Jehova Chu Tih Tak Zeta “Zawngtute Hnena Lâwmman Pêk Hmang A Ni”

“Pathian hnêna lo kal chuanin, ani chu a awm tih leh zawngtute hnêna lâwmman pêk hmang a ni tih rin tûr a ni.”​—⁠HEBRAI 11:⁠6.

1, 2. Jehova chhiahhlawh ṭhenkhatte chuan engvângin nge insitna an neih theih?

“KUM 30 dâwn lai chu Jehova Thuhretu ka lo ni tawh a; mahse, chutianga koh chu phu ka inti ngai thlâwt lo,” tiin Barbara-i chu a inpuang a ni. * “Pioneer-te thawkin leh mawhphurhna dang tam tak nei mah ila, a enga mah hian Thuhretu tia koh phu nia inhriatna min pe thei lo,” a ti. Keith-a chuan chutiang ngaih dân tho chu a sawi chhuak a: “Jehova chhiahhlawhte’n hlimna tûr chhan tam tak nei mah se, ka hlim tlat loh avângin a châng chuan ka phu lo niin ka inhre ṭhîn. Hei hian dinhmun ti zualkai tûr maiin thiam loh inchantîrna a thlen a ni,” a ti.

² Tûn lai leh hmân laia Jehova chhiahhlawh rinawm tam takte chuan hetiang inhriatna hi an do reng a. Hetianga inhriatna hi i do ve ngai em? I rinpuite’n nun an chênin, enghelh nei lo leh hlim taka awm anga an lan laiin, harsatna tam takin a chîmbuai mai thei che a. Chu mi avâng chuan, Jehova pawm tlâk i ni lovin, a ngaihsak tlâk pawh ni lovah i inhre mai thei. Chutiang chu thil awm dân anga ngaiin rang takin thu titlu mai suh. Bible chuan: “Ani [Jehova] chuan hrehawm tuartu hrehawmzia chu a hmusit si lova, a ten hek lo; a hmai chu a lakah a thup hek lo; amah a auhvin a ngaithla zâwk a,” tiin min tiam a ni. (Sâm 22:24) Chûng  Messia chungchânga hrilh lâwkna thute chuan Jehova’n a mi rinawmte a ngaithla mai ni lovin, lâwmman a pe bawk a ni tih a târ lang a ni.

3. Engvângin nge he khawvêl thilte nêksâwrna laka kan him loh?

³ Tumah​—⁠Jehova mite ngei pawh​—⁠hi he khawvêl thilte nêksâwrna lakah hian an him thei lo. Jehova hmêlma lian ber, Diabol-Setana awpna khawvêlah kan awm si a. (2 Korinth 4:​4; 1 Johana 5:19) Mak danglam taka venghim an nih ahnêkin, Jehova chhiahhlawhte chu Setana beih tum berte an ni zâwk mah a ni. (Joba 1:​7-12; Thu Puan 2:10) Chuvângin, Pathian hun ruat a thlen hma loh zawng, Jehova’n min ngaihsak a ni tih ring nghet tlat chunga “hrehawm tuarna kawngah chuan chhel” a, kan “ṭawngṭai fan fan” a ngai a ni. (Rom 12:12) Kan Pathian, Jehova’n min hmangaih lo a ni tih ngaih dân chu kan nei ngai tûr a ni lo!

Chhelna Kawnga Hmân Laia Entawn Tûrte

4. Jehova chhiahhlawh dinhmun lungchhiatthlâk tak tuarte entîrna ṭhenkhat pe rawh.

⁴ Hmân laia Jehova chhiahhlawh tam takte chuan dinhmun lungchhiatthlâk takte an tawrh chhuah a ngai ṭhîn a. Entîr nân, Hani chu fa a neih loh avângin “a rilru a mangang êm êm mai a,” chu chu Pathian theihnghilhna nên intluk rengah a ngai a ni. (1 Samuela 1:​9-11) Elija chu tualthah hmang Lalnu Jezebeli’n a ûm chuan a hlau va, Jehova hnênah: “A tâwk ta e; aw LALPA, tûnah hian ka nunna hi la mai teh, ka pute aiin ka ṭha chuang bîk si lo va,” tiin a ṭawngṭai a ni. (1 Lalte 19:⁠4) Tin, tirhkoh Paula chuan: “Thil ṭha tih ka duh laiin sualna ka hnênah a lo awm ṭhîn a ni,” tia a inpuan khân, a ṭhat famkim lohna chu a manganpui hle ngei ang. “Mi rethei ka va ni tehlul em!,” tiin a sawi belh hial a ni.​—⁠Rom 7:​21-24.

