Nu leh Pate U, In Chhûngkaw Mamawh Ngaihsak Rawh U
Nu leh Pate U, In Chhûngkaw Mamawh Ngaihsak Rawh U
“Tupawh mahni chhûngkhat lainate ngaihsak lo . . . chuan rinna an phatsan a ni.”—1 TIMOTHEA 5:8.
1, 2. (a) Chhûngkuate Kristian inkhâwma an tel tlâng hmuh chu engvângin nge phûrawm tak a nih? (b) A hun taka inkhâwmna hmun thleng thei tûra chhûngkuate tawn buaina ṭhenkhat chu eng nge ni?
KRISTIAN kohhran inkhâwm ṭan hmaa i han hawikual vêl hian thianghlim tak leh ṭha taka inthuam naupang, an nu leh pate bula ṭhu thlapte chu i hmu thei ang. Chûng chhûngkuaa hmangaihna lang—Jehova an hmangaihna leh an inhmangaih tawnna—hmuh chu a nuam hle a ni lâwm ni? Mahse, chhûngkuaa a hun taka inkhâwmna hmun thleng thei tûra thawhrim a ngaihzia chu theihnghilh mai a awl ṭhîn.
2 A tam zâwkah chuan, nu leh pate chu nilêngin an buai thei êm êm a, inkâwm zânah phei chuan an buai lehzual a ni. Ei rawngbâwl a ngai a, in chhûng sekrek khawih a ngai a, tin, naupang homework an tih zawhpui a ngai bawk a. Chhûngkuaa mi tinte chu an felfaiin, an ei puarin, a hun takah an inpeih a ni tih an enfiah a ngaih avângin, mawhphurhna rit ber chu nu leh pate kovah a innghat a ni. Tin, naupangte nên chuan hun lo taka buaina chhuah châng a awm ngei ang. Upa ber chuan a infiam laiin a kekawr a tithlêr a. A tê ber chuan a chaw a tibua a. Naupangte chu an inhnial ṭan a. (Thufingte 22:15) Chûng buainate rah chhuah chu eng nge ni? Nu leh pate fîmkhur taka thil ruahman chu a tisukuk thei a ni. Chutichung chuan, chutiang chhûngkuate chu inkhâwm ṭan hma, hma tâwk takah Kingdom Hall an thleng deuh ziah ṭhîn. Naupangte Jehova rawngbâwl tûra an ṭhanlen paha, inkhâwmna hmuna chawlhkâr tin, a kum a kuma han hmuh chu a va phûrawm tak êm!
3. Jehova’n chhûngkuate chu a hlut hle tih engtin nge kan hriat theih?
3 Nu leh pa anga i hna chu a châng chuan buaithlâkin, hahthlâk hle mah se, Jehova’n i thawhrimnate a hlut hle tih i ring tlat thei a ni. Jehova chu chhûngkua Dintu a ni a. Chuvângin, a Thu chuan chhûngkua zawng zawng chu “hming chawi chhana”—Jehova—avânga lo awm an ni tih a sawi. (Ephesi 3:14-19) Chuvângin, nangni nu leh pate’n kawng dik taka in chhûngkaw mawhphurhna hlen tûra in thawhrim hian, Lei leh Vâna Lal Chungnungber chu inchawimawi a ni. (1 Korinth 10:31) Chu chu chanvo ropui tak a ni lâwm ni? A nih chuan, nu leh pate hnêna Jehova pêk mawhphurhna kan ngaihtuah chu a âwm a ni. He thuziakah hian, chhûngkaw mamawh ngaihsakna nêna inkûngkaihte kan ngaihtuah ang. Pathianin nu leh pate chu chhûngkaw mamawh ngaihsak tûra a beiseina kawng thumte i lo en ang u.
