Jehova Chuan “In Samzaite Lam Pawh” A Chhiar Vek

“An [Chawngzawng] zînga pakhat mah in Pa [hriat] lovin leiah a tla lo vang. In samzaite lam pawh hi chhiar vek a ni asin.”​—⁠MATTHAIA 10:​29, 30.

1, 2. (a) Engvângin nge Joba chuan Pathianin a kalsan nia a ngaih? (b) Joba thusawi chuan Jehova a hawisan tihna a ni em? Sawifiah rawh.

“NANG ka au che a, mi chhâng lo va, ka ding a, nangin mi hawi lo. Ka lakah i nun a lo râwng ta a, i kut chakin mi tiduhdah a.” He thusawitu hian hrehawm nasa tak a tawrh avângin hetianga thu a sawi pawh hi a mak lo ve! A thil neih zawng zawng a hloh va, chhiatna mak danglam takah a fate a chân vek a, tûnah natna khirh tak a vei bawk a ni. Chu pa hming chu Joba a ni a, a hrehawm tawrhna nasa tak chu kan hlâwkpui atân Bible-ah chhinchhiah a ni.​—⁠Joba 30:​20, 21.

² Joba ṭawngkam chhuak chu Pathian a hawisan ta emaw tih mai tûr mah ni se, a hawisan hauh lo. A thinlunga a manganna nasa tak a sawi chhuak mai a ni. (Joba 6:​2, 3) Setana chu a hrehawm tawrh chhan a ni tih a hre lo va, chuvângin Pathianin a kalsan ta emaw tiin thutâwp dik lo a siam a. Ṭumkhat phei chu, Joba chuan Jehova hnênah: “Engah nge i hmêl i thupa, i hmêlmaa mi ngaih le?” tiin a zâwt hial a ni. *​—⁠Joba 13:24.

3. Lungngaihna kan tawh hunah, kan rilruah eng nge lo awm thei?

³ Tûn laiah Jehova mi tam takte chuan indona te, politic emaw, vântlâng thil emawa inthlâkthlengnain buaina nasa tak a thlen te, leilung chhiatna te, tarna te, dam lohna te, retheih lutukna te, leh sawrkâr danbehna te avângin harsatna chhum lo chat lovin an tuar a. Nang ngei pawhin hrehawm engemaw tak chu i tuar ve ngei ang. A châng chuan, Jehova chuan i lakah a hmêl a thup nia ngaih châng i nei mai thei bawk. Johana 3:16 thu: “Pathianin khawvêl a hmangaih êm êm a, chutichuan a Fapa mal neih chhun a pe a,” tih hi chu i hre chiang hle a. Chuti chung pawhin, a tihrehna hmuh theih si lohva hrehawm i tawrh hunah: ‘Pathian hian min hmangaih tak tak em? Ka hrehawm tawrh hi a hria em? A mi mal angin min ngaihsak em?’ tiin i ngaihtuah mai thei a ni.

4. Paula chuan eng dinhmun kum hlun nge a tawrh ngai a, chutiang dinhmun chuan eng kawngin nge min nghawng mai theih?

⁴ Tirhkoh Paula chunga thilthleng hi han ngaihtuah teh. Ani chuan: “Tisaah hlîng min pe a ni, Setana tirhkoh kut thak hnawih nâna mi hmangtu tûr chu . . . Mi kiansan theih nân Lalpa chu vawi thum ka dîl a,” tiin a ziak a. Jehova chuan a ngenna chu a ngaithla a. Amaherawhchu, thilmak tihna hmangin a inrawlh dâwn lo tih Paula hnênah chuan a hriattîr a ni. Inrawlh ai mahin, Paula chuan a ‘tisaa hlîng’ awm chu tuar thei tûra ṭanpui tûrin Pathian thiltihtheihnaah a innghah a ngai zâwk dâwn a ni. * (2 Korinth 12:​7-9) Paula angin hrehawmna kum hlun engemaw tak i tuar mai thei a. ‘Ka hrehawm tawrhna chungchângah Jehova’n engmah ti dâwn lo anga a lan hi ka dinhmun a hriat loh vâng emaw, min ngaihsak loh vâng emaw a ni em?,’ tiin i ngaihtuah mai thei. A chhânna chu a ni hauh lo, tih hi a ni! Jehova’n a chhiahhlawh rinawm zawng zawngte a ngaihtuahna nasa tak chu Isua’n a tirhkohte a thlanfel hnu lawka a thusawi hian a sawi uar a ni. A thusawiin tûn laia keini min fuih theih dân i lo en ang u.

