Jehova Thu Chu A Nung

Lalte Bu Khatna Aṭanga Thu Pawimawh Hrilhfiahna

“MI FEL an lo pun hian mite an lâwm ṭhîn a, mi sualin rorêlna an chanin mite an rûm ṭhîn.” (Thufingte 29:⁠2) Bible-a Lalte bu Khatna chuan he thufing dikzia hi a rawn entîr chiang hle. Chu chuan a lal hun chhûnga hmân lai Israel hnamte’n hausakna leh himna nasa taka an chen hun, Solomona nun kawng chanchin a sawi a ni. Lalte Bu Khatna chuan Solomona thih hnua ram a inṭhendarh dân leh a hnua Israel leh Juda rama lal 14-te chanchin a sawi tel bawk. Hêng lalte zînga pahnih chauh hi Jehova lakah an rinawm reng a. Chu bâkah, Lalte bu chuan Elija tiamin zâwlnei parukte thiltih a sawi bawk a ni.

Jerusalem leh Judai rama zâwlnei Jeremia ziah a ni a, a chanchin ziak chuan kum 129 vêl​—⁠B.C.E. 1040 aṭanga B.C.E. 911 thleng a huap a. A lehkhabu a siam pum lai chuan, Jeremia chuan hma sâng thil chhinchhiahna, ‘Solomona thiltih ziakna bu’ angte chu a râwn ngei tih a lang a ni. Chûng a hranpaa chhinchhiahte chu hmuh tûr a awm tawh lo.​—⁠1 Lalte 11:41; 14:19; 15:⁠7.

LAL FING CHUAN MUANNA LEH HAUSAKNA A AWMTIR

(1 Lalte 1:​1–11:43)

Lalte Bu Khatna chu Lal Davida Fapa Adonija’n a pa lalna chhuhsak a tum dân ngaihnawm takin a inṭan a. Zâwlnei Nathana inrawlh vatna chuan chu thiltum chu a hlawhchhamtîrin, Davida fapa Solomona chu lala siam a ni ta a ni. Lal thar thil dîlah Jehova chu a lâwm a, “finna leh hriatna thinlung” rualin, “hausakna leh ropuina” pawh a pe a. (1 Lalte 3:​12, 13) Lal finna chu tlukpui nei lo, a hausakna lah khaikhin rual loh a ni. Israel hnam chuan muanna leh hausakna hun chu an chên a ni.

Solomona in sak zawh tâkte zîngah chuan Jehova biak in leh sawrkâr in hrang hrangte a tel a. Jehova chuan Solomona’n a thu a âwih reng phawt chuan: “Israelte chungah hian i ram lalṭhutthlêng chu kumkhua atân ka tinghet ang,” tih a tiam a ni. (1 Lalte 9:​4, 5) Pathian dik chuan thuâwih lohna rah chhuah tûrte pawh a hrilh lâwk bawk. Amaherawhchu, Solomona chuan ram dang mi nupui tam tak a lo nei ta a. An thununna hnuaiah chuan, a tar hnuah biakna dik lo lam a hawi a. Jehova chuan a lalram chu ṭhen darh a ni ang tih a hrilh lâwk ta a ni. Solomona chu B.C.E. 997-ah a thi a, a kum 40 chhûng lalna chu a tâwp ta a. A fapa Rehoboama chu a lal ṭan ta a ni.

Bible Chungchâng Zawhnate Chhânna:

1:​5​—⁠Engvângin nge Davida a la nun reng laiin, Adonija chuan lal ṭhutthleng chhuh a tum? Bible chuan a chhan a sawi lo. Amaherawhchu, a unaupate zînga amah aia upa zâwk Ammona leh Absaloma te an thih ve ve tawh avâng leh Davida fapa Kileaba pawh a thih tawh a rinawm avângin, Adonija chuan Davida fapa a la damte zînga upa ber a nihna angin lalṭhutthlêng chu a chan tûrah a ruat a ni thei ang tia thutâwp siam chu a âwm a ni. (2 Samuela 3:​2-4; 13:​28, 29; 18:​14-17) Sipai hotu thiltithei tak Joaba leh mi thiltithei tak puithiam lal Abiathara ṭanpuina a dawn avângin, Adonija chuan a thiltum chu a hlawhtling tûrah a ngai a nih hmêl hle. Bible chuan Davida’n Solomona chu a lalṭhutthlêng rochuntîr a tum tih a hriat leh hriat loh a sawi lo. Amaherawhchu, Adonija chuan Solomona leh mi dang, Davida laka rinawmte  chu ‘inthawinaah’ a sâwm lo. (1 Lalte 1:​9, 10) Hei hian Solomona chu hmêlma angin a thlîr tih a kawhhmuh a ni.