Tisa Lam Mamawh Ngaihsakin
4. Chhûngkuaa naupangte mamawh ngaihsak chungchângah Jehova’n eng ruahmanna nge a siam?
4 Tirhkoh Paula chuan: “Tupawh mahni chhûngkhat lainate ngaihsak lo va, mahni chênpui chhûngte ngei pawh ngaihsak lo chuan rinna an phatsan a ni, ring lo mi aiin an sual zâwk,” tiin a ziak a. (1 Timothea 5:8) Paula’n heta “tupawh” a tih hian, tunge a rilruah awm? A rilrua awm chu chhûngkaw lû ber a ni a, chu chu pa ber a ni tlângpui a ni. Pathianin hmeichhia pawh a pasal ṭanpuitu nihna chanvo zahawm tak a pe bawk a ni. (Genesis 2:18) Bible hun laia hmeichhiate chuan an pasalte chhûngkaw mamawh ngaihsaknaah an ṭanpui ṭhîn. (Thufingte 31:13, 14, 16) Tûn laiah, nu leh pa mal ṭan chhûngkua chu tûn hma zawng aiin an tam a. * Nu leh pa mal ṭan tam takte chuan an chhûngkaw mamawh ṭha takin an ngaihsak a ni. Pa ber kaihhruaina hnuaia, nu leh pa ṭan kawp chu duhthusâm zawng a ni ngei mai.
5, 6. (a) An chhûngkaw tisa lam mamawh ngaihsak tumte hmachhawn harsatna ṭhenkhat chu engte nge ni? (b) Pâwn lam hnate thlîr dân engin nge Kristian chhûngkaw mamawh ngaihsaktute chu chhel ṭâng ṭâng tûra ṭanpui?
5 Timothea thawn khat 5:8-ah hian, eng ang mamawh ngaihsakna nge Paula rilrua awm? A chung leh a hnuaia thu awmte chuan chhûngkaw tisa lam mamawhte chungchâng a sawi tih a târ lang. Tûn lai khawvêlah hian, chutianga tisa lam mamawh ngaihsak nân chhûngkaw lû chuan harsatna tam tak a tâwk thei a. Hna aṭanga inbânna te, hna hmu lo tamna te, khawsak man to lutukna te ang bawkin, khawvêl pumah ei leh bar lama harsatna chu a hluar hle a ni. Chutiang harsatnate hmachhawnna kawngah chhûngkaw mamawh ngaihsaktu chu chhel ṭâng ṭâng tûrin engin nge ṭanpui thei?
6 Chhûngkaw mamawh ngaihsaktu chuan Jehova hna pêk a thawk a ni tih a inhre tûr a ni. Paula thâwk khum thute chuan miin he thupêk hi zâwm thei chung sia a zawm duh loh chuan, ani chu ‘rinna phatsantu’ nên tehkhin theih a ni tih a târ lang. Kristian chuan Pathian hmaa chutiang dinhmun pumpelh tûr chuan theih tâwp a chhuah ngei ang. Mahse, lungchhiatthlâk takin tûn lai khawvêla mi tam takte chuan “hmangaihna pianpui [an] nei lo.” (2 Timothea 3:1, 3) Dik tak chuan, pa ber chhiar sên lohte chuan an mawhphurhna an hlen lo va, chhûngkua chu dinhmun khirh takah an dah a ni. Kristian pasalte chuan an chhûngkaw mamawh ngaihsak tûra an mawhphurhna chu ngaihthahin, an ngaiho mai mai lo. An hnathawhpui tam takte ang lo takin, chhûngkaw mamawh ngaihsaktu Kristiante chuan an chhûngte mamawh a ngaihsaktîr theih avângin, hna hniam takte pawh hna zahawm leh pawimawh, Pathian Jehova fakna hmanrua angin an thlîr a ni.
7. Engvângin nge nu leh pate’n Isua entawn tûr siam an ngaihtuah chu thil tihâwm tak a nih?
7 Chhûngkaw lûte chuan Isua entawn tûr ṭha famkim ngaihtuahna chu an ṭangkaipui thei bawk. Bible chuan Isua chu “Chatuan Pa” tiin a lo sawi lâwk tih hre reng rawh. (Isaia 9:6, 7) Rinna neitute pa angin, “Adama hnuhnûng zâwk,” Isua chuan “mihring hmasa ber Adama” chu hlawhtling takin a rawn thlâk a ni. (1 Korinth 15:45) Pa hmasial tak, mahni inhaivungtu Adama ang lo takin, Isua chu pa atâna duhthusâm a ni. Bible chuan a chungchângah: “He miah hian hmangaihna engnge a nih kan hria, amah chuan kan tân a nunna a pêk tâk avângin,” a ti. (1 Johana 3:16) Ni e, Isua chuan a nunna ngei chu mi dangte tân inhuam takin a pe a ni. Mahse, thil pawimawh lo zâwkah pawh, nî tinin mi dangte mamawh chu a mamawh aiin a dah pawimawh zâwk bawk. Nangni nu leh pate chuan chu mahni inpêkna rilru put hmang chu inentawn tûr a ni.