 “Hlau Suh U”​—⁠Engvângin Nge?

5, 6. (a) Engtin nge Isua’n tirhkohte chu an hmaa thil lo thleng tûrte hlau lo tûra a ṭanpui? (b) Engtin nge Paula chuan Jehova’n amah a ngaihsakna a rin tlatzia a lantîr?

⁵ Tirhkohte chuan Isua hnên aṭangin ramhuai ‘hnawh chhuah theihna tûra ramhuai bawlhhlawhte chunga thuneihna leh dam lohna tinrêng leh natna tinrêng tihdam theihna tûra thuneihna’ tiamin thiltihtheihna nasa tak an dawng a ni. Mahse, hei hi hrehawm leh harsatnate an tâwk ngai lo vang tihna a ni lo. Chu mi nêna inkalh takin, Isua chuan an chunga thil lo thleng tûr ṭhenkhat chu a sawifiah zâwk a ni. Amaherawhchu, heti hian a fuih a ni: “Taksa tihluma thlarau tihlum thei lotute chu hlau suh ula; Gehena-a thlarau leh taksa tiboral theitu erawh chu hlau zâwk ang che u,” tiin.​—⁠Matthaia 10:​1, 16-22, 28.

⁶ An hlauh a ngaih loh chhan hre thiam tûra a tirhkohte ṭanpui tûrin, Isua chuan tehkhin thu pahnih a pe a. An hnênah: “Chawngzawng pahnih dâr tangka pakhatah an hralh ṭhîn lo vem ni? nimahsela, an zînga pakhat mah in Pa [hriat] lovin leiah a tla lo vang. In samzaite lam pawh hi chhiar vek a ni asin. Chuvângin hlau suh u; chawngzawng tam tak aiin in hlu zâwk a ni,” a ti a ni. (Matthaia 10:​29-31) Isua’n hrehawm tawrh huna hlauh lohna chu Jehova’n a mi mala min ngaihsak tih rin tlatna nên a thlunzawm tih chhinchhiah rawh. Tirhkoh Paula chuan, chutiang rin tlatna chu a nei tih a chiang hle. Heti hian a ziak a ni: “Pathian kan lama a ṭan chuan tuin nge min do thei ang? Ama Fapa ngei pawh zuah lova, kan zaa aia petu chuan thil zawng zawng pawh athlâwnin min pe tel lo vang em ni?,” tiin. (Rom 8:​31, 32) Eng harsatna pawh tâwk mah la, a laka i rinawm chhûng chuan Jehova’n a mi malin a ngaihsak che tih i chiang thei a ni. Isua’n a tirhkohte a fuihna thu ngun zawka kan bih chian hian, Jehova’n a mi malin min ngaihsak tih a chiang lehzual ang.

Chawngzawng Hlutna

7, 8. (a) Isua hun laiin chawngzawngte chu eng anga thlîr nge a nih? (b) Engvângin nge Matthaia 10:29 chuan “chawngzawng” tâna Grik thu mal a tê sawina a hman?

⁷ Isua tehkhin thu sawi chuan Jehova’n A chhiahhlawh tinte a ngaihtuahna chungchâng a sawifiah chiang hle a. Chawngzawng chungchâng hi lo ngaihtuah hmasa teh. Isua hun lai chuan, chawngzawng sa an ei ṭhîn a; mahse, thlai a tihchhiat avângin, buh leh thlai tichhetu anga ngaih a ni tlângpui a. Chawngzawngte chu an tamin an tlâwm hle a, tûn lai pawisa chuan chêng hnih vêlin pahnih lai a lei theih a ni. Chu mi man lêt hnih chuan chawngzawng pali ni lovin, panga a lei theih a​—⁠hlutna rêng nei lo ang maiin sava pakhat chu pêk belh a nih chu!​—⁠Luka 12:⁠6.

⁸ He sava tlânglâwn tak lenzâwng hi han ngaihtuah bawk teh. Sava dang tam takte nêna khaikhin râlah chuan, chawngzawng puitling pawh hi a tê hle a. Chu a chhapah, Matthaia  10:​29-a Grik thu mal “chawngzawng” tia lehlin hi chawngzawng tê tihna a ni zui lehnghâl a ni. Isua chuan a tirhkohte chu sava zînga tê ber leh engmah lo ber ngaihtuah tûrin a duh tih a chiang hle. Hrilhfiahna pakhat chuan, “Isua’n sava te tak tê a târ lan hnuah, chu mia a tê sawina a hmang zui lehnghâl!” tiin a sawi.

