha hril tûrin dodâlna chuan harsatna dang a siam leh a. Isua chuan amah zuitute chu: “Ka hming avângin hnam zawng zawng huat in ni ang,” tiin a vaukhân lâwk a ni. (Matthaia 24:9) Hmân lai Kristiante angin, tûn laia Isua zuitute chu huat, dodâl, leh tihduhdah an ni. (Tirhkohte 5:17, 18, 40; 2 Timothea 3:12; Thu Puan 12:12, 17) Ram ṭhenkhatah chuan, anni chu sawrkârin a khapbet a. Amaherawhchu, Pathian thuâwih an duh avângin, chutiang rama Kristian dikte chuan Lalram chanchin ṭha chu an hril zêl a ni. (Amosa 3:8; Tirhkohte 5:29; 1 Petera 2:21) Engin nge anmahni leh khawvêl puma Thuhretu dangte chu chutiang tihtîr thei le? Jehova chuan a thlarau thianghlim hmangin anni chu a tichak a ni.—Zakaria 4:6; Ephesi 3:16; 2 Timothea 4:17.
16. Engtin nge Isua’n thuhrilh rawngbâwlna leh Pathian thlarau inkûngkaihna a lantîr?
16 Isua’n a zirtîrte hnênah: “Thlarau thianghlim chu in chunga a lo thlen hunah thiltihtheihna in la nei ang; tichuan . . . kâwlkil thleng pawhin ka thuhretute in ni ang,” tia sawiin Pathian thlarau leh thuhrilh rawngbâwlna inzawmna chu a sawi uar a ni. (Tirhkohte 1:8; Thu Puan 22:17) He Bible chânga thil indawt dân hi a pawimawh a ni. A hmasa berin, zirtîrte chuan thlarau thianghlim an dawng a; tichuan, khawvêl puma thuhrilh rawngbâwlna chu an thawk ṭan a ni. Pathian thlarau ṭanpuina chauhvin ‘hnam zawng zawng hnêna hriattîrna’ pe tûrin chakna an nei thei ang. (Matthaia 24:13, 14; Isaia 61:1, 2) Chuvângin, Isua chuan thlarau thianghlim chu inâwm takin “thlamuantu,” a nih loh leh ṭanpuitu angin a sawi a. (Johana 15:26) A zirtîrte chu Pathian thlarau chuan zirtîrin, a kaihruai dâwn tih a sawi a ni.—Johana 14:16, 26; 16:13.
17. Dodâlna nasa tak kan tawh hian, engtin nge thlarau thianghlim chuan min ṭanpui?
17 Eng kawngin nge Pathian thlarau chuan tûn laia chanchin ṭha hrilhnaa dodâlna nasa tak kan tawh hunah min ṭanpui? Pathian thlarau chuan min tichakin, min tiduhdahtute chu a dodâl a ni. He mi entîr nân, Lal Saula nuna thilthleng hi ngaihtuah teh.
Pathian Thlarau Dodâlna
18. (a) A ṭha lo lama eng inthlâk thlengna nge Saula’n a paltlang? (b) Eng tihdân nge Saula’n Davida tihduhdah nân a hman?
18 Israel lal hmasa ber angin, Saula chuan bul ṭanna ṭha tak a nei a; mahse, a hnuah chuan Jehova thu a âwih lo a ni. (1 Samuela 10:1, 24; 11:14, 15; 15:17-23) Chuvângin, Pathian thlarau chuan lal chu a ṭanpui tawh lo va. Saula chu a dawta lal tûra hriak thih tawh leh Pathian thlarau ṭanpuina dawng mêk Davida chungah chuan tharum thawh hial khawpin a thinrim a ni. (1 Samuela 16:1, 13, 14) Davida chu awlsam taka hneh theih mai tûr angin a lang. Tihah chuan, ṭingṭang chauh a ken laiin Saula erawh chuan fei a keng tlat si a. Tichuan, ni khat chu Davida chuan ṭingṭang a tum laiin, “Saula chuan a fei chu a han lek a, ‘Bangah sâwn Davida ka khawh bet tlat teh ang,’ a ti a. Davida chuan vawi hnih a kiansan a.” (1 Samuela 18:10, 11) Chu mi hnuah, Saula chuan Davida ṭhian a fapa Jonathana thu chu a ngaithla a, chhechhamin: “LALPA nunna chhâlin ka sawi e, [Davida] chu tihhlum tûr a ni tawp lo vang,” a ti a. Mahse, Saula chuan “a fei chuan Davida chu banga khawhbeh leh tlat a tum” leh a ni. Nimahsela, Davida chu “Saula kiang ata chu a pût chhuak var a, fei chu bangah chuan a khawh bur ta ngur mai a.” Davida chu a tlân chhia a; mahse, Saula chuan a ûm zui a. Chu mi hun khirh takah chuan, Pathian thlarau chu Saula dodâltu a lo ni. Eng kawngin nge?—1 Samuela 19:6, 10.