5. (a) Engtin nge Hani te, Elija te, leh Paula te chu malsâwm an nih? (b) Kan lungngaih hunah Pathian Thu aṭangin thlamuanna eng nge kan neih theih?

⁵ Hani te, Elija te, leh Paula te hian an vaiin Jehova rawngbâwlnaah an chhel vek tih kan hria a, Ani chuan nasa takin mal a sâwm a ni. (1 Samuela 1:20; 2:21; 1 Lalte 19:​5-18; 2 Timothea 4:⁠8) Amaherawhchu, mihringte rilru buaina chi hrang hrang, lungngaih manganna, beidawnna, leh hlauhnate chu an tâwk a ni. Chuti a nih chuan, a chânga kan lungngai ṭhîn hi mak kan ti tûr a ni lo. Mahse, damchhûng nun lungkhamnain Jehova hmangaihna che a rinhlelhtîr che chuan, eng nge i tih theih? Pathian Thu aṭangin thlamuanna i hmu thei a ni. Entîr nân,  thuziak hmasaah khân, Jehova’n “in samzaite lam pawh hi chhiar vek a ni” tih thu Isua sawi kha kan sawiho tawh a. (Matthaia 10:30) Chûng mi tichak thei tak thute chuan Jehova’n a chhiahhlawh mi mal tinte nasa takin a ngaihsak tih a târ lang a ni. Isua sawi chawngzawng tehkhin thu pawh kha ngaihtuah lêt bawk teh. Chûng sava te tak tête pawh Jehova hriat lohva leia an tlâk loh chuan, engvângin nge i dinhmun chu a ngaihthah tehlul ang ni?

6. Engtin nge Bible chu mahni insitna dotute tân thlamuanna hnâr a nih theih?

⁶ Keini mihring ṭha famkim lote hi Pathian Jehova, Siamtu thil engkimtithei mithmuhah hian kan hlu thei tak zet em le? Thei tehlul e! Dik takin, kan hlu tih min rin nghehtîrtu Bible châng tam tak a awm a ni. Hêng Bible chângte kan ngaihtuah hian: “Ka rilru ngaihtuah tam tak ka neih lai chuan i thlamuannate chuan ka nunna hi a tihlim ṭhîn,” tia fakna hla phuahtu thusawite hi kan sawi chhâwng ve thei a ni. (Sâm 94:19) Pathian min hlutna leh a duhzâwng kan tih chhunzawm zêl chuan lâwmman min pe ang tih hre thiam lehzual tûra min ṭanpuitu tûr, hêng Pathian Thu aṭanga thlamuanna thu ṭhenkhat chu i lo ngaihtuah ang u.

Jehova “Rochuam”

7. Hnam sualte hnênah Jehova chuan hrilh lâwkna phûrawm tak eng nge Malakia kal tlanga a pêk?

⁷ B.C.E. kum zabi panganaah chuan Judai ram dinhmun chu a chhe hle a ni. Puithiamte chuan inthawina atâna tlâk lo rante chu pawmin, Jehova maichâmah an hlân a. Rorêltute lahin hleih an nei a. Dawi hmanna te, dâwt sawi te, in bumna te, leh uirêna te chu a hluar êm êm mai a ni. (Malakia 1:​8; 2:9; 3:⁠5) He zahpah nei lo lêka tâl bawraw hnam hnênah hian, Malakia chuan thu mak tak a hril lâwk a. Nakinah chuan, Jehova’n a mite chu a pawm leh ang. “Rochuam ka siam nîah chuan ka ta an ni ang, sipaihote LALPA chuan a ti; tin, miin a fapa, a rawngbâwlsaktu chu a zuat angin anni chu ka zuat ang,” tiin kan chhiar a ni.​—⁠Malakia 3:17.

8. Engvângin nge mipui tam takte tân Malakia 3:17 thu bul chu hman theih a nih?

⁸ Malakia hrilh lâwkna chuan tûn lai hian thlarauva hriak thih Kristian, thlarau lam hnam 1,44,000 te chungah thlen famkimna a nei a ni. Chu hnamte chu Jehova tân “rochuam” emaw, “Pathian mite” emaw an ni ngei mai. (1 Petera 2:⁠9) Malakia hrilh lâwkna chu “mipui tam tak . . . puan vâr sina . . . lalṭhutphah hmaah leh Berâm No hmaa ding” te tân pawh a phûrawm hle. (Thu Puan 7:​4, 9) Anni chu hriak thihte nên Berâm Vêngtu pakhat, Isua Krista hnuaiah pâwl khat an lo ni.​—⁠Johana 10:16.

