Naupangte U, Jehova Chu Fak Rawh U!
Naupangte U, Jehova Chu Fak Rawh U!
“Lei aṭang hian, . . . nula leh tlangvâlte, putar leh naupangte u, LALPA chu fak rawh u.”—SAM 148:7, 12.
1, 2. (a) Naupang tam tak chuan eng ang khuahkhirhnate nge an hriat? (b) Engvângin nge naupangte tân an chunga an nu leh pate khuahkhirhnate avânga thinur a ngaih loh?
NAUPANGTE chuan an tih atâna phal rih loh thilte chu an hre chiang hle ṭhîn a. An zînga tam tak chuan mahnia kawng kân phal an nih nân emaw, zân mut hun bithliahsak a ngaih loh nân emaw, motor khalh phalsak an nih nân emaw kum eng zât nge an nih ngai tih chu an hrilh thei zân ang che. A châng chuan, naupang chuan a thil châkzâwng a dîl apiang chuan, “I upat deuh hun nghâk rawh,” tih chhânna hlîr a tâwk niin a hre thei a ni.
2 Nu leh pate’n nangmahni humhim nân emawa chutiang khuahkhirhnate siam chu a finthlâk niin an hria tih nangni naupangte chuan inhria a ni. In nu leh pate thu in âwihin Jehova chu a lâwm tih inhre chiang hle bawk a. (Kolossa 3:20) Mahse, hêng khuahkhirhna zawng zawngte avâng hian i nun inṭan hun i la nghâk rengah i inngai em? I upat deuh hma loh chu thil pawimawh zawng zawng tih âwih loh a ni em? A ni lo rêng rêng! Tûn lai hian puitlin huna tih atâna i thil nghah chanvo engpawh aia pawimawh zâwk fê hna pakhat thawh mêk a ni a. Nangni naupangte chu he hnaa in tel ve hi phal a ni em? Phal in nih mai bâkah—dik tak chuan chutianga ti tûrin Pathian Chungnung Bera ngei hian a sâwm che u asin!
3. Jehova’n naupangte chu eng chanvo nei tûrin nge a sâwm a, tûnah eng zawhnate nge kan ngaihtuah dâwn?
3 Eng hna nge tûna kan sawi chu? He thuziaka kan thupui Bible châng hi han chhinchhiah teh: “Lei aṭang hian, . . . nula leh tlangvâlte, putar leh naupangte u, LALPA chu fak rawh u,” tih hi. (Sâm 148:12) Hetah hian i chanvo neih hlu tak chu sawi lan a ni: Jehova i fak thei tih chu. Naupang i nih angin, chu hnaa tel chu i phûr em? Mi tam takte chu an phûr hle a ni. Phûrpui a phu chhan hre tûrin, zawhna pathum i lo ngaihtuah ang u. A hmasa berah chuan, engvângin nge Jehova i fak ang? A pahnihnaah chuan, engtin nge amah chu thiam taka i fak theih ang? A pathumnaah chuan, Eng huna Jehova fak ṭan nge ṭha?
Engvângin Nge Jehova I Fak Ang?
4, 5. (a) Sâm 148 sawi angin, eng dinhmun ropui takah nge kan awm? (b) Engtin nge thil siam ṭawng thei lo leh ngaihtuahna nei lote chuan Jehova an fak theih cheu?
4 Jehova fak chhan tûr langsâr ber chu Siamtu a nih vâng a ni. Sâm 148-na chuan he thudik ngaihsak tûr hian min ṭanpui a. Han mitthla lawk teh: Hla mawi leh mi khawih thei tak saho dial dial mipui tam tak tâwk ta la, engtin nge i awm ang? A hla thute chuan a dik tih i hriat, i thil ngaih pawimawh te, hlimawm i tih te, leh engthâwlthlâk i tih te sawi chhuak ta se, engtin nge ni ang? A hla thute chu zirin, anmahni zaipui ve chu i châk lo vang maw? A tam zâwk chuan kan châk ang. Awle, Sâm 148-na chuan chutiang dinhmun, mahse, ropui zâwk daihah i awm tih a târ lang. Chu fakna hla chuan an vaia inlungrual taka Jehova faktu mipui rual chungchâng chu a târ lang a. Mahse, he fakna hla hi i chhiar zêl chuan, thil pangngai lo tak engemaw i hmu ang. Chu chu eng nge ni?
