“Nangmahni Ngei In Fiah Ṭhîn Rawh U”
“Nangmahni Ngei In Fiah Ṭhîn Rawh U”
“Rinnaah chuan in awm emaw, nangmahni ngei inchhin ṭhîn ula; nangmahni ngei in fiah ṭhîn rawh u.”—2 KORINTH 13:5.
1, 2. (a) Engtin nge rinna chungchânga hriat chian lohna chuan min nghawng theih? (b) Eng dinhmunin nge kum zabi khatnaa Korinth khuaa mi ṭhenkhat chu kalna tûr lam hre lova awmtîr?
THINGTLANG lama zin mi pakhat chu kawng pêng ṭhuam a va thleng a. A tum ram thlen thei tûr kawng a hriat chian loh avângin, kawnga a tawhte chu a zâwt a; mahse, an thu hrilh chu a inkalh tlat si. A mangang a, kal ngaihna a hre ta lo. Kan rinna chungchânga rinhlelhna neih pawh chuan, chutiang bawkin min nghawng thei a. Chutianga thil hriatchian lohna chuan kan thutlûkna siam tûr a tibuai thei a, kalna tûr lam hre lovin mi awmtîr thei a ni.
2 Kum zabi khatna Grik ram, Korinth khua Kristian kohhran chhûnga mite chungah chutiang bawk nghawng nei thei tûr thil a lo thleng a. “Tirhkoh lian berte” chuan tirhkoh Paula thuneihna chu chovin: “A lehkha thawnte chu a ritin a khauh va, a taksa lam erawh chu a âwm nêm a, a ṭawng pawh a sitawm a ni,” an ti a. (2 Korinth 10:7-12; 11:5, 6) Chutiang thlîr dân chuan Korinth kohhrana ṭhenkhatte chu kalna tûr lam pawh hre chiang lovin a awmtîr mai thei a ni.
3, 4. Korinth mite hnêna Paula fuihna chu engvângin nge kan ngaihven tûr a nih?
3 Paula chuan C.E. 50-a Korinth khua a va tlawh khân, Korinth kohhran chu a din a. Korinth-ah chuan “an zîngah Pathian thu zirtîrin kum khat leh thla ruk a awm” a ni. Dik tak chuan, “mi tam tak pawhin an hria a, an ring ve a, baptisma an chang ta a.” (Tirhkohte 18:5-11) Paula chuan Korinth khuaa a rinpuite thlarau lam ṭhatna tûr chu a vei êm êm a. Chu bâkah, Korinth mite chuan thil engemaw chungchângah Paula thurâwn lâk nân lehkha an thawn bawk a ni. (1 Korinth 7:1) Chuvângin, an hnênah thurâwn ṭha tak a pe a ni.
4 Paula chuan: “Rinnaah chuan in awm emaw, nangmahni ngei inchhin ṭhîn ula; nangmahni ngei in fiah ṭhîn rawh u,” tiin a ziak a. (2 Korinth 13:5) He zilhna an zawmna hian Korinth-a unaute chu an kalna tûr hriat chian lohna ata a vênghim dâwn a ni. Chu chuan tûn laiah pawh chutiang bawkin min vênghim ve thei a ni. A nih chuan, engtin nge Paula thurâwn hi kan zui theih ang? Engtin nge rinnaa kan awm leh awm loh kan inchhin theih ang? Mahni infiahnaah engte nge tel?
“Rinnaah In Awm Emaw, Nangmahni Ngei Inchhin Ṭhîn Ula”
5, 6. Rinnaa kan awm leh awm loh inchhin nân eng tehna nge kan neih a, engvângin nge chu chu tehna ṭha famkim a nih?