9. Isua chawngzawng tehkhin thuin eng thu pawimawh thiltithei tak nge a târ lan?

⁹ Isua chawngzawng tehkhin thu hian thu pawimawh thiltithei tak a târ lang: Mihringte tâna hlutna nei lo anga lang hi Pathian Jehova tân chuan a pawimawh hle a ni, tih hi. Chawngzawng tereuh tê pawh Jehova hriat lohvin “leiah a tla” dâwn lo tiin, Isua chuan he thudik hi a belh chhah a ni. * A zirtîr chu a chiang hle. Jehova’n sava tê ber leh pawimawh lo ber pawh a hriat chuan, amah betu dinhmun harsa tak chu a va han ngaihtuah nasa lehzual dâwn êm!

10. “In samzaite lam pawh hi chhiar vek a ni asin,” tih hian pawimawhna eng nge a neih?

¹⁰ He chawngzawng chungchânga tehkhin thu hi belhchhahin, Isua chuan: “In samzaite lam pawh hi chhiar vek a ni asin,” tiin a sawi a. (Matthaia 10:30) He thu ril tak, tawi tak si hian Isua chawngzawng tehkhin thu sawi tum tak chu tifiah zual a ni. Ngaihtuah teh: Mihring luah hian a tlângpui thuin samzai 1,00,000 vêl a awm ṭhîn a. A tlângpui thuin, kan samzai khat chu a dang nên a inang vek a, samzai pakhattê mah hian a bîka kan hriat a phu hran lo. Mahse, Pathian Jehova chuan kan samzai tinte hi a mal malin a hriaa, a chhiar vek a ni. Hei hi thil awm dân a nih avângin, Jehova hriat theih loh kan nun dân phung a awm thei dâwn em ni le? Jehova chuan a chhiahhlawh tinte siam an nih dân hi a hre chiang hle a ni. Dik takin, ani chuan “thinlung lam a en” a ni.​—⁠1 Samuela 16:⁠7.

11. Engtin nge Davida chuan mi mal taka Jehova ngaihsakna a rin tlatzia a sawi chhuah?

¹¹ Harsatna nasa tak tuartu Davida chuan Jehova’n a hria tih a inhre chiang a ni. “Aw LALPA, nangin ngun takin mi en chhuak a, mi hre ta. Nangin ka ṭhut leh ka din hi i hre ṭhîn a, ka ngaihtuahna hi hla tak aṭang pawhin i hre thiam ṭhîn,” tiin a ziak a. (Sâm 139:​1, 2) Nang pawhin Jehova’n a mi malin a hre bawk che tih i chiang thei a ni. (Jeremia 17:10) Thil zawng zawng hmutu Jehova mitin hmuh hmaih tûr khawpa tê tham lutukah inngai nghâl mai suh!

“Ka Mittuite Hi Savun Pengah Chuan Thun Ang Che”

12. Engtin nge Jehova’n a mite hrehawm tawrhte a hria tih kan hriat theih?

¹² Jehova’n a chhiahhlawhte a mi malin a hriat mai bâkah, mi mal tina an harsatna tawhte pawh a hre vek a ni. Entîr nân, Israel mite chu sala awpbeh an nih khân, Jehova chuan Mosia hnênah: “Aigupta rama ka mi awmte chu an hrehawmzia ka hmu reng asin, anmahni vêngtute avânga an au thâwmte chu ka lo hria a; an lungngaihnate chu ka hre reng si a,” tiin a sawi. (Exodus 3:⁠7) Hrehawm kan tawrh laiin, Jehova’n min hmu a, kan au thâwmte a ngaithla tih hriat chu a va han thlamuanthlâk tak êm! Kan hrehawm tawrhna a ngaihsak tak zet a ni.

13. Jehova’n a chhiahhlawhte a ngaihtuah tak zet tih engin nge lantîr?

¹³ Jehova chuan amah nêna inlaichînna neite a ngaihsakzia chu Israel mite a ngaihtuah dânah hian kan hmuh belh a. An hrehawm tawrhna chu an luhlul vâng ni fo ṭhîn mah se, Isaia chuan Jehova chungchângah: “An manganna zawng zawngah chuan ani chu a mangang ve ṭhîn,” tiin a ziak a ni. (Isaia 63:⁠9) Chuti chu, Jehova chhiahhlawh rinawm i nih angin, hrehawm i tawrh hian, Jehova pawhin a tawrhpui ve che tih i chiang thei a ni. Chu chuan harsatna huaisen taka hmachhawn tûr leh a rawngbâwl zêl tûra i theihtâwp chhuah tûrin a tur che a ni lâwm ni?​—⁠1 Petera 5:​6, 7.