8, 9. (a) An fate mamawh hmasial lo taka ngaihsak savate aṭangin nu leh pate’n eng nge an zir theih? (b) Engtin nge Kristian nu leh pa tam takte chuan mahni inpêkna rilru put hmang an lantîr?
8 Nu leh pate chuan Pathian mi luhlul takte hnêna Isua thu: “Arpuiin a notê a thla hnuaia a awp khâwm angin i fate vawi engzât nge awp khâwm ka tum kha!,” tih aṭangin mahni hmasial lo hmangaihna chungchâng tam tak an zir thei a ni. (Matthaia 23:37) Hetah hian Isua chuan arpuiin a notê a thla hnuaia a awp khâwm dân chu mithlaa hmuh theih tûrin fiah takin a târ lang a. Dik tak chuan, nu leh pate chuan a note tihnatna laka vêng tûra mahni hlauhawma indah huam, pianpui finna nei arpui, a nih loh leh sava dangte aṭangin thil tam tak an zir thei a ni. Sava nu leh pate’n nî tina an thiltih ṭhin hmuh pawh a chhinchhiah tlâk hle bawk a. Chaw zawngin an thlâwk kual chhên a ni. An chauh hle hunah pawh, an lem zawh pawha dîl belh zêl, an naute keu hmuiah chuan chaw an fah a. Jehova thil siam tam tak chu an fate mamawh ngaihsak kawngah an “fing hle” a ni.—Thufingte 30:24.
9 Chutiang bawk chuan, khawvêl pum puia Kristian nu leh pate chuan mahni inpêkna rilru put hmang chhuanawm tak chu an lantîr a ni. In fate tawrhtîr ai chuan nangmahni’n in tuar duhzâwk ngei ang. Chu bâkah, nî tinin in chhûngte mamawh ngaihsak nân inhuam takin mahni in inpe bawk a. In zînga tam tak chuan hna hahthlâk leh ninawm tak thawk tûrin zîng takah in tho a ni. In chhûngte chaw ṭha pe tûrin in thawkrim hle a. In fate’n thawmhnaw fai, chênna tlâk in, leh a âwm tâwka lehkha an zir theih nân ṭan in la bawk a. Chutiang chuan nî tin, a kuma kum têl in ti a ni. Chutiang inpêkna leh chhêlna chuan Jehova a tilâwm hle! (Hebrai 13:16) Mahse, chutih rual chuan, in chhûngte mamawh in ngaihsak theih dân kawng pawimawh dang tam tak a awm tih in hria a ni.
Thlarau Lam Mamawh Ngaihsakin
10, 11. Mihringte mamawh ber chu eng nge ni a, an fate hnêna chu mamawh pe chhuak thei tûr chuan Kristian nu leh pate’n eng nge an tih hmasak phawt ngai?
10 Tisa lam mamawh ngaihsakna ai maha pawimawh zâwk chu thlarau lam mamawh ngaihsak hi a ni. Isua chuan: “Mihring hi chhang chauhvin an nung lo vang a, Pathian kaa thu tin chhuakin an nung zâwk ang,” a ti. (Matthaia 4:4; 5:3) Thlarau lam mamawh ngaihsak tûrin nangni nu leh pate’n eng nge in tih theih?
11 He mi chungchângah hian, Deuteronomy 6:5-7 aia Bible châng hman tam zâwk a awm lo hial ang. Khawngaihin i Bible keuvin, hêng chângte hi chhiar rawh. Nu leh pate chu Jehova hmangaihna nei a, a thute thinlunga la lût a, Pathian nêna inlaichînna nei hmasa tûra hrilh an ni tih chhinchhiah rawh. Ni e, Jehova kawngte, a thu bulte, leh a dânte hriatthiamna leh hmangaihna nei tûrin, Pathian thu chu khûnkhân taka i zir a, Bible i chhiar ziah a, i thu chhiarte i chhût ngun ṭhin a ngai a ni. Chutianga i tih chuan hlimna, Pathian zahna, leh hmangaihna neihtîrtu tûr Bible thutak ropui takte chuan i thinlung a luahkhat ang. I fate hnêna pêk tûr thil ṭha tam tak i nei bawk ang.—Luka 6:45.
