Zinkawng Thui Chu Hlâwkpui A Ni

DEMOCRATIC Republic of Congo aṭanga report dawnin a târ lan dân chuan, pianpui unaunu pahnihte chu Lisala khuaa “Pathian Chawimawi Rawh” District Inkhâwmpuia tel tûrin, râl ram kal tlang zin kawng thui taka zin chu an rêl thlu a. Inkhâwmpuinaa thlarau lam zirtîrna leh Kristian inkawmna neih an inbeisei bâkah, Kinshasa rama Jehova Thuhretute branch office aṭanga palai lo kalte hmuh chu an nghâkhlel hle a ni. Ram chhûnga tualchhûng indona avângin, branch office-a mite chu kum tam tak chhûng an hmu thawh lo va, he hun hi remchânga lâk an duh a ni.

Taikuang lawng nêna zinin, unaunu pahnihte chu luipui pahnih zawhin leh ram ngaw kal pêlin, an chênna khua Basankusu aṭanga mêl 200 vêla hla Lisala-ah an zin a ni. An tum ram thlen nân kawng lakaah chawlhkâr thum an thang a ngai a. An pahnihin kum 3 leh kum 19 chhûng hunbi kima rawngbâwltu an nih avângin, he zin kawng hi Ram chanchin ṭha thehdarh nân remchângah an hmang a ni. Kawnga an tawhte hnêna thuhrilh nân dârkâr 110 an hmang a, tract 200 leh magazine 30 an sem chhuak a ni.

Lui dungah chuan, chu mi hmuna awm ṭhîn tui vawk leh awlê kâra lawnga an zin a ngai a. Anni chu lui dungah zânah an zin thei lo​—⁠chutiang hmuna thim hnua zin chu a hlauhawm avângin! Tin, kawngah chuan sipaiin an lo enfiahna hmun tam tak an pal tlang a ngai bawk a ni.

He zin kawng hi a thuiin, hahthlâk hle mah se, unaunu pahnihte chuan hah an inhuam a ni. An pahnih chuan Lisala khuaa inkhâwmpui an hman theih avângin an lâwmin, an hlim hle a. An thinlung chu thutak avângin a phûr hle a, chuta tel unau 7,000-te nêna an inkawmna chuan a tichak a ni. Inkhâwmpui zawhah chuan, an haw kawngah harsatna ngai bawk pal tlang lehin, an chhûngte nên him takin an inhmu leh a ni. (w05 8/1)