5 Thil tihchhinnaah chuan, mi emaw, thil emaw chu chhin a ni ṭhîn a; tin, ṭanchhan emaw, tehna emaw hmanga chhin a ni bawk ṭhîn. He mi chungchângah hian, kan chhin tûr chu rinna—kan pawm thurinte—a ni lo. Keimahni mi mal tinte hi kan chhin tûra chu a ni. Chutianga inchhin tûr chuan, tehna ṭha famkim kan nei a. Davida phuah fakna hla chuan: “LALPA dân chu a ṭha famkim a, nunna a siam ṭha ṭhîn: LALPA thuhriattîr chu a rinawm a, mi mâwl a tifing ṭhîn; LALPA thununna thu chu a dik a, thinlung a tilâwm ṭhîn: LALPA thupêk chu a thianghlim a, mitte a tivâr ṭhîn,” a ti. (Sâm 19:7, 8) Bible-ah chuan Jehova dân ṭha famkimte leh thununna thute a chuang a, a thuhriattîrna chu a rinawmin, a thupêk chu a thianghlim a ni. Chuta awm thute chu inchhin nâna tehna ṭha famkim a ni.
6 Pathian thâwk khum thu chungchângah, tirhkoh Paula chuan: “Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a, thinlunga ngaihtuah leh tumte hi a hre nghâl thei a ni,” a ti. (Hebrai 4:12) Ni e, Pathian thu chuan kan thinlung—chhûng lama kan nihna dik tak chu—a enchhin thei a ni. Engtin nge he thuchah hriam tak leh thiltithei tak hi kan tân kan nuntîr theih ang? Fakna hla phuahtu chuan a hman dân tûr chu chiang takin a târ lang a ni. Heti hian a zai a: ‘A eng a thâwl e . . . Jehova dâna lâwmna nei mi chu,’ tiin. Tichuan: “A dân thu chu achhûn azânin a ngaihtuah ṭhîn,” tiin a zai zawm a ni. (Sâm 1:1, 2) ‘Jehova dân’ chu Pathian Lehkha Thu, Bible-ah hmuh theih a ni a. Jehova Thu chhiar chu nuam kan ti tûr a ni. Ngaihtuah tûrin, a nih loh leh chhût ngun tûrin hun kan insiam tûr a ni a. He mi kan tih hian, Pathian Thu-a thu inziakte’n min chhin chu kan inphal tûr a ni.
7. Rinnaa kan awm leh awm loh inchhin dân kawng bul ber chu eng nge ni?
7 A nih chuan, rinnaa kan awm leh awm loh kan inchhinna bul ber chu Pathian Thu chhiar a, chhût ngun bawka kan thil zirte kan nungchangin a thlâwp dân bih chian hi a ni a. Pathian Thu hre thiam tûra ṭanpuitu tam tak kan neih avângin, kan lâwm hle thei a ni.
8. Engtin nge “bawi rinawm, fing tak” thu leh hla chhuahte chuan rinnaa kan awm leh awm loh inchhin tûra min ṭanpui?
8 Jehova chuan zirtîrna leh kaihhruaina chu Bible chângte hrilhfiahtu, “bawi rinawm, fing tak” thu leh hla chhuahte hmangin a pe a ni. (Matthaia 24:45) Entîr nân, Draw Close to Jehovah * tih lehkhabu bung tâwp apiang deuhthawa bâwm “Questions for Meditation” (Chhût Ngun Tûr Zawhnate) tih chu han ngaihtuah teh. He lehkhabu hmêlhmang hian mi mala ngaihtuahna hun remchâng min va pe tak êm! Kan thu leh hla chhuah, Vênnainsâng leh Awake! chhûnga thuziak tam takte pawhin rinnaa kan awm leh awm loh inchhin tûrin min ṭanpui bawk a ni. Tûn hnai maia chhuak Vênnainsâng-a Thufingte bu ṭanchhan thuziak chungchângah, Kristian unaunu pakhat chuan: “He thuziak hi a chhawr tlâk hlein ka hria. Ka ṭawngkam chhuak, ka nungchang, leh ka rilru put hmangte hian Jehova tehna felte a mil leh mil loh inenfaih tûrin min ṭanpui tak zet a ni,” a ti.
9, 10. Rinnaa kan awm leh awm loh inchhin reng tûra min ṭanpui tûrin Jehova’n eng ruahmannate nge a siam?