9. Engvângin nge Jehova mite chu atân “rochuam” an nih?

⁹ Engtin nge Jehova’n a rawngbâwl thlangtute chu a thlîr? Malakia 3:​17-a chhinchhiah ang hian, hmangaihna ngah tak pain a fapa a thlîr angin a thlîr a ni. “Rochuam” tia a mite a kohna duhawm tak hi chhinchhiah teh. Ṭawng lehlin dang chuan, chu thu chu “ka ta liau liau,” “ka thil neih hlu ber,” leh “ka lunghlu” ti tein a dah a. Engvângin nge Jehova’n amah betute chu chutiang khawpa a hlut? A chhan pakhatah chuan, Pathian lâwm nachâng hre tak a nih vâng a ni. (Hebrai 6:10) Thinlung taka a rawngbâwltute chu a hnaihin, a ngaihlu êm êm a ni.

10. Engtin nge Jehova’n a mite a vênhim?

¹⁰ Rochuam anga i thlîr thil hlu tak engemaw i nei em? Chu chu vênghim tûrin hma i la lâwm ni? Jehova chuan a “rochuam” chu chutiang bawkin a vênghim a ni. A mite chu nuna hrehawm tawrhna leh chhiatna thleng thei zawng zawng lak aṭangin a hum lo ngei mai a. (Thuhriltu 9:11) Mahse, Jehova chuan a chhiahhlawh rinawmte chu thlarau lamah a hum theiin, a hum ngei bawk ang. Hrehawm tawrhna engpawh tuar chhuak tûra an mamawh chakna chu a pe a ni. (1 Korinth 10:13) Hei vâng hian, Mosia chuan hmân laia Pathian mi, Israelte hnênah: “Chhel tak leh huai takin awm ula, . . . in hnêna kala chu LALPA in Pathian a ni si a; a tithlâwn lo vang che u a, kal pawh a kal san tawp lo vang che u,” tiin a hrilh a ni. (Deuteronomy 31:⁠6) Jehova chuan a mite chu manhla takin a dâwr ṭhîn a ni. A tân chuan “rochuam” an ni si a.

Jehova ‘Lâwmman Petu’ Chu

11, 12. Jehova chu Lâwmman min Petu a nihna hriatthiamna chuan engtin nge keimahni inrinhlelhna kan neihte do lêt tûrin min ṭanpui theih?

¹¹ Jehova’n a chhiahhlawhte a hlutzia fiahna dang leh chu lâwmman a pe ṭhîn hi a ni. Israel  mite hnênah chuan: “Vân tukverhte chu hawnsak che uin malsâwmna dawn sên loh khawp hial ka vûr dâwn che u nge dâwn lo, mi han fiah teh rêng u, sipaihote LALPA chuan a ti,” tiin a hrilh a. (Malakia 3:10) A tâwpah chuan, Jehova chuan a chhiahhlawhte chu chatuana nunna lâwmman a pe ngei ang. (Johana 5:24; Thu Puan 21:⁠4) He lâwmman hlu tak mai hian Jehova hmangaihna leh a thilphalna nasatzia a lai lang a ni. Tin, a rawngbâwl thlangtute a hlut tak zetzia a târ lang bawk. Jehova chu Lâwmman Petu thilphal tak anga thlîr dân zirna chuan Pathian mithmuha kan nihna chungchânga rinhlelhna kan neih engpawh chu do lêt tûrin min ṭanpui thei a ni. Dik takin, Jehova chuan ani chu Lâwmman Petu anga thlîr tûrin min fuih a ni! Paula chuan: “Pathian hnêna lo kal chuanin, ani chu a awm tih leh zawngtute hnêna lâwmman pêk hmang a ni tih rin tûr a ni,” tiin a ziak a ni.​—⁠Hebrai 11:⁠6.

¹² Lâwmman min pêk a tiam vâng ringawt ni lovin amah kan hmangaih avângin Jehova rawngbâwl kan ni ngei mai. Chutichung pawhin, lâwmman beiseina kan thinlunga neih hi thil âwm lo leh mahni hmasialna a ni chuang lo. (Kolossa 3:​23, 24) Jehova chuan amah tih tak zeta zawngtute a hmangaih avâng leh a hlut avângin, hma lain lâwmman a pe ṭhîn a ni.