12. Engtin nge nu leh pate chuan an fate Bible thutak zirtîr chungchângah Jehova entîrna chu an entawn theih ang?
12 Thlarau lama chak nu leh pate chu a remchân hun apianga an fate hnêna Jehova thute “zirtîr” tûra Deuteronomy 6:7-a hmuh thurâwn chu zâwm tûrin an inthuam a ni. Heta “zirtîr” tia lehlin thu mal awmzia hi hrilh nawn fona hmanga zirtîr leh an thinlunga tuh tihna a ni. Jehova chuan kan vaiin—a bîk takin naupangte chuan—zir tûrin hrilh nawn fo kan ngai tih a hre chiang a ni. Chuvângin, Isua chuan a rawngbâwlnaah a hrilh tawh sate pawh a hrilh nawn fo a ni. Entîr nân, a zirtîrte chu chapo leh inel aia inngaitlâwm tûra a zirtîr khân, thu bul thuhmun chu kawng chi hrang hrangin a sawi nawn a. Chhûtpuina hmangin, tehkhin thu hmangin, leh tihhmuhna hmang pawhin a zirtîr a ni. (Matthaia 18:1-4; 20:25-27; Johana 13:12-15) Mahse, chhinchhiah tlâk tak chu Isua’n a dawhthei reng hi a ni. Chutiang bawkin, nu leh pate chuan an fate hnênah thutak bulpuite zirtîr dân kawng an dap a ngai a, Jehova thu bulte chu naupangte’n an hriatthiam a, an nunpui thlengin dawhthei taka an hrilh nawn fo a ngai a ni.
13, 14. Nu leh pate’n an fate hnêna Bible thutak an zirtîr theihna hun ṭhenkhat chu engte nge ni a, eng thuziakte hmangin nge?
13 Chhûngkuaa Bible zir hun hi chutiang zirtîrna atâna hun duhthusâm chu a ni a. Dik tak chuan, chhûngkaw Bible zirna hlimawm tak, mi tichak thei, leh hunbi neia neih rengna chu chhûngkaw thlarau lam atâna thil pawimawh ber a ni. Khawvêl puma Kristian chhûngkuate chuan chutiang zirna chu an hlimpui a, Jehova inawpna pâwl kal tlanga pêk thu leh hla chhuahte chu naupangte mamawh ang zela siam remin an hmang a ni. He mi chungchângah hian Learn From the Great Teacher tih lehkhabu chu Questions Young People Ask—Answers That Work bu ang thovin, malsâwmna ropui tak a ni. * Mahse, chhûngkaw zirna hun chauh chu naupangte zirtîrna hun a ni lo.
14 Deuteronomy 6:7-in a târ lang angin, nangni nu leh pate’n in fate nêna thlarau lam thil in sawiho theihna hun tam tak a awm a. In zin tlâng emaw, in chhûng sekrek in thawk dûn emaw, a nih loh leh in chawlh hahdam tlân emaw hunah in fate thlarau lam mamawh ngaihsak theihna hun remchâng in nei thei a ni. I fate chu Bible thutak chungchâng “sawipui hluah” kher chu a ngai lo va. Chu ai mah chuan, chhûngkuaa tîtîna chu mi tichak thei, thlarau lam thil nihtîr tum rawh. Entîr nân, Awake! magazine-ah chuan thu chi hrang hrang chuanna thuziak tam tak a tel a. Chutiang thuziakte chuan Jehova thil siam nungcha te, khawvêl puma hmun mawi te, leh mihring hnam dân leh nun dân mak tak takte lam hawizâwnga tîtîna kawng a hawng thei a ni. Chutiang tîtîna chuan naupangte chu bâwih rinawm leh fing tak hmanga chhuah thu leh hlate chhiar tam lehzual tûrin a chêttîr thei a ni.—Matthaia 24:45-47.