14. Sâm 56 phuah laia dinhmun chu eng nge ni?

¹⁴ Lal Davida’n Jehova ngaihsakna leh ngaihtuahna a rin tlatzia chu tualthah hmang Lal Saula hnên aṭanga a tlân chhiat laia a phuah Sâm 56-ah târ lan a ni. Davida chu Gath-ah a tlân chhia a; mahse, Philistia-hovin an lo hriat chuan an man mai ang tih a hlau va. “Ka hmêlmaten nilêngin mi lem zawh an tum a: chapo taka mi beitute hi an tam si a,” tiin a ziak a ni.  A dinhmun hlauhawm tak avângin, Davida chu Jehova lam a hawi a. “Nilêngin ka thute an la kawi ṭhîn a; an ngaihtuahna zawng zawng chu ka ṭhat lohna tûr lam hlîr a ni,” a ti.​—⁠Sâm 56:​2, 5.

15. (a) Davida’n Jehova hnênah a mittui savun penga thun tûr emaw, lehkhabua ziak tûr emawa a dîl hian, eng a tihna nge ni? (b) Rinna fiahna kan tawrh lai hian, eng nge kan chian theih?

¹⁵ Tichuan, Sâm 56:8-a chhinchhiah angin, Davida chuan thu duhawm tak heti hian a sawi a ni: “Nangin ka vahvaihnate hi i chhinchhiah ṭhîn a: ka mittuite hi i savun pengah chuan thun ang che. I lehkhabuah a chuang hlawm lâwm ni?” tiin. Jehova ngaihsakna sawifiahna rilru khawih tak a va ni êm! Manganna kan tawrh lai hian, mittui tla hialin Jehova kan au mai thei a. Mi ṭha famkim Isua meuh pawhin chutiang chuan a ti a ni. (Hebrai 5:⁠7) Davida chuan Jehova’n amah chu a thlîr reng a, savun penga a mittuite thun ang emaw, lehkhabua ziak ang emaw maiin a hrehawmna a hria ang tih a ring tlat a ni. * I mittui chuan chu savun peng chu a hnawh khat deuh thaw dâwn emaw, chutiang lehkhabu phêk tam tak a awh dâwn emaw niin i ngai mai thei a. Chutiang a nih chuan, thlamuang takin awm ang che. Bible chuan: “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn,” tiin min tiam a ni.​—⁠Sâm 34:18.

Pathian Ṭhian Ṭha Tak Lo Niin

16, 17. (a) Jehova chuan a mite harsatna tawh a ngaihsak tih engtin nge kan hriat? (b) Amah nêna inṭhian ṭhatna nei tûrin Jehova’n eng nge a tih?

¹⁶ Jehova’n ‘kan sam zaite lam pawh’ a chhiar vekna hian kan biak Pathian min ngaihsakna leh min thlîr rengzia tlêm azâwng min hriattîr a ni. Natna leh hrehawm tawrhna zawng zawng bo tûr chuan a thutiam khawvêl thar kan nghah a ngai nachungin, Jehova chuan tûnah ngei pawh hian a mite tân thil mak danglam tak a ti a ni. Davida chuan: “Jehova nêna inṭhian ṭhatna chu amah ṭihtute hnênah a awm a, a thuthlun chu anmahni a hriattîr ang,” tiin a ziak a ni.​—⁠Sâm 25:​14, NW.

¹⁷ “Jehova nêna inṭhian ṭhatna.” Chu chu mihring ṭha famkim lote tân thil theih niin a lang lo tlat! Amaherawhchu, Jehova chuan amah ṭihtute chu a ina thleng tûrin a sâwm a ni. (Sâm 15:​1-5) Eng nge Jehova’n a mikhualte tân a tih? Davida sawi dân chuan ani chuan a thuthlung chu anmahni a hriattîr a ni. Jehova chuan thurûk a hrilh a, a thiltumte leh chûng mila nung tûra an tih ngaite an hriat theih nân zâwlneite hnênah a “thurûk” a hailang a ni.​—⁠Amosa 3:⁠7.