19. Engtin nge Pathian thlarauvin Davida a humhim?
19 Davida chu zâwlnei Samuela hnênah a tlân chhia a; mahse, Saula chuan amah man tûrin mi a tîr a. Amaherawhchu, Davida bihrûkna an han thlen chuan, “Saula mi tirhte chungah chuan Pathian thlarau a lo thleng a, anni pawh chuan thu an va sawi ve ta dual dual a.” Pathian thlarauvin a chiah hneh êm avângin, an kal chhan ber pawh an theihnghilh hmin ṭhak a ni. Vawi hnih dang Saula chuan Davida hruai kîr leh tûrin a mite a tîr a, a ngai bawk a thleng leh ṭhîn a. A tâwpah chuan Lal Saula ngei chu Davida hnênah chuan a kal a; mahse, 1 Samuela 19:20-24.
Saula ngei pawh chuan Pathian thlarau hnathawh chu a kalh zo bîk lo. Dik takin, thlarau thianghlim chuan Saula chu ‘nilêng leh zankhuain’ che thei lovin a siam a, Davida tân tlân chhiat theihna hun tam tâwk a pe a ni.—20. Saula’n Davida a tihduhdah chungchâng aṭangin eng nge kan zir theih?
20 He Saula leh Davida chungchâng thu hian zir tûr mi tichak thei tak a pai a ni: Pathian thlarauvin a do hunah chuan Pathian chhiahhlawh tiduhdahtute chu an hlawhtling thei lo, tih hi. (Sâm 46:11; 125:2) Israelte chunga Davida laltîr chu Jehova thiltum a ni a. Tumahin an tidanglam thei lo. Kan hun lai atân, Jehova chuan ‘ram chanchin ṭha hi hrilhin a awm ang’ a ti a. Tumahin chu chu an dang chat thei lo.—Tirhkohte 5:40, 42.
21. (a) Engtin nge tûn laia dodâltu ṭhenkhat chu an chêt? (b) Eng nge kan rinngheh tlat?
21 Sakhua leh politics hruaitu ṭhenkhat chuan min danbeh nân dâwt leh tharum an hmang hial a. Nimahsela, Jehova’n thlarau lama Davida a vênhim ang chiahin, tûn laia A mite pawh A vênghim ang. (Malakia 3:6) Chuvângin, Davida angin: “Pathian ka ring a, ka hlau lo vang; mihringin eng nge mi tih theih ang?” tiin ringnghet tak chungin kan sawi a ni. (Sâm 56:11; 121:1-8; Rom 8:31) Hnam zawng zawngte hnêna Lalram chanchin ṭha hril tûra Pathian hna pêk kan thawh hian, Jehova ṭanpuinain harsatna zawng zawng chu i tuar chhuak ang u. (w05 7/1)
[Footnote-te]
^ par. 5 “Lungawina Nasa Tak,” tih phêk 26-naa bâwm chu en rawh.
^ par. 10 Jehova Thuhretute tih chhuah a ni.
I Hre Chhuak Thei Em?
• Engvângin nge kan thuhrilh dân phung chu kan siamrem?
• Remchânna thlentu eng “kawngka zau tak” nge hawn a nih?
• An ngaihthlâk duh lohna bialah pawh kan thuhrilh rawngbâwlnain eng nge a tihhlawhtlin?