9 Kohhran inkhâwmahte leh inkhâwmpuiahte chuan kaihhruaina leh fuihna tam tak kan dawng bawk a. Hêng hi Isaia hrilh lâwknain a sawiate tâna Pathian buatsaih thlarau lam chawte zînga mi a ni. Isaia chuan: “Ni hnuhnûngahte chuan heti hi a ni ang a, LALPA in awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan hnam tinrêngte chu an kal nguah nguah ang. Tin chi tam takte chu an kal ang a, ‘Lo haw ula, LALPA tlângah, . . . i chho vang u; tichuan ani’n a kawng chanchinte chu min zirtîr ang a, a kalkawngahte chuan kan kal ang,’” tiin a hrilh lâwk a ni. (Isaia 2:2, 3) Jehova kawngte chungchâng chutiang zirtîrna dawn chu malsâwmna a ni tak zet a ni.
10 Upate pawh tiamin, thlarau lama puitlingte thurâwn chu kan inchhin dân tûr kawng dang a ni. Anni chungchângah, Bible chuan: “Unaute u, mi, sual engpawh a tih lai phâwkin awm sela, nangni thlarau mite u, ‘Thlêmna ka tâwk ve dah ang e,’ tia invêng ṭha chungin chutiang mi chu thuhnuairawlh takin tungding leh rawh u,” tih a sawi a. (Galatia 6:1) Min tungding tûra he ṭanpuina a awm avâng hian kan va lâwm tak êm!
11. Rinnaa kan awm leh awm loh inchhin nân eng nge ngai?
11 Kan thu leh hla chhuahte, Kristian inkhâwmte, leh upate hi Jehova hnên aṭanga thilpêk ropui takte an ni. Mahse, rinnaa kan awm leh awm loh inchhin tûr chuan, mahni kan inenfiah a ngai a. Chuvângin kan thu leh hla chhuahte kan chhiar hunah emaw, Pathian Lehkha Thu fuihnate kan ngaihthlâk hunah emaw, mahni heti hian kan inzawh a ngai a ni: ‘Hêng hi keima tân a ni em? Chu chu ka ti em? Kristian thurin pumhlûm chu ka vuan tlat em?’ tiin. Hêng châwmnate hmanga kan dawn thu hriattîrnate chunga kan rilru put hmang pawhin kan thlarau lam dinhmun chu a thunun a ni. Bible chuan: “Khawvêl mi chuan Pathian thlarau lam thilte chu a lâwm ṭhîn lo, ani ngaih chuan âtthlâk a ni si a . . . Thlarau mi erawh chuan thil engkim a hre fiah [“bih chiang,” New World Translation] ṭhîn,” a ti. (1 Korinth 2:14, 15) Kan lehkhabute, magazine-te, leh kan thu leh hla chhuah danga kan chhiarte, kan inkhâwmnate leh upate hnên aṭanga kan thu hriatte chunga thlarau lam thlîr dân kan neih leh chûng avânga kan lâwmna chu vawn reng kan tum tûr a ni lâwm ni?
“Nangmahni Ngei In Fiah Ṭhîn Rawh U”
12. Mahni ngei infiahnaah engte nge tel?
12 Mahni ngei infiah ṭhinnaah chuan, mahni inchhûtna a tel a. Ni e, thutakah kan awm a ni thei a; mahse, eng ang chenin nge thutak mila kan nun? Kan nihna infiahnaah chuan, kan puitlinzia leh thlarau lam châwmna kan hlut tak zetzia târ lanna a tel a ni.
13. Hebrai 5:14 sawi angin, engin nge kan puitlinna lantîr?
13 Keimahniah Kristian puitlinna târ lanna eng nge hmuh kan tum ang? Tirhkoh Paula chuan: “Chaw rum erawh chu puitlingte tân a ni, chûngte chuan an hman fo avângin chhia leh ṭha fiah tûrin an hriat theihnate chu an sawizawi tawh,” tiin a ziak a. (Hebrai 5:14) Kan hriat theihnate sawizawina hmangin kan puitlinna chu kan lantîr a ni. Insawizawi mi chuan intihsiaknaa ṭha taka a tih theih nân, a taksaa tihrâwlte chu hman ziahna hmanga a sawizawi ang chiahin, kan hriat theihnate chu Bible thu bulte nunpuina hmangin kan sawizawi tûr a ni.