13. Engvângin nge tlanna pêk chu Jehova min hmangaihzia lantîrna ropui ber a nih?

¹³ Jehova mithmuha mihringte an hlutzia lantîrna ropui ber chu tlanna a siam hi a ni a. Tirhkoh Johana chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin a ziak a ni. (Johana 3:16) Isua Krista tlanna inthawina chuan Jehova mithmuhah hlu lo emaw, hmangaih tlâk lo emaw nia ngaih dân neih engpawh chu a kalh a ni. Dik takin, Jehova’n man to tak​—⁠a Fapa neih chhun​—⁠kan tâna a pêk si chuan, min hmangaih hle tihna a ni ngei ang.

14. Engin nge Paula tlanna thlîr dân târ lang?

¹⁴ Hei vâng hian, insitna i neih chângin, tlanna hi ngun takin ngaihtuah rawh. A ni, he thilpêk hi Jehova hnên aṭanga mi mal thilpêk angin thlîr rawh. Chu chu tirhkoh Paula thlîr dân chu a ni. “Mi rethei ka va ni tehlul êm!,” tia a sawi hi han hre chhuak leh teh. Mahse, a hnuah Paula chuan: “Isua Krista kan Lalpa avângin Pathian hnênah lâwmthu ka sawi a ni,” a ti a; tin, Krista chu “mi hmangaiha ka aia inpetu,” tiin a sawi bawk a ni. (Rom 7:​24, 25; Galatia 2:20) Hetianga a sawi hian, Paula chuan mahni inngaih pawimawh vânga sawi a ni lo. Jehova’n a mi malin a hlut tih a ring nghet mai a ni. Paula angin, nang pawhin tlanna chu Pathian hnên aṭanga mi mal thilpêk angin i thlîr tûr a ni a. Jehova chu Chhandamtu thiltithei tak mai chauh ni lovin, hmangaih taka Lâwmman Petu pawh a ni.

Setana “Ngamthlêmnate” Lakah Invêng Rawh

15-17. (a) Engtin nge Diabola’n mahni insitna dik lo taka a hman? (b) Joba thiltawn aṭangin eng fuihna nge kan dawn theih?

¹⁵ Chutichung pawh chuan, Pathian Thu-a thâwk khum hnemna thute i tân a nih ngei rin chu harsa i la ti tho mai thei a. Pathian khawvêl thara chatuana nunna lâwmman chu mi dangte tân nia ngaiin, nang erawh chuan phu hlawl lovah i inngai mai thei bawk. Hei hi i ngaih dân a nih chuan, eng nge i tih theih?

¹⁶ Ephesi khuaa mite hnêna Paula fuihna thu: “Diabola ngamthlêmnate chu in do zawh nân Pathian râlthuam famkimin inthuam rawh u,” tih kha i hre chiang ngei ang a. (Ephesi 6:11) Setana hmanruate kan ngaihtuah hian, hausak âtchilhna leh nungchang bawlhhlawhnate hi kan rilruah a lo lang vat thei a, chung chu a inâwm hle bawk a ni. Hêng thlêmnate hian hmân lai leh kan hun laia Pathian mi tam takte chu a âwk tawh a ni. Amaherawhchu, Setana ngamthlêmna dang​—⁠Pathian Jehova hmangaih loh nia mite hmin a tumna​—⁠hi kan hmaih tûr a ni lo.

¹⁷ Diabola hi Pathian hawisan tûra mite chutiang ngaih dân neihtîrna kawngah a thiam hle a ni. Joba hnêna Bildada thusawi hi han ngaihtuah lêt teh: “Engtin nge Pathian hmâah mi a fel theih ang le? Engtin nge hmeichhe hrin a thianghlim theih ang? Ngai teh, thla meuh pawh khian ênna a nei nêm, Arsite pawh a mithmuhah chuan an thianghlim lo. Mihring  lek phei chu e, thil lung mai a ni! Mihring fapa chu changpât mai a ni,” tih hi. (Joba 25:​4-6; Johana 8:44) Chûng thute’n mi a tihbeidawn theih dân tûr chu i ngaihtuah phâk em? Tichuan Setana chu intihbeidawntîr hauh suh ang che. Chu aimah chuan, thil dik ti tûra i beih sauh nâna mamawh huaisenna leh chakna i neih theih nân, Setana ngamthlêmnate chu hre zâwk ang che. (2 Korinth 2:11) Joba chungchângah chuan, thunun a ngai chung pawhin, Jehova chuan a hmaa a hloh tâk zawng zawng lêt hnih pe lêt lehin, a chhelna lâwmman a pe a ni.​—⁠Joba 42:10.

Jehova Chu “Kan Rilru Aiin A Ropui Zâwk”

18, 19. Engtin nge Pathian chu “kan rilru aiin a ropui zâwk” a, eng kawngin nge ‘engkim a hriat’?