5 Sâm 148-a târ lan faktu tam takte hi ṭawng thei lo leh thil ngaihtuah thei lo an ni. Entîr nân, nî, thla, arsi, vûr sûr, thlipuite, tlâng lian, leh tlâng tê-te chuan Jehova an fak tih kan chhiar a. Engtin nge hêng thilsiam nunna nei lote hian chutianga an fak theih? (Châng 3, 8, 9) A dik a dik chuan, thingte, tuifinriata thilnungte, leh ramsate chuan chutiang bawkin an fak a ni. (Châng 7, 9, 10) Ni tla êng mawi tak i thlîr emaw, thlabial zâna chhawrthlapuiin vân sâng boruaka arsite a tlân pêl diai diai lai i en emaw, nungchate inchhaih lâwmin i nui emaw, ram mawi tak chu mak i ti hle emaw ngai em? Chutiangin i awm ngai a nih chuan thil siamte fakna thâwm chu i “hre” tawh tihna a ni. Jehova thil siam zawng zawngte chuan Siamtu engkimtithei anga lei leh vâna nasa taka thiltithei, fing tak, leh hmangaihna ngah an awm lo tih min hriatnawntîr a ni.—Rom 1:20; Thu Puan 4:10, 11.
6, 7. (a) Sâm 148 sawi angin eng finna nei thil siamtein nge Jehova fak? (b) Engvângin nge Jehova fak tûra chêttîr kan nih theih? Tehkhin thu pe rawh.
6 Sâm 148-na chuan thil siam finna neite pawhin Jehova an fak tih a târ lang bawk. Châng 2-naah chuan, Jehova vân lam thil siam “sipaiho,” vântirhkohte chuan Pathian an fak tih kan hmu a ni. Châng 11-naah chuan mihring thiltithei leh hmingthang, lalte leh rorêltu angte chu faknaa tel tûra sâwm an ni. Vântirhkoh thiltithei takte mahin Jehova fak an hlimpui chuan, mihring ve maite chu Jehova fak lo tûr khawpin an inngai pawimawh lutuk tûr em ni? Chuvângin, châng 12 leh 13-ah chuan, nangni naupangte chu Jehova faknaa tel ve tûra sâwm in ni. Chuta tel ve tûra chêttîrin i awm em?
7 Tehkhin thu pakhat hi han ngaihtuah teh. Ṭhian—infiamna lam emaw, lemziah lam emaw, a nih loh leh rimawi lam emawa—themthiam tak pakhat nei ta la, a chanchin chu i chhûngte leh i ṭhian dangte hnênah i hrilh ang em? Rinhlelh rual a ni lo. Awle, Jehova thiltih zawng zawng chungchâng hriatna chuan kan chungah chutiang bawkin nghawng a nei thei a ni. Entîr nân, Sâm 19:1, 2 chuan vân arsi bawm chiai chuan “thu a sawi . . . chhâwngtîr zêl,” a ti. Kan tân chuan, Jehova thiltih mak takte chungchâng kan ngaihtuah hian, mi dangte hnênah kan Pathian chungchâng hrilh lovin kan awm thei lo a ni.
8, 9. Chhan engte avângin nge Jehova’n amah kan fak a duh?