1:​49-​53; 2:​13-​25​—⁠Engvângin nge Solomona chuan Adonija chu a ngaihdam hnuah a thah? Bath-sebi chuan hmu thiam lo mah se, Adonija’n lal hnêna Abisagi nupui atâna a dîltîrna phêna a thiltum chu Solomona chuan a hria a ni. Davida chuan Abisagi hmêlṭha tak chu mutpui lo mah se, a hmei anga ngaih a ni a. Chu mi hun laia hnam dân ang chuan, Abisagi chu Davida ro luahtu tân chauh a ni. Adonija chuan Abisagi nupuia a neih theih chuan lalṭhutthleng a chuh leh thei dâwn tih a ngaihtuah a ni thei. Adonija dîlna chu lalna chuh tumna anga a hriat avângin Solomona chuan a ngaihdamna chu a sût leh a ni.

6:⁠37–​8:​2​—⁠Biak in hlanna chu engtika neih nge ni? Solomona lal kum 11-na, B.C.E. 1027, thla riatnaah biak in chu sak zawh a ni a. Cheimawi leh thil dang neuh neuhte buatsaihna chuan thla 11 a awh a nih hmêl hle. Chuvângin, biak in hlanna chu B.C.E. 1026 kum a thla sarihnaa neih a nih ngei a rinawm. He thuziak hian biak in sak zawh hun leh hlan a nih hma inkârah in sakna chanchin dang a sawi a, hei hi in sak chungchâng chanchin kimchang zâwk a pêk theih nân a ni ngei ang.​—⁠2 Chronicles 5:​1-3.

9:​10-​13​—⁠Solomona’n Tura lal Hirama hnêna Galili rama khaw 20 a pêk chu Mosia Dân nên a inrem em? Leviticus 25:​23, 24-a dân sawi chhuah chu Israelte ram luahah chauh hman tûr a ni thei ang. Solomona’n Hirama hnêna ram a pêkte chu Ram Tiam ramri chhûngah awm mah se, Israel mi ni lo, hnam dangte luah ram a ni thei ang. (Exodus 23:31) Solomona’n “sakawr a ngah” leh nupui tam tak a neih hun ang bawkin, tûna ram a pêkna pawh hi Dân a zawm pumhlûm lohzia entîrtu pakhat a ni thei bawk. (Deuteronomy 17:​16, 17) Engpawh chu ni se, Hirama chu a thilpêkah chuan a lungawi lo. Chu khuate chu milem pathian beho-te chuan an enkawl ṭha lo, a nih loh leh a khaw hmun a fuh vak lo pawh a ni thei ang.

11:​4​—⁠A upat huna Solomona rinawm loh chhan chu a tar chak tawh loh vâng em ni? Chu mi vâng chu a nih hmêl lo hle. A lal ṭan khân Solomona chu a la naupang hle a, kum 40 chhûng rorêl mah se, kum upa lutuk chu a ni lo. Chu bâkah, Jehova a biakna chu a thlahthlam pumhlûm lo. Rinpawlhna thil tih a tum niin a lang.

Kan Zir Tûrte:

2:​26, 27, 35. Jehova thu sawi lâwk chu a lo thleng dik zêl. Elia thlah Abiathara puithiam nihna ata bântîrna chuan Jehova’n “Elia chhûngte chungchâng thu a sawi” a tithleng famkim a. Phinehasa thlah kal chho zêla Zadoka’n Abiathara a thlâkna chuan Number 25:10-​13-na a tithleng famkim a ni.​—⁠Exodus 6:​25; 1 Samuela 2:​31; 3:​12; 1 Chronicles 24:3.