18. Jehova’n amah nêna inlaichînna hnai tak nei tûrin min duh tih engtin nge kan hriat?

¹⁸ Dik takin, keini mihring ṭha famkim lote hi Chungnung Ber, Pathian Jehova ṭhian ṭha kan ni thei hi thil lâwmawm tak a ni a. Chu tak chu ti tûrin min fuih zâwk mah a ni. Bible chuan: “Pathian hnaih rawh u, tichuan anin a hnaih ang che u,” tiin a sawi a ni. (Jakoba 4:⁠8) Jehova chuan amah nêna inlaichînna hnai tak nei tûrin min duh a. A nihna takah chuan, chu inlaichînna kan neih theih nân chuan hma a la der tawh a ni. Isua tlanna inthawina chuan Pathian Engkimtitheia ṭhian nih theihna kawng min hawnsak a ni. Bible chuan: “Amahin min hmangaih hmasak avângin kan hmangaih a ni,” a ti a ni.​—⁠1 Johana 4:19.

19. Engtin nge chhelna hian Jehova nêna kan inlaichînna a tih chak theih?

¹⁹ Dinhmun duhawm lo tak hnuaia kan chhel hian chu inṭhianna hnai tak chu a chak zual a ni. Zirtîr Jakoba chuan: “Engmah tlachham lova in famkim a, in puma in him theih nân chhelna chuan thawk famkim rawh se,” tiin a ziak a. (Jakoba 1:⁠4) Harsatna tawrhna chuan eng nge a ‘thawh’ zawh? Paula “tisaa hlîng” kha ngaihtuah leh teh. A chungchângah hian chhelnain eng nge a tih famkim? “Chutichuan Krista thiltihtheihna chu ka chunga a awm theih nân lâwm êm êmin ka chak lohnate hi ka chhuang tawh zâwk ang. Chuvângin Krista avângin chak lohnaahte, chhiatnaahte, nêksawrnaahte, tihduhdahnaahte, hnawhchêpnaahte ka lâwm ṭhîn a ni; ka chak loh apiangin a ni ka chak ṭhin ni,” tiin Paula chuan a hrehawm tawrhna chungchâng chu a sawi a ni. (1 Korinth 12:​9, 10) Paula thiltawn chu Jehova chuan a ṭûl anga thiltihtheihna​ —⁠a ṭûl phawt chuan ‘thiltihtheihna nasa tak’​—⁠chu a tuar chhuah theih nân a pe ang tih chu a ni. Chu chuan, Krista leh Pathian Jehova a hnaihtîr zual lehchhâwng a ni.​—⁠2 Korinth 4:7; Philippi 4:​11-13.

20. Lungngaihna kan tawnin, engtin nge Jehova’n min chhawmdâwlin, min thlamuan ang tih kan chian theih?

²⁰ Jehova chuan i hrehawm tawrh chu a awm zêl a phal pawh a ni thei a. Chutiang a nih chuan, amah ṭihtute tâna a thutiam chu rilruah vawng reng ang che: “Engtikah mah ka thlahthlam tawp lo vang chia, kal pawh ka kalsan tawp lo vang che,” tih chu. (Hebrai 13:⁠5) Chutiang chhawmdâwlna leh thlamuanna chu i nei thei a ni. Jehova chuan ‘i samzaite lam pawh’ hi a chhiar vek a. I chhelna chu a hmu a. I hrehawm tawrh chu a hria a. A ngaihsak tak zet che a ni. Tin, ani chuan ‘i hnathawh leh a hming chunga hmangaihna i lantîr’ chu a theihhngilh ngai hauh lo vang.​—⁠Hebrai 6:10. (w05 8/1)

[Footnote-te]

I Hre Chhuak Em?

• Engin nge Pathianin a kalsan nia mi chu inngaihtîr thei?

• Isua chawngzawng tehkhin thu leh kan sam zaite chhiar vek a nih dân a sawi aṭangin eng nge kan zir theih?

• Mi mittui Jehova ‘savun penga’ thunna emaw, ‘lehkhabua’ chuantîrna emaw chu eng tihna nge ni?

• “Jehova nêna inṭhian ṭhatna” chu engtin nge kan neih theih ang?

[Zirlai Atâna Zawhnate]

[Phêk 24-naa milem]

Engvângin nge Jehova chuan Paula “tisaa hlîng” chu a lâk bosak loh?