8 Jehova kan fak chhan langsâr tak pakhat leh chu chutiang ti tûra min duh vâng a ni. Engvângin nge? Mihringte fak a mamawh vâng em ni? Ni lo ve. A chângin keini mihringte hian fak kan mamawh mai thei a; mahse, Jehova chu keini aiin a sâng zâwk daih a ni. (Isaia 55:8) A nihna leh a miziate a ringhlel ngai lo. (Isaia 45:5, 6) Mahse, ani chuan kan fak a duh a, kan fak hian a lâwm a ni. Engvâng nge? A chhan pahnih han ngaihtuah teh. A hmasain, amah kan fak a ngai tih a hria a. Thlarau lam mamawh, Pathian biaka biak tûr mamawh neiin min siam a. (Matthaia 5:3) I nu leh pate’n i tân a ṭha dâwn tih an hriat avânga chaw i ei ṭhat huna an lâwm ang chiahin, i thlarau lam mamawh i phuhrûk a hmuhna hian Jehova chu a tilâwm a ni.—Johana 4:34.
9 A pahnihna chu, Jehova’n amah kan fakna mi dangte’n an hriat a ngai tih a hriat vâng a ni. Tirhkoh Paula chuan la naupang zâwk Timothea hnênah hêng thute hi a ziak a ni: “Nangmah leh i zirtîrnaah chuan fîmkhur la; chûng thil tiin awm reng rawh; chutiang tiin nangmah leh i thu ngaithlatute chu i chhandam dâwn zuk nia,” tiin. (1 Timothea 4:16) Ni e, Pathian Jehova chanchin mi dangte i zirtîr a, i fak hunah hian Jehova chu an lo hre ve thei dâwn a. Chutiang hriatna chuan an chatuan chhandamna a thlen thei tlat a ni!—Johana 17:3.
10. Engvângin nge kan Pathian fak tûra tihluih nia kan inhriat?
10 Jehova kan fak chhan dang a la awm cheu va. I ṭhian themthiam tak tehkhin thu kha hre reng rawh. Mi dangin a chanchin dik lo sawiin, a hming sawichhe ta se, amah fak lehzual chu i tum tlat lo vang maw? Awle, Jehova chu he khawvêlah hian nasa taka sawi chhiat a ni a. (Johana 8:44; Thu Puan 12:9) Chuvângin, amah hmangaihtute chuan a chungchâng thu dik tak sawi a, thu dik lote siam ṭha tûra tihluih niin an inhria a ni. Nang pawhin Jehova i hmangaihna leh a chunga i lâwmna chu sawi chhuakin, a hmêlma Setana aia amah Rorêltu atân i duh zâwk tih târ lan chu i duh em? Chûng chu Jehova fakna hmangin i ti thei vek a. A nih chuan, a dawta zawhna awm chu engtin nge tih a ni.
Naupang Ṭhenkhatin Jehova An Fak Dân
11. Eng Bible entîrnate’n nge Jehova faknaah naupangte chu an hlawhtling hle thei tih târ lang?
11 Bible chuan naupangte chu Jehova faknaah an hlawhtling thei ṭhîn hle tih a târ lang a. Entîr nân, Israel hmeichhe naupang pakhat Suria rama sala hruai chu a awm a. A pi hnênah chuan Jehova zâwlnei Elisa chungchâng chu huaisen takin a hrilh a ni. A thusawite chuan thilmak tihna a thlen a, thu hrilhna thiltithei tak pêk a ni ta a ni. (2 Lalte 5:1-17) Isua pawhin naupangtê a nihin huaisen takin thu a hril a. A naupang laia thilthleng zawng zawngte chu Pathian Lehkha Thu-a chhinchhiah theih vek a ni nâ a, Jehova chuan Isua kum 12 mi a nih laia Jerusalem biak ina sakhaw hruaitute hnêna huaisen taka zawhna a zawh a, Jehova kawngte a hriatthiamna avânga mak an tih laia thilthleng chu a chhinchhiahtîr a ni.—Luka 2:46-49.
12, 13. (a) A thih hma lawk khân Isua’n biak inah eng nge a tih a, chuta awm mite chungah nghawng eng nge a neih? (b) Engtin nge Isua chuan naupangte fakna chham chhuah chu a ngaih?