2:​37, 41-46. Hrem lohva Pathian dân  bawhchhiat theih nia ngaih chu a va hlauhawm tak êm! Duh rêng vanga ‘nunna kalna kawngka zîm’ pênsante chuan an thutlûkna âtthlâk tak rah chu an seng ngei ang.​—⁠Matthaia 7:14.

3:​9, 12-14. Jehova chuan a rawngbâwl thei tûra finna, hriatthiamna, leh kaihhruaina tih tak zeta dîltu a chhiahhlawhte ṭawngṭaina chu a chhâng ṭhîn.​—⁠Jakoba 1:⁠5.

8:​22-​53. Solomona chuan Jehova​—⁠khawngaihna Pathian, thutiam Hlentu, leh ṭawngṭaina Ngaithlatu​—⁠a ngaihsânna chu a va han lantîr nasa tehrêng êm! Solomona biak in hlanna ṭawngṭaina thute ngun taka ngaihtuahna chuan, hêng miziate leh Pathian mize hmêlhmang dangte kan ngaihhlutna chu a tizual sauh vang.

11:​9-​14, 23, 26. A kum upat lama Solomona’n thu a awih loh khân, Jehova chuan hmêlmate a din chhuak a. “Pathianin chapote a dodâl a, inngaitlâwmte erawh chu khawngaihna a pe si ṭhîn,” tiin tirhkoh Petera chuan a sawi a ni.​—⁠1 Petera 5:⁠5.

11:30-​40. Ahija thu hrilh lâwk avângin Lal Solomona chuan Jeroboama chu thah a tum a. Tûn hma kum 40 liam taa Adonija leh phiarrutu dangte chunga phuba lâk a duh loh lai nêna khaikhin chuan lal chhânlêt dân chu a va danglam ta êm! (1 Lalte 1:​50-53) He rilru put hmang inthlâkthlengna hi Jehova laka a tawlh bo vâng a ni.

RAM INPUMKHAT CHU A KEH DARH

(1 Lalte 12:​1–22:53)

Jeroboama leh mipuite chu Lal Rehoboama hnênah lo kalin, a pa, Solomona’n an chunga phurrit a nghah chu tizâng tûrin an ngên a. An ngenna tihhlawhtlinsak aiin, Rehoboama chuan an phur tihritsak zâwkah a vau va. Hnam sâwmte chu helin, Jeroboama chu an chunga lalah an siam ta a ni. Lalram chu ṭhen darh a ni ta. Rehoboama chuan Juda leh Benjamin hnam hmanga din chhim lam lalram chungah ro a rêl a; Israel hnam sâwm hmâr lam lalram chungah chuan Jeroboama chuan ro a rêl thung a ni.

Mipuite Pathian be tûra Jerusalema an kal lohna tûrin, Jeroboama chuan rangkachak bâwng no lem pahnih a siam a​—⁠pakhat chu Dan-ah a dah a, pakhat chu Bethel-ah a dah a. Jeroboama hnua Israel rama lalte chu Nadaba, Baasa, Ela, Zimria, Tibnia, Omria, Ahaba, leh Ahazia te an ni. Abija, Asa, Jehosaphata, leh Jehorama te chu Rehoboama lal hnuah Judai ramah chuan an lal a. Hêng lalte lal laia zâwlneite chu Ahija, Semaia, a hming hriat loh Pathian mi pakhat, Jehua, Elija, leh Mikaia te an ni.

Bible Chungchâng Zawhnate Chhânna:

18:​21​—⁠Elija’n Jehova emaw, Baala emaw a pakhat zâwk zâwk zui tûra a tih khân, engvângin nge mipuite chu an ngawih reng? Jehova phût angin a hnênah an inpumpêk pumhlûm lo tih an hria ang a, chu chuan inthiam lohna a siam a ni thei ang. A nih loh pawhin, Jehova betu nia inchhâl chunga Baala biak a dik lohna hmu thei lo khawpin an thinlung a sak pawh a ni thei bawk ang. Jehova’n a thiltihtheihna a lantîr  hnuah chauh a ni: “LALPA hi a lo ni. Pathian chu, LALPA hi a lo ni, Pathian chu,” an tih ni.​—⁠1 Lalte 18:39.