14, 15. Engvângin nge Pathian Thua thurilte zir tûrin taihmâk kan chhuah ang?
14 Mahse, kan hriat theihnate kan sawizawi hmain, hriatna kan nei hmasa tûr a ni. Chu mi atân chuan, taima taka inzir a ngai a. Mahnia inzirna—a bîk takin, Pathian Thu, thuril tak takte—chungchâng kan zir ziah hian, kan hriat theihnate chuan hma a sâwn a ni. Kum kal tawhahte khân, thuril tam tak chu Vênnainsâng-ah sawiho a ni tawh a. Thutak ril takte sawina thuziak kan hmuh hunah engtin nge kan chhân lêt? Chûngah chuan “thu hriat har takte” a awm avâng maiin pumpelh kan duh em? (2 Petera 3:16) A thute chu hre thiam tûrin ṭan kan khawh lehzual zâwk a ni.—Ephesi 3:14-19.
15 Mahnia inzirna neih chu a harsat chuan engtin nge ni ang? Zirna chu nuam tih emaw, hlimpui emaw tum chu a pawimawh a. * (1 Petera 2:2) Puitlin lam pana ṭhang chho tûr chuan Pathian Thua thuril, chawrum nêna inchâwm dân kan zir a ngai a ni. Chutilochuan, hriat theihna tlêm tê chauh kan nei ang. Mahse, puitlinzia târ lannaah chuan hriat theihna neih mai aia tam a tel a. Taima taka mahni inzirna hmanga kan neih hriatna chu kan nî tin nuna kan hman a ngai a ni.
16, 17. ‘Thu zâwmtute’ nih chungchângah tirhkoh Jakoba’n eng fuihna nge a pêk?
16 Mahni infiahna chu thutak hlutna kan lantîrna—kan rinna thiltihah pawh a hmuh theih bawk. He mi kawnga mahni inchhûtna târ lan nân, tirhkoh Jakoba chuan tehkhin thu thiltithei tak hmangin: “Thu ngaithlatute mai ni lovin zâwmtute lo ni zâwk rawh u, chutilochu mahni inbum in lo ni dah ang e. Tupawh thu ngaithlatu nia zâwmtu ni si lo chu mi, dârthlalanga a pianpui hmai ngun taka inen ang chu a ni, a kal bo va, mi eng ang nge a nih a intheihnghilh nghâl si ṭhîn. Amaherawhchu tupawh dân famkim, zalênna dân hi bih a, chutianga awm reng a, ngaithla a, theihnghilh leh mai ṭhîntu ni lo va, zâwma hna thawk fo ṭhîntu ni zâwk chu, chu mi chu a thil tihah malsâwmin a awm ang,” a ti.—Jakoba 1:22-25.
17 Jakoba chuan: ‘Pathian thu dârthlalang chu bihin, mahni inchhût rawh. Hei hi ti hrâm hrâm la, Pathian thua i hmuh thilte hmangin mahni in enfiah ang che. Tichuan, i thil hmuh chu theihnghilh nghâl mai suh. Insiam ṭhat ngai apiang siam ṭha rawh,’ a tihna a ni. Mahse, he thurâwn zawm hi a châng chuan a harsa mai thei.
18. Engvângin nge Jakoba thurâwn zuina chuan harsatna a thlen?
18 Lalram thuhrilhnaa tel a ngaihna hi entîr nân han hmang ta i la. “Miten thinlungin an ring a, felna an hmu ṭhîn a, kain an ṭan a, chhandamna an hmu bawk ṭhîn,” tiin Paula chuan a ziak a ni. (Rom 10:10) Chhandamna hmu tûra kan kaa ṭan tûr chuan, insiamremna neih nual a ngai a. Kan zîngah hian thuhrilhnaa tel awlsam ti kan awm mang lo va. Thuhriltu taima tak ni tûr leh kan nuna a phu ang ngeia dah pawimawh tûr chuan, insiamremna leh inpêkna nasa lehzual a ngai a ni. (Matthaia 6:33) Mahse, he Pathian pêk hna thawktu kan nih tawh chuan, chu chuan Jehova fakna a thlen avângin kan hlim a ni. A nih chuan, Lalram puang chhuaktu taima tak kan ni em?