12 A lo puitlinin, Isua chuan naupangte chu Jehova fak tûrin a fuih bawk a ni. Entîr nân, a thih hma ni engemaw zât lekah, Isua chuan Jerusalem biak inah a hun a hmang a. Bible chuan chutah chuan ‘thilmakte a ti’ tih a sawi. Hmun thianghlim rûkrute pûka siamtute chu a hnawt chhuak a. Mitdelte leh kebaite chu a tidam bawk. Chuta awm apiang, a bîk takin sakhaw hruaitute chu Jehova leh a Fapa, Messia chu fak tûra chêttîra awm tûr an ni nâa le. Mahse, lungchhiatthlâk takin chu mi hun laia awm mi tam takte chuan chutiang fakna chu an chhâk chhuak lo. Anni chuan Isua chu Pathian tirh a ni tih an hre nachungin, sakhaw hruaitute chu an hlau a ni. Mahse, mi ṭhenkhat chuan huaisen takin thu an sawi a. Tute nge an nih i hria em? Bible chuan: “Puithiam lalte leh lehkha ziaktuten [Isua] thil mak tihte leh biak ina ‘Davida fapa Hosanna!’ tia naupang aute chu an hmuhin an lungni lo êm êm a, [Isua] hnênah, ‘Hêngho thu sawi hi i hria em?’ an ti a,” a ti.—Matthaia 21:15, 16; Johana 12:42.
13 Puithiamte chuan amah faktu naupangte chu Isua’n a khapbeh an beisei a. A khapbet em? Khapbet lo ve! Isua’n puithiamte chu: “Hria e; ‘Nausênte leh hnute hne laite kaa chhuak chuanin fakna i tiṭhafamkim ta,’ tih hi in chhiar ngai lo vem ni?” tiin a chhâng a ni. Isua leh a Pa chuan naupangte fakna chu an lâwm tih a chiang hle. Chûng naupangte chuan chuta awm puitling zawng zawngte tih tûr chu an ti a ni. An rilru fîm takah chuan chûng thil zawng zawng chu a chiang hle a ni ngei ang. He mi hian thil mak a tih an hmu a, rinna leh huaisen taka a thusawite an hria a; tin, Pathian leh a mite chunga hmangaihna nasa tak a lantîrte chu an hmu bawk. Ani chu a inchhâl ang ngeiin thutiam “Davida fapa,” Messia chu a ni. An rinna chu malsâwmin a awm a, hêng naupangte hian hrilh lâwkna thlen famkimtîrnaah chanvo an nei ve hial a ni.—Sâm 8:2.
14. Engtin nge naupangte thilpêk neih chuan Pathian fak tûra a thuam?
14 Chûng entîrnate aṭang chuan eng nge kan zir theih? Naupangte chu Jehova faktu hlawhtling tak an ni thei tih chu kan zir a ni. Anni chuan thutak chu chiang tak leh fiah taka hmuh theihna leh an rinna chu tih tak zet leh ṭhahnemngai taka târ lan theihna an nei fo a ni. Tin, Thufingte 20:29-a târ lan thilpêk: “Tlangvâlte ropuina chu an chakna a ni,” tih chu an nei bawk. Ni e, nangni tlangvâlte, a nih loh leh naupangte chuan—Jehova faknaa ṭangkai tak—chakna leh thiltihtheihna chu in nei a ni. Engtin nge chûng thilpêkte chu i hman ṭangkai theih ang?
Engtin Nge Jehova I Fak Theih?
15. Jehova hlawhtling taka fak tûr chuan, eng chêttîrtu nge ṭûl?
15 Hlawhtlinna chu thinlung aṭangin a inṭan a. Mi dangin tihtîr che an duh vâng ringawta ti i nih chuan, Jehova faknaah i hlawhtling thei lo vang. Thupêk zawng zawnga ropui ber chu hei hi a ni tih hre reng rawh: “Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni,” tih hi. (Matthaia 22:37) Mahnia a Thu zirna aṭangin Jehova chu nangmah ngeiin i hre tawh em? Chûng zirna rah ṭha chu Jehova hmangaihna a ni. Chu hmangaihna lantîr dân phung pângngai tak chu amah fak hi a ni a. A chêttîrtu che chu a chian a, a chak bawk chuan, phûr taka Jehova fak tûrin i inpeih tawh ang.