20:​34​—⁠Jehova’n Ahaba chu Suria-ho a hnehtîr hnuah, engvângin nge Ahaba chuan an lal, Benhadada chu a zuah? Ahaba chuan Benhadada thah aiin, thu a thlunpui ta zâwk a, chu thuthlung aṭang chuan Suria Khawpui, Damaska kawngpuite chu dâwrpui hmun siam nân Ahaba chuan a chang dâwn a ni. Tûn hma chuan, Benhadada pa chuan Samaria kawtthlêrte chu a sumdâwnna hmun bîk atân a lo siam tawh a. Chuvâng chuan, Ahaba’n Damaska sumdâwnna hmun a din theih nân Benhadada chu a chhuah a ni.

Kan Zir Tûrte:

12:​13, 14. Nuna thutlûkna pawimawh tak kan siam hian, Pathian Thu hria leh Pathian thu bulte zahna thûk tak nei mi puitling hnên aṭangin thurâwn kan la tûr a ni.

13:​11-​24. Thurâwn emaw, rawtna emaw rinhlelh kai chu rinpui rinawm tak hnên aṭanga lo kal pawh ni se, chu thurâwn chu Pathian Thua kaihhruaina ṭha tak nêna khaikhin tûr a ni.​—⁠1 Johana 4:⁠1.

14:13. Jehova chuan kan ṭhatna lai hmuh tumin min en chhuak vek a. Chu ṭhatna chu engmah tham ni lo mah se, theihtâwp chhuaha a rawng kan bâwl hian chu chu a ṭhanlentîr thei a ni.

15:​10-​13. Kalpêngte chu huaisen taka hnâwlin, biakna dik erawh chu kan chawisâng zêl tûr a ni.

17:​10-​16. Zarephath hmeithai chuan Elija chu zâwlnei a ni tih a hria a, chutiang tak chuan a thleng a, Jehova’n rinna nêna a thiltih chu mal a sâwm a ni. Tûn laiah pawh, Jehova chuan rinnaa kan thiltihte chu a hmu a, kawng hrang hranga Lalram hnathawh ṭanpuitute chu mal a sâwm a ni.​—⁠Matthaia 6:33; 10:​41, 42; Hebrai 6:10.

19:​1-8. Dodâlna nasa tak kan tawh laiin, Jehova ṭanpuina kan ring tlat thei a ni.​—⁠2 Korinth 4:​7-9.

19:​10, 14, 18. Biakna dik pawmtute chu an mal ngai lo. Jehova leh khawvêl pum puia unaute an nei a ni.

19:11-​13. Jehova hi leilung pianken pathian (nature god) emaw, leilung pianken chakna (natural forces) emaw anga sawi mai theih a ni lo.

20:11. Benhadada’n Samari a tihchhiat chungchâng a uanpui hle lai chuan: “Mi [indo tûra] a inrâlthuam lai rengin, [hnehna chang tawh ang hrimin] a inrâlthuamna hlîp thla tawh ang rengin an uang ngai lo ve,” tiin Israel lal chuan a chhâng a. Hna thawh tûr thar kan hmachhawn hunah, uangthuang taka a lutuka inrintâwkna neih chu kan pumpelh ngei tûr a ni.​—⁠Thufingte 27:1; Jakoba 4:​13-16.

Kan Tân A Hlu Hle

Sinai Tlânga Dân pêk a nih dân a sawiin, Mosia chuan Israelte hnênah: “Ngai teh u, vawiinah hian in hmaah malsâwmna leh ânchhia ka dah a; LALPA in Pathian thupêkte tûna ka pêk che u hi in zawm chuan, malsâwmna; LALPA in Pathian thupêkte chu in zawm loh va, . . . in pênsan erawh chuan, ânchhia,” tiin a hrilh a ni.

Lalte Bu Khatna hian he thudik pawimawh tak hi min va hriat chiantîr tak êm! Kan hmuh tawh angin, he lehkhabu hian zir tûr dang hlu takte min zirtîr bawk a. A thute chu a nungin, thil a tithei tak zet a ni.​—⁠Hebrai 4:12. (w05 7/1)

[Phêk 29-naa milem]

Biak in leh in dang Solomona sakte

[Phêk 30, 31-naa milem]

Jehova’n a thiltihtheihna a lantîr hnuah, mipuite chuan: “Pathian chu LALPA hi a lo ni,” tiin an au