19. Kan rinna thiltihah hian eng nge tel ang?
19 Kan rinna thiltihte chuan eng ang chenin nge a huap zau vang? Paula chuan: “In thil zir te, in thil pawm te, in thil hriat te, keimaha in thil hmuh te pawh kha, khâng ang kha ti ṭhîn ang che u; tichuan thlamuanna Pathian chuan a awmpui ang che u,” a ti a. (Philippi 4:9) Kan nihna chu kan thil zirte, kan thil pawm te, kan thil hriat te, leh kan thil hmuh te—Kristian inpumpêkna leh zirtîr nihna zawng zawng—nunpuina hmanga târ lan a ni. Jehova chuan: “Hei hi kawng a nih hi, tah hian kal rawh u,” tiin zâwlnei Isaia hmangin a zirtîr a ni.—Isaia 30:21.
20. Eng ang mite nge kohhran tân malsâwmna nasa tak ni?
20 Pathian Thu taima taka zir a, chanchin ṭha ṭhahnemngai taka hril a, sawisêl bova rinawmna vawng a, rinawm taka Lalram thlâwptu a hmei a pate chu kohhran tân malsâwmna ropui tak an ni a, an lawina kohhran chu an tinghet a ni. A bîk takin, mi thar tam tak ngaihsak tûr an awm avângin, an ṭangkai hle. Paula thurâwn zâwma ‘rinnaah chuan kan awm emaw, keimahni ngei inchhin ṭhînin, keimahni ngei kan in fiah ṭhin’ hunah chuan mi dang chungah nghawng ṭha kan nei ve dâwn a ni.
Pathian Duhzâwng Tihnaah Lâwm Rawh
21, 22. Engtin nge Pathian duhzâwng tih chu kan lâwmzâwng tak kan nihtîr theih?
21 Hmân lai Israel Lal Davida chuan: “Aw ka Pathian, i duhzâwng tih hi ka lâwmzâwng tak a ni; a ni, i dân thu chu ka thinlungah a awm reng e,” tiin a zai a. (Sâm 40:8) Davida chuan Pathian duhzâwng tih chu nuam a ti a ni. Engvângin nge? Jehova dân chu a thinlunga a awm vâng a ni. Davida chu a kalna tûr kawngah chuan a chiang hle a ni.
22 Pathian dân kan thinlunga a awm hian, kalna tûr kawng hre chiang lovin kan awm lo va. Pathian duhzâwng tih chu kan lâwmzâwng a lo ni. Chuti chu, thinlung taka Jehova rawngbâwl chu ‘i tum hrâm’ ang u.—Luka 13:24. (w05 7/15)
[Footnote-te]
^ par. 8 Jehova Thuhretute chhuah a ni.
^ par. 15 Zirna neih dân tûr rawtna ṭangkai tak atân, Jehova Thuhretute chhuah, Benefit From Theocratic Ministry School Education bu phêk 27-32 en rawh.
I Hre Chhuak Em?
• Rinnaa kan awm leh awm loh engtin nge kan chhin theih?
• Kan nihna infiahnaah eng nge tel?
• Kan Kristian puitlinna lantîr nân eng finfiahna nge kan pêk theih?
• Engtin nge kan rinna thiltihte chuan kan nihna chhût tûra min ṭanpui?
[Zirlai Atâna Zawhnate]
[Phêk 15-naa milem]
Rinnaa i awm leh awm loh inchhin dân bul ber chu i hria em?
[Phêk 16-naa milem]
Hriat theihna hmangin, kan Kristian puitlinna chu kan lantîr
[Phêk 17-naa milem]
‘Ngaithla a, theihnghilh leh mai ṭhîntu ni lo va, zâwma hna thawk fo ṭhîntu nih zâwkna’ hmangin kan nihna kan târ lang