• Engvângin nge dodâltu tumahin Lalram chanchin ṭha hrilhna chu an tihtâwp theih loh?
[Zirlai Atâna Zawhnate]
[Phêk 26-naa bâwm]
“Lungawina Nasa Tak”
“An hlimin lungrual taka Jehova rawngbâwl chu nuam an ti hle.” Hei hi Spain ram aṭanga Bolivia rama pêm chhûngkaw pakhat chungchâng sawina a ni. An chhûngkuaa fapa pakhat chu hmun kilkhâwra awm, ṭanpui ngai group pakhat ṭanpui tûrin Bolivia ramah a va kal a. Hlimna a tawh chuan a nu leh pate rilru a khawih hle a—mipa kum 14 aṭanga 25 mi pali awmna—an chhûngkuain, chutah chuan rawng an bâwl ta thuai a ni. An fapa pathumte chuan pioneer an thawk mêk a, a hmahruaitu ber chuan tûn hnai lawk khân Ministerial Training School a zir chhuak a ni.
Canada ram aṭanga Europe Khawchhak lama rawngbâwla awm kum 30 mi Angelica-i chuan: “Harsatna tam tak tawh tûr a awm a; mahse, rawngbâwlnaa mite ṭanpuina aṭang hian lungawina ka nei a ni. Anmahni ṭanpui tûra ka lo kal avânga Tualchhûng Thuhretute lâwmthu sawi chhuah tam takte chuan kan rilru a khawih hle bawk,” a ti.
United States aṭanga Dominican Republic rama rawngbâwla awm, unaunu piang hmun pahnih, kum 30 tling ṭêp tawhte chuan: “Ngai neih tûr hnam dân chi hrang tam tak a awm. Mahse, kan hnaah kan bei fan fan a, tûnah chuan kan Bible zirpui pasarihte chu an rawn inkhâwm tawh a ni,” an ti. He unaunu pahnihte hi kohhran awm lohna khuaa Lalram thuchhuahtu group pakhat awpkhâwmnaah an ṭangkai hle a ni.
Kum 30 tling ṭêp tawh Laura-i chuan ram dangah kum 4 aia tam rawngbâwlin a awm tawh a. Ani chuan: “Ka nun ka dah mâwlmang lui tlat a. Hei hian thuchhuahtute chu tlâwm taka nun hi retheih vâng ni lovin, rilru fel tak putna leh kan duh leh duh lohvah a innghat a ni tih hmu thiam tûrin a ṭanpui a ni. Mi dangte, a bîk takin, ṭhalaite ṭanpui theihna hi ka tân chuan hlimna hnâr, ram danga rawngbâwlnaa harsatna khirh tak tirehtu a ni. Heta ka rawngbâwlna hi eng dang nên mah ka thlâkthleng lo vang, Jehova’n a phal chhûng chu ka awm zui zêl ang,” tiin a sawi a ni.
[Phêk 27-naa bâwm/milem]
Good News for People of All Nations Lehkhabutê Hmêlhmangte
He lehkhabutê Good News for People of All Nations-ah hian phêk khat awh chanchin a awm a. Ram ṭhenkhat tâna chhuahah hian ṭawng 92 laiin a chuang a ni. In neituin a chhiar huna amah i bia ang mai a nih nân, a thu chu ṭawngkam ang maia ziak a ni.
Lehkhabutê thuhmahruai chuan kan hriatthiam loh ṭawng hmangte hnêna ṭanpuina ṭangkai tak pe thei tûra kan tih tûr rahbi tam tak a târ lang a. Hêng rahbi indawtte hi ngun takin chhiar la, fîmkhur takin hmang ang che.
A chhunga thu awmte ziakna hian ṭawng hming chauh ni lovin, a ṭawng chhinchhiahnate pawh a târ lang tel a ni. He hmêlhmang hian ṭawng hrang hrang chhinchhiahna, kan tract-te leh thu leh hla chhuah dangtea awm chu hre tûrin a ṭanpui ang che.
[Milem]
Rawngbâwlnaah he lehkhabutê hi i hmang em?