15. Engtin nge nu leh pate’n an fate chu Kristian rawngbâwlna tuiawm tak leh manhla taka thlîr tûra an ṭanpui ang?
15 I fate nêna mi tichak thei tak tîtîna neihna chuan thlarau lam mamawh dang phuhru tûrin a ṭanpui ang che. Kristian naupangte chuan mi dangte hnêna an rinna thiam taka hrilh tûrin an zir a ngai a. Vênnainsâng leh Awake!-a thu ngaihventhlâk ṭhenkhat in sawi laiin, thuziak leh rawngbâwlna thlunzawm theih dân kawng i dap thei a ni. Entîr nân, heti hian i zâwt thei ang: “Jehova chungchâng he thu hi mi tam takin hria se a ṭha viau lo vang maw? Engtin nge he mi chungchâng mite kan ngaihventîr theih ang?” tiin. Chutianga sawihona chuan naupangte chu an thil zir mi dangte hrilh chhâwn châkna nei tûrin a ṭanpui thei a ni. Tichuan, i fate’n rawngbâwlnaa an zui che hunah chuan chûng tîtînate a taka i hman dân an hmu ang a. Tin, rawngbâwlna chu lungawina leh hlimna nasa tak thlentu, hna tuiawm tak leh hlimawm tak a nih an hre bawk ang.—Tirhkohte 20:35.
16. Naupangte’n an nu leh pate ṭawngṭaina an ngaihthlâk aṭangin eng nge an zir theih?
16 Nu leh pate chuan an ṭawngṭai hian an fate thlarau lam mamawh an ngaihsak bawk a ni. Isua chuan a zirtîrte chu ṭawngṭai dân a zirtîr a, vawi tam tak a ṭawngṭaipui a ni. (Luka 11:1-13) Jehova Fapa ngei ṭawngṭaina ngaihthlâk aṭanga thil an zir tam dân tûr chu han ngaihtuah teh! Chutiang bawkin, i fate chuan i ṭawngṭaina aṭangin thil tam tak an zir thei a ni. Entîr nân, Jehova chuan thinlung aṭanga nêl taka biak pawh leh buaina kan neih engpawh nêna amah pan tûrin min duh tih an hre dâwn a ni. Ni e, i ṭawngṭainate chuan i fate chu thlarau lam thutak pawimawh tak zir tûrin a ṭanpui thei a ni: An Pa vâna mi nêna inlaichînna an nei thei tih hi.—1 Petera 5:7.
Rilru Lam Mamawh Ngaihsakin
17, 18. (a) Engtin nge Bible chuan naupangte hnêna hmangaihna lantîr a pawimawhzia a târ lan? (b) Engtin nge pate chuan an fate hmangaihna lantîrna kawngah Jehova an entawn ang?
17 Dik takin, naupangte pawhin rilru lama mamawh pawimawh tak an nei a. Pathian Thu chuan nu leh pate hnênah he mamawh phuhrûksak pawimawhzia hi a hrilh a ni. Entîr nân, hmeichhe la nula deuhte chu “an fate hmangaih” tûrin a fuih a. (Tita 2:3-5) Hei hi zawm tûr kawng finthlâk a ni tak zet a ni. Chu chuan naupang chu hmangaihna lantîr dân a zirtîr a, dam chhûng hlâwkna a thlen bawk. Kawng leh lamah chuan, naupang hnêna hmangaihna lantîr loh chu a âtthlâk a ni. Chu chuan rilru natna nasa tak a thlen a, kan ṭha famkim lo chung pawha nasa taka min hmangaihtu, Jehova kan entawn lo tihna a ni bawk.—Sâm 103:8-14.