16, 17. Jehova fakna kawngah nungchangin pawimawhna eng nge a neih? Entîrna pe rawh.
16 Tûnah, i sawi tûr i ngaihtuah hmain, i tih dân tûr ngaihtuah hmasa rawh. Elisa hun laia Israel hmeichhe naupang chu chaltlai tak, mi zahpah nei lo, a nih loh leh rinawm lo tak chu ni se chuan, Suria rama amah mantu chuan Jehova zâwlnei chungchâng a sawi chu a ngaihthlâksak i ring em? Ngaihthlâksak hauh lo vang. Chutiang bawkin, mi i zahthiam a, i rinawm a, i hawihhâwm bawk tih an hmuh che chuan, i thusawi chu an ngaithla duh bîk ang. (Rom 2:21) Entîrna pakhat hi han ngaihtuah ila.
17 Portugal rama kum 11 mi hmeichhe naupang pakhat chuan school-ah Bible zirtîr a chhia leh ṭha hriatna kalh kûtte hmang tûrin nêkchêpna a tâwk a. A tel theih loh chhan chu zirtîrtu hnênah zahthiam takin a hrilh a; mahse, zirtîrtu chuan a nuihzatbûr a ni. Hunte a liam zêl chuan zirtîrtu chuan vawi tam tak amah tihzak a tum ṭhîn a, a sakhuana chu a nuihsawh a. Amaherawhchu, hmeichhe naupang chuan zahthiamna a lantîr zêl a ni. Chu mi hnu kum engemaw zâtah chuan chu unaunu tleirâwl chuan hun bikima rawngbâwltu angin, regular pioneer a thawk a. Inkhâwmpui pakhata mite baptisma chan lai a lo thlîr chuan an zînga mi pakhat chu a hre tlat a ni. Ani chu a zirtîrtu hlui lo ni rengin! Mittui nêna an inpawm hnu chuan, a upa zâwk chuan a naupang zâwk hnênah a school naupang mi zahthiam tak mizia chu a theihnghilh ngai loh thu a hrilh a ni. Thuhretu pakhatin a va tlawh chuan zirtîrtu chuan a school naupang hlui mizia chu a lo hrilh a. Chuvângin, Bible zirna chu ṭan a ni a, he nu hian Bible thutak chu a pawm phah ta a ni. Ni e, i nungchang chu Jehova fakna kawnga thiltithei tak a ni thei a ni!
18. Bible leh Pathian Jehova chungchâng tîtîna ṭan tûra a tîm a nih chuan, naupang chuan eng nge a tih theih?
18 School-ah i rinna chungchâng tîtî ṭan chu harsa tih châng i nei em? Nangmah chauh i ni lo. Amaherawhchu, mi dangin i rinna chungchâng zâwt tûr chein ruahmanna i siam thei a ni. Entîr nân, dânin a phal a, chutianga ti tûra phal a nih chuan, Bible ṭanchhan thu leh hla chhuahte chu keng a, chhûn chawlh hunah emaw, a theih hun dangah emaw engah nge i chhiar loh vang? I zirpuite chuan i lehkha chhiar lai chungchâng chu an zâwt mai thei che a. An zawhna chhânna hmangin leh i chhiar lai thuziak emaw, lehkhabu emawa tuiawm i tih thuziakte hrilhna hmangin, i hriat loh hlânin tîtîna ṭha tak chu i nei ṭan dêr thei a ni. I school kalpuite rinna hriat nân zawhnate chu zawh theihnghilh suh. Zahthiam takin ngaithla la, Bible aṭanga i thu zirte chu hrilh rawh. Phêk 9-a thiltawnte’n a târ lan angin, ṭhalai tam takte chuan school-ah Pathian an fak a ni. Hei hian hlimna nasa tak a thlenin, mi tam tak chu Jehova hre tûrin a ṭanpui a ni.
