School-ah Jehova Fakin
School-ah Jehova Fakin
KHAWVEL pumah Jehova Thuhretu naupangte chuan school-ah an ṭawngkam leh nungchang hmanga Pathian fak theih dân kawng tam tak an hmu a. An tleirâwl lai ṭhahnemngaihna târ langtu thiltawn ṭhenkhat chu lo en ta ila.
Greece rama Thuhretu naupang pakhat chu leilung tuamtu boruak tihchhiatna chungchâng ziak tûra tih a ni a. Watchtower Publication Index a en hnu chuan, Awake! magazine-ah thu ṭangkai tak mai a hmu a, chu chu a thu lâk chhuahna a nihzia a essay ziah tâwpah chuan a târ lang a ni. Zirtîrtu chuan essay a chhiar tawh zawng zînga ṭha ber a nih thu a hrilh a. A essay ziah chu a hnua an neih seminar-ah a hmang a, rah ṭha a chhuah a ni. Chuvângin, unaunu chuan zirtîrtu chu Awake! magazine dangte pêk a tum a, chûng zîngah chuan “Zirtîrtute—An Tel Lovin Eng Nge Kan Tih Ang?” tih pawh a tel a ni. Zirtîrtu chuan Awake! magazine chu an class-ah a fak a, zirlai dang ṭhenkhatte chuan neih ve atân an dîl ṭan ta a. Unaunu chuan an chhiar ve theih nân thla danga chhuak magazine tam tak school-ah a keng ta a ni.
Africa khawmual Benin ramah, Kristian tleirâwl pakhat chuan nêksâwrna dangdai tak a tâwk a. An tihṭhin dân angin, school naupang engemaw zât nu leh pate chuan exam dâwn hnaihah subject harsa an tih bîkte atân zirtîrtute an ruai tlâng ṭhîn a ni. Mahse, zirtîrtute chuan Inrinni zîng chu a hrana zirtîr nân an thlang tlat mai a. Thuhretu tleirâwl chuan: “Inrinni zîng hi kohhran pum pui thu hrila kan chhuah nî a ni a. Ka tân chuan chawlhkâr khat chhûnga hun hlimawm ber ka hman hun a nih avângin thil dang eng nên mah ka thleng lo vang!” tiin a hnial a. A pa, pa mal ṭan leh Thuhretu ni bawk chuan a sawi chu pawmin, nu leh pa rualte leh zirtîrtute chu an hun thlâktîr a tum ngial a. Mahse, an vai chuan an pawmsak lo va. Hmeichhe tleirâwltê chuan zirtîrna hranpa lâk belh loh mai chu a titlu ta a. Chu ai chuan a kohhrana mite nên thuhrilhnaah a tel ta zâwk a ni. A pâwlpuite chuan an nuihzat a, thuhrilh bânsan a, a Pathian kalsan bawk tûrin an fuih chiam a. An ngaihah chuan a fail dâwn chiang a ni. Mahse, result hriat a han nih chuan, chu a hrana zirtîrna dawng zirlaite chu an fail a; kan unaunu erawh chu a pass a ni. Sawi kher ngai lovin, an nuihsawhna chu a tâwp a. Tûnah chuan zirlaite chuan, “I Pathian râwng chu i bâwl zêl tûr a ni,” tiin an hrilh tawh zâwk a ni.
Czech Republic rama kum 12 mi hmeichhe naupang chu lehkhabu pakhat chanchin ṭawngkama sawi tûra a inbuatsaih a ngai a. A nu chuan The Greatest Man Who Ever Lived lehkhabu hmang tûrin a fuih a ni. A chanchin sawi chu heti hian a ṭan a: “Eng nge in ngaih dân? Nung dam tawh zînga mi ropui ber chu tunge ni ang?” tiin. Tichuan, Isua leia a nun lai chanchin leh a zirtîrnate chu a sawi a. Tichuan, bung pakhata a thupui “Ngaihdamna Kawnga Zir Tûr Pakhat” tih chanchin chu a sawi a ni. Zirtîrtunu chuan, “I hnên aṭanga ka chanchin dawn tawh zawng zînga ṭha ber a ni!” a ti a, chu lehkhabu chu lâwm takin a dawng a ni. A zirpui ṭhenkhat pawhin an duh ve a. A tûka bu 18 lai han sem chhuah chu a phûr hle a ni.
Chutiang naupangte chuan school-a Jehova fakna kawngah hlimna namên lo an tawng a. Kan zain an tleirâwl lai ṭhahnemngaihna chu kan entawn tûr a ni. (w05 6/15)