18 Jehova chuan a lei lam fate hmangaihna kawngah hma a la hmasa hial a. Johana thawn khat 4:19 chuan, ‘min hmangaih hmasa,’ tiin a sawi. A bîk takin nangni pate chuan Jehova chu entawnin, infate nêna hmangaihnaa in inphuarna chu tinghet tûrin hma inla tûr a ni. Bible chuan pate chu an fate tinuar lo tûrin a fuih a, “chutilochuan an bei a dawng dah ang.” (Kolossa 3:21) Naupangte tân an nu emaw, pa emawin hmangaih lo leh hlut lo anga inhriatna an neih aia nawrhna nasa zâwk tûr a awm mang meuh lo. An rilru veizâwng tilang hreh ṭhîn Pate chuan Jehova entîrna hi a hre reng tûr a ni. Jehova chuan vân aṭang meuhvin a Fapa a pawmzia leh a hmangaihzia chu a sawi chhuak a ni. (Matthaia 3:17; 17:5) Isua tân chuan a va thlamuanthlâk dâwn êm! Chutiang bawkin, naupangte chuan an nu leh pate tih tak zeta hmangaihna leh pawmna aṭangin chakna leh huaisenna nasa tak an nei thei a ni.
19. Engvângin nge thununna chu a pawimawh a, inbûk tâwkna eng nge Kristian nu leh pate’n neih an tum tlat?
19 Nu leh pa hmangaihna chu ṭawngkam mai erawh a ni hauh lo. Hmangaihna chu thiltiha lantîr a ni deuh ber a. Tisa lam leh thlarau lam mamawh ngaihsakna chu nu leh pa hmangaihna lantîrna a ni thei; a bîk takin, chutianga ti tûra nu leh pate chêttîrtu bul ber chu hmangaihna a nih hunah hian. Chu bâkah, thununna chu nu leh pate hmangaihna lantîrna pawimawh tak a ni bawk. Dik takin, “Lalpa chuan a hmangaih chu a thunun ṭhîn.” (Hebrai 12:6) Kawng lehlamah chuan, thunun lohna chu nu leh pate’n an fate an hmangaih lohzia lantîrna a ni thung. (Thufingte 13:24) Jehova chuan inbûk tâwkna ṭha chu a vawng reng a, “dik takin,” a nih loh leh a âwm tâwkin thununna a pe ṭhîn. (Jeremia 46:28) Chutiang inbûk tâwkna chu mi ṭha famkim lo nu leh pate tân a awlsam reng ṭhîn lo. Mahse, chu inbûk tâwkna neih tum tlata i thawhrimna chu a manhla a ni. Hmangaihnaa thununna khauh tak chuan naupang chu hlim taka ṭhang chho tûr leh hmuingîl tûrin a ṭanpui a ni. (Thufingte 22:6) Chu chu a ni lâwm ni, Kristian nu leh pa tinte’n an fate tâna an duh chu?
20. Engtin nge nu leh pate’n an fate chu ‘nunna thlan’ theihna hun remchâng ṭha ber an pêk theih?
20 Nangni nu leh pate’n Jehova pêk hna pawimawh tak—in fate tisa lam, thlarau lam, leh rilru lam mamawh ngaihsakna hna—in thawh hian, a lâwmman chu a ropui hle a ni. Chutiang chuan in fate chu “nunna chu thlang” tûrin leh a hnua “nun” reng theihna hun remchâng ṭha ber chu in pe a ni. (Deuteronomy 30:19) An puitlin huna Jehova rawngbâwl leh nunna kawnga awm tlat naupangte chuan an nu leh pate chu nasa takin an tihlim a. (Sâm 127:3-5) Chutiang hlimna chuan kumkhua a daih ang! Mahse, tûnah ṭhalaite’n engtin nge Jehova an chawimawi theih? A dawta thuziak chuan chu chu a rawn sawi ang. (w05 6/15)
[Footnote-te]
^ par. 4 He thuziakah hian, chhûngkaw mamawh ngaihsaktu chu mipa anga sawi a ni a. Amaherawhchu, a thu bulte chu chhûngkaw mamawh ngaihsaktu Kristian hmeichhiate tân pawh a hman tlâk a ni.
^ par. 13 Jehova Thuhretute chhuah a ni.
Engtin Nge I Chhân Ang?
Nu leh pate’n an fate
• Tisa lam mamawh
• Thlarau lam mamawh
• Rilru lam mamawhte ngaihsak nân eng nge an tih theih?
[Zirlai Atâna Zawhnate]
[Phêk 10-naa milem]
Sava tam tak chuan an fate mamawh ngaihsak tûrin an thawk rim