19. Engtin nge naupangte chu in tina rawngbâwlnaah an lo hlawhtlin zual zêl theih ang?
19 In tina rawngbâwlna chu Jehova fak dân kawng hlawhtling ber a ni a. I la tel lo a nih chuan, engvângin nge i thiltumah i dah loh vang? I tel reng tawh a nih chuan, i tân thiltum dang insiam tûr a awm em? Entîr nân, in tina thu inang sawi ai chuan, i nu leh pa leh mi dang thiltawn ngahte chu thurâwn ṭha pe tûr chein zâwt la, hmasâwn dân ngaihtuah rawh. Bible hman tam dân, hlawhtling taka tlawhkîr dân leh Bible zirpuina ṭan dân te chu zir rawh. (1 Timothea 4:15) Chutiang kawnga Jehova i fak tam poh leh, i lo hlawhtling sauh vang a, i rawngbâwlna chu nuam i ti tial tial ang.
Engtikah Nge Jehova I Fak Ṭan Ang?
20. Engvângin nge naupangte tân Jehova fak nân an naupang lutuk nia an inngaih a ṭûl loh?
20 He zawhna pathum sawihona zîngah hian, hei hi chhânna awlsam ber a ni. Bible chhânna fiah tak hi chhinchhiah rawh: “Tûna i naupang lai hian i siamtu hre reng rawh,” tih hi. (Thuhriltu 12:1, New World Translation) A ni, Jehova fak ṭan hun chu tûnah a ni. “Jehova fak tûrin ka la naupang lutuk. Thiltawn ka nei si lo. Ka upat deuh thleng ka nghâk ang,” tih mai chu a awlsam hle. Chutianga inngai hmasatu i ni lo. Entîr nân, naupang Jeremia chuan Jehova hnênah: “E, Lalpa PATHIAN, ngai teh, thu ka sawi thiam lo, ka naupang si,” a ti a. Jehova chuan hlauh chhan tûr a awm lo tih a hrilh a ni. (Jeremia 1:6, 7) Chutiang bawkin, Jehova kan fak hian hlauh tûr engmah kan nei lo. Kan chunga lo thleng thei hlauhawm zîngah Jehova sût theih loh engmah a awm lo.—Sâm 118:6.
21, 22. Engvângin nge Jehova faktu naupangte chu daifîm nêna tehkhin an nih a, engvângin nge chu tehkhinna chuan mi a tihchak?
21 A nih chuan, nangni naupangte u, kan fuih a che u: Jehova chu fak tîm suh u! Tûna i naupan lai hi a ni, he leia thawh mêk hna pawimawh bera tel vena hun ṭha ber chu. Chutianga i tihin, thil ropui tak engemawah i tel ve a ni—lei leh vâna Jehova faktu chhûngkaw hung takah hian. He chhûngkuaa i tel avâng hian Jehova chu a lâwm a ni. Fakna hla phuahtuin Jehova chungchâng a sawina thâwk khum thute hi han chhinchhiah teh: “I mite chu i thiltihtheihna nîah chuan mahni duh thuin an inpe ṭhîn: thianghlim mawinaah, zîng pum chhûng aṭangin, i tleirâwl daifîm chu i nei a,” tih chu.—Sâm 110:3.
22 Zîng ênga daifîm tlê takte chu a mawi hle a ni lâwm ni? Mi a tiharhin, a tle sêr a, an tam avângin chhiar sên rual a ni lo. Chu chu Jehova’n he hun khirh taka amah rinawm taka faktu nangni naupangte a hmuh dân che u a ni. Dik takin, amah fak i thlanna chuan a thinlung a tilâwm a ni. (Thufingte 27:11) Chuvângin, nangni naupangte u, Jehova chu fak rawh u! (w05 6/15)
Engtin Nge I Chhân Ang?
• Jehova fak chhan tûr pawimawh ṭhenkhatte chu engte nge ni?
• Eng Bible entîrnatein nge Jehova faknaah naupangte chu an hlawhtling hle thei tih târ lang?
• Tûn laiah naupangte’n engtin nge Jehova an fak?
• Naupangte’n engtikah nge Jehova an fak ṭan ang a, engvângin nge?
[Zirlai Atâna Zawhnate]