¹⁸ Lungngaihnain thûk taka zung a kaih tawh chuan thunun tum chu a harsa thei ngei ang le. Mahse, Jehova thlarau chuan ‘Pathian hriatna dâl thil nghet takte’ zawi zawia ṭhiat tûrin a ṭanpui thei che a ni. (2 Korinth 10:​4, 5) Mahni insitnain a chîmbuai dâwna a lan chângin, tirhkoh Johana thu: “Chu miah chuan thutaka mi kan ni tih kan inhria ang a, kan rilruin thiam loh min chantîrna kawngah chuan ama mithmuh ngeiah kan rilru kan thlêm dai bawk ang; Pathian chu kan rilru aiin a ropui zâwk a, engkim a hre si a,” tih hi chhût ngun rawh.​—⁠1 Johana 3:​19, 20.

¹⁹ “Pathian chu kan rilru aiin a ropui zâwk” tih chu eng tihna nge ni? A châng chuan, kan rilruin thiam loh min chantîr thei a, a bîk takin kan ṭhat famkim lohna leh kan tlin lohnate avânga tlâktlai lo nia kan inhriat hian, thiam loh min chantîr zual a ni. A nih loh leh, kan seilen dân avângin kan thiltih engmah hi Jehova pawm tlâk ni lo ang hrima ngaiin, mahni insitna nasa tak kan nei a ni thei. Tirhkoh Johana thu chuan Jehova chu kan insitna aiin a ropui zâwk tih min tiam tlat a ni! Kan thil tihsual piah lam chu hmuin kan nih theih tûrte chu a hria a. Kan rilru sûkthlêk dân leh kan thiltumte pawh a hre vek a ni. Davida chuan: “Kan taksa siam dân hi a hriat a, vaivut mai kan ni tih a hriat reng avângin,” tiin a ziak a ni. (Sâm 103:14) Ni e, Jehova chuan keimahni kan inhriat aia chiangin min hria a ni!

“Mawina Lallukhum” leh “Ropuina Lukhum”

20. Isaia dinthar lehna hrilh lâwkna chuan Jehova’n a chhiahhlawhte a thlîr dân eng nge a laih lan?

²⁰ Zâwlnei Isaia kaltlangin Jehova chuan hmân laia a mite chu dinthar leh beiseina a pe a. Babulon sala an tân lai chuan, he thlamuanna leh tiamnawnna hi nasa taka beidawngte mamawh chiah chu a ni! Anmahni ram ngeia an kîr leh hun tûr chu thlîrin, Jehova chuan: “LALPA kuta mawina lallukhum leh i Pathian kuta ropuina lukhum i ni bawk ang,” tiin a sawi a ni. (Isaia 62:⁠3) He thu hmang hian, Jehova chuan a mite chu chawimawina leh ropuinain a thuam a ni. Tûn laia thlarau lam Israelte chungah pawh chutiang tho chuan a ti a. Hei hi mi zawng zawng ngaihsân atâna a chawimawi ang mai hi a ni.

21. Engtin nge Jehova’n rinawm taka i chhelna lâwmman chu a pe dâwn che tih rin tlatna i neih theih?

²¹ He hrilh lâwkna hi a bul berah hriak thihte chunga a thlen famkim laiin, Jehova’n a rawngbâwltu zawng zawngte chunga chawimawina a pêk chu a entîr a ni. Hei vâng hian, rinhlelhnain a chîmbuai lai hian, ṭha famkim lo mah ni la, Jehova tân “mawina lallukhum” leh “ropuina lukhum” anga hlu i ni thei tih hria ang che. Chuvâng chuan, a duhzâwng tih tak zeta tih tum zêlin a thinlung tihlâwm chu tum zêl ang che. (Thufingte 27:11) Hetianga i tih hian, Jehova chuan rinawm taka i chhelna lâwmman chu a pe dâwn che tih i ring nghet tlat thei a ni! (w05 8/1)

[Footnote]

I La Hria Em?

• Engtin nge Jehova “rochuam” kan nih?

• Engvângin nge Jehova chu Lâwmman Petu anga kan thlîr a pawimawh?

• Setana “ngamthlêmna” engte lakah nge kan invên ngai?

• Eng kawngin nge Pathian chu “kan rilru aiin a ropui zâwk”?

[Zirlai Atâna Zawhnate]

[Phêk 28-naa milem]

Paula

[Phêk 28-naa milem]

Elija

[Phêk 28-naa milem]

Hani